KERIAUN KRONIKEL

1 Solomon nein Depit kin kekehlailla nan eh kaunda, oh Siohwa eh Koht kin ketin ieiang ih oh ketin kahrehiong ih en uhdahn lapalapala.+

2 Solomon eri ileklahng Israel pwon, kaunen meh kid kan oh kaunen meh epwiki kan, sounkopwung kan oh kaun koaros en Israel pwon, kaunen peneinei kan. 3 Solomon oh mwomwohdiso pwon eri kohla ni wasa ileo nan Kipeon,+ pwe ih wasao me impwal en mihting en Koht mehlelo mihmi ie, impwal me sapwellimen Siohwa ladu Moses wiahda nan sapwtehno. 4 Ahpw, mwowe sang, Depit wadohr Kohpwahn inou lap en Koht mehlelo sang Kiriad-searim+ oh kihdi wasa me Depit kaunopadahro; e kauwada impwal ehu ong kohpwao nan Serusalem.+ 5 Oh pei sarawi prons+ me Pesalel+ nein Uri nein Urr wiahdao kin mihmi mwohn impwal sarawi en Siohwa; oh Solomon oh mwomwohdiso kin kapakap mwowe.* 6 Solomon eri wiahda meirong kan wasao mwohn silangin Siohwa, oh e wiahda meirong isihs 1,000 pohn pei sarawi prons+ me mi ni impwal en mihtingo.

7 Pwohngo Koht ketin pwarohng Solomon oh mahsanihong ih: “Peki dahme ke men I en kihong uhk.”+ 8 Solomon ahpw patohwanohng Koht: “Komw ketin kasalehiongehr semei Depit limpoak loalopwoat laud,+ oh komw ketin wiahiongieier I en wiahla nanmwarki pwe I en wiliandi ih.+ 9 Eri, Maing Siohwa Koht, sapwellimomwi inou ong semei Depit en pweida,+ pwe komw ketin wiahiongieier I en wiahla nanmwarkien aramas ngeder me duwehte pwelpar en sampah.+ 10 Komw ketikihong ie erpit oh loalokong+ pwe I en kin kahluwa aramas pwukat,* pwe ihs me kak kopwung sapwellimomwi aramas ngeder pwukat?”+

11 Koht eri ketin mahsanihong Solomon: “Pwehki ih inengen omw mohngiong met oh ke sohte peki kepwehpwe, dipwisou oh wahu de mehlahn* irail kan me kailongkin uhk oh ke pil sohte peki mour werei,* ahpw ke peki erpit oh loalokong pwe ken kopwung nei aramas akan me I kasapwiluhkada ken kaunda,+ 12 eri erpit oh loalokong pahn kohieng uhk; ahpw I pil pahn kihong uhk kepwe oh dipwisou oh wahu me sohte nanmwarki men mwohmw ahneki oh pil sohte nanmwarki men mwurimw pahn ahneki.”+

13 Solomon eri pwurasang wasa ileo nan Kipeon,+ wasa me impwal en mihtingo mihmi ie oh e pwurodo Serusalem; ih eri kaunda Israel. 14 Oh Solomon kin kihkihpene kuruma oh oahs* kan; were kuruma 1,400 oh oahs* 12,000,+ oh e kihdiong irail nan kahnimw en kuruma kan+ oh wasa me karanih nanmwarkio nan Serusalem.+ 15 Nanmwarkio kin wiahiong silper oh kohl nan Serusalem en tohtohla duwehte takai,+ oh tuhke sidar en tohtohla duwehte tuhke sikamor* kan nan Sepihla.+ 16 Nein Solomon oahs kan pekedersang Isip,+ oh nein nanmwarkio sounnetinet kan kin pwainkihda pwihn en oahs kan* ni uwen pweipwei ehu.+ 17 Uwen pweinen ehu kuruma me kin pekederdo sang Isip iei silper 600, oh uwen pweinen emen oahs iei 150; irail eri kin uhd kadarirailla rehn nanmwarkien Id koaros oh nanmwarkien Siria kan.

2 Solomon ahpw ruwese tehnpas ehu ong mwaren Siohwa+ oh tehnpas ehu ong eh wehio en kokouda.+ 2 Solomon eri kihpene meh 70,000 nin duwen tohndoadoahk me sohte ahneki koahiek tohrohr,* 80,000 nin duwen soun-par takai pohn nahna kan+ oh 3,600 nin duwen sounapwalih.+ 3 Oh Solomon pil kadaralahng Airam+ nanmwarkien Dair koasoi pwukat: “Komw ketin wiahiong ie duwehte me komw wiahiong semei Depit ni omw kadarohng ih tuhke sidar en kaukihda tehnpese.+ 4 I pahn kauwada tehnpas ehu ong mwaren Siohwa ei Koht, pwe I en kasarawihong ih, isik warpwohmwahu+ mwohn silangi, oh pil wasa me pilawa koasoakoasoak*+ en kin mi ie ahnsou koaros oh pwehn wiahda meirong isihs kan, nimenseng oh nin soutik,+ rahnen Sapad kan,+ maram pwul kan,+ oh ahnsoun kasarawi kan+ ong Siohwa at Koht. Met iei pwukoa me Israel pahn wia kohkohlahte. 5 Tehnpas me I pahn kauwada uhdahn pahn lapala, pwe at Koht lapalapasang koht teikan koaros. 6 Ahpw ihs me kak kauwada tehnpas ehu ong ih? Pwe nanleng, nanleng me keieu ile, sohte kak itarohng ih,+ a ihs ngehi pwe I en kauwada tehnpas ehu ong ih? Ihte me I kak wia iei kauwada tehnpas en wiahda meirong ediniei mwohn silangi. 7 Eri komw ketin kadarodohng ie tohndoadoahk saman men me kin samanih doadoahk en kohl, silper, prons,+ mete, dereht ntahnmwel sang wunen sihpw,* dereht weitahta oh poh mei oh me kin ese perper. E pahn doadoahk nan Suda oh Serusalem, oh e pahn iang nei tohndoadoahk saman kan me semei Depit piladahr.+ 8 Oh komw ketin kadarodohng ie tuhke sidar, suniper+ oh alkum+ sang Lepanon, pwe I uhdahn ese me sapwellimomwi ladu kan koahiek en pelehdi tuhkehn Lepanon kan.+ Nei ladu kan pahn iang sapwellimomwi ladu kan doadoahk+ 9 pwe ren kaunopadahng ie tuhke tohtohie, pwe tehnpas me I pahn kauwada uhdahn lapala. 10 Eri kilang! I pahn kihong sapwellimomwi ladu kan,+ sounpal tuhke kan mwenge: kor* 20,000 en wihd, kor 20,000 en parli, pahd* 20,000 en wain oh pahd 20,000 en lehn olip.”

11 Airam nanmwarkien Dair eri kadaralahng Solomon kisinlikou wet: “Pwehki Siohwa ketin poakohng sapwellime aramas akan, e ketin wiahkinkomwihla ar nanmwarki.” 12 Airam eri nda: “Kaping en kohwong Siohwa, Koht en Israel, me ketin wiahda nanleng oh sampah, pwehki eh ketikihong Nanmwarki Depit pwutak loalokong men,+ me dehde mwahu oh ahneki koahiek en wehwehki,+ me pahn kauwada tehnpas ehu ong Siohwa oh tehnpas ehu ong eh wehio. 13 Eri I pahn kadarewei Airam-api,+ tohndoadoahk saman men, me ahneki koahiek en wehwehki. 14 Ih nein lihen Dan men ahpw eh pahpao ohlen Dair men; e koahiek nan doadoahk en kohl, silper, prons, mete, takai, tuhke, dereht ntahnmwel sang wunen sihpw, dereht poh mei, likou linen kaselel oh dereht weitahta.+ E kak wia soangen doadoahk en parada soahng koaros oh mahlenihada soahng koaros me kohwong ih.+ E pahn iang sapwellimomwi tohndoadoahk saman kan oh nein ei kaun, semomw Depit, tohndoadoahk saman kan. 15 Eri komw* ketin kadarodo wihd, parli, lehn olip oh wain me komw inoukihongehr sapwellimomwi ladu kan.+ 16 Oh se pahn pelehdi tuhke kan sang Lepanon,+ uwen tohto me komw anahne, oh se pahn pirepene oh kapeidihwei nansedo lel Sopa;+ oh komw pahn wadalahng Serusalem.”+

17 Solomon eri wadekedi mehn liki koaros me kousoan nan sapwen Israel,+ duwehte wadawad me seme Depit wiadahr,+ oh mehn liki 153,600 me wadawadedi. 18 Solomon eri koasoanehdi meh 70,000 sang rehrail nin duwen tohndoadoahk me sohte ahneki koahiek tohrohr,* 80,000 nin duwen soun-par takai+ pohn nahna kan oh 3,600 nin duwen sounapwalih me pahn kihong aramas ako doadoahk.+

3 Solomon eri tepida kauwada tehnpesen Siohwa+ nan Serusalem pohn Nahna Moria,+ wasa me Siohwa ketin pwarohng seme Depit,+ ih wasao me Depit kaunopada ie, nan en Ornan mehn Sepuso eh wasahn kihsang kilin krein.*+ 2 E tepida kokou ni keriaun rahn en keriaun sounpwong, ni kapahieun sounpar en eh mwehi. 3 Oh poahsoan me Solomon wiadahr ong kokoudahn tehnpesen Koht mehlelo reireiki kiupid 60, tehlapki kiupid 20,+ nin duwen wiepen sosohng en mahso.* 4 Palangk me mi mwowe reireiki kiupid 20, me pahrekiong tehlap en tehnpaso,* oh ilehki kiupid 20;* oh e kidimkihla kohl tohr loale.+ 5 E kidimkihla pere laudo* tuhke suniper, mwurin mwo e pwainkihdi kohl kaselel,+ oh e kapwatahkihda tuhke pahm* me perperda+ oh sein kei.+ 6 Oh e pil kapwatahkihda tehnpaso takai kesempwal kaselel kan;+ oh kohl+ me e doadoahngki iei kohl sang Parpaim. 7 E kidimkihla kohl tehnpaso, rehu kan, taht en wenihmw kan, dihd kan, oh wenihmw kan;+ oh e parada kerup kan ni dihd kan.+

8 Ih eri wiahda Wasa Sarawiheo;*+ reirei en wasao duwehte tehlap en tehnpaso, kiupid 20, oh tehlapki kiupid 20. E kidimkihla wasao kohl kaselel+ dalend* 600. 9 Uwen toutou en kohl ong nihl kan iei sekel* 50; oh e kidimkihla perehn powe kan kohl.

10 Ih eri wiahda sansal en kerup riemen nan Wasa Sarawiheo,* oh e kidimkihla sansal ko kohl.+ 11 Uwen reirei en pehnpihr en kerup ko+ patpene kiupid 20; ehu pehnpihr en keieun kerupo reireiki kiupid limau oh kin sair dihd en tehnpaso, oh eh pehnpihr teio reireiki kiupid limau oh kin sair ehu pehnpihr en kerup teio. 12 Oh ehu pehnpihr en kerup teio reireiki kiupid limau oh kin sair apali dihd en tehnpaso, oh eh pehnpihr teio reireiki kiupid limau oh kin sair ehu pehnpihr en keieun kerupo. 13 Pehnpihr en kerup pwukat kin ngampeseng kiupid 20; oh ira kin kesihnen oh sohpeilahng Wasa Sarawio.

14 E pil wiahda kahdeng ehu+ sang ni dereht poh mei, dereht ntahnmwel sang wunen sihpw, dereht weitahta oh likou kaselel, oh e deiadiong mwomwen kerup kei powe.+

15 Ih eri wiahda uhr riapwoat+ mwohn tehnpaso, me reireiki kiupid 35, oh kadoken ehuehu uhr ko kiupid limau.+ 16 Oh e wiahda sein kan, me duwehte mwaramwar, oh kihdiong pohn kadoken uhr ko, oh e wiahda pwohmakraneid 100 oh kihdiong pohn sein ko. 17 E kauwada uhr ko mwohn tehnpas sarawio, apwoat ni palimaun* oh apwoat ni palimeing;* e kahdaneki me mi ni palimaun Sakin* oh me mi ni palimeing Pohas.*

4 Solomon eri wiahda pei sarawi pronso,+ kiupid 20 reirei, kiupid 20 tehlap oh kiupid 10 ile.

2 E wiahda lapalahn peisin en pihl ehu me adaneki Sehd+ prons.* E pwonopwon oh reireiki kiupid 10 sang apali keileo lella pali teio oh e ilehki kiupid limau, oh kiupid 30 pidakihpene.+ 3 Oh mie mehn kapwat kord*+ me mi pahnangin keileo, me kapilpene keileo pwon, meh 10 mi ni kiupid ehu pidakihpene Sehdo. Kord ko wiawihda ni irek riau me patehngete. 4 E mi pohn kouwol 12,+ meh 3 sohpeilahng paliepeng, meh 3 sohpeilahng palikapi, meh 3 sohpeilahng palieir, oh meh 3 sohpeilahng palimese; oh Sehdo mi pohrail, oh tihnsewarail ko koaros sohpeipene nanwerenge. 5 Oh e mosulki sosohng en peh* ehu; oh keileo wiawihda duwehte keilen kep ehu, duwehte masal en kiepw. Peisino kak audaudkihda* pihl ni sosohng en pahd* 3,000.

6 Oh pil, e wiahda peisin eisek mehn wideud oh kihdi meh limau ni palimaun oh meh limau ni palimeing.+ Re kin kamwakele soahng kan me kin kadoadoahk ong meirong isihs nan peisin ko.+ Ahpw Sehdo iei ong samworo kan ren kamwakelehki irail.+

7 Ih eri wiahda dewen lamp kohl eisek,+ nin duwen me koasoandier,+ oh e kihdi mepwukat nan tehnpas sarawio, meh limau ni palimaun oh meh limau ni palimeing.+

8 E pil wiahda tehpel eisek oh kihdi mepwukat nan tehnpas sarawio, meh limau ni palimaun oh meh limau ni palimeing;+ oh e wiahda pwohl kohl 100.

9 Ih eri wiahda wasa me kelpene kan+ me samworo kan+ kin doadoahk ie oh wasa laud kelepeneo+ oh wenihmw kan ong wasa me kelpeneo, oh e kidimkihla wenihmw ko prons. 10 Oh e kihdi Sehdo ni palimaun, sallahng palieir en palimese.+

11 Airam pil wiahda deupen pehs, sapwel oh pwohl kei.+

Eri Airam kanekehla doadoahk me e wiahiong Nanmwarki Solomon ong tehnpesen Koht mehlelo:+ 12 uhr riapwoato+ oh kadoken uhr ko me mwomwen pwohl me mi pohn uhr riapwoato; uhk riauo+ mehn pwaindi kadoken uhr riauo me mwomwen pwohl me mi pohn uhr ko; 13 pwohmakraneid 400+ ong uhk riauo, irek riau en pwohmakraneid ong ehuehu uhk ko, mehn pwaindi kadoken uhr riau me mwomwen pwohl me mi pohn uhr ko;+ 14 kuruma* eisek oh peisin eisek pohn kuruma ko;+ 15 Sehdo oh kouwol 12 pahn Sehdo;+ 16 oh dewen pehs kan, sapwel kan, pwohk kan,+ oh dipwisou koaros me kisehn mepwukat, me Airam-apip+ wiahkihda prons melengileng ong Nanmwarki Solomon ong tehnpesen Siohwa. 17 Nanmwarkio eri wiahda mepwukat nan sapwen Sordan, nanpwungen Sukot+ oh Sereda ni eh doadoahngki mehn katenehla mete me wiawihkihda pwehl. 18 Dipwisou pwukat koaros me Solomon wiahda uhdahn tohto; uwen toutoun prons ko sohte sansalda.+

19 Solomon wiahda dipwisou koaros+ ong tehnpesen Koht mehlelo: pei sarawi kohlo;+ tehpel ko+ me pilawahn kasansal kin mi powe;+ 20 dewen lamp kan oh lamp kan me wiawihkihda kohl tohr,+ pwehn kin lullul mwohn pere me mi keieu masloaleo nin duwen me koasoandi; 21 oh wahnrohs masal ko, lamp ko, tihpw ko, me wiawihkihda kohl tohr; 22 mehn kakunla lamp ko, pwohl ko, kep ko, oh dewen mwoalus ko me wiawihkihda kohl tohr; oh wasahn pedolong en ihmwo, wenihmw kan en perehn masloaleo ong Wasa Sarawiheo+ oh wenihmw kan en ihmw en tehnpas sarawio me wiawihkihda kohl.+

5 Solomon eri kanekehla doadoahk koaros me e anahne wiahda ong tehnpesen Siohwa.+ Solomon eri wahlongala soahng kan me seme Depit kasarawialahr+ oh e kihdi silper, kohl, oh dipwisou kan koaros nan wasahn nahk dipwisou kesempwal kan en tehnpesen Koht mehlelo.+ 2 Ni ahnsowo Solomon kapokonepene ohl mah kan en Israel, kaunen keinek koaros, kaunen peneinei kan koaros en Israel. Irail eri kohdo Serusalem pwe ren wahdahdo sang kohpwahn inou lap en Siohwa nan Kahnimw en Depit,+ me iei Saion.+ 3 Ohlen Israel koaros eri pokonpene mwohn nanmwarkio ni ahnsoun kasarawi* me wiawi ni keisuhwen sounpwong.+

4 Ohl mah koaros en Israel eri kohdo, oh mehn Lipai ko pwekada Kohpwao.+ 5 Irail wahdahdo Kohpwao, impwal en mihtingo,+ oh dipwisou sarawi kan koaros me mi nan impwalo. Samworo ko oh mehn Lipai ko* me wahdahdo mepwukat. 6 Nanmwarki Solomon oh mwomwohdisohn Israel pwon me lukodo pwe ren tuhwong ih, miher mwohn Kohpwao. Sihpw oh kou tohtohie meirongala+ kahrehda re sohte kak wadawadedi. 7 Samworo ko eri wahlongala kohpwahn inou lap en Siohwa nan dewe, nan pere me mi keieu masloalen ihmwo, Wasa Sarawiheo, pahnangin pehnpihr en kerup ko.+ 8 Eri pehnpihr en kerup ko ngampeseng pohn dewen Kohpwao, me kahrehda kerup ko pwaindi Kohpwao oh tuhkehn wisik ko.+ 9 Tuhkehn wisik ko uhdahn reirei, kahrehda imwin tuhkehn wisik ko sansal ong Wasa Sarawi me mi mwohn pere me mi keieu masloaleo, ahpw sohte me kak kilang sang likio. Oh ape pwukat mihmihte mwo leledo rahnwet. 10 Sohte mehkot mi nan Kohpwao, ihte pelien takai patapat riapali me Moses kihdiong loale nan Orep,+ ni ahnsou me Siohwa ketin wiahda inou lap+ rehn aramas en Israel kan ni arail kohkohieisang Isip.+

11 Ni ahnsou me samworo ko kohieido sang nan wasa sarawio (pwe samworo ko koaros me mi mwo kasarawialahr pein irail,+ sohte lipilipil mehnia pwihn me re iang),+ 12 sounkoul en Lipai kan koaros+ me mi pahn kaweid en Asap,+ Eman,+ Sedudun+ oh neirail pwutak kan oh riarail kan likawih likou kaselel, oh re kolokol simpal kan,* keseng sahl kan oh arp kan; re kesihnen ni palimesehn pei sarawio, oh samworo 120 iang irail pepeuk sowi kan.+ 13 Ni ahnsou me sounpeuk sowi ko oh sounkoul ko wiahkintehieu kapinga oh kalahnganohng Siohwa, oh ni ngilen sowi ko, simpal ko* oh mehn keseng teiko ar peipeido ni ar kapikapinga Siohwa, “pwehki ih me kupwur mwahu; sapwellime limpoak loalopwoat me poatopoat,”+ tehnpaso, iei tehnpesen Siohwa, ahpw direkihla pelien depwek ehu.+ 14 Samworo ko sohte kak kesihnen wasao oh papah pwehki pelien depweko, pwehki lingan en Siohwa kadirehla tehnpesen Koht mehlelo.+

6 Ni ahnsowo Solomon ahpw patohwan: “Siohwa ketin mahsanih me e pahn ketiket nan rotorot mosulo.+ 2 Met I patohwan kauwadahr tehnpas ileile ehu ong komwi, wasa ehu me koasoandier ong komwi en ketiket ie kohkohlahte.”+

3 Nanmwarkio eri sohpeila oh kapaiahda mwomwohdisohn Israel pwon ni tohnmwomwohdiso pwon ar wie kesikesihnen.+ 4 E ahpw patohwan: “Kaping en kohwong Siohwa, Koht en Israel, me ketin inoukihong semei Depit sang nin doauese, oh ketin kapwaiada sang nin lime, ni eh ketin mahsanih, 5 ‘Sang rahn me I kahrehsang nei aramas akan nan sapwen Isip, I sohte pilada kahnimw ehu nanpwungen kahnimw en keinek en Israel koaros pwehn kauwada tehnpas ehu ong mwareiet en kin mihmi ie,+ oh I sohte pilada emen en wiahla kaunen nei aramas en Israel kan. 6 Ahpw I piladahr Serusalem+ ong mwareiet en kin mihmi wasao, oh I piladahr Depit en kaunda nei aramas en Israel kan.’+ 7 Oh semei Depit kin inengieng nan eh mohngiong en kauwada tehnpas ehu ong mwaren Siohwa, Koht en Israel.+ 8 Ahpw Siohwa ketin mahsanihong semei Depit, ‘Ih me ke kin inengieng nan omw mohngiong, ken kauwada tehnpas ehu ong mwareiet, oh mwahu omw kin inengieng met nan omw mohngiong. 9 Ahpw, ke sohte pahn kauwada tehnpaso, ahpw pein noumw pwutak me pahn ipwidiong uhk* me pahn kauwada tehnpas ehu ong mwareiet.’+ 10 Siohwa ketin kapwaiada inou me e ketin wiadahro, pwe I wiliandier semei Depit oh I mwohndiong nan mwoalen Israel,+ duwehte me Siohwa ketin inoukidahr.+ I pil kauwadahr tehnpas ehu ong mwaren Siohwa, Koht en Israel, 11 oh wasao I kihdiong Kohpwa me inou lapo mi loale,+ me Siohwa ketin wiahiong aramas en Israel kan.”

12 Solomon eri kesihnen mwohn pei sarawi en Siohwa mwohn mwomwohdisohn Israel pwon, oh e kapapeseng peh ko.+ 13 (Pwe Solomon wiadahr pasapas prons ehu oh kihdiong nanwerengen wasa kelpeneo.+ Pasapaso kiupid* limau reirei, kiupid limau tehlap oh kiupid siluh ile; ih eri kesihnenda powe.) Oh e kelepwikihdi mwohn mwomwohdisohn Israel pwon oh kapahdahla peh ko nanleng,+ 14 oh patohwan: “Maing Siohwa, Koht en Israel, sohte emen Koht nanleng de pil nin sampah me duwehte komwi, me kin ketin kolokol inou lapo oh ketin kasalehda limpoak loalopwoat ong sapwellimomwi ladu kan me kin weweid mwohn silangomwi sang nan arail mohngiong unsek.+ 15 Komw kin ketin kolokolete inou me komw ketin wiahiong semei Depit, sapwellimomwi ladu.+ Komw ketin wiadahr inou sang ni pein doauesomwi, oh rahnwet komw ketin kapwaiadahr sang nin limomwi.+ 16 Oh met, Maing Siohwa, Koht en Israel, komw ketin kolokolete inou me komw ketin wiahiong semei Depit, sapwellimomwi ladu ni omwi ketin mahsanih: ‘Ahnsou koaros e pahn mie ohl emen sang kadaudokomw mwohn silangi me pahn mwohndiong nan mwoalen Israel, ma noumw pwutak kan pahn kin kanahieng arail kin momour oh idawehn ei kosonned,+ duwehte omw kin idawehn elei kan.’+ 17 Oh met, Maing Siohwa, Koht en Israel, komw ketin kapwaiada inou me komw ketin wiahiong sapwellimomwi ladu Depit.

