Te Oronga Anga Tei Akamareka i te Atua

TE REKAREKA ra a Iesu e tana au pipi i tetai kaikaianga meitaki i Betania ma te au oa piri vaitata e manganui, kapiti mai ia Maria, Mareta, e Lazaro tei akatuakaou uaia akenei. Te rave mai anga a Maria i tetai paunu manongi oko maata e kua akatainu i te vaevae o Iesu, kua riri a Iuda Ikariota e kua tuatua maira. “Eaa teianei manongi i kore ei i okoiaʼi i te denari kia toru ake te anere [aiteite ki te moni tutaki no te mataiti okotai], apai atu ei na te putaua ra?” i patoi ei aia. Kua viviki tetai papaki i te rave mai i te au akaapaanga mei te reira rai.​—Ioane 12:1-6; Mareko 14:3-5.

Inara, kua pau atura a Iesu e: “Vaio ua atu iaia. . . . Te noo tamou nei te putaua ki o kotou nei; e kia inangaro ra, e tika ïa kia takinga-meitaki atu: ko au nei ra, kare au e noo tikai ki o kotou.” (Mareko 14:6-9) Kua apii te au arataki akonoanga ngati Iuda e ko te orongaanga tauturu kare ei mea meitaki ua mari ra ka rauka katoa i te tapoki i te au ara. I tetai tua, kua akataka meitaki a Iesu e ko te oronga anga te akamareka ra i te Atua kare i kotinga uaia ki te au apinga orongaanga tauturu ki te putaua.

Na te akara anga poto i te mataara i raveia ai te oronga anga i roto i te putuputuanga Kerititiano mua e akakite mai ei i etai au mataara tau te ka rauka ia tatou i te akaari i to tatou manako e te akamareka anga i te Atua ma ta tatou oronga anga. Ka akataka katoa mai te reira i tetai tu takake no te oronga anga te akatupu ra i te meitaki maata.

Ka “Oronga Atu Ei”

I te au atianga e manganui kua akamaroiroi a Iesu i tana au pipi kia “oronga atu ei.” (Luka 12:33) Inara, kua akamatakite maira a Iesu, no runga i te akaariari anga tei akakoro uaia kia akakakaia te tangata oronga ra kare ra i te Atua. “Kia oronga ra koe i taau apinga aroa,” i karanga ai aia, “auraka e na mua i te akatangi i te pu, mei ta te aronga pikikaa, i roto i te au sunago, e i te au arataa ra, kia akameitakiia ratou e te tangata.” (Mataio 6:1-4) Na te akono anga i teia akoanga, kua kopae te au Kerititiano mua i te tu tapu akamea ua a te au arataki akonoanga maata i to ratou tuatau e kua iki i te tauturu i te aronga tei anoano ra na te rave anga i te au angaanga me kare te oronga anga i te au apinga oronga ua.

Ia Luka 8:1-3, ei akatauanga, kua akakiteia mai kia tatou e kua taangaanga a Maria Magadala, Ioana, Susana, e tetai papaki i ta “ratou apinga” i te matuapuru anga kia Iesu e ki tana au apotetoro. Noatu e kare teia au tangata nei i ngere ana, kua akaruke ratou i ta ratou au angaanga kia akara tikai ratou ki te au tauta anga takake ki runga i te angaanga orometua. (Mataio 4:18-22; Luka 5:27, 28) Na te tauturu anga ia ratou kia akaoti i ta ratou tuku anga angaanga orongaia mai e te Atua, i taua tu rai, ko teia au vaine nei, te akakaka ra i te Atua. E kua akaari te Atua i tana arikianga na te akaora anga i tetai rekoti o to ratou tu oronga anga aroa i roto i te Pipiria kia tatauia e te au uki katoatoa i te tuatau ki mua.​—Maseli 19:17; Ebera 6:10.

Ko Doreka tetai vaine meitaki tei ‘ki i te angaanga meitaki e te oronga i te apinga.’ Kua maani aia i te au kakau no te au takaua tei anoano ra i roto i tona taoni i te pae taatai ia Iopa. Me nana uaorai i oko i te au kakau katoatoa ra e me te angaanga ra aia e kare e tutakiia mai, kare tatou e kite. Noatu rai, kua akaperepereia aia no tana angaanga meitaki e te aronga tei tauturuia e ia, pera katoa ki te Atua, tei akameitaki aroa mai i tana angaanga meitaki.​—Angaanga 9:36-41.

