Ko Iehova To Tatou Tiaki

“Ko Iehova toku tiaki; kare rava au e ngere.”​—SALAMO 23:1.

1-3. Eaa i kore ei e kare i te mea poitirere e kua akaaite a Davida ia Iehova ki tetai tiaki?

ME UIIA atu kia koe kia akataka mai i te mataara e akono ra a Iehova i tona au tangata, eaa taau ka tuatua atu? Eaa te akaaiteanga taau ka rave mai te ka akakite mai i te utuutuanga maru tana i oronga ki tona au tavini akarongo mou ra? Kua tere atu e 3,000 mataiti i topa, kua tata te ariki tata taramo ko Davida i tetai akatakaanga manea no Iehova, i te taangaanga anga i te akaaiteanga tuatua no roto mai i te angaanga o to Davida oraanga mua.

² Ei tangata mapu, e tangata tiaki mamoe a Davida, no reira kua kite aia e akapeea i te akono anga i te mamoe. Kua kite meitaki aia e ko te mamoe, me akarukeia ko ratou uaorai, ka ngaro ua e ka riro mai ei ereere na te aronga keia me kore na te au manu taae. (1 Samuela 17:34-36) Me kare tetai tiaki akono meitaki ra, penei kare e kitenaia mai e ratou tetai ngai no ratou e ta ratou kai. I te au mataiti i muri mai, kare ekokoanga e e au manakonako anga reka ua to Davida no te au ora e manganui tana i akapou ana i te arataki anga, te paruru anga, e te angai anga i te mamoe.

³ Kare i te mea poitirere e kua akamaaraia taua angaanga a tetai tiaki i te akauruia anga a Davida kia akataka mai i te akono anga meitaki ta Iehova i akaari no tona au tangata. Kua akamata te Salamo 23, ta Davida i tata, ki te au tuatua e: “Ko Iehova toku tiaki; kare rava au e ngere.” Ka akamanako ana tatou e eaa ra teia tuatua i tau ei. E oti, ma te tauturu anga a Salamo 23, ka kite tatou e na roto i teea au mataara i akono meitaki ei a Iehova i tona au tangata akamori mei tetai tiaki e akono meitaki ra i tana mamoe.​—1 Petero 2:25.

E Akaaiteanga Tau

4, 5. Akapeea te Pipiria i te akataka anga mai i te au tu o te mamoe?

⁴ E maata te au ingoa o Iehova i roto i te au Tuatua Tapu, inara te tuatua “Tiaki” te akakite maira i te tu maru tikai. (Salamo 80:1) Kia marama meitaki tikai e eaa ra a Iehova i kapiki tauia ai e e Tiaki, e meitaki no tatou kia kite i nga mea e rua: te mea mua, te tu o te mamoe e te rua, te au angaanga e te au tu o tetai tiaki meitaki.

⁵ Te akakite putuputu maira te Pipiria i te au tu o te mamoe, i te akataka anga mai i te reira e te ariu viviki ra ki te aroa o te tiaki (2 Samuela 12:3), kare e ae (Isaia 53:7), e kare i paruruia. (Mika 5:8) Kua akakite mai tetai tangata tata tei akono ana i te mamoe no tetai au mataiti e: “Kare te mamoe e akono ‘ua ia ratou uaorai’ mei ta etai e manako ra. E maata atu ta ratou e umuumu ra, i tetai ua atu au manu ra, te akonokono ope koreia anga e te akono meitakiia anga.” Kia ora ua atu, te umuumu ra teia au manu ora paruru koreia i tetai tiaki akono meitaki.​—Ezekiela 34:5.

