Kjennen de ieeschte Lieren ut de Schreft die noch togood komen?

1. Waut deed daut aun die, aus du de ieeschte Lieren ut de Schreft vestonen kust?

DE IEESCHTE Lieren ut de Bibel haben ons Läwen jeendat. Biejlikj aus wie lieeden, daut Gott sien Nomen Jehowa wia, fung wie aun, met am Frind to woaren (Jes. 42:​8, NW). Aus wie lieeden, woo daut met de Vestorwne wia, muak wie ons nich lenja Sorjen doaräwa, aus onse leewe Vestorwne wua lieden musten (Liera 9:10). Un aus wie lieeden, daut Gott vesproaken haud, de Ieed to een Paradies to moaken, muak wie ons nich mea Sorjen doaräwa, woo daut lota sennen wudd. Wie wieren ons secha, daut wie nich bloos fa een Stootskje läwen wudden – biejlikj 70 ooda 80 Joa –, oba fa eewich (Psa. 37:29; 90:10).

2. Woo wiest 2. Petrus 1:​12-13, daut de ieeschte Lieren ut de Bibel mau rajcht riepe Christen togood komen kjennen?

² Wie motten kjeenmol vejäten, woo wichtich de ieeschte Lieren ut de Bibel sent. See wie mol daut Biespel von de Christen, aun dee Petrus sienen tweeden Breef schreef. Dee wieren “aul gaunz faust” enne Woarheit (läs 2. Petrus 1:​12-13). Oba nu wieren doa faulsche Lierasch un gottloose Mana en de Vesaumlunk, waut de Breeda un Sestren von de Woarheit aufbrinjen wullen (2. Pet. 2:​1-3). Petrus wull dise Breeda un Sestren Moot toospräakjen, daut see sikj von dise Läajes wajchhoolen sullen. Doawäajen holp hee dee aun eenje Lieren denkjen, waut see aul wisten. Dit wudd äant halpen, bat aum Enj tru to bliewen.

3. Wuarom sellen aule Christen doa wieda äwa nodenkjen, waut dee daut ieeschte jelieet haben? Met waut jeit daut to vejlikjen?

³ Je riepa wie em Jeisteljen woaren, je bäta lia wie, woo de ieeschte Lieren ut de Schreft ons kjennen togood komen. Mol een Biespel: Eene Mame un äare Dochta brucken veleicht deeselwje Sachen toom eene Moltiet moaken. Oba met de Tiet haft de Mame jelieet, deeselwje Sachen noch opp aundre Wäaj to brucken, om veschiedne aundre Moltieden to moaken, waut sea scheen schmakjen. Krakjt soo es daut uk met eenen, waut Jehowa aul lang deent, un met eenen, waut noch mol korz aunjefongen haft, de Bibel to studieren. Dee kjikjen veschieden aun de ieeschte Lieren naun. Wuarom? Wiels onse Omstend sikj no de Doop veleicht jeendat haben ooda wie veleicht mea Väarajchten jekjräajen haben. Wan wie äwa de ieeschte Lieren ut de Schreft nodenkjen, waut wie ea mol jelieet haben, dan lia wie veleicht noch wada niee Sachen, waut ons en onse Loag nu halpen kjennen. Well wie mol seenen, waut een riepa Christ noch lieren kaun von dreeatlei, waut hee daut ieeschte jelieet haft.

JEHOWA ES DE SCHEPFA

4. Waut haft daut aun ons jedonen to weeten, daut Jehowa de Schepfa es?

⁴ “Dee, waut aules jemoakt haft, es Gott” (Heb. 3:4). Wie weeten, daut een weisa un majchtja Schepfa dän Ieedbaul un aules, waut doa bowen es, jemoakt haft. Hee haft ons Menschen jemoakt un weet aules äwa ons. Hee es uk om ons bekjemmat un wenscht sikj emma daut Baste fa ons. Dise leichte Lia to vestonen, aulsoo daut Jehowa de Schepfa es, haft väl aun ons jedonen un haft ons Läwen eenen Senn jejäft.

