Teateamamao Ainei Koe no te Mate Maata?

1. Eaa i meitaki ei kia vai teateamamao no te au tumatetenga?

ME TEATEAMAMO tatou ka ora tatou. Ei akaraanga, me tupu te tumatetenga natura, ka ora te tangata tei vai teateamamao e ka rauka i te tauturu i tetai atu. Karanga tetai akaaereanga tauturu tangata i Europa e: “Me vai teateamamao tatou ka ora tatou.”

2. Eaa tatou ka vai teateamamao ei no te mate maata? (Mataio 24:44)

² Ka tupu viviki te “mate maata.” (Mata. 24:21) Inara, e tuke teia tumatetenga, no te mea kua kite tatou te aere maira te reira. E 2,000 mataiti i teianei, kua akamatakite mai a Iesu i tana au pipi kia vai teateamamao no teia ra. (E tatau ia Mataio 24:44.) Me vai teateamamao tatou, ka rauka ia tatou te akakoromaki e te tauturu atu i tetai.​—Luka 21:36.

3. Akapeea te akakoromaki, te tangi aroa, e te aroa me akateateamamao ia tatou no te mate maata?

³ Akamanako ana e toru tu te ka tauturu ia tatou kia vai teateamamao no te mate maata. Eaa ta tatou ka rave me patiia mai tatou kia akakite i tetai karere akavaanga e kua patoiia mai te reira e te aronga irinaki kore? (Apo. 16:21) Ka anoanoia te akakoromaki kia akarongo kia Iehova, te irinakianga e ka paruru aia ia tatou. Eaa ta tatou ka rave me ngere te au taeake i tetai me kore te katoa anga i ta ratou apinga? (Haba. 3:17, 18) Ka tangi aroa atu tatou ma te tauturu ia ratou. Eaa ta tatou ka rave, me tamaki mai te au pupu enua, ka noo kapiti tatou i te pae i te au taeake e te au tuaine? (Eze. 38:10-12) Ka akaperepere tatou ia ratou ma te tauturu ia ratou i te tuatau ngata.

4. Akapeea te Pipiria te akakite anga mai kia akakoromaki, kia tangi aroa, e kia aroa ua tatou?

⁴ Te akamaroiroi maira te Tuatua a te Atua kia maroiroi ua atu tatou i te akakoromaki, te tangi aroa, e te aroa. Karanga a Luka 21:19 e: “E ora ra kotou kia mou tamou marie.” Akakite a Kolosa 3:12 e: “E tenana, ka akangakau aroa ua.” Karanga a 1 Tesalonia 4:9, 10 e: “Kua apiiia kotou uaorai e te Atua i te aroa ia kotou uaorai. . . . Te ako atu nei ra matou kia kotou, e te au taeake, kia maata ua atu rai.” Kua akakiteia teia au irava ki te au pipi tei akakoromaki, tangi aroa, e te aroa. Inara, kua anoanoia ratou kia akatupu i teia au tu. Kia pera rai tatou. Ei tauturu ia tatou, ka uriuri tatou akapeea te au Kerititiano mua te akaari anga i teia au tu. E oti ka akara tatou akapeea me aru i te au pipi e kia vai teateamamao no te mate maata.

AKAMATUTU I TOOU TU AKAKOROMAKI

5. Akapeea te au Kerititiano mua te akakoromaki anga i to ratou manamanata?

⁵ Kua anoanoia te au Kerititiano mua kia akakoromaki. (Ebe. 10:36) I te pae i te akakoromaki anga i te au manamanata tei matauia e te tangata, e maata atu ta ratou i akakoromaki. Kua takinokinoia te maata anga ia ratou, e te au arataki akonoanga ngati Iuda e te au mana tutara o Roma e pera to ratou uaorai pamiri. (Mata. 10:21) I roto i te putuputuanga, kua anoanoia ratou kia patoi i te aronga pikikaa e ta ratou apiianga pikikaa. (Anga. 20:29, 30) Inara, kua akakoromaki ua atu te au Kerititiano. (Apo. 2:3) Akapeea ra? Kua akamanako ratou i te au akaraanga Pipiria no te tu akakoromaki, mei ia Iobu. (Iako. 5:10, 11) Kua pure ratou no te maroiroi. (Anga. 4:29-31) E kua akamou ratou ki runga i te au tupuanga meitaki o to ratou tu akakoromaki.​—Anga. 5:41.

