Barava Followim Example Bilong Jesus
“Mi showimaot example for iufala, so olsem mi duim long iufala, iufala mas duim tu.”—JOHN 13:15.
1. Why nao Jesus hem wanfala example wea fitim for olketa Christian followim?
LONG history bilong olketa man, wanfala man nomoa no sin long full laef bilong hem. Jesus nao datfala man. ‘Evri nara man sin.’ (1 Kings 8:46; Romans 3:23) Dastawe olketa tru Christian ting long Jesus olsem perfect example for followim. Tru nao, long Nisan 14, 33 C.E., no longtaem bifor hem dae, Jesus talem olketa disaepol for followim example bilong hem. Hem sei: “Mi showimaot example for iufala, so olsem mi duim long iufala, iufala mas duim tu.” (John 13:15) Long last naet bifor hem dae, Jesus storyim samfala wei wea olketa Christian shud trae for followim hem. Long disfala article, bae iumi lukluk long samfala wei hia.
Why Iumi Mas Hambol
2, 3. Hao nao Jesus hem perfect example bilong hambol fasin?
2 Taem Jesus encouragem olketa disaepol for followim example bilong hem, diswan minim saed long hambol fasin. Planti taem Jesus kaonselem olketa follower bilong hem for hambol, and long datfala naet long Nisan 14, hem showimaot hambol fasin bilong hemseleva taem hem wasim leg bilong olketa aposol. Bihaen, Jesus hem sei: “Sapos mi, nomata mi Lord and Teacher, wasim leg bilong iufala, iufala tu mas wasim leg bilong narawan.” (John 13:14) Then hem talem olketa aposol for followim example bilong hem. Hem nao nambawan example bilong hambol fasin!
3 Aposol Paul talem iumi hao bifor Jesus hem kam long earth hem “wanfala spirit olsem God.” Nomata olsem, hem lusim hae position bilong hem and kamap wanfala man long earth. And tu, “hem mekem hemseleva hambol and obey go kasem taem hem dae long torture stake.” (Philippians 2:6-8) Ting raonem datwan. Jesus, wea garem barava hae position long universe, hem willing for low winim olketa angel, for born olsem wanfala baby, for stap anda long parents wea no perfect, and for dae olsem wanfala nogud criminal. (Colossians 1:15, 16; Hebrews 2:6, 7) Datwan nao hambol fasin! Waswe, iumi fit for followim datfala “wei for tingting” and mekem grow “hambol tingting” olsem Jesus? (Philippians 2:3-5) Ia, iumi fit, bat hem no isi for duim datwan.
4. Olketa wanem samting savve mekem man praod, and why nao disfala fasin mekem man stap long danger?
4 Hambol fasin hem difren evribit from praod fasin. (Proverbs 6:16-19) Praod fasin nao spoelem Satan. (1 Timothy 3:6) Praod fasin hem isi for grow long heart bilong olketa man, and taem hem kamap, hem no isi for aotem. Pipol savve praod bikos long kantri, tribe, samting olketa ownim, education, samting olketa duim, position long community, lukluk, saed long sports, and staka nara samting. Bat olketa samting hia nating important long Jehovah. (1 Corinthians 4:7) And sapos olketa samting olsem mekem iumi kamap praod, datwan spoelem wei wea iumi fren witim hem. “From nomata Jehovah hem hae, hem lukim hambol wan; bat man wea praod hem lukim from farawe.”—Psalm 138:6; Proverbs 8:13.
Hambol Midolwan Olketa Brata
5. Why nao olketa elder mas hambol?
5 Olketa responsibility wea iumi garem long kongregeson and wei wea iumi sapotim and waka insaed long service bilong Jehovah shud no mekem iumi kamap praod. (1 Chronicles 29:14; 1 Timothy 6:17, 18) For tok stret, taem iumi garem olketa responsibility wea moa big, iumi need for kamap moa hambol. Aposol Peter encouragem olketa elder for no ‘bossim olketa wea God ownim, bat kamap example long olketa sheep.’ (1 Peter 5:3) Olketa elder kasem appointment for kamap olketa servant and example, no olketa boss and bigman.—Luke 22:24-26; 2 Corinthians 1:24.