6. Akapeea tetai tikitinari Pipiria i te akataka anga mai i tetai ra i roto i te oraanga o tetai tiaki taito ra?

⁶ Mei teaa rai te tu o te ra o te tiaki taito? Te akataka maira tetai tikitinari Pipiria e: “I te popongi roa ka arataki atu aia i te anana mei roto mai i te koro, te aere ra aia na mua ake i te anana ki te ngai ka angaiia ai ratou. Ka akono aia ia ratou i reira i te ra katoa, i te akarakara matakite anga e kare tetai o te mamoe i aere ke atu, e me kua ngaro tetai i tetai manga tuatau i tona tiaki anga e kua aere ke atu mei te katoa anga, ka kimi meitaki aia e kitea uaia atu e ia te reira e te akaoki akaou mai anga i te reira. . . . I te aiai ka akaoki mai aia i te anana ki te kainga ki roto i te koro, te tare anga i te reira ia ratou e pati maira i raro ake i te rakau o te ngutupa ei akapapu anga kiaia uaorai e kare tetai i ngaro. . . . E maata te taime e tiaki ana aia i te koro i te po mei te au manu taae, me kore te au tauta anga kikite a te aronga keikeia.”a

7. Eaa ra tetai tiaki ka inangaro ei i tetai taime i te akaari i te akakoromaki anga marie e te tu maru?

⁷ Te vai ra tetai au taime te inangaro ra te mamoe, tera tikai te au tinana mamoe te nui ra e i te punua mamoe ra, i tetai aka akakoromaki anga e te tu maru. (Genese 33:13) Kua akakite mai tetai tataanga Pipiria e: “E tupu putuputu ua ana te anauanga o te punua mamoe i roto i tetai anana i tetai ngai mamao roa atu i runga i tetai tua o te maunga. E paruru matakite ana te tiaki i te tinana mamoe i tona tuatau paruparu e ka mou mai i te punua mamoe e ka apai atu i te reira ki roto i te koro. I tetai manga tuatau i muri mai, me rauka te reira i te aere, penei ka apai atu aia i te reira i roto i tona nga rima me kore i roto i tetai tuanga o tona kakau.” (Isaia 40:10, 11) Te taka meitaki ra, te inangaro ra tetai tiaki meitaki i tetai tu pakari e te maru.

8. Kua akakite mai a Davida i teea au tumu no tona irinakianga ia Iehova?

⁸ “Ko Iehova toku tiaki”​—kare ainei e e akatakaanga tau tera no to tatou Metua i te rangi ra? Ia tatou e akara matatio ra ia Salamo 23, ka kite tatou e akapeea te Atua i te akono anga ia tatou ma te maroiroi e te tu maru ei tiaki ra. I roto i te irava 1, te akakite maira a Davida i tona irinakianga e ka rave te Atua i te au akanoonooanga pouroa no Tana mamoe kia kore oki ratou “e ngere.” I roto i te au irava te aru maira, kua akakite mai a Davida e toru au tumu no teia irinakianga: Na Iehova e arataki, e paruru, e i angai i Tana mamoe. Ka uriuri taki tai tatou i teia.

“E Arataki Rai Iaku”

9. Eaa te akaraanga no te au ta Davida e akataka maira, e akapeea te mamoe i o mai ei ki roto i taua akanoonoo anga?

⁹ Te mea mua, na Iehova e arataki i tona au tangata. Kua tata a Davida e: “Te akamoe nei aia iaku i te au ngai ngangaere ruperupe ra; te arataki nei aia iaku na te pae i te vai taʼe marie. E akaoki rai aia i toku vaerua: e arataki rai iaku na te au ara tuatua-tika, no tona ra ingoa.” (Salamo 23:2, 3) Te moe au ua ra tetai anana i roto i te ngai puapinga​—te akataka maira a Davida i konei i tetai akara anga pumaana, akangaroi anga e te tinamou. Te tuatua Epera i taikuia mai no te “au ngai” ko te aite anga e “ngai reka.” Me ko ratou ua, kare e kitenaia mai e te mamoe tetai ngai akangaroi anga ei takoto anga ki raro ma te au. Na to ratou tiaki e arataki atu ia ratou ki taua “ngai reka” ra.

