From Hem Plan Gud, Hem Kasem Gud Samting

María Isabel, wea hem 10 year, hem stap long San Bernardo, Chile, long South America. Hem wanfala young pablisa wea strong for preach. Famili bilong hem olketa native Mapuche pipol. Full famili barava hapi for sapotim olketa arrangement for startim wanfala niu kongregeson long Mapudungun languis, wea hem languis bilong olketa Mapuche pipol.

Taem María Isabel herem announcement Memorial bae kamap long Mapudungun languis tu, and olketa printim 2000 invitation pepa long datfala languis, hem laek for help givimaot olketa invitation hia. Hem tingim experience bilong olketa nara young Witness wea kasem gud samting taem olketa preach long olketa skul fren and teacher bilong olketa. Hem story witim mami and dadi bilong hem, and olketa disaed bae hem gud sapos María Isabel tingim eni gud plan for givimaot olketa invitation pepa long skul. Wanem nao plan bilong hem?

First samting, María Isabel askem olketa long skul office sapos hem savve putim wanfala invitation pepa long main gate bilong skul. Olketa letem, and olketa praisem hem from hem laek for duim datwan. Wanday long skul assembly, principal tu mekem announcement long laodspeaker abaotem datfala invitation pepa!

Then, María Isabel askem olketa teacher sapos hem savve story long evri class long skul. Olketa teacher letem hem, so hem askem evri class hu nao olketa student wea Mapuche. Hem sei: “Mi tingse maet 10 or 15 student long full skul nao Mapuche, batawea, staka student nao Mapuche, and mi givimaot 150 invitation pepa!”

“HEM EXPECTIM SAMWAN WEA BIG FINIS”

Wanfala woman wea lukim datfala invitation pepa long gate bilong skul hem askem hu nao hem savve story witim abaotem datwan. Hem barava sapraes taem olketa sei for hem go lukim wanfala gele wea hem 10 year nomoa! María Isabel smile big taem hem sei: “Hem expectim samwan wea big finis.” María Isabel givim invitation long datfala woman and story lelebet abaotem datwan. Then hem askem datfala woman wea nao hem stap mekem hem and parents bilong hem savve visitim woman hia for story moa abaotem Kingdom bilong God. Datfala woman and 26 nara Mapuche pipol olketa kam long Memorial, and datwan mekem 20 pablisa wea preach long Mapuche pipol olketa hapi tumas. Distaem datfala grup hem kamap wanfala kongregeson wea barava gohed gud!

Nomata wanem nao age bilong iu, waswe, iu tu savve invaetem olketa skulfren or wakfren for kam long Memorial, wanfala pablik tok, or distrik convention? Maet iu kasem samfala idea long hao for duim diswan from olketa experience long olketa pablikeson bilong iumi. And tu, iu savve askem Jehovah for givim holy spirit long iu mekem iu no fraet for story long narawan abaotem hem. (Luke 11:13) Sapos iu duim olsem, maet iu tu bae hapi tumas for kasem gud samting wea kamaot from olketa plan bilong iu.