Поможын кодэлэнди, кастэ «оди цырдэлпэ каринг о чачимос»

1. Сар андярэн пэс и мануша, кала ашунэн и лащи новость? (Дила 13:47, 48; 16:14, 15).

АНДО пэрво вико бут мануша сразу приашундёнас каринг и новость пала Царство. (Проадинон Дила 13:47, 48; 16:14, 15.) Адес тожэ исин кацавэ мануша. Ай со, если варико спэрва на камэл тэ ашунэл пала кода, со ԥэнэнпэ андэ Библия? Када на сыкавэл, кай потом во на парувэла пэско гиндо и на закамэла май бут тэ уӷанэн пала Дэл. Давайте подаса дума, со тэ терас, кала амэнди попэрдёл мануш, савэстэ «оди цырдэлпэ каринг о чачимос».

2. Васо лэ манушэн, савэнди амэ поможысарас тэ жан па лэ Христоско дром, можно тэ сыстосарас лэ виткэнца?

² Тэ поможыс лэ манушэсти тэ жал па лэ Христоско дром — када сар тэ барярэс варисо пэ пэско ӷородо. Пэ дэсавэ витки и фрукты вибарён май ӥто и тути трэбуй лэн сразу тэ стидэс. Но инке трэбуй тэ на бистрэс тэ диқэс и пала авэр витки, савэнди трэбуй май бут время, кай пэр лэндэ варисо тэ вибарёл. Точно кадя жэ, кала амэ виарақлям кодэлэ манушэс, савэсти сразу чалеля о чачимос анда Библия, амэ камас со май ӥто тэ поможысарас лэсти тэ ашэл лэ Христоско ученико. Но амэ на ашавас и кодэлэн, касти трэбуй май бут время, кай тэ полэн, пэскати дэ важно о чачимос анда Библия (Иоан. 4:35, 36). Кала амэ росполаса, саво англа амэндэ мануш, амэ сможэм тэ дас лэсти со май лащи помощь. Андэ кадэя статья амэ роздиқаса, со трэбуй тэ терас, если о мануш сразу камэл тэ уӷанэн май бут пала Библия. Инке амэ уӷанаса, сар тэ поможысарас лэсти тэ ашэл май пашэ каринг о Дэл.

КАЛА О МАНУШ КАМЭЛ ТЭ УӶАНЭН О ЧАЧИМОС

3. Со тэ терас, если о мануш сразу камэл май бут тэ уӷанэн пала Дэл? (1 Коринфо 9:26).

³ Кала амэ арақас манушэс, саво камэл тэ ашунэл и лащи новость, амэ камас тэ поможысарас лэсти со май ӥто тэ тердёл по правильно дром, саво андярэл каринг и вечно жызня. Важ када на лажа сразу тэ ԥэнэс лэ манушэсти, кай исин возможность тэ сытёл па Библия, и тэ ақарэс лэс пэ амарэ собрании. (Проадинон 1 Коринфо 9:26.)

4. Сар ек манушни сразу закамля тэ сытёл па Библия?

⁴ Ԥэн, кай можно тэ сытёл па Библия. Дэсавэ мануша сразу жэ закамэн тэ сытён па Библия. Акэ со сас андэ Канада. Еқвар каринг амари тележка важ и литература поджыля ек тэрни манушни и ля и брашура «Жувэн вечно пэ бахтатэ!». И ԥэй, сави тердёлас паша тележка, росԥэндя лати, кай исин возможность бесплатно тэ сытёл па Библия. Кодэла манушняти када чалеля, и вонэ линэ ек еқэстар о номеро. Када сас в четверг. Андэ кодэва жэ дес и манушни пистросардя амаря ԥьяти и пушля, кала вой можэт тэ залэл тэ сытёл па Библия. И ԥэй ԥэндя лати, кай можэт тэ авэл каринг латэ пэ выходни. Но и манушни ԥэндя: «Ай ту можэш тэ авэс тэся? Мандэ как раз авэла время». Важ када в пятницу вонэ залинэ тэ сытён па Библия, ай ужэ пэ выходни кадэя манушни пэрво разо смоӷла тэ авэл пэ собрания. Потом латири дружба лэ Иеговаса ля ӥто тэ барёл.