10. Akapeea te Atua i te akaari anga mai i tona irinaki anga ia tatou?

¹⁰ Akapeea a Iehova i te arataki anga ia tatou i teia tuatau? Ko tetai mataara tana e rave ra i te reira na roto i te akaraanga. Te raurau maira Tana Tuatua ia tatou kia ‘aru i te Atua.’ (Ephesia 5:1) Te taiku maira te manako o taua au tuatua ra i te tangi aroa, te akakoreanga ara e te aroa. (Ephesia 4:32; 5:2) E tika tikai, kua akanoo a Iehova i te akaraanga meitaki roa atu i te akaari anga mai i taua au tu aroa. E mea tau kore ainei kia pati mai aia kia aru atu tatou iaia ra? Kare. E akakiteanga umere tikai taua akoanga akauruia i tona irinaki anga ia tatou. Na roto i teea mataara? Kua angaia tatou i roto i to te Atua tu, te aite anga kua orongaia mai kia tatou te au tu akono tau e te tu kite no te tu i te pae vaerua. (Genese 1:26) No reira, kua kite a Iehova e noatu to tatou au tu apa, tei roto ia tatou nei te tikaanga kia tatanu tatou i taua au tu tana i akakite mai. E akamanako ana​—kua papu i to tatou Atua aroa e ka riro rai tatou mei iaia ra. Me aru tatou i tona akaraanga, nana e arataki ia tatou, na roto i tetai akatutuanga, ki tetai “ngai reka.” I rotopu i teia ao kino nei, ka “noo tinamou” tatou, te kite anga i te au te aere maira no te kite anga e tei ia tatou to te Atua mareka anga.​—Salamo 4:8, NW; 29:11.

11. I te arataki anga i tana mamoe, eaa ta Iehova e manako maira, e akapeea teia i te akaata anga mai i tana e pati maira kia tatou?

¹¹ I te arataki anga ia tatou, e maru e e akakoromaki anga to Iehova. E akamanako ana tetai tiaki i te au kotinga anga o tana mamoe, no reira te arataki ra aia kia “tau ki te au puaka.” (Genese 33:14) Te arataki katoa ra a Iehova e kia “tau ki” tana mamoe. Te manako maira aia i to tatou au tu e te au turanga. Tera te aiteanga i reira, te akatanotano ra aia i te aere anga, kare roa oki i pati maata mai ana i te ka rauka ra ia tatou i te oronga. Eaa tana e pati maira koia oki kia akaari tatou i te ngakau katoa. (Kolosa 3:23) Inara akapeea me kua pakari koe e kare e rauka i te rave i te mea taau i rave ana? Akapeea me e aka maki tikai toou te kotinga ra ia koe? E manea tikai te umuumuanga e kia akaari tatou i te ngakau katoa. Kare nga tangata e rua e aiteite tikai ana. Te tavini anga ma te ngakau katoa ko te aite anga kia taangaanga i toou maroiroi e te ririnui ki katoa te ka rauka ia koe i roto i ta te Atua angaanga. Noatu te au tu apikepike te akatuke ra i ta tatou aerenga, te akaperepere ra a Iehova i ta tatou akamorianga ngakau katoa.​—Mareko 12:29, 30.

12. Eaa te akaraanga no roto mai i te Ture a Mose te akatutu maira e na Iehova e arataki kia “tau ki” tana mamoe?

¹² Ei akatutu anga mai e te arataki ra a Iehova kia “tau ki” tana mamoe, e akamanako ana i tei karangaia no runga i tetai tarangaara i roto i te Ture a Mose. Te inangaro ra a Iehova i te au tarangaara memeitaki tei akakeuia e te au ngakau ki i te aroa. I taua taime rai, kua akatakaia mai te au tarangaara kia tau ki te tu o te tangata oronga ua ra. Te karanga ra te Ture: “Kia kore e tika iaia kia apai mai i te punua mamoe . . . ei kukupa tana e apai mai . . . kia rua ake, e kare ra, kia rua ake punua rupe.” E akapeea ra me kare e rauka iaia i te tutaki i nga rupe e rua? Ka apai mai aia i reira i tetai “faraoa pueu.” (Levitiku 5:7, 11) Te akaari maira teia e kare te Atua e maro mai ana i tei kore i rauka ana i tei oronga ra i te itae atu. I te mea e kare te Atua i taui, ka kiteaia e tatou te pumaana i te kite anga e kare e maata ana tana e pati maira ta tatou ka oronga atu; kareka ra, te reka ra aia i te ariki mai i tei rauka ia tatou i te oronga atu. (Malaki 3:6) E pereperekavana tikai te reira i te aratakiia anga e taua Tiaki kite ra!

