“Auraka e Parukaua To Rima”

“Auraka e parukaua to rima. Ko to Atua ra ko Iehova, tei roto ïa ia koe, ko tei ririnui ia; nana rai e akaora.”​—ZEPHANIA 3:16, 17.

1. Eaa ta tetai tangata apiiia i te Puka Tapu ra i tuatua no runga i te totou a Zephania?

KUA tou mai te totou a Zephania kia mamao ke mai i to te reira tupu anga mua i te itu e te ono anere mataiti M.T.N. I tana tuatua anga no Zephania, kua tata te Poropeta ko C. F. Keil: “Te totou a Zephania . . . kare i akamata ua ma te akakite anga i tetai akava anga no te ao katoa e pini ua ake, no reira maira te akava anga te ka topa ki rungao ia Iuda no tona au ara, e ki runga i te ao o te au pa enua no tona takinga kino i te au tangata o Iehova; mari ra te akakite katoa ra i te ra maata e te mataku o Iehova ra.”

2. Eaa te tu aiteite te vaira i rotopu i te au tu i te tuatau ia Zephania ra e te turanga i roto ia Kerititome i teia tuatau nei?

² I teia tuatau nei, ko te tuku anga tika akavaanga a Iehova kia akaputu i to te au pa enua no te akapou anga na tetai tu maata rava atu i to te tuatau ia Zephania ra. (Zephania 3:8) Ko taua au pa enua te karanga ra e Kerititiano ratou e apa tikai to ratou i te akara anga a te Atua ra. Mei ia Ierusalema i tutaki ra na te akautunga maata no tona tiratiratu kore kia Iehova, no reira ka tutaki katoa a Kerititome i te Atua no tona au tu kaimoumou. Te au akava anga tei tukuia ra ki runga ia Iuda e Ierusalema i te tuatau ia Zephania ra te piri maata atura te ririnui ki te au akonoanga e te au tuanga oki o Kerititome. Kua taviivii katoa oki ratou i te akamori ma na ta ratou au apiianga akangateitei kore i te Atua, e manganui tei akamataia mai i te akonoanga peikani. Kua tuku atinga ratou e au mirioni ua atu ta ratou au tamaroa ora meitaki ra ki runga i te atarau o te tamaki i teia tuatau. Pera katoa oki, kua kairoia e te aronga akatutuia maira e tei noo ki Ierusalema ra tei karangaia ra e Kerititiano ma te akara etu, te au ravenga purepure, e te ainga tau kore taekeanga, te akamaaraara anga i te akamori anga ia Baala.​—Zephania 1:4, 5.

3. Eaa te rauka ra kia tuatuaia no te au arataki e manganui e te au kavamani poritiki i teia tuatau nei, e eaa ta Zephania i totou?

³ E manganui te au arataki poritiki o Kerititome te rekareka ra me kiteia ratou i te are pure. E mei te “ui ariki” o Iuda ra, te akavare ra tetai papaki o ratou i te au tangata mei te “liona ngunguru ra” e te “au luko” taae ra. (Zephania 3:1-3) Te au tavini poritiki o taua aronga ra “ko tei akaki i te are o to ratou pu ki te rave aroa kore e te pikikaa.” (Zephania 1:9) Te tutakiia e te tu viivii te tupu ra. E ko te au kavamani poritiki i roto e i vao ia Kerititome, te tupu ra to ratou numero ‘te akameamea maata ua ra’ ei patoi atu i te au tangata o Iehova tapaota, koia tona Au Kite, ma te akonoanga ia ratou ei tetai “pupu akonoanga” aviriia ra. (Zephania 2:8; Angaanga 24:5, 14) Kua totou a Zephania no taua aronga arataki poritiki katoa ra e te aronga aru ia ratou e: “Kare e tika i to ratou ario e to ratou auro i te akaora ia ratou i te rā o to Iehova riri otooto ra; e pou roa ra te enua katoa i te ai ra o tona vareae: e rave akaope rava oki aia i te aronga ravarai e noo i te enua nei, kare e roaia.”​—Zephania 1:18.

