Nurwanye poropagande ya Shetani

‘NTIMUHENDWE. Imana yanyu ntizobafasha. Nimwuzure n’umwami w’i Ashuri canke na ho mwibonereko!’ Ubwo ni bwo butumwa Rabushake, intumwa y’Umwami w’Umusiriya Senakeribu, yashikirije abantu b’i Yeruzalemu. Ingabo z’uwo mwami zari zateye igihugu c’Ubuyuda. Ayo majambo iyo ntumwa yashikirije yari ayo guca intege abantu b’i Yeruzalemu no kubatera ubwoba kugira ngo bishikane.​—2 Abm. 18:28-35.

Abasiriya bari bazwi ko ari abantu b’ababisha bakaba na ba ruburakigongwe. Baratera ubwoba abansi babo mu kubamenyesha amakuru y’ido n’ido ateye ubwoba yerekeye ukuntu bafata bunyamaswa abo baba batwaye ari inyagano. Nk’uko umutohozakahise umwe yitwa Philip Taylor abivuga, barakoresha “iterabwoba rifatanije na poropagande, vyaba bigenewe gutuma baguma biganziye abo baba banesheje no gutera ubwoba aboshoboye kuba abansi babo, bakaba babigira bakoresheje ibicapo vyakwiragiza poropagande yabo be n’amajambo yatuma abantu bata umutwe.” Poropagande, ni ikirwanisho gikomeye. Taylor avuga ko ari ikirwanisho gituma “umuntu ata umutwe.”

Abakirisu b’ukuri “[ba]fise intambara yo kunigana, atari ukunigana n’amaraso n’umubiri, mugabo kunigana . . . n’ibinyankomezi vy’impwemu bibi,” ni ukuvuga ko banigana n’ibiremwa vy’impwemu vyagararije Imana. (Ef. 6:12) Umukuru muri ivyo biremwa ni Shetani wa Mubesheranyi. Na we nyene arakoresha iterabwoba hamwe na poropagande.

Shetani yivugisha yuko ashobora gusenyura ugutungana k’uwo ari we wese muri twebwe. Mu gihe c’umwe sekuruza w’imiryango Yobu, Shetani yabwiye Yehova Imana ati: “Ivy’umuntu atunze vyose yobitanga ku magara yiwe.” Mu yandi majambo, ni nk’aho yariko avuga yuko mu gihe umuntu yoshirwako umukazo bimwe bikomeye, bitebe bitebuke yotakaza ugutungana kwiwe imbere y’Imana. (Yobu 2:4) None Shetani yoba avuga ukuri? Ubwo none twese twoba dufise urugero ntarengwa mu bijanye n’ukwihangana, ku buryo nka hamwe hogira iciyongera kuri rwo vyotuma duca turenga ku ngingo ngenderwako twisunga, kugira ngo tube turamaze kabiri? Shetani ashaka ko twiyumvira gutyo. Ni co gituma akoresha poropagande yonona kugira ngo yinjize ico kintu mu mizirikanyi yacu. Nimuze dusuzume bumwebumwe mu buryo akoresha, hanyuma turimbure ukuntu dushobora kumunanira.

‘Amatanguriro yabo ari mu mukungugu’

Shetani yarakoresheje Elifazi, umwe mu bagenzi batatu ba Yobu bari baje kumuraba, kugira ngo avyure ibihari ku vy’uko abantu bafise intege nke rwose. Mu kuvuga abantu ko “baba mu nzu z’ibumba,” yabwiye Yobu ati: “Amatanguriro [yabo ari] mu mukungugu, bahonyoreka nk’inyenzi. . . . Hagati y’igihe c’igitondo n’umugoroba baravunagurwa: Bapfa akagīrīre, ntihagire ūbishirak’umutima.”​—Yobu 4:19, 20.

Hariho n’ahandi mu Vyanditswe tugereranywa n’“inzavya z’ivu,” ni ukuvuga inkono zoroshe kumeneka zikozwe mw’ibumba. (2 Kor. 4:7) Turi abanyantege nke kubera igicumuro be n’agasembwa twarazwe. (Rom. 5:12) Hamwe twoba tutagira uwudufasha, twobangamirwa n’ibitero vya Shetani. Mugabo kubera yuko turi abakirisu, turafise ikidufasha. Naho turi abanyantege nke, turi n’agaciro mu nyonga z’Imana. (Yes. 43:4) Vyongeye, Yehova araronsa impwemu nyeranda abayimusaba. (Luka 11:13) Impwemu yiwe irashobora kuturonsa “ububasha burengeye ubusanzwe,” bukadufasha kuvyifatamwo neza mu ngorane zose Shetani yoduteza. (2 Kor. 4:7; Flp. 4:13) Nitwarwanya wa Mubesheranyi, “[d]ukomeye mu kwizera,” Imana izotuma dushikama yongere idukomeze. (1 Pet. 5:8-10) Ni co gituma tudakwiye gutinya Shetani wa Mubesheranyi.