E Puapinga te Akakeu Anga Tau

Na teaa i akakeu i teia aronga kia oronga atu? Kua tere atu te reira i te manako tangi aroa tei akamataia e tetai pati anga manako ngakau no te tauturu anga. Kua kite ratou i te apainga manako ngakau kia rave i tei rauka ia ratou i te rave i te au ra taki tai i te tauturu i te aronga te kite ra i te putaua, te tu kino, te makimaki, me kare tetai ua atu au tu ngata. (Maseli 3:27, 28; Iakobo 2:15, 16) Ko teia te tu oronga anga te akamareka ra i te Atua. Kua akakeu maata ia te reira e te aroa oonu no te Atua e te inangaro anga kia aru i tona tu aroa e te meitaki.​—Mataio 5:44, 45; Iakobo 1:17.

Kua akakite mai te apotetoro ko Paulo i teia tu puapinga no te oronga anga i te uianga aia e: “Te tangata ra tei iaia te apinga o teianei ao, e kite atura aia i tona taeake i te ngere anga, e karapii atura tona ngakau iaia, teiea te anoano i te Atua i te noo anga i roto iaia?” (1 Ioane 3:17) Te kite pu ia ra te pau anga. Te aroa no te Atua te akakeu ra i te au tangata kia oronga i te apinga. Te ariki ra e te tutaki ra te Atua i te aronga, mei iaia rai, te akaari ra i te vaerua oronga anga. (Maseli 22:9; 2 Korinetia 9:6-11) Te kite ra ainei tatou i teia tu no te oronga anga i teia tuatau? E akamanako ana i tei tupu ua akenei i roto i tetai putuputuanga a te Au Kite o Iehova.

Te anoano pakariia ra te ripea no te are o tetai vaine Kerititiano ruaine. Koia anake ua i tona kainga e kare e ngutuare tangata i te tauturu iaia. I roto i te au mataiti, e vai akatuera ua ana i tona kainga kia raveaia te au uipaanga Kerititiano, e putuputu te taime e oronga ana aia i tana kai ma tetai ke tei ariki mai i tana patianga. (Angaanga 16:14, 15, 40) I te kite anga i tona manamanata, kua kapiti taokotai mai te au mema o te putuputuanga i te tauturu. Kua oronga etai i te au moni, ko tetai papaki kua rave ratou i te angaanga. Tere atu i te au epetoma tokoiti ua, kua tuku te aronga tauturu i tetai tapoki ou no te are, kua maani i tetai are pai ou, kua paraiia e kua peniia te katoa anga o te taua mua, e kua maani i te au kaparata ou i roto i te ngai tunu anga kai. Ta ratou oronga anga kare i akamerengo ua i te anoano o te vaine ra kareka ra kua akapiri vaitata katoa i te putuputuanga e kua akamareka i te au tangata tupu ra ei akaraanga no te oronga anga Kerititiano mou.

E manganui te au mataara te ka rauka ia tatou uaorai i te tauturu i tetai papaki. Ka rauka ainei ia tatou i te akapou i te tuatau ma te tamaiti me kare ki te tamaine kare e metua? Ka rauka ainei ia tatou i te rave i tetai okooko anga me kare te tui kakau no tetai ruaine takaua ta tatou i kite? Ka rauka ainei ia tatou i te tunu i tetai kai me kare i te tauturu i te oronga atu i tetai moni ki tetai tangata kare e rava ana te moni? Kare e anoanoia kia apinganui tatou i te tauturu atu. Kua tata te apotetoro ko Paulo e: “Te vai ra oki te tika i te ngakau, e ārikiia ïa ta te tangata i rauka ra, kare i tei kore i rauka iaia ra.” (2 Korinetia 8:12) Inara, ko taua oronga anga uaorai ainei, te oronga anga ta te Atua ka akameitaki? Kare.

Akapeea ra te Akapapa Anga Tauturu?

I tetai au taime kare e rava ana te au tauta anga. Ko te tika, kua akono a Iesu e tana au pipi i tetai moni noa ua na te putaua, e kua ariki ratou i te au akaputuanga a te au tangata e manako maira ta ratou i aravei ana i roto i ta ratou angaanga. (Ioane 12:6; 13:29) Pera katoa, kua rave te au putuputuanga o te anere mataiti mua i te koi anga me tupu mai te anoano anga e kua akapapa i te tauturu anga maata.​—Angaanga 2:44, 45; 6:1-3; 1 Timoteo 5:9, 10.

Kua tupu mai tetai o taua atianga i te 55 T.N. Kua topa te au putuputuanga i Iudea ki roto i te putaua, penei ake tei tupu mai no te onge maata i tupu ua akenei. (Angaanga 11:27-30) Ko te apotetoro ko Paulo, e manako ua ana i te putaua, kua pati atu i te tauturu a te au putuputuanga tei mamao ke atu ki Makedonia. Nana uaorai i akapapa i tetai koi anga e kua taangaanga i te au tangata tei akatikaia kia apai i te reira. (1 Korinetia 16:1-4; Galatia 2:10) Kare aia e kare tetai atu papaki i rave mai i te tutaki anga no ta ratou angaanga.​—2 Korinetia 8:20, 21.