“Kare rai Au e Mataku i te Kino: Tei Vaitata Katoao Koe Iaku”

13. I roto ia Salamo 23:4, i akapeea a Davida i te tuatua piri vaitata anga tikai, e eaa ra teia kare i te mea poitirere ua?

¹³ Te oronga maira a Davida i te rua o te tumu anga no tona irinakianga: Te paruru ra a Iehova i tana mamoe. E tatau tatou: “E kia aere ua atu au na te o ra o te maru-mate, kare rai au e mataku i te kino: tei vaitata katoao koe iaku; to rakau e to tokotoko tei akapumaana mai iaku.” (Salamo 23:4) Te tuatua ra a Davida i teianei i tetai pirianga vaitata tikai, i te tuatua anga kia Iehova ma te kauono nomena ra ko “koe.” Kare teia i te mea poitirere ua, no te mea te tuatua ra a Davida e i akapeea te Atua i te tauturu anga iaia kia akakoromaki i te tu kino. Na roto ana a Davida i te au o kino e manganui​—i te au taime ravarai tei roto tikai tona oraanga i te kino. Inara kare aia i tuku ana i te mataku kia akaaere iaia, no te mea kua kite aia e tei te pae te Atua​—iaia​—e te vai teateamamao ra ma Tana “rakau” e te “tokotoko.” Te kite anga i teia paruruanga i akapumaanaia ai a Davida e kare ekokoanga kua akapiri vaitata atura iaia ra kia Iehova.b

14. Eaa te akapapu anga ta te Pipiria e oronga maira kia tatou no runga i ta Iehova paruruanga, inara eaa ra e kare ko te aite anga ia o te reira?

¹⁴ Akapeea a Iehova i te paruru anga i tana mamoe i teia tuatau? Te akapapu maira te Pipiria kia tatou e kare e rauka i te aronga patoi​—te temoni me kore te tangata ra​—i te takore atu i tana mamoe mei te enua nei. Kare a Iehova e akatika i te reira. (Isaia 54:17; 2 Petero 2:9) Inara, kare te aite anga o teia e ka paruru to tatou Tiaki ia tatou mei te tumatetenga tikai ra. Te kite nei tatou i te au timataanga ta te tangata e matau ra, e te aro nei tatou i te patoianga te tupu ra ki te au Kerititiano mou katoatoa. (2 Timoteo 3:12; Iakobo 1:2) Penei, te vai ra te au taime no tatou ra, i te ‘aere ua atu na te o ra o te maru-mate.’ Ei akaraanga, penei te vaitata atura tatou ki te mate no te takinga kinoanga me kore no etai tumatetenga i te pae kopapa. Penei te vaitata atura tetai tangata ta tatou e akaperepere ra i te mate. I te au atianga akara anga kino ra, tei ia tatou to tatou Tiaki, e ka paruru aia ia tatou. Akapeea ra?

15, 16. (a) Na roto i teea au mataara te tauturu ra a Iehova ia tatou kia akono i te au arairai anga ta tatou ka aro atu? (e) E akakite mai i tetai tupuanga i te akaari mai e akapeea a Iehova i te tauturu anga ia tatou i te au tuatau timataanga.

