Love Strongim Iumi for No Fraet
“God no givim iumi spirit bilong fraet, bat bilong paoa and love and gudfala tingting.”—2 TIMOTHY 1:7.
1, 2. (a) Love savve muvim man for duim wanem samting? (b) Why nao wei wea Jesus no fraet hem barava spesol?
WANFALA hasband and waef wea just marit daev long deep sea klosap wanfala taon long east part bilong Australia. Tufala redi for kamaot from sea taem wanfala maeti white shark hem kam for attakim datfala woman. Hasband bilong hem kwiktaem pushim waef bihaenem hem and letem shark tekem hem. Woman hia sei olsem long funeral service bilong hasband bilong hem: “Hem dae for sevem mi.”
2 Tru nao, love savve muvim man for showimaot fasin for barava no fraet. Jesus Christ hem talem disfala toktok: “No eniwan hem garem love wea winim diswan, wea hem willing for lusim laef bilong hem for olketa fren bilong hem.” (John 15:13) No longtaem bihaen Jesus talem toktok hia, hem givim laef bilong hem, no for wanfala man nomoa bat for evri man long earth. (Matthew 20:28) And tu, taem Jesus givim laef bilong hem for sevem iumi, hem no samting wea hem seknomoa duim. Hem savve finis pipol bae tok spoelem hem, deal witim hem long nogud wei, accusim hem rong and killim hem dae long wanfala post. And tu, hem redyim olketa disaepol bilong hem for diswan taem hem sei: “Iumi gogo ap long Jerusalem distaem, and olketa bae givim Son bilong man long olketa chief priest and scribe, and olketa bae judgem hem for dae, and olketa bae givim hem go long olketa man bilong olketa nation, and olketa bae mekfani long hem and spit long hem and whipim hem and killim hem dae.”—Mark 10:33, 34.
3. Wanem nao helpem Jesus for barava no fraet?
3 Wanem nao samfala samting wea mekem Jesus barava no fraet olsem? Samting wea barava helpem hem nao faith and fasin for fraet long God. (Hebrews 5:7; 12:2) Bat main samting wea mekem Jesus no fraet hem love wea hem garem for God and for olketa man long earth. (1 John 3:16) Sapos iumi mekem grow kaen love olsem and garem faith and fasin for fraet long God, bae iumi tu fit for showimaot fasin for no fraet olsem Christ. (Ephesians 5:2) Hao nao iumi savve mekem grow kaen love olsem? Iumi need for luksavve hu nao mekem iumi fit for garem and showimaot love hia.
“Love Hem Kam From God”
4. Why nao iumi fit for sei love hem kam from Jehovah?
4 Jehovah nao hem showimaot love winim eni narawan and love kam from hem. Aposol John hem raet olsem: “Olketa wea mi lovem, iumi mas gohed for lovem narawan, bikos love hem kam from God, and evriwan wea garem love hem pikinini bilong God and hem kasem savve abaotem God. Man wea no showimaot love hem no savve long God, bikos God hem love.” (1 John 4:7, 8) So man savve mekem grow semkaen love wea God showimaot only sapos hem fren gud witim Jehovah long wei for kasem stretfala savve, and barava willing for duim samting followim datfala savve.—Philippians 1:9; James 4:8; 1 John 5:3.
5, 6. Wanem nao helpem olketa firstfala disaepol bilong Christ for mekem grow sem love wea Christ showimaot?
5 Long lastfala prea wea Jesus talem witim 11-fala faithful aposol bilong hem, hem showimaot hao wei for savve long God hem join witim wei for mekem love kamap moa big. Hem sei olsem: “Mi talemaot nem bilong iu long olketa and mi bae gohed for talemaot, mekem datfala love wea iu showimaot long mi olketa tu savve garem and mi savve wan mind witim olketa.” (John 17:26) Jesus helpem olketa disaepol bilong hem for garem love wea hem and Dadi bilong hem garem for each other. Taem iumi tingim toktok bilong Jesus and samting wea hem duim, hem mekem iumi tingim olketa nambawan fasin bilong God wea join witim nem bilong Hem. Dastawe Jesus fit for sei: “Man wea lukim mi hem lukim Father tu.”—John 14:9, 10; 17:8.
6 Wei for showimaot sem love olsem Christ hem wanfala frut bilong holy spirit bilong God tu. (Galatians 5:22) Taem olketa firstfala Christian kasem datfala holy spirit long Pentecost 33 C.E., olketa rememberim staka samting wea Jesus teachim long olketa, and tu, olketa savve gud go moa long mining bilong olketa Scripture. Disfala deep savve hem mekem love wea olketa garem for God kamap moa strong. (John 14:26; 15:26) Wanem nao kamaot from diswan? Olketa strong for preachim gud nius and olketa no fraet, nomata wei for duim datwan mekem laef bilong olketa stap long danger.—Acts 5:28, 29.
