Помагине е манушенге, коленца изучинес и Библия, те решинен те служинен е Йеховаске

1-2. а) Соске десаве мануша, колато изучинен и Библия, даран те ачшон е Йеховаскере свидетеля? б) Со ка дикхас калке урокиесте?

Сине ли букя, ашал коленге халян холи тай дарасас те ачшос е Йеховаскоро свидетели? Сигурно дарасас, кай те колегя, те амала или то семейство ка нерверинен пес бут, ако ачшос Свидетели. Или мислингян, кай нисар нанай те ащи те живинес, сарто мангел о Дел. Ако халян холи салке букиенге ащи те ахальовес сар чувствинен пес десаве мануша, колато изучинен и Библия тай соске ащи те овел ленге пхаро те ачшон е Йеховаскере свидетеля.

² О Исусес жанелас, кай салка букя ащи те пречинен декхаске те служинел е Йеховаске. (Мат. 13:20-22) Ама ов продължингяс те помагинел калкенге, колато даранас те ачшон лескере ученикя. Ов керелас давкха като 1) помагинелас ленге те ахальовен соске сине ленге пхаро те решинен те служинен е Йеховаске, 2) помагинелас ленге те дехен е Йеховас по-бут, 3) помагинелас ленге те тховен е Йеховас ко първо тхан пе животосте тай 4) сикавелас лен со те керен, кана окола дикхен те спиринен лен те служинен е Йеховаске. Сар ащи сар о Исусес те помагинас е манушенге те ачшон е Йеховаскере свидетеля, жикай изучинас ленца о лил „Шукар животос завинаги!“?

ПОМАГИНЕ Е МАНУШЕСКЕ, КОЛЕСА ИЗУЧИНЕС, ТЕ АХАЛЬОВЕЛ СОСКЕ СИ ЛЕСКЕ ПХАРО ТЕ РЕШИНЕЛ ТЕ СЛУЖИНЕЛ Е ЙЕХОВАСКЕ

3. Со пречинелас е Никодимиеске те ачшол е Исусескоро ученики?

³ О Никодим сине важно управники ки Юдея, ама сине десаве букя, колато пречинде леске те решинел те ачшол е Исусескоро ученики. Накхле само шов масек отсар о Исусес проповединелас тай о Никодим ахалило, кай ов си бичшалдо таро Дел. (Йоан 3:1, 2) Ама ов хоратинелас е Исусеса само машкар и рат, соскето даралас таро юдея. (Йоан 7:13; 12:42) Ов ащи те мислинелас песке, кай нанай те ачшол лес нищо, ако ачшол е Исусескоро ученики.a

4. Сар о Исусес помагингяс е Никодимиеске те ахальовел со мангел о Дел лестар?

⁴ О Никодим бут шукар жанелас о Закони, ковато о Дел диняс е Моисейес, ама декхой требелас те помагинел леске те ахальовел со мангел о Йехова лестар. Сар помагингяс леске о Исусес? Ов сине готово те хоратинел е Никодимиеса даже презал и рат. О Исусес бут ясно пхенгяс леске со требе те керел, за те ачшол лескоро ученики: те овел пишмани пе безехенге, те покръстинел пес паниесте тай те сикавел, кай верувинел ке Девлескоро чшаво. (Йоан 3:5, 14-21)

5. Сар ащи те помагинас е манушеске, колеса изучинас, те ахальовел со пречинел леске те служинел е Йеховаске?

⁵ Даже ако о мануш, колеса изучинас, те ахальовел и Библия шукар може би ка требе те помагинас леске те ахальовел со пречинел леске те служинел е Йеховаске. Например ащи те керел бути бут сахакя или лескоро семейство те на мангел ов те ачшол йекх таре Йеховаскере свидетеля. Дикх сар о Исусес те отделинес време е манушеске, колеса изучинес. Ащи те жан те пиен кафес заедно или те пхиравен тумен. Тогава ов ка ащи те пхенел по воги тай ту ка ащи те ахальовес саве проблемя иси лес. Пхен е манушеске, кай си шукар те променинел по животос, за те сикавел пи любов кариг о Йехова а ма за те анел радост туке.