5. Со трэбуй тэ терас, если о мануш спэрва на камэл тэ сытёл па Библия? (Кадяжэ диқэн и картинки.)

⁵ Амэ на аштярас, кай всаворэ́ манушэндэ авэла кацави жэ хватка тэ сытён па Библия, сар кай кадэя манушни. Дэкала амэнди прижалапэ тэ пристас май бут зор. Спэрва амэ трэбуй тэ погиндосарас, пала со лэ манушэсти авэла интересно тэ дэл дума. И дажэ если о мануш сразу на закамэла тэ сытёл па Библия, на трэбуй тэ умэкас и вас. Если тэ на парашас тэ шас сама лэ манушэс, потом во, можэт, «спилоя» и закамэла тэ сытёл. Исин ԥрала и ԥэя, савэ драго ӷанэн тэ сытярэн аврэн па Библия. Давайте уӷанаса лэндар, пала со амэ трэбуй тэ дас дума, ай пала со най, кала камас тэ залас тэ сытярас лэ манушэс па Библия.

6. Со амэ можэм тэ ԥэнас, кай о мануш тэ закамэл тэ подэл дума амэнца инке еқвар?

⁶ Бут ԥрала и ԥэя шутэ сама, кай андэ дэсавэ страны и мануша даран лэ алавэстар «изучения», или кай лэн варисости лэна «тэ сытярэн». Фэдэр вместо кадэла алава тэ ԥэнэс лэ манушэсти, кай тумэ можэте вместе «тэ адинон» и Библия, «тэ подэн дума» важ латэ или «май драго тэ уӷанэн» пала латэ. Кай о мануш тэ закамэл тэ подэл дума инке еқвар, можно тэ ԥэнэс лэсти: «Ай ту ӷанэс, кай андэ Библия можно тэ уӷанэс вся, со камэс?» Или: «Хоть и Библия сас пистромэ дэлмут, андэр латэ исин бут лашэ советоря». Инке можно тэ ԥэнэс: «Хутила ек стакано чаё, кай тэ уӷанэс варисо интересно». И най кажно разо трэбуй тэ ԥэнэс, кай тумэ лэна тэ диқэнпэ «постояно» или «кажно курко». Тоди о мануш на лэла тэ гиндой, кай во обязано туса тэ диқэлпэ.

7. Со поможысардя дэсавэнди тэ полэн, кай вонэ арақлэ о чачимос? (1 Коринфо 14:23—25).

⁷ Ақар пэ собрания. Кала жувэлас о апостало Павло, дэсавэ мануша полинэ, кай арақлэ о чачимос, кала пэрво разо авелэ пэ собрания. (Проадинон 1 Коринфо 14:23—25.) Кацаво терэлпэ и андэ амари время тожэ. Обычно, кай о мануш и дружба лэ Дэвлэса ашэл май састи тоди, кала во лэл тэ ԥирэл пэ амарэ собрании. Но кала лэс тэ ақарас? Андэ книжка «Жувэн вечно пэ бахтатэ!» пала собрании росԥэнэнпэ андэ 10-то ӷлава. Но кай тэ ақарас лэ манушэс, амэнди на трэбуй тэ аштярас, кала амэ прожаса кадэя ӷлава. Ужэ посли пэрво дума амэ можэм тэ ақарас лэ манушэс пэ собрания, сави авэла пэ выходни. Инке можно тэ ԥэнас, сави авэла речь или пала со авэла и статья анда «Сторожэво башня».

8. Со амэ можэм тэ росԥэнас лэ манушэсти, саво пэрво разо авеля пэ собрания? (Исайя 54:13).