¹⁵ Kare a Iehova i taputou mai i te akaoanga na roto i te temeio.c Inara kua papu ia tatou teia: Ka tauturu mai a Iehova ia tatou kia autu i te au arairai anga ta tatou ka aro atu. Ka rauka iaia i te oronga mai i te pakari kia tatou kia akakoromaki atu i te “au timataanga e manganui te tu.” (Iakobo 1:2-5) Te taangaanga ra tetai tiaki i tana rakau me kore i te tokotoko kare e kia akaatea ke atu i te manu taae kareka katoa ra kia opara marie i tana mamoe ki te mataara tau. Ka rauka ia Iehova i te “opara marie” ia tatou, penei ake na roto i tetai taeake akamori, kia taangaanga i te akoanga tei akatumuia ki runga i te Pipiria te ka rave i tetai taui anga maata i roto i to tatou turanga. Kapiti atu, ka rauka ia Iehova i te oronga mai kia tatou i te maroiroi kia tamou marie. (Philipi 4:13) Na roto i tona vaerua tapu, ka rauka iaia i te oronga mai kia tatou te “mana maata meitaki.” (2 Korinetia 4:7) Ka rauka i te vaerua o te Atua i te tauturu ia tatou kia akakoromaki i tetai ua atu timataanga ta Satani ka tuku mai ki runga ia tatou. (1 Korinetia 10:13) Kare ainei ei pumaana i te kite e te papa ua ra a Iehova i te tauturu mai ia tatou?

¹⁶ Ae, noatu eaa te o kino ta tatou uaorai ka o atu ki roto, kare tatou e aere na roto i te reira e ko tatou ua. Tei ia tatou to tatou Tiaki, i te tauturu anga ia tatou i roto i te au tu kare tatou i kite tikai ana i te akamata anga. E akamanako ana no runga i tetai tangata pakari Kerititiano tei kiteaia mai tetai maki tupu i roto i te roro. “Ka akatika ra au e i te akamata anga kua kite au iaku uaorai i te manako anga e me kua riri a Iehova iaku me kore me te inangaro maira aia iaku. Inara kua tauta au kia kore e atea ke mai mei ia Iehova. Kareka ra, kua akakite atu au i toku manamanata kiaia. E kua tauturu mai a Iehova iaku, i te akapumaana putuputu mai anga iaku na roto i toku au taeake e te au tuaine. E manganui tei akakite mai i te au tupuanga meitaki tei akatumuia ki runga i to ratou uaorai tupuanga i te autu anga i te maki kino. Kua akamaara mai ta ratou au tuatua tau kiaku e te apinga te tupu ra kiaku kare i te apinga tuke. Kua akapapu maira te tauturu anga tau, kapiti anga mai etai au akakiteanga pumaana no te takinga meitaki, e tei te pae a Iehova iaku e kare e mareka kore mai ana iaku. E tikai, kia akakoromaki ua atu au i toku maki, e kare ra au i kite e eaa te ka tupu mai. Inara kua irinaki au e tei te pae a Iehova iaku e ka tauturu ua mai rai aia iaku i roto i teia timataanga.”

“Kua Akanoonoo Koe i Tetai Kaingakai Naku”

17. Akapeea a Davida i te akataka anga mai ia Iehova i roto ia Salamo 23:5, e eaa ra kare teia nga tu e tuke ana ki te akatutuanga no te tiaki ra?

¹⁷ I teianei te akakite maira a Davida i te toru o te tumu no tona irinakianga i roto i tona Tiaki: Na Iehova e angai i tana mamoe, e te rave pu ua nei aia i te reira. Kua tata mai a Davida e: “Kua akanoonoo koe i tetai kaingakai naku ki mua i te aroaro o toku au enemi; kua akatainu koe i toku mimiti ki te manongi; te ki nei taku kapu.” (Salamo 23:5) I roto i teia irava, kua akataka mai a Davida i tona Tiaki ei peretana akamanuiri takinga meitaki tei oronga pu ua mai i te kai e te vai. Ko nga akatutuanga e rua​—no tetai tiaki akono e tetai peretana akamanuiri takinga meitaki ra​—kare nga tu e tuke ana. No te mea, e mea tau kia kite tetai tiaki meitaki e teiea te au ngai ka kiteaia mai te meitaki e kia rava ua oki te vai no te inu anga kia kore oki tana anana “e ngere.”​—Salamo 23:1, 2.

