Tru Teaching Abaotem Hell Helpem Iu Long Wanem Wei?

OLKETA wea teachim hao hell hem wanfala ples for man safa, olketa mekhae long wei wea againstim Jehovah God and olketa wei bilong hem. Bible talem hao God bae finisim evri rabis pipol. (2 Thessalonians 1:​6-9) Bat stretfala wei for kros bilong God, hem no main wei bilong hem.

God no man for mekem pipol feel nogud or mek trabol. Hemseleva ask olsem: ‘Waswe mi hapi taem rabis man dae?’ (Ezekiel 18:23) Sapos God no hapi taem rabis pipol dae, hao nao hem ting taem hem lukim pipol gohed for safa?

Love hem main wei bilong God. (1 John 4:8) Tru nao, ‘Jehovah hem duim gudfala samting long evriwan. Hem showimaot mercy long iumi and long evri samting wea hem wakem.’ (Psalm 145:9) Dastawe, God laekem iumi for gohed lovem hem.​—Matthew 22:35-​38.

Iu Worshipim God Bikos Iu Lovem Hem or Bikos Iu Fraetem Hell?

Disfala teaching wea sei soul hem safa long hell hem mekem man for fraetem God. Bat man wea lanem trufala samting abaotem God and lovem hem bae garem stretfala wei for fraet long God. Psalm 111:10 hem talem olsem: ‘Wei for fraet long Jehovah hem start bilong bigfala savve. Evriwan wea duim olketa samting hia garem gudfala wei for luksavve.’ Disfala wei for fraet long God hem, no for fraetem God long nogud wei, bat for respectim and honorim Creator. Diswan bae mekem iumi garem stretfala tingting for mekem God hapi and for garem stretfala wei for fraet long hem.

Tingim hao wei for lanem trufala teaching abaotem hell hem helpem Kathleen, wanfala woman wea hem 32 year wea iusim drug bifor. Evritaem hem savve go long olketa party, hem raf, heitim hemseleva and hem olobaot. Hem talem stret: “Taem mi tingim gele bilong mi wea hem wan year nomoa, mi ting olsem: ‘Wanem nao mi duim long hem. Mi bae bone long hell for samting wea mi duim.’ ” Kathleen trae for no iusim drug, bat hem gohed for iusim. Hem sei olsem: “Mi laek changem rabis wei bilong mi bat laef bilong mi long disfala world hem nating gud nomoa. Luk olsem mi no savve kamap gud nao.”

Gogo, Kathleen meetim Olketa Jehovah’s Witness. Hem sei olsem: “Mi lanem hao no eni hellfire stap. Bible barava talemaot stret. Taem mi lanem hao mi bae no bone long hell, datwan barava mekem mi hapi.” And hem lanem promis bilong God hao pipol bae laef olowe long earth and no eni rabis pipol bae stap. (Psalm 37:10, 11, 29; Luke 23:43) Hem hapi for tok olsem: “Distaem mi garem trufala hope for laef olowe long Paradaes!”

From Kathleen no bilivim hellfire, waswe, hem faendem wei for no iusim drug? Hem talem olsem: “Taem mi barava laek iusim drug, mi bae askem Jehovah for helpem mi. Mi tingim hao God no laekem kaen wei olsem, and mi no laek for mekem hem feel sorre. Hem herem prea bilong mi.” (2 Corinthians 7:1) Stretfala wei for fraet long God and wei for laek mekem hem hapi helpem Kathleen for no iusim drug moa.

Tru tumas, wei for lovem God and for garem stretfala wei for fraet long hem savve mekem iumi for duim wanem God laekem and mekem iumi hapi for olowe. Iumi no fraetem nao wei for safa long hell. Man wea raetem psalm sei olsem: “Evriwan wea fraet long Jehovah and duim evri samting wea hem talem, olketa hapi.”​—Psalm 128:1.

[Box/Olketa Piksa long page 9]

HU NAO BAE KAMAOT FROM HELL?

Samfala Bible transleison mekem pipol konfius taem olketa iusim toktok “hell” for transleitim Greek toktok Geʹen·na and Haiʹdes. Taem Bible iusim disfala toktok Geʹen·na, hem minim wei for barava finis wea minim no eni wei for man laef bak. Bat olketa wea stap long Haiʹdes or Hades, wei hem stap for olketa laef bak.

So bihaen Jesus dae and laef bak, aposol Peter talem pipol hao God “no letem Jesus for stap long hell.” (Acts 2:​27, 31, 32; Psalm 16:⁠10; King James Version) Disfala toktok wea olketa transleitim “hell” long disfala verse, hem Haiʹdes long Greek languis. Jesus no go long ples for bone. Hades, or “hell,” hem grev nomoa. Bat hem no Jesus nomoa wea God letem for kamaot from Hades.

Bible storyim taem wea pipol bae laef bak olsem: ‘Dae and hell givim kam olketa wea dae insaed.’ (Revelation 20:13, 14, KJ) God bae markem olketa wea fit for laef bak for kamaot from “hell,” mekem hell hem emti nao. (John 5:​28, 29; Acts 24:15) Hem nambawan hope for taem wea bae kam. Wei for lukim olketa wea iumi lovem wea dae finis laef bak! Hem Jehovah, God wea garem bigfala love nao bae duim diswan.