Au Taeake Mapu​—Kia Riro Mai ei Kerititiano Tukatau

1. Eaa ta tetai tane Kerititiano ka rave?

KUA oronga te Ariki ko Davida i teia ikuikuanga ki tana tamaiti ko Solomona: “E akamaroiroi, e akatangata tikai koe.” (1 Ari. 2:​1-3) Ka anoanoia te au tane Kerititiano kia aru i teia ikuikuanga. Ka akono ratou i te au ture a te Atua e ka taangaanga i te au kaveinga Pipiria i roto i to ratou oraanga. (Luka 2:52) Eaa i puapinga ai no te au tane mapu kia riro mai ei Kerititiano tukatau?

2-3. Eaa i puapinga ai kia riro mai tetai taeake mapu ei Kerititiano tukatau?

² E manganui te au apainga a tetai taeake i roto i tona ngutuare e te putuputuanga. E te au taeake mapu, i akamanako ana koe i te au apainga ka rauka ia koe a te tuatau ki mua? Penei ka inangaro koe i te riro mai ei painia tamou, ei tavini tauturu e ei tangata pakari. Penei ka iki koe i te akaipoipo e te riro mai ei metua tane. (Ephe. 6:4; 1 Timo. 3:1) Kia taeria teia au akakoroanga, ka anoanoia koe kia riro mai ei Kerititiano tukatau.b

³ Eaa te ka tauturu ia koe? Ka anoanoia koe kia apii i te au tu kite karape. Akapeea koe me akapapa i teianei no te au apainga puapinga taau ka akono a te tuatau ki mua?

AU TAKAINGA KIA RIRO MAI EI KERITITIANO TUKATAU

4. Ka kitea te au akaraanga meitaki noou kiea? (Akara katoa i te tutu.)

⁴ Aru i te au akaraanga meitaki. E maata te au tane i roto i te Pipiria tei riro ei akaraanga meitaki no te au taeake mapu. E tu akono Atua to ratou e te kite karape i te arataki i tona iti tangata. E au akaraanga meitaki katoa tetai i roto i toou ngutuare e te putuputuanga. (Ebe. 13:7) E ko te akaraanga meitaki rava atu, ko Iesu Mesia. (1 Pete. 2:21) E apii meitaki i to ratou akaraanga e kia akamanako akapeea me aru i to ratou tu meitaki.—Ebe. 12:​1, 2.

5. Akapeea e rauka ai te tu akono, e eaa i puapinga ai te reira? (Salamo 119:9)

⁵ Kia rauka te tu akono. (Mase. 3:21) Ka tauturu te tu akono i tetai tangata kia akamanako i mua ake ka rave ei i te ikianga. No reira, e tauta pakari i te akatupu e te akaari i te tu akono. No teaa ra? No te mea ko te au mapu tane o teianei ao, ka rave ratou i te ikianga ma te akamanako ua ia ratou uaorai. (Mase. 7:7; 29:11) Pera katoa ka riro te tivi, te au teata, te initaneti e te social media ei akatere i to ratou oraanga e ta ratou e rave ra. Akapeea koe me akatupu i te tu akono? E akamata na te apii anga i te au kaveinga Pipiria e te akamanako i te puapinga o te reira noou. E oti, e taangaanga i teia au kaveinga kia rave i te au ikianga te ka akamareka ia Iehova. (E tatau ia Salamo 119:9.) Ka tauturu maata te reira ia koe kia riro mai ei Kerititiano tukatau. (Mase. 2:​11, 12; Ebe. 5:14) Akapeea te tu akono me tauturu ia koe i roto i teia nga turanga: (1) toou tu i mua i te au tuaine e te (2) toou akamanea anga.

6. Akapeea te tu akono me tauturu i tetai taeake mapu kia akangateitei i te au tuaine?

⁶ Ka tauturu te tu akono ia koe kia akangateitei i te vaine. Kare i te mea tarevake no tetai taeake mapu kia akatupu i te pirianga ki tetai tuaine Kerititiano. Inara, ka tauturu te tu akono iaia kia kore e tuatua, tata e te rave i tetai ua atu angaanga te ka taki atu i te tuaine kia manako e te akainangaroia ra aia, inara te akameamea ua ra te taeake iaia. (1 Timo. 5:​1, 2) E me aere kapiti raua ko tetai tuaine, ka akapapu te taeake e kare raua e noo ko raua anake ua.—1 Kori. 6:18.