6. Сар ащи те помагинес е манушеске, колеса изучинес, те овен лес силес те керел о букя, колато сикльовел? (1 Коринтяни 16:13)

⁶ Кана о мануш, колеса изучинас и Библия, си сигурно, кай о Йехова ка помагинел леске те керел со си шукар леске андо якха, давкха ка дел лес силес те керел о букя, колато сикльовел. (Четине 1 Коринтяни 16:13.) Ащи те ахальовес сар най-шукар те помагинес е манушеске, колеса изучинес, като мислинес далкхеске кова сине то любимо учители ки училища. Сигурно сине о учители, ковато ма само сикавелас тут сар керен пес десаве букя, ама помагинелас-да туке те овес сигурно, кай ту ащи те керес лен. Ако мангас те сикавас е манушен шукар, на требе само те пхенас ленге со мангел о Дел, а требе те помагинас-да ленге те овен сигурна, кай он ащи те керен со мангел о Йехова, соскето ов помагинел ленге. Сар ащи те керас давкха?

ПОМАГИНЕ Е МАНУШЕСКЕ, КОЛЕСА ИЗУЧИНЕС, ТЕ ДЕХЕЛ Е ЙЕХОВАС ПО-БУТ

7. Сар о Исусес помагингяс калкенге, колато шуненас лес, те дехен е Йеховас по-бут?

⁷ О Исусес жанелас, кай кана декхой дехел е Йеховас, ка мангел те керел о букя, колато сикльовел тари Библия. Ов сикавелас пе ученикиен букя, колато те помагинен ленге те барярен пи любов кариг пе небесноне Дадесте. Например ов пхенгяс, кай о Йехова си сар дад, ковато дел пе чшавен шукар букя. (Мат. 7:9-11) Десавен таро мануша, колато шуненас е Исусес, може би на сине лачшо дад. Представине туке сар чувствинде пес он, кана о Исусес пхенгяс ленге о примери, колесте йекх лачшо дад приемингяс пе чшес, кана о чшо решингяс те иринел пес кхере, въпреки кай кергясас бут кханиле букя. О Исусес помагингяс е манушенге те дикхен, кай о Йехова бут дехел лен тай мангел те помагинел ленге. (Лука 15:20-24)

8. Сар ащи те помагинес е манушеске, колеса изучинес и Библия, те дехел е Йеховас по-бут?

⁸ Ту-да ащи те помагинес е манушеске, колеса изучинес и Библия, те дехел е Йеховас по-бут, като често хоратинес далкхеске саво си о Йехова. Помагине леске секо дром, кана изучинен, те ахальовел сар давкха со сикльовел сикавел, кай ов дехел амен. Кана хоратинен далкхеске, кай о Йехова диняс пе Чшес за аменге, помагине леске те ахальовел, кай ов кергяс давкха ма само соскето дехел саворе манушен, а соскето дехел лес-да. (Рим. 5:8; 1 Йоан 4:10) Кана о мануш ахальовел кибор бут о Йехова дехел лес, ов-да ка дехел е Йеховас са по-бут. (Гал. 2:20)

9. Со помагингяс йекхе манушеске те променинел по животос?

⁹ Дикх со ачшило йекхе манушеса тари Индонезия, колескоро алав си Майкъл. Лескоро дад тай лескери дай сине Свидетеля, ама ов на покръстисайло. Кана сине на 18, ов гело те керел бути ки чужбина. По-късно ов прандесайло анди Индонезия, ама мукляс пе ромня тай пе чшая отхе тай продължингяс те керел бути ки чужбина. Тогава лескери ромни тай лескери чшай започнинде те изучинен и Библия тай те керен давкха со сикльовен. Кана лескери дай мули, о Майкъл решингяс те иринел пес кхере, за те дикхел пе дадес тай ов-да започнингяс те изучинел. О букя тари част „Роде по хоресте“ ко 27 уроки таро лил „Шукар животос завинаги!“ направо дине лескере вогиесте. Кана мислингяс кибор дукханило е Йеховас те дикхел пе чшавес те мъчинел пес, о Майкъл започнингяс те ровел. Тай кана дикхляс кибор бут о Йехова тай о Исусес дехен лес, ов сине бут благодарно, променингяс по животос тай покръстисайло.

