Teachim Olketa Pikinini Bilong Iu for Lovem Jehovah
“Olketa son wea man garem taem hem young hem olsem olketa arrow long hand bilong wanfala strong man.”—PSALM 127:4.
1, 2. Hao nao pikinini hem olsem “arrow long hand bilong wanfala strong man”?
MAN wea sutsut long bow and arrow redi for sutim target bilong hem. Hem holem gud datfala bow and arrow and hem barava markem gud datfala target wea hem laek sutim. Then hem sutim nao! Waswe, bae hem kasem target bilong hem? Samfala difren samting savve affectim diswan, olsem savve bilong datfala man for sutsut, sapos hem wind or nomoa, and sapos arrow hem gud or nogud.
2 King Solomon hem storyim olketa pikinini olsem “olketa arrow long hand bilong wanfala strong man.” (Psalm 127:4) Tingim hao disfala tokpiksa hem fitim parents and olketa pikinini. Man for sutsut hem holem datfala arrow for lelebet taem nomoa. For kasem target bilong hem, hem mas sutim kwiktaem. Olketa mami and dadi tu olsem. Olketa garem lelebet taem nomoa for trainim pikinini for lovem Jehovah. Bihaen lelebet taem nomoa, olketa pikinini big nao and savve disaed seleva. (Matthew 19:5) Waswe, parents bae kasem target bilong olketa, wea hem nao wei wea pikinini gohed for lovem God and servem hem taem olketa big finis? Samfala difren samting savve affectim diswan. Thrifala long olketa samting hia hem nao wei wea parents iusim gud savve wea olketa garem, famili wea pikinini growap insaed, and wei wea ‘arrow,’ wea hem nao datfala pikinini, hem acceptim and followim datfala training. Iumi bae story raonem thrifala samting hia. Firstaem, iumi bae story raonem samfala wei bilong parents wea iusim gud savve wea olketa garem.
Parents wea Iusim Gud Savve—Showimaot Gudfala Example
3. Why nao parents mas duim tu samting wea olketa talem?
3 Jesus showimaot gudfala example for parents long wei wea hem duim samting followim wanem hem teachim. (John 13:15) Long narasaed, hem judgem olketa Pharisee wea “nating savve duim” samting wea olketa “talem.” (Matthew 23:3) For parents muvim pikinini for lovem Jehovah, olketa mas no talem wanfala samting and duim difren samting. Sapos parents toktok nomoa bat no duim samting followim wanem olketa talem, datwan hem iusles nomoa olsem wanfala bow wea no garem string.—1 John 3:18.
4. Wanem nao olketa kwestin wea hem gud for parents askem olketa seleva, and why nao olsem?
4 Why nao example bilong parents hem barava important? Long sem wei wea parents savve lane for lovem God taem olketa lukluk gud long example bilong Jesus, pikinini tu savve lane for lovem Jehovah taem olketa luk followim gudfala example bilong parents bilong olketa. Olketa fren bilong pikinini savve helpem hem or “spoelem gudfala fasin” bilong hem. (1 Corinthians 15:33) Parents nao main wan wea savve affectim tingting and fasin bilong pikinini, especially taem olketa smol. Dastawe, hem gud for parents askem olketa seleva olsem: ‘Mi wanem kaen fren for pikinini bilong mi? Waswe, example wea mi showimaot hem encouragem pikinini bilong mi for garem gudfala fasin? Wanem nao example bilong mi saed long olketa important samting olsem wei for prea and for studyim Bible?’
Parents wea Iusim Gud Savve —Prea Witim Pikinini
5. Wanem nao olketa pikinini savve lanem from prea bilong parents bilong olketa?
5 Taem olketa pikinini herem olketa prea bilong iu, olketa savve lanem plande samting abaotem Jehovah. Sapos olketa herem iu prea long God for sei thankiu long taem bilong kaikai and iu prea taem iufala studyim Bible, wanem nao bae olketa lanem? Olketa bae lanem hao Jehovah nao givim olketa samting wea olketa needim long physical wei, wea iumi shud thankiu long hem. And tu, hem nao teachim iumi olketa tru samting insaed long Bible. Hem nao olketa important samting wea pikinini mas lanem.—James 1:17.