18 “Ahpw ia duwe, Koht uhdahn pahn ketin kousoan rehn aramas akan nin sampah?+ Kilang! Nanleng, ei, nanleng me keieu ile, sohte kak itarohng komwi;+ eri ia uwen tehnpas wet me I patohwan kauwadahr eh nohn tikitik ong komwi!+ 19 Maing Siohwa ei Koht, komw ketin karonge kapakap en sapwellimomwi laduet oh eh tungoal pekipek en kupwuramwahu, oh komw ketin karonge ngilen peksawas oh kapakap me sapwellimomwi laduet patohwan kapakapki mwohn silangomwi. 20 Silangomwi en ketin ireirong tehnpas wet ni rahn oh nipwong, ong wasa me komw ketin mahsanih me komw pahn ketikihdi mwaromwi ie,+ pwe komwi en ketin karonge kapakap me sapwellimomwi laduet kin sohpeidohng wasaht oh kapakapki. 21 Oh komw ketin karonge en sapwellimomwi laduet eh peksawas oh pekipek kan me sapwellimomwi aramas en Israel kan kin sohpeidohng wasaht oh kapakapki,+ oh komw ketin karonge sang ni wasa me komwi kin ketiket ie nanleng;+ ei, komwi en ketin karonge oh ketin mahkohng kiht.+

22 “Ma aramas emen kin wiahda dihp ong emen ienge oh idihdiong en kahula* oh kin pwukoahki kahula* wet, oh nindoken eh mihmihte pahn kahula* wet e ahpw patohdo mwohn sapwellimomwi pei sarawi en tehnpas wet,+ 23 eri komwi en ketin karonge sang nanleng oh ketin mwekid oh kadeikada sapwellimomwi ladu kan ni omwi ketin dupukohng aramas suwedo oh ketin kalokehki dahme e wiadahro,+ oh ni omwi ketin kasalehda me aramas pwungo sohte dipada* oh ketin katingiheki eh wiewia pwung.+

24 “Oh ma sapwellimomwi aramas en Israel kan kin lohdi pahn arail imwintihti kan pwehki arail kin pwurupwurehng wia dihp ong komwi,+ oh re pwurodo rehmwi oh kalinganahda mwaromwi+ oh kapakap+ oh peki kupwuramwahu mwohmwi nan tehnpas wet,+ 25 eri komwi en ketin karonge sang nanleng+ oh ketin mahkohng dipen sapwellimomwi aramas en Israel kan oh ketin kapwureiraildohng nan sahpw me komw ketikihong irail oh samarail mehn mahs ako.+

26 “Ni ahnsou me nanleng ritidi oh sohla keteu+ pwehki arail kin pwurupwurehng wia dihp ong komwi,+ oh re kin sohpeidohng wasaht oh kapakap oh kalinganahda mwaromwi oh sohpeisang diparail pwehki komwi ketin kahrehiong irail en aktikitikla,*+ 27 eri, komwi en ketin karonge sang nanleng oh ketin mahkohng dipen sapwellimomwi ladu kan, sapwellimomwi aramas en Israel kan, pwe komw pahn ketin kaweidkin irail duwen ahl mwahu me irail pahn keid ie;+ oh ketin kamwerehdiong keteu+ pohn sapwellimomwi sahpwet me komw ketikihong sapwellimomwi aramas akan nin duwen sohso ehu.

28 “Ma lehk lapalap de soumwahu lusulus+ wiawi nan sahpwet,+ wahnsahpw ohkihla kisinieng karakar, eniep,+ mwutumwut en loukust, de loukust*+ mehwo kan pwarada de ma arail imwintihti kan kapilirailpene nan kahnimw sohte lipilipil me mi nan sahpwet*+ de ma soangen kalokolok de soumwahu teikan pahn wiawi,+ 29 soangen kapakap sohte lipilipil,+ soangen peki kupwuramwahu sohte lipilipil+ me mwein aramas emen wia de aramas akan koaros en Israel wia (pwe emenemen ese pein eh lokolok oh medek)+ ni arail kin kapahwei pehrail kan ong tehnpas wet,+ 30 eri komwi en ketin karonge sang nanleng, wasa me komwi kin ketiket ie,+ oh komw ketin mahkohng;+ oh komw ketin katingih emenemen nin duwen eh wiewia kan koaros, pwe komwi ketin mwahngih eh mohngiong (komwi kelehpw me uhdahn ketin mwahngih mohngiong en aramas),+ 31 pwe irail en lemmwikin komwi ni ar kin idawehn alomwi kan erein ar momour nan sahpw me komw ketikihong samat mehn mahs ako.

32 “Oh pil duwen mehn liki men me sohte wia kisehn sapwellimomwi aramas en Israel oh me kohdo sang sahpw doh pwehki mwaromwi* lapalap+ oh duwen nin limomwi roson oh manaman lapalap, oh e patohdo sohpeidohng tehnpas wet oh kapakap,+ 33 eri komwi en ketin karonge sang nanleng, wasa me komwi kin ketiket ie, oh ketin wiahda mehkoaros me mehn likio peki rehmwi, pwe aramas koaros nin sampah en esehla mwaromwi+ oh lemmwikin komwi, duwehte me sapwellimomwi aramas en Israel kan kin wia, oh en ese me tehnpas wet me I kauwadahr kin kalinganahda mwaromwi.

34 “Ma sapwellimomwi aramas akan kohla mahweniong arail imwintihti kan wasa sohte lipilipil me komw ketin poaroneiraillahng ie,+ oh irail ahpw kapakap+ ong komwi, sohpeilahng kahnimw wet me komw ketin piladahr, oh ong ni tehnpas wet me I kauwadahr ong mwaromwi,+ 35 eri komw ketin karonge sang nanleng arail kapakap oh peki kupwuramwahu oh ketin mwekid* pwehki irail.+

36 “Ma re wiahda dihp ong komwi (pwe sohte aramas emen me sohte dipe),+ oh komwi ketin engiengda pahrail oh ketin mweidirailla ong arail imwintihti, oh me salihiraildi kan kalipeiraillahng nan sahpw ehu, wasa doh de keren,+ 37 oh re pehmada me irail me sapwung nan sahpw me re kalipilipala ieo, oh re pwurodo rehmwi oh peki kupwuramwahu nan sahpw me re selidi ie, patohwan, ‘Se dipadahr oh wiahda me sapwung; se wiadahr me suwed,’+ 38 oh re pwurodohng komwi ni ar mohngiong+ oh mour* unsek nan sahpw me re sensel ie+ wasa me re kalipilipala ie, oh re kapakap sohpeilahng sapwarail me komw ketikihong samarail mehn mahs ako oh kahnimw me komw ketin piladahro+ oh tehnpas me I kauwadahr ong mwaromwi, 39 eri komw ketin karonge ar kapakap oh ar peki kupwuramwahu sang nanleng, wasa me komwi kin ketiket ie, oh ketin mwekid* pwehki irail+ oh ketin mahkohng sapwellimomwi aramas akan me dipadahng komwi.

40 “Eri, Maing ei Koht, komw kupwurkalahngan oh ketin mahsanih oh karonge kapakap me kin wiawi* wasaht.+ 41 Maing Siohwa Koht, komw ketidahla ni sapwellimomwi wasahn kommoal,+ komwi oh Kohpwahn inou lapo, kilel en sapwellimomwi kehl. Maing Siohwa Koht, sapwellimomwi samworo kan en pwuhriong nan komour, oh irail akan me loalopwoatohng komwi en pereperen pwehki soahng mwahu koaros me komw ketin wiadahr.+ 42 Maing Siohwa Koht, komw dehr ketin soikala* sapwellimomwi me keidio.+ Komw ketin tamataman sapwellimomwi limpoak loalopwoat ong Depit sapwellimomwi laduwo.”+

7 Eri ni ahnsowohte me Solomon kaimwisekala kapakapo,+ kisiniei ahpw kohdihdo sang nanleng+ oh isikala meirong isihso oh meirong teikan, oh sapwellimen Siohwa lingan ahpw kadirehla tehnpaso.+ 2 Samworo ko sohte kak pedolong nan tehnpesen Siohwa pwehki sapwellimen Siohwa lingan kadirehla tehnpesen Siohwa.+ 3 Oh aramas en Israel ko koaros kilikilang ni kisinieio eh kohdihdo oh sapwellimen Siohwa lingan eh pwarada pohn tehnpaso, oh re ahpw kelepwikihdi pohn tat takaio, poaridi oh kaping kalahnganohng Siohwa, “pwehki ih me kupwur mwahu; sapwellime limpoak loalopwoat me poatopoat.”

4 Nanmwarkio oh aramas ako koaros eri wiahda meirong kan mwohn silangin Siohwa.+ 5 Nanmwarki Solomon meirongkihla kou 22,000 oh sihpw 120,000. Nanmwarkio oh aramas ako koaros eri kasarawihala tehnpesen Koht mehlelo.+ 6 Samworo kan kin kesihnen ni ar wasahn doadoahk, duwehte mehn Lipai ko me kesihnen oh kolokol mehn keseng ko pwe ren kouliong Siohwa.+ (Nanmwarki Depit wiahda mehn keseng pwukat pwehn kapingkalahngan ong Siohwa—“pwe sapwellime limpoak loalopwoat me poatopoat”—ni Depit eh kin doadoahngki mepwukat* ong kapinga Koht.) Oh samworo ko peuk sowi ko ni ngihl laud mwohrail,+ nindoken mehn Israel koaros ar kesikesihnen.

7 Solomon eri kasarawihala nanwerengen wasa me kelpeneo me mi mwohn tehnpesen Siohwa, pwe e anahne wiahda meirong isihs kan+ oh wih en meirong en kaminimin ko wasao. Solomon wia met pwehki pei sarawi prons+ me e wiahdao sohte itarohng meirong isihs kan, meirong en krein kan,+ oh wih en meirong kan.+ 8 Ni ahnsowo, Solomon wiahda kasarawio* erein rahn isuh+ iangahki Israel pwon, lapalahn mwomwohdiso ehu sang Lepo-amad* leldihla Wahun Isip.+ 9 Ahpw ni kawaluhn rahn* re wiahda kapokon sarawi ehu,+ pwehki re wia kasarawien pei sarawio erein rahn isuh oh kasarawio* erein rahn isuh. 10 Eri ni kerieisek siluhn rahn en keisuhwen sounpwong, e kadarpeseng aramas ako ni imwarail kan pereperen+ oh mohngiongirail nsenamwahuki soahng mwahu kan me Siohwa ketin kasalehiong Depit oh Solomon oh sapwellime aramas en Israel kan.+

11 Solomon eri kanekehla doadoahk en kauwada tehnpesen Siohwa oh tehnpesen nanmwarkio;+ oh Solomon kapwaiada mehkoaros me e koasoanehdi en wia me pid tehnpesen Siohwa oh tehnpese.+ 12 Siohwa eri ketin pwarohng Solomon+ nipwongo oh mahsanihong ih: “I karongeier omw kapakap oh I piladahr ihmw wet ong wasahn wia meirong kan.+ 13 Ni ei ritingedi nanleng oh sohla keteu oh ni ei ruwese mensiek kan ren kangala sahpwet oh ma I kadarodo soumwahu lusulus nanpwungen nei aramas akan, 14 ma nei aramas akan me kin weuwa mwarei+ aktikitikla+ oh kapakap oh rapahkin ie oh sohpeisang ar wiewia suwed kan,+ eri I pahn karonge sang nanleng oh mahkohng diparail kan oh kamwahwihala sapwarailo.+ 15 Eri I pahn karonge irail kan me kin kapakap wasaht oh silangi kat pahn kin ireirong irail.+ 16 Oh I piladahr oh kasarawialahr tehnpas wet pwe mwareiet en mihmi wasaht kohkohlahte,+ oh silangi oh mohngiongi pahn mihmi wasaht ahnsou koaros.+

17 “A kowe, ma ke kin kekeidwei mwohn silangi duwehte semomw Depit eh kin kekeid, sang ni omw kin wiahda soahng koaros me I kehkehlingkihong uhk, oh peikiong ei koasoandi kan oh ei kopwung kan,+ 18 eri I pahn kauwada mwoalen omw wehi,+ duwehte ei wiahda inou lap rehn semomwo Depit,+ ni ei mahsanih: ‘Ahnsou koaros e pahn mie ohl emen sang kadaudokomw me pahn kaunda Israel.’+ 19 Ahpw ma kumwail sohla pahn idawehn oh kesehla ei koasoandi kan oh kehkehlik kan me I kihdiong mwohmwail, oh kumwail kohla oh papah koht teikan oh poaridiong irail,+ 20 I pahn usada Israel sang pohn sapwei me I kihong irail,+ oh I pahn kesehsang mwohn silangi tehnpas wet me I kasarawihala ong mwarei, oh I pahn wiahiong met mehkot me aramas koaros pahn kouruhrki oh mwamwahliki.*+ 21 Oh tehnpas wet pahn wiahla koasoakoasoak en mohn ihmw. Koaros me pahn keidla limwah pahn pwuriamweikihla kangkakil+ oh nda, ‘Dahme Siohwa ketin wiahkihda met ong sahpwet oh tehnpas wet?’+ 22 Irail ahpw pahn nda, ‘Met pwehki arail kesehla Siohwa,+ Koht en samarail mehn mahs ako, me ketin kahreiraildo sang nan sapwen Isip,+ oh re alehda koht teikan oh poaridiong irail oh papah irail.+ Ih kahrepen eh ketikihdiong pohrail kahpwal pwukat koaros.’”+

8 Erein sounpar 20, Solomon wie kakau tehnpesen Siohwa oh tehnpeseo.+ 2 Mwurin mwo, Solomon onehda sapahl kahnimw kan me Airam+ kihong Solomon oh koasoanehdi mehn Israel kan* en kousoan wasa ko. 3 Oh pil Solomon kohla Amad-sopa oh kalowehdi. 4 Ih eri onehda sapahl* Tadmor nan sapwtehn oh kahnimw en wasahn nahk kan koaros+ me e kauwada nan Amad.+ 5 E pil kauwada Ped-oron Pali Powe+ oh Ped-oron Pali Pah,+ kahnimw kehlail kan me mie kehl, ewen kehl, oh mehn kateng kan, 6 oh Paalad+ oh pil en Solomon kahnimw en wasahn nahk kan koaros, oh kahnimw en kuruma kan koaros,+ kahnimw en soundak oahs kan, oh sohte lipilipil dahme Solomon men kauwada nan Serusalem, nan Lepanon, oh nan sahpw kan koaros me mi pahn eh kaunda.

7 Ahpw duwen aramas akan koaros me luwehdi sang rehn mehn Id kan, mehn Amor kan, mehn Peris kan, mehn Ip kan, oh mehn Sepus kan,+ me kaidehn kisehn Israel,+ 8 kadaudokarail kan me luhwehdi nan sahpwo—irail kan me mehn Israel kan sohte kasohrehla+—Solomon ruwesehiong irail ren wia doadoahk idihd leledo rahnwet.+ 9 Ahpw sohte emen rehn mehn Israel kan me Solomon kaliduwih,+ pwehki irail wia nah sounpei, kaunen nah opiser kan, oh kaunen soundak kuruma oh soundak oahs kan.+ 10 Kaunen keriaun kaun akan meh 250 me kin apwahpwalih en Solomon doadoahk kan, kaun en pwihnen doadoahk me kakaun aramas akan.+

11 Solomon pil wahsang nein Parao serepeino+ nan Kahnimw en Depit oh wahdahdo nan ihmw me e kauwadahng liho,+ pwe e nda: “Mendahki ih ei pwoud, e sohte pahn kousoan nan tehnpesen Nanmwarki Depit en Israel, pwe wasa kan me Kohpwahn inou lap en Siohwa kin kohdo ie me sarawi.”+

12 Solomon eri wiahda meirong isihs kan+ ong Siohwa pohn pei sarawi+ en Siohwa, me e kauwada mwohn palangko.+ 13 Nin duwen kehkehlik en Moses, e kin idawehn koasoandi en ehuehu rahn oh wiahda meirong ong Sapad kan,+ maram pwul kan+ oh kasarawi kan me koasoandi en wiawi pak siluh nan ehuehu pahr+—Kasarawien Pilawa me Sohte Doal Ihs,+ Kasarawien Wihk kan+ oh Kasarawien Impwal kan.*+ 14 Oh pil, Solomon koasoanehdi pwihnen samworo kan+ ong arail doadoahk nin duwen kosonned en seme Depit, oh e koasoanehdi mehn Lipai kan ong arail pwukoa kan, pwe irail en kin kapinga+ oh papah mwohn samworo kan nin duwen koasoandien ehuehu rahn, oh e koasoanehdi silepen ewen kehl kan ni ar pwihn kan ong ehuehu ewen kehl,+ pwe Depit, ohlen Koht mehlelo me kehkehlingki mepwukat. 15 Oh re sohte sohpeisang en nanmwarkio kehkehlik ong samworo kan oh mehn Lipai kan me pidada soahng sohte lipilipil de imwen nahk kan. 16 Eri en Solomon doadoahk koaros soandi mwahu,* sang ni rahn me poahsoan en tehnpesen Siohwa wiawihda+ lao doadoahko imwisekla. Tehnpesen Siohwa eri kokouda.+

17 Ih ahnsowo me Solomon kohla Esiongkeper+ oh Elod+ ni oaroahr en sapwen Edom.+ 18 Airam+ kadarala reh sohp kan oh sehla koahiek kei me mi pahn kaweid en nah ladu kan. Irail iang nein Solomon ladu ko kohla Opir+ oh alehsang wasao kohl+ dalend* 450 oh wahdo rehn Nanmwarki Solomon.+

9 Lih nanmwarkien Sipa+ eri rongada duwen Solomon, ih eri kohdo Serusalem pwehn songki Solomon peidek apwal kei.* E lella iangahki pwihn en ladu tohtohie,* iangahki kamel kan me wa lehn palsam* oh kohl+ oh takai kesempwal tohtohie. E kohla rehn Solomon oh koasoiaiong ih soahng koaros me mi nan eh mohngiong.+ 2 Solomon eri sapengala eh peidek kan koaros. Sohte mehkot me apwal ong* Solomon en kawehwehiong liho.

3 Ni ahnsou me lih nanmwarkien Sipao kilangehr erpit en Solomon,+ tehnpas me e kauwadahro,+ 4 mwenge kan me mi pohn eh tehpel,+ wasa me nah ladu kan kin mwohd ie, mwomwen nah sounpapah kan ar kin papah ni tehpel oh arail likou kan, nah sounkohwahn wain kan oh arail likou kan, oh eh meirong isihs me e kin wiewia ahnsou koaros ni tehnpesen Siohwa,+ e uhdahn pwuriamweikihla. 5 E ahpw ndaiong nanmwarkio: “Rohng me I rong nan ei wehi duwen omwi pweida* oh omwi erpit me mehlel. 6 Ahpw I sohte kin kamehlele rohngo lao I kohdo oh kilangki pein mesei.+ Oh kilang! I pil saikinte rongedi elep en omwi erpit laud.+ Komwi siklahsang mehlel dahme I rongehro.+ 7 Meid pai sapwellimomwi aramas akan, oh meid pai sapwellimomwi ladu kan me kin patopato rehmwi ahnsou koaros, oh me kin patohwan rongorong omwi erpit! 8 Kaping en kohwong Siohwa omwi Koht, me ketin kupwurperenkin komwi ni eh ketikinkomwihdi nan mwoale nin duwen nanmwarki ong Siohwa omwi Koht. Pwehki omwi Koht eh ketin poakohng Israel,+ e ketin idihkomwihda pohn Israel nin duwen nanmwarki pwe komwi en ketin wia kopwung ni pwung pahrek oh kaunda ni pwung, pwe Israel en mihmi kohkohlahte.”

9 Liho eri kihong nanmwarkio kohl+ dalend* 120 oh lehn palsam ni uwe ieu me inenen laud oh takai kesempwal kan. Sohte emen me wahla uwen soangen lehn palsam me duwehte me lih nanmwarkien Sipa kihong Nanmwarki Solomon.+

10 Oh pil, nein Airam ladu ko oh nein Solomon ladu ko me kin wahdo kohl sang Opir+ pil kin wahdo tuhke alkum oh takai kesempwal kan.+ 11 Nanmwarkio wiahkihda tuhke alkum kehndake kan ong tehnpesen Siohwa+ oh ong tehnpesen nanmwarkio,+ oh pil arp oh mehn keseng sahl kan ong sounkoul kan.+ Sohte emen me kilangehr soahng kaselel kan me duwehte mepwukat nan sapwen Suda.

12 Nanmwarki Solomon pil kihong lih nanmwarkien Sipa soahng koaros me e mwahuki oh peki, laudsang dahme* liho wadohng nanmwarkio. Liho eri mweselda oh pwuralahng nan eh wasa, iangahki nah ladu kan.+

13 Oh uwen toutou en kohl me kin kodohng Solomon nan pahr ehu kin pahrekiong kohl+ dalend 666. 14 Met likin dahme kin kohsang rehn sounnetinet me kin seiseiloak, sounnetinet kan, nanmwarkien Arepia koaros oh kepina kan en sahpwet kin wahdo kohl oh silper rehn Solomon.+

15 Nanmwarki Solomon wiahda mehn sansar laud 200 sang ni kohl me doalkihda ehu soangen mete tohrohr+ (ehuehu mehn sansar kin kidikidkihla sekel* 600 en kohl me doalkihda ehu soangen mete tohrohr)+ 16 oh mehn sansar tikitik 300 sang ni kohl me doalkihda ehu soangen mete tohrohr (ehuehu mehn sansar kin kidikidkihla mina* 3 en kohl). Nanmwarkio eri kihdiong mepwukat nan Imwen Welin Lepanon.+

17 Nanmwarkio pil wiahkihda aipori mwoahl ehu me inenen laud oh kidimkihla kohl tohr.+ 18 Lohn kehndake weneu me kohdalahng ni mwoahlo, oh mie utupen aluweluwe kohl ehu me patehng mwoahlo, oh mie mehn irekek en mwoahlo pali koaros, oh laion riemen+ kesihnen limwahn mehn irekek ko. 19 Mie laion 12+ me kesihnen pohn lohn kehndake weneu ko, emenemen ni imwin ehuehu kehndake weneu ko. Sohte ehu wehi tohrohr me wiadahr mehkot me duwehte met. 20 Nein Nanmwarki Solomon kep koaros wiawihkihda kohl, oh dipwisou koaros nan Imwen Welin Lepanon wiawihkihda kohl tohr. Sohte mehkot me wiawihkihda silper, pwehki sohte weden silper ni mwehin Solomono.+ 21 Pwe weren nanmwarkio sohp ko kin kohla Tarsis+ iangahki nein Airam ladu ko.+ Pak ehu nan sounpar siluh koaros, sohp en Tarsis ko kin kohdo audaudkidahr kohl oh silper, aipori,+ mwengki oh pihkoak* kan.

22 Eri nanmwarki Solomon kepwehpwehsang oh erpit sang nanmwarki teikan koaros en sampah.+ 23 Oh nanmwarki kan sang wasa koaros nin sampah kin songosong en tuhwong Solomon pwehn rong duwen eh erpit me Koht mehlelo ketikihong nan eh mohngiong.+ 24 Emenemen irail kin wadohng ih kisakis—soahng kan me wiawihkihda silper oh kohl, likou kan,+ tehtehn mahwen, lehn palsam, oahs kan, oh dongki kan—oh met kin pousehlahte wiawi sounpar koaros. 25 Oh mie ahn Solomon wasahn dewen oahs 4,000 ong nah oahs ko oh were kuruma ko oh e naineki oahs* 12,000,+ oh e kihdiong irail nan kahnimw en kuruma kan oh wasa me karanih nanmwarkio nan Serusalem.+ 26 Oh e kin kaunda nanmwarki kan koaros sang ni Pillapo* lella sapwen mehn Pilisdia kan oh lella ni irepen Isip.+ 27 Nanmwarkio kin wiahiong silper nan Serusalem en tohtohla duwehte takai, oh tuhke sidar en tohtohla duwehte tuhke sikamor* kan nan Sepihla.+ 28 Oh aramas akan kin wahdo oahs kan rehn Solomon sang Isip+ oh sang sahpw teikan koaros.

29 A duwen soahng teikan nan poadopoad en Solomon,+ sang ni tapi lel ni imwi, e sou ntinting nan en soukohp Nadan+ nting kan, nan en Ahisa+ mehn Sailo kokohp kan, oh nan nting kan me soukohp* Iddo,+ me kilangehr kaudiahl duwen Seropoham+ nein Nepat ntingihedi? 30 Solomon kaunda Israel pwon nan Serusalem erein sounpar 40. 31 Solomon eri kommoaldi rehn seme mehn mahs ako. Irail eri sarepedi ih nan Kahnimw en Depit semeo;+ oh nah pwutak Reopoham wiliandi ih wiahla nanmwarki.+

10 Reopoham eri kohla Sekem,+ pwe Israel pwon kolahr Sekem pwe ren wiakihla ih nanmwarki.+ 2 Ni ahnsowohte me Seropoham+ nein Nepat rongada duwen met (e mihmihte Isip pwehki e tangasang Nanmwarki Solomon),+ Seropoham eri pwurodo sang Isip. 3 Irail eri ileklahng ih, oh Seropoham oh Israel pwon ahpw kohdo rehn Reopoham oh ndaiong: 4 “Semomwio kahrehiong at mehn wisik en apwal.+ Ahpw ma komw pahn ketin kamengeila doadoahk apwal en semomwo oh ketin kamarahda wisik toutou me e ketikihdiong poht, eri se pahn kin papah komwi.”

5 Reopoham ahpw ndaiong irail: “Kumwail pwurodo rehi mwurin rahn siluh.” Aramas ako eri kohkohla.+ 6 Nanmwarki Reopoham eri peki sawas rehn ohl mah kan me kin papah seme Solomon ni ahnsou me e wie momour oh nda: “Soangen kaweid dah me kumwail pahn kihda ong duwen ei pahn sapengala aramas pwukat?” 7 Irail ahpw sapengki ih: “Ma komw pahn kadek ong aramas pwukat oh kaperenirailda oh ketikihong irail pasapeng me mwahu, re pahn wiewiahte sapwellimomwi ladu ahnsou koaros.”