E viviki katoa te Au Kite o Iehova i teia tuatau i te tauturu me tupu te tumatetenga. I te tuatau maana i te 2001, ei akatauanga, kua akatupuia e te uriia pakari te vaipuke maata i Houston, Texas, U.S.A. Te katoaanga, e 723 kainga o te Au Kite tei kino i roto i tetai au tu, e maata tei kino tikai. Kua akapupu vivikiia tetai kumiti tauturu no te tumatetenga kapiti mai anga te aronga pakari Kerititiano tau kia akarakara i te au anoano o te aronga tataki tai e kia oronga atu i te au moni tauturu i te tauturu i te Au Kite o te reira ngai kia autu i te turanga e kia ripea i to ratou au are. Na te aronga puareinga tauturu ra mei te au putuputuanga i te pae mai i rave i te au angaanga katoatoa. Kua rekareka tikai tetai Kite i te tauturu e te rauka anga mai iaia te tutaki anga no ko mai i tana kamupani initurini ra i tutaki i te au ripea o tona are, kua oronga viviki atu aia i te moni ki te tauturu anga moni kia rauka i te reira i te tauturu i tetai papaki tei anoano ra.

Inara, me tae mai ki te orongaanga akaaereia, te anoanoia ra tatou kia matakite ia tatou e uriuri manako ra no te au pati anga e manganui tei tukunaia mai kia tatou. Ko etai au akaaerenga orongaanga e akapouanga moni tikai ta ratou akaaere anga me kare e akapouanga moni tikai no te kimi moni, e tuanga meangiti ua tei toe mai o te moni i koiia i akakoroia. Te karanga ra a Maseli 14:15 e: “Te akarongo ra te kite kore i te au tuatua katoa ra: te akara meitaki ra te tangata akono ra i tona takainga.” No reira e mataara pakari ia kia akara matatio tikai i te au tika.

Te Oronga Anga te Akatupu ra i te Meitaki Maata

Te vaira tetai tu oronga anga e puapinga maata atu i to te orongaanga tauturu. Kua taiku atu a Iesu ki teia i te ui mai anga tetai tutara apinganui ou ra e eaa tana ka rave kia rauka te ora mutu kore. Kua karanga atura a Iesu kiaia e: “Ka aere ka oko i taau apinga, ka apai atu ei na te putaua; e apinga taau i reira i te rangi; ka aere mai ei ka aru mai iaku.” (Mataio 19:16-22) E akara ana e kare a Iesu i karanga ua e, ‘E apai atu na te putaua e ka rauka ia koe te ora mutu kore.’ Kareka ra, kua karanga atu aia e, “Ka aere mai ei ka aru mai iaku.” I roto i tetai atu au tuatua, noatu e e akameitaki anga e e puapinga te au angaanga orongaanga tauturu, e maata atu te o maira i te riro mai anga ei pipi Kerititiano ra.

To Iesu manako maata ko te tauturu anga i tetai papaki i te pae vaerua. I muri poto ua ake i tona matenga, kua akakite aia kia Pilato e: “I anau mai ei au nei, i aere mai ei au ki te ao nei, e akakite i te tuatua-mou.” (Ioane 18:37) Iaia e arataki ra i te tauturu anga i te putaua, te rapakau anga i te maki, e te angai anga i tei onge, kua tereni tikai a Iesu i tana au pipi kia tutu aere. (Mataio 10:7, 8) Ko te tika, i roto i tana au ikuikuanga openga kia ratou ko te akauenga e: “E akariro i to te pa enua katoa ei pipi.”​—Mataio 28:19, 20.

Ae, kare te tutu anga i akatikatika ana i te au manamanata katoatoa o te ao. Inara, te tua anga i te tuatua meitaki no te Patireia o te Atua ki te au tangata ravarai te akakaka ra i te Atua no te mea te akatupu ra te tutu anga i te anoano o te Atua e te akatuera ra i te mataara ki te au akameitakianga mutu kore no te aronga tei ariki mai i te karere tu-Atua. (Ioane 17:3; 1 Timoteo 2:3, 4) Eaa ka kore ei e akarongo atu ki ta te Au Kite o Iehova ka tuatua mai me atoro mai ratou i tetai ua atu tuatau? Te aere maira ratou ma tetai apinga oronga i te pae vaerua. E kua kite ratou e ko teia te mataara meitaki roa atu te ka rauka ia ratou i te oronga atu kia koe.

[Au Tutu i te kapi 6]

E manganui te au mataara kia akaari e te manako ra tatou

[Tutu i te kapi 7]

Te akamareka ra ta tatou tutu anga i te tuatua meitaki i te Atua e te akatuera ra i te mataara ki te au akameitakianga mutu kore