Πίστη​—Εκ Ιδιότητα σο Ντέλα Ζορ

Η ΠΙΣΤΗ τθερέλα μπαρί ζορ. Για παράδειγμας, παρόλο σο ο Μπενγκ μανγκέλα τι κερέλ-αμέν τι τσσιναβάς τι αβάς αμαλά ι Ντεβλέσκε, αμαρί πίστη βοηθίνελα-αμέν τι “σταματίνας σαρέ ο βέλη ι πφιρνέσκε σο τθερένα γιακ”. (Εφεσ. 6:​16) Η πίστη ντέλα-αμέν ζορ τι νακχαβάς προβλήματα σο ισί σαρ βεσά. Ο Ιησούς βακερντάς πι μαθητένγκε: «Άμα τθερένα αζόμ πίστη καζόμ ισί ο σπόρος ι μουσταρδάκο, κα βακερέν ακαλέ βεσέσκε: “Τζα οτθέ” ντα κα τζαλ». (Ματθ. 17:​20) Η πίστη τθερέλα ι ζορ τι ατσσικιαρέλ-αμέν πασέ κο Ιεχωβά, οτθάρ ισί λατσσό τι ντικχάς ακαλά ερωτήσεις: Σο ισί η πίστη; Σο σχέση τθερέλα η πίστη αμαρέ γκίσαρ; Σαρ κα κεράς-λα πιο ζουρανί; Ντα κάστε πρέπει τι τθεράς πίστη;​—Ρωμ. 4:3.

ΣΟ ΙΣΙ Η ΠΙΣΤΗ;

Πίστη νανέ σάντε τι πακιάς ι αλήθεια ή τι τζανάς-λα ντα τι μουτθαβάς-λα, σόσκε ατζέ-ντα «ο δαίμονες . . . πακιάνα [ότι ο Ντεβέλ υπαρχίντιβελα] ντα ιζράνα κατά νταρ». (Ιακ. 2:​19) Αλλά σο ισί η πίστη;

Σαρ βακερέλα η Αγία Γραφή, η πίστη τθερέλα τι κερέλ ντουέ πραγματέντζαρ. Πρώτον, «πίστη ισί η σιγουριά σο τθερέλα εκ τζενό οντουλένγκε σο μπεκλεντίνελα τι αβέν». (Εβρ. 11:​1α) Άμα τθερένα πίστη, πακιάνα σαρέ τουμαρέ γκίσαρ ότι σαρέ οντουλά σο βακερέλα ο Ιεχωβά ισί μπαγιά ντα κα αβέν-πες. Για παράδειγμας, ο Ιεχωβά βακερντάς ι Ισραηλιτένγκε: «Άμα κα μπορίνενας τι χαλαβέν ι συμφωνία σο κερντόμ τι αβέλ η ντισάρα ντα ι συμφωνία σο κερντόμ τι αβέλ η ιράτ, ντα αντικάς μα τι αβέλ η ντισάρα ντα η ιράτ κο σαάτι σο τραμπιντόμ, σάντε αζομάν κα μπορίνελας τι χαλάντιβελ η συμφωνία σο κερντόμ μι υπηρετίσαρ ι Δαβιδίσαρ». (Ιερ. 33:​20, 21) Νακχλό ποτές τουμαρέ γκοντιάταρ ότι ο κχαμ κα τσσιναβέλ τι νικιόλ ντα τι περέλ ντα ότι αντικάς να κα αβέλ ντισάρα ντα ιράτ; Σίγουρα όχι! Άμα ισινέν σίγουροι ότι ο κχαμ ποτές να κα τσσιναβέλ τι νικιόλ ντα τι περέλ, σόσκε μα τι αβέν σίγουροι ότι Οντουβά σο κερντάς-λεν ανταλά να κα κερέλ οντουλά σο βακερντάς;​—Ησ. 55:​10, 11· Ματθ. 5:18.