8 Ahpw, Reopoham soikala kaweid me ohl mah ko kihong ih, oh e peki sawas rehn mwahnakapw akan me irail ehu keirda oh met re wia nah sounpapah.+ 9 E ahpw idek rehrail: “Soangen kaweid dah me kumwail pahn kihda duwen atail pahn sapeng aramas pwukat me ndaiong ie, ‘Komw ketin kamarahda mehn wisik me semomwio ketikihdiong poht’?” 10 Mwahnakapw ako me irail ehu keirda ahpw ndaiong ih: “Iet me komw pahn mahsanihong aramas ako me patohwanohng komwi, ‘Semomwio kahrehiong at mehn wisik en toutou, ahpw komwi anahne kamarahda ong kiht;’ iet me komw pahn mahsanihong irail, ‘Senditikiet pahn ahlapasang pwonen semeio. 11 Semeio kihong kumwail mehn wisik toutou ehu, ahpw I pahn kalaudehla amwail mehn wisiken. Semeio kin kalokehkin kumwail mehn wowoki sahl kei, ahpw I pahn kalokehkin kumwail mehn wowoki tekatek kan.’”

12 Seropoham oh aramas ako koaros ahpw kohdo rehn Reopoham ni kesiluhwen rahn, duwehte me nanmwarkio koasoiaier: “Kumwail pwurodo rehi ni kesiluhwen rahn.”+ 13 Ahpw nanmwarkio sapengala irail ni lemei. Nanmwarki Reopoham eri soikala kaweid en ohl mah ko. 14 E koasoiaiong irail duwen kaweid en mwahnakapw ko, nda: “I pahn kahrehiong amwail mehn wisik en toutou, oh I pahn kalaudehla amwail mehn wisiken. Semeio kin kalokehkin kumwail mehn wowoki sahl kei, ahpw I pahn kalokehkin kumwail mehn wowoki tekatek kan.” 15 Eri nanmwarkio sohte rong aramas ako, pwe Koht mehlelo me ketin kahrehiong wekidekla wet en wiawi,+ pwe en kapwaiada mahsen en Siohwa sang rehn Ahisa+ mehn Sailo ong Seropoham nein Nepat.

16 Pwehki nanmwarkio kahng rong irail, aramas ako, Israel pwon, eri sapengki nanmwarkio: “Ia duwe, mie pwaisat rehn Depit? Sohte at sohso rehn nein Sehsi pwutak. Israel, emenemen en pwurala rehn eh koht akan! Kadaudok en Depit kan, pein apwalih kumwail.”+ Israel eri pwurala ni imwarail ko.*+

17 Ahpw Reopoham pousehlahte kakaun mehn Israel kan me kin koukousoan nan kahnimw en Suda kan.+

18 Nanmwarki Reopoham eri kadarala Adoram,+ me kin apwalih irail ako me ruwesiong ren wia doadoahk idihd kan ong nanmwarkio, ahpw mehn Israel kan katehki ih takai oh kemehla. Nanmwarki Reopoham ahpw kereda pohn were kurumao oh tangalahng Serusalem.+ 19 Oh mehn Israel kan kin uhwong kadaudok en Depit kan leledo rahnwet.

11 Ni ahnsou me Reopoham leledo Serusalem, e mwadangete kapokonepene keinek en Suda oh Pensamin kan,+ sounpei kaiahnda* 180,000 kei, pwe ren peiong Israel oh kapwuredohng Reopoham wehio.+ 2 Siohwa eri ketin mahsanihong Semaia+ ohlen Koht mehlelo: 3 “Ndaiong Reopoham nein Solomon, nanmwarkien Suda oh ong Israel pwon nan Suda oh Pensamin, 4 ‘Iet me Siohwa ketin mahsanih: “Kumwail dehr kohdahla oh mahweniong riamwail kan. Emenemen kumwail en pwurala ni imwamwail kan, pwe ngehi me kahrehda met en wiawi.”’”+ Irail eri peikiong mahsen en Siohwa oh pwurala oh sohte mahweniong Seropoham.

5 Reopoham eri kousoanla nan Serusalem oh kauwada kahnimw kehl kehlail kan nan Suda. 6 Ih eri kauwada* Pedleem,+ Etam, Tekoa,+ 7 Pedsur, Soko,+ Adullam,+ 8 Kahd,+ Maresah, Sip,+ 9 Adoraim, Lakis,+ Aseka,+ 10 Sorah, Aisalon+ oh Ipron,+ kahnimw kehl kehlail kan me mi nan Suda oh Pensamin. 11 Oh e pil kakehlailihala kahnimw kehl kehlail kan oh idihada kaunen sounpei kan nan wasa pwukat oh kihdiong mwenge oh leh oh wain wasa ko, 12 oh e kihdiong mehn sansar laud kan oh ketieu kan nan kahnimw kan koaros; e inenen kakehlailihala kahnimw pwukat. Suda oh Pensamin mihmihte pahn eh manaman.

13 Oh samworo kan oh mehn Lipai kan me mi nan Israel pwon utung ih, ni ar kohdo sang arail wasa kan koaros. 14 Mehn Lipai ko kesehla arail mohs ko oh sapwarail ko+ oh kohdo Suda oh Serusalem, pwehki Seropoham oh nah pwutak kan solahr mweidohng irail en papah nin duwen samworo kan ong Siohwa.+ 15 Seropoham eri idihada pein nah samworo kan ong wasa ile kan+ oh ong ngehn suwed kan me mwomwen kuht*+ oh ong kouwol pwul kan me e wiahda.+ 16 Oh irail me kohsang keinek en Israel kan koaros, me kin koasoanehdi teng nan mohngiongirail ren rapahki Siohwa, Koht en Israel, ahpw idawehn samworo ko oh mehn Lipai ko kohla Serusalem pwe ren wia meirong kan ong Siohwa, Koht en samarail mehn mahs ako.+ 17 Erein sounpar siluh re kin kakehlailih manaman en nanmwarkien Suda oh utung Reopoham nein Solomon, pwe re kin idawehn elen Depit oh Solomon erein sounpar siluh.

18 Reopoham pwoudikihda Maalad, me eh pahpa iei Serimod nein Depit oh eh nohno iei Apieil nein Eliap,+ me nein Sehsi. 19 Kedekedeo liho naitikihong Reopoham pwutak kan: Sius, Semaraia oh Saham. 20 Mwurin liho, Reopoham uhd pwoudikihda Maaka nein nein Apsalom.+ Kedekedeo Maaka naitikihong ih Apaisa,+ Attai, Saissa oh Selomid. 21 Reopoham poakohng Maaka nein nein Apsalom laudsang eh pwoud teikan oh eh pekehi kan koaros,+ pwe e pwoudiki lih 18 oh pekehiki lih 60, oh e naineki pwutak 28 oh serepein 60. 22 Reopoham eri idihada Apaisa nein Maaka nin duwen kaun nanpwungen rie kan, pwe e men wiahkihla ih nanmwarki. 23 Ahpw Reopoham mwekidki erpit* oh kadarala* ekei nah pwutak kan ni kahnimw kehl kehlail kan koaros+ me mi nan sapwen Suda oh Pensamin pwon, oh e kihong irail mwenge tohto oh pil arail pwoud tohto.

12 Mwurinte en Reopoham manaman en nanmwarki eh tengedi oh e kehlailla,+ e kesehla Kosonned en Siohwa+ oh Israel pwon pil iangih. 2 Ni kelimaun sounpar en Nanmwarki Reopoham, Nanmwarki Sisak+ en Isip ahpw kohdahdo mahweniong Serusalem, pwehki ar wiahda mwekid salelepek ong Siohwa. 3 Mie kuruma 1,200 oh soundak oahs 60,000 oh pwihnen sounpei tohtohie me iangih kohdo sang Isip—mehn Lipia kan, mehn Suk kan oh mehn Idiopia kan.+ 4 E kalowehdi kahnimw kehl kehlail en Suda kan, ih eri leledo Serusalem.

5 Soukohp Semaia+ eri kohdo rehn Reopoham oh lapalap en Suda kan me pokonpene Serusalem pwehki Sisak, oh e ndaiong irail: “Iet me Siohwa ketin mahsanihen, ‘Kumwail keseielahr, eri I pil keseikumwailla+ nan pehn Sisak.’” 6 Lapalap en Israel ko oh nanmwarkio eri aktikitikla+ oh nda: “Siohwa me ketin pwung.” 7 Ni ahnsou me Siohwa ketin mahsanihada arail aktikitikla, Siohwa ahpw ketin mahsanihong Semaia: “Irail aktikitiklahr. Eri, I sohte pahn kasohreirailla,+ oh mwurin ahnsou kis I pahn kapitirailla. I sohte pahn wudekihdiong ei engieng pohn Serusalem sang Sisak. 8 Ahpw re pahn wiahla nah ladu, pwe re pahn esehla wekpeseng en arail papah ie oh papah nanmwarkien* sahpw teikan.”

9 Nanmwarki Sisak en Isip ahpw kohdahdo mahweniong Serusalem. E wahsang dipwisou kesempwal kan en tehnpesen Siohwa+ oh dipwisou kesempwal kan en tehnpesen nanmwarkio. E wahsang mehkoaros, iangahki mehn sansar kohl kan me Solomon wiahda.+ 10 Nanmwarki Reopoham eri wiahda mehn sansar prons kan pwehn wiliandi mehn sansar ko, oh e kihong mepwukat rehn kaunen sounsilasil kan,* irail me kin sinsile wasahn pedolong en tehnpesen nanmwarkio. 11 Ahnsou koaros me nanmwarkio kin kohla ni tehnpesen Siohwa, sounsilasil kan kin kohdo oh wahda mehn sansar ko, oh mwuri re kin kapwurehdo nan perehn sounsilasil kan. 12 Pwehki nanmwarkio eh aktikitikla, sapwellimen Siohwa engieng eri sohrasang ih,+ oh e sohte ketin kasohreirailla douluhl.+ Oh pil, mie soahng mwahu kan me dierek nan Suda.+

13 Nanmwarki Reopoham kalaudehla eh manaman nan Serusalem oh pousehlahte kakaun; Reopoham sounpar 41 ni ahnsou me e wiahla nanmwarki, oh e kakaunki sounpar 17 nan Serusalem, kahnimw me Siohwa ketin piladahr sang nan keinek en Israel koaros nin duwen wasa ehu en ketikihdiong mwareo. Eden en Reopoham eh nohno iei Naama mehn Ammon.+ 14 Ahpw e kin wia dahme suwed pwehki e sohte koasoanehdi teng nan eh mohngiong en kin rapahki Siohwa.+

15 A duwen poadopoad en Reopoham, sang ni tapi lel ni imwi, e sou ntinting nan nting kan me soukohp Semaia+ oh Iddo+ sounkilang kaudiahlo ntingihedi nan poadopoad en peneinei? Oh mahwen kin wiewiawi nanpwungen Reopoham oh Seropoham.+ 16 Reopoham eri kommoaldi rehn seme mehn mahs ako oh seridi nan Kahnimw en Depit;+ oh nah pwutak Apaisa+ wiliandi ih wiahla nanmwarki.

13 Ni kaeisek waluhn sounpar en Nanmwarki Seropoham, Apaisa wiahla nanmwarkien Suda.+ 2 E kakaunki erein sounpar siluh nan Serusalem. Eden eh nohno iei Maikaia+ nein Uriel mehn Kipea.+ Oh mahwen kin wiawi nanpwungen Apaisa oh Seropoham.+

3 Apaisa eri kohla mahwen iangahki sounpei kehlail 400,000 me kaiahnda.*+ Oh Seropoham uhkihong ih sounpei kehlail 800,000 me kaiahnda* oh koasoaneiraildi ni ireken mahwen. 4 Apaisa eri uh pohn Nahna Semaraim, me mi ni wasa nahnahn Epraim kan, oh nda: “Seropoham oh Israel pwon, kumwail rong ie. 5 Kumwail sohte ese me Siohwa, Koht en Israel ketikihongehr Depit manaman en kaunda Israel kohkohlahte,+ ih oh nah pwutak kan,+ sang ni inou lap en soahl?*+ 6 Ahpw Seropoham+ nein Nepat, nein Solomon* ladu, ahpw uhda oh uhwongada eh kaun.+ 7 Oh aramas pohnkahke oh soh katepe kei kin pokonpene reh. Re pweida ni ar uhwong Reopoham nein Solomon ni ahnsou me Reopoham pwulopwul oh nan kapehd tikitik oh e sohte kak pelian irail.

8 “A met kumwail lemeleme me kumwail kak pelianda wehin Siohwa me mi nan pehn kadaudok en Depit kan, pwehki amwail wia lapalahn pokon ehu oh kumwail kolokol kouwol kohl me Seropoham wiahda pwe kumwail en wiahki amwail koht.+ 9 Kumwail sou kasarelahr sapwellimen Siohwa samworo kan,+ kadaudok en Aaron kan oh mehn Lipai kan, oh kumwail sou idihadahr pein noumwail samworo kan duwehte me aramas en sahpw teikan kin wia?+ Mehmen me wahdo* emen koupwul wol oh sihpw wol isimen kak wiahla samworo ong soahng kan me kaidehn koht. 10 A kiht, Siohwa me at Koht,+ oh se sohte kesehla ih; at samworo kan me wia kadaudok en Aaron kan kin papah Siohwa oh mehn Lipai kan kin sawas nan doadoahko. 11 Re kin wiahda meirong isihs kan en edinieida ong Siohwa nimenseng oh nin soutik koaros+ iangahki warpwohmwahu,+ oh kihdi pilawa koasoakoasoak*+ pohn tehpel me wiawihkihda kohl tohr,+ oh re kin isikada lamp kan me mi nan dewen lamp kohl nin soutik koaros,+ pwehki se kin kapwaiada at pwukoa ong Siohwa at Koht; ahpw kumwail keselahr ih. 12 Eri kilang! Koht mehlelo kin ketiket reht oh kahluwai kiht. Sapwellime samworo kan mi wasaht pwe ren peuk sowi kan pwehn kehsehkin kumwail mahwen. Kumwail ohlen Israel kan, kumwail dehr peiong Siohwa, Koht en samamwail mehn mahs ako, pwe kumwail sohte pahn pweida.”+

13 Ahpw Seropoham kadaralahr ekei nah sounpei pwe ren rukula mwurin mehn Suda ko, kahrehda nah karis en sounpei ko mi mwohn Suda oh me rukula ko mi mwurirail. 14 Ni mehn Suda ko ar sohpeila, re tehkada me re pahn anahne peiong me mi mwohrail oh mwurirail ko. Irail eri tepida likweriong Siohwa peksawas,+ nindoken samworo ko ar pepeuk sowi ko ni ngihl laud. 15 Mehn Suda ko eri werkihda wer en mahwen, oh ni mehn Suda ko ar werkihda wer en mahwen, Koht mehlelo ahpw ketin kalowehdi Seropoham oh Israel pwon mwohn Apaisa oh Suda. 16 Mehn Israel ko eri tangasang mwohn Suda, oh Koht ketikihong irail nan pehn Suda. 17 Apaisa oh nah aramas ako kemehla me tohto rehrail, oh sounpei kaiahnda* en mehn Israel 500,000 me kamakamala. 18 Kahrehda mehn Israel ko lohdi, ahpw mehn Suda ko kana pwehki re likih* Siohwa, Koht en samarail mehn mahs ako.+ 19 Apaisa eri pwakipwakihlahte Seropoham oh kihsang kahnimw kan reh, Pedel+ oh kisin kahnimw kan me kapilpene, Sesana oh kisin kahnimw kan me kapilpene oh Eprain+ oh kisin kahnimw kan me kapilpene. 20 Oh Seropoham sohte pwurehng alehdi eh manaman ni mwehin Apaisa; Siohwa eri ketin kaloke, ih eri mehla.+

21 Ahpw Apaisa wie kekehlailla. Kedekedeo e pwoudikihda lih 14+ oh e nainekihda pwutak 22 oh serepein 16. 22 A duwen soahng teikan nan poadopoad en Apaisa, eh mwekid kan oh eh lokaia kan, mepwukat ntingdi nan pwuhk kan me soukohp Iddo+ ntingihedi.

14 Apaisa eri kommoaldi rehn seme mehn mahs ako, oh re sarepedi ih nan Kahnimw en Depit;+ oh nah pwutak Asa wiliandi ih wiahla nanmwarki. Nan eh mwehio sahpwo ahpw meleileidi erein sounpar eisek.

2 Asa kin wia dahme mwahu oh pwung mwohn silangin Siohwa eh Koht. 3 E kihsang pei sarawien mehn liki kan+ oh wasa ile kan, sukpeseng uhr sarawi kan+ oh pelehdihsang tuhke sarawi kan.*+ 4 Oh pil, e ndaiong Suda en rapahki Siohwa, Koht en samarail mehn mahs ako oh ren kapwaiada Kosonnedo oh kehkehlik kan. 5 Ih eri kihsang wasa ile kan nan kahnimw en Suda kan koaros oh dewen warpwohmwahu kan,+ oh wehio kin usehlahte ahneki onepek mwahu pahn eh kaunda. 6 E kauwada kahnimw kehl kehlail kan nan Suda,+ pwehki sahpwo kin onepek mwahu oh sohte me mahweniong ih erein sounpar pwukat, pwe Siohwa ketikihong ih kommoal.+ 7 E ndaiong Suda: “Kitail kauwada kahnimw pwukat oh kapilkipene kehl kan oh imwen doulik kan,+ ewen kehl kan* oh lepin tuhkehn kateng kan. Pwe sahpwet mihmihte rehtail, pwehki atail kin rapahki Siohwa atail Koht. Kitail rapahkier, oh e ketikihongkitailehr popohl* wasa koaros.” Arail doadoahko eri pweida.+

8 Asa naineki karis en sounpei 300,000 sang Suda, me tehtehki mehn sansar laud oh ketieu kan. Oh sounpei kehlail 280,000 sang Pensamin me kin wa mehn sansar tikitik oh kesik ketieu kan.*+

9 Mwuhr, Sera mehn Idiopiao ahpw kohdo mahweniong irail iangahki karis en sounpei 1,000,000 oh kuruma 300.+ Ni Sera eh lella Maresah,+ 10 Asa ahpw kohieila mahweniong Sera oh re koasoaneiraildi ni ireken mahwen nan Wahun Sepada nan Maresah. 11 Asa eri likweriong Siohwa eh Koht+ oh patohwan: “Maing Siohwa, e mengeiong komwi en sewese me tohto de pil irail akan me sohte ahneki manaman.+ Maing Siohwa at Koht, komw ketin sewesei kiht, pwe se kin likih komwi,*+ oh se kohdo uhwong pokon wet ni mwaromwi.+ Maing Siohwa, komwi me at Koht. Komw dehr ketin mweidohng aramas en poweikomwihdi.”+

12 Siohwa eri ketin kalowehdi mehn Idiopia kan mwohn Asa oh Suda, mehn Idiopia ko eri tangdoaui.+ 13 Asa oh aramas ako me iangih ahpw pwakihirailla lao lel Kerar,+ oh mehn Idiopia ko wie mehmehla lao sohte emen rehrail mourla, pwe Siohwa oh sapwellime kariso kamwomwirailla. Mwurin mwo, re wahsang dipwisou lohdi tohtohie. 14 Oh pil, re kauwehla kahnimw koaros limwahn Kerar, pwehki Siohwa ketin kahrehiong ren masepwehkada; oh sounpei ko kulih kahnimw ko koaros, pwehki dir dipwisou me re kak kulihasang nan kahnimw pwukat. 15 Re pil mahweniong irail kan me kin kousoan nan impwal kan oh naineki pelinmen kan, oh re koledi sihpw oh kamel tohtohie. Mwurin mwo re ahpw pwurala Serusalem.

15 Sapwellimen Koht ngehn sarawi ahpw tiada pohn Asaraia nein Oded. 2 Asaraia eri kohieila tuhwong Asa oh ndaiong ih: “Kumwail rong ie, Asa oh kumwail mehn Suda oh Pensamin kan koaros! Siohwa kin ketin ieiang kumwail erein amwail pahn ieiang ih;+ oh ma kumwail rapahki ih, e pahn ketin mweidohng kumwail en diar ih,+ ahpw ma kumwail kesehla ih, e pahn ketin keseikumwailla.+ 3 Ahnsou reirei* Israel sohte ahneki Koht mehlelo, sohte samworo me pahn padahkih irail oh sohte kosonned.+ 4 Ahpw ni ar lelohng apwal, re pwurodo rehn Siohwa, Koht en Israel oh rapahki ih, e ketin mweidala ren diarada ih.+ 5 Ni ahnsou pwuko sohte me kak seiloak ni popohl,* pwe mie pingiping laud nanpwungen tohn kousapw kan koaros nan sahpwo. 6 Ehu wehi kin kalowehdi ehu wehi oh ehu kahnimw kin kalowehdi ehu kahnimw, pwehki Koht ketin kahrehiong ren pingkihda soangsoangen kahpwal koaros.+ 7 Ahpw kumwail, kumwail kehlail oh dehr mworusala,*+ pwe e pahn mie ketingpen amwail doadoahk.”

8 Ni ahnsowohte me Asa rongada mahsen pwukat oh en soukohp Oded kokohpo, e ahpw eimahda oh kihsang dikedik kasaut kan nan sapwen Suda+ oh Pensamin pwon oh sang nan kahnimw kan me e kalowehdi ni wasa nahnahn Epraim kan, oh e onehda sapahl pei sarawien Siohwa me mi mwohn palangk en Siohwa.+ 9 Oh e kapokonepene Suda oh Pensamin pwon. E pil kapokonepene mehn liki kan me kousoan rehrail sang Epraim oh Manase oh Simion,+ pwe me tohtohie iangala ih sang Israel ni ar kilangada me Siohwa eh Koht kin ketin ieiang ih. 10 Irail eri pokonpene nan Serusalem ni kesiluhwen sounpwong en kaeisek limaun sounpar en mwehin Asa. 11 Rahno re meirongkihong Siohwa dipwisou lohdi kan me re wahdo, kou 700 oh sihpw 7,000. 12 Oh pil, re wiahda inou lap ehu ren rapahki Siohwa, Koht en samarail mehn mahs ako sang nan ar mohngiong unsek oh mour* unsek.+ 13 Mehmen me sohte pahn rapahki Siohwa, Koht en Israel, pahn kamakamala, sohte lipilipil ma me tikitik de laud, ohl de lih.+ 14 Irail eri kahukihla inou ehu ong Siohwa ni ngihl laud, ni weriwer en peren oh ni ngilen sowi oh mehn pepeuk kan.* 15 Oh Suda pwon ahpw perenkihda kahula wet, pwehki re kahukihla met sang nan ar mohngiong unsek oh re ngoangki rapahki ih oh e ketin mweidohng irail en diar ih,+ oh Siohwa ketin pousehlahte ketikihong irail popohl* wasa koaros.+

16 Nanmwarki Asa pil kihsang Maaka+ eh nohno kahlap nan dewen inen nanmwarki, pwehki eh wiahda dikedik kasaut ehu ong kaudok en tuhke sarawio.*+ Asa pelehdihsang en liho dikedik kasauto oh kamwutepene oh isikala nan Wahun Kidron.+ 17 Ahpw wasa ile kan sohte kohsang+ nan Israel.+ Ahpw mendahki met, mohngiong en Asa kin unsek* erein eh mour.*+ 18 Oh e wahlong nan tehnpesen Koht mehlelo soahng kan me ih oh semeo kasarawialahr—silper, kohl, oh soangsoangen dipwisou kan.+ 19 Sohte mahwen wiawi lao lel ni kesilihsek limaun sounpar en mwehin Asa.+

16 Ni kesilihsek weneu en sounpar en mwehin Asa, Nanmwarki Paasa+ en Israel ahpw kohdahdo mahweniong Suda oh tepida kauwada* Rama+ pwehn irehdi emen en dehr kohieisang de kohdo rehn* Nanmwarki Asa en Suda.+ 2 Asa eri wahieido silper oh kohl sang nan wasahn nahk dipwisou kesempwal kan en tehnpesen Siohwa+ oh tehnpesen nanmwarkio oh kadarala mepwukat rehn Nanmwarki Penadad en Siria+ me kin koukousoan nan Damaskus, oh ndaiong: 3 “Mie inou en nanpwungmwahupene* rehi oh rehmwi oh nanpwungen semeio oh semomwio. I kadarewei rehmwi silper oh kohl. Komw ketido kauwehla omwi inou en nanpwungmwahu* rehn Nanmwarki Paasa en Israel, pwe en pweieksang ie.”

