تیمُتھیُس دے ناں دُوجا خط

3 پر ایہہ جان لے کہ آخری زمانے چ مشکل حالاتاں دا سامنا کرنا پئے گا 2 کیونکہ لوک خودغرض، پیسے نال پیار کرن والے، شیخی مارن والے، گھمنڈی، کُفر بکن والے، ماں پیو دے نافرمان، ناشکرے، بے‌وفا، 3 اپنیاں دی پرواہ نہ کرن والے، ضدی، بدنامی کرن والے، اپنے اُتے قابو نہ رکھن والے، ظالم، نیکی دے دُشمن، 4 دھوکھےباز، ڈھیٹھ، غرور نال پُھلے ہوئے تے خدا دی بجائے موج مستی نُوں پیار کرن والے ہون گے۔ 5 لوک خدا دی عبادت کرن دا دِکھاوا تے کرن گے، پر اوہدی مرضی مطابق زندگی نئیں گزارن گے۔ ایہناں لوکاں توں دُور رہوِیں۔ 6 ایہناں وچوں ای کجھ آدمی اُٹھ کھلون گے تے چالاکی نال گھراں چ وڑھن گے تے اوہناں کمزور عورتاں*‏ نُوں دھوکھے نال اپنے وَس چ کر لین گے جیہڑیاں گُناہ چ پئیاں ہوئیاں نیں تے اپنیاں طرحاں طرحاں دِیاں خواہشاں دِیاں غلام نیں۔ 7 اوہ تلیم تے حاصل کردیاں رہندیاں نیں، پر کدی وی سچائی نُوں پوری طرحاں نئیں سمجھدیاں۔‏

8 اوہ آدمی سچائی دی مخالفت کردے نیں بالکل جیویں ینیس تے یمبریس نے موسیٰ دی مخالفت کیتی سی۔ اوہناں آدمیاں دی سوچ پوری طرحاں وِگڑی ہوئی اے۔ اوہ خدا دی تلیم دے مطابق نئیں چلدے۔ ایس لئی خدا نے اوہناں نُوں ردّ کر دِتا اے۔ 9 اوہ اپنے ارادیاں چ کامیاب نئیں ہون گے سگوں سارے لوکاں نُوں پتہ چل جائے گا کہ اوہ کِنّے بے‌وقوف نیں، بالکل جیویں ینیس تے یمبریس نال ہویا سی۔ 10 پر تُوں میری تلیم، میرے چال‌چلن،‏*‏ میرے مقصد، میرے ایمان، میرے صبر، میری محبت تے مشکلاں نُوں برداشت کرن دے معاملے چ میری مثال تے بڑے دھیان نال عمل کیتا اے۔ 11 نالے تُوں ایہہ وی جاننا ایں کہ مَیں انطاکیہ، اِکُنیُم تے لِسترہ چ کِنّاں ظلم تے مصیبتاں سہیاں۔ مَیں ایہہ سب کجھ صبر نال برداشت کیتا تے مالک نے مینوں ہر مشکل چوں کڈھیا۔ 12 اصل چ اوہناں سارے لوکاں تے ظلم ہوئے گا جیہڑے مسیح یسوع دے شاگرد بن کے خدا دی بندگی کرنا چاہندے نیں۔ 13 پر بھیڑے تے دھوکھےباز آدمیاں دی بُرائی ودھدی جائے گی۔ اوہ دُوجیاں نُوں وی گمراہ کرن گے تے آپ وی گمراہ ہون گے۔‏

14 پر تُوں اوہناں گلاں تے عمل کردا رہ جیہڑیاں تینوں سکھائیاں گئیاں سن تے جنہاں تے ایمان لیان لئی تینوں قائل کیتا گیا سی۔‏*‏ یاد رکھ کہ تُوں ایہہ گلاں کنہاں کولوں سکھیاں نیں۔ 15 نالے ایہہ وی کہ تینوں بچپن توں پاک کلام چوں اوہ تلیم دِتی گئی اے جیہڑی تینوں سمجھدار بنا سکدی اے تاکہ تُوں مسیح یسوع تے ایمان رکھن دی وجہ توں نجات حاصل کر سکیں۔ 16 پاک کلام دی ہر گل خدا دی رہنمائی چ*‏ لکھی گئی اے تے اوہ تلیم دین، درستی کرن، معاملیاں نُوں سدھارن تے نیک اصولاں*‏ مطابق تربیت کرن لئی فائدےمند اے 17 تاکہ خدا دا ہر بندہ ہر لحاظ نال قابل ہووے تے ہر چنگے کم لئی پوری طرحاں تیار ہووے۔‏