Δεύτερον, πίστη ισί “οντουβά σο σικαβέλα ξεκάθαρα ότι εκ πράγμας σο ναστί ντικχάσα ισί μπαγιά”. Η πίστη σικαβέλα αμένγκε «ξεκάθαρα» ή γιαβέρτουλους “κερέλα-αμέν τι πακιάς” πράγματα σο ναστί ντικχάσα αμαρέ γιακχίντζαρ αλλά ισί μπαγιά. (Εβρ. 11:​1β· υποσ.) Σο μανγκέλα τι βακερέλ ανταβά; Βακερέν ότι εκ τσσαβό πουτσέλα-τουμέν: “Σαρ τζανάσα ότι υπαρχίντιβελα η μπαρμπάλ;” Παρόλο σο ποτές να ντικχλέν ι μπαρμπάλ, κα ανένας λέσκε γκοντιάτε ο πράγματα σο σικαβένα ότι η μπαρμπάλ υπαρχίντιβελα, σαρ ισί η ανάσα σο λάσα, οντουλά σο κερέλα η μπαρμπάλ ντα γιαβερά. Κάνα ο τσσαβό κα πακιάλ ότι ανταλά ισί μπαγιά, κα αγαβέλ ότι αβέλα-πες τι πακιάλ οντουλέντε σο ναστί ντικχέλα. Αντικάς η πίστη-ντα αβέλα κάνα ντικχάσα ο πράγματα σο σικάντιβενα ξεκάθαρα παρόλο σο ναστί ντικχίντιβενα.​—Ρωμ. 1:​20.

ΠΡΕΠΕΙ ΤΙ ΤΘΕΡΑΣ ΕΚΤΙΜΗΣΗ ΑΜΑΡΕ ΓΚΙΣΤΕ

Για τι τθεράς πίστη, ντα τι σικάντιβεν αμένγκε ο πράγματα σο ναστί ντικχίντιβενα, πρέπει πρώτα τι “σικλιάς ντιπ ι αλήθεια”. (1 Τιμ. 2:4) Αλλά να ερεσέλα ανταβά. Ο απόστολος Παύλος γραφιντάς: «Πι γκίσαρ σικαβέλα πίστη [εκ τζενό]». (Ρωμ. 10:​10) Πρέπει όχι σάντε τι πακιάς κι αλήθεια αλλά τι εκτιμίνας-λα ντα. Σάντε αζομάν κα μανγκάς τι σικαβάς αμαρί πίστη, δηλαδή τι τζουβντιάς σαρ μανγκέλα ο Ντεβέλ. (Ιακ. 2:​20) Εκ τζενό σο να τθερέλα αντρέ πι γκίστε εκτίμηση ι αληθειάκε μπορεί μα τι ντελ σημασία ατζέ-ντα κο πράγματα σο σικαβένα ξεκάθαρα ότι κάτι ισί μπαγιά. Ανταβά αβέλα-πες άμα να μανγκέλα τι αλλάνελ οντουλά σο πακιάλα ή άμα μανγκέλα τι κερέλ οντουλά σο μανγκέλα λέσκο σώμας. (2 Πέτρ. 3:3, 4· Ιούδα 18) Άκ’ σόσκε κο πουρανέ μπρεσά να τθερένας πίστη σαρέ ο τζενέ σο ντικχλέ θαύματα πουμαρέ γιακχίντζαρ. (Αριθ. 14:​11· Ιωάν. 12:​37) Ο άγιος πνεύμας ι Ντεβλέσκο ανέλα πίστη σάντε κο τζενέ σο λένγκο γκι μανγκέλα μπαγιά ι αλήθεια.​—Γαλ. 5:​22· 2 Θεσ. 2:​10, 11.

ΣΑΡ ΚΕΡΝΤΑΣ Ο ΔΑΒΙΔ ΖΟΥΡΑΝΙ ΠΙ ΠΙΣΤΗ

Εκ τζενό σο τθερέλας ζουρανί πίστη ισινέ ο βασιλιάς Δαβίδ. (Εβρ. 11:​32, 33) Αλλά να τθερένας ασακί πίστη σαρέ ο τζενέ λέσκε φαμιλιάτε. Για παράδειγμας, ντικχέν σο κερντάς εκ φαρ ο Ελιάβ, ο πιο μπαρό πφραλ ι Δαβιδίσκο. Κάνα ο Γολιάθ πρασαντάς ι Ισραηλιτέν, ο Δαβίδ χολιασάλο. Οτθάρ, ο Ελιάβ κερντάς λάφια κο Δαβίδ ντα αντικάς σικαντάς ότι να τθερέλας πίστη κο Ιεχωβά. (1 Σαμ. 17:​26-28) Καέκ να τθερέλα πίστη πι μπιανιμάσταρ· ντα καέκ να λέλα-λα πι νταντέσταρ ή πι νταγιάταρ. Ο Δαβίδ τθερέλας πίστη σόσκε ισινέ αμάλ ι Ντεβλέσκο.

