Ащи те боринес тут е кханиле букиенца колато мангел пес туке те керес

1. Соса боринен пес саворе безехале мануша?

Декхана мангляс ли пес туке те керес букя колато о Йехова на дехел? Ако ва, ма мислине кай само ту боринес тут салке букиенца. И Библия пхенел: „Саво-да изпитание те овел тумен о също вече сине аверен-да.“ (1 Кор. 10:13) Демек соса-да те боринес тут, авер-да мануша боринен пес далкхеса. На синян коркоро тай о Йехова ащи те помагинел туке те побединес.

2. Саве кханиле букя ащи те манген пес десаве християниенге тай манушенге колато изучинен и Библия? (Дикх о снимкес-да.)

² И Библия също пхенел: „Секо йекх амендар си изпитиме, таро букя колато мангел лескоро сърцес, колато циден лес тай хохавен лес.“ (Як. 1:14) Давкха стихи сикавел аменге кай секоне манушес иси различна изпитания. Например ащи йекхе пхралеске те мангел пес те керел мръсна букя йекхе жувляса, а авереске ащи те мангел пес те керел мръсна букя йекхе мрушеса. Калкенге колато преди дикхле мръсна букя ащи пак те мангел пес ленге те дикхен салка букя. Аверенге ащи те мангел пес те дрогиринен пес или те макярен пес сарто керенас преди. Десаве пхрала тай пхеня тай мануша колато изучинен и Библия боринен пес салке букиенца. Секо йекх амендар декхана чувствингяс пес сар о Павел ковато пхенгяс: „Кана мангав те керав давкха со си лачшо е Девлеске андо якха, авел манге андрал те керав давкха со си кханило.“ (Рим. 7:21)

3. Со ащи те мислинел песке декхой колеске често мангел пес те керел йекх тай съща кханиле букя?

³ Ако често мангел пес туке те керес йекх тай съща кханиле букя, ащи те мислинес кай нанай тут силес те керес со мангел о Дел. Ашал далкхеске ащи те мислинес туке също кай нанай сар те овес лачшо е Йеховаске андо якха. Ама ащи те овес сигурно кай нито йекх калке букиендар нанай верно! Калке урокиесте ка дикхас соске тай ка ахальовас калка дуй букя: 1) Кой мангел те мислинес туке кай нанай тут силес те боринес тут тай кай на синян лачшо е Йеховаске андо якха? 2) Сар ащи те боринес тут е кханиле букиенца колато мангел пес туке те керес?

СО МАНГЕЛ О БЕНГ ТЕ МИСЛИНАС АМЕНГЕ

4. a) Соске о Бенг мангел те мислинас кай нащи те боринас амен е кханиле букиенца колато мангел пес аменге те керас? б) Соске ащи те овас сигурна кай иси амен силес далкхеске?

⁴ О Бенг мангел те мислинас кай нанай амен силес те керас со мангел о Дел кана мангел пес аменге те керас кханиле букя. О Исусес сикавгяс давкха кана пхенгяс пе ученикиенге те молинен пес: „Помагине аменге те на керас безех тай пазине амен таро Бенг.“ (Мат. 6:13) О Бенг пхенел кай о мануша нанай те шунен е Йеховас кана мангел пес ленге те керен кханиле букя. (Йов 2:4, 5) Соске мислинел давкха? Соскето ов сине о първо ковато мукляс кавка со мангел пес леске те хохавел лес тай на ачшило верно е Йеховаске. Аке соске ов мислинел кай аме синям сар лесте тай кай веднага ка иринас думо е Йеховаске кана авел десаво изкушение. О Бенг мислинелас кай ов ка ащи те традел даже е Девлескере Чшавес те керел безех. (Мат. 4:8, 9) Ама верно ли си кай нанай амен силес те боринас амен е кханиле букиенца колато мангел пес аменге те керас? Нанай верно. Аме-да сар о апостол Павел ащи те пхенас: „Всичконаске иси ман силес, соскето о Дел дел ман сила.“ (Флп. 4:13)

5. Катар жанас кай о Йехова си сигурно кай аме ащи те боринас амен е кханиле букиенца колато мангел пес аменге те керас?