6. Wanem nao parents duim for helpem pikinini for savve hao Jehovah hem interest long evriwan long olketa?
6 Bat sapos iu prea witim famili bilong iu long olketa narafala taem and no long taem for kaikai and Bible study nomoa, and iu prea abaotem samting wea barava affectim iu and olketa pikinini bilong iu, iu duim wanfala important samting. Iu bae helpem pikinini for savve hao Jehovah hem part long famili bilong iufala, and hem barava kea long evriwan long iufala. (Ephesians 6:18; 1 Peter 5:6, 7) Wanfala dadi hem sei: “Start long taem wea dota bilong mifala hem born, mifala prea witim hem. Taem hem start for big gele, mifala prea abaotem hu nao hem fitim for kaban witim and olketa nara samting wea savve affectim hem. Mifala prea witim hem evriday go kasem taem hem marit and no stap witim mifala.” Waswe, iu tu savve prea witim pikinini bilong iu evriday? Waswe, iu savve helpem olketa for ting long Jehovah olsem wanfala Fren wea interest long feeling bilong olketa, and no provaedem nomoa physical and spiritual need bilong olketa?—Philippians 4:6, 7.
7. Wanem nao parents mas savve mekem olketa savve prea abaotem samting wea affectim pikinini bilong olketa?
7 Hem tru, for iu prea abaotem samting wea really affectim pikinini bilong iu, iu mas savve long samting wea hem duim and interest long hem. Tingim toktok bilong wanfala dadi wea trainim tufala dota bilong hem wea big finis distaem. Hem sei: “Long end bilong evri week, mi askem miseleva tufala kwestin hia: ‘Wanem nao olketa samting wea olketa pikinini bilong mi duim long disfala week? And wanem gud samting nao happen long olketa?’” Parents, waswe, iu savve askem iufala seleva olketa kwestin olsem, and then storyim olketa samting hia taem iu prea witim olketa pikinini? Sapos iu duim olsem, iu no trainim olketa nomoa for prea long Jehovah, wea hem nao Datwan wea herem prea, bat for lovem hem tu.—Psalm 65:2.
Parents wea Iusim Gud Savve —Showimaot Example for Study Gud
8. Why nao parents mas helpem pikinini bilong olketa for studyim gud Word bilong God evritaem?
8 Hao nao tingting bilong parents abaotem wei for studyim Bible savve helpem pikinini for fren gud witim God? Wei for tufala pipol fren gud tugeta, tufala evriwan mas no story nomoa bat mas lisin tu. Wanfala long olketa wei wea iumi lisin long Jehovah hem for studyim Bible witim olketa pablikeson wea ‘faithful slave’ provaedem. (Matthew 24:45-47; Proverbs 4:1, 2) Dastawe, for helpem pikinini for fren gud witim Jehovah for olowe, hem gud for parents encouragem olketa for studyim gud Word bilong God evritaem.
9. Wanem nao parents savve duim for helpem pikinini for study gud evritaem?
9 Wanem nao parents savve duim for helpem pikinini for study gud evritaem? Best wei wea parents savve helpem pikinini hem thru long example wea olketa seleva showimaot. Waswe, pikinini bilong iu lukim iu hapi for readim and studyim Bible evritaem? Tru, maet iu busy for lukaftarem olketa pikinini bilong iu, and maet iu tingim hao iu no garem inaf taem for read and study. Bat askem iuseleva, ‘Waswe, olketa pikinini bilong mi lukim mi lukluk long television evritaem?’ Sapos olsem, waswe, iu savve iusim samfala long olketa taem hia for showimaot gudfala example long pikinini long wei for duim study seleva?
10, 11. Why nao parents mas duim Bible study witim famili evritaem?
10 Nara gudfala wei wea parents savve teachim pikinini for lisin long Jehovah hem long wei for famili storyim Bible tugeta. (Isaiah 30:21) Bat maet samfala ting olsem, ‘Why nao parents mas duim famili study witim pikinini sapos olketa tekem pikinini long kongregeson meeting evritaem?’ Staka gudfala reason stap for diswan. Parents nao main wan wea Jehovah givim responsibility long olketa for teachim pikinini. (Proverbs 1:8; Ephesians 6:4) Wei wea famili studyim Bible tugeta hem teachim pikinini hao worship hem no samting for duim front long pipol nomoa, bat hem samting wea hem part long laef bilong olketa.—Deuteronomy 6:6-9.