6. Iumi olketa Christian mas garem hambol fasin taem olketa wanem samting happen long laef bilong iumi?
6 Hem no olketa elder nomoa wea mas hambol. Peter raet long olketa young man wea maet praod from mind bilong olketa kwiktaem for tekem samting and olketa moa strong long physical wei winim olketa olo. Hem sei: “Garem hambol tingting taem iufala deal witim each other, bikos God hem againstim praod pipol, bat hem showimaot kaeness wea man no fit for kasem long olketa hambol wan.” (1 Peter 5:5) Tru nao, iumi evriwan mas garem hambol fasin olsem Christ. Iumi mas hambol for preachim gud nius, especially taem pipol no interest or tok kros. Iumi mas hambol for acceptim kaonsel or for garem simpol laef, mekem iumi savve duim moa samting long ministry. And tu, iumi needim hambol fasin, faith, and fasin for no fraet taem olketa nius report tok nogud abaotem iumi, taem pipol iusim law for againstim iumi, or taem iumi kasem raf persecution.—1 Peter 5:6.
7, 8. Wanem nao samfala wei wea iumi savve mekem grow hambol fasin?
7 Hao nao wanfala man savve lusim praod fasin and showimaot “hambol tingting [and] tingim narafala pipol olsem hae” winim hem? (Philippians 2:3) Hem need for ting long hemseleva olsem Jehovah ting long hem. Jesus explainim stretfala wei for iumi ting long iumiseleva taem hem sei: “So iufala tu, bihaen iufala duim evri samting wea iufala mas duim, iufala mas sei, ‘Mifala nao olketa iusles slave nomoa. Samting wea mifala duim hem samting wea mifala shud duim.’ ” (Luke 17:10) No forget, Jesus duim staka samting winim wanem iumi savve duim. Nomata olsem, Jesus hem hambol.
8 And tu, iumi savve askem Jehovah for helpem iumi for garem stretfala tingting abaotem iumiseleva. Iumi savve prea olsem man wea raetem psalm, wea sei: “Teachim mi gudfala fasin, gudfala tingting and savve, from mi showimaot faith long olketa komandment bilong iu.” (Psalm 119:66) Jehovah bae helpem iumi for garem stretfala and balance tingting abaotem iumiseleva, and bae hem blessim hambol tingting bilong iumi. (Proverbs 18:12) Jesus sei: “Eniwan wea mekem hemseleva hae, bae kamap hambol, and eniwan wea mekem hemseleva hambol, bae kamap hae.”—Matthew 23:12.
Stretfala Tingting Abaotem Wanem Hem Stret and No Stret
9. Hao nao Jesus ting long samting wea stret and no stret?
9 Nomata Jesus stap for 33 year witim pipol wea no perfect, hem “no garem sin.” (Hebrews 4:15) Tru nao, taem man wea raetem psalm profesi abaotem Messiah, hem sei: “Iu lovem raeteous fasin, and iu heitim wicked fasin.” (Psalm 45:7; Hebrews 1:9) Long disfala wei tu olketa Christian trae for followim Jesus. Olketa savve wanem hem stret and no stret, and tu, olketa heitim samting wea no stret and lovem samting wea stret. (Amos 5:15) Diswan helpem olketa for faet againstim feeling for duim sin wea evri man born witim.—Genesis 8:21; Romans 7:21-25.
