August

Tingim tufala important point lo disfala scripture lo text for tuday: (1) Man wea stret savve kasem staka trabol. (2) Jehovah sevem iumi from olketa trabol. Hao nao Jehovah sevem iumi? Hem helpem iumi for garem balance tingting abaotem olketa situation wea iumi feisim lo disfala world. Nomata Jehovah promisim hao bae iumi hapi taem iumi worshipim hem, datwan no minim bae iumi free from olketa problem. (Isa. 66:14) Hem laekem iumi for tingim future blo iumi, wea hem nao taem wea iumi bae enjoyim laef for olowe. (2 Cor. 4:​16-18) Bat go kasem datfala taem, Jehovah bae helpem iumi each day for gohed faithful lo hem. (Lam. 3:​22-24) Wat nao iumi savve lanem from example blo olketa wea faithful lo Jehovah lo bifor and distaem? Iumi lanem hao iumi savve feisim samfala challenge wea iumi no expectim. Nomata olsem, taem iumi depend lo Jehovah, hem bae evritaem helpem iumi.—Ps. 55:22. w23.04 14-15 ¶3-4

Iumi savve lane from example blo Joseph and Mary, wea willing for obeyim olketa wea garem authority nomata lo taem wea hem no isi. (Luke 2:​1-6) Taem Mary babule for samting olsem naen month finis, hem and Joseph feisim wanfala hard situation from law wea gavman mekem. Augustus wea hem ruler blo Roman Empire mekem law for duim wanfala census. So Joseph and Mary mas travel go lo Bethlehem. Tufala mas travel for 150 kilometer ap and daon lo olketa maunten for kasem lo there. Datfala trip bae hem no isi, especially for Mary. Maet tufala wari abaotem wat maet happen if hem bornem baby taem tufala followim road. Tufala maet wari abaotem safety blo baby bikos hem nao datfala Messiah wea Jehovah promisim. Hao, datwan hem gud excuse for tufala no obeyim datfala law wea gavman mekem? Nomata Joseph and Mary garem gud reason for wari, datwan no stopem tufala for no obeyim datfala law. Jehovah blessim tufala bikos tufala obey. Mary arrive sef lo Bethlehem, hem bornem healthy baby, and wat hem duim help for fulfillim Bible profesi!—Mic. 5:2. w23.10 8 ¶9; 9 ¶11-12

Waswe sapos iu fraet tumas for koment lo meeting? Wanfala idea wea savve help hem for prepare gud. (Prov. 21:5) Taem iu studyim gud datfala information, bae hem moa isi for iu givim olketa koment. And tu, givim olketa short koment. (Prov. 15:23; 17:27) Taem ansa blo iu short bae iu no fraet tumas. Short koment wea iu talem lo own toktok blo iu showimaot iu prepare gud and minim datfala information. Hao if iu traem samfala lo olketa idea hia, bat iu still fraet for givim winim wanfala koment? No wari, Jehovah tinghae lo best wea iu fit for givim. (Luke 21:​1-4) For duim best blo iu hem no minim iu bae duim wanem iu no fit for duim. (Phil. 4:5) Disaedem wat iu savve duim, markem goal for kasem datwan, and askem Jehovah for helpem iu for no fraet. Firstaem, markem goal for givim wanfala short koment. w23.04 21 ¶6-8

Aposol Paul comparem iumi witim olketa soldia wea redi and werem full suit for faet. Wanfala soldia wea on duty shud evritaem redi for faet. Iumi tu olsem. Iumi shud evritaem redi for day blo Jehovah taem iumi werem datfala samting for kavarem chest, wea hem faith and love, and datfala helmet wea hem nao hope. Samting for kavarem chest savve protectim heart blo soldia. Faith and love protectim tokpiksa heart blo iumi. Hem helpem iumi for gohed servem God and followim Jesus. Faith mekem iumi sure Jehovah bae rewardim iumi taem iumi lukaotem hem witim full heart. (Heb. 11:6) Faith bae helpem iumi for gohed loyal lo Leader blo iumi Jesus, nomata iumi feisim eni challenge. Taem iumi lane from example blo olketa distaem wea gohed faithful nomata olketa kasem persecution or hard taem saed lo selen, datwan savve strongim faith blo iumi for deal witim eni challenge. And taem iumi followim example blo olketa wea mekem laef simpol and putim Kingdom first, iumi bae no foldaon lo trap for laekem tumas material samting. w23.06 10 ¶8-9