⁵ О Йехова нанай сар о Бенг. Ов си сигурно кай аме ащи те боринас амен е кханиле букиенца колато мангел пес аменге те керас. Катар жанас давкха? О Йехова пхенгяс кай бут мануша ка ачшон леске верна тай ка ачшон живде ко баро бедствие. О Йехова ковато нащи хохавел пхенел кай бут мануша ка ден андо нево светос „урявде парне шехиенца“, демек шуже е Девлеске андо якха. (Откр. 7:9, 13, 14) Давкха сикавел кай о Йехова мислинел кай аме ащи те боринас амен е кханиле букиенца колато мангел пес аменге те керас.

6-7. Со авер мангел те мислинас о Бенг?

⁶ О Бенг мангел също те мислинас кай нанай сар те овас лачше е Йеховаске андо якха ашал далкхеске кай мангел пес аменге те керас кханиле букя. Соске мангел те мислинас давкха? Соскето ов нисар нанай те овел лачшо е Йеховаске андо якха тай ка овел унищожиме. (Бит. 3:15; Откр. 20:10) О Бенг бут къскандинел далкхестар кай амен иси амен надежда те живинас вечно. Ов керел со ащи за те традел амен те мислинас кай синям сар лесте тай нищо лачшо на жарел амен-да. Ама аме нисар на синям сар лесте. Даже тари Библия ахальовас кай о Йехова мангел те помагинел аменге за те ащи те живинас вечно. Ов „на мангел никхой те овел унищожиме а саворе те овен пишмани пе безехенге.“ (2 Пет. 3:9)

⁷ Ако мислинас кай нанай амен силес те боринас амен или кай нанай сар те овас лачше е Йеховаске андо якха, керас давкха со мангел о Бенг. Ако ахальовас давкха шукар ка ащи те заачшовас мамуй лесте. (1 Пет. 5:8, 9)

СО АЩИ ТЕ МИСЛИНАС АМЕНГЕ АШАЛ ДАЛКХЕСКЕ КАЙ СИНЯМ БЕЗЕХАЛЕ

8. Со пхенел и Библия кай си о безех? (Псалм 51:5) (Дикх и бележка-да „Со си“.)

⁸ Ма само о Бенг ащи те традел амен те мислинас кай нанай амен силес те боринас амен е кханиле букиенца колато мангел пес аменге те керас тай кай нащи те овас лачше е Йеховаске андо якха. Ащи те мислинас аменге калка букя ашал о безех-да ковато иси амен таро Адам тай тари Ева.a (Йов 14:4; четине Псалм 51:5.)

9-10. а) Со ачшило е Адамиеса тай е Еваса след като ачшиле безехале? (Дикх и картинка-да.) б) Сар о безех традел амен те чувствинас амен авдиес?

⁹ Дикх со ачшило е Адамиеса тай е Еваса кана ачшиле безехале. След като на шунде е Девлес он гаравде пес тай дикхле со са те учшарен пес за те на овен нанге. О Адам тай и Ева нащине по-бут те овен амала е Йеховаса. Со-да те керенас винаги ка лажанас тай ка ханас холи соскето сине безехале. Нанаяс сар те махнинен о безех пестар.

¹⁰ Аме на синям сар о Адам тай и Ева. Е Исусескери жертва на сине за ленге. Ама ашал лаке амаре безеха ащи те овен простиме тай те овас амала е Девлеса. (1 Кор. 6:11) Ама аме още синям безехале. Аке соске ащи те чувствинас амен виновна, те хас холи, те мислинас кай нищо на ачшол амендар тай те лажас. И Библия пхенел кай о безех керел пхаро о животос е манушенгоро даже калкенгоро колато „на керде о също безех сар о Адам“. (Рим. 5:14) Ама на требе те мислинас кай нанай амен силес те боринас амен е кханиле букиенца колато мангел пес аменге те керас тай кай нащи те овас лачше е Йеховаске андо якха. Сар ащи те спиринас те мислинас калке букиенге?

