Lot die wieda von Jehowa leiden

1. Wuarom sell wie ons von Jehowa leiden loten? Met waut jeit daut to vejlikjen?

STAL die mol väa, du best en eenen Woolt vebiestat. Daut es doa sea jefäadlich, wiels daut eene Jäajent es, wua väl loose Steena sent un wua daut Ojjezeffa, wille Tieren un jeftje Plaunten jeft. Secha wurscht du daut väl räakjnen, wan doa wäa wia, waut die dän Wajch wiesen kunn, un daut wist, wua de Jefoaren wieren un woo du dee kust utem Stich gonen. Dise Welt es soo aus dee Woolt. Doa sent aulawäajen Jefoaren, waut besonda ons Veheltnis met Jehowa schoden kjennen. Oba Jehowa kaun ons daut baste halpen, de Jefoaren utem Stich to gonen un dän Wajch wiesen, no de niee Welt to komen.

2. Woo deit Jehowa ons leiden?

² Woo deit Jehowa ons leiden? Ieeschtens, derch sien Wuat, de Bibel. Oba hee brukt uk Menschen toom ons aunleiden. Biejlikj brukt hee dän “truen un väabedochten Sklow” toom ons jeisteljet Äten jäwen, waut ons halpt, goode Entscheidungen to moaken (Mat. 24:45). Jehowa brukt uk aundre Mana toom ons leiden, waut sikj doamet vestonen. De Kjreisoppsechtasch un Eltestasch biejlikj spräakjen ons Moot too un jäwen ons Rot, woo wie met schwoare Loagen kjennen foadich woaren. Wie sent sea dankboa, daut Jehowa ons en dise schwoare, latste Doag soo fein leiden deit! Dit halpt ons, met am Frind to bliewen un daut wie een scheenet Läwen haben kjennen – nu aul un uk fa emma.

3. Waut woa wie en disen Artikjel seenen?

³ Eenjemol felt ons daut veleicht schwoa, de Aunwiesungen notokomen, waut Jehowa ons jeft; besonda wan hee daut derch onvolkomne Mana deit. Wuarom? Veleicht jleich wie de Aunwiesungen nuscht, waut dee ons jäwen. Ooda wie haben daut Jefeel, daut et nich kluak es, waut dee ons sajen un daut soone Aunwiesungen nich kjennen von Jehowa komen. En soone Loag mott wie besonda doaropp vetruen, daut Jehowa dee es, waut siene Deena leiden deit un daut et Säajnungen brinjt, wan eena sikj von am leiden lat. Om ons Vetruen to stoakjen, woa wie en disen Artikjel äwa dreeatlei räden: 1. Woo deed Jehowa siene Deena ieeschtemma leiden? 2. Woo deit hee daut vondoag dän Dach? Un 3. woo kjemt ons daut togood, wan wie ons von am leiden loten?

WOO JEHOWA DAUT VOLKJ ISRAEL LEID

4-5. Woo wees Jehowa, daut hee Moses brukt toom de Israeliten leiden? (See daut Bilt oppe väaschte Sied.)

⁴ Jehowa haud Moses aunjestalt toom de Israeliten ut Ägipten rutleiden. Un hee jeef dee gaunz kloaren Bewies, daut hee äant derch Moses leiden deed. Biejlikj jeef hee äant eene Wolkj fa äwadach un een Fia fa de Nacht (2. Mo. 13:21). Moses jinkj de Wolkj hinjaraun, waut am un de Israeliten no daut Roode Mäa leid. Daut Volkj kjrieech sea groote Angst, aus dee enworden, daut see tweschen daut Roode Mäa un de ägiptische Armee wieren. Dee dochten, daut Moses eenen Fäla jemoakt haud, daut dee äant no daut Roode Mäa jebrocht haud. Oba daut wia nich een Fäla. Jehowa haud dee derch Moses met Fliet doahan jeleit (2. Mo. 14:2). Gott muak dee dan opp eene sea besondre Wajch frie (2. Mo. 14:26-28).

⁵ Moses recht sikj 40 Joa nodäm noch emma no de Wolkj, om Gott sien Volkj derch de Wiltnis to leiden.a Fa eene jewesse Tiet sad Jehowa de Wolkj bowa Moses sien Zelt, wua aule Israeliten daut seenen kunnen (2. Mo. 33:7, 9-10). Von ut de Wolkj räd Jehowa met Moses, un Moses vetald daut Volkj daut, waut Jehowa jesajcht haud (Psa. 99:7). De Israeliten hauden jenuach Bewies, daut Jehowa Moses brukt toom äant leiden.