Taem iumi savve hao for kontrolem iumiseleva bae iumi kontrolem feeling and wat iumi duim. Iumi mas kontrolem iumiseleva mekem iumi kasem olketa goal blo iumi, especially if hem no isi for kasem wanfala goal or iumi no laek duim. Remember, disfala fasin hem wanfala frut blo holy spirit, so askem Jehovah for holy spirit for helpem iu garem disfala important wei. (Luke 11:13; Gal. 5:​22, 23) No weit for raet taem. Distaem hem hard for faendem raet taem for duim samting. If iumi weit nomoa, bae iumi no savve kasem goal blo iumi. Maet iumi feel wikdaon for kasem goal bikos maet hem luk olsem hem hard tumas. If iu ting olsem, hao sapos iu divaedem goal blo iu lo olketa smol part? If iu garem goal for impruvim wanfala wei blo iu, hao sapos firstaem iu isisi showimaot datfala wei? If iu garem goal for readim full Bible, hao sapos firstaem iu read for lelebet taem nomoa? w23.05 29 ¶11-13

Lo olketa last day distaem, Jehovah gohed iusim organization blo hem for provaedem spiritual kaikai for helpem iumi for gohed followim datfala “Road wea Holy.” (Isa. 35:8; 48:17; 60:17) Taem samwan acceptim for studyim Bible, hem garem chance for wakabaot followim datfala “Road wea Holy.” Samfala wakabaot short distance nomoa then olketa lusim datfala road. Olketa narawan gohed for followim go kasem taem olketa kasem end blo datfala road. Wea nao end blo datfala road? For olketa wea garem hope for go lo heven, datfala “Road wea Holy” hem leadim olketa for kasem “paradaes bilong God” lo heven. (Rev. 2:7) For olketa wea garem hope for stap lo earth, datfala road leadim olketa for kasem perfect laef lo end blo datfala 1,000 year. If iu travel followim datfala road distaem, no luk bak. And no lusim datfala road go kasem taem iu kasem end blo datfala road lo niu world! w23.05 17 ¶15-16; 19 ¶17-18

Taem iu ting abaotem evri samting wea Jehovah duim for iu, bae iu appreciatim hem and laek for dedicate lo hem. (Ps. 116:​12-14) Bible sei Jehovah hem givim “evri gud and perfect present.” (Jas. 1:17) Best present Hem givim, hem taem hem sakrifaesim Son blo hem, Jesus. Diswan hem spesol tumas! Datfala ransom mekem hem possible for iu garem klos frenship witim Jehovah. And Jehovah givim iu chance for laef olowe. (1 John 4:​9, 10) For dedicatem iuseleva lo Jehovah hem wanfala best wei for showimaot iu appreciatim datfala nambawan wei wea Jehovah showimaot love, and for evri nara blessing wea hem givim iu.—Deut. 16:17; 2 Cor. 5:15. w24.03 5 ¶8

Taem iumi lukim barava nogud wei blo pipol lo world, iumi garem sem feeling olsem raeteous man Lot. Hem “barava feel nogud long wei bilong pipol wea nating shame for duim rong samting,” bikos hem savve Dadi blo iumi lo heven barava heitim datwan. (2 Pet. 2:​7, 8) From Lot fraet lo God and lovem hem, Lot barava heitim rabis wei blo pipol wea stap raonem hem. Iumi distaem tu stap between pipol wea no respectim or ting nating lo olketa standard blo Jehovah. Nomata olsem, iumi savve keepim wei blo iumi klin if iumi gohed lovem God and garem stretfala wei for fraet lo hem. Iumi savve duim olsem bikos Jehovah provaedem buk blo Proverbs wea encouragem and strongim iumi. Evri Christian, olketa man and woman, young and olo, savve kasem barava gud samting taem olketa followim wise kaonsel lo Proverbs. Taem iumi fraet lo Jehovah, iumi mas careful for no frens witim olketa wea garem nogud wei. w23.06 20 ¶1-2; 21 ¶5

