Leswi Hi Nga Swi Dondzraka Ka Mazritu Ya Wugamu Ya Yakobe Loko A Li Kusuhi Ni Ku Fa—Xiyenge 2

1. He xini xiyenge xa wuprofeta bya Yakobe lexi a xi hlayiki na a li kusuhi ni ku fa lexi hi taka bula ha xone ka nhlokomhaka leyi?

VANA va Yakobe a va tsrhame kun’we na yene va mu yingiseta hi wuzron’wana loko a va tovokisa. Hi lani hi swi voniki ha kone ka nhlokomhaka ya ku sungula, a mazritu lawa Yakobe a ma byeliki Rubeni, Simiyoni, Levhi na Yuda ma va hlamalisile. Swi nga yentxeka vavanuna lava a va tivutisa leswi Yakobe a a ta byela lavan’wana va 8. A hi voneni leswi hi nga swi dondzraka ka mazritu lawa a ma byeliki Zebuloni, Yisakari, Dani, Gadi, Axere, Naftali, Yosefa na Benjamini.a

ZEBULONI

2. Tlhamuxela tovoko ledzri kumiwiki ha Zebuloni ni ndlela leyi dzri hetisekiki ha yone. (Genesisi 49:13) (Tlhela u vona ni bokisi.)

² Dondzra Genesisi 49:13. Yakobe a hlaye leswaku a lixaka dzra Zebuloni a dzri ta tsrhama kusuhi ni lwandle hi tlhelo dzra n’walungu ka Tiko dzra Xidumbiso. Ku tlula 200 wa malembe lawa ma landzreliki, a Vazebuloni va yamukele tiko dzravu. A dzri kumeka makazri ka lwandle dzra Galileya ni Lwandle dzra Mediteraniyu. Moxe a profete a ku: “Nyonxa We Zebuloni, a mintizrweni yaku.” (Det. 33:18) Swi nga yentxeka leswi swi tlhamuxela leswaku a lixaka dzra Zebuloni a dzri ta yendzra hi ku nabyala ka matlhelo ha mabidzri ya malwandle lawa. Hi ndlela leyo, a swi ta va nabyalela ku xava kumbe ku xavisela mintxhumu vhanu lava humaka ka mimbangu ya ku siyanasiyana. Swi nge na mhaka ni swiyimu swa kone, a lixaka dzra Zebuloni a dzri ni swivangelo swa ku nyonxa.

3. I yini leswi nga hi pfunaka ku tsrhama na hi nyonxile?

³ Leswi hi nga swi dondzraka: Hi ni swivangelo swa ku nyonxa swi nge na mhaka ni lomu hi tsrhamaka kone kumbe swiyimu swezru. Akuva hi tama hi nyonxa, hi fanela ku yaneliseka hi leswi hi nga na swone. (Amaps. 16:6; 24:5) Minkama yin’wana swi nga hi nabyalela ku tsrhamela ku pimisa hi mintxhumu leyi hi kalaka hi nga li na yone ku tlula mintxhumu leyinene leyi hi nga na yone. Xileswo, ka mintxhumu leyi u nga na yone, zama ku vona leswinene.—Gal. 6:4.

YISAKARI

4. Tlhamuxela tovoko ledzri kumiwiki ha Yisakari ni ndlela leyi dzri hetisekiki ha yone. (Genesisi 49:14, 15) (Tlhela u vona ni bokisi.)

⁴ Dondzra Genesisi 49:14, 15. Yakobe a kulungele Yisakari hi kola ka leswi a a li mutizri wa nkhinkhi, a mu fananise ni ntamu lowu mbongolo yi nga na wone, ku nga xihazri lexi tlakulaka mintxhumu ya ku bindzra. Yakobe a tlhele a hlaya leswaku Yisakari a a ta va ni tiko ledzrinene. A mazritu ya Yakobe ma hetisekile hikusa a lixaka dzra Yisakari dzri yamukele tiko dzra ku nona ledzri a dzri li kusuhi ni nambu wa Yordani, lani a va bindzrula mintxhumu yinyingi. (Yoxu. 19:22) A lixaka dzra Yisakari dzri tizre hi nkhinkhi akuva dzri hlayisa tiko ledzro. Nakone dzri tlhele dzri tizra hi nkhinkhi akuva dzri pfuna van’wana. (1 Tih. 4:7, 17) Hi xikombiso, loko muyavanyisi Baraki na muprofeta Debora va kombele mpfunu leswaku va lwa na Sisera, a lixaka dzra Yisakari hi dzrone dzri tinyikeliki akuva dzri va pfuna. Nakone vone a va tiyimisele ku lwa minkama hinkwayu.—Vaya. 5:15.