ПОМАГИНЕ Е МАНУШЕСКЕ, КОЛЕСА ИЗУЧИНЕС, ТЕ ТХОВЕЛ Е ЙЕХОВАС КО ПЪРВО ТХАН ПЕ ЖИВОТОСТЕ

10. Со кергяс о Исусес, за те помагинел пе ученикиенге те керен по-бут е Йеховаске? (Лука 5:5-11) (Дикх и снимка-да.)

¹⁰ Десаве таре Исусескере ученикя веднага ахалиле, кай ов си о Месия, ама ленге-да требелас помощ те ахальовен, кай за те служинен е Йеховаске, требе те ден всичко пестар те проповединен и лачши новина. Накхлосас десаво време отсарто о Петрес тай о Андрей сине е Исусескере ученикя, кана ов канингяс лен те овен постоянно леса. (Мат. 4:18, 19) Он, заедно е Яковеса тай е Йоанеса, сине рибаря тай икаленас бут парес. (Мар. 1:16-20) Кана о Петрес тай о Андрей мукле пи бути, сигурно мислинде сар те парварен пе семействонен, жикай си е Исусеса. Соске и служба сине по-важно ленге таро парес? Ко лил Лука четинас, кай о Исусес кергяс чудо, ковато баряргяс ленгери вяра, кай о Йехова ка дикхел ленге. (Четине Лука 5:5-11.)

11. Со ащи те пхенас е манушеске, колеса изучинас, за те помагинас леске те барярел пи вяра?

¹¹ Аме нащи те керас чудеса сар о Исусес, ама ащи те пхенас е манушенге сар о Йехова помагинел калкенге, колато тховен лес ко първо тхан пе животосте. Например дес ли тут годи сар о Йехова помагингяс туке, кана започнингян те жас ко събрания? Може би требелас те хоратинес е бареса тай те пхенес леске, кай нанай те ащи те керес бути, кана иси тут събрания. Пхен е манушеске, колеса изучинес, сар барили ти вяра, като дикхлян сар о Йехова помагингяс туке, кана тховгян лес ко първо тхан те животосте.

12. а) Соске си шукар те канинас различноне пхрален тай пхениен кана изучинас йекхе манушеса? б) Со авер ащи те керес, за те помагинес е манушеске те тховел е Йеховас ко първо тхан пе животосте? Пхен йекх примери.

¹² Бут си шукар, кана авер пхрала тай пхеня-да ащи те пхенен е манушеске, колеса изучинес, сар променинде по животос, за те овел о Йехова о най-важно ленге. Канине различноне пхрален тай пхениен ко изучаване тай пуч лен сар ахалиле и истина тай со керде, за те керен по-бут анди служба е Йеховаске. Също ащи те дикхен заедно е манушеса о клиповя ки част „Роде по-хоресте“ или ки част „Ахальов по-бут“ таро лил „Шукар животос завинаги!“. Например кана изучинен о 37 уроки тай дикхен о клипи „О Йехова ка дел амен о букя, колато требен аменге“, помагине е манушеске те ахальовел, кай о Йехова ка помагинел леске, кана ов тховел лес ко първо тхан.

СИКАВ Е МАНУШЕС, КОЛЕСА ИЗУЧИНЕС, СО ТЕ КЕРЕЛ, КАНА ОКОЛА ДИКХЕН ТЕ СПИРИНЕН ЛЕС ТЕ СЛУЖИНЕЛ Е ЙЕХОВАСКЕ

13. Со кергяс о Исусес, за те жанен со те керен лескере ученикя, кана дикхен те спиринен лен те служинен е Йеховаске?