Maet famili blo iu againstim iu or maet iu sakrifaesim samfala material samting mekem iu putim Kingdom first lo laef blo iu. (Matt. 6:33) Sapos olsem, iu savve sure hao Jehovah lukim evri samting wea iu duim. (Heb. 6:10) For sure, iu experiencem wat Jesus talem: “Eniwan wea lusim haos or olketa brata or sista or mami or dadi or pikinini or olketa garden bikos long mi and bikos long datfala gud nius bae hem kasem bak staka samting distaem winim wanem hem lusim. Bae hem kasem olketa haos, olketa brata, sista, mami, pikinini, and olketa garden, and tu, pipol bae spoelem hem. Then long world wea bae kam, bae hem kasem laef olowe.” (Mark 10:​29, 30) Olketa blessing wea iu bin kasem hem barava winim eni sakrifaes wea iu mekem.—Ps. 37:4. w24.03 9 ¶5

Taem bigfala hangere kasem olketa Christian lo Judea, olketa brata and sista lo kongregeson blo Antioch “disaed for sendem relief supply for helpem olketa brata long Judea, fitim wanem man wanwan savve givim.” (Acts 11:​27-30) Nomata olketa brata and sista wea kasem big hangere stap farawe, olketa Christian lo Antioch barava laek for helpem olketa. (1 John 3:​17, 18) Iumi tu savve showimaot iumi sorre lo olketa brata and sista wea kasem disaster distaem. Iumi kwiktaem for givim sapot taem iumi askem olketa elder if iumi savve help lo wanfala project, givim donation for waka raonem world, or prea for olketa wea disaster affectim olketa. Maet olketa brata and sista blo iumi tu needim help for kasem need blo olketa. Taem King blo iumi Christ Jesus kam for judgem pipol, iumi laekem hem for lukim iumi gohed tingim narawan and invaetem iumi for kasem gud samting from Kingdom.—Matt. 25:​34-40. w23.07 4 ¶9-10; 6 ¶12

Jesus followim wei blo Jehovah for flexible. Hem kam lo earth for preach lo “pipol bilong Israel nomoa, wea olsem olketa sheepsheep wea lus.” Nomata olsem, hem flexible taem hem preach lo pipol. For example, wanfala woman wea no Jew begim Jesus for healim dota blo hem wea ‘demon barava spoelem.’ Jesus tingim woman hia and healim dota blo hem. (Matt. 15:​21-28) Tingim nara example. Insaed lo ministry blo Jesus, hem sei: “Man wea talem . . . hem no disaepol bilong mi, mi bae talem . . . hem no disaepol bilong mi.” (Matt. 10:33) Bat waswe, Jesus rejectim Peter from Peter denyim hem thrifala taem? Nomoa. Jesus luksavve Peter repent and garem faith. Bihaen Jesus resurrect, hem appear lo Peter and masbi hem talem Peter hem forgivim hem and still lovem hem. (Luke 24:​33, 34) Jehovah God and Jesus Christ no ova tumas. Waswe lo iumi? Jehovah expectim iumi tu for olsem. w23.07 21 ¶6-7

Wat nao iumi savve talem lo olketa narawan for mekem olketa sure hao earth bae kamap paradaes? First samting, Jehovah nao mekem datfala promis. Bible buk Revelation sei: “God wea sidaon long throne hem sei: ‘Mi wakem evri niu samting.’” Jehovah garem wisdom, paoa, and hem barava laek for mekem promis blo hem kamap tru. Second samting, Jehovah sure bae hem fulfillim promis blo hem, so hem storyim datwan olsem hem happen finis. Hem sei: “Man savve trustim olketa toktok hia and hem barava tru. . . . Olketa toktok hia hem kamap tru nao!” Third samting, no eni samting savve stopem Jehovah for completim samting wea hem startim finis. Dastawe hem sei: “Mi nao Alpha and Omega.” (Rev. 21:6) Jehovah bae pruvim hao Satan hem laea and hem no savve stopem hem for fulfillim plan blo hem. So taem samwan sei: “Hem barava here naes, bat mi no bilivim if hem savve kamap tru.” Iu savve readim and explainim Revelation 21:​5, 6 for olketa. Explainim hao olketa toktok hia wea Jehovah talem, hem olsem hem saenem witim own signature blo hem, wea mekem iumi sure hem bae fulfillim promis blo hem.—Isa. 65:16. w23.11 7 ¶18-19