5. Ha yini hi fanela ku tikazratela ku va vatizri va nkhinkhi?

⁵ Leswi hi nga swi dondzraka: Swanga hi leswi a a wu nyika lisima ntizro lowu a wu yentxiwa hi lixaka dzra Yisakari, Yehovha a wu nyika lisima ntizro lowu hi mu yentxelaka wone. (Ekles. 2: 24) Yanakanya hi xikombiso xa vamakwezru lava tizraka hi nkhinkhi akuva va bekisa bandla. (1 Tim. 3:1) Vamakwezru lava a va lwi yimpi ya hakakunene, kambe va fanela ku tikazratela ku sizrelela vhanu va Xikwembu Nkulukumba ka makhombo ya moya. (1 Kor. 5:1, 5; Yud. 17-23) Va tlhela va tikazratela ku lulamisela ni ku beka wukaneli lebyi kutxanaka akuva va tiyisa bandla.—1 Tim. 5:17.

DANI

6. He xini xiyavelo lexi lixaka dzra Dani dzri xi yamukeliki? (Genesisi 49:14, 15) (Tlhela u vona ni bokisi.)

⁶ Dondzra Genesisi 49:17, 18. Yakobe a fanise Dani ni nyoka leyi hlulaka swihazri leswi swi yi tlulaka hi ku kula swa ku fana ni kavhalu ledzri tizrisiwaka a yimpini. A lixaka dzra Dani a dzri ni xixixi nakone a dzri lulamele ku hlasela valala va tiko dzra Israyele. Na va kongoma ka Tiko dzra Xidumbiso, a lixaka dzra Dani dzri ve dzrone dzra “wugamu” ka tinxaka letin’wana akuva dzri sizrelela tiko. (Tinhl. 10:25) Nambileswi ntizro lowu a wu yentxiwa na wu nga voniwi hi vhanu lavan’wana, wone a wu li wa lisima.

7. Xana hi fanela ku xi vonisa kuyini xiyavelo xin’wana ni xin’wana lexi hi xi yamukelaka nkama lowu hi tizrelaka Yehovha?

⁷ Leswi hi nga swi dondzraka: Xana u ke u hamba ntizro wa kukazri lowu swi tikombiki ingi a wu voniwanga hi mhunu? Swi nga yentxeka u same u pfunisa ni ku basisa Yindlu ya Wugandzreli, u tinyikele akuva u tizra ka asembleya, kongresu kumbe ku bekisa mintizro yimbeni. Loko swi li hi ndlela leyo, wa kulungeliwa! Dzrimuka leswaku minkama hinkwayu Yehovha awa swi xiya nakone a swi nyika lisima hinkwaswu leswi u mu yentxelaka swone. A nyonxa ngopfu swinene loko a xiya leswaku u mu tizrela ku nga li hi nkongometo wa ku djula ku kulungeliwa hi van’wana, kambe hi leswi u djulaka ku kombisa leswaku wa mu zrandzra.—Mat. 6:1-4.

GADI

8. Ha yini a swi nabyala kuva valala va Vaisrayele va hlasela lixaka dzra Gadi? (Genesisi 49:19) (Tlhela u vona ni bokisi.)

⁸ Dondzra Genesisi 49:19. Yakobe a profete leswaku ntlawa wa vawutli a wu ta hlasela Gadi. Ntsrhaku ka 200 wa malembe, a lixaka dzra Gadi dzri ye tsrhama ka mbangu lowu a wu li wuxeni ka nambu wa Yordani ku nga lani a ku hamba ndzrelekanu ni matiko lawa a ma li valala vavu. Ku hanya ka mbangu lowo a swi ta yentxa leswaku va hlaseliwa hi ku nabyala, kambe a lixaka dzra Gadi a dzri djula ku ya tsrhama ka mbangu wolowo hikusa a ku ni mbangu wukulu lani a va ta byisa swihazri swavu kone. (Tinhl. 32:1, 5) Swi tikomba ka lixaka dzra Gadi a ku ni vhanu lava a va ni xixixi. Handle ka leswo, a va dumba leswaku Yehovha a a ta va pfuna ku lwela tiko ledzri a a va nyike dzrone. Nakone ku dzringana malembe manyingi, va patsre ni ku zrumela masotxha yavu akuva va pfuna tinxaka tin’wana ku teka Tiko dzra Xidumbiso ledzri a dzri kumeka mpeladambu wa Yordani. (Tinhl. 32:16-19) A va dumba leswaku Yehovha a a ta sizrelela vasati ni vanavu nambiloko vavanuna va nge kone. Yehovha a va tovokisile hi kola ka xixixi ni ku tinyiketela kwavu.—Yoxu. 22:1-4.