⁸ Росԥэн лэ манушэсти, соса амарэ собрании на шонпэ пэ кода, сар стидэнпэ андэ авэр веры и каринг со во, можэт, присытеля. Ек жувли пэрво разо авеля пэ собрания и, кала проандярэнас и статья анда «Сторожэво башня», вой пушля кай и ԥэй, сави ла ақардя: «Ай кадэва мурш пэ сцэна... во со, ӷанэн всаворэн па алавэстэ?» И ԥэй ԥэндя: «И собрания важ амэндэ сар ери, важ када амэ старысавас драго ек еқэс тэ ӷанас». И жувли ԥэндя, кай андэ латири қандири совсем па аврятэ. Бут ко шол сама и пэ авэр маменторя, кала авэл пэ амарэ собрании. (Проадинон Исайя 54:13.) Амэ стидаспэ, кай тэ тэлювас лэ Иеговасти, тэ сытювас лэстар и тэ придас ек еқэсти зор (Евр. 2:12; 10:24, 25). Важ када пэ амарэ собрании нинай нисавэ обрядоря — вся прожал па кацаво порядко, кай амэ тэ сытювас варисости (1 Кр. 14:40). И ҭана, кай прожан амарэ собрании, стердэ просто и удобно, кай амэнди тэ авэл котэ вушэро тэ сытювас. Амэ на ӷуляс андэ лэ правителёнэндири дила, важ када амэ на дас дума важ и политика. Инке амэ на спорисавас ек еқэса англа всаворэ, если амарэ гиндоря на зжанпэ. Кай о мануш тэ полэл, сар прожан амарэ собрании, можно май данглал тэ сыкавас лэсти о видео «Со терэн андо зало, кай тидэнпэ лэ Иеговастирэ свидетеля?».

9, 10. Со можно тэ ԥэнас лэ манушэсти, саво дарал тэ авэл пэ амарэ собрании? (Кадяжэ диқэн и картинка.)

⁹ О мануш можэт тэ дарал, кай, если во лэла тэ ԥирэл пэ амарэ собрании, лэсти прижалапэ тэ ашэл лэ Иеговаско свидетелё. Ԥэн лэсти, кай амэ фартэ лошалэ тэ диқас лэ ӷостёнэн пэ амарэ собрании и кай во можэт просто тэ авэл и тэ диқэл, сар вся прожал. Тэ авэн пэ собрании можно всаворэ́ ереса и дажэ цыкнорэ бэятонэнца. И бэяцэ на сытён отдельно: вонэ ашэнпэ паша пэстирэ родителя. Всаворэ мануша бэшэн вместе и ашунэн и проӷрама. Важ када лэ родителёнэнди на трэбуй тэ пережывают: вонэ драго ӷанэн, каса лэндирэ бэяцэ и сости лэн сытярэн (Втор. 31:12). Кадяжэ амэ на стидас и ловэ па кажно мануш, важ кода кай о Иисусо ԥэндя: «Евья линэ — евья и дэн» (Матф. 10:8). О мануш можэт тэ пережывает, кай лэстэ нинай ӥда, сави поджылоп важ о Зало Царства. Ԥэн лэсти, кай важ када на трэбуй тэ авэл кучутни или фартэ шукарни ӥда. Важ о Дэл важно най кода, сар амэ утидаспэ, ай кода, со амэндэ андо ди (1 Сам. 16:7).

¹⁰ Кала о мануш авэла пэ амари собрания, мэк во диқэл, кай тумэ лошалэ лэсти. Поможын лэсти тэ познакомица лэ старейшынонэнца и аврэ ԥралэнца и ԥэянца. Если во диқэла, кай всаворэ обжанпэ лэса драго и анда ди шон лэс сама, во, наверно, упалэ закамэла тэ авэл амэндэ. Кала жал и собрания, тумэ можэте тэ сыкавэн лэсти и стихоря анда Библия и тема, сави амэ прожас. Кадя лэсти авэла май вушэро тэ полэл, сар амэ сытювас.

