Yehova arumva ugutakamba kwacu

“Inyonga z’Uhoraho ziri ku bagororotsi, n’amatwi yiwe ayabangira ugutakamba kwabo”.​—ZAB. 34:15.

1, 2. (a) Abantu benshi bumva bamerewe gute muri iki gihe? (b) Ni kubera iki ivyo bitadutangaza?

WOBA uriko urashikirwa n’imibabaro? Niba ari ukwo biri, nturi wenyene. Abantu amamiliyoni bari mu rugamba rwo kwihanganira imikazo ya buri musi ijanye n’ukuba babayeho mu vy’iyi si mbi. Kuri bamwe, ivyo bisa n’aho batovyihanganira. Bumva neza na neza bamerewe nk’uko wa mwanditsi wa Zaburi Dawidi yari amerewe, uno akaba yanditse ati: “Ndadendebukiwe, ndajanjaguritse: nnihishwa n’umubabaro wo mu mutima wanje. Umutima urancamwo, intege zanje ziracika: no kubona kw’amaso yanje na kwo nyene kwamvuyemwo”.​—Zab. 38:8, 10.

² Twebwe abakirisu, ntidutangazwa n’imibabaro idushikira mu buzima. Turatahura ko “ububabare nk’ubw’ibise” buri mu bigize ikimenyetso c’ukubaha kwa Yezu cari caravuzwe. (Mrk. 13:8; Mat. 24:3) Ijambo ryo mu rurimi rwo mu ntango ryahinduwe ngo “ububabare nk’ubw’ibise” ryerekeza ku mubabaro ukomeye umuvyeyi agira mu gihe c’ukwibaruka. Ese ingene ivyo bidondora ata kwihenda ukuntu abantu bariko bacumukura cane muri ibi bihe “bitoroshe”, canke “bikaze”, ivyo usanga “bigoye [cane] kwihanganira”!​—2 Tim. 3:1; Kingdom Interlinear.

Yehova aratahura imibabaro idushikira

3. Ni igiki abasavyi b’Imana bazi neza?

³ Abasavyi ba Yehova barazi neza ko batatewe urucanco rubakingira ingaruka ziterwa n’imibabaro turimwo, kandi birashoboka rwose yuko ibintu bigoye bizorushiriza mbere kudabuka. Uretse ibiriko birashikira umuryango w’abantu muri rusangi, twebwe abasavyi b’Imana turahanganye kandi n’‘umwansi, ari we wa Mubesheranyi’, uno akaba yiyemeje gusenyura ukwizera kwacu. (1 Pet. 5:8) Ese ingene vyokworoha yuko umuntu yumva amerewe nka kumwe kwa Dawidi, uwavuze ati: “Ibitutsi vyammenaguye umutima, ndaremewe cane: nareretse ko har’uwongirira akagongwe, nta wabonetse; n’uko har’abonyirura, ndabura”!​—Zab. 69:20.

4. Ni igiki kiduhumuriza igihe turiko turashikirwa n’imibabaro?

⁴ Dawidi yoba yashaka kuvuga ko ata cizigiro namba yari afise? Eka da. Raba ayandi majambo yavuze muri iyo zaburi nyene, ati: “Uhoraho yumva abakene, ntakēngēra imbohe ziwe”, canke “abo mu biwe baboshwe”. (Zab. 69:33, NW, akajambo k’epfo) Mu nsobanuro yagutse, vyoshobora gushika tukumva ari nk’aho turi imbohe zaboshwe n’imibabaro canke amarushwa turimwo. Vyoshobora gusa n’aho abandi badatahura vy’ukuri ivyacu uko vyifashe, kandi kumbure usanga ata vyo batahura. Ariko rero, cokimwe na Dawidi, turashobora guhumurizwa no kumenya ko Yehova atahura rwose imibabaro turimwo.​—Zab. 34:15.

5. Ni igiki Umwami Salomo yari yizigiye adakeka?

⁵ Salomo umuhungu wa Dawidi yarashimitse kuri ico kintu mu gihe co kwegurira Yehova urusengero rw’i Yeruzalemu. (Soma 2 Ngoma 6:29-31.) Yinginze Yehova ngo aze yumve isengesho ry’umuntu wese w’umutima nziraburyarya yomwituye ku bijanye n’“indwara yiwe n’umubabaro wiwe”. None Imana yokwakiriye gute amasengesho y’abo bantu bobaye bari mu mibabaro? Salomo yaraseruye icizigiro yari afise c’uko Imana itokwumvise gusa amasengesho yabo, ariko kandi ko yogize ico ikoze ku neza yabo. Uti kubera iki? Kubera yuko izi vy’ukuri ibiri mu “mitima y’abantu”.