“Ko te Uunaia i te Rā e Riri ei a Iehova Ra”

4. Eaa te akaari maira e e aronga tangata etai te ka ora atu i te ra maata o Iehova ra, inara eaa ta ratou ka tau kia rave?

⁴ Kare ko te katoatoa o te au tangata o Iuda tei akapouia i te itu anere mataiti M.T.N. ra. Mei te reira katoa oki, e aronga etai te ka ora atu i te ra maata o Iehova ra. No taua aronga ra kua akakite a Iehova na roto i tana peroveta ko Zephania: “Kare tei akakoroia i anau; te peke ke nei te rā mei te ota ra; kare kotou i rokoia e te riri viviki o Iehova ra, kare kotou i rokoia e te rā riri o Iehova. E kimi ia Iehova, e te aronga akaaka ravarai o te enua nei, ko tei rave i te tuatua-tau nana ra; e kimi i te tuatua-tika, e kimi i te akaaka peneiake kotou ko te uunaia i te rā e riri ei a Iehova ra.”​—Zephania 2:2, 3.

5. I teia tuatau o te openga nei, koai ma te aronga mua tei akarongo i te akamatakiteanga a Zephania, e akapeea ta Iehova ra taangaanga ia ratou?

⁵ I teia tuatau openga o te ao nei ko te aronga mua tei akarongo i te patianga totouia ra ko te toenga o te au Iseraela vaerua, koia te au Kerititiano akatainuia ra. (Roma 2:28, 29; 9:6; Galatia 6:16) I te kimianga i te tuatua tika e te kimianga i te akaaka e te akaarianga i te akangateitei no ta Iehova ra tuatua tau, kua akaoraia ratou mei roto mai ia Babulonia Maata, koia te patireia o te akonoanga pikikaa o teianei ao, e kua akaoraia mai ki te akaperepere anga tu-Atua i te 1919. Mei reira maira, e e maata oki mei te 1922 mairai, kua rave mataku kore ua teia aronga toenga tiratiratu i te akakiteanga i te au akava anga a Iehova i te au akonoanga e te au pupu akonoanga o Kerititome e te au pa enua poritiki ra.

6. (a) Eaa ta Zephania i totou no te aronga toenga tiratiratu ra? (e) I akapeea te akatupu anga i teia totou?

⁶ Kua totou a Zephania no teia aronga toenga tiratiratu e: “E vaoo ra au i roto ia koe i te au tangata akaaka e te ao, e ka irinaki ratou i te ingoa o Iehova. Kare te toenga o Iseraela e rave i te kino; kare oki ratou e tuatua i te tuatua pikikaa; kare oki e arero pikikaa e kitea i roto i to ratou vaa; ka kaikai oki ratou, e ka akāvai ki raro, e kare ua tetai e akamataku mai.” (Zephania 3:12, 13) Kua tuku tamou teia au Kerititiano akatainuia i te ingoa o Iehova ki mua, e maata oki mei te 1931 maira, i ta ratou mou anga i te ingoa Au Kite o Iehova ra. (Isaia 43:10-12) Na te akamaataanga i te maroanga no to Iehova ngateitei anga, kua akangateitei ratou i te ingoa tu-Atua ra, e kua riro te reira ei tetai akapuanga no ratou. (Maseli 18:10) Kua angai a Iehova ia ratou kia maata te kai vaerua, e kua noo ratou ma te mataku kore i roto i tetai parataito vaerua.​—Zephania 3:16, 17.

‘E Ingoa e te Paapaa i Roto i te Pa Enua Katoa’

7, 8. (a) Eaa tetai atu totou tei akatupuia ra ki runga i te toenga o te Iseraela vaerua ra? (e) Eaa ta te au mirioni ua atu tangata kua kite, e eaa toou uaorai manako i teia tu?

