WASWE, IU TINGIM YET?
Waswe, iu readim olketa Wastaoa magasin wea iumi kasem no longtaem go nomoa and ting raonem samting wea iu readim? Trae for ansarem olketa kwestin hia:
Long wanem taem long Nisan 14 nao olketa Israelite mas busarem pikinini sheepsheep for Pasova?
Samfala Bible transleison sei olketa mas busarem datfala sheepsheep “long evening bifor hem dark.” Diswan hem minim taem wea sun hem go daon, bat hem no dark yet. (Ex. 12:6)—12/15, page 18-19.
Wanem nao samfala Bible principle wea savve helpem olketa young wan for mekem olketa gudfala disison?
Thrifala principle hem olsem: (1) Kingdom and olketa samting wea God sei hem stret mas first samting long laef bilong iu. (Matt. 6:19-34) (2) Kasem hapi long wei for helpem olketa narawan. (Acts 20:35) (3) Hapi for worshipim Jehovah taem iu young. (Eccl. 12:1)—1/15, page 19-20.
Hu nao fofala man wea raedem horse start kam long 1914?
Jesus, wea raedem horse wea kala bilong hem white, hem aotem Satan and olketa demon bilong hem from heven. Man wea raedem horse wea kala bilong hem red, hem piksarem olketa war wea barava spoelem olketa man. Man wea raedem horse wea kala bilong hem blak hem piksarem bigfala hangre. Man wea raedem horse wea kala bilong hem luk nogud piksarem olketa nogud sik, wea killim dae pipol. (Rev. 6:2-8)—3/1, page 6-7.
Wanem taem nao “marit bilong datfala Pikinini Sheepsheep” bae kamap? (Rev. 19:7)
“Marit bilong datfala Pikinini Sheepsheep” bae kamap bihaen Bigfala Babylon hem finis and Jesus Christ finisim evri nara part long world bilong Satan long Armageddon.—2/15, page 10.
Why nao Bible sei olketa Jew long taem bilong Jesus “weitim” Messiah for kam? (Luke 3:15)
Luk olsem olketa Jew long first-century no luksavve long stretfala mining bilong profesi bilong Daniel abaotem Messiah. (Dan. 9:24-27) Nomata olsem, maet olketa Jew herem hao wanfala angel talemaot long samfala man wea lukaftarem sheepsheep hao Christ hem born. Or maet olketa herem tu story abaotem wanem Anna talem taem hem lukim baby Jesus long temple. And tu, olketa man from East kam lukaotem “pikinini wea bae hem king bilong olketa Jew.” (Matt. 2:1, 2) Bihaen, John Baptaesa talemaot Christ hem klosap for kam.—2/15, pages 26-27.
Wanem nao bae helpem iumi for evritaem duim wanem iumi talem? (2 Cor. 1:18)
Hem tru, samfala taem maet samting happen wea mekem hem hard for iumi duim wanem iumi promis for duim. Bat sapos iumi promis or sei bae iumi duim wanfala samting, iumi mas traem best for duim datwan.—3/15, page 32.
Hao nao iumi savve stap klia long wei for lukluk long pornography?
Thrifala samting wea savve helpem iumi hem olsem: (1) Kwiktaem luk difren sapos seknomoa iumi lukim eni rabis piksa. (2) Kontrolem tingting bilong iumi long wei for tingim olketa gud samting and prea long Jehovah. (3) Kontrolem iumiseleva long wei for stap klia long olketa movie or Web site wea showim pornography.—5/1, pages 10-12.
Sapos wanfala Christian lusim famili for go waka long nara ples, wanem nao samfala problem wea savve kamaot from datwan?
Taem dadi and mami no stap tugeta, datwan savve spoelem feeling bilong olketa pikinini and tingting bilong olketa abaotem wanem hem stret and no stret. Maet olketa pikinini kros long dadi and mami. And tu, hasband and waef wea no stap tugeta savve kasem test for no faithful long each other.—4/15, page 19-20.
Wanem fofala kwestin nao iumi shud tingim taem iumi duim preaching waka?
Wanem kaen man nao mi story witim? Long wea nao mi story witim pipol? Wanem taem nao hem gud for story witim pipol? Hao nao mi shud story long pipol?—5/15, page 12-15.
Haomas pipol wea smoke nao olketa dae?
Insaed long wan handred year wea go pas finis, 100,000,000 pipol wea smoke nao olketa dae. Distaem, samting olsem 6,000,000 pipol wea smoke nao olketa dae evri year.—7/1, page 3.