6. Dushobora gute kwihanganira amaganya, kandi kubera iki?

⁶ Na twebwe nyene turashobora kwiyegereza Yehova mw’isengesho ku bijanye n’‘indwara yacu be n’umubabaro wacu’, ni ukuvuga imibabaro umwumwe wese muri twebwe arimwo. Dukwiye guhumurizwa n’ukumenya ko atahura imibabaro turimwo kandi ko atwitwararika. Intumwa Petero yarashigikiye ico ciyumviro igihe yavuga ati: “Muterer[e] amaganya yanyu yose kuri yo, kuko ibababara”. (1 Pet. 5:7) Yehova ararazwa ishinga n’ibidushikira. Yezu yarashimitse ku vy’uko Yehova atwitwararikana urukundo, igihe yavuga ati: “None utujuri tubiri ntitugurishwa igiceri c’agaciro gatoya? Yamara nta na kamwe muri two gakorokera hasi So atabizi. Mugabo n’imishatsi yo ku mutwe wanyu iraharuwe yose. Ntimutinye rero: mwebwe muri n’agaciro kuruta utujuri twinshi”.​—Mat. 10:29-31.

Niwizigire ko Yehova azogufasha

7. Ni ugushigikirwa nyabaki dusezeranirwa?

⁷ Turashobora kwizigira tudakeka ko Yehova ari n’umutima ukunze wo kudufasha igihe twugarijwe n’imibabaro, kandi arabishoboye. “Imana ni yo buhungiro bgacu n’inkomezi zacu, n’umufasha atabura guseruka mu magorwa”. (Zab. 34:15-18; 46:1) None Imana idufasha gute? Rimbura amajambo dusanga mu 1 Abakorinto 10:13, na yo akaba avuga ati: “Imana ni inyizigirwa, ntizobareka ngo mugeragezwe ibirenze ivyo mushobora kwihanganira, mugabo hamwe na nya kigeragezo, izobacira kandi icanzo kugira ngo mushobore kucihanganira”. Yehova yoshobora kuyobora ibintu kugira ngo adukure mu bihe bigoye tuba turimwo, canke agashobora kuturonsa inkomezi dukeneye kugira ngo tuvyihanganire. Ukwo vyogenda kwose, Yehova azodufasha.

8. Dushobora gute kwungukira ku mfashanyo Imana itanga?

⁸ None dushobora gute kwungukira kuri iyo mfashanyo? Raba iki kintu duhanurwa gukora: “Muterer[e] amaganya yanyu yose kuri we”. Tubivuze mu buryo bw’ikigereranyo, ivyo bisobanura ko twese tuzeza Yehova ibanga ryo kwitwararika ibituraje ishinga. Turagerageza kureka kwiganyira maze tukizigira twihanganye ko ari we yitwararika ivyo dukeneye. (Mat. 6:25-32) Mwene ukwo kwizigira gusaba ko twicisha bugufi, ntitwishimikize inkomezi zacu canke ubukerebutsi bwacu bwite. Igihe twicishije bugufi turi “munsi y’ukuboko kw’ubushobozi kw’Imana”, tuba twemeye icese ko turi abantu bo hasi. (Soma 1 Petero 5:6.) Ivyo biraheza bikadufasha kwihanganira ikintu ico ari co cose Imana ireka kikadushikira. Hari aho twoba dushashaye gutabarwa ubwo nyene, ariko turizigira ko Yehova azi neza na neza igihe c’uko agira ico akoze ku bwacu be n’ingene yobigenza.​—Zab. 54:7; Yes. 41:10.