Jehovah mekem wanfala promis witim Abraham taem hem 75 years old and no garem yet pikinini. Waswe, Abraham lukim datfala promis fulfill? Hem lukim lelebet part lo hem nomoa. Bihaen Abraham akrosim Euphrates River, hem mas weit for 25 years bifor hem lukim son blo hem Isaac born, and bihaen nara 60 years, hem lukim tufala granson blo hem Esau and Jacob born. (Heb. 6:15) Bat Abraham no lukim pipol wea kam from laen blo hem kamap wanfala maeti nation and inheritim Promis Land. Nomata olsem, datfala faithful man hem fren klos witim Creator blo hem. (Jas. 2:23) And masbi taem Abraham resurrect, hem bae hapi tumas for savve from hem garem faith and hem patient, evri nation kasem blessing! (Gen. 22:18) Wat nao leson for iumi? Nomata maet iumiseleva no lukim evri promis blo Jehovah fulfill distaem, if iumi patient olsem Abraham, iumi sure Jehovah bae rewardim iumi distaem, and bae iumi kasem staka blessing lo niu world wea hem promisim.—Mark 10:​29, 30. w23.08 24 ¶14

Taem King Uzziah teenager, hem hambol. Hem lane “for fraet lo tru God.” And Jehovah blessim hem for klosap 68 years wea hem laef. (2 Chron. 26:​1-4) Uzziah winim staka nation wea enemy lo olketa Israelite and duim samting for protectim Jerusalem. (2 Chron. 26:​6-15) Masbi Uzziah hapi lo evri samting wea God helpem hem for duim. (Eccl. 3:​12, 13) King Uzziah getius for talem samting for olketa narawan duim. Maet datwan mekem hem for tingse hem savve duim eni samting wea hem laekem. So wanday, Uzziah disaed for go insaed temple blo Jehovah and from hem praod tumas hem laek for bonem incense lo altar, wea hem samting wea olketa king shud no duim. (2 Chron. 26:​16-18) Hae Priest Azariah trae for stretem hem bat Uzziah barava kros. From datwan, Uzziah kasem leprosy and hem spoelem faithful record blo hem lo service blo hem for Jehovah. (2 Chron. 26:​19-21) Laef blo Uzziah bae no olsem, if hem gohed for hambol! w23.09 10 ¶9-10

Nomata Peter kamap anointed Christian, hem still deal witim olketa wik point blo hem. Lo 36 C.E., God sendem Peter lo Cornelius wea hem wanfala Gentile and God anointim Cornelius witim holy spirit, wea datwan showimaot klia “God hem no favorim eniwan,” and olketa Gentile savve kamap part lo Christian kongregeson. (Acts 10:​34, 44, 45) Lo datfala taem, Peter feel free for kaikai witim olketa Gentile, hem samting wea Peter no duim enitaem. Nomata olsem, samfala Jew Christian sei olketa Jew and Gentile shud no kaikai tugeta. Taem samfala Jew wea garem tingting olsem kam lo Antioch, Peter stop for kaikai nao witim olketa Gentile brata blo hem, luk olsem hem fraet nogud olketa Jew Christian hia feel nogud. Aposol Paul lukim samting wea Peter duim and tok strong lo Peter front lo evriwan. (Gal. 2:​13, 14) Nomata Peter mekem mistek hia, hem no givap. w23.09 22 ¶8

Hem gud for honest lo iumiseleva and lukim wat iumi need for impruv lo hem, bat no discourage. “Lord [Jesus] hem kaen tumas” and hem bae helpem iumi for impruv. (1 Pet. 2:3) Aposol Peter sei: “God . . . bae finisim training bilong iufala mekem iufala barava strong.” Firstaem Peter feel olsem hem no gud inaf for Son blo God stap witim hem. (Luke 5:8) Bat witim loving sapot blo Jehovah and Jesus, Peter gohed faithful for followim Christ. Gogo Peter kasem privilege “for go insaed long datfala Kingdom wea no savve finis and wea hem bilong Lord bilong iumi, Jesus Christ, wea hem nao sevem iumi.” (2 Pet. 1:11) Datwan hem nambawan blessing! If iu no givap olsem Peter and letem Jehovah for trainim iu, iu bae kasem reward for laef olowe. Iu bae ‘sure faith bilong iu bae sevem laef bilong iu.’—1 Pet. 1:9. w23.09 31 ¶16-17