КАЛА ЗАЛЭС ТЭ СЫТЯРАС ПА БИБЛИЯ

11. Сар амэ можэм тэ сыкавас, кай цэнисарас лэ манушэстири время?

¹¹ Ай пала со трэбуй тэ сэрэс, кала варикас сытярэс па Библия? Стов патив по мануш и сэр, скати лэстэ исин время. На бистэр, кай лэстэ можэт тэ авэл и авэр важно дила. Ав кай о мануш вовремя, дажэ если о миро пэ тумарэ краёря найсыкло фартэ тэ следий пала время. Инке, кала тумэ лэна пэрво разо тэ прожан и тема па книжка, авэла фэдэр, если када на авэла фартэ долӷо. Дэсавэ ԥрала и ԥэя ԥэнэн, кай фэдэр всегда тэ ужастар вовремя, дажэ если о мануш ӷотово инке тэ дэл дума. Ай инке на дэ дума фартэ бут — дэ тэ виԥэндёл лэ манушэсти (Прит. 10:19).

12. Со амэ камас тэ домардювас, кала залас тэ сытярас лэ манушэс па Библия?

¹² Кала амэ лас тэ сытярас лэ манушэс па Библия, амэ камас тэ поможысарас лэсти тэ уӷанэн и тэ полюбий лэ Иеговас и лэ Иисусос. Важ када амэ вся и время шас сама пэ Библия, ай най пэр пэстэ или пэ кода, со амэ ӷанас (Дила 10:25, 26). О апостало Павло драго сыкадя, сар када тэ терас. Кала во сытярэлас аврэн, во часто дэлас дума пала Иисусо, саво авеля пэ ԥув тэ поможый лэ манушэнди тэ уӷанэн и тэ полюбин лэ Иеговас (1 Кр. 2:1, 2). Инке важ о Павло сас важно тэ поможый лэ нэвэ учениконэнди, кай лэндэ тэ авэл лашо характеро, саво сар сомнак, руп и кучутнэ бара (1 Кр. 3:11—15). Вонэ трэбуй сас тэ патян, тэ авэн годявэрнэ, тэ сытён май бут тэ полэн и тэ стон бари патив по Иегова (Пс. 19:9, 10; Прит. 3:13—15; 1 Пёт. 1:7). Терэн сар о Павло: поможын лэ манушэсти май фартэ тэ патял андо Дэл и тэ ашэл май пашэ каринг амаро небесно Дад (2 Кр. 1:24).

13. Сар тэ сыкавэс лэ манушэсти, кай ту на грабис и старыиспэ тэ полэс лэс? (2 Коринфо 10:4, 5). (Кадяжэ диқэн и картинка.)

¹³ Лэн примеро лэ Иисусостар и старыинпэ тэ на грабин и тэ полэн лэ манушэс, савэс сытярэн па Библия. На задэн вопросоря, савэндар лэ манушэсти можэт тэ ашэл лажаво. Если лэ манушэсти ԥарэс тэ полэл варисави тема, на трэбуй пала латэ бут тэ дэн дума. Фэдэр тэ жан май дур, ай потом тэ ринпэ каринг кадэя тема чуть май интя. Никала на тасавэн по мануш. Трэбуй время, кай о чачимос тэ мэкэл корнё андэ лэско ди (Иоан. 16:12; Клс. 2:6, 7). И хохавни вера сыстойпэ андэ Библия кодэлэса, со састэс тердёл, — например, заԥандадэ састэ фороса. (Проадинон 2 Коринфо 10:4, 5.) Лэ манушэсти можэт тэ авэл ԥарэс тэ ашавэл кода, каринг со во присытеля и со фартэ куч лэстирэ одести. Важ када амэ спэрва трэбуй тэ поможысарас лэ манушэсти тэ строий авэр састо форо — тэ сытярас лэс тэ патял лэ Иеговасти. Кадя о Дэл ашэла важ лэстэ сар «ҭан, кай тэ гарадёл» (Пс. 91:9).