11 Famili study wea parents duim long gudfala wei hem givim chance long olketa tu for luksavve long tingting bilong pikinini saed long fasin and spiritual samting. Olsem example, taem olketa pikinini young, parents savve iusim olketa buk olsem Lane From Datfala Nambawan Teacher.a Klosap evri paragraf long disfala Bible study buk garem olketa kwestin for pikinini talemaot tingting bilong hem. Wei wea parents story raonem olketa scripture insaed long datfala buk savve helpem parents for helpem pikinini for luksavve “long samting wea stret and samting wea no stret.”—Hebrews 5:14.
12. Hao nao parents savve mekem famili study for fitim need bilong pikinini, and hao nao iu duim diswan and wanem gud samting nao iu kasem?
12 Taem pikinini bilong iu big lelebet, changem study for fitim need bilong olketa. Tingim wei wea wanfala mami and dadi helpem olketa teenage dota for ting raonem sapos olketa shud go long wanfala party wea skul organizem wea evriwan bae dance. Datfala dadi hem sei: “Mifala talem long olketa pikinini hao long next famili study, mi and waef bae act olsem olketa pikinini, and olketa dota bae act olsem parents. Eniwan long olketa pikinini savve act olsem Mami or Dadi, bat olketa mas waka tugeta for duim research abaotem olketa party long skul wea evriwan bae dance, and story raonem datwan.” Wanem nao kamaot from diswan? Datfala dadi hem gohed for sei: “Mifala sapraes long wei wea olketa dota bilong mifala (taem olketa act olsem mami and dadi) fit for luksavve long samting wea stret and explainim long mifala (wea act olsem olketa pikinini) olketa reason from Bible why hem no wise for go long datfala dance. Nara samting wea mifala tinghae long hem tu, hem long olketa difren idea wea olketa talem saed long olketa difren hapitaem wea fitim. Diswan helpem mifala for luksavve long tingting bilong olketa and samting wea olketa laekem.” Hem tru, for duim famili study evritaem and long wei wea fitim need bilong famili, parents mas no givap and mas waka hard for tingim olketa difren wei for duim diswan. Taem olketa duim olsem, gud samting savve kamaot from hard waka bilong olketa.—Proverbs 23:15.
Garem Peace Insaed Famili
13, 14. (a) Wanem nao parents savve duim for garem peace insaed famili? (b) Wanem gud samting nao savve kamaot taem parents talem olketa mistek bilong olketa?
13 Wanfala arrow savve kasem target bilong hem sapos datfala man for sutsut markem gud datfala target and sutim taem wind hem no blow. Long sem wei tu, pikinini savve lane for lovem Jehovah sapos parents duim samting for garem peace insaed famili. James hem sei: “Seed bilong frut bilong raeteous fasin hem grow long ples wea peace hem stap for olketa wea mekem peace kamap.” (James 3:18) Wanem nao parents savve duim for garem peace insaed famili? Hasband and waef mas strongim wei wea tufala fren gud tugeta. Hem moa isi for hasband and waef wea lovem and respectim narawan for teachim pikinini bilong olketa for lovem and respectim nara pipol, and Jehovah tu. (Galatians 6:7; Ephesians 5:33) Love and respect savve mekem peace kamap. And hasband and waef wea garem peace midolwan long tufala savve deal witim eni problem wea maet kamap insaed long famili.
14 Hem tru, distaem no eni famili hem perfect long disfala earth, and no eni marit hem perfect tu. Samfala taem maet parents no showimaot olketa frut bilong spirit taem olketa deal witim pikinini. (Galatians 5:22, 23) Taem datwan hem happen, wanem nao parents mas duim? Sapos parents talem hao olketa duim mistek, waswe, diswan bae mekem pikinini for no respectim nao parents bilong hem? Tingim example bilong aposol Paul. Hem olsem spiritual dadi for staka long taem bilong hem. (1 Corinthians 4:15) Bat hem talem stret hao hem duim samfala samting wea no stret. (Romans 7:21-25) Nomata olsem, wei wea hem hambol and honest mekem iumi barava respectim hem and no ting daonem hem. Nomata hem garem olketa wik point, Paul savve raet long datfala kongregeson long Corinth and sei: “Iufala mas followim example bilong mi, olsem mi tu followim example bilong Christ.” (1 Corinthians 11:1) Sapos iu tu talem olketa mistek bilong iu, pikinini bilong iu bae no tingim olowe olketa mistek hia.