10. Sapos iumi gohed for duim “olketa nogud samting” and no repent, diswan showimaot iumi garem wanem tingting?
10 Jesus talem datfala Pharisee Nicodemus: “Man wea duim olketa nogud samting hem heitim laet and no kam long laet, mekem no eniwan stretem hem. Bat man wea duim trufala samting bae kam long laet, mekem waka bilong hem showaot olsem samting wea wan mind witim God.” (John 3:20, 21) Tingim: John talem hao Jesus nao “trufala laet wea givim laet long evri difren kaen pipol.” (John 1:9, 10) Bat Jesus sei sapos iumi duim “olketa nogud samting”—samting wea no stret and wea God no acceptim—iumi heitim datfala laet. Tingim sapos samwan heitim Jesus and olketa standard bilong hem. Hem nao samting wea pipol duim taem olketa gohed for duim sin and no repent. Maet olketa no ting olketa heitim Jesus and olketa standard bilong hem, bat hem nao wei wea Jesus ting long olketa.
Hao for Mekem Grow Tingting Bilong Jesus Abaotem Samting wea Stret and No Stret
11. For garem sem tingting olsem Jesus abaotem samting wea stret and no stret, iumi mas duim wanem?
11 Iumi need for minim gud tingting bilong Jehovah saed long samting wea stret and no stret. Only wei for kasem datwan hem for studyim Word bilong God, Bible. Taem iumi study, iumi need for prea olsem man wea raetem psalm wea sei: “Mekem mi savve long olketa wei bilong iu, O Jehovah; teachim mi olketa road bilong iu.” (Psalm 25:4) Bat, no forget, Satan savve trikim iumi. (2 Corinthians 11:14) Hem savve haedem samting wea no stret for mekem datwan luk stret nomoa long wanfala Christian wea no luk aot gud. Dastawe, iumi need for barava ting raonem samting iumi lanem and followim gud kaonsel from “faithful and wise slave.” (Matthew 24:45-47) Study, prea, and wei for ting raonem samting iumi lanem bae helpem iumi for kamap mature long spiritual wei, and mekem iumi kamap wanfala long olketa wea “thru long wei for iusim, trainim paoa bilong olketa for luksavve long samting wea stret and no stret.” (Hebrews 5:14) Datwan bae helpem iumi for heitim samting wea no stret and lovem samting wea stret.
12. Wanem kaonsel from Bible nao helpem iumi for no duim samting wea no stret?
12 Sapos iumi heitim samting wea no stret, bae iumi no letem feeling for laekem kaen samting olsem for grow long heart bilong iumi. Planti year bihaen Jesus hem dae, aposol John hem raet: “No lovem world or olketa samting insaed long world. Sapos eniwan lovem world, hem no lovem Father; bikos evriting long world—samting wea body wantem and samting wea eye wantem and wei for show-off witim samting wea man garem—hem no kam from Father, bat hem kam from world.”—1 John 2:15, 16.
13, 14. (a) Why nao wei for lovem olketa samting bilong disfala world hem danger for olketa Christian? (b) Hao nao iumi savve stap klia long wei for lovem olketa samting bilong world?
13 Samfala maet tingse samfala samting long disfala world hem gud nomoa. Nomata datwan hem tru, hem isi tumas for samting bilong disfala world for pullim interest bilong iumi, gogo, iumi lusim wei for servem Jehovah. And no eni samting bilong disfala world hem for helpem iumi kam moa klos long God. Dastawe, sapos iumi start for lovem olketa samting long disfala world, nomata hem olketa samting wea no rong, iumi stap long danger. (1 Timothy 6:9, 10) And tu, staka samting long disfala world hem barava nogud and savve spoelem iumi. Sapos iumi lukluk long olketa movie or television program wea mekhae long raf fasin, wei for lovem material samting, or dirty fasin, iumi savve start for ting nating long olketa samting hia—and then olketa samting hia savve isi for switim iumi. Sapos iumi kaban witim pipol wea interest tumas for garem gudfala living or for win saed long bisnis, kaen samting olsem savve kamap barava important long iumi tu.—Matthew 6:24; 1 Corinthians 15:33.