Datfala tabernacle lo bifor hem garem wanfala courtyard, wea hem open area wea fence hem raonem, and olketa priest savve duim waka blo olketa lo there. Disfala courtyard hem garem wanfala big copper altar for burnt offering, and wanfala copper basin wea wata stap insaed. Olketa priest iusim wata hia for klinim olketa seleva bifor olketa savve duim holy waka blo olketa. (Ex. 30:​17-20; 40:​6-8) Distaem, olketa anointed brata blo Christ gohed faithful for waka lo courtyard insaed lo spiritual temple. Datfala big basin wea wata stap insaed, hem remindim evri Christian for mas gohed klin lo wei blo olketa and lo spiritual wei. So wea nao datfala “big crowd” worshipim Jehovah? Aposol John lukim olketa “standap front long datfala throne,” and “worshipim [God] evri day and evri naet.” Datfala big crowd duim diswan lo earth lo courtyard aotsaed lo spiritual temple. (Rev. 7:​9, 13-15) Iumi thankiu lo Jehovah for givim iumi spesol privilege for worshipim hem insaed nambawan spiritual temple blo hem! w23.10 28 ¶15-16

Wanfala wei wea Jehovah savve givim paoa lo iumi, hem thru lo olketa elder. (Isa. 32:​1, 2) So taem iu wari abaotem samting, storyim datwan lo olketa elder. Hapi for acceptim help wea olketa givim lo iu. Jehovah iusim olketa for strongim iu. Hope blo iumi lo Bible for laef olowe lo Paradaes lo earth or lo heven savve strongim iumi tu. (Rome 4:​3, 18, 19) Hope strongim iumi for no givap lo olketa hard taem, preachim gud nius, and for gohed duim olketa difren assignment lo kongregeson. (1 Thess. 1:3) Datfala sem hope strongim aposol Paul tu. Hem sei hem kasem “hard taem,” “konfius,” ‘pipol spoelem hem,’ and “sorre.” And samfala taem laef blo hem stap lo danger tu. (2 Cor. 4:​8-10) From Paul focus lo hope wea hem garem, datwan strongim hem for no givap. (2 Cor. 4:​16-18) Paul focus lo future hope blo hem for laef olowe lo heven. From Paul gohed meditate abaotem datfala hope, datwan mekem hem “strong moa evriday.” w23.10 15-16 ¶14-17

Taem iumi prea, tingim if hem raet taem for Jehovah givim wat iumi askem lo hem. Iumi maet tingse iumi need for kasem ansa for olketa prea blo iumi stretawe. Bat, Jehovah nao savve lo best taem for helpem iumi. (Heb. 4:16) Taem iumi no stretawe receivim wat iumi askem, maet iumi tingse ansa blo Jehovah hem ‘No.’ Bat maet ansa blo hem ‘Nomoa yet.’ For example, wanfala young brata hem prea lo Jehovah for helpem hem kamap gud from sik blo hem. Bat health blo hem no impruv nomoa. If Jehovah duim mirakol for kiurim hem, Satan savve sei datfala brata gohed worshipim Jehovah only bikos Jehovah healim hem. (Job 1:​9-11; 2:4) Tingim tu hao Jehovah markem finis taem for hem kiurim evri difren kaen sik. (Isa. 33:24; Rev. 21:​3, 4) And go kasem datfala taem, Jehovah bae no duim mirakol for healim olketa sik blo iumi. So datfala brata savve askem Jehovah for strongim hem and for helpem hem garem peace lo mind mekem hem savve deal witim datfala sik, and gohed faithful lo God. w23.11 23 ¶13

