Ioane

1 I VAI ana te Logo i muatangana, i te Atua ra oki te Logo, e ko te Atua oki te Logo.

2 I te Atua ra oki aia i muatangana.

3 Nana i anga te au mea katoatoa; kare ua tetai mea i angaia, tei kore i angaia e ia.

4 Tei roto iaia te ora; e taua ora ra, to te tangata ïa mārama.

5 I kakā mai ana te mārama ki te poiri, kare ra te poiri i āriki atu.

6 I tonokia mai tetai tangata mei ko mai i te Atua ra, ko Ioane te ingoa.

7 I aere mai taua tangata ra ei kite, ei akakite i taua mārama ra, kia akarongo te tangata katoatoa iaia.

8 Kare ra aia i taua mārama ra, i aere maira ei akakite i taua mārama ra.

9 Koia te mārama mou, ko te akamārama mai i te tangata katoa i tona aere anga mai ki te ao nei.

10 I te ao nei aia, e nana i anga i teianei ao; kare ra to te ao i kite atu iaia.

11 I aere mai nei aia i ona tikai, kare ra tona iti-tangata tikai i āriki atu iaia.

12 Te aronga katoa ra i āriki atu iaia, i o maira aia i te tika ia ratou kia riro ei tamariki na te Atua, koia te aronga i akarongo i tona ingoa:

13 Te aronga, kare to te toto i anau ei ra, kare oki to te anoano o te kopapa, kare oki to te anoano o te tangata, no te Atua ra.

14 I riro mai nei te Logo ei tangata, e kua puakapa mai ki o matou nei, (kua kite matou i tona kakā, te kakā e tau i te Tamaiti anau tai a te Metua ra) kua ki i te aroa ua e te tuatua-mou.

15 Nona ta Ioane i akakite mai, iaia i kapiki ra, ka na ko mai ei ra e, Koia oki teia taku i karanga ra, Ko te aere mai i muringao iaku nei, kua riro ïa i mua iaku; ko mua oki aia iaku.

16 E no tona ra ki i raukaʼi ia tatou katoa te aroa ua, e te aroa ua.

17 Na Mose oki i tuku mai i te ture, kareka te aroa ua e te tuatua-mou, na Iesu Mesia ïa.

18 Kare ua e tangata i kite i te Atua; ko te Tamaiti anau tai, i runga i te umauma o te Metua ra, koia tei akakite mai iaia.

19 Teia ta Ioane tuatua, i te tono anga mai a te ngati Iuda i te kau taunga ra, e te ngati Levi, no Ierusalema mai, e ui kiaia e, Koai koe?

20 Kua aaki atura aia, kare rava i uuna, aaki ua atura, Kare au te Mesia.

21 Kua na ko maira ratou kiaia, Koai oki? Ko Elia ainei koe? Kua karanga atura aia, Kare au. Ko taua peroveta ra ainei koe? Kua karanga atura aia, Kare.

22 Kua tuatua maira ratou kiaia, Koai koe? ei tuatua anga na matou ki te aronga i tono mai ia matou: eaa ua taau tuatua ia koe uaorai?

23 Kua karanga atura aia, Ko te reo au “no tetai e kapiki aere ki te medebara ra e, Ka akatika ua i te mataara no te Atu,” ko tei karangaia mai e Isaia peroveta ra.

24 No te au Pharisea taua aronga i tonokia maira.

25 Kua ui maira ratou kiaia, na ko maira, Eaa oki koe i bapetizo ei, kare koe i te Mesia, kare oki a Elia, kare oki i taua peroveta ra?

26 Kua karanga aturā Ioane, na ko atura, I bapetizo au ki te vai, te tu ua nei ra tetai i rotopu ia kotou, kare kotou i kite iaia.

27 Koia teia, i miringao aia iaku i te aere anga mai, kua riro aia i mua iaku; kare ïa au e tau kia tatara i te itiki i tona tamaka.

28 Tei Betabara i tera pae Ioridana te tuatua angaia taua tuatua nei, i te bapetizo anga a Ioane ra.

29 E ao akera, kite aturā Ioane ia Iesu i te aere anga mai kiaia ra, e kua na ko akera, Ka akara na i te Punua-mamoe a te Atua, ko tei apai ke atu i te ara a to te ao!