7. Akapeea te tu akono me tauturu i tetai taeake mapu kia iki i tona kakau e te akamanea anga?

⁷ Tetai mataara ke ka akaari te taeake mapu i te tu akono, na roto i tona akamanea anga. Te aronga na ratou e maani i te kakau ou e te tu akamanea, kare o ratou akangateitei ia Iehova e e oraanga tau kore to ratou. Ka kitea to ratou manako tau kore me aao ratou i te kakau pipiri e me akamanea mei te vaine rai. Me akamanea tetai taeake mapu tei inangaro kia riro mai ei Kerititiano tukatau, ka aru aia i te au kaveinga Pipiria e te au akaraanga meitaki i roto i te putuputuanga. Ka ui aia kiaia uaorai: ‘Te akaari ra ainei toku kakau e te akamanea i te tu akono meitaki e te akangateitei no tetai ke? Me akara mai te tangata i toku kakau e te akamanea anga, ka kite ainei ratou e e tavini au no te Atua?’ (1 Kori. 10:​31-33; Tito 2:6) Me akaari tetai taeake mapu i te tu akono, ka akangateiteiia aia e tona au taeake e te au tuaine e pera katoa, tona Metua i te rangi.

8. Akapeea tetai taeake mapu me akatupu i te tu irinakiia?

⁸ Kia irinakiia. Ka akono meitaki tetai taeake irinakiia i tana au apainga. (Luka 16:10) Akamanako i te akaraanga meitaki rava atu ko Iesu. Kare aia i te tangata mako kore mari ra, kua akono meitaki aia i te au apainga pouroa ta Iehova i oronga, noatu te ngatā. E inangaro to Iesu i te tangata e tana au pipi e kua oronga i tona oraanga no ratou. (Ioa. 13:1) E aru i to Iesu akaraanga na te rave meitaki anga i te angaanga tei orongaia kia koe. Me kare e papu ia koe akapeea me rave i te reira, e pati i te tauturu a te au taeake tukatau. Auraka e kopē i te angaanga. (Roma 12:11) Mari ra, e akaoti meitaki i taau angaanga e “e rave ïa ma te ngakau katoa, mei te mea e na te Atu [ko Iehova], eiaa e na te tangata.” (Kolo. 3:23) E akamaara katoa e aronga apa ua tatou, no reira kia akaaka e kia akakite i toou au tarevake.—Mase. 11:2.

APII I TE AU TU KITE KARAPE

9. Eaa ra tetai taeake mapu ka apii ei i te au tu kite karape?

⁹ Kia riro mai ei Kerititiano tukatau, ka anoanoia te au tu kite karape. Ka tauturu tera ia koe kia akono i te au apainga i roto i te putuputuanga, te kimi i te ngai angaanga ei akono ia koe e toou ngutuare, e te akatupu i te pirianga meitaki ki tetai ke. E akamanako ana i teia au tu kite karape.

10-11. Me apii tetai taeake i te tatau e te tata, akapeea aia e te putuputuanga me puapingaia? (Salamo 1:​1-3) (Akara katoa i te tutu.)

¹⁰ Apii i te tatau e te tata meitaki. Karanga te Pipiria e ka mataora te tangata tei akapou i tona taime i te au rā no te tatau e te akamanako i te Tuatua a te Atua. (E tatau ia Salamo 1:​1-3.) Me tatau koe i te Pipiria i te au rā, ka kite koe i to Iehova manako. Ka tauturu te reira ia koe kia akamanako meitaki e kia taangaanga i te au irava. (Mase. 1:​3, 4) E ka anoanoia te au tane kia rave i te reira i roto i te putuputuanga. No teaa ra?