6. Eaa te apiianga mei ta Merita i rave no te akakoromaki i te patoi anga?

⁶ Ka akakoromaki tatou me apii putuputu i te au akaraanga o te tu akakoromaki i roto i te Tuatua a te Atua e ta tatou au puka e kia akamanako oonu i te reira. Na te rave anga i te reira, kua rauka ia Merita, e tuaine i Albania, te akakoromaki i te patoi anga a te pamiri. Karanga aia: “Kua pakia tikai toku ngakau te apii anga i te tua Pipiria o Iobu. Kua mamae tikai aia​—noatu kare aia i kite naai i akatupu i tona manamanata—​karanga aia: ‘E mate ua atu au, kare au e pa i te tuatua-tika naku ra.’ (Iobu 27:5) Manako mai au e kino atu to Iobu manamanata i toku. Kua kite au naai i akatupu i toku manamanata.”

7. Noatu kare tatou e akakoromaki ra i tetai manamanata kino, eaa ta tatou ka apii i teianei?

⁷ Ka akamatutu katoa tatou i to tatou tu akakoromaki na te akakite anga i to tatou manamanata kia Iehova na roto i te pure. (Phili. 4:6; 1 Tesa. 5:17) Penei kare koe e akakoromaki ra i tetai manamanata i teia taime. Noatu ra, te kimi ra ainei koe i ta Iehova arataki anga, me riri koe, me manako tau kore, e me manamanataia? Me pati tauturu putuputu koe i teianei ki te Atua no toou au manamanata i te au ra, kare koe e tapupu me tupu ake te au manamanata maata. Kua papu ia koe e kua kite te Atua aea e akapeea aia me tauturu ia koe.​—Sala. 27:1, 3.

8. Akapeea te akaraanga o Mira te akaari anga mai e me akakoromaki tatou i te au manamanata i teianei, ka tauturu ia tatou a te tuatau ki mua? (Iakobo 1:2-4) (Akara katoa i te tutu.)

⁸ Ka rauka ia tatou te akakoromaki i te mate maata e aere maira me akakoromaki tatou i te au manamanata i teianei. (Roma 5:3) Eaa ra? E maata te au taeake tei akakoromaki i tetai timata anga o te akarongo kua rauka ia ratou te akakoromaki i te ka aru mai. Kua akamatutu te tu akakoromaki ia ratou, matutu atura to ratou akarongo e kua papa ua a Iehova i te tauturu ia ratou. E kua tauturu te akarongo ia ratou kia akakoromaki i tetai akaou manamanata. (E tatau ia Iakobo 1:2-4.) Kua kite mai a Mira, e painia i Albania, e kua riro tona tu akakoromaki i mua ana ei tauturu iaia kia akakoromaki ua atu. Tetai taime e manako ana aia koia anake ua te na roto ra i te au manamanata. Inara kua maara iaia ta Iehova tauturu e 20 mataiti i topa, i karanga ai aia: ‘Kia tiratiratu. Auraka e akamutu i te tavini ia Iehova i teianei, i muri ake i tana tauturu anga ia koe kia autu i te au manamanata ngata.’ Ka akamanako katoa koe i ta Iehova tauturu anga ia koe kia akakoromaki. Kia irinaki e te kite maira aia me akakoromaki koe i tetai manamanata e ka tutaki mai ia koe. (Mata. 5:10-12) Me tupu te mate maata, ka kite i reira koe akapeea me akakoromaki ua atu.

AKAARI I TE TU TANGI AROA

9. Akapeea te putuputuanga i Anetioka o Arama te akaari anga i te tu tangi aroa?

⁹ Akamanako ana te tupu anga te onge maata ki te au Kerititiano i Iuda. Te rongo anga te putuputuanga i Anetioka o Arama i te onge, kua tangi aroa atura ratou i te au taeake i Iudea. E kua taangaanga i to ratou tu tangi aroa. ‘Kua akakoro ratou te akau i te apinga, e tau iaia uaorai, ei turu atu i te au taeake i noo i Iudea ra.” (Anga. 11:27-30) Noatu e mamao te ngai i noo ei te au taeake tei ongeia, kua akakoro te au Kerititiano i Anetioka te tauturu ia ratou.​—1 Ioa. 3:17, 18.

10. Akapeea tatou me akaari i te tu tangi aroa ki te au taeake akamori tei rokoia e te tumatetenga? (Akara katoa i te tutu.)