11. Даже ако мислинас кай нащи те боринас амен е кханиле букиенца колато манген пес аменге, со ащи те керас винаги? (Римляни 6:12)

¹¹ Ашал далкхеске кай синям безехале подекхана ащи те мислинас кай нанай сар те боринас амен е кханиле букиенца колато манген пес аменге. Все едно йекх гласос амаре шересте пхенел аменге давкха, ама аме на требе те шунас лес. Соске? Соскето и Библия пхенел кай аме ащи те на домукас о безех „те командинел амен“. (Четине Римляни 6:12.) Давкха сикавел кай ащи те на керас о букя колато манген пес аменге. (Гал. 5:16) О Йехова си сигурно кай ащи те отчшияс о изкушения иначе нанаяс те пхенел аменге те керас лес. (Втор. 30:11-14; Рим. 6:6; 1 Сол. 4:3) Ащи те овас сигурна кай ащи те боринас амен е кханиле букиенца колато манген пес аменге.

12. Со требе те керас ако мислинас кай нанай сар те овас лачше е Йеховаске андо якха тай соске?

¹² Ако мислинас кай нанай сар те овас лачше е Йеховаске андо якха ашал далкхеске кай мангел пес аменге те керас кханиле букя требе те дас амен годи кай о безех пхенел аменге давкха тай те на шунас лес. Соске? Соскето и Библия пхенел кай о Йехова жанел кай синям безехале. (Пс. 103:13, 14) Ов жанел всичко аменге тай жанел даже сар о безех аравгяс секоне йекхес амендар. (1 Йоан 3:19, 20) Ако боринас амен е кханиле букиенца колато мангел пес аменге те керас, ка овас шуже е Йеховаске андо якха. Соске ащи те овас сигурна далкхесте?

13-14. Пхен дали давкха кай мангел пес аменге те керас кханиле букя означинел кай нащи те овас лачше е Йеховаске андо якха.

¹³ И Библия сикавел кай давкха те мангас те керас кханиле букя тай те керас лен си бут различно. Нащи винаги те отчшиас о кханиле букя колато авен амаре гогяте, ама ащи те спиринас амен те керас лен. Например десаве християня ко Коринт преди совенас мруш мрушеса тай жувли жувляса. О Павел пишингяс: „Салка сине десаве тумендар.“ Означинел ли давкха кай ленге нисар по-бут на мангелас пес те керен мръсна букя? На-а, соскето си бут трудно те спиринес те мангес те керес салка букя. Ама о християня колато спириненас пес те керен кханиле букя, сине лачше тай шуже е Йеховаске андо якха. (1 Кор. 6:9-11) Аме-да ащи те овас сар ленде.

¹⁴ Саве-да кханиле букя те мангел пес туке те керес, ащи те боринес тут ленца. Даже ако нащи те спиринес те мислинес ленге, ащи те спиринес те мангес те керес давкха со традел тут те керес о безех. (Еф. 2:3) Со ащи те помагинел туке далкхеске?

СО КА ПОМАГИНЕЛ ТУКЕ ТЕ БОРИНЕС ТУТ?

15. Соске на требе те хохавес тут за те ащи те боринес тут е кханиле букиенца колато манген пес туке те керес?

¹⁵ За те ащи те боринес тут е кханиле букиенца колато манген пес туке те керес требе те жанес соса си туке пхаро те боринес тут. Ма хохав тут. (Як. 1:22) Например ако декхой дехел те пиел бут ащи те мислинел песке кай давкха нанай проблеми соскето авер пиен по-бут лестар. Или декхой ковато дикхел мръсна букя ащи те мислинел песке: „Нанаяс те мангав те дикхав салка букя ако ми ромни сикавелас манге по-бут любов.“ Ако мислинес туке салка букя ка овел по-лесно те керес безех. Ма роде туке извинения те керес кханиле букя. Ту синян отговорно е букиенге колато керес. (Гал. 6:7)

16. Сар целоне вогиеса те мангес те керес давкха со мангел о Дел?