Fasin for No Fraet and Love Hem Showaot
7. Wanem nao kasem Paul and Barnabas long missionary gogo bilong tufala?
7 Aposol Paul hem raet olsem: “God no givim iumi spirit bilong fraet, bat bilong paoa and love and gudfala tingting.” (2 Timothy 1:7) Paul hem story abaotem samting wea kasem hem. Tingim hard taem wea hem and Barnabas kasem long missionary gogo bilong tufala. Tufala preach long plande taon, wea samfala hia hem Antioch, Iconium, and Lystra. Long each taon, samfala kamap man for biliv, bat olketa narawan againstim olketa and deal witim olketa long raf wei. (Acts 13:2, 14, 45, 50; 14:1, 5) Long Lystra wanfala sekson wea kros fogud sutim Paul witim ston and leavim hem from olketa tingse hem dae nao! “Bat taem olketa disaepol hipap raonem hem, hem standap and go insaed long datfala taon. And long next day hem go long Derbe witim Barnabas.”—Acts 14:6, 19, 20.
8. Hao nao wei wea Paul and Barnabas no fraet hem showimaot bigfala love wea tufala garem for pipol?
8 From pipol trae for killim dae Paul, waswe, diswan mekem hem and Barnabas fraet and stop for preach? Nomoa nao! Bihaen tufala “mekem plande for kamap disaepol” long Derbe, tufala “go bak long Lystra, Iconium, and Antioch.” Why nao olsem? Mekem tufala savve encouragem olketa niu wan for gohed garem strongfala biliv. Paul and Barnabas sei olsem: “Iumi mas kasem plande hard taem bifor iumi savve go insaed long kingdom bilong God.” Tru nao, from olketa garem bigfala love for olketa “smol sheep” bilong Christ, tufala hia nating fraet. (Acts 14:21-23; John 21:15-17) Bihaen tufala appointim olketa elder insaed each niu kongregeson hia, tufala prea for olketa and “givim olketa hia wea biliv long Jehovah.”
9. Hao nao olketa elder long Ephesus ting long love wea Paul garem for olketa?
9 From Paul garem bigfala love for pipol and hem man wea nating fraet, staka Christian long datfala taem barava lovem hem. Tingim samting wea happen long wanfala meeting wea Paul garem witim olketa elder from Ephesus, wea hem nao ples wea hem stap for thrifala year bifor and wea pipol barava againstim hem. (Acts 20:17-31) Bihaen Paul encouragem olketa for lukaftarem olketa sheep bilong God, hem nildaon witim olketa and prea. Then, “evriwan long olketa krae, and olketa holem Paul and kissim hem, bikos olketa barava feel sorre taem hem sei olketa bae no lukim hem moa.” Olketa brata hia barava lovem Paul! Tru nao, Paul and olketa wea go witim hem barava faendem hem hard for lusim olketa, bikos olketa elder hia barava feel sorre tumas and no laekem olketa for go.—Acts 20:36–21:1.
10. Hao nao olketa Witness bilong Jehovah distaem showimaot love for each other nomata datwan mekem olketa stap long danger?
10 Distaem, iumi barava lovem olketa traveling overseer, olketa elder long kongregeson and plande narawan, bikos olketa no fraet taem olketa helpem olketa sheep bilong Jehovah. Olsem example, long olketa kantri wea war gohed or gavman tambuim preaching waka, olketa traveling overseer and waef bilong olketa putim laef and freedom bilong olketa long danger mekem olketa savve visitim olketa kongregeson. And tu, olketa raf ruler and sekson bilong olketa mekem staka Witness safa, bikos olketa hia no givim information abaotem olketa nara Witness, or talem wea nao olketa kasem spiritual kaikai. Pipol persecutim plande thousand Witness, spoelem olketa, and killim olketa dae tu bikos olketa gohed for preachim gud nius and hipap tugeta long olketa Christian meeting, nomata gavman tambuim olketa for duim datwan. (Acts 5:28, 29; Hebrews 10:24, 25) Iumi laek for garem sem faith and love olsem olketa brata and sista hia wea nating fraet!—1 Thessalonians 1:6.
No Letem Love Bilong Iu Gogo Daon
11. Wanem nao olketa wei wea Satan faet againstim olketa servant bilong Jehovah, and wanem nao olketa mas duim for mekem hem no spoelem olketa?