⁷ Kare i manako koreia te piri anga oonu o te aronga toenga ki te ingoa o Iehova e ki te au kaveinga tuatua tika o tana Tuatua. Kua kite te au tangata ngakau tae i te tuke anga i rotopu i te tu akono o te aronga toenga ra e te tu viivii e te pikikaa o te aronga arataki poritiki e te akonoanga o teianei ao. Kua akameitakiia e Iehova “te aronga toenga o te Iseraela [vaerua ra].” Kua akangateitei aia ia ratou ma te apainga i tona ingoa, e kua akariro aia ia ratou kia tuatua meitakiia i roto i te au tangata o te enua katoa nei. Kua tau teia ki tei totouia ra e Zephania: “I taua tuatau ra e akaoki mai ei au ia kotou, i taua tuatau rai e akaputuputu ei au ia kotou: e akatupu oki au i to kotou ingoa, e te paapaa ia kotou, i roto i te pa enua katoa o te enua nei, kia taruri ke au i to kotou tuikaa anga ki mua i to kotou mata, te tuatua mairā Iehova.”​—Zephania 3:20.

⁸ Mei te 1935 maira, e au mirioni tikai te au tangata kua kite e tei runga ta Iehova ra akameitakianga i te aronga toenga ra. Te aru rekareka ra ratou i teia aronga ngati Iuda vaerua, me kare au Iseraela, i te na koanga: “Ka aere katoa tatou: kite akenei oki matou e tei ia kotou te Atua.” (Zekaria 8:23) Te kite nei teia “au mamoe ke atu” i te toenga akatainuia e ko “te tavini akono meitaki e te pakari,” tei akataoongaia ra e Karaiti “ei akaaere i te au apinga [i te enua nei] ravarai nana ra.” Te kaikai akameitaki ra ratou i te kai vaerua tei teateamamaoia e te pupu tavini “i te ora mou ra.”​—Ioane 10:16; Mataio 24:45-47.

9. Eaa te “reo” tei apiiia ra e te au mirioni ua atu tangata kia tuatua, e eaa te angaanga maata ta te au mamoe ke atu e tavini ra “ma te manako okotai” ma te toenga o tei akatainuia ra?

⁹ I te pae mai o te aronga toenga, te apii nei teia aronga mamoe ke atu e au mirioni ua atu kia noo e kia tuatua kia rotai ma te “reo ma.”a Kua totou a Iehova na roto ia Zephania: “Ei reira oki au e tuku atu ei i te [“reo ma,” NW] ki te au tangata nei, kia tautopa katoatoa ratou i te ingoa o Iehova; kia tavini atu ratou iaia ma te manako okotai.” (Zephania 3:9) Ae, te tavini taokotai nei te au mamoe ke atu ia Iehova “ma te manako okotai” ma te au mema akatainuia o te “anana iti” i te angaanga rapurapu o te tutuanga “i te evangelia o te basileia nei, . . . ei kite no te pa enua ravarai.”​—Luka 12:32; Mataio 24:14.

‘E Tae Maira te Ra o Iehova’

10. Eaa tikai ta te toenga o tei akatainuia ra i irinaki marie ana, e eaa ta ratou ka ora atu kia kite ei tetai pupu?

¹⁰ Kua tamou marie te toenga o tei akatainuia ra ki roto i te manako i te tuatua akauruia a te apotetoro ko Petero e: “Kare ua [a Iehova] i akaroaroa i tana i tuatua maira, mei ta tetai pae e karanga ra e, e akaroaroa; e akakoromaki maata ra tona ia tatou, kare rava i anoano e kia mate atu tetai, kia rauka katoatoa ra te tataraara. E tae maira te rā o [Iehova] mei te keia.” (2 Petero 3:9, 10, akaaite ia NW.) Kare te au mema o te pupu o te tavini akono meitaki i manako ekoko no te aere mai anga te ra o Iehova i to tatou tuatau nei. Ka akamata taua ra maata ra ma te rave anga i ta te Atua ra akautunga ki runga ia Kerititome, koia ta Ierusalema i akatutu maira, e te toenga atu o to Babulonia Maata ra.​—Zephania 1:2-4; Apokalupo 17:1, 5; 19:1, 2.