¹⁶ На требе само те жанес соса си туке пхаро те боринес тут, а целоне вогиеса-да те мангес те на керес лес. (1 Кор. 9:26, 27; 1 Сол. 4:4; 1 Пет. 1:15, 16) Мислине со най-бут традел тут те мангес те керес давкха тай кана си туке най-пхаро те на керес лес. Например ащи те овел туке най-пхаро кана синян измориме или презал и рат. Подготвине тут тай решине со ка керес за те пазинес тут. Най-шукар си те керес давкха англал те авел о изкушение. (Пр. 22:3)

17. Со ащи те сикльовас таро Йосиф? (Битие 39:7-9) (Дикх и картинка-да.)

¹⁷ Дикх со кергяс о Йосиф кана лескере господариескери ромни траделас лес те совел ласа. Ов веднага откажингяс лаке. (Четине Битие 39:7-9.) Со сикльовас далкхестар? Още англал давкха те ачшол о Йосиф вече решингясас те керел со мангел о Дел. Ту-да ащи те дес всичко тутар за те мангес целоне вогиеса те керес со мангел о Дел още англал те авел десаво изкушение. Тогава ка овел туке по-лесно соскето вече решингян со ка керес.

ЧЕСТО ДИКХ СО СИ ТЕ СЪРЦЕСТЕ

18. Сар те побединес о кханиле букя колато мангел пес туке те керес? (2 Коринтяни 13:5)

¹⁸ За те побединес о кханиле букя колато мангел пес туке те керес требе те продължинес те дикхес со си те сърцесте. (Четине 2 Коринтяни 13:5.) Подекхана пуч тут дали о букя колато мислинес тай керес си шукар тай ако требе дикх те променинес тут. Например даже кана отчшивгян йекх изкушение ащи те пучес тут: „Кибор време требелас манге?“ Ако на отчшивгян лес веднага, ма ха холи, ама дикх сар ащи авер дром те керес давкха по-шукар. Мислине салке букиенге: „Ако ме гогяте авен кханиле букя, ащи ли по-сиго те спиринав те мислинав за ленге? Дали ашал о букя колато дикхав, четинав тай шунав си манге още по-лесно те мислинав кханиле букиенге? Пхандав ли веднага ме якха кана ки телевизия сикавен мръсна букя? Ахальовав ли кай си мере лачшипнаске те керав давкха со мангел о Йехова даже ако требе те дав всичко мандар за те на шунав мо сърцес?“ (Пс. 101:3)

19. Сар ащи ашал о решения колато на дикхьон боркха важна те овел аменге още по-пхаро те боринас амен е кханиле букиенца колато мангел пес аменге те керас?

¹⁹ На требе те родес туке извинения-да е кханиле букиенге колато керес. И Библия пхенел: „О сърцес хохавел по-бут всичконастар тай кана си леске пхаро си готово те керел всичко.“ (Йер. 17:9) Например йекх мануш ковато преди дикхляс мръсна букя ащи те започнинел те мислинел песке кай нищо нанай те ачшол ако дикхел снимкес колато траден лес те мислинел мръсноне букиенге ама на сикавен нанге манушен. Или ащи те мислинел: „Нанай нищо кханило далкхесте те представинав манге кай керав мръсна букя щом на керав лен?“ Ако декхой мислинел салка букя, давкха со ка мангел те керел ка овел давкха со пхенел леске лескоро сърцес. (Рим. 13:14) Сар те на ачшол давкха? Внимавине тай дикх те на лес десаве кханиле решения, даже те на дикхьон боркха важна, ашал коленге те ресес жи отхе те керес безех.b Отчшив всичко со авел те гогяте тай ащи те традел тут те родес туке извинения те керес кханиле букя.

20. Со жарас те ачшол тай катар иси амен помощ акана?

²⁰ Сарто ахалилям о Йехова дел амен силес те отчшияс о изкушения. Също ашал е Исусескери жертва ов ащи те простинел амаре безеха тай те дел амен вечно животос ко рай ки пхув. Ка овас бут щастлива кана ка ащи те служинас е Йеховаске без те боринас амен е кханиле букиенца колато мангел пес аменге те керас. Жи кай на ачшол давкха ащи те овас сигурна кай ка овен амен силес те боринас амен е кханиле букиенца колато мангел пес аменге те керас тай кай ащи те овас лачше е Йеховаске андо якха. Ашал далкхеске кай о Йехова ка благословинел амен кана дас всичко амендар, аме ащи те побединас!