4 Penadad eri rong Nanmwarki Asa oh kadarala kaunen karis en sounpei kan pwehn mahweniong kahnimw en Israel kan, oh re kalowehdi Ison,+ Dan,+ Apel-maim, oh wasahn nahk dipwisou koaros nan kahnimw en Napdali kan.+ 5 Ni ahnsou me Paasa rongada duwen met, e mwadangete uhdihsang eh kokou* Rama oh sohla koadoahke. 6 Nanmwarki Asa eri kapokonepene Suda pwon, oh re wahsang nan Rama+ takai oh tuhke kan me Paasa kokouki,+ oh e doadoahngki mepwukat pwehn kauwada* Kepa+ oh Mispa.+

7 Ni ahnsowo sounkilang kaudiahlo Ananai+ ahpw kohdo rehn Nanmwarki Asa en Suda oh ndaiong: “Pwehki ke likih* nanmwarkien Siria oh sohte likih* Siohwa omw Koht, karis en sounpei en nanmwarkien Siria pitsangehr nan pehmw.+ 8 Mehn Idiopia oh Lipia kan sou naineki lapalahn karis ehu iangahki kiden kuruma oh soundak oahs kan? Ahpw pwehki ke likih Siohwa, e ketikihong irail nan pehmw.+ 9 Pwe silangin Siohwa kin mahmahsenseli sampah pwon+ pwehn ketin kasalehda sapwellime kehl* ong irail kan me kin loalopwoatohng ih nan ar mohngiong unsek.*+ Ke wiadahr tiahk pweipwei nan irair wet; sang met kohla mahwen pahn kin wiawihong uhk.”+

10 Ahpw Asa lingeringerda pahn sounkilang kaudiahlo oh kihlong ih nan imweteng* pwehki e mwehlkihda dahme e ndao. Asa eri tepida wiakauwe ekei aramas ako ni ahnsowohte. 11 A duwen poadopoad en Asa, sang ni tapi lel ni imwi, e ntinting nan Pwuhken Nanmwarkien Suda oh Israel kan.+

12 Ni kesilihsek duwaun sounpar en eh mwehi, Asa ahpw ahnekihda soumwahu ehu ni neh ko lao e soumwahula douluhl; oh pil mendahki e soumwahu, e sohte sohpeiong Siohwa ahpw e sohpeiong toahkte kan. 13 Asa eri kommoaldi rehn seme mehn mahs ako;+ e mehla ni kapahisek ehun sounpar en eh mwehi. 14 Irail eri sarepedi ih nan lapalahn sousou ehu me e weirada ong pein ih nan Kahnimw en Depit,+ oh re kihdi pohn mehn wisik mehla ehu me audaudki lehn palsam* oh soangsoangen mehn doal kan oh leh pwohmwahu kan me doalpene.+ Oh re pil wiahda lapalahn kisiniei ehu ong ih* ni eh mehlao.

17 Oh nah pwutak Seosopat+ wiliandi ih wiahla nanmwarki, oh e kakehlakahda eh manaman pohn Israel. 2 E kihdi karis en sounpei kan nan kahnimw kehl kehlail kan koaros en Suda oh kihdi pwihnen sounpei kan nan sapwen Suda oh nan kahnimw en Epraim kan me seme Asa kalowehdi.+ 3 Siohwa kin ketin ieiangete Seosopat pwehki e kin kekeid nan elen seme mehn mahso Depit+ oh e sohte kin sohpeiong Paal kan. 4 Pwe e sohpeiong Koht en semeo+ oh idawehn* sapwellime kehkehlik a kaidehn wiewiahn Israel.+ 5 Siohwa ketin sewese Seosopat pwe eh kaunda wehio en kin kehlail;+ oh aramas en Suda kan koaros kin usehlahte wadohng Seosopat kisakis, oh e uhdahn kepwehpwehla oh waunla mehlel.+ 6 E eimahda ni eh idawehn elen Siohwa kan, oh e pil kihsang wasa ile kan+ oh tuhke sarawi kan*+ nan Suda.

7 Ni kesiluhwen sounpar en eh mwehi, e ahpw ekerpene nah lapalap akan, Penail, Opadaia, Sekaraia, Nedanel oh Maikaia, oh e kadarirailla pwe ren padahk nan kahnimw en Suda kan. 8 Mie mehn Lipai kan me iang irail: Semaia, Nedanaia, Sepadaia, Asahel, Semiramod, Sehonadan, Adonaisa, Dopaisa oh Topadonaisa, oh samworo ko Elisama oh Sehoram pil iang irail.+ 9 Irail wa pwuhken Kosonned en Siohwa oh tepida padahk nan Suda.+ Re pidakih kahnimw koaros en Suda oh padapadahkih aramas akan.

10 Siohwa ketin kamasakada wehi koaros en sahpw kan me kapilpene Suda, oh re sohte kin mahweniong Seosopat. 11 Oh mehn Pilisdia kan wadohng Seosopat kisakis oh mwohni nin duwen daksis. Mehn Arepia kan wadohng ih sihpw wol 7,700 oh kuht wol 7,700 sang nan neirail pelinmen kan.

12 Seosopat kin wie kekehlailla,+ oh e pousehlahte kauwada wasa kelpene kehlail kan+ oh kahnimw en wasahn nahk kan+ nan Suda. 13 E wiahda lapalahn doadoahk kei nan kahnimw en Suda kan, oh mie nah sounpei kan, sounpei kehlail kan nan Serusalem. 14 Sounpei pwukat nehnepeseng nin duwen ar peneinei kan: sang Suda, mie kaunen meh kid kan, Adnah me kaun oh sounpei kehlail 300,000 me iangih.+ 15 Oh pahn eh kaweid, Sehohanan me kaun oh meh 280,000 me iangih. 16 Oh Amasaia nein Sikri pil mi pahn eh kaweid. Sang ni pein nsene, e pilada en papah Siohwa, oh sounpei kehlail 200,000 me iangih. 17 Oh sang Pensamin,+ Eliada, sounpei kehlail men, oh ohl 200,000 me tehtehki kesik ketieu oh mehn sansar kan me iangih.+ 18 Oh Sehosapad mi pahn en Eliada kaweid, oh ohl 180,000 me tehtehki dipwisoun mahwen me iangih. 19 Ih irail pwukat me kin papah nanmwarkio patehng irail ako me nanmwarkio kihdi nan kahnimw kehl kehlail kan nan Suda pwon.+

18 Seosopat uhdahn kepwehpwehla oh waunla mehlel,+ ahpw e wiahda inoun minimin rehn Eihap+ sang ni kapwopwoud ehu. 2 Mwurin sounpar kei e ahpw kohdihla rehn Eihap nan Sameria,+ Eihap eri meirongkihla sihpw oh kou tohtohie ong Seosopat oh aramas akan me iangih. Oh e kangoangehki* en kohdahla mahweniong Ramod-kilead.+ 3 Nanmwarki Eihap en Israel eri ndaiong Nanmwarki Seosopat en Suda: “Komw pahn iang ie ketila Ramod-kilead?” E ahpw sapengki: “I pahn iang komwi ketila iangahki nei aramas akan oh I pahn sewesei komwi nan mahweno.”

4 Ahpw Seosopat ndaiong nanmwarkien Israel: “Komw kupwurkalahngan oh peki mahs kaweid en Siohwa.”+ 5 Nanmwarkien Israel eri kihpene soukohp kan, ohl 400, oh ndaiong irail: “Sen kohla mahweniong Ramod-kilead, de I en dehr kohla?” Irail ahpw nda: “Komw ketidahla, oh Koht mehlelo pahn ketikihong nan limen nanmwarki met.”

6 Seosopat eri nda: “Sohte soukohp en Siohwa men wasaht?+ Kita pil peki kaweid en Koht sang reh.”+ 7 Nanmwarkien Israel eri ndaiong Seosopat: “Pil miehte emen ohl+ me kita kak peki kaweid en Siohwa reh; ahpw I kailongki, pwe e sohte kin kohpada mehkot mwahu duwen ngehi, ahpw me suwed ahnsou koaros.+ Iei ih Maikaia nein Imla.” Ahpw Seosopat nda: “Nanmwarki en dehr mahsanih soahng wet.”

8 Nanmwarkien Israel eri ekerodo emen lapalap en tehnpaso oh ndaiong: “Wahdo Maikaia nein Imla ni ahnsou karuwaru.”+ 9 Nanmwarkien Israel oh Seosopat, nanmwarkien Suda, eri mwohd nan mwoalara, likawih likoun nanmwarki; ira wie mwomwohd ni wasahn kihsang kilin krein en wasahn pedolong en ewen kelen Sameria, oh soukohp ko koaros ahpw wiewia kokohp mwohra. 10 Sedekaia nein Kenahna eri wiahda nah kod mete kei oh nda: “Iet me Siohwa ketin mahsanihen, ‘Ih mepwukat me ke pahn doakoahki* mehn Siria kan lao ke kamwomwirailla.’” 11 Soukohp teikan koaros pil kohpada soahngohte, nda: “Komw ketidahla Ramod-kilead oh komw pahn pweida;+ Siohwa pahn ketikihong nan limen nanmwarki met.”

12 Eri meninkeder me kolahng ekerodo Maikaia ahpw ndaiong ih: “Kilang! Mahsen en soukohp ako koaros me mwahu ong nanmwarkio. Menlau, omw mahsen en pil duwehte arail ko,+ oh koasoi mwahu.”+ 13 Ahpw Maikaia nda: “Nin duwen Siohwa eh ketin ieias, dahme ei Koht pahn ketin mahsanih iei me I pahn koasoia.”+ 14 Ih eri kohla rehn nanmwarkio oh nanmwarkio idek reh: “Maikaia, se en kohla mahweniong Ramod-kilead, de I en dehr kohla?” E mwadangete sapengki: “Komw ketidahla oh komw pahn pweida; re pahn lohdi nan pehmwail kan.” 15 Nanmwarkio eri ndaiong ih: “Pak depe me I anahne wiahiong uhk ken kahukihla me ke pahn kin ndaiongiehte dahme mehlel ni mwaren Siohwa?” 16 Maikaia eri nda: “I kilang mehn Israel koaros ar mwarahkpeseng pohn nahna kan, rasehng sihpw kan me sohte sileparail.+ Siohwa ketin mahsanih: ‘Sohte arail soumas. Mweidohng emenemen irail en pwurala ni imwarail ni popohl.’”

17 Nanmwarkien Israel ahpw ndaiong Seosopat: “I sou ndahwei, ‘E sohte pahn kohpada mehkot mwahu duwen ngehi, ihte me suwed’?”+

18 Maikaia ahpw nda: “Eri, komw karonge mahsen en Siohwa: I kilangehr Siohwa eh ketiket pohn mwoale+ oh karis en nanleng koaros+ kesikesihnen ni palimauni oh palimeingi.+ 19 Siohwa eri ketin mahsanih, ‘Ihs me pahn pitihedi Nanmwarki Eihap en Israel, pwe en kohdahla oh mehla nan Ramod-kilead?’ Oh emen kin koasoia ehu soahng a pil emen kin koasoia ehu soahng tohrohr. 20 Ngehn emen*+ eri patohdahla oh uh mwohn silangin Siohwa oh patohwan, ‘I pahn pitihedi.’ Siohwa ahpw ketin keinemwe reh, ‘Ia duwen omw pahn wia met?’ 21 E sapengki, ‘I pahn kohla oh kihong lokaia likamw nan ewen nah soukohp koaros.’ Ih eri ketin mahsanih, ‘Ke pahn pitihedi, oh ke pil pahn pweida. Kohla oh wia met.’ 22 Oh met Siohwa ketikihongehr lokaia likamw nan ewen noumwi soukohp pwukat,+ ahpw Siohwa ketin lohkidahr kahpwal ong komwi.”

23 Sedekaia+ nein Kenahna eri keido oh pohr likinsepen+ Maikaia+ oh nda: “Ke koasoakoasoia me sapwellimen Siohwa ngehn sarawi* kohsang rehi pwehn mahseniong uhk?”+ 24 Maikaia ahpw sapengki: “Kilang! Ke pahn esehda met ni rahn me ke pahn pedolongala nan pere me mi keieu masloaleo pwe ken rukula.” 25 Nanmwarkien Israel ahpw nda: “Ale Maikaia oh walahng Amon, kaunen kahnimwo oh Sohas nein nanmwarki pwutako. 26 Ndaiong ira, ‘Iet me nanmwarkio mahsanihen: “Kesehlong aramas menet nan imweteng+ oh kihong ekiste pilawa oh pihl lao I pwurodo ni popohl.”’” 27 Ahpw Maikaia nda: “Ma komw pwurodo ni popohl, eri Siohwa sohte ketin mahseniong ie.”+ E ahpw pil nda: “Kumwail aramas akan koaros, kumwail tehk met.”

28 Eri nanmwarkien Israel oh Seosopat, nanmwarkien Suda kohdahla Ramod-kilead.+ 29 Nanmwarkien Israel eri ndaiong Seosopat: “I pahn wekidala mwomwei oh kohla nan mahweno, ahpw ke pahn likawihada omw likoun nanmwarki.” Nanmwarkien Israel eri wekidala mwomwe, oh ira kohla nan mahweno. 30 Eri nanmwarkien Siria ruwesekiher nah kaunen kuruma ko: “Kumwail dehr peiong emen, me tikitik de lapalap, ihte nanmwarkien Israel.” 31 Oh ni ahnsowohte me kaunen kuruma ko kilangada Seosopat, irail ahpw medewe: “Ih nanmwarkien Israelo met.” Irail eri sohpeiong pwehn peiong; oh Seosopat tepida likwer peksawas,+ oh Siohwa ketin sewesehda, oh ni ahnsowohte Koht ketin kawetirailsang reh. 32 Ni ahnsou me kaunen kuruma ko esehda me kaidehn nanmwarkien Israelo mwo, re ahpw mwadangete pweieksang ih.

33 Ahpw ohl emen kesikihweite nah kesik ketieuwo oh lel nanmwarkien Israel nanpwungen peusepen eh likou meteo.* Nanmwarkio eri ndaiong nah soundak kurumao: “Wekidek oh waiehsang nan mahwenet,* pwehki I ohla laud.”+ 34 Mahweno wiewiawi erein rahno pwon, oh nanmwarkien Israelo anahne utuhtda nan kurumao, sohsohpeilahng mehn Siria kan lao lel nin soutik; oh e mehla ni ahnsou me ketipino kihrla.+

19 Nanmwarki Seosopat en Suda ahpw pwurala ni tehnpeseo nan Serusalem ni popohl.+ 2 Sehu+ nein Ananai+ sounkilang kaudiahlo ahpw kohieila pwehn tuhwong oh ndaiong Nanmwarki Seosopat: “Ke medewe e pwung ken sewese aramas suwed+ oh poakohng irail kan me kin kailongki Siohwa?+ Pwehki met engieng en Siohwa pahn kohwong uhk. 3 Ahpw mie soahng mwahu kan rehmwi,+ pwehki ke kamwakelehsang nan sahpwet tuhke sarawi kan* oh ke kaunopada omw mohngiong* en rapahki Koht mehlelo.”+

4 Seosopat eri usehlahte koukousoan nan Serusalem, oh e pwurehng seiloakseli rehn aramas ako sang Peersipa lel wasa nahnahn Epraim kan,+ pwehn kapwureiraildo rehn Siohwa, Koht en samarail mehn mahs ako.+ 5 E pil idihada sounkopwung kan nan sahpwo pwon, nan kahnimw kehl kehlail koaros en Suda, nan ehuehu kahnimw.+ 6 Oh e ndaiong sounkopwung ko: “Kumwail medemedewe dahme kumwail kin wiewia, pwe kumwail kin kopwung ni mwaren Siohwa a kaidehn ni eden aramas, oh e kin ketiket rehmwail ni amwail kin kadeik.+ 7 Eri kumwail lemmwiki Siohwa.+ Kumwail kanahieng dahme kumwail kin wia, pwe Siohwa atail Koht sohte kin ketin kopwung sapahrek,+ sohte kin lipilipilki aramas+ oh sohte kin ale kisakis ni ahl sapwung.”+

8 Pil nan Serusalem, Seosopat idihada ekei mehn Lipai kan oh samworo kan oh ekei kaunen peneinei en Israel kan pwe ren papah nin duwen sounkopwung kei ong Siohwa oh pwe ren apwalih repenpwung en tohn Serusalem kan.+ 9 Oh e kehkehlingkihong irail: “Iet me kumwail pahn wia ni amwail lemmwiki Siohwa, ni lelepek oh mohngiong unsek:* 10 Ni ahnsou me riamwail kan me kin kousoan nan arail kahnimw kan wahdo repenpwung me pidada kakerehdi nta+ de peidek duwen kosonned, kehkehlik, koasoandi kan de kopwung kan, kumwail pahn panawih irail pwe ren dehr dipada mwohn silangin Siohwa; pwe ma soh, sapwellime engieng pahn kohdiong pohmwail oh riamwail kan. Ih met me kumwail pahn wia, pwe kumwail en dehr dipada. 11 Kaunen samworo Amaraia me pahn sewese kumwail ong soahng koaros me pid Siohwa.+ A Sepadaia nein Ismael me kaunen peneinei en Suda ong soahng koaros me pid nanmwarki. Oh mehn Lipai kan pahn sewesei kumwail nin duwen sounapwalih kei. Kumwail kehlail oh doadoahk, oh Siohwa en ketiket rehn irail kan me kin wia me mwahu.”*+

20 Mwurin mwo, mehn Mohap kan+ oh mehn Ammon kan,+ iangahki ekei mehn Amonim kan* ahpw kohdo mahweniong Seosopat. 2 Seosopat eri alehdi rohng wet: “Lapalahn pokon ehu kodohng mahweniong uhk sang palio sehdo,* sang Edom,+ oh re mihmi nan Asason-damar, me iei, Engkedi.”+ 3 Seosopat eri masepwehkada, oh e koasoanehdi en rapahki Siohwa.+ Ih eri lohki me Suda pwon en kaisihsol. 4 Aramas en Suda kan eri pokonpene pwe ren peki sawas rehn Siohwa;+ re kohdo sang kahnimw koaros en Suda pwe ren peki kaweid sang Siohwa.

5 Seosopat eri kesihnenda nanpwungen mwomwohdisohn Suda oh Serusalem nan tehnpesen Siohwa mwohn wasa kelpene kapwo, 6 oh e patohwan:

“Maing Siohwa, Koht en samat mehn mahs ako, komwi kelehpw me Koht en nanleng;+ komw sou kin ketin kaunda wehi kan koaros?+ Mie manaman oh roson nin limomwi, oh sohte me kak pelian komwi.+ 7 Maing at Koht, komw sou ketin kasarehsang tohn sahpwet mwohn sapwellimomwi aramas en Israel kan oh ketikihong kadaudok en kompoakepahmwo Eipraam sahpwet nin duwen sohso poatopoat ehu?+ 8 Oh re kousoanla wasaht, oh re kauwadahng komwi wasa sarawi ehu ong mwaromwi,+ ni ar patohwan, 9 ‘Ma kahpwal pahn lelohng kiht, mehnda ma kedlahs, kadeik, soumwahu lusulus de lehk lapalap, a se pahn uh mwohn tehnpas wet oh mwohn silangomwi (pwe mwaromwi kin mi nan tehnpas wet)+ oh likweriong komwi peksawas nan at apwal, a komwi en ketin karonge oh doareikitala.’+ 10 A iet aramas en Ammon, Mohap oh wasa nahnahn Seir kan,+ me komw sohte ketin mweidohng Israel en mahweniong ni ar kohieidohsang nan sapwen Isip. Re sohpeisang irail oh sohte kamwomwirailla.+ 11 A met re pahn dupungkihong kiht me suwed ni ar kohdo kasareikitasang nan sapwomwi me komw ketikihong kiht nin duwen sohso.+ 12 Maing at Koht, komw sou pahn ketin kadeikirailda?+ Pwe sohte at kehl mwohn lapalahn pokon wet me kohkohdohn mahweniong kiht; oh se sehse dahme se pahn wia,+ ahpw masat kat kin sohpeiwohng komwi.”+

13 Erein ahnsowo, aramas en Suda ko koaros iangahki ar pwoud kan oh neirail seri kan,* me tikitik oh laud, kesikesihnen mwohn silangin Siohwa.

14 Sapwellimen Siohwa ngehn sarawi* ahpw tiada pohn Sahasiel nan mwomwohdiso. Ih me nein Sekaraia, me nein Penaia, me nein Seiel, me nein Madanaia mehn Lipai men, kadaudok en Asap. 15 Sahasiel nda: “Kumwail mehn Suda pwon oh tohn Serusalem kan oh Nanmwarki Seosopat, kumwail rong kanahieng! Iet me Siohwa ketin mahsanihong kumwail, ‘Kumwail dehr perki de masak pokon laud wet, pwe mahwen wet kaidehn amwail ahpw sapwellimen Koht.+ 16 Lakapw kumwail pahn kohdihla mahweniong irail. Re pahn kohdahdo ni wasahn kot en Sis, oh kumwail pahn diar irail ni imwin wahwo mwohn sapwtehn en Seruel. 17 Kumwail sohte pahn anahne pei nan mahwen wet. Kumwail onopada, kesikesihnen+ oh kilang sapwellimen Siohwa komour ong kumwail.*+ Suda oh Serusalem, kumwail dehr perki de masak mehkot.+ Kumwail kohieila mahweniong irail lakapw, oh Siohwa pahn ketin ieiang kumwail.’”+

18 Ni ahnsowohte Seosopat ahpw dairukedi nanpwelo, oh Suda pwon oh tohn Serusalem kan eri poaridi mwohn silangin Siohwa pwe ren kaudokiong Siohwa. 19 Mehn Lipai kan sang kadaudok en mehn Kohad+ oh Kora kan ahpw kesihnenda pwe ren kapinga Siohwa, Koht en Israel ni ngihl laud.+

20 Irail eri sangkenei pirida mandahn rahno oh kohieila nan sapwtehn en Tekoa.+ Ni ar kohieila, Seosopat ahpw kesihnenda oh nda: “Kumwail mehn Suda oh tohn Serusalem kan, kumwail rong ie! Kumwail pwoson Siohwa amwail Koht pwe kumwail en kak kesihnenda teng.* Kumwail pwoson sapwellime soukohp kan,+ oh kumwail ahpw pahn pweida.”

21 Mwurin Seosopat eh koasoiong aramas ako, e idihada ohl ekei ren kouliong+ Siohwa oh kapinga ih ni ar likawih likou sarawi. Ni ar tiengla mwohn karis en sounpeio, re ndinda: “Kapingkalahngan ong Siohwa, pwe sapwellime limpoak loalopwoat me poatopoat.”+

22 Ni ar tepida pereperen kokoulki koulen kaping kan, Siohwa ketin kahrehiong aramas en Ammon, Mohap oh wasa nahnahn Seir kan me kohkodohng Suda ren pwuriamweikihla mehkot ehu, oh re uhd peipene.+ 23 Oh mehn Ammon oh Mohap ko eri peiong tohn wasa nahnahn Seir kan+ pwe ren kamwomwirailla; oh mwurin ar kamwomwala tohn Seir ko, re uhd kemehla emenemen irail.+

24 Ahpw ni Suda eh kohdo ni wasahn iroir* en sapwtehno+ oh kilenglahng pokono, re kilangada ar wonohn nanpwelo melahr;+ sohte emen me pitila. 25 Seosopat oh nah aramas ako eri kohieila pwe ren wahsang dipwisou lohdi ko rehrail, oh re diarada kiden kepwe, likou oh dipwisou kesempwal kan, me re kak kulihada lao re sohla kak wahda.+ Re doadoahngkihla rahn siluh pwe ren wahsang dipwisou lohdi ko, pwe dipwisou ko me inenen tohto. 26 Ni kapahieun rahno, re pokonpene ni Wahun* Peraka, oh wasao re kapinga* Siohwa. Ihme kahrehda re kahdaneki wasao Wahun Peraka*+—leledo rahnwet.

27 Ohl en Suda oh Serusalem kan koaros, iangahki Seosopat me tieng mwohrail ahpw pwurala Serusalem ni peren, pwe Siohwa ketin kahrehiong ren perenkihda ar kalowehdi arail imwintihti kan.+ 28 Irail eri kohlongodo nan Serusalem kesekesengki mehn keseng sahl akan, arp kan+ oh sowi kan+ oh re kohlongala nan tehnpesen Siohwa.+ 29 Oh ni ahnsou me wehi koaros en sahpw akan rongada me Siohwa ketin mahweniong imwintihti en Israel kan, re ahpw masakada Koht.+ 30 Eri mie onepek mwahu nan wehin Seosopat, oh eh Koht kin pousehlahte ketikihong ih popohl* wasa koaros.+

31 Oh Seosopat eri pousehlahte kakaun Suda. E sounpar 35 ni ahnsou me e wiahla nanmwarki, oh e kakaunki sounpar 25 nan Serusalem. Eden eh nohno iei Asuhpa nein Sili serepein.+ 32 E kin kekeid nan elen semeo Asa.+ E sohte kin wetsang ahlo, oh e kin wia dahme pwung mwohn silangin Siohwa.+ 33 Ahpw, wasa ile kan sohte kohsang,+ oh aramas ako saikinte kaunopada ar mohngiong en kaudokiong Koht en samarail mehn mahs ako.+

34 A duwen soahng teikan nan poadopoad en Seosopat, sang ni tapi lel ni imwi, e dierek nan nting kan me Sehu+ nein Ananai+ ntingihedi, me mi nan Pwuhken Nanmwarkien Israel kan. 35 Mwurin met Nanmwarki Seosopat en Suda eri wiahda inoun minimin rehn Nanmwarki Ahasaia en Israel, me wiadahr soahng suwed kan.+ 36 Seosopat eri wiahkihla Ahasaia ienge, pwe ira en wiahda sohp en kohla Tarsis,+ oh ira wiahda sohp kan nan Esiongkeper.+ 37 Ahpw Elieser nein Dodapahu mehn Maresa kohpada duwen Seosopat oh nda: “Pwehki ke wiahda inoun minimin rehn Ahasaia, Siohwa pahn ketin kauwehla omw doadoahk kan.”+ Sohp ko eri ohla+ oh sohte kak kohla Tarsis.