Κο Ψαλμός 27, ο Δαβίδ σικαβέλα σαρ κερντάς ζουρανί πι πίστη. (Εδ. 1) Σκεφτίνελας οντουλά σο νακχλόας ντα σο κερντάας ο Ιεχωβά λέσκε ντουσμανίνγκε. (Εδ. 2, 3) Εκτιμίνελας μπουτ ο ναός ι Ιεχωβάσκο. (Εδ. 4) Ο Δαβίδ ντέλας λατρεία ι Ντεβλές γιεκ γιαβερέ πιστέ τζενέντζαρ κι σκηνή της μαρτυρίας. (Εδ. 6) Ρόντελας σαρέ πι γκίσαρ ι Ιεχωβάσκε αντράλ κατά προσευχή. (Εδ. 7, 8) Ντα μανγκέλας τι σικλιόλ ι Ντεβλέσκο ντρομ. (Εδ. 11) Η πίστη ισινέ αζόμ σημαντική λέσκε σο πουτσλάς: «Κάι κα αβάβας άμα να πακιάβας;»​—Εδ. 13.

ΣΑΡ ΤΙ ΚΕΡΕΝ ΠΙΟ ΖΟΥΡΑΝΙ ΤΟΥΜΑΡΙ ΠΙΣΤΗ

Τουμέν-ντα κα τθερέν πίστη σαρ οντιά σο τθερέλας ο Δαβίδ άμα σκεφτίνενα ντα κερένα ο πράγματα σο βακερέλα ο Ψαλμός 27. Για τι τθερέν πίστη, πρέπει τι τζανέν ντιπ ι αλήθεια, οτθάρ καζόμ πιο μπουτ σικλιαρένα-τουμέν κατά Ντεβλέσκο Λάφι ντα κατά έντυπα, αζόμ πιο εύκολος κα αβέλ τι τθερέν ανταγιά ιδιότητα σο αβέλα κατά Ντεβλέσκο πνεύμας. (Ψαλμ. 1:2, 3) Κάνα σικλιαρένα-τουμέν, αρακχέν σαάτι για τι σκεφτίνεν. Άμα κερένα-λες ανταβά, τουμαρί εκτίμηση ι Ιεχωβάσκε κα μπαριόλ. Κάνα μπαριόλα τουμαρί εκτίμηση ι Ιεχωβάσκε, κα μανγκέν ατζέ πιο μπουτ τι σικαβέν τουμαρί πίστη κο συναθροίσεις ντα κο έργος. (Εβρ. 10:​23-25) Επίσης, σικαβάσα πίστη κάνα να τσσιναβάσα τι “προσευχίντιβας ντα να μουκχάσα-αμέν”. (Λουκ. 18:​1-8) Οτθάρ, «τι προσευχίντιβεν συνέχεια» κο Ιεχωβά ντα τι αβέν σίγουροι ότι «βοβ πφαμπόλα τουμένγκε». (1 Θεσ. 5:​17· 1 Πέτρ. 5:7) Η πίστη τσσίντελα-αμέν τι κεράς ο λατσσιπέ, ντα κάνα κεράσα ο λατσσιπέ, αμαρί πίστη μπαριόλα.​—Ιακ. 2:22.

ΤΙ ΣΙΚΑΒΕΝ ΠΙΣΤΗ ΚΟ ΙΗΣΟΥΣ

Ι ιράτ πριν τι μερέλ, ο Ιησούς βακερντάς πι μαθητένγκε: «Τι τθερέν πίστη κο Ντεβέλ, τι τθερέν πίστη μάντε-ντα». (Ιωάν. 14:1) Οτθάρ, πρέπει τι τθεράς πίστη, όχι σάντε κο Ιεχωβά, αλλά κο Ιησούς-ντα. Σαρ κα σικαβέν πίστη κο Ιησούς; Κα ντικχάς τριν τρόπους.

Πρώτον, τι ντικχέν ο λύτρος σαρ εκ δώρος σο κερντάς τουμένγκε ο Ντεβέλ. Ο απόστολος Παύλος βακερντάς: «Τθεράβα [ζωή] αντράλ κατά πίστη κο Τσσαβό κι Ντεβλέσκο, σο μανγκλάς-μαν ντα ντινάς πι ζωή μάνγκε». (Γαλ. 2:​20) Άμα σικαβένα πίστη κο Ιησούς, σίγουρα πακιάνα ότι ο λύτρος ισί τουμένγκε, ότι χάρη ανταλέσταρ συγχωρίντιβενα τουμαρέ αμαρτίες, ότι κα ντελ-τουμέν ζωή για πάντα ντα ότι σικαβέλα καζόμ μπουτ μανγκέλα-τουμέν ο Ντεβέλ. (Ρωμ. 8:​32, 38, 39· Εφεσ. 1:7) Ανταβά κα ντελ-τουμέν ζορ για τι νασκιαρέν ο μπέτι αισθήματα σο τθερένα τουμαρέ νεαυτόσκε.​—2 Θεσ. 2:​16, 17.