6. Woo stalden de mieeschte Israeliten sikj opp? (4. Mose 14:2, 10-11).

⁶ Daut es truarich, oba de mieeschte Israeliten neemen dän kloaren Bewies nich aun, daut Moses de Veträda von Jehowa wia (läs 4. Mose 14:2, 10-11). Emma wada stalden dee sikj doajäajen, daut Jehowa Moses brukt, om äant to leiden. Woo kjeem daut ut? Dise Israeliten kunnen nich en daut vesproakne Launt nennkomen (4. Mo. 14:30).

7. Woont sent eenje Biespels, waut sikj von Jehowa leiden leeten? (4. Mose 14:24). (See uk daut Bilt.)

⁷ Daut jeef oba eenje Israeliten, waut sikj von Jehowa leiden leeten. Jehowa räd biejlikj von Kaleb un säd, daut dee am “tru nojefolcht” wia (läs 4. Mose 14:24). Gott beloond Kaleb doafäa un leet am mau rajcht wälen, wua hee en daut vesproakne Launt wonen wull (Jos. 14:12-14). De Israeliten, waut en daut vesproakne Launt nennkjeemen, wieren uk een goodet Biespel doafäa, daut dee sikj von Jehowa leiden leeten. Aus Moses ieescht jestorwen wia, wia Josua utjewält, om de Israeliten to leiden, un “de Israeliten hauden sien läwen lank Forcht fa am” (Jos. 4:14). Doawäajen säajend Jehowa dee un jeef dee daut vesproakne Launt (Jos. 21:43-44).

8. Woo leid Jehowa sien Volkj en de Tiet von de Kjennichs? (See uk daut Bilt.)

⁸ Joaren lota brukt Jehowa de Rechta toom sien Volkj leiden. Doahinja, en de Tiet von de Kjennichs, stald Jehowa de Profeeten aun, om sien Volkj to leiden. De true Kjennichs horchten no dän Rot von de Profeeten. Biejlikj leet de Kjennich David sikj deemootich von dän Profeet Natan trajchtwiesen (2. Sam. 12:7, 13; 1. Chr. 17:3-4). De Kjennich Joschafat kjeem dän Rot von dän Profeet Jahasiel no un rod daut Volkj von Juda too, aun “[Gott] siene Profeeten” to jleewen (2. Chr. 20:14-15, 20). Aus de Kjennich Hiskia en eene sea schwoare Loag wia, fruach dee dän Profeet Jesaja no Help (Jes. 37:1-6). Jiedatsmol, wan de Kjennichs sikj von Jehowa leiden leeten, worden dee un daut Volkj jesäajent un beschizt (2. Chr. 20:29-30; 32:22). Daut haud sult gaunz kloa to seenen sennen, daut Jehowa siene Profeeten brukt, om sien Volkj to leiden. Oba de mieeschte Kjennichs un uk de Israeliten horchten nich no Jehowa siene Profeeten (Jer. 35:12-15).

WOO JEHOWA DE IEESCHTEMMASCHE CHRISTEN LEID

9. Wäm brukt Jehowa toom de ieeschtemmasche Christen leiden? (See uk daut Bilt.)

⁹ Nodäm Jesus vom Doot oppjestonen wia, stald Jehowa de Christenvesaumlunk opp. Woo deed Jehowa de Christen don leiden? Hee stald Jesus aus Haupt von de Vesaumlunk aun (Efs. 5:23). Oba Jesus räd nich perseenlich met siene Nofolja un säd, waut jieda eena doonen sull. Hee brukt de Apostel un de Eltestasch en Jerusalem toom dee aunleiden (Apj. 15:1-2). Doa worden uk Eltestasch aunjestalt toom de Vesaumlungen Aunleidunk jäwen (1. Tes. 5:12; Tit. 1:5).

10. (a) Neemen de ieeschtemmasche Christen de Leidunk aun, waut see kjrieejen? (Apj. 15:30-31). (b) Wuarom neemen eenje daut ieeschtemma nich aun, wäm Jehowa brukt toom sien Volkj leiden? (See daut Hock “Wuarom wellen eenje daut nich jleewen, daut Jehowa Menschen brukt toom siene Deena leiden?”)

¹⁰ Neemen de ieeschtemmasche Christen dise Aunleidunk aun? De Mieeschte jo. Dee wieren schaftich, daut see Aunwiesungen kjrieejen un kjeemen daut uk no. “See freiden sikj äwa dän Moot”, waut see kjrieejen (läs Aposteljeschicht 15:30-31). Oba woo deit Jehowa siene Deena vondoag dän Dach leiden?