9. Xana ku dumba Yehovha swi khumba leswi hi swi hlawulaka a wuton’wini hi ndlela yini?

⁹ Leswi hi nga swi dondzraka: Akuva hi tizrela Yehovha loko hi kumana ni swikazratu, swi djula ku va hi tama hi mu dumba. (Amaps. 37:3) Vanyingi namunhla va kombisa leswaku va mu dumba Yehovha hi ku titsrona swa kukazri leswaku va seketela mintizro ya ku yaka ya nhlengeletanu, ku tizra lomu ku nga ni xivileleko lexikulu ni ku bekisa swiyavelo swin’wana. Va yentxa leswo hikusa va dumba leswaku Yehovha minkama hinkwayu a ta va hlayisa.—Amaps. 23:1.

AXERE

10. I yini leswi Axere a kalaka a nga swi kotanga ku swi yentxa? (Genesisi 49:20) (Tlhela u vona ni bokisi.)

¹⁰ Dondzra Genesisi 49:20. Yakobe a hlaye leswaku a lixaka dzra Axere a dzri ta va ledzri ganyiki nakone swi ve hi ndlela yoleyo. A swi hlaya ku va lixaka ledzro dzra Axere dzri kuma mimbangu leyi noniki ngopfu swinene a Israyele hinkwaku. (Det. 33:24) A dzri tlhela dzri hamba ndzrelekanu ni Lwandle dzra Mediteraniyu ku patsra ni mimbangu ya ku hambela mabindzru lamakulu ka yone ya ku fana ni mimbangu leyi a ku yima switimela swa mati. Kambe a lixaka dzra Axere a dzri swi kotanga ku hlongola Vakanana a tikweni dzravu. Leswi lixaka dzra Axere a dzri ganyile ni leswi dzri kalaka dzri nga va hlongolanga Vakanana, swi tikomba na Vakanana va va kutxetele kuva va nga ha zron’weki ngopfu hi ku yentxa ku zrandzra ka Yehovha. (Vaya. 1:31, 32) Hi xikombiso, loko Baraki a kombele mpfunu ka Vaisrayele leswaku a lwa ni khandzra dzra Vakanana, a lixaka dzra Axere a dzri tinyikelanga akuva dzri pfunisa. Xileswo, a va yi vonanga mintxhumu ya ku hlamalisa leyi Yehovha a yi yentxiki akuva a pfuna Vaisrayele ku hlula “a kusuhi ni mati ya Megido”. (Vaya. 5:19-21) Swi nga yentxeka na lixaka dzra Axere dzri khomiwe hi tingana loko dzri yingele lisimu dzra ku hlula dzra Baraki na Debora ledzri a dzri ku: “Axere a tsrhame a nga yentxi ntxhumu a nkingeni wa lwandle.”—Vaya. 5:17.

11. Ha yini hi fanela ku va ni vonela ledzri dzringaniseliwiki hi mintxhumu leyi vonekaka?

¹¹ Leswi hi nga swi dondzraka: Hi djula ku yentxa hinkwaswu leswi hi nga swi kotaka a ntizrweni wa Yehovha. Akuva hi kota ku yentxa leswo, hi fanela ku fambela kule ni mayanakanyela ya vhanu mayelanu ni mintxhumu leyi vonekaka. (Amapr. 18:11) Nambileswi hi yi vilelaka mali, a hi yi voni na yi li ya lisima swinene ku tlula ku tizrela Yehovha. (Ekles. 7:12; Heb. 13:5) A hi tlangi hi nkama hi ku djuletela mintxhumu leyi hi kalaka hi nga yi vileli. A matsrhan’wini ya leswo, hi djuletela tindlela ta ku tizrisa ntamu wezru ni nkama wezru akuva hi tizrela Yehovha na hi tiva leswaku a nkameni lowu taka hi ta va ni wutomi lebyi nyonxisaka.—Amaps. 4:8.