14 Long narasaed, sapos iumi hapi long Word bilong Jehovah, “samting wea body wantem and samting wea eye wantem and wei for show-off witim samting wea man garem” bae no switim iumi. And tu, sapos iumi kaban witim olketa wea putim Kingdom bilong God olsem first samting long laef, bae iumi kamap olsem olketa and lovem samting olketa lovem and stap klia long samting olketa stap klia long hem.—Psalm 15:4; Proverbs 13:20.
15. Hao nao wei for lovem raeteous fasin and heitim samting wea no stret, olsem Jesus duim, savve strongim iumi?
15 Wei wea Jesus heitim samting wea no stret and lovem raeteous fasin helpem hem for tingim evritaem “datfala hapi wea stap front long hem.” (Hebrews 12:2) Iumi savve duim sem samting tu. Iumi savve hao “world and evri samting wea pipol long world laekem redi for finis.” Eni hapi wea man kasem from disfala world hem for lelebet taem nomoa. Bat “man wea duim will bilong God bae stap olowe.” (1 John 2:17) From Jesus duim will bilong God, olketa man kasem chance for laef olowe. (1 John 5:13) Iumi evriwan want for followim hem and kasem gud samting from faithful fasin bilong hem.
Stand Strong Taem Iumi Kasem Persecution
16. Why nao Jesus encouragem olketa follower bilong hem for lovem each other?
16 Jesus storyim nara wei wea olketa disaepol bilong hem bae followim hem taem hem sei: “Diswan nao komandment bilong mi, for iufala mas lovem each other olsem mi lovem iufala.” (John 15:12, 13, 17) Planti difren reason stap why olketa Christian lovem brata bilong olketa. Main samting wea Jesus tingim taem hem talem datfala komandment hem wei wea world bae heitim olketa. Hem sei: “Sapos world heitim iufala, iufala savve world hem heitim mi firstaem bifor hem heitim iufala. . . . Wanfala slave hem no winim masta bilong hem. Sapos olketa persecutim mi, bae olketa persecutim iufala tu.” (John 15:18, 20) Tru nao, nara wei wea olketa Christian olsem Jesus, hem persecution wea olketa kasem. Olketa need for mekem grow strongfala love midolwan long olketa seleva for helpem olketa gohed strong nomata pipol heitim olketa.
17. Why nao world heitim olketa tru Christian?
17 Wanem nao mekem world heitim olketa Christian? Hem bikos olketa “no part bilong world” olsem Jesus. (John 17:14, 16) Olketa no saed witim eni army and no teksaed long politik, olketa followim olketa Bible principle, tinghae long laef olsem holy samting, and garem hae standard saed long fasin. (Acts 15:28, 29; 1 Corinthians 6:9-11) Olketa main goal bilong olketa hem saed long spiritual samting, no material samting. Olketa stap long disfala world, bat olsem Paul hem raet, olketa no ‘iusim world evribit.’ (1 Corinthians 7:31) Hem tru, samfala pipol praisem Olketa Jehovah’s Witness for hae standard bilong olketa. Nomata olsem, olketa no changem standard bilong olketa for mekem pipol praisem or acceptim olketa. From diswan, pipol long world no minim olketa and planti pipol heitim olketa.
18, 19. Followim example bilong Jesus, hao nao olketa Christian deal witim persecution and wei wea pipol againstim olketa?
