Negocio ruwaqkunaman predicasun
1. ¿Imaraykun mana llakikunanchischu negociokunapi manchakuspa predicasqanchismanta?
1 ¿Manchakunkichu negociokunapi predicayta? Chhayna kaqtinqa ama llakikuychu; Apóstol Pablopas manchakurqanmi allin predicaqña karqan chaypas, ichaqa kallpachakurqanmi predicación llank’ayta hunt’ananpaq (1 Tes. 2:2). Qatiqninpi kinsa tapuykunata qhawarisun imas yanapawasunman negociokunapi predicanapaq chaytapas.
2. ¿Imaraykun mana yuyaykunaykichu llank’apakuqkunata rimapayaqtiyki phiñakunankuta?
2 ¿Phiñakunkumanchu negociopi llank’apakuqkuna rimapayaqtiy? Askha negociokunapi llank’apakuqkunan imakuna ruwasqankutapas saqesparaq runakunata atiendenanku. Hinaspapas rantiqtapas hina qhawarispan respetowan atiendesunkiku. Sichus allin p’achasqa sumaq sonqotaq kanki chayqa, respetowanmi tratasunkiku.
3. ¿Imatan ruwanayki rantikuqkunata mana phiñachinaykipaq?
3 ¿Predicaymanchu askha rantiqkuna kashaqtin? Allinmi kanman negocioman manaraq askha runakuna hamushaqtinku predicayqa, chayqa kanman chayllaraq kichakushaqtinmi. Hinaspapas dueño otaq llank’apakuqpas sapallan kasqantan qhawarina, ichaqa manan unaytachu rimapayana.
4. ¿Imaynatan negociokunapi predicawaq?
4 ¿Imatan niyman? Sichus negociopi askha llank’apakuqkuna kan chayqa, chaypi kaq encargadowan rimay. Yaqapaschá kayta niwaq: “Negociowan llank’aqkunataqa maynillanpin wasinkupi tariyku chaymi llank’anankuman visitashayku. Ruwanaykitaq kashan chayqa pisillata rimarisun”, nispa. Vendeqkunawan mana pantanasuykipaqqa, ama contribucionta mañakuychu qelqakuna saqesqaykimanta, sichus tapusunkiku imakunawanmi chaykunata ruwakun chayqa willawaqmi. Ima negocio kasqanman hina encargadota tapuwaq wakin llank’apakuqkunawan pisillapi rimanaykipaq. Paykunamanpas ñawpaqpi nisqanchista hinan nillawaqtaq. Sichus mayqen llank’apakuqpas sinchi ruwanayoq kashan chayqa, aswan pisillata rimay chaymantataq huk tratadota saqey. Hinaspapas manaña piwanpas rimayta atiwaqchu chayqa, tapuy saqewaqchus qelqakunata chayta.
5. ¿Imaraykun kallpachakunanchis negociokunapi predicanapaq?
5 Jesuspas Pablopas mana manchakuspan runakunaq llank’ananpi predicarqanku, qanpas atiwaqmi chay ruwayta (Mat. 4:18-21, 9:9; Hech. 17:17). Jehová Diosmanta mañakuy kallpata thak-kaytapas qonasuykipaq (Hech. 4:29). Negociokunapi predicayqa ancha allinpunin askha runakuna kasqanrayku. ¿Kallpachakuwaqchu chayta ruwanaykipaq?