NAFTALI

12. Xana leswi Yakobe a swi hlayiki mayelanu na Naftali swi ve ntiyiso hi ndlela yini? (Genesisi 49:21) (Tlhela u vona ni bokisi.)

¹² Dondzra Genesisi 49:21. Yakobe a hlaye leswaku Naftali a “a khanela mazritu lama nyonxisaka”. Leswo swi nga ha kombisa ndlela leyi Yesu a a vulavula ha yone a wutizrelini byake lani misaveni. Yesu a tsrhame nkama wunyingi ka doropa dzra Kapernawume ledzri a dzri kumeka a mutini wa lixaka dzra Naftali. A ve hi ndlela leyo Kapernawume a dzri vitaniwa ‘doropa dzrake’. (Mat. 4:13; 9:1; Yoh. 7:46) Ezaya a profete leswaku Yesu a a ta va ‘ku vonekisa lokukulu’. (Eza. 9:1, 2) Yesu a a li “livaningu dzra ntiyiso” ledzri vaningelaka vhanu va tinxaka hinkwatu hi kola ka leswi a swi dondzrisiki.—Yoh. 1:9.

13. Hi nga yentxa yini akuva mavulavulela yezru ma nyonxisa Yehovha?

¹³ Leswi hi nga swi dondzraka: Leswi hi swi hlayaka ni ndlela leyi hi swi hlayaka ha yone, i swa lisima ka Yehovha. Xana hi nga vulavula “mazritu ya ku nyonxisa” hi ndlela yini? Hi ku vulavula ntiyiso. (Amaps. 15:1, 2) Hi nga vulavula mazritu lawa ma yakaka hi ku kulungela van’wana a matsrhan’wini ya ku solasola kumbe ku tsrhamela ku khala. (Efe. 4:29) Hi nga tlhela hi tibekela makungu ya ku txutxela wuswikoti bya ku sungula mabulu lawa ma pfulaka mukhandlu wa ku nyikela wumboni.

YOSEFA

14. Tlhamuxela ndlela leyi tovoko dzra Yosefa dzri veke dzra ntiyiso ha yone. (Genesisi 49:22, 26) (Tlhela u vona ni bokisi.)

¹⁴ Dondzra Genesisi 49:22, 26. Swi tikomba na Yakobe a tikhuze ngopfu ha Yosefa, a ve “lweyi a hlawuliwiki a makazri ka vamakwavu”. Yakobe a mu vitane swanga “zrwavi dzra nsinya lowu pswalaka ha hombe”. Yakobe hi ku kongoma a a li yene nsinya wa kone, kasi Yosefa a a li zrwavi dzrake, Yosefa a a li n’wana wa nsati wa Yakobe ku nga Rakeli, lweyi a a mu zrandzra ngopfu swinene. Yosefa a a ta kuma hakelo ledzri phindiwiki ku tlula dzra Rubeni n’wana wa mativula wa Leya. (Gen. 48:5, 6; 1 Makr. 5:1, 2) Xiyenge lexi xa wuprofeta xi hetiseke loko vana vabidzri va Yosefa ku nga Efrayimi na Manasi va yamukele pfindla dzravu swanga tinxaka tibidzri leti a ti hambanisiwe ni tinxaka timbeni ta Vaisrayele.—Gen. 49:25; Yoxu. 14:4.

15. Xana Yosefa a yangulise kuyini loko a khomiwa hi ndlela ya ku biha?

¹⁵ Yakobe a tlhele a hlaya leswaku “a vatxopi a va mu xanisa [Yosefa], va mu txopa va va va mu bekela xiviti”. (Gen. 49:23) Lava yentxiki leswo ku ve vamakwavu lava a va mu tsrhohoka, va yentxiki leswaku Yosefa a khomiwa hi ndlela ya ku kala wululami. Yosefa a nga va bekelanga xiviti vamakwavu kumbe ku yanakanya leswaku Yehovha hi yene a a mu vangela ku xaniseka. Hi lani Yakobe a hlayiki ha kone: “A wugubu byake byi tame byi va mbangwini wa byone nakone a mavoko yake ma tame ma va ni ntamu ma tlhela ma tlhavukanya.” (Gen. 49:24) Yosefa a dumbe Yehovha loko a kumana ni mindzringo nakone handle ka ku dzrivalela vamakwavu, a tlhele a va khoma hi ndlela ya wunene. (Gen. 47: 11, 12) Yosefa a pfumelele mindzringo leyi a kumaniki na yone yi mu wupfisa. (Amaps. 105: 17-19) Swanga mabindzru, Yehovha a mu tizrise akuva a yentxa mintxhumu ya ku hlamalisa.