¹¹ Ka akara te au taeake e te au tuaine ki te au tane tukatau no te aratakianga e te apiianga a te Pipiria. (Tito 1:9) Me kite koe i te tatau e te tata meitaki, ka rauka ia koe i te akapapa i te au akoanga e te au pauanga te ka akamaroiroi i te au taeake. Ka rauka katoa ia koe te tata i te au manako puapinga mei taau uaorai apii e mei te au akoanga i ko i te au uipaanga, akaputuputuanga e te uruoaanga. Ka tauturu teia au tataanga ia koe kia akamatutu i toou akarongo e kia akamaroiroi i toou au taeake.

12. Eaa te ka tauturu ia koe kia karangaranga meitaki?

¹² Apii i te karangaranga meitaki. Ka anoanoia tetai tane Kerititiano kia karangaranga meitaki. E rauka ai teia tu kite karape, ka tau aia kia akarongo meitaki e kia āriki i te manako o tetai ke. (Mase. 20:5) Ka apii aia kia akarongo meitaki ki te tangi anga o te reo e te akara i te tutu mata e te tu o tetai tangata. Kare koe e apii i teia tu kite karape me kare koe e akapou i te taime ki te tangata. Me taangaanga ua koe i te apinga electronic no te karangaranga mei te tata imere e te tuku karere, ka ngatā ia koe i te pukapuka atu ki te tangata. No reira, e kimi i te au atianga no te pukapuka ki tetai ke.—2 Ioa. 12.

13. Eaa atu ta tetai taeake mapu ka rave? (1 Timoteo 5:8) (Akara katoa i te tutu.)

¹³ Apii i te akono ia koe uaorai. Ka anoanoia tetai tane Kerititiano kia akono iaia uaorai e tona ngutuare. (E tatau ia 1 Timoteo 5:8.) I tetai au enua, ka apii te au taeake mapu i te angaanga mei to ratou metua e tetai o te kopu tangata. I te au enua ke, ka apii te tane mapu i tetai tu kite karape iaia e aere ra ki te apii tua rua. Noatu eaa toou turanga, e mea meitaki kia apii i tetai tu kite karape kia rauka mai tetai ngai angaanga naau. (Anga. 18:​2, 3; 20:34; Ephe. 4:28) No reira, e angaanga pakari e e akaoti meitaki i taau angaanga. Ka kite mai te tangata i te reira e ka akameitaki ia koe. Ka tauturu katoa tera ia koe kia rauka mai tetai ngai angaanga e kia akono i te reira. Ka riro te au tu e te kite karape ta tatou i uriuri ei tauturu i tetai taeake mapu no te tuatau ki mua. Ka uriuri tatou i teia au apainga.

AKAPAPA NO TE TUATAU KI MUA

14. Akapeea tetai taeake mapu me akapapa no te angaanga tavini tamou?

¹⁴ Tavini tamou. E maata te au tane tukatau tei rave i te angaanga tavini tamou i to ratou mapuanga. Ka tauturu te angaanga painia i tetai taeake mapu kia angaanga kapiti ki te aronga tukeke. Ka tauturu katoa te reira iaia kia akaputu e te akaravarava i tana moni. (Phili. 4:​11-13) Tetai ravenga meitaki no te akamata i te angaanga tavini tamou, ko te painia tauturu. E manganui tei painia tauturu no tetai tuatau, kua riro mai ei painia tamou. Ka tauturu te angaanga painia ia koe kia rave i te au tuanga ke o te angaanga tavini tamou, mei te angaanga pātu e te aere ki Betela.

15-16. Akapeea tetai taeake mapu me riro mai ei tavini tauturu e ei tangata pakari?

¹⁵ Tavini tauturu me kore tangata pakari. Ka tau te au tane Kerititiano kia akanoo i te akakoroanga no te tavini ei tangata pakari. Kua akataka te Pipiria ia ratou ei aronga tei “inangaro . . . i te angaanga meitaki.” (1 Timo. 3:1) I mua ake ka tavini ei te taeake ei tangata pakari, ka tau aia kia riro mai ei tavini tauturu. Ka tauturu ratou i te aronga pakari kia akono i te au taeake e te au tuaine. Ka tavini akaaka te aronga pakari e te au tavini tauturu i te putuputuanga e ka rave maroiroi i te angaanga tutu aere. Ka rauka i tetai taeake mapu mei te 17 ki te 19 mataiti kia riro mai ei tavini tauturu. E ka rauka i tetai tavini tauturu tukatau mei te 20 tuma mataiti kia tavini ei tangata pakari.