¹⁰ Ka akaari tatou i te tu tangi aroa i teianei me kua rokoia te au taeake akamori e tetai tumatetenga. Ka tauturu viviki tatou​—penei na te pati anga ki te aronga pakari kia tauturu atu tatou, na te oake anga i te moni tauturu ki te angaanga i te ao katoa, me kore te pure anga no te au taeake tei rokoia e te tumatetenga.b (Mase. 17:17) Ei akaraanga, i te 2020, tere atu i te 950 Kumiti Tauturu Tumatetenga tei akanooia i te ao katoa no te akono i te au taeake tei rokoia e te maki COVID-19. Kia akameitakiia teia au taeake tei tavini i roto i teia au kumiti tauturu. No to ratou tu tangi aroa no te au taeake e te au tuaine, kua tuʼa ratou i te au apinga tauturu, kua akamaroiroi i te pae vaerua, e kua patu akaou i tetai au are e te au ngai akamorianga.​—Akaaite ia 2 Korinetia 8:1-4.

11. Akapeea te au angaanga tangi aroa me akangateitei i to tatou Metua i te rangi?

¹¹ Me akaari tatou i te tu tangi aroa no tetai tumatetenga, ka kite mai te tangata i ta tatou e rave ra. Ei akaraanga, i te 2019, kua takore te Uriia Dorian i tetai Are Uipaanga Patireia i te Bahamas. I te au taeake e patu akaou ra i te are uipaanga, kua pati ratou i tetai tangata patu are kare i te Kite kia tare mai eia moni tei anoanoia no te angaanga. Akakite aia kia ratou: “Ka inangaro au i te oronga atu . . . i te au matini, te aronga angaanga e te au apinga. . . . Ka inangaro au i te rave i teia no ta kotou akaaereanga. Kua pakia toku ngakau te kite i to kotou aroa no to kotou au taeake.” Kare te maata anga o te tangata i kite ia Iehova. Inara e maata te kite ra i ta te Au Kite o Iehova e rave ra. Mei teaa atura te mataora te kiteia maira to tatou tu tangi aroa e kua akavaitata i te tangata ki Tei “aroa maata” maira!​—Ephe. 2:4.

12. Akapeea te tu tangi aroa i teianei me akateateamamao ia tatou no te mate maata? (Apokalupo 13:16, 17)

¹² Eaa tatou ka akaari ei i te tu tangi aroa i te tuatau o te mate maata? Te akakite maira te Pipiria e ka tupu te manamanata ki te aronga kare e turu ana i te akatereanga poritiki​—i teianei e te tuatau o te mate maata. (E tatau ia Apokalupo 13:16, 17.) Penei ka anoano tauturu te au taeake e te au tuaine i te au mea o te oraanga. Me tae mai to tatou Ariki, ko Iesu Karaiti, no te akava i te tangata, kia kite mai aia ia tatou e tangi aroa ra e ka pati mai ia tatou kia “noo ki te basileia.”​—Mata. 25:34-40.

AKAMATUTU I TOOU TU AROA

13. Mei tei akakiteia ia Roma 15:7, akapeea te au Kerititiano mua te akamatutu anga i to ratou pirianga aroa?

¹³ Ko te aroa te akairo tei akataka i te au Kerititiano mua. E mama ainei ia ratou te akaari i te aroa? Akamanako ana i te iti tangata tukeke i roto i te putuputuanga i Roma. Te vaira te au ngati Iuda, tei aru i te Ture a Mose, pera te au iti tangata ke, e tuke ta ratou au peu. Tetai au Kerititiano e au tuikaa, tetai e aronga rangatira​—penei tetai e pu no te au tuikaa. Akapeea teia au Kerititiano te akakoromaki anga i to ratou tuke e kia akamatutu i to ratou aroa? Kua ako te apotetoro ko Paulo kia ‘āriki ratou ia ratou uaorai.’ (E tatau ia Roma 15:7.) Eaa te aiteanga o tana tuatua? Te aiteanga o te ‘āriki” kia akono ma te takinga meitaki me kore ei manuiri, ki roto i te ngutuare me kore ki roto i tetai kapitianga oa. Ei akaraanga, kua akakite a Paulo kia Philemona kia ariki i te tuikaa tuitarere ko Onesimo: “E āriki mai koe iaia.” (Phile. 17) E kua ariki a Peresila e Akuila ia Apolo, e meangiti ua tana i kite i te apiianga Kerititiano, na te ‘arataki anga iaia ki to raua ngutuare.’ (Anga. 18:26) Kare ratou i tuku ana i to ratou oraanga tukeke kia akatakake ia ratou, kua ariki ua te au Kerititiano i to ratou tuke e kua akono i tetai e tetai.