5. Woo halpt ons daut to weeten, daut Jehowa de Schepfa es? (Jesaja 45:​9-12).

⁵ De Lia, daut Jehowa de Schepfa es, kaun ons halpen, deemootich to sennen. Biejlikj säd Hiob mol eenjet äwa Jehowa, waut nich soo wia, un hee proowd bloos to bewiesen, daut hee em Rajchten wia. Oba Jehowa holp Hiob doaraun denkjen, daut hee de aulmajchtja Schepfa wia (Hiob 38:​1-4). Doaderch kunn Hiob vestonen, daut aules, waut Jehowa deit, emma rajcht es. Doatoo säd de Profeet Jesaja väl Joaren lota: “Frajcht de Leem dän Toppstrikja, waut hee moakt”? (Läs Jesaja 45:​9-12.)

6. Wanea sell wie doa deep äwa nodenkjen, woo weis un majchtich ons Schepfa es? (See uk de Bilda.)

⁶ Wan een Christ ieescht mea Erfoarunk haft, dan kaun dee veleicht aunfangen, dolla opp siene ieejne Iedeeen to vetruen, enne Städ en Jehowa sien Wuat no Aunleidunk to sieekjen (Hiob 37:​23-24, NW). Woo wudd dän daut halpen, doa deep äwa notodenkjen, daut sien Schepfa sea weis un majchtich es? (Jes. 40:22; 55:​8-9). Dise wichtje Lia kaun am halpen to vestonen, daut Jehowa siene Jedanken sea väl hecha sent aus siene ieejne, un opp dise Wajch kaun hee uk deemootich bliewen.

7. Waut holp Rahela, eene Endrunk auntonämen?

⁷ Doaräwa notodenkjen, daut Jehowa de Schepfa es, holp Rahela, waut en Sloweenien wont, daut auntonämen, daut sikj en de Organisazion waut endad. See sajcht: “Eenjemol es mie daut nich gaunz leicht jewast, eenje Entscheidungen auntonämen von deejanje, waut de Leidunk haben. Biejlikj späad sikj mie daut grulich sea fonnich, aus ekj daut ieeschte Mol eenen Brooda met eenen Boat sach eene Räd hoolen, wan ekj uk aul dän 8. Berecht von dän Väastaunt – 2023 jekjikjt haud. Doawäajen bäd ekj to Jehowa, daut hee mie halpen sull, dise Endrunk auntonämen.” Rahela kunn vestonen, daut dee, waut Himmel un Ieed jemoakt haft, siene Organisazion emma daut baste Leiden kaun. Wan die daut mol schwoa felt, een nieet Vestentnis ooda eene niee Aunwiesunk auntonämen, wuarom wurscht doa dan nich mol deep äwa nodenkjen, woo weis un majchtich ons Schepfa es? (Reem. 11:​33-36).

WUAROM GOTT DAUT LIEDEN TOOLAT

8. Woo kjemt ons daut togood to weeten, wuarom Gott daut Lieden toolat?

⁸ Wuarom lat Gott daut Lieden too? Eenje, waut de Auntwuat opp dise Froag nich weeten, sent doll jeworden äwa Gott ooda denkjen, daut et am nich mol jeft! (Spr. 19:3). Oba du hast jelieet, daut de Menschen lieden un stoawen motten, wäajen de metjeorwne Sind un de Onvolkomenheit un nich, wiels Jehowa daut veuasoakt. Du hast uk jelieet, daut wäajen Jehowa soo jeduldich met de Menschen es, haben aul väle kunt am kjanen lieren un vestonen, woo hee met aul daut Lieden fa emma een Enj moaken woat (2. Pet. 3:​9, 15). Dise Lieren jäwen ons Troost un brinjen ons Jehowa noch noda.

9. En waut vonne Tieden sell wie doaräwa nodenkjen, wuarom Jehowa daut Lieden toolat?

⁹ Wie weeten, daut wie motten jeduldich luaren, bat Jehowa met aul daut Lieden een Enj moakt. Oba wan wie selfst ooda wäa von de Famielje waut Schlemmet beläft, ojjerajcht behaundelt woat ooda wäm em Doot velist, wunda wie veleicht, wuarom Jehowa nich bosich waut doamet deit (Hab. 1:​2-3). En soone Tieden es daut goot, doaräwa notodenkjen, wuarom Jehowa daut toolat, daut de Jerajchte lieden motten (Psa. 34:20).a Wie kjennen uk äwa sien Väanämen nodenkjen, daut hee met daut Lieden fa emma een Enj moaken woat.