15, 16. Why nao parents shud trainim pikinini for lovem olketa Christian brata and sista, and hao nao olketa savve duim diswan?
15 Wanem moa parents savve duim for helpem pikinini for lovem Jehovah? Aposol John hem sei: “Sapos eniwan hem sei: ‘Mi lovem God,’ bat hem heitim brata bilong hem, hem laea nao. From hem hard for man lovem God wea hem no savve lukim, sapos hem no lovem brata bilong hem wea hem savve lukim.” (1 John 4:20, 21) Dastawe, taem iu trainim pikinini bilong iu for lovem olketa Christian brata and sista, iu teachim olketa for lovem God. Hem gud for parents askem olketa seleva, ‘Waswe, mi storyim olketa gud samting or nogud samting abaotem kongregeson?’ Hao nao bae iu savve? Lisin gud long wei wea olketa pikinini bilong iu story abaotem olketa meeting and olketa brata and sista. Iu bae herem tingting bilong iu long samting wea olketa talem.
16 Wanem nao parents savve duim for helpem pikinini for lovem olketa spiritual brata and sista? Peter, wanfala dadi wea garem tufala teenage boy, hem sei: “Start from taem olketa boy bilong mifala smol, mifala evritaem askem olketa mature brata and sista for kam kaikai long haos and kaban witim mifala, and mifala barava enjoyim datwan. From taem olketa smol, tufala boy bilong mifala kaban witim pipol wea lovem Jehovah, and distaem olketa lukim hao wei for servem God hem wanfala hapi samting.” Dennis, wanfala dadi wea garem faevfala gele, hem sei: “Mifala encouragem olketa gele bilong mifala for fren witim olketa mature pioneer insaed kongregeson, and long samfala taem wea fitim, mifala invaetem olketa traveling overseer and waef bilong olketa for kam long haos.” Waswe, iu tu savve duim samting for helpem pikinini for ting long kongregeson olsem part long famili bilong iu?—Mark 10:29, 30.
Samting wea Pikinini Mas Duim
17. Gogo, olketa pikinini seleva mas disaedem wanem samting?
17 Tingim moa tokpiksa abaotem datfala man for sutsut long bow and arrow. Nomata hem iusim gud savve wea hem garem, maet hem no kasem datfala target sapos datfala arrow wea hem iusim hem bend. Tru tumas, parents bae trae hard for stretem datfala tokpiksa arrow taem olketa waka hard for stretem tingting bilong pikinini. Bat gogo, olketa pikinini seleva mas disaed sapos olketa bae letem world pullim olketa, or for letem Jehovah nao mekem olketa “wei wea [olketa] followim hem stret.”—Proverbs 3:5, 6; Romans 12:2.
18. Hao nao samting wea pikinini chusim savve affectim olketa narawan?
18 Parents garem bigfala responsibility for trainim pikinini bilong olketa “long discipline and wei for stretem tingting wea kam from Jehovah,” bat gogo, pikinini seleva mas disaed sapos hem bae servem Jehovah taem hem full grown. (Ephesians 6:4) So olketa pikinini, askem iufala seleva, ‘Waswe, bae mi acceptim training bilong parents bilong mi wea lovem mi?’ Sapos iu duim olsem, iu chusim best samting for duim long laef. Iu bae mekem parents bilong iu barava hapi. Winim evri samting, iu bae mekem heart bilong Jehovah hapi.—Proverbs 27:11.
[Footnote]
a Olketa Jehovah’s Witness pablisim.
Waswe, Iu Remember?
• Wanem nao parents savve duim for showimaot gudfala example saed long prea and wei for studyim Bible?
• Wanem nao parents savve duim for garem peace insaed famili?
• Wanem nao pikinini seleva mas disaedem, and hao nao samting wea hem chusim hem affectim olketa narawan?
[Piksa long page 29]
Waswe, iu showimaot gudfala example long pikinini long wei for duim study seleva?
[Piksa long page 31]
Famili wea garem peace savve hapi