Samson mekem wanfala serious mistek, bat hem no givap. Hem lukaotem chance for faet againstim olketa Philistine, wea hem nao wat Jehovah laekem hem for duim. (Judg. 16:​28-30) Samson begim Jehovah: “Letem mi pei bak lo olketa Philistine.” Tru God ansarem prea blo Samson and givim moa spesol paoa lo Samson. From datwan, Samson killim dae staka Philistine lo datfala party winim eni nara taem. Nomata Samson kasem olketa barava nogud samting from mistek blo hem, datwan no stopem hem for duim will blo Jehovah. Nomata if iumi mekem mistek and kasem kaonsel or lusim wanfala privilege, iumi mas no givap. Tingim hao Jehovah redi for forgivim iumi. (Ps. 103:​8, 9) Nomata iumi mekem mistek, Jehovah savve givim strong lo iumi for duim will blo hem, olsem hem duim for Samson. w23.09 6 ¶15-16

Taem iu no givap, iu mekem Jehovah hapi. Diswan no minim Jehovah hapi taem iu kasem olketa hard taem or problem. Bat hem hapi bikos iu no givap and gohed faithful. Hem barava encouraging for savve hao taem iumi no givap, iumi mekem Jehovah hapi. (Ps. 5:12.) Tingim hao Abraham tu kasem olketa test bat taem hem no givap, Jehovah hapi lo hem. Jehovah ting lo Abraham olsem fren blo hem and sei Abraham hem raeteous. (Gen. 15:6; Rome 4:​13, 22) God savve ting olsem lo iumi tu. Jehovah hapi no bikos lo staka waka wea iumi duim lo service blo hem or privilege wea iumi garem, bat hem hapi from iumi faithful and no givap lo olketa hard taem. And nomata wat nao age blo iumi, living, or ability wea iumi garem, iumi evriwan savve faithful lo God. Hao, iu deal witim wanfala hard taem distaem and iu gohed loyal lo Jehovah? If olsem, tingim hao iu mekem Jehovah hapi. Taem iumi luksavve hao God hapi lo iumi, datwan strongim go moa hope wea iumi garem lo olketa promis blo hem. w23.12 11 ¶13-14

Wanfala Christian brata mas lane for lisin and story gud. Man wea savve story gud, hem lisin and understandim tingting and feeling blo olketa narawan. (Prov. 20:5) Hem savve lane for understandim tu tingting and feeling blo samwan from tone blo voice, feis, and body languis. Hard for iu duim diswan if iu no spendem taem witim olketa narawan. If iu evritaem iusim email, text message, and olketa nara electronic device for story, datwan savve spoelem skill wea iu garem for story in person witim pipol. So hem gud for trae faendem olketa wei for story in person witim olketa narawan. (2 John 12) Wanfala mature Christian brata mas lane tu for sapotim hemseleva and olketa lo famili. (1 Tim. 5:8) Hem evritaem gud for lanem skill wea bae helpem iu for faendem waka. (Acts 18:​2, 3; 20:34; Eph. 4:28) Waka hard and mek sure iu finisim wat iu startim. And olketa narawan bae luksavve and tinghae lo waka blo iu. w23.12 27 ¶12-13

Lo Bible, datfala toktok “day blo Jehovah” hem minim taem wea Jehovah judgem olketa enemy blo hem and sevem pipol blo hem. Samfala taem lo bifor Jehovah bin duim diswan. (Isa. 13:​1, 6; Ezek. 13:5; Zeph. 1:8) “Day blo Jehovah” lo taem blo iumi bae start taem gavman attakim Bigfala Babylon and hem bae end lo Armageddon. For iumi sev lo datfala “day,” iumi need for prepare distaem. Jesus teachim iumi hao iumi mas duim samting for redi for datfala “bigfala trabol,” and tu for mas gohed redi for datwan. (Matt. 24:21; Luke 12:40) Lo first leta blo aposol Paul for olketa lo Thessalonica, hem iusim samfala tokpiksa for helpem olketa Christian for gohed redi for bigfala day blo Jehovah for judgem pipol. Paul savve day blo Jehovah bae no kam lo datfala taem. (2 Thess. 2:​1-3) Nomata olsem, hem encouragem olketa brata blo hem for redi and ting lo datfala day olsem bae hem kam tumoro nao, and iumi tu savve followim kaonsel blo hem. w23.06 8 ¶1-2