21 Seosopat eri kommoaldi rehn seme mehn mahs ako oh seridi rehn seme mehn mahs ako nan Kahnimw en Depit; oh nah pwutak Sehoram wiliandi ih wiahla nanmwarki.+ 2 Rie kan, nein Seosopat pwutak kan iei Asaraia, Seheiel, Sekaraia, Asaraia, Maikel oh Sepataia; irail pwukat koaros nein Nanmwarki Seosopat en Israel. 3 Oh arail pahpao kihong irail kisakis tohto ni silper oh kohl oh dipwisou kesempwal kan, iangahki kahnimw kehl kehlail kan nan Suda;+ ahpw e kihong Sehoram+ wehio, pwehki ih me mesenih.

4 Ni ahnsou me Sehoram tepida kaunda wehin semeo, e kakehlaka eh manaman en nanmwarki ni eh kemehkihla rie ko koaros+ kedlahs oh pil ekei lapalap akan en Israel. 5 Sehoram sounpar 32 ni ahnsou me e wiahla nanmwarki, oh e kakaunki sounpar waluh nan Serusalem.+ 6 E kin idawehn elen nanmwarkien Israel kan,+ duwehte peneinei en Eihap ko, pwe e pwoudikihda nein Eihap serepein;+ oh Sehoram kin wiewia dahme suwed mwohn silangin Siohwa. 7 Ahpw Siohwa sohte ketin kupwurki kamwomwala peneinei en Depit pwehki inou lap me e ketin wiahiong Depit,+ pwe e ketin inoukihong me e pahn ketikihong ih oh nah pwutak kan lamp ehu ahnsou koaros.+

8 Ni mwehin Sehoram, Edom ahpw uhwongada Suda+ oh kasapwilada pein eh nanmwarki.+ 9 Sehoram oh nah kaunen sounpei kan eri kohla wasao iangahki were kuruma ko koaros, e ahpw uhda nipwongo oh kalowehdi mehn Edom kan me kapilpene ih oh kaunen kuruma ko. 10 Ahpw Edom kin usehlahte uhwong Suda leledo rahnwet. Lipna+ pil uhwongada Suda ni ahnsowo, pwehki e kesehla Siohwa, Koht en seme mehn mahs ako.+ 11 E pil wiahda wasa ile kan+ pohn nahnahn Suda kan pwehn kahrehiong tohn Serusalem kan ren kaudokiong* koht en liki kan, oh e kahrehiong Suda en wetsang nan ahl pwung.

12 Kedekedeo kisinlikou ehu sang soukohp Elaisa+ ahpw leledo reh, iet audepe: “Iet me Siohwa, Koht en semomw mehn mahso Depit ketin mahsanih, ‘Ke sohte kin idawehn elen semomw Seosopat+ de elen Nanmwarki Asa+ en Suda. 13 Ahpw ke kin idawehn elen nanmwarkien Israel kan+ oh kahrehiong Suda oh tohn Serusalem kan ren kaudokiong* koht en liki kan,+ duwehte me peneinei en Eihap wiahda,+ oh ke pil kemehla pein riomw kan,+ peneinei en semomwo me mwahusang uhk. 14 Kahrehda Siohwa uhdahn pahn ketin kaloke noumw aramas akan, noumw seri kan, omw pwoud kan oh e pahn ketin kamwomwala omw kepwe kan koaros. 15 Oh ehuehu rahn, ke pahn kin lokolongki soumwahu tohto, iangahki soumwahu en nan mwasahl, lao mwasahlomw kan pwediei pwehki soumwahwo.’”

16 Siohwa eri ketin kahrehiong+ mehn Pilisdia kan+ oh Arepia kan+ me mi limwahn mehn Idiopia kan ren imwintihtiong Sehoram. 17 Irail mahweniong Suda, oh re kohlongala nan sahpwo oh wahsang dipwisou koaros me dierek nan tehnpesen nanmwarkio,+ iangahki nah pwutak ko oh eh pwoud ko; oh ihte nah pwutak me mihmi reh iei Sehoahas*+ me keieu tikitik. 18 Oh mwurin mepwukat koaros, Siohwa eri ketin kalokehki soumwahun mwasahl ehu me sohte kak mwahula.+ 19 Mwurin ahnsou kei, mwurin sounpar riau, mwasahle ko ahpw pwediei pwehki eh soumwahwo, oh e mehla ni eh weiweirengki eh soumwahwo; oh nah aramas ako sohte wiahda kisiniei ong ih duwehte kisiniei me wiawihda ong seme mehn mahs ako.+ 20 E sounpar 32 ni ahnsou me e wiahla nanmwarki, oh e kakaunki sounpar waluh nan Serusalem. Sohte me pahtoukihla eh mehlao. Irail eri sarepedi ih nan Kahnimw en Depit,+ a kaidehn nan wasahn seridien nanmwarki kan.+

22 Tohn Serusalem kan eri kasapwilada nah pwutak me keieu tikitiko Ahasaia, en wiliandi ih wiahla nanmwarki, pwe pwihnen aramas loallap ko me iangodo mehn Arepia ko nan kahnimpwalo kemehla nah pwutak laud ko koaros.+ Eri Ahasaia nein Sehoram pwutak ahpw tepida kakaun nin duwen nanmwarkien Suda.+ 2 Ahasaia sounpar 22 ni ahnsou me e wiahla nanmwarki, oh e kakaunki sounpar ehu nan Serusalem. Eden eh nohno iei Adalaia+ me pahpa kahlapki Omri.*+

3 E pil idawehn elen peneinei en Eihap,+ pwe eh nohnou wiahla nah sounkaweid en wia me suwed. 4 Oh e kin usehlahte wia dahme suwed mwohn silangin Siohwa, duwehte peneinei en Eihap, pwe mwurin mehlahn semeo, re wiahla nah sounkaweid me kahrehda eh ohla. 5 E idawehn arail kaweid oh iang Sehoram nein Nanmwarki Eihap en Israel kohla mahweniong Nanmwarki Asael+ en Siria nan Ramod-kilead,+ wasa me sounkesik ketieu kan kauwehla Sehoram. 6 Sehoram pwurala Sesreel+ pwehn kamwahwihala ohla ko me re wiahiong ih nan Rama ni eh mahweniong Nanmwarki Asael en Siria.+

Ahasaia* nein Sehoram+ nanmwarkien Suda ahpw kohdihla Sesreel pwehn tuhwong Sehoram+ nein Eihap, pwehki eh ohla.*+ 7 Ahpw Koht ketin kahrehiong Ahasaia en mehla ni eh kohla rehn Sehoram; oh ni eh kohla, e iang Sehoram kohieila tuhwong Sehu+ nein nein Nimsi,* me Siohwa ketin keiehdi en kamwomwala* peneinei en Eihap.+ 8 Ni ahnsou me Sehu tepida kadeikada peneinei en Eihap, e ahpw diarada lapalap en Suda kan oh nein rien Ahasaia pwutak kan, nein Ahasaia sounpapah kan oh kemeirailla.+ 9 Ih eri rapahki Ahasaia; re koledi ih nan wasa me e rukuruk ieo nan Sameria, irail eri wahdo ih rehn Sehu. Re kemehla oh sarepedi,+ pwe re nda: “Eh pahpa kahlap Seosopat, me kin rapahki Siohwa nan eh mohngiong unsek.”+ Sohte emen nan peneinei en Ahasaia me ahneki manaman en kaunda wehio.

10 Ni Adalaia,+ inen Ahasaia eh kilangada me nah pwutako melahr, e ahpw uhda oh kamwomwala kisehn kadaudok en nanmwarkien Suda pwon.+ 11 Ahpw, Sehosapead nein nanmwarkio serepein ahpw ale Sehoas+ nein Ahasaia pwutak oh kawaisang ih nanpwungen nein nanmwarkio pwutak kan me pahn kamakamala. E kihdi pwutako oh lih me kin apwaliho nan perehn meir ehu masloaleo. Sehosapead nein Nanmwarki Sehoram+ (ih me en samworo Sehoiada+ pwoud oh rien Ahasaia) ahpw koasoanehdi en ekihsang Adalaia kisin pwutako, eri liho sohte kemehla pwutako.+ 12 Sehoas mihmihte rehrail erein sounpar weneu, oh e wie ekiek nan tehnpesen Koht mehlelo, nindoken Adalaia eh kakaun sahpwo.

23 Ni keisuhwen sounpar, Sehoiada ahpw eimahda oh wiahda inou ehu* rehn kaunen meh epwiki kan,+ me iei Asaraia nein Seroham, Ismael nein Sehohanan, Asaraia nein Oped, Maaseaia nein Adaia oh Elisapat nein Sikri. 2 Irail eri kohseli nan Suda pwon oh kapokonepene mehn Lipai kan+ sang kahnimw en Suda kan koaros oh kaunen peneinei en Israel kan. Ni ar leledo Serusalem, 3 mwomwohdiso pwon ahpw wiahda inou lap ehu+ rehn nanmwarkio nan tehnpesen Koht mehlelo, oh mwurin mwo Sehoiada ndaiong irail:

“Kilang! Nein nanmwarki pwutak me pahn kaunda, duwehte me Siohwa ketin inoukihda duwen nein Depit pwutak kan.+ 4 Iet me kumwail pahn wiahn: Silikis ehun samworo kan oh mehn Lipai kan me pahn doadoahk+ ni rahnen Sapad pahn wia silepen wenihmw kan;+ 5 pil silikis ehu pahn mi ni tehnpesen nanmwarkio,+ oh pil silikis ehu pahn mi ni Ewen Kelen Poahsoan, oh aramas ako koaros pahn mi nan wasa kelpene en tehnpesen Siohwa.+ 6 Dehpa mweidohng emen en pedolong nan tehnpesen Siohwa ihte samworo kan oh mehn Lipai kan me kin papah.+ Irail pwukat me kak pedolong pwehki irail pwihn sarawi ehu, oh aramas teikan koaros pahn kapwaiada arail pwukoa ong Siohwa. 7 Mehn Lipai kan pahn kapilpene nanmwarkio ni pali koaros, emenemen pahn kolokol nah tehtehn mahwen. Mehmen me pahn pedolong nan tehnpaso pahn kamakamala. Kumwail pahn mihmihte rehn nanmwarkio wasa koaros me e kin ketila ie.”*

8 Mehn Lipai ko oh Suda pwon uhdahn kapwaiada dahme samworo Sehoiada kehkehlingki. Emenemen irail ahpw kahrehda neirail ohl akan me doadoahk ni rahnen Sapad,+ iangahki irail akan me kommoal ni rahnen Sapad, pwe samworo Sehoiada sohte mweidohng pwihn kan+ ren kommoal sang ar doadoahk. 9 Samworo Sehoiada eri kihong kaunen meh epwiki ko+ nein Nanmwarki Depit ketieu ko oh mehn sansar tikitik ko oh mehn sansar pwonopwon ko,+ me mi nan tehnpesen Koht mehlelo.+ 10 Ih eri koasoanehdi aramas ako koaros, emenemen en kin kol nah tehtehn mahwen,* sang ni palimaun en tehnpaso lel ni palimeing en tehnpaso, limwahn pei sarawio oh limwahn tehnpaso oh re kapilpene nanmwarkio. 11 Irail eri wahieido nein nanmwarkio pwutako+ oh kidahng powe nihno* oh Mehn Kadehdeo*+ oh kasapwiladahng ih nanmwarki, oh Sehoiada oh nah pwutak ko keiehdi ih. Irail eri nda: “Nanmwarki en ketin mour werei!”+

12 Ni Adalaia eh rongada ngilen aramas ako ar tangatang oh kapikapinga nanmwarkio, e ahpw mwadangete kohdo rehn aramas ako ni tehnpesen Siohwa.+ 13 Ih eri kilangada nanmwarkio eh kesikesihnen limwahn eh uhro ni wasahn pedolongo. Lapalap ako+ oh sounpeuk sowi ko mihmi rehn nanmwarkio, oh aramas en sahpwo koaros wie pereperen+ oh pepeuk sowi kan, oh sounkoul kan me kolokol mehn keseng kan me tiengki koulen kaping kan. Adalaia eri tehrpeseng eh likou ko oh werkihda: “Re pangielahr! Re pangielahr!” 14 Ahpw samworo Sehoiada wahieido kaunen meh epwiki ko, irail ako me idihdida pohn sounpei ko oh ndaiong irail: “Kumwail wahieila liho sang nanpwungen sounpei kan, oh ma mehmen pahn iangala liho a kumwail kemehkihla kedlahs!” Pwe samworo nda: “Kumwail dehr kemehla ih nan tehnpesen Siohwa.” 15 Irail eri koledi liho, oh ni eh lella ni wasahn pedolong en Ewen Kelen Oahs ni tehnpesen nanmwarkio, re ahpw mwadangete kemehla ih wasao.

16 Sehoiada eri wiahda inou lap ehu nanpwungen ih oh aramas ako koaros oh nanmwarkio, me re pahn kin wiewiahte sapwellimen Siohwa aramas.+ 17 Mwurin mwo aramas ako koaros ahpw kohla ni imwen kaudok en Paal oh kauwehla,+ oh re kamwutepene eh pei sarawi kan oh eh sansal kan,+ oh re kemehla Mattan, samworo en Paal+ mwohn pei sarawi ko. 18 Sehoiada eri kihong nan pehn samworo kan oh mehn Lipai kan pwukoahn apwalih tehnpesen Siohwa. Ih irail me Depit idihada nan pwihn kan ren apwalih tehnpesen Siohwa pwe ren wiahda meirong isihs kan ong Siohwa+ nin duwen dahme ntingdi nan Kosonned en Moses,+ ni ar pereperen oh kokoul, nin duwen me Depit kaweidki. 19 Sehoiada pil koasoanehdi silepen ewen kehl kan+ limwahn ewen kelen tehnpesen Siohwa, pwe sohte mwahn me samin men en kak pedolong. 20 Ih eri kahrehda kaunen meh epwiki kan,+ lapalap akan, kaun akan en aramas ako, oh aramas koaros en sahpwo, oh e iang nanmwarkio kohdihdo sang ni tehnpesen Siohwa. Irail keidla ni ewen kehl en powe kohla ni tehnpesen nanmwarkio oh kamwohdangedi nanmwarkio pohn mwoahl+ en wehio.+ 21 Aramas koaros en sahpwo ahpw perenda oh miehla meleilei nan kahnimwo, pwehki re kemehkihla Adalaia kedlahs.

24 Sehoas sounpar isuh ni ahnsou me e wiahla nanmwarki,+ oh e kakaunki sounpar 40 nan Serusalem. Eden eh nohno iei Sipiah mehn Peersipa.+ 2 Sehoas kin usehlahte wiewia dahme pwung mwohn silangin Siohwa erein ahnsou me samworo Sehoiada kin momour.+ 3 Sehoiada pilada lih riemen en wiahla eh pwoud, oh e nainekihda pwutak kan oh serepein kan.

4 Mwurin mwo, Sehoas eri inangihada nan eh mohngiong en onehda sapahl tehnpesen Siohwa.+ 5 Ih eri kapokonepene samworo kan oh mehn Lipai kan oh ndaiong irail: “Kumwail kohla nan kahnimw en Suda kan oh kihpene mwohni sang Israel pwon pwehn onehda sapahl tehnpesen amwail Koht+ nan pahr koaros; oh kumwail mwadang wia met.” Ahpw mehn Lipai ko sohte mwadang mwekid.+ 6 Nanmwarkio eri ekerodo kaunen samworo Sehoiada oh ndaiong ih:+ “Dahme kahrehda ke saikinte ndaiong mehn Lipai kan ren wahdo sang Suda oh Serusalem daksis sarawi me sapwellimen Siohwa laduwo, Moses+ kehkehlingki, daksis sarawi en mwomwohdisohn Israel, ong impwal en Kadehdeo?+ 7 Nein lih suwedo Adalaia+ pwutak kan, dapengpeseng tehnpesen Koht mehlelo+ oh re doadoahngkihong Paal dipwisou sarawi kan koaros en tehnpesen Siohwa.” 8 Eri, sang ni ruwes en nanmwarkio, koakon ehu+ ahpw wiawihda oh kohdi likin ewen kelen tehnpesen Siohwa.+ 9 Mwurin mwo pakair ehu ahpw kohpeseng nan Suda oh Serusalem pwon ren patohwando rehn Siohwa daksis+ sarawi me Moses, ladun Koht mehlelo, ndaiong Israel nan sapwtehno. 10 Lapalap ako koaros oh aramas ako koaros ahpw perenda,+ oh re usehlahte wahwahdo kisakis kan oh kesekesehdiong nan koakono lao e dirala.*

11 Ni ahnsou me mehn Lipai kan kin wahlongodo koakono pwehn uhd kolahng nanmwarkio oh re kin kilang me mwohni kan kin tohtohla nan koakono, nein nanmwarki sekterio oh sawasepen samworo lapalapo ahpw kin kohdo oh kihsang kanengen koakono,+ oh mwuri re kin kapwurehla koakono nan dewe. Ih met me re kin wia rahn koaros, oh re kin rikpene mwohni tohto. 12 Nanmwarkio oh Sehoiada eri kin kihong irail kan me kin apwalih doadoahk en tehnpesen Siohwa, oh re kin pwain soun-par takai kan oh tohndoadoahk saman kan ren onehda sapahl tehnpesen Siohwa,+ oh pil sounwia mete oh prons kan ren onehda sapahl tehnpesen Siohwa. 13 Oh irail ako me kin apwalih doadoahko ahpw tapiada doadoahko, oh onohnsapahlo eri doudoulahte wiawi pahn ar kaweid, oh re onehda sapahl tehnpesen Koht mehlelo duwehte nin tapio oh kakehlailihala tehnpaso. 14 Oh ni ahnsowohte me re kanekehla doadoahko, re wahla luhwen mwohnio rehn nanmwarkio oh Sehoiada, oh mwohni ko uhd kadoadoahkohng wiahda dipwisou kan ong tehnpesen Siohwa, dipwisoun papah kan oh mehn wiahda meirong kan oh kep kan oh dipwisou kohl oh silper kan.+ Oh erein Sehoiada eh momour, re kin kaukaule wiahda meirong isihs kan+ ni tehnpesen Siohwa.

15 Mwurin Sehoiada eh momour werei oh nsenamwahu,* e ahpw mehla; e sounpar 130 ni eh mehla. 16 Irail eri sarepedi ih rehn nanmwarki kan nan Kahnimw en Depit,+ pwehki soahng mwahu kan me e wiadahr nan Israel,+ ong Koht mehlelo oh tehnpeseo.

17 Mwurin Sehoiada eh mehla, lapalap en Suda kan ahpw kohdo poaridiong nanmwarkio, oh nanmwarkio rong irail. 18 Re kesehla tehnpesen Siohwa, Koht en samarail mehn mahs ako oh tepida papah tuhke sarawi kan* oh dikedik kan, kahrehda sapwellimen Koht engieng kohdiong* pohn Suda oh Serusalem pwehki diparail kan. 19 E kin ketin usehlahte poaronehla soukohp kan rehrail pwehn kapwureiraildo rehn Siohwa, oh re kin pwurupwurehng panawih* irail, ahpw re kahng rong.+

20 Sapwellimen Koht ngehn sarawi* eri tiada pohn Sekaraia nein samworo Sehoiada,+ oh e kesihnenda pohn wasa ile ieu oh ndaiong aramas ako: “Iet me Koht mehlelo ketin mahsanih, ‘Dahme kahrehda kumwail kauwehkihla sapwellimen Siohwa kehkehlik kan? Kumwail sohte pahn pweida! Pwehki amwail kesehla Siohwa, eri, e pil pahn ketin keseikumwailla.’”+ 21 Ahpw re koasoanehdi ren uhwongada+ oh sang ni ruwes en nanmwarkio re katehki takai lao e mehla nan wasa kelpene en tehnpesen Siohwa.+ 22 Eri Nanmwarki Sehoas sohte tamataman limpoak loalopwoat me Sehoiada semen Sekaraia kasalehiong ih, oh e kemehla nah pwutako, me nda ni ahnsou me e pahn mehlao: “Siohwa en ketin mahsanih met oh kapwukoahkin uhk.”+

23 Ni tepin pahro, karis en sounpei en Siria kan ahpw kohdahdo mahweniong Sehoas, oh re pedolong nan Suda oh Serusalem.+ Irail eri kemehla lapalap koaros en aramas ako,+ oh re kadaralahng nanmwarkien Damaskus dipwisou koaros me re kulihada. 24 Mendahki karis en sounpei en mehn Siria ko me kohlongodo nan sahpwo malaulau, Siohwa ketikihong nan pehrail karis laud en sounpei en Suda ko,+ pwehki re* kesehla Siohwa, Koht en samarail mehn mahs ako; irail* eri kadeikada Sehoas. 25 Oh ni ar kohkohlahsang Sehoas (pwe re kauwehla ih douluhl*), pein nah ladu ko koasoanehdi ren uhwongada pwehki eh kakerehdi ntahn nein samworo Sehoiada pwutak kan.*+ Irail kemehla ih pohn eh pehto.+ Eri e mehla oh re sarepedi ih nan Kahnimw en Depit,+ ahpw re sohte sarepedi nan wasahn seridien nanmwarki kan.+

26 Iet aramas ako me koasoanehdi ren uhwongada+ ih: Seipad nein Semead lihen Ammon men oh Sehosapad nein Simrid lihen Mohap men. 27 Me pid nah pwutak kan oh kadeik tohto me kohwong ih+ oh onohnsapahl* en tehnpesen Koht mehlelo,+ mepwukat koaros kileldi nan kawehwehpen Pwuhken Nanmwarki kan. Oh nah pwutak Amasaia wiliandi ih wiahla nanmwarki.

25 Amasaia sounpar 25 ni ahnsou me e wiahla nanmwarki, oh e kakaunki sounpar 29 nan Serusalem. Eden eh nohno iei Sehoaddan mehn Serusalem.+ 2 E doulahte wia dahme pwung mwohn silangin Siohwa, ahpw kaidehn ni mohngiong unsek. 3 Ni ahnsou me e ahnekilahr manaman unsek ong wehio, e ahpw kemehla nah lapalap ako me kemehla seme, nanmwarkio.+ 4 Ahpw e sohte kemehla neirail seri kan, pwe e mwekid pahrekiong dahme ntinting nan Kosonnedo, nan pwuhken Moses, wasa me Siohwa ketin kehkehlingki: “Pahpa kan sohte pahn mehkihla neirail seri kan, oh seri kan sohte pahn mehkihla arail pahpa kan; ahpw emenemen pahn mehkihla pein dipe.”+

5 Oh Amasaia kapokonepene Suda oh koasoanehdi irail en kesihnen nin duwen kaunen peneinei kan, nin duwen kaunen meh kid kan oh kaunen meh epwiki kan. E wia met ong Suda oh Pensamin pwon.+ E kileleiraildi sang sounpar 20 kohda,+ oh e diarada sounpei kaiahnda* 300,000, me kak doadoahngki ketieu oh mehn sansar laud, me kak iang karis en sounpei. 6 Oh pil, e pwainda sounpei kehlail 100,000 sang Israel, ni silper dalend* 100. 7 Ahpw ohlen Koht mehlelo kohdo reh oh ndaiong: “Maing nanmwarki, komw dehr mweidohng karis en Israel en iang komwi ketila, pwe Siohwa sohte ketin ieiang Israel,+ e sohte ketin ieiang emen mehn Epraim. 8 Ahpw komw kelehpw ketila, pei, oh eimah nan mahwen. Pwe ma soh, Koht mehlelo kak ketin kahrehiong komwi en pwupwudi mwohn imwintihti men, pwe Koht ketin sapwellimanki manaman en sewesei+ komwi oh kahrehiong komwi en pwupwudi.” 9 Amasaia eri ndaiong ohlen Koht mehlelo: “A ia duwen dalend 100 me I kihong karis en sounpei en Israelo?” Ohlen Koht mehlelo ahpw sapengki: “Siohwa kak ketikihong komwi laudsang met.”+ 10 Amasaia eri kapwurehla karis en sounpei ko me kohdo reh sang Epraim. E kadarirailla nan arail wasa kan. Ahpw, irail uhdahn lingeringer pahn Suda, kahrehda re kohkohla nan ar wasa kan ni ar lingeringer.

11 Amasaia eri eimahda oh kahre pein nah karis en sounpei kan kohla ni Wahun Soahl,+ oh e kemehla aramas en Seir 10,000.+ 12 Oh aramas en Suda kan koledi meh 10,000 me momour. Irail eri wairailda pohn kadoken paipalapo oh keseiraildihsang pohn kadoken paipalapo, irail koaros ahpw mwerpeseng. 13 Ahpw sounpei ko me Amasaia kapwurehla pwe e sohte mweidohng ren iang ih mahwen,+ uhd mahweniong kahnimw en Suda kan, sang Sameria+ lel Ped-oron;+ re kemehla aramas 3,000 oh wahsang dipwisou lohdi tohto.