WOO JEHOWA SIEN VOLKJ VONDOAG DÄN DACH LEIT

11. Waut von Biespel wiest, daut Jehowa deejanje leit, waut en sien Volkj veropp gonen?

¹¹ Jehowa leit sien Volkj vondoag dän Dach noch. Daut deit hee derch sien Wuat un sien Sän, waut daut Haupt von de Vesaumlunk es. Kjenn wie dän Bewies seenen, daut Jehowa vondoag dän Dach noch emma Menschen brukt toom ons aunleiden? Gaunz kloa. See wie mol eenje Sachen, waut no daut Joa 1870 passieeden. Charles Taze Russell un siene Poatna kunnen daut enseenen, daut daut Joa 1914 wudd een besondret Joa sennen, wua sikj de biblische Profezeiungen erfellen wudden, daut Gott sien Kjennichrikj wudd oppjestalt woaren (Dan. 4:22-23). Dee fungen daut rut, wäajen dee sea de Bibel studieeden un doaropp vetruden, daut de Profezeiungen doabennen sikj erfellen wudden. Wia daut Jehowa, waut dise Mana aunleiden deed? Jo, daut wia. Daut, waut aune 1914 enne Welt passieed, bewees kloa, daut Gott sien Kjennichrikj aunfunk to rejieren. Dan bruak de Ieeschta Weltkjrich ut un doahinja jeef daut veschiedne Krankheiten, Ieedbäben un Hungaschnoot (Luk. 21:10-11). Jehowa brukt werkjlich dise opprechtje Christen toom sien Volkj leiden.

12-13. Waut wort doa enjerecht, daut doa en dän Tweeden Weltkjrich noch mea Menschen prädjen un lieren kunnen?

¹² See wie mol, waut en de Tiet von dän Tweeden Weltkjrich passieed. Nodäm daut de veauntwuatelje Breeda Openboarunk 17:8 fein studieet hauden, worden dee en, daut dis Kjrich nich wudd to Harmagedon fieren. Oba dee worden en, daut et wudd eene frädelje Tiet jäwen, wua se noch väl mea wudden prädjen kjennen. Soo, mau rajcht wan daut uk nich no eene kluake Entscheidunk sacht, stalden de veauntwuatelje Breeda de Gilead-Bibelschool opp. Dise School wia doafäa jedocht, daut Missionoaren utjelieet worden toom äwa de gaunze Welt prädjen un lieren. Eenje Missionoaren worden noch en de Tiet von dän Weltkjrich wajchjeschekjt. Bowenenn wort de trua un väabedochta Sklow sikj eenich, noch eene besondre Schoolb opptostalen, wua aule Vekjindja enne Vesaumlunk lieeden, bäta to prädjen un to lieren. Opp dise Wajch wort Gott sien Volkj noch bäta fa daut Prädichtwoakj reedjemoakt, waut noch ver äant wia.

¹³ Wan wie nu soo trigjkjikjen, kjenn wie gaunz kloa seenen, daut Jehowa siene Deena en dee schwoare Tiet jeleit haft. Von dän Tweeden Weltkjrich aun, haben Jehowa siene Deena en väl Lenda met Frieheit kunt prädjen un daut Woakj haft sea toojenomen.

14. Wuarom kjenn wie gaunz opp de Leidunk vetruen, waut von Jehowa siene Organisazion un von de Eltestasch kjemt? (Openboarunk 2:1).

¹⁴ Vondoag dän Dach veloten de Breeda vom Väastaunt sikj wieda opp Christus siene Leidunk. Dee wellen de Breeda un Sestren soone Aunwiesungen jäwen, wuaraun to seenen es, woo Jehowa un Jesus äwa de Sachen denkjen. Derch de Kjreisoppsechtasch un de Eltestasch woaren de Aunwiesungen no de Vesaumlungen jebrocht.c De jesaulwde Eltestasch sent en Christus siene “rajchte Haunt” (läs Openboarunk 2:1). Secha sent aule Eltestasch onvolkomen un moaken Fäla. Moses un Josua muaken uk Fäla un krakjt soo uk de Apostel (4. Mo. 20:12; Jos. 9:14-15; Reem. 3:23). Oba wie seenen gaunz kloa, daut Jesus dän truen un väabedochten Sklow un de Eltestasch noch emma gaunz krakjt leiden deit, un hee woat daut uk “dän Tiet äwa . . . bat daut Enj von dise TIET” doonen (Mat. 28:20). Wie kjennen gaunz opp dise Leidunk vetruen, waut hee ons derch de Breeda jeft, waut äwa daut Woakj aunjestalt sent.