Δεύτερον, τι τζαν πιο πασέ κο Ιεχωβά αντράλ κατά προσευχή, σο μπορίνενα τι κερέν χάρη κι θυσία κι Ιησούσκι. Χάρη κο λύτρος, προσευχίντιβασα κο Ιεχωβά «με σιγουριά . . . για τι ντιντιόλ-αμέν έλεος ντα τι αρακχάς ο λατσσιπέ σο να αξίνασα-λες αζομάν σο κα χρειαζίντιβας βοήθεια». (Εβρ. 4:​15, 16· 10:​19-22) Ο προσευχές κερένα-αμέν τι μανγκάς ατζέ πιο μπουτ τι τζας κόντρα κο πειρασμός τι αμαρτίνας.​—Λουκ. 22:40.

Τρίτον, τι ντεν καν κο Ιησούς. Ο απόστολος Ιωάννης γραφιντάς: «Οντουβά σο πακιάλα κο Τσσαβό τζουβντιόλα για πάντα· οντουβά σο να ντέλα καν ι Τσσαβές να κα ντικχέλ ζωή, αλλά η χολί ι Ντεβλέσκι ατσσόλα οπρά-λέστε». (Ιωάν. 3:​36) Ο Ιωάννης βακερντάς ότι ισί τζενέ σο τθερένα πίστη ντα γιαβερά τζενέ σο να ντένα καν. Τουμέν, σικαβένα πίστη κο Ιησούς κάνα ντένα-λες καν. Ντένα καν κο Ιησούς κάνα κερένα «ο νόμος ι Χριστόσκο», δηλαδή σαρέ οντουλά σο σικλιαρντάς ντα ο εντολές σο ντινάς. (Γαλ. 6:2) Επίσης, ντένα καν κο Ιησούς κάνα ακολουθίνενα λέσκε οδηγίες σο ντέλα αντράλ κατά «πιστός ντα φρόνιμος δούλος». (Ματθ. 24:​45) Άμα ντένα καν κο Ιησούς, κα τθερέν ι ζορ τι νταϊντίνεν προβλήματα σο ισί σαρ μπαρέ καταιγίδες.​—Λουκ. 6:​47, 48.

«ΤΙ ΜΠΑΡΙΑΡΕΝ ΤΟΥΜΑΡΙ ΑΓΙΑ ΠΙΣΤΗ»

Εκ φαρ, εκ μουρς ντινάς βίκος ντα βακερντάς κο Ιησούς: «Τθεράβα πίστη! Βοήθινε-μαν οτθέ σο χρειαζίντιβαβα πίστη!» (Μάρκ. 9:​24) Οντουβά τζενό τθερέλας πίστη, αλλά αγαντάς ότι χρειαζίντιβελας ατζέ πιο μπουτ. Σαρ οντουβά τζενό, κα αβέλ ο σαάτι σο αμέν-ντα κα χρειαζίντιβας πιο μπουτ πίστη. Ντα σαρέ μπορίνασα τι κεράς πιο ζουρανί αμαρί πίστη ακανά. Σαρ ντικχλάμ, κεράσα πιο ζουρανί αμαρί πίστη κάνα σικλιαράσα-αμέν κατά Ντεβλέσκο Λάφι ντα σκεφτίνασα-λες, κάτι σο μπαριαρέλα αμαρί εκτίμηση ι Ιεχωβάσκε. Ντα αμαρί πίστη αβέλα πιο ζουρανί κάνα, γιεκ αμαρέ πφραλέντζαρ, ντάσα λατρεία ι Ιεχωβάς, βακεράσα κο τζενέ οντουλά σο μπεκλεντίνασα τι αβέν-πες ντα να τσσιναβάσα τι προσευχίντιβας. Ντα κάνα κεράσα πιο ζουρανί αμαρί πίστη, λάσα ι πιο μπαρί ευλογία σαριλένταρ. Ο Λάφι ι Ντεβλέσκο βακερέλα αμένγκε: «Πφραλάλεν, τι μπαριαρέν τουμαρί άγια πίστη . . . για τι ατσσικιαρέν τουμαρό νεαυτός κι Ντεβλέσκι αγάπη».​—Ιούδα 20, 21.