2 Korinetia

6 E TEIANEI, te ako katoa atu nei matou te rave angaanga kapiti nei, ia kotou, e auraka kotou e āriki puapinga kore ua i te aroa ua o te Atua ra:

2 (Te karanga ra oki aia e, “Kua akarongo au ia koe i te tuatau tau ra, e kua tauturu atu au ia koe i te rā e oraʼi ra:” i na, teia taua tuatau tau ra, teia taua rā e oraʼi ra.)

3 Kare rava i tuku i te turorianga ki te tangata ravarai, kia kore e akakinoia te taoonga nei;

4 Te akakite ua nei ra matou ia matou uaorai e e rave angaanga na te Atua i te au mea katoa nei, i te akakoromaki maata, i te mate, i te apiapi, i te tumatetenga,

5 I te pāpā, i te tapeka, i te aue, i te angaanga, i te tapapa, i te akakoreanga kai,

6 I te viivii kore, i te kite, i te akakoromakianga roa, i te takinga-meitaki, i te Vaerua Tapu, i te aroa pikikaa kore,

7 I te tuatua-mou, i te mana o te Atua, i te taoonga ra, ko te tuatua-tika, i te rima katau e te rima kaui,

8 I te teitei, e te akaaka, i te rongo kino, e te rongo meitaki: mei te aronga pikikaa ra, e aronga tuatua-mou ra;

9 Mei te mea kare i kitea kua kitea tikaia ra; mei te mea te mate nei, e i na, te ora ua nei rai matou; kua akoia mai, kare rai i taia mate ravaia:

10 Mei te mea te aue nei, kare ra i tivata i te rekareka; mei te mea e putaua, te akariro nei ra te tangata e manganui ei tangata apinga; mei te mea kare rava e puapinga, tei ia matou ra te au mea katoa nei.

11 E to Korinetia e! te karanga ua atu nei to matou vaa ia katou, kua maora ua to matou ngakau.

12 Kare kotou i apiapi ia matou, kua apiapi ra kotou i roto i to kotou uaorai ngakau.

13 E kia pera katoa mai kotou ia matou, (te karanga atu nei au mei te mea e e tamariki kotou naku,) kia maora katoa oki kotou. 14 Auraka kotou e kapitiia ma te tau kore i te aronga akarongo kore ra: eaa to te tuatua-tika tau anga i te tuatua-tika kore? e eaa to te mārama tau anga i te poiri?

15 Eaa to te Mesia tau anga ia Beliala? e eaa to te tangata akarongo ra puapinga i te tangata akarongo kore?

16 E eaa to te nao o te Atua ra aite anga atu i te idolo? ko te nao oki kotou o te Atua ora ra; ta te Atua i tuatua maira e, “E noo tikai au i roto ia ratou, e aaere au i roto ia ratou; e ei Atua au no ratou, e ei tangata oki ratou noku.”

17 E teianei, te na ko mairā Iehova, “E aere mai kotou ki vao, mei roto mai ia ratou ra, kia taka ke kotou, e auraka e rave ua atu i te mea viivii ra;” “e naku e āriki atu ia kotou,

18 E ei Metua au no kotou, e ei tamariki tamaroa kotou naku, e ei tamariki tamaine,” te tuatua mairā Iehova mana katoatoa ra.