Wanem Jesus Teachim Abaotem God

“Son nomoa savve gud long Dadi long heven. Bat Son hem laek for story abaotem Dadi long olketa narawan, mekem olketa tu savve long [Dadi].”​—LUKE 10:22, CONTEMPORARY ENGLISH VERSION.

BIFOR firstborn Son bilong God kam long earth, hem stap longfala taem long heven witim Dadi bilong hem. Tufala barava fren gud tugeta. (Colossians 1:​15) Dastawe Son hem savve gud long tingting, feeling, and wei bilong Dadi bilong hem. Taem disfala Son kam long earth, wea nem bilong hem Jesus, hem barava laek tumas for teachim pipol tru samting abaotem Dadi bilong hem. Iumi savve lanem staka samting abaotem God taem iumi readim wanem Jesus talem abaotem hem.

Nem bilong God Nem bilong God, Jehovah, hem barava important tumas long Jesus. Jesus laekem pipol for savve long nem bilong Dadi bilong hem and iusim datwan. Nem bilong Jesus hem minim “Jehovah Hem Sevem Iumi.” Long naet bifor Jesus dae, hem prea long Jehovah olsem: “Mi talemaot nem bilong iu long olketa.” (John 17:26) Iumi no sapraes Jesus iusim nem bilong God and talemaot nem hia long pipol. Tru tumas, sapos Jesus no mekem pipol savve long nem bilong God and wanem nao nem hia hem minim, hard tumas for olketa savve long tru samting abaotem Jehovah!a

Bigfala love bilong God Jesus prea olsem long God: “Dadi, . . . iu lovem mi long taem bifor yet.” (John 17:24) God barava lovem Jesus taem hem stap long heven, dastawe taem Jesus stap long earth, Jesus trae hard for showimaot datfala love long staka wei.

Jesus showimaot love bilong Jehovah hem big tumas. Jesus sei: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.” (John 3:​16) Greek word for “world” hem no minim “earth.” Bat long disfala scripture “world” hem minim olketa man. God lovem tumas olketa man, dastawe hem givim kam Son wea hem lovem tumas mekem olketa man wea faithful savve kamap free from sin and dae and kasem laef olowe. Iumi hard for minim bigfala love wea God showimaot for iumi.​—Romans 8:​38, 39.

Wanem Jesus talem mekem iumi savve long disfala tru samting: Jehovah barava lovem olketa man wanwan wea worshipim hem. Jesus teachim hao Jehovah hem olsem shepherd wea savve long olketa sheepsheep and hem lovem olketa wanwan. (Matthew 18:12-​14) Jesus hem sei Jehovah savve tu taem wanfala smol bird hem dae. And Jesus sei moa: “Hem kaontem finis tu evri hair long hed bilong iufala.” (Matthew 10:29-​31) So sapos Jehovah hem savve taem wanfala smol bird hem dae, waswe long pipol wea worshipim hem? Hem lukluk gud long olketa man wanwan wea worshipim hem and hem barava tingim olketa! Sapos Jehovah kaontem finis evri hair long hed bilong iumi, hem savve tu long evri samting abaotem iumi, olsem wanem iumi needim, hard taem wea iumi kasem, and olketa samting wea iumi wari abaotem!

Dadi long heven Iumi storyim finis hao long article bifor diswan, Jesus hem spesol Son bilong God. Dastawe staka taem Jesus kolem Jehovah “Dadi” taem hem story long hem and taem hem story long nara pipol abaotem hem. Interesting samting nao, firstfala toktok wea Jesus talem wea Bible storyim, hem long taem wea Jesus stap long temple taem hem 12 year. Hem sei Jehovah hem ‘Dadi bilong hem.’ (Luke 2:49) Disfala toktok “Dadi” stap klosap 190 taem long olketa Gospel. Jesus kolem Jehovah “Dadi bilong iufala,” “Dadi bilong mifala,” and “Dadi bilong mi.” (Matthew 5:​16; 6:9; 7:​21) From Jesus iusim datfala word “Dadi” staka taem, datwan showimaot olketa man wea no perfect and wea sin savve fren gud witim Jehovah.

Sorre and kaen long pipol and willing for forgive Jesus savve from olketa man no perfect, olketa needim Jehovah for sorre and kaen long olketa. Long tokpiksa abaotem prodigal son, Jesus markem Jehovah witim dadi wea savve forgive and wea garem bigfala love for son bilong hem wea repent. (Luke 15:11-​32) Wanem Jesus talem mekem iumi savve Jehovah bae sorre and kaen long eni man wea duim samting for showimaot hem repent. Jehovah barava laek for forgivim man wea repent. Jesus sei: “Olketa long heven hapi long naenti-naen raeteous man wea no need for repent, bat iu savve, bae olketa barava hapi tumas taem wanfala man wea sin hem repent.” (Luke 15:7) Hu nao bae les for fren gud witim God wea sorre and kaen long pipol?

God wea herem prea Taem Jesus stap long heven bifor hem kam long earth, hem lukim wei wea Jehovah ‘herem prea bilong pipol’ and hao Jehovah laek tumas for herem prea bilong olketa faithful man wea worshipim hem. (Psalm 65:2) Dastawe taem Jesus duim ministry bilong hem, hem teachim olketa man wea lisin long hem hao for prea and wanem for prea abaotem. Hem sei long olketa: “Taem iu prea, no talem sem samting evritaem.” Hem talem olketa for askem ‘God for duim samting wea hem plan for duim long earth, long sem wei wea hem duim datwan long heven.’ Iumi savve prea tu for olketa samting wea iumi needim, for God forgivim sin bilong iumi, and for iumi no foldaon long eni samting wea switim iumi for duim wanem hem no stret. (Matthew 6:​5-​13) Jesus teachim hao Jehovah hem dadi wea herem prea bilong pipol wea worshipim hem.​—Matthew 7:​7-​11.

Tru tumas, Jesus waka hard for teachim tru samting abaotem Jehovah and olketa wei bilong Hem. Bat Jesus laek for teachim pipol nara samting tu abaotem Jehovah. Hem wanem Jehovah bae iusim for mekem olketa bigfala change kamap long world wea bae mekem plan bilong Hem for earth and olketa man kamap tru. Tru tumas, diswan nao main samting wea Jesus preachim long pipol.

[Footnote]