11, 12. (a) Eaa tetai atu tuanga o ta Zephania totou kua akatupuia ki runga i te aronga toenga ra? (e) I akapeea te toenga o tei akatainuia i te akarongo anga i te kapiki, “Auraka e parukaua to rima”?

¹¹ Kua rekareka te aronga toenga tiratiratu ra i te akaora angaia i te 1919 mei te tuikaa anga i te pae vaerua kia Babulonia Maata, koia te patireia akonoanga pikikaa o teianei ao. Kua kite ratou i te tupu anga o te totou a Zephania: “Ka imene, e te tamaine a Ziona; ka maeva, e Iseraela; kia pereperekavana, e kia rekareka ma te ngakau katoa, e te tamaine a Ierusalema. Kua apai keia e Iehova taau ra au utunga; kua akapeke aia i toou ra au enemi; tei roto ia koe ra te ariki o Iseraela, ko Iehova: kare koe e kite akaou i te kino. I taua rā ra ka tuatuaiaʼi Ierusalema, Auraka e mataku; e Ziona e, Auraka e parukaua to rima. Ko to Atua ra ko Iehova, tei roto ïa ia koe, ko tei ririnui ïa; nana rai e akaora.”​—Zephania 3:14-17.

¹² Ma te irinaki anga e te akapapu anga maata e tei roto a Iehova ia ratou, kua aere ua atu te toenga o tei akatainuia ra ma te mataku kore i te akatupu anga i ta ratou angaanga tu-Atua ra. Kua tutu aere ratou i te tuatua meitaki o te Patireia e kua akakite i ta Iehova au akavaanga i to Kerititome, te toenga atu o Babulonia Maata, e te toenga atu o te akatereanga kino a Satani no te au mea nei. Na roto atu i te au tu ngata katoa, i te au raungauru mataiti mei te 1919 maira, kua akarongo ratou i te akauenga tu-Atua ra: “Auraka e mataku; e Ziona e, Auraka e parukaua to rima.” Kare ratou i tuku ua i to ratou au rima ki raro i te tuaanga i te au pirioni ua atu aenga pepa, au makatini, au puka, e te au puka rikiriki akakiteanga i te Patireia o Iehova. Kua riro ratou ei akaraanga akauru anga akarongo ki te au mamoe ke atu ra tei aere mai ki to ratou tua mei te 1935 mairai.

“Auraka e Parukaua To Rima”

13, 14. (a) Eaa ra tetai pae o te ngati Iuda i unui ei ki muri mei te tavinianga ia Iehova, e i akapeea teia i kiteiaʼi? (e) Eaa te mea pakari kore no tatou kia rave, e eaa te angaanga kare tatou e tau kia tuku i to tatou rima kia parukaua?

¹³ Ia tatou ‘e tapapa atura’ i te ra maata o Iehova, akapeea e raukaʼi ia tatou te tauturu tau mei te totou mai a Zephania ra? Te mea mua, ka tau tatou kia matakite kia kore e riro mei te au ngati Iuda i te tuatau ia Zephania tei unui ra ki muri i te aruanga ia Iehova no to ratou manako ekoko anga no te vaitata anga mai te ra o Iehova. Kare ra taua aronga ngati Iuda ra i tuatua akakite atea mai i to ratou ekoko anga, inara na ta ratou tu rave anga i akakite e kare ratou i irinaki tikai e kua vaitata te ra maata o Iehova ra. Kua rave maroiroi ratou i te akaputu anga apinga kare ra i tamou marie i ta ratou uaorai tapapa anga ia Iehova.​—Zephania 1:12, 13; 3:8.