9. Ni umutwaro uwuhe Dawidi yari akeneye gukorera Yehova?

⁹ Niwibuke amajambo Dawidi yavuze dusanga muri Zaburi 55:22 agira ati: “Ukorere Uhoraho umutwaro wawe, na we azokuramira: ntazokwigera akundira umugororotsi kunyiganyizwa”. Igihe Dawidi yandika ayo majambo, yari afise umubabaro mwinshi cane. (Zab. 55:4) Vyiyumvirwa ko iyo zaburi yanditswe igihe umuhungu wiwe Abusalomu yategura mu mpisho umugambi wo kunyaga ingoma yiwe. Wa muhanuzi Ahitofeli Dawidi yizigira kuruta abandi bose yariyunze muri uwo mugambi ugayitse. Dawidi yabwirijwe guhunga arava i Yeruzalemu kugira ngo arokore igufa. (2 Sam. 15:12-14) No muri ivyo bihe bibabaje, Dawidi yagumye yizigira Imana, kandi ntiyavunitse umutima.

10. Dutegerezwa gukora iki igihe turi mu mibabaro?

¹⁰ Nk’uko kwa Dawidi, na twebwe nyene dutegerezwa kwiyegereza Yehova mw’isengesho ku bijanye n’imibabaro yose twoba turimwo. Reka turabe ico intumwa Paulo yaduhimirije gukora ku bijanye n’ivyo. (Soma Abafilipi 4:6, 7.) Ni igiki none kizova mw’isengesho mwene iryo rituranywe ubwira? “Amahoro y’Imana arengeye ukwiyumvira kwose azorinda imitima ya[cu] n’ububasha bwa[cu] bwo kwiyumvira biciye kuri Kristu Yezu”.

11. “Amahoro y’Imana” akingira gute imitima yacu be n’ububasha bwacu bwo kwiyumvira?

¹¹ None isengesho ryoba rizotuma ukuntu ivyawe vyifashe guhinduka? Kumbure. Ariko, turakwiye kumenya ko Yehova atama nantaryo yishura amasengesho yacu nk’uko twoba tubishaka. Naho biri ukwo, isengesho riradufasha kugumana uburimbane mu bwenge kugira ngo ntiduhave turengerwa n’imibabaro tuba turimwo. “Amahoro y’Imana” arashobora gutuma dusubiza umutima mu nda igihe turemerewe n’inyiyumvo zibabaje. Nka kurya kw’ikirindiro c’abasoda kijejwe gukingira igisagara kinaka igitero c’abansi, ni ko n’“amahoro y’Imana” azokingira imitima yacu be n’ububasha bwacu bwo kwiyumvira. Azotuma kandi dutsinda amakenga, ubwoba be n’ivyiyumviro bitari vyo twogira yongere aturinde gukora ibintu gihuruduka canke mu buryo butaranga ubukerebutsi.​—Zab. 145:18.

12. Tanga akarorero kerekana ingene umuntu ashobora kugira amahoro yo mu mutima.

¹² Dushobora gute kugira amahoro yo mu mutima igihe turi mu mibabaro? Rimbura akarorero gasa n’akajanye n’uko ivyacu vyifashe mu mice imwimwe. Dufate ko hari umukozi afise umukoresha amuryagagura. Ariko rero, uwo mukozi araronse akaryo ko guserurira inyiyumvo ziwe umuyobozi w’iryo shirahamwe akoreramwo, uno akaba ari umuntu w’umutima mwiza kandi akora ibitegereka. Uwo muyobozi aramukuye amazinda ko atahura uko ivyiwe vyifashe maze aciye amumenyesha yuko uwo mukoresha vuba agiye kubogozwa muri ayo mabanga. None ivyo bituma uwo mukozi amererwa gute? Kuba yemera ico kintu kimusubiriza umutima mu nda kandi akaba azi ibigiye gushika, birakomeza umwiyemezo afise wo kubandanya akora, mbere n’aho abwirizwa kwihanganira izindi ngorane nkeyi mu kurindira. Na twebwe nyene turazi yuko Yehova atahura uko ivyacu vyifashe, kandi aradukura amazinda ko vuba “umutware w’iyi si agira atabwe hanze”. (Yoh. 12:31) Mbega ikintu gihumuriza!

13. Ni ikindi kintu ikihe dutegerezwa gukora uretse gutura isengesho?

¹³ None twoca twiraramira ngo n’uko twabwiye Yehova ingorane zacu mw’isengesho? Haba n’intete. Hari n’ikindi dusabwa gukora. Turakeneye gukora duhuza n’ivyo tuba twasavye mu masengesho yacu. Igihe Umwami Sauli yarungika abantu kwa Dawidi kugira ngo bamwice, Dawidi yasenze ati: “Mana yanje, unkize abansi banje: unshire hejuru y’abampagurukiye. Unkize inkozi z’ibibi, undinde abavisha amaraso”. (Zab. 59:1, 2) Uretse iryo sengesho Dawidi yatuye, yaranumviye umugore wiwe maze arakora ibikenewe kugira ngo ayanyage. (1 Sam. 19:11, 12) Muri ubwo buryo nyene, turashobora gusenga dusaba ubukerebutsi ngirakimazi kugira ngo budufashe kuvyifatamwo neza mu bintu bibabaje, kumbure bunadufashe kubitorera umuti.​—Yak. 1:5.