Lo 1978, olketa buildim wanfala barava tol building wea 60 story hae lo Tokyo, Japan. From earthquake savve happen olowe lo datfala city, maet pipol ting, ‘Hao datfala building bae strong tu?’ Datfala building barava strong. Why nao olsem? Olketa engineer designim for barava strong and flexible for followim movement blo earthquake. Hao nao olketa Christian olsem datfala tol building? Olketa Christian olsem datfala building wea strong and flexible. Olketa need for gohed strong for obeyim olketa law and standard blo Jehovah. Olketa “willing for obey” and no eniwan bae changem disison blo olketa. Bat lo semtaem, olketa ‘no forcem tingting bilong olketa,’ bat olketa mas flexible fitim each situation or if need kamap. (Jas. 3:17) Olketa Christian wea lane for garem balance tingting bae no strict tumas or ova tumas for acceptim nomoa eni samting. w23.07 14 ¶1-2

Jesus mas againstim olketa temptation from Satan. And samfala temptation hem olketa direct attak from Satan for stopem hem for loyal lo God. (Matt. 4:​1-11) Satan laekem tumas for mekem Jesus sin mekem hem no fit for peim datfala ransom. Taem Jesus duim ministry blo hem lo earth, hem feisim staka test. Olketa enemy persecutim hem and laek for killim hem dae. (Luke 4:​28, 29; 13:31) Hem mas deal tu witim wik point blo olketa aposol blo hem. (Mark 9:​33, 34) Taem olketa kotem hem, olketa killim hem nogud and tok spoelem hem. Then hem kasem bigfala pain and olketa killim hem dae olsem wanfala criminal. (Heb. 12:​1-3) Taem Jesus hange lo torture-stake, hem mas deal seleva witim bigfala pain wea kasem hem bikos Jehovah no protectim hem nao from datwan. (Matt. 27:46) Tru nao, Jesus barava safa bifor hem peim datfala ransom. Taem iumi ting abaotem staka samting wea Jesus willing for duim for iumi, hem mekem iumi for barava lovem hem. w24.01 10-11 ¶7-9

Iumi need for patient mekem iumi fren gud witim olketa narawan. Datwan helpem iumi for lisin gud taem narawan story. (Jas. 1:19) Patient helpem iumi for keepim peace tu. Hem helpem iumi for no react kwiktaem tumas and for talem samting wea no kaen taem iumi anda stress. And if iumi patient, bae iumi no kros kwiktaem nomata samwan duim samting wea mekem iumi feel nogud. Instead for pei bak, iumi bae ‘no kros bat evritaem forgivim hem.’ (Col. 3:​12, 13) Patient savve helpem iumi tu for mekem olketa gud disison. Instead for iumi followim feeling nomoa or kwiktaem for mekem disison, iumi bae tek taem for duim research and ting raonem which option nao hem best. For example, if iumi lukaotem waka maet iumi kwiktaem for acceptim first waka wea iumi faendem. Bat if iumi patient, bae iumi tek taem for ting raonem hao datfala waka bae affectim famili and spiritual laef blo iumi. Taem iumi patient, bae iumi avoidim olketa rong disison. w23.08 22 ¶8-9

If iu discourage bikos iu mas faet againstim feeling for laek duim sin ting abaotem dedication promis blo iu lo Jehovah, and datwan bae strongim disison blo iu for faet againstim eni temptation. Hao nao bae hem helpem iu? Taem iu dedicate lo Jehovah, iu disaed for no duim samting wea iuseleva laekem. Diswan minim iu bae sei no lo eni goal and eni samting wea iuseleva laekem wea mekem Jehovah no hapi. (Matt. 16:24) So taem iu kasem test, iu bae no need for ting raonem moa wat for duim. Hem bae olsem iu satem door from evri nara tingting, and wanfala nomoa bae open, hem nao for faithful lo Jehovah. Iu bae gohed disaed strong for mekem Jehovah hapi. Iu bae garem sem tingting olsem Job. Nomata hem kasem barava hard taem, hem disaed strong and sei: “Mi bae no letem eni samting for mekem mi no faithful!”—Job 27:5. w24.03 9 ¶6-7