14 Ahpw mwurin Amasaia eh pwurodo sang eh kalowehdi mehn Edom kan, e wahdo en aramas en Seir kan koht kan oh koasoaneiraildi pwehn wiahki eh koht,+ oh e tepida poaridiong mwohrail oh wiahiong irail meirong isihs kan. 15 Siohwa eri ketin engiengda kowahlap pahn Amasaia, oh e ketin poaronehla soukohp men me ndaiong ih: “Dahme kahrehda ke kin idawehn arail koht akan me sohte kin kapitala pein neirail aramas akan sang nan pehmw?”+ 16 Ni eh koasoakoasoiong, nanmwarkio ahpw nda: “Ia duwe, se idihiukada ken wia sounkaweid en nanmwarki?+ Ke dehr koasoi!+ I pahn koasoanehdi ken kamakamala ma ke koasoakoasoite.” Soukohpo eri tok, ahpw e doula nda: “I ese me Koht ketin koasoanedier en kamwomwuhkala, pwehki omw wiadahr met oh sohte rong ei kaweid.”+

17 Mwurin eh koasoiong nah sounkaweid ko, Nanmwarki Amasaia en Suda ahpw kadarala kair ehu rehn Sehoas nein Sehoahas nein Sehu nanmwarkien Israel, nda: “Kohdo kita mahwenpene.”*+ 18 Nanmwarki Sehoas en Israel ahpw kadarala pasapeng wet rehn Nanmwarki Amasaia en Suda: “Tuhke tekatek en Lepanon kadaralahng tuhke sidar en Lepanon kair wet, ‘Mweidohng noumw serepeinen en pwoudiki nei pwutaket.’ Ahpw, mahn lawalo en Lepanon men keid wasao oh tiakedi tuhke tekateko. 19 Komw nda, ‘Kilang! I* kalowedier Edom.’+ Kahrehda omw mohngiong pohnmwahsohkihda oh komw men waunla. Ahpw mihmihte ni tehnpasomwien. Dahme komw men wiahkihda kahpwal laud oh lohdi, iangahki Suda?”

20 Ahpw Amasaia sohte rong,+ met iei kupwuren Koht mehlelo pwehn ketikinirailla nan pehn imwintihtio,+ pwehki ar idawehnla koht en Edom kan.+ 21 Nanmwarki Sehoas en Israel eri kohdahla, ih oh Nanmwarki Amasaia en Suda ahpw mahwenpene nan Ped-semes,+ me iei sapwen Suda. 22 Suda eri lohdi pahn Israel, emenemen irail ahpw tangdoaui pwuralahng ni imwarail kan.* 23 Nanmwarki Sehoas en Israel eri koledi Nanmwarki Amasaia en Suda, nein Sehoas nein Sehoahas,* nan Ped-semes. Sehoas eri wahdo Amasaia Serusalem, oh e kauwehla dihd en Serusalem sang ni Ewen Kelen Epraim+ lel ni Ewen Kelen Keimw,+ kiupid 400.* 24 E wahsang kohl oh silper koaros oh dipwisou koaros me dierek nan tehnpesen Koht mehlelo me Oped-edom kin apwahpwalih oh pil nan wasahn nahk dipwisou kesempwal kan en tehnpesen nanmwarkio,+ e pil wahsang aramas akan. Ih eri pwurala Sameria.

25 Amasaia+ nein Sehoas nanmwarkien Suda momourki sounpar 15 mwurin mehlahn Sehoas+ nein Sehoahas nanmwarkien Israel.+ 26 A duwen soahng teikan nan poadopoad en Amasaia, sang ni tapi lel ni imwi, kilang! e sou ntinting nan Pwuhken Nanmwarkien Suda oh Israel kan? 27 Sang ni ahnsou me Amasaia sohpeisang eh idawehn Siohwa, ekei koasoanehdi ren pelianda+ ih nan Serusalem. Ih eri tangalahng Lakis, ahpw re kadarala ohl ekei ren pwakihala ih nan Lakis oh re kemehla ih wasao. 28 Irail eri wahdo ih pohn oahs kei, oh sarepedi ih rehn seme mehn mahs ako nan kahnimw en Suda.

26 Aramas en Suda ko koaros eri ale Usaia,+ me sounpar 16 oh kasapwiladahng ih nanmwarki pwehn wiliandi semeo Amasaia.+ 2 E onehda sapahl Elod+ oh kapwuredohng Suda mwurin nanmwarkio* eh kommoaldi rehn seme mehn mahs ako.+ 3 Usaia+ sounpar 16 ni ahnsou me e wiahla nanmwarki, oh e kakaunki sounpar 52 nan Serusalem. Eden eh nohno iei Sekolaia mehn Serusalem.+ 4 E doulahte wia dahme pwung mwohn silangin Siohwa, duwehte me semeo Amasaia kin wia.+ 5 Oh e kin pousehlahte rapahki Koht ni mwehin Sekaraia. Ih me padahkihong en kin lemmwiki Koht mehlelo. Erein eh kin rapahki Siohwa, Koht mehlelo kin ketin wiahiong en pweida mwahu.+

6 Usaia kohieila oh peiong mehn Pilisdia kan+ oh koapwoarehda kelen Kahd,+ kelen Sapne+ oh kelen Asdod.+ Ih eri kauwada kahnimw kan nan sahpw en Asdod oh sapwen mehn Pilisdia kan. 7 Koht mehlelo ketin pousehlahte sewese ih kalowehdi mehn Pilisdia kan, mehn Arepia kan+ me kin kousoan nan Kurpaal, oh pil kalowehdi mehn Meun kan. 8 Mehn Ammon kan+ eri tepida wadohng Usaia kisakis kan. Kedekedeo eh ndand ahpw kohpeseng lella Isip, pwehki e uhdahn kehlailla. 9 Usaia pil kauwada imwen doulik kan+ nan Serusalem limwahn Ewen Kelen Keimw,+ Ewen Kelen Wahu+ oh Utupen Kehl, oh e kakehlakahda imwen doulik pwukat. 10 E pil kauwada imwen doulik kan+ nan sapwtehn oh weirada* pwoaren nahk pihl tohto (pwe e naineki kiden pelinmen); e pil wia soahngohte nan Sepihla oh wasa patapato. Mie nah soumwet kan oh soumwet en kreip kan pohn nahna kan oh nan Karmel, pwehki e kin perenki mwetuwel.

11 Oh pil, Usaia nainekihda karis en sounpei ehu me onopadahr ong mahwen. Irail kin koasoansoandi ni pwihn kan oh kohieila mahwen. Sekteri Seiel+ oh kaun Maaseaia me wadekedi oh kileleiraildi.+ Ira mi pahn kaweid en Ananaiah, emen nein nanmwarkio lapalap ako. 12 Uwen tohtohn kaunen peneinei kan me kin kaunda sounpei kehlail pwukat iei meh 2,600. 13 Karis en sounpei kan me mi pahn ar kaweid me onopadahngehr mahwen iei meh 307,500, karis kehlail ehu me pahn utung nanmwarkio mahweniong eh imwintihti.+ 14 Usaia pil kihong karis en sounpeio pwon mehn sansar kan, ketieu kan,+ lisoarop kan, likou mete kan,*+ kesik ketieu kan oh takain pahi kan.+ 15 Oh pil nan Serusalem, e wiahda dipwisoun mahwen kan me ohl koahiek kan pilahnehda; dipwisou pwukat me kak kesingkihla arep oh takai laud kan mi pohn imwen doulik kan+ oh pohn keimwen kehl kan. Eh ndand eri kohpeseng lel wasa doh kan, pwehki lapalahn sawas kohieng ih oh e kehlailla.

16 Ahpw ni ahnsowohte me e kehlailla, eh mohngiong ahpw aklapalapala me kahrehiong en mwomwla, oh e wiahda mwekid salelepek ong Siohwa eh Koht ni eh pedolong ni tehnpesen Siohwa pwehn isik warpwohmwahu pohn pei sarawien warpwohmwahwo.+ 17 Samworo Asaraia oh samworo eimah 80 me kin papah Siohwa ahpw mwadangete pedolongala mwuri. 18 Re ahpw pelianda Nanmwarki Usaia oh ndaiong ih: “Usaia, e sohte konehng komwi en isik warpwohmwahu ong Siohwa!+ Samworo kante me pahn isik warpwohmwahu, pwe irail me kadaudok en Aaron,+ irail me Koht ketin kasarawilahr. Komw ketieisang wasa sarawien, pwe komw wiadahr mwekid salelepek oh pwehki met komw sohte pahn ale lingan sang rehn Siohwa Koht.”

19 Usaia kolokol mehn isihs ehu pwe en isik warpwohmwahu, e ahpw lingeringerda;+ oh ni eh linglingeringer pahn samworo ko, tokutok+ pa pwarada pohn temweo mwohn samworo ko nan tehnpesen Siohwa limwahn pei sarawi en warpwohmwahwo. 20 Ni kaunen samworo Asaraia oh samworo ko koaros ar sohpeiong ih, re kilangada tokutok pohn temweo! Re ahpw karuwa en kohieisang wasao oh pein ih mwadangete kohieila, pwehki Siohwa ketin kaloke ih.

21 Nanmwarki Usaia tokutokte lao lel rahn me e mehla, oh e kin kousoan nan ehu ihmw tohrohr nin duwen aramas tokutok men,+ pwe e solahr mweimweiong kohla ni tehnpesen Siohwa. Nah pwutak Sodam kin apwalih tehnpesen nanmwarkio oh kopwung aramas en sahpwo.+

22 A duwen soahng teikan nan poadopoad en Usaia, sang ni tapi lel ni imwi, soukohp Aiseia+ nein Eimwos me ntingihedi. 23 Usaia eri kommoaldi rehn seme mehn mahs ako, oh re sarepedi ih rehn seme mehn mahs ako ahpw nan en nanmwarki kan mohs en seridi, pwe re nda: “Ih aramas tokutok men.” Oh nah pwutak Sodam+ wiliandi ih wiahla nanmwarki.

27 Sodam+ sounpar 25 ni ahnsou me e wiahla nanmwarki, oh e kakaunki sounpar 16 nan Serusalem. Eden eh nohno iei Serusah, nein Sadok serepein.+ 2 E doulahte wia dahme pwung mwohn silangin Siohwa, duwehte me seme Usaia kin wia,+ oh e sohte ngihtehtehki pedolong nan tehnpesen Siohwa.+ Ahpw aramas ako wiewiahte me suwed. 3 Sodam kauwada Ewen Kehl Powe en tehnpesen Siohwa,+ oh wiahda doadoahk tohto pohn kelen Opel.+ 4 E pil kauwada kahnimw kan+ nan wasa nahnahn Suda kan,+ oh e kauwada wasa kelpene kehlail kan+ oh imwen doulik kei+ nanwel kan. 5 E mahweniong nanmwarkien mehn Ammon kan+ oh kedekedeo e kaloweiraildi, kahrehda nan pahro mehn Ammon kan kihong ih silper dalend* 100, sosohng en kor* 10,000 en wihd oh sosohng en kor 10,000 en parli. Mehn Ammon kan pil kihong ih soahngohte ni keriaun oh kesiluhn sounpar.+ 6 Sodam eri kekehlailla, pwe e koasoanehdi teng en idawehn elen* Siohwa eh Koht.

7 A duwen soahng teikan nan poadopoad en Sodam, eh mahwen oh mwekid koaros, e ntinting nan Pwuhken Nanmwarkien Israel oh Suda kan.+ 8 E sounpar 25 ni ahnsou me e wiahla nanmwarki, oh e kakaunki sounpar 16 nan Serusalem.+ 9 Sodam eri kommoaldi rehn seme mehn mahs ako, oh re sarepedi ih nan Kahnimw en Depit.+ Oh nah pwutak Ahas wiliandi ih wiahla nanmwarki.+

28 Ahas+ sounpar 20 ni ahnsou me e wiahla nanmwarki, oh e kakaunki sounpar 16 nan Serusalem. E sohte kin wia dahme pwung mwohn silangin Siohwa duwehte me Depit seme mehn mahso wiadahr.+ 2 Ahpw e kin idawehn elen nanmwarkien Israel kan,+ oh e pil wiahda sansal mete+ en Paal kan. 3 Oh pil, e kin wiahda meirong ediniei kan nan Wahun Innom* oh isikala nah pwutak kan nan kisiniei,+ ni eh kin idawehn wiewia kasaut en wehi kan+ me Siohwa ketin kasarehsang mwohn mehn Israel kan. 4 E pil kin usehlahte wiewia meirong oh meirong ediniei kan pohn wasa ile kan,+ pohn dohl kan oh pahn tuhke losolos koaros.+

5 Eh Koht Siohwa eri ketikihla ih nan pehn nanmwarkien Siria,+ kahrehda re kalowehdi ih oh wahsang aramas tohto oh wairailla Damaskus.+ Koht pil ketikihla ih nan pehn nanmwarkien Israel, me kemehla nein Ahas sounpei tohto. 6 Pwe Peka+ nein Remalaia kemehla ohl kommwad 120,000 nan Suda nan rahnteieu, pwehki Suda kesehla Siohwa, Koht en samarail mehn mahs ako.+ 7 Oh Sikri, sounpei en Epraim men, kemehla nein nanmwarkio pwutak Maaseaia oh Asrikam, me kin apwalih tehnpaso,* oh Elkana me keriauwih nanmwarkio. 8 Oh mehn Israel kan pil salihedi riarail mehn Suhs 200,000—lih, pwutak oh serepein kan; re pil wahsang dipwisou lohdi tohto, oh re wahla dipwisou lohdi ko Sameria.+

9 Ahpw soukohp en Siohwa men me adaneki Oded mi wasao. E kohieila mwohn karis en sounpei me kohkodohng Sameria oh ndaiong irail: “Kilang! Pwehki Siohwa, Koht en samamwail mehn mahs ako eh ketin engieng pahn Suda me kahrehda e ketikihirailwei nan pehmwail.+ Ahpw kumwail kemeirailla ni lemei, oh Koht ketin mahsanih dahme kumwail wiadahr. 10 A met kumwail koasoakoasoane en wiahkihla aramas en Suda oh Serusalem kan noumwail ladu ohl oh lih.+ Ahpw, kumwail sou pil wiadahr dihp mwohn silangin Siohwa amwail Koht? 11 Eri kumwail rong ie oh kapwurehla me selidi kan me kumwail wahsang rehn riamwail ko, pwe Siohwa ketin engieng kowahlap pahmwail.”

12 Kahrehda ekei kaunen mehn Epraim kan, Asaraia nein Sehohanan, Perekaia nein Mesillemod, Sehiskaia nein Sallum oh Amasa nein Adlai ahpw uhwongada irail ako me kohdo sang mahweno, 13 oh re ndaiong irail: “Kumwail dehr wadohng me selidi kan wasaht, pwe met pahn kahrehiong kitail dipada mwohn silangin Siohwa. Dahme kumwail koasoakoasoane en wia pahn kalaudehla dipatail kan, pwe dipatail kan laudehr oh Koht ketin engieng kowahlap pahn Israel.” 14 Sounpei ko eri kihla me selidi ko oh dipwisou lohdi ko+ rehn lapalap ako oh mwomwohdiso pwon. 15 Ohl ako me idihdida ahpw uhda oh sewese me selidi ko, oh kihong koaros me kilisou ar likou sang ni dipwisou lohdi ko. Irail eri kalikawihirailda oh kihong arail suht, kanarail mwenge oh nimarail pihl oh leh ong kilirail kan. Oh re pil kidahng me luwet kan pohn dongki kan oh wairailla rehn riarail ko nan Seriko, kahnimw en tuhke pahm kan.* Mwurin mwo re pwurala Sameria.

16 Ni ahnsowo Nanmwarki Ahas peki sawas rehn nanmwarkien Asiria kan.+ 17 Oh mehn Edom kan pwurehng kohlongodo oh mahweniong Suda oh wahsang me selidi kan. 18 Mehn Pilisdia kan+ pil mahweniong kahnimw kan en Sepihla+ oh Nekep en Suda oh kalowehdi Ped-semes,+ Aisalon,+ Kederod, Soko oh kisin kahnimw kan me kapilpene, Timnah+ oh kisin kahnimw kan me kapilpene, oh Kimso oh kisin kahnimw kan me kapilpene; oh re kousoanla wasao. 19 Siohwa eri ketin kanamenekihala Suda pwehki Nanmwarki Ahas en Israel, pwe e mweidohng Suda en wia pein nsene, me kahrehda aramas ako ar uhdahn salelepekiong Siohwa.

20 Kedekedeo Nanmwarki Tiklad-pilneser+ en Asiria ahpw kohdo uhwongada Ahas oh kahpwalihala+ a kaidehn kakehlaka. 21 Ahas eri kihsang dipwisou kan nan tehnpesen Siohwa oh nan tehnpesen nanmwarkio+ oh nan imwen lapalap akan oh wiahda kisakis ong nanmwarkien Asiria; ahpw met sohte sewese ih. 22 Oh nan erein eh apwalo, Nanmwarki Ahas pil ahpwte kalaudehla eh salelepekiong Siohwa. 23 Ih eri tepida wiahda meirong ong koht en Damaskus kan+ me kalowehdi ih,+ oh e doula nda: “Pwehki koht kan en nanmwarkien Siria kan kin sewese irail, I pahn meirong ong irail, pwe re pil kakete sewese ie.”+ Ahpw re kahrehiong ih oh Israel pwon en pwupwudi. 24 Oh Ahas pil kihpene dipwisou kan en tehnpesen Koht mehlelo; ih eri lupukpene dipwisoun tehnpesen Koht mehlelo,+ ritingedi wenihmw kan en tehnpesen Siohwa,+ oh wiahda pei sarawi kan ong pein ih nan keimw koaros nan Serusalem. 25 Oh nan kahnimw en Suda kan koaros, e wiahda wasa ile kan pwehn wiahda meirong ediniei ong koht teikan,+ oh e kansensuwedihada Siohwa, Koht en seme mehn mahs ako.

26 A duwen soahng teikan nan eh poadopoad, soahng koaros me e wiahda sang nin tapi lel ni imwi, e ntinting nan Pwuhken Nanmwarkien Suda oh Israel kan.+ 27 Ahas eri kommoaldi rehn seme mehn mahs ako, oh re sarepedi ih nan kahnimwo, nan Serusalem, pwe re sohte wahla ih nan wasahn seridien nanmwarkien Israel kan.+ Oh nah pwutak Esekaia wiliandi ih wiahla nanmwarki.

29 Esekaia+ wiahla nanmwarki ni eh sounpar 25, oh e kakaunki sounpar 29 nan Serusalem. Eden eh nohno iei Apaisa nein Sekaraia serepein.+ 2 E doulahte wia dahme pwung mwohn silangin Siohwa+ duwehte me Depit seme mehn mahso wiadahr.+ 3 Ni keieun sounpwong en keieun sounpar en eh mwehi, e ritingada wenihmw kan en tehnpesen Siohwa oh onehda sapahl mepwukat.+ 4 Ih eri wahdo samworo kan oh mehn Lipai kan oh kapokoneirailpene nan wasahn tuhpene ni palimese. 5 E ahpw ndaiong irail: “Kumwail mehn Lipai kan, kumwail rong ie. Kumwail kasarawihala pein kumwail+ oh kasarawihala tehnpesen Siohwa, Koht en samamwail mehn mahs ako, oh kumwail kihsang soahng samin kan nan wasa sarawio.+ 6 Pwe samatail ako kin salelepek oh re wiadahr dahme suwed mwohn silangin Siohwa atail Koht.+ Re sohte kasalehda ar wauneki impwal en Siohwa oh re kesehla ih.+ 7 Re pil ritingedi wenihmw kan en palangko+ oh kakunla lamp ko.+ Re sohla isik warpwohmwahu+ oh wiahda meirong isihs kan+ nan wasa sarawio ong Koht en Israel. 8 Kahrehda, sapwellimen Siohwa engieng eri kohdiong pohn Suda oh Serusalem+ oh e ketin kahrehiong irail nan apwal, eri irail akan me kin kilang oh rong duwen met kin masepwehkada, pwuriamweila oh kuwaikin* irail, nin duwen me kumwail kilikilang met.+ 9 Ihme kahrehda samatail ko mehkihla kedlahs,+ oh neitail pwutak kan, serepein kan oh atail pwoud kan selidi.+ 10 Eri met I kin inengieng nan ei mohngiong en wiahda inou lap ehu rehn Siohwa, Koht en Israel,+ pwe sapwellime engieng kowahlap en sohrasang kitail. 11 Samwa ko, met kaidehn ahnsoun seukautih,* pwe Siohwa ketin pilkumwailda en uh mwohn silangi, pwehn wia sapwellime sounpapah+ oh wiahda sapwellime meirong ediniei kan.”+

12 Mehn Lipai kan eri kesihnenda: Mahad nein Amasai oh Soel nein Asaraia sang mehn Kohad kan;+ sang mehn Merari kan,+ Kis nein Apdi oh Asaraia nein Sehallelel; sang mehn Kerson kan,+ Soha nein Simma oh Ihden nein Soha; 13 sang kadaudok en Elisapan kan, Simrai oh Seuel; sang kadaudok en Asap kan,+ Sekaraia oh Madanaia; 14 sang kadaudok en Eman kan,+ Seheiel oh Simei; sang kadaudok en Sedudun kan,+ Semaia oh Ussiel. 15 Irail eri kapokonepene riarail kan oh re kasarawihala pein irail oh kohdo duwehte me nanmwarkio kehkehlingki sang ni mahsen en Siohwa, pwe ren kamwakelehda tehnpesen Siohwa.+ 16 Samworo ko eri pedolongala nan tehnpesen Siohwa pwe ren kamwakel oh re wahieido soahng samin koaros me re diarada nan tehnpesen Siohwa oh wahla nan wasa kelpeneo+ ni tehnpesen Siohwa. Mehn Lipai ko ahpw uhd ale oh wahieila likio nan Wahun Kidron.+ 17 Irail tapiada kamwakelo ni keieun rahn en keieun sounpwong, oh ni kawaluhn rahn en sounpwongo re lel ni palangk en Siohwa.+ Re kasarawieki tehnpesen Siohwa rahn waluh, oh ni kaeisek weneun keieun sounpwongo re ahpw kaimwisekala.

18 Mwurin mwo re ahpw kohla rehn Nanmwarki Esekaia oh nda: “Se kamwakeledahr tehnpesen Siohwa pwon, pei sarawien meirong isihso+ oh dipwisawi kan koaros,+ oh tehpel en pilawa koasoakoasoako*+ oh dipwisawi kan koaros. 19 Oh dipwisou ko koaros me Nanmwarki Ahas kesehla erein eh wie kakaun ni ahnsou me e wiahda mwekid salelepeko,+ se kaunopadahr oh kasarawialahr,+ oh re mihmi mwohn pei sarawien Siohwa.”

20 Nanmwarki Esekaia eri sangkenei pirida oh kapokonepene lapalap akan en kahnimwo, irail eri kohdahla ni tehnpesen Siohwa. 21 Re wahda kouwol isimen, sihpw wol isimen, sihmpwul wol isimen oh kuht wol isimen nin duwen meirong en dihp ong wehio, ong wasa sarawio oh ong Suda.+ Ih eri ndaiong samworo ko, kadaudok en Aaron ko, ren meirongkihla mahn ako pohn pei sarawien Siohwa. 22 Irail eri kemehla kou ko,+ oh samworo ko ale ntao oh usupihki pohn pei sarawio;+ mwuri re kemehla sihpw wol ko oh usupihki ntao pohn pei sarawio, oh re kemehla sihmpwul wol ko oh usupihki ntao pohn pei sarawio. 23 Irail eri wahdo kuht wol ko me wia mehn meirong en dihp mwohn nanmwarkio oh mwomwohdiso, oh re pwil pehrail ko pohrail. 24 Samworo ko eri kemeirailla oh wiahkihda ntahrail ko meirong en dihp pohn pei sarawio, pwehn wiahda tomw ong Israel pwon, pwehki nanmwarkio nda me meirong isihs oh meirong en dihp en wiawi ong Israel pwon.

25 Erein ahnsowo, Esekaia koasoanehdi mehn Lipai kan ni tehnpesen Siohwa ren kol simpal kan,* keseng sahl akan oh arp kan,+ ni eh idawehn kehkehlik en Depit+ oh Kad+ nein nanmwarkio sounkilang kaudiahl oh soukohp Nadan.+ Kehkehliko pwilisang Siohwa sang sapwellime soukohp kan. 26 Mehn Lipai ko eri kesihnen kolokol nein Depit mehn keseng kan, oh samworo ko kolokol sowi kan.+

27 Esekaia eri ruwese meirong isihso en wiawi pohn pei sarawio.+ Ni ahnsou me meirong isihso tepida, koul ong Siohwa eri tepida oh pil sowi ko, me pwakih ngilen mehn keseng kan en Nanmwarki Depit en Israel. 28 Mwomwohdisou pwon eri poaridi nindoken sounkoul ko ar kokoul oh sounpeuk sowi kan ar pepeuk sowi—mepwukat koaros wiewiawi lao meirong isihso isihsla. 29 Ni ahnsowohte me re kanekehla ar wie meirongo, nanmwarkio oh koaros me mi reh ahpw kelepwikihdi oh lukupoardi. 30 Nanmwarki Esekaia oh lapalap ako eri ndaiong mehn Lipai ko ren kapingahki Siohwa melkahkahn Depit+ oh Asap+ sounkilang kaudiahlo. Irail eri wia kaping ni peren mwuledek, oh re kelepwikihdi oh lukupoardi.