¹³ О Исусес бут дром пхенгяс пе ученикиенге, кай окола, даже ленгере енданя, ка дикхен те спиринен лен те служинен е Йеховаске. (Мат. 5:11; 10:22, 36) Хари англал те мерел, ов пхенгяс ленге, кай даже ащи те мударен лен, ашал далкхеске, кай служинен е Йеховаске. (Мат. 24:9; Йоан 15:20; 16:2) О Исусес пхенгяс пе ученикиенге те внимавинен, кана проповединен тай те на споринен калкенца, колато захан пес ленца, за те ащи те продължинен те проповединен.

14. Сар ащи те помагинас е манушеске, колеса изучинас, те овел готово, кана декхой дикхел те спиринел лес те служинел е Йеховаске? (2 Тимотей 3:12)

¹⁴ Аме-да сар о Исусес ащи те пхенас е манушеске, колеса изучинас, со ащи те пхенен тай те керен лескере колегя, амала тай енданя, ашал далкхеске кай ов изучинел и Библия. (Четине 2 Тимотей 3:12.) Десаве колегя ащи те асан леске, кай живинел, сарто мангел о Дел. Авер тай даже лескере енданя ащи те пхенен, кай о букя, коленде верувинел, си глупоскя. Шукар си те хоратинас калке букиенге, за те жанел о мануш, колеса изучинас, со те пхенел тай со те керел, кана авен салка проблемя.

15. Со ащи те помагинел е манушеске, колеса изучинес, кана лескере енданя дикхен те спиринен лес те служинел е Йеховаске?

¹⁵ Ако декхой лескере семействостар дикхел те спиринел лес те служинел е Йеховаске, помагине е манушеске, колеса изучинес, те мислинел соске лескоро ендано нерверинел пес. Ащи лескере енданя те мислинен, кай е Йеховаскере свидетеля хохавен или кай си кханиле мануша. Даже десаве тере Исусескере енданя мислиненас, кай ов си денило. (Мар. 3:21; Йоан 7:5) Сикав е манушес, колеса изучинес, те овел търпеливо тай те хоратинел лачшипнаса пе енданиенца тай околе манушенца.

16. Сар ащи те помагинас е манушеске, колеса изучинас, те пхенел пе енданиенге состе верувинел?

¹⁶ Даже кана лескере енданя манген те жанен по-бут тари Библия, ка овел шукар о мануш, колеса изучинес, те на пхенел ленге всичко со жанел наведнъж. Ако керел давкха, ащи те авел ленге бут тай те на манген авер дром те хоратинен леса калке букиенге. Аке соске пхен е манушеске, колеса изучинес, кай си шукар те хоратинел хари е букиенге, коленде верувинел, за те ащи лескере енданя авер-да дром те манген те хоратинен леса е Девлеске. (Кол. 4:6) Ов ащи те сикавел ленге о сайти jw.org, колестар ащи те сикльовен по-бут е Йеховаскере свидетеленге.

17. Сар ащи те сикавес е манушес, колеса изучинес, со те отговоринел, кана пучен лес десаве букя е Йеховаскере свидетеленге? (Дикх и снимка-да.)

¹⁷ Ащи те сикавес е манушеске, колеса изучинес, о статиес „Въпрося, колато бут мануша пучен“ ко сайти jw.org, за те помагинес леске те жанел сар те отговоринел, кана лескере енданя или колегя пучен лес десаве букя. (2 Тим. 2:24, 25) Ма бистер те използвинес о блокчес „Десаве мануша пхенен“, ковато си секоне урокиесте таро лил „Шукар животос завинаги!“. Пхен леске, кай си шукар те представинел песке сар пхенел декхаске состе верувинел. Ако требе, ма дара те пхенес леске сар те хоратинел по-шукар. Кана традес лес те керел пес все едно пхенел туке состе верувинел, ов ка сикльол те хоратинел далкхеске околенца-да.