14. Akapeea a Anna e tana tane te akaari anga i te aroa?

¹⁴ Ka rauka katoa ia tatou te akaari i te aroa ki te au taeake e te au tuaine na te ariki anga ia ratou ki roto i to tatou kapitianga oa. E ka aroa katoa mai ratou ia tatou. (2 Kori. 6:11-13) Akamanako ana ia Anna e tana tane. I muri poto ake i to raua neke anga ki tetai angaanga mitinari ou i Opunga Aperika, kua tupu te maki COVID-19. Ei au taeake ou, kare raua i aravei ana i ta raua putuputuanga. Akapeea te nga tokorua me akaari i te tu aroa? Kua vitio karangaranga raua i te au taeake e te au tuaine e te inangaro ra raua i te kite meitaki atu i te au taeake. Kua pakia tikai te ngakau o te au pamiri e kua taniuniu mai ma te au karere. Eaa teia nga tokorua i tauta ei te aravei ia ratou? Karanga a Anna: “Kare rava e ngaropoina iaku te aroa tei akaariia mai kiaku e toku pamiri i te au tuatau meitaki e te au tuatau kino e kua akakeu iaku kia aroa katoa.”

15. Eaa te apiianga mei ia Vanessa kia akaperepere i te au taeake e te au tuaine katoatoa? (Akara katoa i te tutu.)

¹⁵ E maata te au taeake e te au tuaine tukeke i roto i ta tatou putuputuanga mei te au oraanga tukeke ma te au tu tukeke. Ka akamatutu tatou i to tatou aroa no ratou na te akamouanga ki runga i to ratou tu meitaki. Tetai tuaine ko Vanessa, te tavini ra i Nu Tireni, e ngata ana iaia te piri vaitata ki tetai pae i roto i tana putuputuanga. Inara manako aia kare aia e akamamao mei te aronga kare aia e reka ana mari ra kia akapou i tetai taime kia ratou. Na te rave anga i te reira kua kite aia i ta Iehova i mareka i roto ia ratou. Karanga aia: “Te riro anga taku tane ei akaaere kotinga, te akaoaoa nei maua i te au taeake e te au tuaine tukeke, e mama iaku i teianei te piri vaitata kia ratou. Te reka nei au i te au tu tangata tukeke. Te mareka katoa ra a Iehova i te reira no te mea kua akavaitata aia ia tatou ki roto i tetai taokotaianga tangata tukeke.” Me akara tatou i te au taeake mei ta Iehova e akara ra, te akaperepere ra tatou ia ratou.​—2 Kori. 8:24.

16. Eaa te aroa ka puapinga ai i te tuatau o te mate maata? (Akara katoa i te tutu.)

¹⁶ E mea puapinga te aroa i te tuatau o te mate maata. Me tupu te reira, naai e paruru ia tatou? Akamanako ana i ta Iehova i ako ki tona iti tangata te tamakiia anga a Babulonia taito: “E aere mai, e taku iti-tangata e, e tomo ki roto i to au pia ra, e topiri marie i toou au pa ia koe: e pipini ei koe i tetai manga tuatau iti kia okotai ake kamoanga mata, kia ngaro ke atu taua riri otooto nei.” (Isa. 26:20) Ka aru katoa tatou i teia au tuatua me tupu te mate maata. Te “au pia” ko te putuputuanga te reira. I te tuatau o te mate maata, kua taputou mai a Iehova te paruru ia tatou me vai taokotai tatou ki te au taeake irinaki. No reira e angaanga pakari tatou i teianei kia akakoromaki e kia akaperepere i te au taeake. E ora ai tatou!

AKATEATEAMAMAO I TEIANEI

17. Me teateamamao tatou i teianei, eaa ta tatou ka rave i te tuatau o te mate maata?

¹⁷ Ka tupu te taitaia ki te tangata i “te rā maata o Iehova.” (Zepha. 1:14, 15) Ka kite katoa te iti tangata o Iehova i te turanga ngata. Me vai teateamamao tatou i teianei, ka noo maru ua tatou ma te tauturu i tetai atu. Ka akakoromaki tatou i tetai ua atu manamanata. Me tupu te kino ki te au taeake, ka akapumaana tatou ia ratou ma te tangi aroa atu e te akono ia ratou. Ka piri vaitata tatou ki te au taeake e te au tuaine, tei akaperepereia. Ka tutaki a Iehova ia tatou ki te ora mutu kore i te enua kare e tumatetenga e te manamanata.​—Isa. 65:17.