31 Esekaia eri nda: “Met kumwail katohrohrlahr* ong Siohwa, eri kumwail kohdo oh wahdo meirong kan oh meirong en kapingkalahngan kan ni tehnpesen Siohwa.” Mwomwohdisou eri tepida wahdo meirong kan oh meirong en kapingkalahngan kan, oh koaros me inengieng met nan ar mohngiong ahpw wahdo meirong isihs kan.+ 32 Uwen tohtohn meirong isihs kan me mwomwohdiso wahdo iei kou 70, sihpw wol 100, sihmpwul wol 200—mepwukat koaros mehn meirong isihs ong Siohwa+— 33 oh meirong sarawi kan iei kou 600 oh sihpw 3,000. 34 Ahpw samworo ko malaulau oh re sohte kak kihsang kilin mahn en meirong isihs ko koaros, eri riarail mehn Lipai ko sewese irail+ lao doadoahko imwisekla oh lao samworo ko kak kasarawihala pein irail,+ pwe mehn Lipai kan kin ngoangki* kasarawih pein irail laudsang samworo ko. 35 Pil mie meirong isihs tohto,+ oh pil wih en meirong en kaminimin kan oh meirong en wain kan+ ong meirong isihs kan.+ Eri doadoahk en tehnpesen Siohwa ahpw pwurehng wiawi.* 36 Esekaia oh aramas ako koaros eri perenkihda dahme Koht mehlelo ketin wiahda ong aramas ako,+ pwe mepwukat koaros mwadangete wiawihda.

30 Esekaia eri kadarpeseng pakair nan Israel+ oh Suda pwon, oh pil ntinglahng Epraim oh Manase,+ ren kohdo ni tehnpesen Siohwa nan Serusalem pwe ren kasarawih Pahsohpa ong Siohwa, Koht en Israel.+ 2 Ahpw, nanmwarkio, nah lapalap ako oh mwomwohdiso pwon nan Serusalem koasoanehdi ren kasarawih Pahsohpao ni keriaun sounpwong,+ 3 pwe re sohte kak wia kasarawio ni keieun sounpwong,+ pwehki malaulau samworo kan me kasarawihala pein irail+ oh pil aramas akan saikinte pokonpene nan Serusalem. 4 Koasoandi wet mwomwen pwung ong nanmwarkio oh mwomwohdiso pwon. 5 Irail eri koasoanehdi ren wiahda pakair ehu nan Israel pwon, sang Peersipa lel Dan,+ pwe aramas ako en kohdo oh kasarawih Pahsohpao ong Siohwa, Koht en Israel nan Serusalem, pwe nin duwen pwihn ehu re sohte kapwaiada met duwehte dahme ntingdier.+

6 Meninkeder ko* eri wahda kisinlikou ko sang nanmwarkio oh nah lapalap ako oh kohla wasa koaros nan Israel oh Suda, duwehte me nanmwarkio kehkehlingki, oh nda: “Aramas en Israel kan, kumwail pwurodo rehn Siohwa Koht en Eipraam, Aisek oh Israel, pwe en kak ketin pwurala rehn me luwehdi kan me pitsang nan pehn nanmwarkien Asiria kan.+ 7 Kumwail dehr duwehte samamwail mehn mahs ako oh riamwail kan me wiahda mwekid salelepek ong Siohwa, Koht en samarail mehn mahs ako. Pwehki met, Koht ketin kahrehiong irail nan apwal, eri irail akan me kin kilang oh rong duwen met kin masepwehkada, duwehte me kumwail kilikilang.+ 8 Eri kumwail dehr keptakai duwehte samamwail mehn mahs ako.+ Kumwail uhpahiong Siohwa oh patohdo nan sapwellime wasa sarawio+ me e ketin kasarawihala kohkohlahte oh papah Siohwa amwail Koht, pwe sapwellime engieng kowahlap en sohrasang kumwail.+ 9 Pwe ni amwail pahn pwurodo rehn Siohwa, irail akan me salihedi riamwail kan oh noumwail seri kan pahn kasalehiong irail kadek kalahngan+ oh pahn mweimweiong ren pwurodo nan sahpwet,+ pwe Siohwa amwail Koht me ketin kupwurkalahngan oh kadek kalahngan,+ oh e sohte pahn ketin sohpeisang kumwail ma kumwail pwurodo reh.”+

10 Meninkeder ko* eri kohla sang kahnimw lel kahnimw wasa koaros nan sapwen Epraim oh Manase,+ oh pil Sepulon, ahpw aramas ako kin kouruhrkin irail oh kepitkin irail.+ 11 Ahpw, ekei sang Aser, Manase oh Sepulon aktikitikla oh kohdo Serusalem.+ 12 Kupwuramwahu en Koht mehlelo pil mi nan Suda pwehn kaminiminirailpene,* pwe ren kapwaiada dahme nanmwarkio oh lapalap ako kehkehlingki sang mahsen en Siohwa.

13 Aramas tohto ahpw pokonpene nan Serusalem pwehn kasarawih Kasarawien Pilawa me Sohte Doal Ihs+ ni keriaun sounpwong;+ met wia mwomwohdiso laud ehu. 14 Irail eri uhda oh kihsang pei sarawi kan me mi nan Serusalem,+ oh re kihsang pei sarawien warpwohmwahu ko koaros+ oh kesehla nan Wahun Kidron. 15 Irail eri kemehla meirong en Pahsohpao ni 14 en keriaun sounpwongo. Samworo ko oh mehn Lipai ko ahpw namenekda, irail eri kasarawihala pein irail oh wahdo meirong isihs ko ni tehnpesen Siohwa. 16 Irail eri kesihnenda nan dewerail kan, nin duwen Kosonned en Moses ohlen Koht mehlelo; samworo ko eri usupihki nta+ me re alehsang mehn Lipai ko pohn pei sarawio. 17 Aramas tohto nan mwomwohdiso saikinte kasarawihala pein irail, oh mehn Lipai ko kemehla meirong en Pahsohpa kan ong koaros me saikinte mwakelekelda,+ pwehn kasarawihirailla mwohn silangin Siohwa. 18 Pwe aramas tohto, mehlel irail kan me kohsang Epraim, Manase,+ Isakar oh Sepulon sohte kamwakelehda pein irail, ahpw re pil tungoale Pahsohpao, oh met weksang dahme ntingdiero. Ahpw Esekaia kapakapkin irail, patohwan: “Siohwa me ketin kupwuramwahu,+ en ketin kupwure 19 koaros me koasoanedier nan ar mohngiong* en rapahki Koht mehlelo,+ Siohwa, Koht en samarail mehn mahs ako, mendahki ar saikinte kamwakelda nin duwen koasoandien sarawi.”+ 20 Siohwa eri ketin karonge Esekaia oh mahkohng* aramas ako.

21 Mehn Israel ko me mi nan Serusalem wiewia Kasarawien Pilawa me Sohte Doal Ihs+ erein rahn isuh ni peren mwuledek,+ oh mehn Lipai ko oh samworo ko kapikapinga Siohwa rahn koaros, kesekesengki mehn keseng kan ni ngihl laud ong Siohwa.+ 22 Oh Esekaia pil koasoiong oh kangoange mehn Lipai ko koaros me papah Siohwa ni loalokong. Oh aramas ako koaros mwengemwenge ni kasarawio erein rahn isuh,+ wiewia meirong en kaminimin kan+ oh kapingkalahngan ong Siohwa, Koht en samarail mehn mahs ako.

23 Mwomwohdiso pwon eri koasoanehdi ren pil usehla wia met erein rahn isuh, irail eri wia met erein rahn isuh ni ar pereperen.+ 24 Oh Nanmwarki Esekaia en Suda kihong mwomwohdiso kou wol 1,000 oh sihpw 7,000, oh lapalap akan kihong mwomwohdiso kou wol 1,000 oh sihpw 10,000;+ oh samworo tohto kasarawihala pein irail.+ 25 Oh mwomwohdisohn Suda pwon, samworo kan, mehn Lipai kan, mwomwohdiso pwon me kohsang Israel+ oh mehn liki kan+ me kohsang sapwen Israel oh pil me kin kousoan nan Suda ahpw usehlahte pereperen. 26 Oh peren laud wiawi nan Serusalem, pwehki sohte mehkot me duwehte met me wiawi nan Serusalem sang ni mwehin Solomon nein Depit, nanmwarkien Israel.+ 27 Samworo en Lipai ko eri uhda oh kapaiahda aramas ako;+ oh Koht ketin karonge ngilarail kan, oh arail kapakap leldahla nanleng, sapwellime wasahn kousoan sarawio.

31 Mwurinte mepwukat koaros eh imwisekla, mehn Israel kan koaros me mi mwo ahpw kohieilahng kahnimw en Suda kan, oh re kamwutepene uhr sarawi kan,+ pelehdi tuhke sarawi kan,*+ oh karangkehdi wasa ile kan+ oh pei sarawi kan+ nan Suda oh Pensamin pwon, oh pil nan Epraim oh Manase,+ lao re kauwehla douluhl. Mwurin mwo mehn Israel kan koaros ahpw pwuralahng arail kahnimw kan, emenemen ong pein sapwe.

2 Esekaia eri koasoanehdi samworo kan+ oh mehn Lipai kan+ nin duwen arail pwihn kan, emenemen samworo oh mehn Lipai ong ar doadoahk,+ ong meirong isihs kan oh meirong en kaminimin kan, pwe ren papah oh ren kapingkalahngan oh kapinga Koht ni ewen kehl en wasa kelpene kan* en tehnpesen Siohwa.+ 3 Ekei soahng kan me nanmwarkio ahneki kin kohda pwehn wiahda meirong isihs kan,+ me iei meirong isihs en nimenseng oh nin soutik kan,+ oh pil meirong isihs ong rahn en Sapad kan,+ maram pwul kan,+ oh kasarawi kan,+ duwehte dahme ntingdi nan Kosonned en Siohwa.

4 Esekaia pil kehkehlingkihong aramas ako me kin kousoan nan Serusalem ren kihong samworo kan oh mehn Lipai kan pwaisarail,+ pwe ren kak kapwaiada ar doadoahk duwehte me kosonned en Siohwa mahsanih. 5 Ni ahnsowohte me ruwes wiawi, mehn Israel kan kihpene kiden tepin wahn krein, wain kapw, lehn olip+ oh sukehn loangalap oh tepin wahnsapw kan koaros;+ re ahpw wahdo eisek kis ehun soahng koaros ni uwe ieu me tohto.+ 6 Oh aramas en Israel oh Suda kan me kin kousoan nan kahnimw en Suda kan pil wahdo eisek kis ehun kou oh sihpw oh eisek kis ehun soahng sarawi kan+ me kasarawihong Siohwa arail Koht. Re ahpw wahdo oh koasoakehda koasoakoasoak tohto. 7 Ni kesiluhwen sounpwong+ re tepida koasoakehda ar kisakis kan; oh ni keisuhwen sounpwong+ re kanekehla. 8 Ni Esekaia oh lapalap akan ar kohdo oh kilangada koasoakoasoak ko, re ahpw kapinga Siohwa oh kapaia sapwellime aramas en Israel kan.

9 Esekaia eri idek rehn samworo kan oh mehn Lipai kan duwen koasoakoasoak ko, 10 oh Asaraia kaunen samworo kan en peneinei en Sadok ahpw ndaiong ih: “Sangete ahnsou me re tepida wahdo kisakis kan nan tehnpesen Siohwa,+ aramas akan mwengemwenge lao re medla ahpw dirte luhwe, pwe Siohwa ketin kapaia sapwellime aramas akan, oh luhwe laud wet mihmihte.”+

11 Esekaia eri ndaiong irail ren kaunopada wasahn nahk kan*+ nan tehnpesen Siohwa, irail eri kaunopada. 12 Re kin usehlahte wahlongodo sawas kan ni mehlel, eisek kis ehun soahng kan me re anahne wahdo+ oh soahng sarawi kan; Konanaia mehn Lipaio me pwukoahki apwalih mepwukat koaros, oh rie pwutako Simei me keriauwih. 13 Sang ni kehkehlik en Nanmwarki Esekaia, Seheiel, Asasaia, Nahad, Asahel, Serimod, Sosapad, Eliel, Ismakaia, Mahad oh Penaia me wia wiliepe kei me kin sewese Konanaia oh rie pwutako Simei. Oh Asaraia me sounapwalih tehnpesen Koht mehlelo. 14 Oh Kore nein Imnah, mehn Lipai men me kin wia silepen ewen kehl ni palimese,+ oh e kin apwalih meirong kan me aramas akan nsenki wiahiong+ Koht mehlelo, oh e kin nehkpeseng kisakis kan me kohwong Siohwa+ oh pil meirong me keieu sarawi kan.+ 15 Oh Ihden, Miniamin, Sesua, Semaia, Amaraia oh Sekanaia mi pahn eh kaweid. Irail mi nan kahnimw en samworo kan,+ oh re kin wia doadoahk en aramas likilik kan, pwe ren nehkpeseng ni pahrek kisakis pwukat ong riarail kan me mi nan pwihn kan.+ Me mah oh pwulopwul kin ale soangen wehtehieu. 16 Met patehngete nehne me kin kohwong pwutak kan me sounpar siluh kohda me kileldi nan peneinei kan, me kin kohdo papah nan tehnpesen Siohwa rahn koaros oh kapwaiada pwukoa kan me ar pwihn pwukoahki.

17 Kileldien peneinei en samworo kan wiawihda nin duwen ar peneinei kan,+ duwehte kileldien peneinei en mehn Lipai kan me sounpar 20 kohda+ pil wiawi nin duwen pwukoa kan me ar pwihn pwukoahki.+ 18 Kileldien peneineio kin iangahki neirail seri kan koaros, arail pwoud kan, neirail pwutak kan oh neirail serepein kan, arail mwomwohdiso pwon⁠—⁠pwe re kin usehlahte kasarawih pein irail ong arail doadoahk sarawi kan pwehki ar kin wia doadoahk en aramas likilik⁠— 19 oh pil kadaudok en Aaron kan, samworo kan me kin kousoan nan mohs akan me kapil ar kahnimw kan.+ Nan kahnimw koaros, mie ohl akan me idihdida ren kin nehkpeseng mwenge rehn ohl koaros me peneinei en samworo oh aramas koaros me iang kileldi nan peneinei en mehn Lipai.

20 Esekaia wiahda met nan Suda pwon, oh e kin usehlahte wia dahme mwahu oh pwung oh kin lelepek mwohn silangin Siohwa eh Koht. 21 Oh doadoahk koaros me e wiahda pwehn rapahki eh Koht, sohte lipilipil me pidada doadoahk en tehnpesen Koht mehlelo+ de Kosonned oh kehkehlik, e kin wia ni mohngiong unsek oh e pweida.

32 Mwurin Esekaia eh kapwaiada mepwukat ni lelepek,+ Nanmwarki Senakerip en Asiria ahpw kohdo oh mahweniong Suda. E kapilpene kahnimw kehl kehlail kan. E medemedewe en kauwehla kelen kahnimw ko oh kalowehdi.+

2 Ni Esekaia eh esehda me Senakerip kodohr oh e koasoakoasoane en mahweniong Serusalem, 3 oh mwurin eh koasoiong nah lapalap ako oh sounpei ko, e ahpw koasoanehdi ren pinahla utuhnpihl kan likin kahnimwo.+ Irail eri utung ih. 4 Aramas tohto eri pokonpene, oh re pinahla utuhnpihl koaros oh pihl me kin pwilipwillahng nan sahpwo, oh re nda: “Mehnda kitail en pil mweidohng nanmwarkien Asiria kan en kohdo oh diar diren pihl?”

5 Esekaia pil koasoanehdi en onehda sapahl kehlo pwon me rengkidi oh kauwada imwen doulik powe, oh e kauwada pil ehu kehl masliki. E pil kamwahwihala Dohl*+ en Kahnimw en Depit, oh wiahda tehtehn mahwen* oh mehn sansar tohto. 6 Ih eri idihada kaunen sounpei kan pohn aramas ako oh kapokoneirailpene ni wasahn tuhpeneo ni ewen kelen kahnimwo oh kangoange irail,* nda: 7 “Kumwail kommwad oh kehlail. Kumwail dehr perki de masak nanmwarkien Asiria+ oh pokon laud wet me iangih, pwe me iang kitail kan tohtohsang me iangih.+ 8 E kehlki manaman en aramas,* ahpw kitail kin kehlki Siohwa atail Koht en ketin sewesei kitail oh mahwenkin kitail.”+ Aramas ako eri kehlailkihda mahsen kan en Nanmwarki Esekaia en Suda.+

9 Mwurin met, nindoken Nanmwarki Senakerip en Asiria eh mihmi nan Lakis+ iangahki nah kariso pwon,* e ahpw kadarala nah ladu kan Serusalem, rehn Nanmwarki Esekaia en Suda oh mehn Sudia koaros nan Serusalem,+ nda:

10 “Iet me Nanmwarki Senakerip en Asiria, mahsanih, ‘Dahme kumwail koapworopworki me kumwail mihmihkihte nan Serusalem nan eh kapilpilpenehr?+ 11 Esekaia sou pitipitih kumwail oh mweidohng kumwail en mehkihla duhpek oh men nimpil, ni eh nda: “Siohwa atail Koht pahn ketin kapitkitailsang nan pehn nanmwarkien Asiria”?+ 12 Kaidehn ih Esekaiaohte me kihsang en amwail Koht* wasa ile kan+ oh Eh pei sarawi kan+ oh ndaiong Suda oh Serusalem: “Kumwail anahne poaridi mwohn pei sarawiteieu oh kumwail anahne wiahda amwail meirong isihs kan powe”?+ 13 Kumwail sehse dahme ngehi oh semei mehn mahs ako wiahiong aramas koaros nan sahpw akan?+ Koht en wehi kan kak doarehla sapwarail kan sang nan pehi?+ 14 Ihs nanpwungen koht koaros en wehi pwukat me semei mehn mahs ako kamwomwala me kak doarehla nah aramas akan sang nan pehi, pwe amwail Koht en pil kak doareikumwailla sang nan pehi?+ 15 Eri kumwail dehr mweidohng Esekaia en pitih kumwail de kahluwai kumwail nan ahl sapwung duwehte met!+ Kumwail dehr kamehlele, pwe sohte koht en tohnwehi de wehi ehu kak doarehla nah aramas sang nan pehi oh sang nan pehn semei mehn mahs ako. Eri, ia duwen amwail Koht menet eh kak doareikumwailsang nan pehi!”+

16 Nah ladu ko pil usehla kepitki Siohwa, Koht mehlelo oh sapwellime ladu Esekaia. 17 E pil ntingihada kisinlikou kan+ pwehn kepitki Siohwa, Koht en Israel+ oh lahlahwe ih, nda: “Duwehte koht en wehi kan me sohte kak doarehsang neirail aramas akan nan pehi,+ pil Koht en Esekaia sohte pahn kak doarehsang nah aramas akan nan pehi.” 18 Re kin usehlahte koasoakoasoi ni ngihl laud ni lokaiahn Suhs ong aramas en Serusalem ko me mi pohn kehlo, pwehn kamasakada oh katikitikihala nan kapehdirail kan, pwe ren kalowehdi kahnimwo.+ 19 Re lahlahwe Koht en Serusalem duwehte ar lahlahwe koht en aramas en sampah kan, me wiawihkihda pehn aramas. 20 Ahpw Nanmwarki Esekaia oh soukohp Aiseia+ nein Eimwos usehlahte kapakapki duwen met oh likilikwerdahla nanleng peksawas.+

21 Siohwa eri ketin poaronehla tohnleng men oh kasohrehla sounpei kehlail koaros+ oh kaun akan koaros me mi nan kahnimpwal en nanmwarkien Asiria. Ih eri namenekla oh pwurala nan sapweo. Mwuhr e pedolong nan imwen kaudok en eh kohto, oh ekei nah pwutak ko ahpw kemehkihla ih kedlahs wasao.+ 22 Siohwa eri ketin kapitala Esekaia oh tohn Serusalem kan sang nan pehn Nanmwarki Senakerip en Asiria oh sang nan pehn imwintihti teikan koaros oh ketikihong irail popohl* wasa koaros. 23 Oh aramas tohto ahpw patohwando kisakis kan ong Siohwa nan Serusalem oh soahng kaselel kan ong Nanmwarki Esekaia en Suda,+ oh mwurin ahnsowo kohdo wehi koaros ahpw waunekihla ih mehlel.

24 Ni rahn ako Esekaia soumwahuda oh pahn kereniongehr mehla, oh e kapakapohng Siohwa,+ me ketin sapengala ih oh ketikihong ih kilel ehu.+ 25 Ahpw Esekaia sohte kasapahlkalahnganki soahng mwahu kan me wiawihong ih, pwe eh mohngiong aklapalapala, me kahrehda Koht ketin engiengda pah oh Suda oh Serusalem. 26 Ahpw, Esekaia aktikitikla oh sohla aklapalap,+ ih oh tohn Serusalem kan, oh sapwellimen Siohwa engieng eri sohte kohdiong pohrail ni mwehin Esekaia.+

27 Esekaia eri inenen kepwehpwehla oh waunla;+ oh e wiahda eh imwen nahk kan+ ong silper, kohl, takai kesempwal kan, lehn palsam,* mehn sansar kan oh ong dipwisou kesempwal koaros. 28 E pil wiahda wasahn nahk kan ong krein oh wain kapw oh leh, oh pil dewen soangen pelinmen koaros oh dewen pelinsihpw kan. 29 E pil wiahda eh kahnimw kan, oh alehdi pelinmen tohto, sihpw, kuht oh kou, pwe Koht ketikihong ih dipwisou tohtohie. 30 Iei Esekaia me pinahla utuhnpihl+ en Kihon+ kan me mi powe oh kauwetdihla pihl ko ni palikapi en Kahnimw en Depit,+ oh Esekaia kin pweida nan eh doadoahk kan koaros. 31 Ahpw, ni ahnsou me sounkair kan en lapalap en Papilon ko pekederla pwehn idek reh duwen kilel ehu+ me pwarada nan sahpwo,+ Koht mehlelo ketin mweidala en wia nsene,+ pwe en ketin mwahngih audepen eh mohngiong.+

32 A duwen soahng teikan nan poadopoad en Esekaia oh eh wiewiahn limpoak loalopwoat kan,+ mepwukat ntingdi nan kaudiahl en soukohp Aiseia+ nein Eimwos, nan Pwuhken Nanmwarkien Suda oh Israel kan.+ 33 Esekaia eri kommoaldi rehn seme mehn mahs ako, oh re sarepedi ih ni ukada me kolahng wasahn seridien kadaudok en Depit kan;+ oh Suda pwon oh tohn Serusalem kan wiahda lapalahn wahu ehu ni eh mehlao. Oh nah pwutak Manase wiliandi ih wiahla nanmwarki.

33 Manase+ sounpar 12 ni ahnsou me e wiahla nanmwarki, oh e kakaunki sounpar 55 nan Serusalem.+

2 E kin wia dahme suwed mwohn silangin Siohwa, oh e kin idawehn wiewia kasaut en wehi kan me Siohwa ketin kasarehsang mwohn aramas en Israel kan.+ 3 E pwurehng kauwada wasa ile kan me seme Esekaia karangkehdi,+ oh e wiahda pei sarawi kan ong Paal kan oh tuhke sarawi kan,* oh e kin pwongih karis en nanleng kan koaros* oh papah mepwukat.+ 4 E pil kauwada pei sarawi kan nan tehnpesen Siohwa,+ wasa me Siohwa ketin mahsanih: “Nan Serusalem, mwarei pahn poatopoat.”+ 5 Oh e kauwada pei sarawi kan ong karis en nanleng kan koaros* nan wasa riau me kelpene nan tehnpesen Siohwa.+ 6 Oh e meirongkihla nah pwutak kan nan kisiniei*+ nan Wahun Innom;*+ e kin wia akmanaman,+ kosetipw, wunahni, oh idihada sounwunahni kan oh sounkosetipw kan.+ E kin wiahda suwed me inenen laud mwohn silangin Siohwa, pwehn kansensuwedih.