11 Taem Jesus torowem Satan kam daon long earth, Satan barava laek for aotem kros bilong hem long olketa servant bilong Jehovah bikos olketa ‘obeyim olketa komandment bilong God and witness abaotem Jesus.’ (Revelation 12:9, 17) Wanfala wei wea Devil iusim hem persecution. Bat plande taem diswan hem kikbak, bikos hem mekem pipol bilong God garem love wea moa strong for each other, and hem muvim plande long olketa for duim moa samting. Narafala wei wea Satan iusim hem for trae switim iumi for duim samting wea body laekem. For againstim diswan, iumi needim wanfala difren kaen wei for no fraet, bikos iumi mas disaed strong for againstim olketa rong feeling, wea heart bilong iumi wea savve ‘trikim iumi’ hem laekem.—Jeremiah 17:9; James 1:14, 15.
12. Hao nao Satan iusim “spirit bilong world” for mekem love bilong iumi for God hem gogo daon?
12 Narafala samting wea Satan iusim for barava spoelem man nao hem “spirit bilong world,” wea minim, main tingting bilong pipol and samting wea muvim olketa wea barava againstim holy spirit bilong God. (1 Corinthians 2:12) Spirit bilong world hem mekhae long greedy fasin and wei for lovem tumas material samting, wea hem nao “samting wea eye wantem.” (1 John 2:16; 1 Timothy 6:9, 10) Nomata hem no rong for garem olketa material samting and selen, sapos iumi lovem olketa hia winim God, then Satan hem win nao. Samting wea mekem datfala spirit bilong world garem “paoa” hem wei wea hem pullim man for duim samting wea body laekem. Hem savve isisi spoelem man long wei wea haed, hem pullim man olowe, and hem olsem air, bikos datfala spirit hem stap evriwea raonem iumi. No letem spirit bilong world spoelem heart bilong iu!—Ephesians 2:2, 3; Proverbs 4:23.
13. Olketa wanem samting nao savve testim wei wea iumi garem klin fasin?
13 Bat for againstim and rejectim nogud spirit bilong world, and gohed for garem fasin wea klin, iumi needim fasin for no fraet. Olsem example, man mas no shame long narawan and no fraet for offem video, computer, or television taem olketa dirty piksa kamap. Man mas no fraet for rejectim olketa samting wea olketa fren laekem hem for duim or for stop for kaban witim olketa nogud man. And tu, man mas no fraet for obeyim olketa law and principle bilong God nomata olketa skulfren, wakfren, neiba, or relative tok spoelem hem.—1 Corinthians 15:33; 1 John 5:19.
14. Sapos spirit bilong world affectim iumi, wanem nao iumi shud duim?
14 Dastawe hem important tumas for iumi strongim love wea iumi garem for God and for olketa spiritual brata and sista bilong iumi! Ting raonem olketa goal and living bilong iu for lukim sapos spirit bilong world hem affectim iu long eni wei. Sapos spirit hia hem affectim iu, nomata maet lelebet nomoa, iu mas prea long Jehovah for helpem iu disaed strong for aotem datwan from iu and no letem datwan spoelem iu moa. Jehovah bae ansarem olketa prea olsem wea man talem from heart. (Psalm 51:17) Nara samting tu, spirit bilong hem nao strong winim spirit bilong world.—1 John 4:4.
No Fraet Taem Iumi Wanwan Feisim Hard Samting
15, 16. Hao nao wei for garem love olsem Christ savve helpem iumi for deal witim olketa hard samting? Storyim wanfala example.
15 Olketa nara hard samting wea olketa servant bilong Jehovah mas deal witim nao hem wei for no perfect and olo, wea plande taem mekem olketa sik, disable, wikdaon, and garem staka narafala problem. (Romans 8:22) Sapos iumi garem love olsem Christ, datwan savve helpem iumi for deal witim olketa problem hia. Tingim example bilong Namangolwa, wea growap insaed wanfala Christian famili long Zambia. Taem hem tu year, hem kamap disable. Hem sei: “Mi savve barava feel shame bikos mi tingse pipol bae lukluk strong long mi. Bat olketa spiritual brata bilong mi helpem mi for no ting olsem. From diswan, mi winim nao feeling for barava shame, and gogo mi baptaes.”
16 Nomata Namangolwa hem garem wanfala wheelchair, plande taem hem mas wakabaot long hand and knee bilong hem taem hem go long bush road. Nomata olsem, hem savve auxiliary pioneer for tufala month evri year. Wanfala haosholder hem krae taem Namangolwa witness long hem. Why nao olsem? From faith and wei wea sista bilong iumi no fraet hem barava muvim haosholder hia. Jehovah barava blessim Namangolwa. Faevfala Bible student bilong hem baptaes finis, and wanfala hem elder long kongregeson. Namangolwa hem sei: “Leg bilong mi savve soa fogud, bat mi no letem datwan stopem mi.” Sista hia hem wanfala nomoa long staka Witness raonem world wea wik long body bat barava strong long ministry bikos olketa lovem God and neiba. Olketa hia barava spesol long Jehovah!—Haggai 2:7.