Ingene dushobora kuronka inkomezi zodufasha kwihangana

14. Ni igiki gishobora kudufasha kwihangana igihe turi mu bintu bigoye?

¹⁴ Hari aho ibintu bigoye turimwo bitoca ubwo nyene bikurwaho. Vyoshobora mbere no kubandanya igihe kinaka. Niba bigenze gutyo, ni ibiki none bizodufasha kwihangana? Ubwa mbere, niwibuke yuko igihe tubandanije gusukurira Yehova tudahemuka, naho twoba turi mu ngorane, tuba tugaragaje urwo tumukunda. (Ibik. 14:22) Nugume wibuka ca kirego ca Shetani ku bijanye na Yobu, igihe yavuga ati: “Mbeg’ugira ngo Yobu yubahira Imana ubusa? Ntiwamuzitiriye uruzitiro rumukikije, bo n’inzu yiwe, n’ivyatunze vyose? Wahezagiye igikorwa c’amaboko yiwe, kand’itunga ryiwe ryagwiriye mu gihugu. Ariko pfa gutuma ukuboko kwawe, wubike ivy’afise vyose, urābe kw atazokurogotako imbonankubone”. (Yobu 1:9-11) Kubera ko Yobu yagumye ari intadohoka, yaragaragaje yuko ico kirego cari ikinyoma cambaye ubusa. Igihe twihanganiye ibintu bibabaje, na twebwe nyene tuba turonse akaryo ko kugaragaza ko Shetani ari umubeshi. Ukwo kwihangana kwacu na kwo guca gutuma icizigiro dufise gikomera.​—Yak. 1:4.

15. Ni uturorero utuhe dushobora kudukomeza?

¹⁵ Ubwa kabiri, nugume wibuka yuko “ivyo bintu nyene, mu buryo bw’imibabaro, biranguka mu muryango wose w’abavukanyi ba[we] mw’isi”. (1 Pet. 5:9) Mu vy’ukuri, “nta kigeragezo ca[gu]shitseko kitari igisanzwe ku bantu”. (1 Kor. 10:13) Urashobora rero kuronka inkomezi be n’umutima rugabo mu kuzirikana ku turorero tw’abandi, aho kuguma wibanda ku ngorane zawe bwite. (1 Tes. 1:5-7; Heb. 12:1) Nufate akanya ko kuzirikana ku bijanye n’akarorero k’abo uzi bagumye bihanganye badahemuka naho bari mu bintu bibabaza cane. Woba umaze kugira ubushakashatsi ku bijanye n’inkuru zimaze gusohorwa zigana ivyashikiye abandi mu buzima, urondera izoba zerekeye abigeze gushikirwa n’ikintu gisa n’ico urimwo? Hari aho wosanga izo nkuru zigukomeje cane.

16. Imana idukomeza gute igihe turi mu bigeragezo bitandukanye?

¹⁶ Ubwa gatatu, niwibuke ko Yehova ari “Se w’imbabazi zuzuye ikibabarwe [a]kaba n’Imana y’uruhoza rwose, iyiduhoza mu makuba yacu yose, ngo dushobore guhoza abari mu makuba y’ubwoko bwose biciye ku ruhoza twebwe ubwacu turiko turahoreshwa n’Imana”. (2 Kor. 1:3, 4) Ni nk’aho Imana iba ihagaze iruhande yacu kugira ngo ituremeshe yongere idukomeze, atari gusa mu makuba tuba turimwo ariko no “mu makuba yacu yose”. Ivyo bica rero bituma dushobora guhoza abandi “mu makuba y’ubwoko bwose”. Paulo ubwiwe yariboneye ko ayo majambo ari ay’ukuri.​—2 Kor. 4:8, 9; 11:23-27.