30 Koia teia taku i karanga ra e, Te aere mai nei tetai tangata i muringao iaku nei, e kua riro aia i mua iaku: ko mua rai oki aia iaku.

31 Kareka au, kare au i kite iaia: kia kitea ra aia e to Iseraela, i aere mai ei au e bapetizo ki te vai nei.

32 Kua akakite atura oki a Ioane, na ko atura, Akara atura au i te Vaerua i te eke anga mai mei te rangi mai, mei te kukupa ra te tu, e kua noo iora ki runga iaia.

33 Kare ra au i kite iaia, auraka tei tono mai iaku e bapetizo ki te vai nei, i karanga mai kiaku nei e, Ko taau e akara i te Vaerua i te eke anga mai, e te noo anga ki runga iaia, koia ïa, ko te ka bapetizo ïa ki te Vaerua Tapu.

34 Kite atura oki au, e akakite atura oki au e, ko te Tamaiti teia na te Atua.

35 E ao akera, te tu ua akerā Ioane ma e toko rua puke pipi ana ra;

36 E kite akera aia ia Iesu i te aere anga mai na reira, kua na ko akera, Ka akara na i te Punua-mamoe a te Atua.

37 E kite akera aua nga pipi ra i taua tuatua nana ra, kua aru atura raua ia Iesu.

38 Kua anga mairā Iesu ki miri, kite maira ia raua i te aru anga, kua tuatua maira kia raua, Eaa ta korua e kimi nei? Kua karanga atura raua kiaia, E Rabi, (koia oki te karangaia nei e, e te Orometua, kia kiritiia ra,) e noo koe kiea?

39 Kua tuatua maira aia kia raua, Ka aere mai ka akara. Aere atura raua e kite atura i tona nooanga, e noo atura ki ona i taua rā ra: kua tae oki te ngauru o te ora.

40 E tetai o aua puke tangata toko rua i akarongo i te tuatua a Ioane ra, ko tei aru atu ia Iesu ra, ko Anederea ïa, te taeake o Simona Petero ra.

41 E aravei atura aia i mua i tona uaorai tuakana ia Simona, kua karanga atura aia kiaia, Kua kitea ia maua te Mesia, (koia oki Te Akatainuia kia kiritiia ra.)

42 Kua arataki maira aia iaia kia Iesu ra. E kia akara akerā Iesu iaia ra, kua na ko atura, Ko Simona koe, ko te tamaiti a Iona; ka tapaia koe ia Kepha, koia oki a Petero.

43 E ao akera, kua manako akerā Iesu, ka aere ki Galilea, e kua aravei akera ia Philipa, kua karanga atura kiaia, Ka aru mai iaku.

44 No Betesaidā Philipa, no te oire o Anederea e Petero.

45 E aravei akera oki a Philipa ia Natanaela, kua karanga atura kiaia, Kua kitea e matou ta Mose i tata ki roto i te ture ra, e ta te au peroveta ra, ko Iesu i Nazareta, e tamaiti na Iosepha.

46 Kua tuatua mairā Natanaela kiaia, E meitaki ainei to Nazareta mai? Kua karanga aturā Philipa kiaia, Ka aere mai ka akara.

47 Kua akara aturā Iesu ia Natanaela i te aere anga mai kiaia ra, kua tuatua iora iaia, Ka akara na i te ngati Iseraela tikai, kare ua e pikikaa o roto iaia.

48 Kua tuatua mairā Natanaela kiaia, Noea to kite iaku? Kua karanga aturā Iesu, na ko atura kiaia, Akara atura au ia koe i raro ake i te suke, ou Philipa i karanga atu ei kia koe.

49 Kua tuatua mairā Natanaela kiaia, E Rabi, ko te Tamaiti koe a te Atua; ko te Ariki koe o Iseraela.

50 Kua karanga aturā Iesu kiaia, na ko atura, No te mea i karanga atu au kia koe na e, te akara atura au ia koe i raro ake i te suke ra, i akarongo ei koe: e mea ngiti tena i taau ka kite a muri nei.

51 Kua karanga atura aia kiaia, Tika, tika tikai taku e karanga atu kia kotou, Teia kotou ka kite i te rangi i te mavete anga, e te au angela a te Atua i te kake anga atu, e i te eke anga mai, i runga i te Tamaiti a te tangata nei.