17, 18. Wanem nao helpem plande for deal witim sik and olketa narafala hard samting? Talem example bilong samfala wea iu savve.
17 Olketa sik wea gohed for longtaem tu savve barava mekem man wikdaon and feel sorre. Wanfala elder hem sei: “Long buk study wea mi attendim, wanfala sista hem garem sugar and kidney bilong hem nogud, nara sista garem cancer, tufala sista garem bigfala pain long olketa join from arthritis, and wanfala sista garem tufala nogud sik wea nem bilong tufala lupus and fibromyalgia. Samfala taem olketa feel wikdaon. Bat no enitaem olketa missim olketa meeting, taem olketa sik big or stap long hospital nomoa olketa no kam. Evriwan long olketa duim preaching waka evritaem. Olketa mekem mi tingim toktok bilong Paul taem hem sei: ‘Taem mi wik, hem nao taem wea mi strong.’ Mi tinghae tumas long love bilong olketa and wei wea olketa disaed strong for duim samting. Maet from health bilong olketa hem no mas gud, diswan mekem olketa barava luksavve long samting wea really important long laef.”—2 Corinthians 12:10.
18 Sapos iu kasem hard taem bikos iu sik or kasem eni nara problem, “prea evritaem” for God helpem iu for no wikdaon. (1 Thessalonians 5:14, 17) Maet samfala taem bae iu feel gud and samfala taem bae iu feel wikdaon, bat trae for tingting abaotem olketa spiritual samting wea savve encouragem iu, main wan nao Kingdom hope wea iumi garem wea barava spesol. Wanfala sista hem sei: “Field service hem olsem medicine bilong mi.” Wei for sharem gud nius witim nara pipol hem helpem hem for no tingim olketa problem bilong hem nomoa bat for tingim gud samting wea hem bae kasem.
Love Helpem Olketa wea Duim Rong Samting for Kam Bak Long Jehovah
19, 20. (a) Wanem nao savve helpem olketa wea duim rong samting for no fraet for kam bak long Jehovah? (b) Wanem nao bae iumi storyim long nextfala article?
19 Plande wea kamap wik long spiritual wei or duim sin faendem hem hard for kam bak long Jehovah. Bat sapos olketa hia really repent and mekem love bilong olketa for God hem grow moa, diswan bae mekem olketa no fraet for duim datwan. Tingim Mario,a wea stap long United States. Mario hem lusim Christian kongregeson, hem kamap man wea depend long alcohol and drug and, bihaen 20 year, olketa putim hem insaed long prison. Mario hem sei: “Mi start for tingting strong abaotem future bilong mi and for readim Bible moa. Gogo mi start for tinghae long olketa fasin bilong Jehovah, main wan nao hem mercy, wea mi evritaem askem hem for showimaot long mi taem mi prea long hem. Bihaen mi kamaot from prison, mi no kaban witim olketa fren bilong mi bifor, mi attendim olketa Christian meeting, and gogo mi kam bak insaed kongregeson. Distaem, saed long body, mi kasem nao samting wea kamaot from wanem mi duim bifor, bat gud samting wea mi garem nao hem wanfala nambawan hope. Mi barava thankiu long Jehovah for mercy and wei wea hem forgivim mi.”—Psalm 103:9-13; 130:3, 4; Galatians 6:7, 8.
20 Hem tru, olketa wea kasem sem samting olsem Mario mas waka hard for kam bak long Jehovah. Bat love wea olketa mekem grow moa, wea kamaot from wei for studyim Bible, prea, and wei for ting raonem samting, bae mekem olketa garem fasin for no fraet and for no givap. Kingdom hope tu hem strongim Mario. Tru tumas, hope tu savve barava muvim iumi for duim gudfala samting, olsem love, faith and fasin for fraet long God hem duim. Long nextfala article bae iumi storyim gud disfala spiritual present wea spesol.
[Footnotes]
a Mifala changem nem.
Waswe, Iu Savve Ansa?
• Hao nao love helpem Jesus for showimaot fasin for no fraet long nambawan wei?
• Hao nao love wea Paul and Barnabas garem for olketa brata mekem tufala barava no fraet?
• Wanem nao Satan iusim for trae mekem Christian love hem gogo daon?
• Love wea iumi garem for Jehovah savve mekem iumi no fraet for deal witim olketa wanem hard samting?
[Piksa long page 25]
Love wea Paul garem for pipol mekem hem savve gohed and no givap
[Piksa long page 26]
For followim olketa standard bilong God, man needim fasin for no fraet
[Piksa long page 26]
Namangolwa Sututu