18. Eaa te akaari maira e e peretana akamanuiri takinga meitaki a Iehova?

¹⁸ E peretana akamanuiri takinga meitaki katoa ainei to tatou Tiaki? Kare e ekokoanga no te reira! E akamanako ana i te tu, no runga i te maata e te tukeke o te kai pae vaerua ta tatou e reka ra i teianei. Na roto i te tavini akono meitaki e te pakari, te oronga maira a Iehova kia tatou i te au puka tauturu e te au porokaramu meitaki i ko i te au uipaanga, te au akaputuputuanga, e te au uruoaanga​—pouroa te reira te akaki ra i to tatou au anoano pae vaerua. (Mataio 24:45-47) Kare e kore ana te kai pae vaerua. Kua rauka i “te tavini akono meitaki e te pakari” i te maani e mirioni ua atu au Pipiria e te au puka apii Pipiria, e te rauka ra taua au puka i teianei e 413 reo. E tuke tuke teia kai i te pae vaerua ta Iehova i oronga mai​—mei te “u,” te au apiianga Pipiria mama ua, ki te “kai pakari,” e au apiianga oonu i te pae vaerua. (Ebera 5:11-14) Tei tupu mai, me aro atu tatou i te au manamanata me kore i te au ikianga, ka kite ua tatou i ta tatou e anoano ra. Teiea i reira tatou me kare oki taua kai i te pae vaerua ra? E peretana oronga takinga meitaki maata tikai to tatou Tiaki!​—Isaia 25:6; 65:13.

“Ka Noo Rai Au i Roto i te Are o Iehova”

19, 20. (a) I roto ia Salamo 23:6, eaa te irinakianga ta Davida i akakite mai, e akapeea e rauka ai ia tatou taua irinakianga? (e) Eaa te ka uriuriia i roto i te atikara te aru maira?

¹⁹ I muri ake i te akamanako anga i te au mataara o tona Tiaki e Tei Oronga maira, kua taopenga a Davida e: “Ka riro rai te meitaki, e te aroa, i te aru mai iaku i te au rā katoa o toku nei ora anga: e ka noo rai au i roto i te are o Iehova e roa ua atu oku puke rā.” (Salamo 23:6) Te tuatua ra a Davida ma tetai ngakau tei ki i te akameitaki anga e te akarongo​—e tu akameitaki anga i te akamaara anga i te tuatau i topa e e akarongo te akara anga ki te tuatau ki mua. Kua tinamou teia tiaki o mua ana, i te kite anga e me noo piri vaitata aia ki tona Tiaki i te rangi ra, mei te mea e te noo ra i roto i Tona are, ka riro ua rai aia ei tumu anga no ta Iehova akono anga aroa.

²⁰ Ka rauka ia tatou i te akameitaki tikai i te au tuatua manea tei tataia i roto ia Salamo 23! Kua kiteaia mai e Davida tetai mataara tau i te akataka anga mai e akapeea a Iehova i te arataki anga, te paruru anga, e te angai anga i tana mamoe. Kua akonoia te au tuatua pumaana a Davida kia oronga mai kia tatou i te irinakianga e ka rauka katoa ia tatou i te akara atu kia Iehova ei Tiaki no tatou. Ae, me noo piri vaitata tatou kia Iehova, ka akono aia ia tatou ei Tiaki aroa ra ‘e roa ua atu te puke rā,’ e e tuatau ua atu. Inara, ei mamoe nana ra, tei ia tatou te apainga kia aaere ma to tatou Tiaki maata, ko Iehova. Eaa te o maira ki teia nei ra ka uriuriia atu i roto i te atikara te aru maira.

[Au Tataanga Rikiriki i Raro]

Maara Ainei ia Koe?

• Eaa ra i tau ei e kua akaaite a Davida ia Iehova ki tetai tiaki?

• Akapeea a Iehova i te arataki anga ia tatou ma te kite marama?

• Na roto i teea au mataara te tauturu maira a Iehova ia tatou kia akakoromaki ua atu i te au timataanga?

• Eaa te akaari maira e e peretana akamanuiri takinga meitaki a Iehova?

[Tutu i te kapi 18]

Mei tetai tiaki i Iseraela, na Iehova e arataki ra i Tana mamoe