¹⁴ Kare teia tuatau i te tuatau no te tuku i te au ekoko anga kia akaia ki roto i to tatou au ngakau. Ka riro ei pakari kore tikai kia akaroa atu i roto i to tatou manako me kare ngakau i te aere mai anga o te ra o Iehova ra. (2 Petero 3:1-4, 10) Ka tau tatou kia kopae ke i te unuianga ki muri i te aruanga ia Iehova me kare i ‘te tukuanga i to tatou rima kia parukaua’ i tana angaanga. Te kapiti nei teia i te kore e “angaanga ma te rima akatau” i ta tatou tutu anga i “te tuatua meitaki.”​—Maseli 10:4; Mareko 13:10.

Maroanga i te Manako Kore Anga

15. Eaa te ka akariro ia tatou kia tuku ua i to tatou rima kia topa i te tavini anga ia Iehova, e i akapeea te totou anga i teia manamanata i roto i te totou a Zephania ra?

¹⁵ Te rua, ka tau tatou kia paruru atu i te au tupu anga akaparuparu o te tu manako kore. I te au enua e manganui o te Opunga Ra, ka rauka i te manako kore i te au tumu i te pae vaerua kia riro ei tumu no te maroiroi kore i roto i tetai pae o te aronga tutu aere i te tuatua meitaki. Kua vairai taua tu manako kore ra i te tuatau ia Zephania. Kua akakite mai a Iehova na roto ia Zephania e: “E akautunga atu au i te au tangata . . . tei karanga i to ratou ngakau e, Kare a Iehova e rave i te meitaki, kare rai oki aia e rave i te kino.” (Zephania 1:12) I te tataanga i teia tuanga tuatua i roto i te Cambridge Bible for Schools and Colleges, kua karanga a A. B. Davidson e te taiku ra te reira i te au tangata tei “tomo ra ki raro ki roto i te tu manako kore me kare ki roto i te irinaki anga kore no runga i tetai ua atu tamanata mai a tetai mana teitei i te au ravenga a te tangata nei.”

16. Eaa te tu o te manako te vaira i roto i te au mema e manganui o te au akonoanga Kerititome ra, inara eaa te akamaroiroi anga ta Iehova e oronga maira kia tatou?

¹⁶ Ko te tu manako kore ua ko te tu akono matauia ia i teia tuatau nei i te au tuanga e manganui o te enua, e maata oki i te au pa enua apinganui. Noatu ko te au mema o te au akonoanga o Kerititome kare ua e irinaki ana e ka tamanata mai te Atua ko Iehova i te au ravenga a te tangata nei i to tatou tuatau. Ka akakore ua atu ratou i ta tatou tauta anga kia itae atu kia ratou ma te tuatua meitaki o te Patireia me na tetai katakata irinaki kore ua me kare na tetai tuatua tapoto ua mai e “Kare au e inangaro atu ana!” I raro ake i teia au tu, e akaaoanga tikai te akakoromaki marie anga i te angaanga akakitekite aere. Ka timata ia i to tatou akakoromaki anga. Inara na te totou a Zephania, te akamaroiroi maira a Iehova i tona au tangata tiratiratu, i te na ko anga: “Auraka e parukaua to rima. Ko to Atua ra ko Iehova, tei roto ïa ia koe, ko tei ririnui ïa; nana rai e akaora; e rekareka aia i runga ia koe ma te pereperekavana, e noo marie aia i roto i tona aroa; e rekareka aia i runga ia koe ma te imene.”​—Zephania 3:16, 17.