7 E kihdi sansal perperda me e wiahda nan tehnpesen Koht mehlelo+ me Koht ketin mahsanihong Depit oh nah pwutak Solomon: “Nan tehnpas wet oh Serusalem me I piladahr sang nan keinek en Israel koaros, I pahn kihdi mwarei kohkohlahte.+ 8 Oh I sohte pahn pwurehng kihsang nehn Israel nan sahpw me I kihong samarail mehn mahs ako, ma re kanahieng kapwaiada mehkoaros me I kehkehlingkihong irail, Kosonnedo pwon, koasoandi kan oh kosonned kan me I kihda rehn Moses.” 9 Manase kin pousehlahte kaweid sapwungih Suda oh tohn Serusalem kan. E kin kahrehiong irail en wiahda soahng suwed kan me laudsang wehi kan me Siohwa ketin kamwomwala mwohn mehn Israel kan.+

10 Siohwa kin ketin pousehlahte mahseniong Manase oh nah aramas akan, ahpw irail sohte rong.+ 11 Siohwa ketin kadarodo kaunen karis en sounpei en nanmwarkien Asiria kan en mahweniong irail, oh re kolekihdi Manase kehs kan* oh salihekihdi selmete prons riau oh walahng Papilon. 12 Nan eh lokolok, Manase kin pekipeki kupwuramwahu en Siohwa eh Koht oh e kin usehlahte aktikitikla mehlel mwohn silangin Koht en seme mehn mahs ako. 13 E pousehlahte kapakapohng Ih, oh E ketin mwekidki eh pekipeko oh karonge eh peki kupwuramwahu, oh E ketin kapwurelahng ih Serusalem en pwurehng kaunda nin duwen nanmwarki.+ Manase eri esehda me Siohwa iei me Koht mehlel.+

14 Mwurin met, Manase ahpw kauwada kelen masliki ehu ong Kahnimw en Depit+ ni palikapi en Kihon+ nan wahwo oh lella ni Ewen Kelen Mwahmw,+ oh e pouse kehlo pidekla Opel,+ oh e kailehda douluhl kehlo. Oh pil, e idihada kaunen sounpei kan nan kahnimw kehl kehlail koaros nan Suda. 15 Ih eri kihsang koht en liki kan oh kilel en sansal kan nan tehnpesen Siohwa+ oh pei sarawi koaros me e wiahda pohn nahna en tehnpesen Siohwa+ oh nan Serusalem, oh e keseirailla likin kahnimwo. 16 E pil kaunopada pei sarawien Siohwa+ oh tepida wiahda meirong en kaminimin kan+ powe oh meirong en kapingkalahngan kan+ powe, oh e ndaiong Suda en papah Siohwa, Koht en Israel. 17 Ahpw mendahki aramas ako kin wiewia ar meirong ongete Siohwa ar Koht, re kin wiewia met pohn wasa ile kan.

18 A duwen soahng teikan nan poadopoad en Manase, eh kapakap ong eh Koht, oh mahsen en sounkilang kaudiahl kan me koasoiong ih ni mwaren Siohwa, Koht en Israel, mepwukat ntinting nan poadopoad en nanmwarkien Israel kan. 19 Oh pil eh kapakap+ oh duwen eh pekipeko eh pasapengla, dipe kan koaros oh eh salelepekla,+ wasa me e kauwada wasa ile kan oh kauwada tuhke sarawi kan*+ oh sansal perperda kan mwohn eh aktikitikla, mepwukat iang ntinting nan mahsen kan me nah sounkilang kaudiahl kan ntingihdi. 20 Manase eri kommoaldi rehn seme mehn mahs ako, oh re sarepedi ih limwahn tehnpeseo; oh nah pwutak Amon wiliandi ih wiahla nanmwarki.+

21 Amon+ sounpar 22 ni ahnsou me e wiahla nanmwarki, oh e kakaunki sounpar riau nan Serusalem.+ 22 E doulahte wia dahme suwed mwohn silangin Siohwa, duwehte me seme Manase wiadahr;+ oh Amon wiahda meirong ong sansal perperda kan koaros me semeo Manase wiahda,+ oh e kin pousehlahte papah irail. 23 Ahpw e sohte aktikitikla mwohn silangin Siohwa+ duwehte me seme Manase wia;+ ahpw Amon kalaudehla douluhl dipe. 24 Kedekedeo nah ladu ko ahpw koasoanehdi ren uhwong ih+ oh kemehla ih nan tehnpeseo. 25 Ahpw aramas akan en sahpwo kemehla irail ako koaros me koasoanehdi ren uhwong Nanmwarki Amon,+ oh re wiahiong nah pwutak Sosaia+ en wiliandi ih wiahla nanmwarki.

34 Sosaia+ sounpar waluh ni ahnsou me e wiahla nanmwarki, oh e kakaunki sounpar 31 nan Serusalem.+ 2 E kin wia dahme pwung mwohn silangin Siohwa oh kin kekeid nan ahl kan me seme mehn mahso Depit kin keid loale, oh e sohte kin wetla ni palimaun de palimeing.

3 Ni kawaluhn sounpar en eh mwehi, nindoken eh wie pwulopwulte, e tepida rapahki Koht en seme mehn mahso Depit;+ oh ni kaeisek riaun sounpar, e tepida kamwakelehda Suda oh Serusalem+ ni eh kihsang wasa ile kan,+ tuhke sarawi kan,* sansal perperda kan+ oh sansal mete kan. 4 Oh pil re kauwehla pei sarawi en Paal kan mwohn mese, oh e pelehdihsang dewen warpwohmwahu me mi pohn pei sarawi pwukat. E pil lupukpene tuhke sarawi kan,* sansal perperda kan oh sansal mete kan oh irispene mepwukat lao wiahla pehs oh kamwarakseli pohn sousoun irail me kin wia meirong ong sansal kan.+ 5 Oh e isikala tihn samworo kan pohn ar pei sarawi ko.+ Ih eri kamwakelehda Suda oh Serusalem.

6 Oh nan kahnimw en Manase, Epraim,+ Simion oh lellahng Napdali, nan wasa ohla kan limwahrail, 7 Sosaia karangkehdi pei sarawi kan oh e kamwutepene tuhke sarawi kan* oh sansal perperda kan,+ irispene mepwukat lao wiahla pehs; oh e pelehdihsang dewen warpwohmwahu koaros nan sapwen Israel pwon,+ oh mwurin mwo e pwuralahng Serusalem.

8 Ni kaeisek waluhn sounpar en eh mwehi, ni eh kamwakeledahr sahpwo oh tehnpas sarawio,* e kadarala Sapan+ nein Asalaia, Maaseaia kaunen kahnimwo oh Soha nein Soahas, me wia sounnting pwe ren onehda sapahl tehnpesen Siohwa eh Koht.+ 9 Irail kohla rehn samworo lapalap Ilkaia oh kihong ih mwohni me wisikdo nan tehnpesen Koht, me mehn Lipai kan me kin papah nin duwen silepen wenihmw kan alehsang Manase, Epraim oh aramas teikan en Israel,+ oh pil sang Suda, Pensamin oh tohn Serusalem kan. 10 Irail eri kihong mwohnio irail kan me idihdida pwe ren apwalih doadoahk en tehnpesen Siohwa. Tohndoadoahk kan nan tehnpesen Siohwa uhd doadoahngki ong kamwahwihala oh onehda sapahl tehnpaso. 11 Irail eri kihong tohndoadoahk saman kan oh sounkou ihmw kan mwohnio pwe ren pwainda takai perperda kan oh tuhke kan ong mehn kateng oh wilianda tuhkehn ihmw kan me nanmwarkien Suda kan mweidohng en ohla.+

12 Oh aramas ako doadoahk ni lelepek.+ Irail me idihdida pohrail iei mehn Lipai kan, Sahad oh Opadaia mehn Merari+ oh Sekaraia oh Mesullam mehn Kohad,+ pwe ren papah nin duwen sounapwalih kan. Oh mehn Lipai kan, irail koaros sounkoul koahiek kei,+ 13 me pwukoahki apwalih tohndoadoahk kan me sohte ahneki koahiek tohrohr* oh wia sounapwalih en irail koaros me kin wia soangsoangen doadoahk kan; oh ekei mehn Lipai kan wia sekteri, kaun oh silepen ewen kehl.+

14 Ni ar kihkihiei mwohni ko me wisikdo nan tehnpesen Siohwa,+ samworo Ilkaia ahpw diarada pwuhken Kosonned en Siohwa+ me e ketikihda rehn* Moses.+ 15 Ilkaia eri ndaiong sekteri Sapan: “I diaradahr pwuhken Kosonnedo nan tehnpesen Siohwa.” Ilkaia eri kihong Sapan pwuhko. 16 Sapan eri wahla pwuhko rehn nanmwarkio oh ndaiong ih: “Sapwellimomwi ladu ko kin wiewia mehkoaros me kileldiong irail. 17 Re ale mwohni ko me dierek nan tehnpesen Siohwa, oh re kin kihla mwohni ko rehn ohl idihdida ko oh rehn irail ako me wia doadoahko.” 18 Sekteri Sapan pil ndaiong nanmwarkio: “Mie pwuhk ehu me samworo Ilkaia kihong ie.”+ Sapan eri tepida wadek pwuhko mwohn nanmwarkio.+

19 Ni ahnsowohte me nanmwarkio rongada mahsen kan en Kosonnedo, e ahpw tehrpeseng eh likou ko.+ 20 Nanmwarkio eri ruwese Ilkaia, Ahikam+ nein Sapan, Apdon nein Maika, sekteri Sapan oh Asaia nein nanmwarki laduwo: 21 “Kumwail kohla kalelapek rehn Siohwa, ong ngehi oh ong irail ako me mihmihte nan Israel oh Suda me pid mahsen kan en pwuhk wet me dierekda; pwe engieng en Siohwa me pahn kohdiong pohtail me inenen laud pwehki samatail mehn mahs ako sohte kin kapwaiada mahsen en Siohwa. Re sohte kapwaiada mehkoaros me ntingdier nan pwuhket.”+

22 Eri Ilkaia, iangahki irail ako me nanmwarkio kadarala, ahpw kohla rehn lih soukohp Ulda.+ E pwoudiki Sallum nein Tikpa nein Aras, me kin apwalih likou kan, oh liho kin kousoan nan Pali Keriau en Serusalem; oh irail ahpw koasoiong ih wasao.+ 23 Liho ahpw ndaiong irail: “Iet me Siohwa, Koht en Israel ketin mahsanih, ‘Kumwail padahkihong ohl me kadarkumwaildo rehi: 24 “Iet me Siohwa ketin mahsanih, ‘I pahn wahdo kahpwal ong wasaht oh towe kan.+ Keria kan koaros me ntingdi nan pwuhko+ me re wadek mwohn nanmwarkien Suda pahn pweida. 25 Pwehki re keseiehla+ oh wiahda meirong ediniei ong koht teikan pwehn kansensuwedihkin ie+ arail doadoahk koaros, I pahn wudekihdiong wasaht ei engieng oh e sohte pahn tokedi.’”+ 26 Ahpw ong nanmwarkien Suda me kadarkumwaildo pwehn kalelapek rehn Siohwa, iet me kumwail pahn ndaiong ih, “Iet me Siohwa, Koht en Israel ketin mahsanih: ‘Me pid mahsen ko me ke rongehr,+ 27 pwehki omw mohngiong mwekidki* oh ke aktikitikla mwohn silangin Koht ni omw rongada sapwellime mahsen kan me pid wasaht oh towe kan oh ke aktikitikla mwohn silangi, oh ke tehrpeseng omw likou kan oh sengiseng mwohn silangi, I pil karongeiuk,+ Siohwa me ketin mahmahsen. 28 Ihme kahrehda ke pahn mehla oh seridi duwehte semomw mehn mahs ako oh ke pahn kommoaldi nan omw sousou ni popohl, oh mesomw kan sohte pahn kilang kahpwal koaros me I pahn wadohng wasaht oh towe kan.’”’”+

Irail eri walahng nanmwarkio rohng wet. 29 Nanmwarkio eri ilekla oh ekerodo ohl mah kan koaros en Suda oh Serusalem.+ 30 Mwurin mwo nanmwarkio eri kohdahla ni tehnpesen Siohwa iangahki aramas koaros en Suda, tohn Serusalem kan koaros, samworo kan, mehn Lipai kan—aramas akan koaros, me mah oh pil pwulopwul. E wadekohng irail mahsen koaros en pwuhken inou lapo me dierek nan tehnpesen Siohwa.+ 31 Nanmwarkio eri kesihnenda nan deweo oh wiahda inou lap ehu*+ mwohn silangin Siohwa, me e pahn idawehn Siohwa oh peikiong sapwellime kehkehlik kan, mehn kataman kan oh koasoandi kan sang nan eh mohngiong unsek oh mour* unsek+ ni eh pahn kapwaiada mahsen kan en inou lap me ntingdi nan pwuhk wet.+ 32 Oh e pil kangoange koaros me mi nan Serusalem oh Pensamin ren pwungki met. Oh tohn Serusalem ko eri tepida mour pahrekiong inou lap en Koht, Koht en samarail mehn mahs ako.+ 33 Sosaia eri kihsang soahng kasaut* koaros nan sapwen mehn Israel kan pwon,+ oh e wiahiong koaros nan Israel ren papah Siohwa arail Koht. Erein eh mour pwon,* re sohte sohpeisang elen Siohwa, Koht en samarail mehn mahs ako.

35 Sosaia eri wiahda Pahsohpa+ ong Siohwa nan Serusalem, oh re kemehla meirong en Pahsohpao+ ni 14 en keieun sounpwong.+ 2 E kilelehiong samworo kan arail pwukoa kan oh kangoange irail en kapwaiada arail doadoahk kan nan tehnpesen Siohwa.+ 3 Ih eri ndaiong mehn Lipai ko, sounpadahk kan en Israel pwon,+ irail akan me sarawi ong Siohwa: “Kumwail kihdi Kohpwa sarawio nan tehnpaso me Solomon nein Depit nanmwarkien Israel kauwada;+ kumwail sohla pahn kapaik met pohn pwopwamwail kan.+ Eri kumwail papah Siohwa amwail Koht oh sapwellime aramas en Israel kan. 4 Oh kumwail kaunopkumwailda sang ni peneinei en samamwail mehn mahs ako, nin duwen amwail pwihn kan, ni amwail idawehn dahme Nanmwarki Depit+ en Israel oh nah pwutak Solomon+ ntingihedi. 5 Kumwail pahn kesihnen nan wasa sarawio nin duwen pwihn kan me kumwail iang, kumwail anahne kesihnen ni ahl ehu me ehuehu peneinei en mehn Lipai kan pahn kak sewese ehuehu peneinei en aramas akan.* 6 Kumwail eri kemehla meirong en Pahsohpao+ oh kasarawihala pein kumwail oh kaunopada met ong riamwail kan pwehn kapwaiada mahsen en Siohwa me Moses padahngki.”

7 Sosaia sawaskihda pelinmen kan ong aramas ako, sihmpwul wol kan oh kuht wol pwulopwul kan, ong meirong en Pahsohpa ong koaros me mi wasao, patpene koaros meh 30,000, pil iangahki kou 3,000. Mepwukat koaros nein nanmwarkio.+ 8 Nah lapalap ako pil kihda sawas ehu nin duwen meirong me re nsenki wiahda ong aramas ako, samworo ko oh mehn Lipai ko. Ilkaia,+ Sekaraia oh Seheiel, kaun akan en tehnpesen Koht mehlelo, eri kihong samworo kan meirong en Pahsohpa 2,600 oh kou 300. 9 Kaunen mehn Lipai ko, Konanaia oh rie ko Semaia oh Nedanel, iangahki Asapaia, Seiel oh Sosapad kihong mehn Lipai ko meirong en Pahsohpa 5,000 oh kou 500.

10 Mehkoaros onopadahr, oh samworo kan kesihnen nan dewerail kan oh mehn Lipai kan kesihnen nin duwen ar pwihn kan,+ duwehte me nanmwarkio kehkehlingki. 11 Re kemehla meirong en Pahsohpa ko,+ oh samworo ko usupihki nta me re alehsang irail,+ erein mehn Lipai ko ar senserehsang kilin mahn akan.+ 12 Mwurin mwo re kaunopada meirong isihs kan pwe ren nehkohng aramas akan me mi nan pwihn kan nin duwen samarail mehn mahs ako, pwe ren kak meirongkihong Siohwa duwehte me ntingdi nan pwuhken Moses; oh re wiahiong kou ko soahngohte. 13 Re kukihada* meirong en Pahsohpao pohn kisiniei nin duwen tiahk;+ oh re kukih meirong sarawi ko nan einpwoat kan, einpwoat laud kan oh mehn pirain kan. Mwurin mwo re ahpw mwadang wahla rehn aramas ko koaros. 14 Mwuri, re kaunopada ong pein irail oh ong samworo ko, pwehki samworo ko, kadaudok en Aaron ko wiewia meirong isihs kan oh wih kan lao lel nipwongo. Mehn Lipai ko eri kaunopada ong pein irail oh ong samworo kan, kadaudok en Aaron kan.

15 Oh sounkoul kan, kadaudok en Asap+ kan, mi nan dewerail kan sang ni kehkehlik en Depit,+ Asap,+ Eman oh nein nanmwarki sounkilang kaudiahlo Sedudun;+ oh silepen ewen kehl kan mi ni ehuehu ewen kehl.+ Irail sohte anahne kohkohsang arail pwukoa, pwehki riarail mehn Lipai ko kaunopada met ong irail. 16 Eri rahno re kanekehla ar kaunopada mehkoaros me Siohwa ketin kupwurki ren wia ong Pahsohpao+ oh re wiahda meirong isihs kan pohn pei sarawi en Siohwa, duwehte me Nanmwarki Sosaia kehkehlingki.+

17 Ni ahnsowo mehn Israel kan me mi mwo wia Pahsohpa oh Kasarawien Pilawa me Sohte Doal Ihs erein rahn isuh.+ 18 Sohte Pahsohpa ehu me duwehte met me wiawi nan Israel sangete mwehin soukohp Samuel; oh pil sohte emen nanmwarkien Israel me wia Pahsohpa duwehte met, me Sosaia,+ samworo kan, mehn Lipai kan, Suda oh Israel pwon me mi wasao oh tohn Serusalem kan wiahda. 19 Pahsohpa wet wiawi ni kaeisek waluhn sounpar en mwehin Sosaia.

20 Mwurin mepwukat koaros, ni Sosaia eh onehda sapahl tehnpas sarawio,* Nanmwarki Neko+ en Isip ahpw kohdahla Karkemis me mi limwahn Iupreitis pwehn mahwen. Sosaia eri kohieila uhwong ih.+ 21 Neko eri kadarala meninkeder kei reh oh nda: “Dahme ke kohkihdo uhwong ie, nanmwarkien Suda? I sohte kodohn uhwong uhk rahnwet, ahpw I pahn peiong ehu wehi tohrohr, oh Koht ketin mahsanih me I en karuwaru. Pwehn mwahu ong uhk, ke dehr uhwong Koht me ketin ieiang ie, pwe ma soh, e pahn ketin kamwomwuhkala.” 22 Ahpw, Sosaia sohte sohpeisang ih, e ahpw wekidala mwomwe+ pwehn peiong oh sohte rong dahme Neko koasoia, me kohsang doauesen Koht. Ih eri kohla mahwen nan Patapat en Mekiddo.+

23 Oh sounkesik ketieu kan kasikihdi Nanmwarki Sosaia, oh nanmwarkio ndaiong nah ladu ko: “Kumwail waiehsang met, pwe I uhdahn ohlahr.” 24 Nah ladu ko eri kihsang ih nan kurumao oh kihdiong nan were keriaun kurumahn mahweno oh walahng Serusalem. Ih eri mehla oh seridi nan sousoun seme mehn mahs ako,+ oh Suda oh Serusalem pwon mwahieiki mehlahn Sosaia. 25 Oh Seremaia+ koulki koulen kedepwidepw kan ong Sosaia, oh sounkoul ohl oh lih koaros+ kin koulki duwen Sosaia nan ar koulen kedepwidepw kan* leledo rahnwet; oh koulki koulen kedepwidepw ko wiahla tiahk* ehu nan Israel, oh koul ko ntingdi nan koulen kedepwidepw kan.

26 A duwen soahng teikan nan poadopoad en Sosaia oh eh wiewiahn limpoak loalopwoat ni eh kapwaiada dahme ntingdi nan Kosonned en Siohwa, 27 oh dahme e wiahda, sang ni tapi lel ni imwi, mepwukat ntinting nan Pwuhken Nanmwarkien Israel oh Suda kan.+

36 Aramas akan en sahpwo ahpw ale Sehoahas+ nein Sosaia oh kasapwiladahng ih nanmwarki nan Serusalem pwehn wiliandi semeo.+ 2 Sehoahas sounpar 23 ni ahnsou me e wiahla nanmwarki, oh e kakaunki sounpwong siluh nan Serusalem. 3 Ahpw, nanmwarkien Isip kihsang ih nan dewe nan Serusalem oh koasoanediong Suda en pwain silper dalend* 100 oh kohl dalend ehu.+ 4 Nanmwarkien Isip pil kasapwilada rien Sehoahas, Elaiakim, en wia nanmwarkien Suda oh Serusalem oh wekidala edeo ong Sehoiakim; ahpw Neko+ ale rieo Sehoahas oh wahla Isip.+

5 Sehoiakim+ sounpar 25 ni ahnsou me e wiahla nanmwarki, oh e kakaunki sounpar 11 nan Serusalem. E doulahte wia dahme suwed mwohn silangin Siohwa eh Koht.+ 6 Nanmwarki Nepukadnesar+ en Papilon ahpw kohdo mahweniong Sehoiakim, pwehn salihekihdi selmete prons riau oh wahla ih Papilon.+ 7 Oh Nepukadnesar kihsang ekei dipwisou kan en tehnpesen Siohwa oh walahng Papilon oh kihdi mepwukat nan tehnpese nan Papilon.+ 8 A duwen soahng teikan nan poadopoad en Sehoiakim, soahng kasaut kan me e wiahda oh soahng suwed koaros duwen ih, e ntinting nan Pwuhken Nanmwarkien Israel oh Suda kan; oh nah pwutak Sehoiakin wiliandi ih wiahla nanmwarki.+

9 Sehoiakin+ sounpar 18 ni ahnsou me e wiahla nanmwarki, oh e kakaunki sounpwong siluh oh rahn eisek nan Serusalem; oh e doulahte wia dahme suwed mwohn silangin Siohwa.+ 10 Ni tepin pahro,* Nanmwarki Nepukadnesar ahpw kadarala aramas akan ren wahdo Sehoiakin Papilon,+ iangahki dipwisou kesempwal kan en tehnpesen Siohwa.+ Oh Nepukadnesar kasapwilada rien semeo Sedekaia en wia nanmwarkien Suda oh Serusalem.+

11 Sedekaia+ sounpar 21 ni ahnsou me e wiahla nanmwarki, oh e kakaunki sounpar 11 nan Serusalem.+ 12 E doulahte wia dahme suwed mwohn silangin Siohwa eh Koht. E sohte aktikitikla mwohn soukohp Seremaia,+ me kin panawih ih sang ni ruwes en Siohwa. 13 E pil uhwongada Nanmwarki Nepukadnesar,+ me kahrehiong ih en kahukihla inou ehu ni mwaren Koht, ahpw e kin keptakaite* oh kahngohdi oh kahng sohpeiong Siohwa, Koht en Israel. 14 Kaunen samworo ko koaros oh pil aramas ako inenen salelepek. Re kin wiewia soahng kasaut koaros me wehi kan kin wia, oh re kasaminehla tehnpesen Siohwa+ me e ketin kasarawihala nan Serusalem.

15 Siohwa, Koht en samarail mehn mahs ako kin ketin usehlahte panawih irail sang sapwellime meninkeder kan. E kin ketin pwurupwurehng panawih irail, pwehki e ketin poakehla sapwellime aramas akan oh sapwellime wasahn kousoan. 16 Ahpw re kin usehlahte kepitki meninkeder kan en Koht mehlelo,+ oh re kin mwamwahliki sapwellime mahsen kan+ oh kapailoke sapwellime soukohp kan,+ lao engieng en Siohwa kohdiong sapwellime aramas akan,+ lao re sohla kak mwahula.

17 Ih eri ketin kadarodo nanmwarkien mehn Kaldia kan en mahweniong irail.+ E kemehkihla neirail mwahnakapw kan kedlahs+ nan arail wasa sarawio;+ e sohte poakehla mwahnakapw de meipwon, me mah de soumwahu.+ Koht ketikihong mehkoaros nan peh.+ 18 Oh nanmwarkien mehn Kaldia ko wahla soahng koaros nan Papilon, dipwisou koaros en tehnpesen Koht mehlelo, me laud oh tikitik, oh pil dipwisou kesempwal kan en tehnpesen Siohwa oh en nanmwarkio oh nah lapalap akan ar dipwisou kesempwal kan.+ 19 E isikala tehnpesen Koht mehlelo,+ karangkehdi kelen Serusalem,+ isikala imwen doulik kehlail kan koaros oh kauwehla soahng kesempwal kan koaros.+ 20 E salihedi irail ako me pitsang kedlahs oh wahla Papilon,+ oh re kin uhd papah ih+ oh nah pwutak kan lao wehin* Persia tepida kakaun,+ 21 pwehn kapwaiada sapwellimen Siohwa mahsen me Seremaia koasoia,+ lao sahpwo kapwungala eh sapad kan.+ Sahpwo komkommoal* erein ahnsowo pwon me e tehnla, pwehn kapwaiada sounpar 70.+

22 Ni keieun sounpar en Nanmwarki Sairus+ en Persia, pwe sapwellimen Siohwa mahsen sang Seremaia+ en pweida, Siohwa ketin kamwakid mohngiong* en Nanmwarki Sairus en Persia en wiahda pakair ehu wasa koaros nan eh wehi, me e pil ntingihedi,+ nda: 23 “Iet me Nanmwarki Sairus en Persia mahsanih, ‘Siohwa, Koht en nanleng ketikihongieier wehi koaros en sampah,+ oh e ketin idihiehda I en kauwadahng ih tehnpas ehu nan Serusalem, me mi nan Suda.+ Eri, sohte lipilipil nanpwungamwail me wia sapwellime aramas, Siohwa eh Koht en ketin ieiang ih, oh en kohdahla wasao.’”+