18. Сар ащи те помагинес е манушеске, колеса изучинес, те мангел те ачшол вестители? (Матей 10:27)

¹⁸ О Исусес пхенгяс пе ученикиенге, кай требе те шунярен и лачши новина. (Четине Матей 10:27.) Кибор по-сиго йекх мануш сикльол те проповединел, боркха по-сиго ка сикльол те мукел пес е Йеховаске андо васта. Сар ащи те помагинес е манушеске, колеса изучинес, те мангел те проповединел? Ако ка овел кампания те проповединел пес по-бут отхе, кате бешен, пхен е манушеске, колеса изучинес, кай ка овел шукар те мислинел со требе те керел, за те ачшол вестители. Кана иси сайка кампания ка овел леске по-лесно те започнинел те проповединел. Ка овел шукар също те започнинел те керел задачес ко събрание презал о курко, соскето давкха ка помагинел леске те сикльол сар по-лачшес те пхенел околенге состе верувинел.

СИКАВ Е МАНУШЕСКЕ, КОЛЕСА ИЗУЧИНЕС, КАЙ ВЕРУВИНЕС, КАЙ ОВ МАНГЕЛ ТЕ АНЕЛ РАДОСТ Е ЙЕХОВАСКЕ

19. Сар о Исусес сикавгяс пе ученикиенге, кай жанел, кай он манген те анен радост е Йеховаске?

¹⁹ Англал о Исусес те иринел пес ко небес, ов пхенгяс пе ученикиенге, кай йекх диес он пак ка овен заедно. Он на ахалиле, кай о Исусес мангелас те пхенел ленге, кай он-да ка жан ко небес. Ама въпреки кай на ахальовенас всичко, о Исусес сине сигурно, кай он манген те анен радост е Йеховаске. (Йоан 14:1-5, 8) Ов жанелас, кай требел ленге време те ахальовен десаве букя, например давкха, кай ка живинен ко небес. (Йоан 16:12) Аме-да сар о Исусес ащи те сикавас е манушенге, коленца изучинас, кай жанас, кай он манген те анен радост е Йеховаске.

20. Сар йекх пхен таро Малави сикавгяс, кай верувинел, кай и жувли, коласа изучинелас, мангел те керел со требе?

²⁰ Аме синям сигурна, кай о мануша, коленца изучинас, манген те керен со требе. Например йекх пхен таро Малави, колакоро алав си Кифундо, започнингяс те изучинел о лил „Шукар животос завинаги!“ йекхе терне жувляса, колакоро алав си Алинафе тай сине католичка. Кана свършинде о 14 уроки, и пхен пучляс е жувля со мислинел е иконенге. Тогава и Алинафе нерверисайли тай пхенгяс: „Ме коркори ащи те решинав дали те използвинав иконес или на-а!“ Палал далкхесте и Кифундо мислингяс, кай и Алинафе нанай те мангел те изучинел по-бут. Ама и пхен продължингяс те изучинел е жувляса тай верувинелас, кай кана накхел хари време, ой ка ахальовел, кай на требе те използвинел иконес. Накхле десаве масекя тай и Кифундо пучляс е жувля о въпроси таро 34 уроки: „Сар помагингяс туке жи акана кавка, кай изучинес и Библия тай жанес по-бут е Йеховаске?“ Тогава и Алинафе пхенгяс боркха шукар букя тай йекх лендар сине, кай о Свидетеля на керен букя, колато и Библия пхенел, кай си кханиле. Хари палал далкхесте ой спирингяс те използвинел иконес тай покръстисайли.

21. Сар ащи те помагинас е манушеске, колеса изучинас, те решинел те служинел е Йеховаске?

²¹ О Йехова си кавка, ковато „керел те барьол“, ама аме ащи те помагинас е манушеске, колеса изучинас, те решинел те служинел леске. (1 Кор. 3:7) Аме ма само сикавас лес со мангел о Дел лестар, а помагинас-да леске те дехел е Йеховас са по-бут тай те сикавел леске пи любов, като тховел лес ко първо тхан пе животосте. Сикавас лес също сар те мукел пес е Йеховаске андо васта, кана декхой мангел те спиринел лес те служинел леске. Ако сикавас, кай верувинас, кай о мануш, колеса изучинас, мангел те анел радост е Йеховаске, давкха ка дел лес силес те решинел те служинел леске.