10. Waut jeef Anne Troost, aus äare Mutta jestorwen wia?

¹⁰ Daut to weeten, wuarom Gott daut Lieden toolat, kaun ons halpen uttohoolen. Anne, waut opp de Insel Mayotte wont, sajcht: “Aus miene Mutta een poa Joa trigj storf, wia ekj sea truarich. Oba ekj docht doa emma wada aun, daut daut Lieden nich Jehowa siene Schult es. Hee well jieren met aul daut Lieden een Enj moaken un onse leewe Vestorwne wada oppwakjen. Äwa dise Lieren notodenkjen, jeft mie soonen grooten Fräd, waut ekj kjeenmol jedocht haud.”

11. Waut sent eenje Uasoaken, wuarom Gott daut Lieden toolat; un woo halpt ons dit, wieda to prädjen?

¹¹ Daut to weeten, wuarom Gott daut Lieden toolat, kaun ons bat doa brinjen, wieda to prädjen. Petrus säd, daut Jehowa jeduldich es, wäajen hee well, daut de Menschen een Leetsennen kjrieen un jerat woaren. Doahinja schreef hee dan: “Denkjt doaräwa no, waut fa Menschen jie sellen sennen. June Woakjen un jun Vehoolen saul heilich sennen un wiesen, daut jie Gott tru deenen” (2. Pet. 3:11). Om “Gott tru to deenen”, mott wie biejlikj prädjen gonen. Krakjt soo aus ons himlischa Voda leew wie uk de Menschen un wellen, daut dee en Gott siene jerajchte niee Welt läwen kjennen. Jehowa es jeduldich un jeft de Menschen en diene Jäajent de Jeläajenheit, am to deenen. Es daut nich een Väarajcht, daut wie kjennen Gott siene Metoabeida sennen un soo väl Menschen aus mäajlich halpen, am kjanen to lieren, ea daut Enj kjemt? (1. Kor. 3:9).

WIE LÄWEN EN “DE LATSTE DOAG”

12. Waut wiest, daut Gott sien Wuat gaunz opp to veloten es?

¹² De Bibel sajcht krakjt, woo de Menschen en “de latste Doag” sennen woaren (2. Tim. 3:​1-5). Wie brucken ons bloos romkjikjen, dan see wie aul, daut dise Profezeiunk sikj erfelt. Wie seenen, daut de Menschen äare Enstalunk un Vehoolen emma schlemma woat. Doaderch hab wie de Sechaheit, daut Gott sien Wuat gaunz opp to veloten es (2. Tim. 3:​13-15).

13. Woo kaun Jesus sien Jlikjnis en Lukas 12:​15-21 ons halpen?

¹³ Wäajen wie weeten, daut wie en de latste Doag läwen, well wie de Tiet daut baste utnutzen. See wie mol, waut wie von daut Jlikjnis lieren kjennen, waut Jesus en Lukas 12:​15-21 vetald (läs). Wuarom wort disen rikjen Maun “du Onkluaka” jenant? Daut wia nich, wiels dee rikj wia, oba wiels dee no daut Orrajchte ut wia. Dee deed “fa sikj selfst wieetvolle Sachen saumlen, oba [wia] fa Gott to beseenen nich rikj”. Daut dee siene Tiet orrajcht brucken deed, wia een groota Fäla, wiels dee wudd aul nich lang läwen. Gott säd to dän Maun: “Dise Nacht woaren se die daut Läwen nämen”. Woo kaun dise Jeschicht ons vondoag dän Dach halpen? Daut woat aul nich mea lang dieren, dan woat daut Enj von dise Welt komen. Doawäajen kjenn wie mol äwa dise Froagen nodenkjen: “Wiest daut, waut ekj mie väajenomen hab, daut ekj de Tiet utnutzen doo? Waut rod ekj miene Kjinja too, waut dee sikj väanämen sellen? Bruck ekj miene Krauft, Tiet un Jelt toom mie een deel Sach aungonen ooda toom em Himmel Wieetvollet saumlen?”