¹⁶ Akapeea koe me riro mai ei tavini tauturu e ei tangata pakari? Te oronga maira te Pipiria i te au tu te ka anoanoia. Kua akatumuia te reira ki runga i te aroa no Iehova, toou ngutuare e te putuputuanga. (1 Timo. 3:​1-13; Tito 1:​6-9; 1 Pete. 5:​2, 3) Tauta kia mārama i teia au tu e oti, pure kia Iehova no te tauturu kia akaari i teia au tu.c

17. Akapeea tetai taeake mapu me akapapa kia riro mai ei tane e ei upoko meitaki? (Akara katoa i te tutu.)

¹⁷ Tane akaipoipo e te upoko ngutuare. Karanga a Iesu e ka iki tetai au tane Kerititiano kia kore e akaipoipo. (Mata. 19:12) Inara, me iki koe i te akaipoipo vaine, ka riro mai koe ei tane e ei upoko ngutuare. (1 Kori. 11:3) Inangaro a Iehova i te tane kia aroa i tana vaine e te akono iaia i te pae kopapa, te pae manako e te pae vaerua. (Ephe. 5:​28, 29) Ka riro te au tu e te kite karape mei te tu akono, te akangateitei i te vaine, e te tu irinakiia ei tauturu ia koe kia riro mai ei tane meitaki. Ka papa i reira koe ei tane e ei upoko meitaki.

18. Akapeea tetai taeake mapu me akapapa kia riro mai aia ei metua meitaki?

¹⁸ Metua tane. Me kua akaipoipo koe, penei ka riro mai koe ei metua tane. Eaa taau ka apii mei ia Iehova no runga i teia? E maata taau ka apii. (Ephe. 6:4) Kua akakite a Iehova ki tana Tamaiti ko Iesu e kua akaperepere e kua mareka rava Aia iaia. (Mata. 3:17) Me riro mai koe ei metua, e akakite putuputu ki taau tamariki e te akaperepere ra koe ia ratou. E akameitaki ia ratou no ta ratou angaanga meitaki i rave. Me aru te au metua i te akaraanga o Iehova, ka tauturu tera i ta ratou tamariki kia riro mai ei au Kerititiano tukatau. E akapapa ia koe i teianei kia riro mai ei metua meitaki na te aroa anga i toou ngutuare e te au taeake i roto i te putuputuanga. E akameitaki ia ratou e e akakite e te akaperepereia ra ratou. (Ioa. 15:9) Ka tauturu teia ia koe kia riro mai ei tokorua e ei metua meitaki no te tuatau ki mua. Me akapera koe, ka akaperepereia koe e Iehova e ka tauturu maata koe i toou ngutuare e te putuputuanga.

EAA TAAU KA RAVE I TEIANEI?

19-20. Eaa te ka tauturu i te au taeake mapu kia riro mai ei Kerititiano tukatau? (Akara i te tutu i te kapi mua.)

¹⁹ E te au taeake mapu, ka anoanoia koe kia tauta kia riro mai ei Kerititiano tukatau. E aru i te au akaraanga meitaki, te akatupu i te tu akono, kia irinakiia, kia apii i te au tu kite karape no te oraanga e kia akapapa no te tuatau ki mua.

²⁰ Penei ka manako koe e apainga teiaa teia au angaanga ka anoanoia. Inara ka rauka ia koe! E akamaara e ka tauturu a Iehova ia koe. (Isa. 41:​10, 13) Ka tauturu katoa toou au taeake e te au tuaine. Me riro mai koe ei Kerititiano tukatau, ka mataora toou oraanga e ka puapingaia. Akaperepere matou ia kotou e te au taeake mapu! E kia akameitaki a Iehova i ta kotou tautaanga kia riro mai ei au Kerititiano tukatau.—Mase. 22:4.