WAN WIE ONS WIEDA VON JEHOWA LEIDEN LOTEN, DAN KJEMT ONS DAUT TOGOOD

15-16. Waut kaust du von deejanje lieren, waut sikj von Jehowa leiden leeten?

¹⁵ Wan wie ons wieda von Jehowa leiden loten, dan hab wie nu aul Säajnungen. Andy un Rosed biejlikj kjeemen dän Rot no, een eefachet Läwen to fieren. (See uk de tweede Erkjläarunk toom studieren von Matäus 6:22 en de Studiabibel.) Doaderch hauden see de Mäajlichkjeit, bie veschiedne Buwoakjs mettohalpen. Rose sajcht: “Wie haben mol en kjliene Woninjen jewont, wua nich mol eene Kjäakj bennen wia. Un wan ekj daut uk leewd, Bilda to moaken, hab ekj mienen Kembre must vekjeepen un uk de aundre Sachen, waut ekj doatoo brukt. Ekj road, aus ekj dise Sachen vekoft. Oba ekj wull soo sennen aus Abraham siene Fru Sara un nich wieda aun daut denkjen, waut ekj oppjejäft haud, oba mootich bliewen” (Heb. 11:15, JHF). Waut vonne Säajnungen haft dit poa Lied jekjräajen? Rose sajcht: “Wie sent ennalich tofräd, wiels wie weeten, daut wie Jehowa aules jäwen, waut wie haben. Wan ekj un mien Maun eene Oabeit doonen, waut Jehowa ons jeft, dan kjrie wie doaderch eene Iedee, woo daut Läwen enne niee Welt woat sennen.” Andy es doamet envestonen un sajcht: “Wie sent werkjlich schaftich, wiels wie aul onse Tiet un Krauft brucken toom daut Kjennichrikj unjastetten.”

¹⁶ Woo kjemt ons daut noch togood, daut wie ons wieda von Jehowa leiden loten? Marcia biejlikj hauden se toojerot, Pionia to woaren. Un aus see met äare School derch wia, wull see daut onbedinjt doonen (Mat. 6:33; Reem. 12:11). See sajcht: “Ekj haud de Mäajlichkjeit, fa vea Joa emsonst en eene Uniwersität to studieren. Oba ekj wull Jehowa mien bastet jäwen. Doawäajen hab ekj daut Aunjebott nich aunjenomen. Ekj wort mie leewa eenich, eene Oabeit to lieren, wuaderch ekj soo väl vedeenen kunnen, daut ekj kunn Pionia sennen. Dauts eent von de baste Entscheidungen, waut ekj jeemols jemoakt hab. Ekj deen nu schaftich aus Pionia, un wiels ekj selfst entscheiden kaun, woo väl ekj schauf, kaun ekj uk em Betel methalpen un ekj hab väl scheenet em Deenst fa Jehowa beläft.”

17. Woo kjemt ons daut noch togood, daut wie ons von Jehowa leiden loten? (Jesaja 48:17-18).

¹⁷ Eenjemol kjrie wie uk Rot von Jehowa siene Organisazion, waut ons beschizt. Biejlikj woat ons doafäa jewoarnt, nich no Jelt hinjaraun to sennen un nich soone Sachen to doonen, waut ons bat doa brinjen kjennen, Gott ontru to woaren. Wan wie ons von Jehowa en dise Stekjen leiden loten, dan es ons daut bloos toom gooden. Wie kjennen een reinet Jewessen hoolen un ons een deel onneedje Trubbels spoaren (1. Tim. 6:9-10). Doaderch kjenn wie Jehowa uk ons bastet jäwen. Un doa es nuscht, waut ons mea Fräd, Freid un Tofrädenheit brinjen kaun (läs Jesaja 48:17-18).

18. Wuarom west du die wieda von Jehowa leiden loten?

¹⁸ Jehowa woat wieda Menschen brucken toom ons Aunwiesungen jäwen en de groote Liedenstiet un uk en daut dusentjoasche Rikj (Psa. 45:17). Woa wie ons von dee leiden loten, wan daut uk bediet, daut wie eenje Sachen nich woaren doonen kjennen, waut wie wudden wellen? Daut haft väl doamet to doonen, aus wie de Aunwiesungen nokomen, waut Jehowa ons nu aul jeft. Well wie ons doawäajen emma von Jehowa leiden loten; biejlikj doaderch, daut wie ons to daut schekjen, waut deejanje sajen, waut äwa ons aunjestalt sent (Jes. 32:1-2; Heb. 13:17). Wie haben goode Uasoak, faust opp onsen Leida Jehowa to vetruen. Hee woat ons halpen, von aules wajchtobliewen, waut ons Veheltnis met am schoden kaun, un woat ons bat de niee Welt brinjen.