17. Bibiliya ishobora gute kudufasha kwihanganira imibabaro yo mu buzima?

¹⁷ Ubwa kane, turafise Ijambo ry’Imana Bibiliya, iryo na ryo rikaba ari “ngirakamaro ku kwigisha, ku gukangira, ku kugorora ibintu, ku gutoza indero mu bugororotsi, ngo umuntu w’Imana abe uwubishoboye neza, afise ibikenewe vyose ku bw’igikorwa ciza cose”. (2 Tim. 3:16, 17) Ijambo ry’Imana ntirituma tuba gusa ‘ababishoboye’ be n’‘abafise ibikenewe ku bw’igikorwa ciza cose’. Riratuma kandi tuba abashoboye kwihanganira imibabaro yo mu buzima. Riratuma tuba ‘ababishoboye neza’ be n’‘abafise ibikenewe vyose’. Ijambo ryo mu rurimi rwo mu ntango rihindurwa ngo “afise ibikenewe vyose” urudome ku rundi risobanura “kuba yararonkejwe ivyo akeneye vyose”. Iryo jambo rishobora kuba ari ryo ryakoreshwa mu bihe vya kera ku bijanye n’ubwato bwaronswa ikintu cose gikenewe ku bw’urugendo runaka canke rigakoreshwa ku bijanye n’imashini yaba ishoboye gukora ikintu ico ari co cose baba bayitezeko. Muri ubwo buryo nyene, Yehova abicishije kw’Ijambo ryiwe, araturonsa ibintu vyose dukenera kugira ngo dutorere umuti ikintu ico ari co cose codushikira. Ku bw’ivyo rero, umwe wese muri twebwe yoshobora kuvuga ati: “Niba Imana yaretse bikanshikira, ndashobora kuvyihanganira ibimfashijemwo”.

Tugiye gukurwako imibabaro yacu yose

18. Ni ikintu ikihe twogumiza ku muzirikanyi kizorushiriza kudufasha kuguma twihangana tudahemuka?

¹⁸ Ubwa gatanu, niwamize nantaryo ku muzirikanyi uku kuri kwiza igitangaza kujanye n’uko Yehova vuba agiye gukura imibabaro yose ku muryango w’abantu. (Zab. 34:19; 37:9-11; 2 Pet. 2:9) Ivyo nivyamara kuranguka, kuba tuzorokorwa n’Imana ntibizoba bisobanura gusa ukurokorwa imibabaro turimwo muri iki gihe, ariko kandi kazoba ari n’akaryo ko kuronswa ubuzima budahera, kwaba ari ukuba mw’ijuru hamwe na Yezu canke kw’isi izoba yahindutse Iparadizo.

19. Bishoboka gute ko umuntu aguma yihangana adahemuka?

¹⁹ Magingo tukirindiriye ico gihe, turabandanya kwihanganira ibintu bibabaje vyo muri iyi si mbi. Ese ukuntu turindiranye umushasharo igihe ivyo bintu bitazoba bikibaho! (Zab. 55:6-8) Nimuze twame twibuka yuko ukwihangana kwacu tudahemuka bigaragaza ko wa Mubesheranyi ari umubeshi koko. Ese twokomezwa biciye ku masengesho dutura be no ku muryango wacu wa gikirisu, tukama twibuka yuko abavukanyi bacu bariko bashikirwa n’ibigeragezo bisa n’ivyo turimwo! Nubandanye kuba uwubishoboye neza kandi afise ibikenewe vyose mu gukoresha neza Ijambo ry’Imana. Ntukigere ureka icizigiro ufise c’uko ya “Mana y’uruhoza rwose” ikwitwararikana urukundo ngo gihungabane. Niwibuke ko “inyonga z’Uhoraho ziri ku bagororotsi, n’amatwi yiwe ayabangira ugutakamba kwabo”.​—Zab. 34:15.

Woshobora kuvyishura?

• Dawidi yumvise amerewe gute ku bijanye n’imibabaro yarimwo?

• Umwami Salomo yaseruye gute ukwizigira yari afise?

• Ni igiki gishobora kudufasha kwihanganira ivyo Yehova areka bikadushikira?

[Ifoto ku rup. 13]

Salomo yarizigira adakeka ko Yehova yogize ico akoze ku neza y’abasavyi biwe bari mu mibabaro

[Ifoto ku rup. 15]

Dawidi yarakoreye umutwaro wiwe Yehova mw’isengesho maze yongera arakora ahuza n’ivyo yasenze asaba