16. Hi nga xi yetiselisa kuyini xikombiso xa Yosefa loko hi kumana ni mindzringo?

¹⁶ Leswi hi nga swi dondzraka: A hi fanelanga ku pfumelela mindzringo leyi hi kumanaka na yone yi hi tsrhindzreta kule na Yehovha kun’we ni vamakwezru. Dzrimuka leswaku Yehovha a nga hi wupfisa akuva hi mu tizrela ka swiyimu leswi kazrataka. (Heb. 12:7) Ku wupfisiwa koloko ku nga hi pfuna kuva hi yampswisa matsrhamela ya wukriste ya ku fana ni timpswalu ni ku dzrivalela. (Heb. 12:11) Hi lani a yentxiki ha kone ka Yosefa, Yehovha a ta hi hakela hi kola ka ku tiyisela kwezru.

BENJAMINI

17. Xana wuprofeta mayelanu na Benjamini byi hetiseke hi ndlela yini? (Genesisi 49:27) (Tlhela u vona ni bokisi.)

¹⁷ Dondzra Genesisi 49:27. Yakobe a hlaye leswaku Vabenjamini a va ta va ni ntamu wukulu wa ku lwa ku fana ni mbyana ya nhova. (Vaya. 20:15, 16; 1 Makr. 12:2) A hosi ya ku sungula ya Israyele ku nga Sawulo, a hume ka lixaka dzra Benjamini. A tikombe a li mhunu wa ntamu kumbe mhunu lweyi a nga ni wuswikoti lebyikulu loko a lwa ni Vafilista. (1 Sam. 9:15-17, 21) Ntsrhaku ka malembe manyingi, Hosi ya xisati Esteri na Mordekayi lava a va li va lixaka dzra Benjamini va huluxe Vaisrayele akuva va nga dlayiwi hi hosi ya Persiya.—Est. 2:5-7; 8:3; 10:3.

18. Hi nga yetisela ku dumbeka ka lixaka dzra Benjamini hi ndlela yini?

¹⁸ Leswi hi nga swi dondzraka: Hinkwavu va lixaka dzra Benjamini, swi nga yentxeka va nyonxe ngopfu swinene loko Sawulo lweyi a a li wa lixaka dzravu a ve hosi. Kambe hi ku famba ka nkama, Yehovha a beke Davhida swanga hosi leyi a yi li ya lixaka dzra Yuda. Nambitanu, a va lixaka dzra Benjamini va mu seketelile Davhida. (2 Sam. 3:17-19) Hi ku famba ka nkama loko tinxaka ta 10 ti pfukele lixaka dzra Yuda, a lixaka dzra Benjamini dzri tame dzri dumbeka ka hosi leyi a yi huma ka lixaka dzra Davhida leyi a yi li ya lixaka dzra Yuda. (1 Tih. 11:31, 32; 12:19, 21) Ku fana ni li lixaka dzra Benjamini, na hine hi nga dumbeka ka Xikwembu Nkulukumba hi ku tama hi seketela lava Yehovha a va hlawuliki leswaku va kongomisa vhanu vake.—1 Tes. 5:12.

19. Xana hi nga dondzra yini ka wuprofeta lebyi Yakobe a byi hlayiki loko a li kusuhi ni ku fa?

¹⁹ Leswi hi swi dondzraka mayelanu ni ndlela leyi wuprofeta lebyi Yakobe a khaneliki ha byone byi hetisekiki ha yone swi hi yentxa hi ya hi kholwa leswaku wuprofeta hinkwabyu lebyi kumekaka Bibeleni nakunene byi ta hetiseka. Nakone ku kambisisa ndlela leyi vana va Yakobe va tovokisiwiki ha yone swi hi pfuna ku yi twisisa ku yampswa ndlela leyi hi nga nyonxisaka Yehovha ha yone.