18 Olketa aposol bilong Jesus lukim hao pipol long disfala world garem bigfala heit taem olketa arrestim and killim dae Jesus, and olketa lukim wei wea Jesus deal witim datwan. Long garden bilong Gethsemane, olketa wea againstim Jesus kam for arrestim hem. Peter iusim sword for trae protectim Jesus, bat hem sei long Peter: “Putim bak sword bilong iu long ples bilong hem, from olketa wea iusim sword bae dae from sword.” (Matthew 26:52; Luke 22:50, 51) Long firstaem, olketa Israelite iusim sword for faetem enemy bilong olketa. Bat datwan hem change nao. Kingdom bilong God hem “no part bilong disfala world” and hem no wanfala nation wea olketa mas protectim. (John 18:36) No longtaem bihaen, Peter bae kamap part bilong wanfala spiritual nation, wea stap long heven. (Galatians 6:16; Philippians 3:20, 21) So, start long datfala taem, olketa disaepol bae followim example bilong Jesus saed long wei for deal witim fasin for heit and persecution—long peaceful wei and witim fasin for no fraet. Olketa bae trust long Jehovah for stretem evri samting and depend long hem for helpem olketa stand strong.—Luke 22:42.
19 Planti year bihaen, Peter hem raet: “Christ hem safa for iufala, and leavim wanfala example for iufala followim long klos wei. . . . Taem pipol tok spoelem hem, hem no tok spoelem olketa. Taem hem safa hem no trae for changem bak, bat hem gohed for trustim datwan wea judge long raeteous wei.” (1 Peter 2:21-23) Olsem Jesus sei bae happen, olketa Christian kasem raf persecution. Long first century and distaem tu, olketa followim example bilong Jesus and garem gudfala nem olsem pipol wea faithful for stand strong long peaceful wei. (Revelation 2:9, 10) Sapos iumi wanwan feisim persecution olsem, iumi laek for duim sem samting.—2 Timothy 3:12.
“Followim Fasin Bilong Lord Jesus Christ”
20-22. Long olketa wanem wei nao olketa Christian “followim fasin bilong Lord Jesus Christ”?
20 Paul raet olsem long kongregeson long Rome: “Followim fasin bilong Lord Jesus Christ, and no plan for olketa samting wea body wantem.” (Romans 13:14) Olketa trae hard for followim olketa fasin and samting wea hem duim and diswan mekem olketa kamap olsem Masta bilong olketa, long wei wea fitim for olketa man wea no perfect.—1 Thessalonians 1:6.
21 Iumi savve win for “followim fasin bilong Lord Jesus Christ” sapos iumi savve gud long laef bilong hem and trae for followim datwan. Iumi followim hambol fasin bilong hem, wei wea hem lovem raeteous fasin and heitim samting wea no stret, wei wea hem lovem olketa brata, hem no part bilong disfala world, and wei wea hem patient for stand strong taem hem safa. Iumi no “plan for olketa samting wea body wantem.” Diswan minim, olketa goal bilong disfala world or samting wea body wantem, hem no main goal long laef bilong iumi. Winim datwan, taem iumi mas disaedem samting or deal witim wanfala problem, iumi shud ting raonem tufala kwestin hia: ‘Hao nao bae Jesus deal witim diswan? Wanem nao bae hem laekem mi for duim?’
22 Last samting, iumi followim Jesus long wei for busy for “preachim gud nius.” (Matthew 4:23; 1 Corinthians 15:58) Long diswan tu, olketa Christian followim example bilong Jesus, and nextfala article bae storyim hao nao olketa duim datwan.
Waswe, Iu Savve Minim?
• Why nao wanfala Christian mas hambol?
• Hao nao iumi savve kasem stretfala tingting abaotem samting wea stret and no stret?
• For deal witim persecution and wei wea pipol againstim olketa, hao nao olketa Christian savve followim example bilong Jesus?
• Hao nao iumi savve “followim fasin bilong Lord Jesus Christ”?
[Piksa long page 7]
Jesus showimaot perfect example bilong hambol fasin
[Piksa long page 8]
Olketa Christian mas showimaot hambol fasin long evri part long laef, wea minim taem olketa preach tu
[Piksa long page 9]
Satan savve mekem nogud hapitaem luk olsem samting wea fitim olketa Christian
[Piksa long page 10]
Love for olketa brata savve strongim iumi taem pipol againstim iumi