КАЛА О МАНУШ АВЭЛ ПЭ СОБРАНИЯ

14. Сар амэнди трэбуй тэ обжаспэ кодэлэнца, ко кати лэл тэ ԥирэл пэ амарэ собрании?

¹⁴ О Иегова камэл, кай амэ драго тэ обжаспэ всаворэ́ манушэнца и тэ на диқас, сави кай о мануш нацыя и саво лэстэ затеримос (Иак. 2:1—4, 9). Со амэ можэм тэ стерас, кай кодэла, ко авэл пэ амарэ собрании, тэ диқэн, кай амэ анда ди шас лэн сама?

15, 16. Со амэ можэм тэ стерас, кай лэ ӷостёнэнди тэ авэл драго пэ амарэ собрании?

¹⁵ Варико авэл пэ амарэ собрании просто через кода, кай лэсти интересно, ай дэко, возможно, авэл важ кода, кай варико анда свидетеля, саво жувэл аврэтэ, потԥэндя лэсти тэ жал пэ собрания. Важ када, если тумэ додиқлэ нэвэ манушэс, поджан каринг лэстэ и роспушэн ек еқэстар. Шон лэс сама, но фартэ на допушэн. Ақарэн лэ манушэс тэ бэшэл вместе тумэнца и, кала жал и собрания, сыкавэн лэсти и стихоря анда пэстири Библия. Или виарақэн важ лэстэ Библия и публикацыя, сави лэна тэ прожан пэ собрания. Погиндон, со тумэ инке можэте тэ стерэн, кай лэ манушэсти тэ авэл удобно. Акэ ек примеро. Еқвар о ԥрал додиқля андо Зало Царства манушэс, саво авеля интя пэрво разо, и поджыля каринг лэстэ тэ поздоровкиийпэ. Кадэва мануш ԥэндя, кай набут пережывает, важ кода кай утидо най кадя шукарнэс, сар всаворэ. О ԥрал поможысардя лэсти тэ на пережывает и ԥэндя, кай лэ Иеговастирэ свидетеля — када само обычни мануша. Через дэсави время кодэва мурш болделя, но во идоси сэрэл, сар дэ драго обжыляпэ лэса амаро ԥрал. Чаче, амэ камас тэ шас сама нэвэ манушэн, савэ авэн, но амэнди трэбуй тэ авас осторожни, кай андэ дума тэ на задас фартэ лични вопросоря (1 Пёт. 4:15).

¹⁶ Со инке можно тэ стерас, кай амарэ ӷостёнэнди тэ авэл драго? Дэн дума пативалэс пала найсвидетеля и пала кода, андэр со вонэ патян, кала терэн и задании, дэн каминтарии или просто дэн дума ек еқэса. На ԥэнэн нисо, со лажавардоп или холярдоп амарэ ӷостёнэн (Тито 2:8; 3:2). Например, нащи тэ подаса́спэ кодэлэндар, кастэ авэр вера (2 Кр. 6:3). Пала када особено важно тэ сэрэн лэ ԥралэнди, савэ пэ собрания ԥэнэн и речь. Инке лэнди трэбуй май просто тэ росԥэнэн и алава и гиндоря, савэ найвушэро тэ полэн кодэлэнди, ко найсвидетеля.

17. Со амэ камас тэ стерас важ кодэла, кастэ «оди цырдэлпэ каринг о чачимос»?

¹⁷ Дес десэстар ашэл инке май важно тэ сытярас лэ манушэн, кай вонэ тэ ашэн ученикоря. Важ када амэ на парашас тэ родас кодэлэн, кастэ «оди цырдэлпэ каринг о чачимос, саво андярэл каринг и вечно жызня» (Дила 13:48). Кала арақэн кацавэ манушэн, на лажан сразу тэ ԥэнэн лэнди, кай вонэ моӷут тэ залэн тэ сытён па Библия, и тэ ақарэн пэ амарэ собрании. Кадя тумэ поможына лэнди тэ тердён по дром, саво андярэл каринг и вечно жызня (Матф. 7:14).