17. Eaa te akaraanga meitaki te ka tau te aronga ou i roto i te au mamoe ke atu ra kia aru, e ka akapeea ra?

¹⁷ Ko te tika ra i te tuatua enua o te au tangata o Iehova i teia tuatau nei e ko te aronga toenga, pera katoa te aronga kua pakari i roto i te au mamoe ke ra, kua oti ia ratou tetai angaanga akaputuanga maata i teia tuatau openga nei. Kua akaari teia au Kerititiano tiratiratu i te akakoromaki anga i te au raungauru mataiti kua topa. Kare ratou i tuku i te tu manako kore o te tuanga maata ra i roto ia Kerititome kia akamaroiroi kore ia ratou. No reira auraka katoa oki e tuku te aronga ou i roto i te au mamoe ke kia akangakau kore ia ratou uaorai na te tu manako kore ki te au apinga i te pae vaerua te tupu maata nei i teia tuatau i te au enua e manganui. Auraka ratou e tuku i to ratou ‘rima kia parukaua,’ me kare kia topa ua. E taangaanga ratou i te au tuatau ravarai ei oronga anga i Te Punanga Tiaki, te Awake!, e etai atu au puka meitaki tei akapapa taka keia ei tauturu i te au tangata tu mamoe ra kia kite i te tuatua mou no te ra o Iehova e te au akameitakianga te ka aru mai.

E Aere ki Mua i te Tapapaanga i Taua Ra Maata Ra!

18, 19. (a) Eaa te akamaroiroi anga kia akakoromaki marie ta tatou ka kite ia Mataio 24:13 e ia Isaia 35:3, 4 oki? (e) Akapeea tatou me akameitakiia me aere taokotai tatou ki mua i te angaanga a Iehova ra?

¹⁸ Kua tuatua maira Iesu: “Kareka te tāpu tikai e tae ua atu ki te openga ra, ka ora ïa.” (Mataio 24:13) No reira, kare te “rima apikepike” me kare ‘te turi ru ua’ ia tatou e tatari ra i te ra maata o Iehova! (Isaia 35:3, 4) Te akapapu ua maira te tuatua a te totou a Zephania no runga ia Iehova e: “Ko tei ririnui ïa; nana rai e akaora.” (Zephania 3:17) Ae, na Iehova e akaora i te “aronga maata” na roto i te tuanga openga o “te mate maata,” me ikuiku aia i tana Tamaiti kia akaungaungatiti roaia te au pa enua poritiki tei “akateitei ia ratou uaorai” i tona au tangata ra.​—Apokalupo 7:9, 14; Zephania 2:10, 11; Salamo 2:7-9.

¹⁹ I te akavaitata anga mai te ra maata o Iehova ra, e aere maroiroi ua atu tatou ki mua, ma te tavinianga iaia “ma te manako okotai”! (Zephania 3:9) Na te rave anga i teia, ei reira tatou e te manganui ua atu ka tau ei kia “uunaia i te rā e riri ei a Iehova ra” e ka kite i te akatapu anga o tona ingoa tapu.

[Tataanga Rikiriki i Raro]

E Akara Akaou Anga

◻ I teea au tu te turanga akonoanga i roto ia Kerititome i aiteite ei ki te tuatau ia Zephania ra?

◻ Akapeea te au arataki poritiki e manganui i aite atu ei ki te ui ariki i te tuatau ia Zephania ra?

◻ Eaa te au taputou i roto ia Zephania ra tei akatupuia ki runga i te aronga toenga?

◻ Eaa ta te au tangata e au mirioni ua atu te kite nei i teianei?

◻ Eaa i kore ei tatou e tau kia tuku i to tatou nga rima kia topa ki raro i te angaanga a Iehova ra?

[Au Tutu i te kapi 15]

Mei ia Zephania rai, kua rave mataku kore ua te toenga tiratiratu o te au Kerititiano akatainuia ra i te akakiteanga i te au akavaanga a Iehova ra

[Au Tutu i te kapi 18]

Kare te “au mamoe ke atu” i tuku i te au tu manako kore o te au tangata ra kia akamaroiroi kore ia ratou