Jehovah hem “God wea garem love,” hem stap witim iumi! (2 Cor. 13:11) Hem interest lo each wan lo iumi. Iumi barava sure “loyal love blo Hem stap raonem” iumi. (Ps. 32:10) Taem iumi gohed ting raonem hao hem showim love for iumi, bae iumi lukim klia hao hem lukaftarem iumi, and iumi bae laek for fren klos witim hem. Iumi savve feel free for prea lo hem and talem hao iumi needim love blo hem. Iumi savve storyim olketa wari blo iumi lo hem bikos iumi sure hem understandim and willing for helpem iumi. (Ps. 145:19) Olsem wanfala fire wea savve mekem iumi for feel warm lo wanfala cold day, love blo Jehovah for iumi tu savve comfortim iumi taem iumi kasem olketa hard situation. Dastawe, iumi hapi for acceptim love blo Jehovah wea savve comfortim iumi and givim iumi peace. And from hem lovem iumi, iumi evriwan laek for sei: “Mi lovem Jehovah”!—Ps. 116:1. w24.01 31 ¶19-20

Jesus no just talem pipol hao nem blo God hem Jehovah. Olketa Jew wea Jesus preach lo olketa savve finis lo nem blo God. Bat Jesus nao ‘helpem iumi for minim Jehovah.’ (John 1:​17, 18) For example, olketa Hebrew Scripture storyim hao Jehovah garem bigfala mercy and hem tingim iumi. (Ex. 34:​5-7) Jesus helpem iumi for minim gud datfala truth taem hem storyim parabol abaotem son wea lus and dadi blo hem. Taem iumi read abaotem hao datfala dadi lukim son blo hem wea repent “taem hem lelebet farawe yet,” and hem ran go for meetim hem, hagem, and barava forgivim hem, datwan helpem iumi for luksavve hao Jehovah showim bigfala mercy and tingim iumi. (Luke 15:​11-32) Jesus helpem pipol for luksavve wat kaen Person nao Dadi blo hem. w24.02 10 ¶8-9

Jehovah strongim and comfortim olketa wea kasem hard taem. Hao nao iumi savve followim example blo Jehovah for tingim and comfortim olketa narawan? Wanfala wei, hem for garem olketa fasin wea savve helpem iumi for tingim and comfortim narawan. Wat nao samfala fasin hia? Wat nao bae helpem iumi for gohed strongim love blo iumi and for “gohed . . . comfortim” each other evriday? (1 Thess. 4:18) Iumi need for gohed garem fasin olsem for sorre witim olketa wea safa, lovem olketa brata, and for kaen. (Col. 3:12; 1 Pet. 3:8) Hao nao olketa fasin hia savve helpem iumi? Taem iumi tingim narawan and olketa fasin hia kamap wei blo iumi, bae iumi barava laek for comfortim olketa wea kasem hard taem. Jesus sei: “Samting wea man tingting tumas abaotem nao bae hem storyim. Gudfala man bae talem gudfala samting bikos gudfala samting stap long heart bilong hem.” (Matt. 12:​34, 35) For comfortim olketa brata and sista hem wanfala barava important wei wea iumi showimaot iumi lovem olketa. w23.11 10 ¶10-11

For minim olketa Bible profesi, iumi need for ask for help. Tingim disfala illustration: Imaginim iu visitim ples wea iu no kasem bifor, bat wanfala fren wea savve gud lo datfala area hem travel witim iu. Hem savve gud lo wea nao iutufala lo hem and wea nao each road go lo hem. For sure, iu hapi tumas fren blo iu hem kam witim iu! Jehovah hem olsem datfala fren. Hem savve lo wea nao iumi lo hem distaem and wat bae happen lo future blo iumi. So for minim olketa Bible profesi, iumi mas hambol and askem help from Jehovah. (Dan. 2:28; 2 Pet. 1:​19, 20) Jehovah hem olsem parents wea laekem olketa pikinini for garem hapi future. (Jeremiah 29:11) Bat Jehovah difren from olketa parents bikos hem savve talem wat bae happen lo future, and wat hem talem hem evritaem kamap tru. Hem includim olketa profesi lo Bible mekem iumi savve lo olketa important event bifor olketa happen.—Isa. 46:10. w23.08 8 ¶3-4