14. Wuarom es daut wichtich, doaräwa notodenkjen, daut wie en de latste Doag läwen? Jeff een Biespel.

¹⁴ Wan wie äwa dän Bewies nodenkjen, daut wie en de latste Doag läwen, halpt ons daut, aun daut Läwen gaunz aundasch nauntokjikjen. Dauts krakjt, woo daut bie eene Sesta wia, waut Miki heet. See sajcht: “Aus ekj met de School derch wia, jankad mie daut sea, een Tierenforscha to woaren. Ekj haud mie oba uk väajenomen, Pionia to woaren un doa to deenen, wua daut aun mea Help fäld. Erfoarne Frind säden, daut ekj mol doaräwa nodenkjen sull, aus ekj werkjlich wudd miene jeistelje Zielen nokomen kjennen, wan ekj mie wudd utlieren loten. Dee holpen mie uk doaraun denkjen, daut daut Enj von dise Welt boolt komen wudd un daut ekj en de niee Welt de gaunze Eewichkjeit haben wudd, mea äwa aul de Tieren to lieren, waut ekj jleich. Doawäajen word ekj mie eenich, mie eene paussende Oabeit to lieren, wua ekj nich wudd brucken soo lang no de School gonen. Doaderch kunn ekj eene Oabeit finjen, waut mie fa dän Pioniadeenst holp, un kunn lota no Ekuador trakjen, wua daut aun mea Vekjindja fäld.” Miki un äa Maun sent nu em Kjreisdeenst en dit Launt.

15. Woo wiest Jakobus sien Biespel, daut wie nich oppjäwen sellen, wan de Menschen uk nich no de goode Norecht horchen wellen? Jeff een Biespel. (See uk de Bilda.)

¹⁵ Wie sellen nich mootloos woaren, wan de Menschen uk nich no de goode Norecht horchen, wiels dee kjennen sikj noch endren. See wie mol daut Biespel von Jakobus, Jesus sien Haulfbrooda. Hee sach daut, woo Jesus oppwoss, de Messias wort un aundre soo lieren kunn, aus noch kjeen aundra jelieet haud. Oba fa Joaren wort hee nich eent von Jesus siene Nofolja. Bloos nodäm daut Jesus vom Doot oppjestonen wia, wort Jakobus een flietja Jinja! (Joh. 7:5; Gal. 2:9).b Dauts wichtich, daut wie met ons Frintschoft nich oppjäwen, waut bat nu bewäsen haben, daut dee nich fa de Woarheit intressieet sent. Wie sellen uk nich opphieren, no soone to gonen, waut ea nich no de Woarheit horchen wullen. Denkj doaraun, daut wie en de latste Doag läwen un daut daut Prädjen wichtich es. Waut du nu to dee sajchst, kaun lota waut aun dee doonen – mau rajcht nodäm de groote Liedenstiet aunjefongen haft.c

BLIEW DANKBOA FA DE IEESCHTE LIEREN UT DE SCHREFT

16. Woo kjennen de ieeschte Lieren ut de Bibel die togood komen? (See uk daut Hock “Bruck daut toom aundre halpen”.)

¹⁶ Daut jeistelje Äten, waut de Organisazion reedmoakt, es eenjemol fa soone jedocht, waut nich mol de ieeschte Lieren ut de Schreft kjanen. Biejlikj de Räd fa aulemaun, eenje Artikjels un Videos opp jw.org un de Tietschreften fa aulemaun sent hauptsechlich fa soone jedocht, waut nich Jehowa siene Zeijen sent. Oba wie kjennen aula eenen Nutzen von de ieeschte Lieren haben. Dee halpen ons, eene jratre Leew fa Jehowa to kjrieen, dee stoakjen onsen Gloowen aun sien Wuat un dee halpen ons, ons doarenn to vebätren, aundre de Woarheit ut de Schreft to lieren (Psa. 19:8).

17. En woone Loagen wudd wie sellen äwa de ieeschte Lieren ut de Bibel nodenkjen?

¹⁷ Soone, waut aul fa Joaren Jehowa siene Zeijen jewast sent, freien sikj sea, wan dee een nieet Vestentnis ut de Bibel kjrieen. Oba wie sent doawäajen sea dankboa fa de wichtichste Lieren ut de Schreft, waut wie daut ieeschte lieeden un waut ons no de Woarheit trocken. Waut kjenn wie doonen, wan wie mol denkjen, daut onse Iedee väl bäta es aus eene Aunwiesunk von Jehowa siene Organisazion? Wie wudden sellen deemootich sennen un doaraun denkjen, wäa de Organisazion leiden deit – de weisa un aulmajchtja Schepfa. Wan wie selfst ooda wäa von de Famielje derch waut Schwoaret jeit, dan wudd wie sellen jeduldich sennen un doaräwa nodenkjen, wuarom Jehowa daut Lieden toolat. Un wan wie entscheiden motten, woo wie onse Tiet un ons Jelt brucken woaren, dan sell wie doaraun denkjen, daut wie en de latste Doag läwen. Muchten de ieeschte Lieren ut de Bibel die wieda stoakjen, die Moot jäwen un die halpen, weis to woaren.