Umuntu ariko “agotomera ibigabitanyo”

Elifazi yabajije ati: “Umuntu vyoshoboka bite kw aba uwera? Cank’uwavyawe n’umugore, kw aba umugororotsi?” Yaciye atanga inyishu mu kuvuga ati: “Erega n’abera bayo [Imana] ntaho ibizigira, mbere n’ijuru na ryo ntiritunganye mu nyonga zayo, nanswe umuntu agayitse kand’abihiye, agotomera ibigabitanyo nk’amazi!” (Yobu 15:14-16) Elifazi yariko abwira Yobu ko Yehova abona yuko ata muntu n’umwe agororotse. Wa Mubesheranyi na we nyene arafatira ku vyiyumviro bitari vyo. Ashaka ko tubuzwa amahoro n’amakosa twakoze muri kahise, tukinegura birenze urugero, be n’uko twiyumvira yuko tutakivayo. Ashaka kandi ko twiyumvira yuko Yehova atwitegako ivyo tudashoboye be n’uko impuhwe ziwe, ikigongwe ciwe hamwe n’imfashanyo aturonsa bidahagije kugira ngo duharirwe amakosa yacu.

Mu vy’ukuri, twese ‘twaracumuye tukaba tudashikira ubuninahazwa bw’Imana.’ Nta muntu n’umwe w’umunyagasembwa yoshobora gushitsa ata gahaze ingingo mfatirwako zigororotse za Yehova. (Rom. 3:23; 7:21-23) Ariko rero, ivyo ntibisobanura yuko ata co tumaze kuri we. Yehova arazi ko “ya nzoka yo mu ntango, iyitwa Mubesheranyi na Shetani,” ari yo iriko ifatira ku kuba turi abanyabicumuro. (Ivyah. 12:9, 10) Kubera ko Imana izi yuko “turi umukungugu,” ntiyirengagiza ico kintu kandi ‘ntiyama idutora amahinyu.’​—Zab. 103:8, 9, 14; NW.

Nitwavavanura n’ingendo yo gukora ikibi maze tukiyegereza Yehova dufise agatima ko kwicuza no kwigaya, ‘azotubabarira cane.’ (Yes. 55:7, NW; Zab. 51:17) Bibiliya ivuga yuko naho mbere ibicumuro vyacu “vyotukura tukutuku, bizokwera derere nka shelegi.” (Yes. 1:18) Nimuze rero twiyemeze kutigera tureka kugerageza gukora ivyo Imana igomba.

Kubera ko turi abanyabicumuro, ntidushobora kwigera dukora ibintu vyotuma tubonwa ko tugororotse imbere y’Imana. Adamu na Eva ntibatakaje gusa ukutagira agasembwa kwabo be n’icizigiro bari bafise co kubaho ibihe bidahera, ariko kandi baratakaje n’ivyacu. (Rom. 6:23) Yamara rero, bivuye ku rukundo rukomeye Yehova akunda abantu, yarashizeho intunganyo yuko duharirwa ibicumuro vyacu biciye ku kwizera inkuka y’incungu y’Umwana wiwe, Yezu Kristu. (Mat. 20:28; Yoh. 3:16) Ese ukuntu ubwo ari uburyo bwiza igitangaza bugaragaza “ubuntu ata wari abukwiriye” bw’Imana! (Tito 2:11) Emwe, turashobora kuvayo! Ni kubera iki none tworeka ngo Shetani atume twiyumvamwo ko tutakivayo?

“Utere amagufa yiwe n’umubiri wiwe”

Shetani yivugishije ko Yobu yotaye ukwizera kwiwe bishitse akaba atagifise amagara meza. Mu guhigisha Yehova, uwo Mubesheranyi yavuze ati: “Utere amagufa yiwe n’umubiri wiwe, urābe kw atazokurogotako imbonankubone.” (Yobu 2:5) Hamwe uwo Mwansi w’Imana yotuma twiyumvamwo ko ata co tumaze kubera yuko dufise amagara make, emwe, yotamba agatarika!

Yamara, Yehova ntaduheba igihe tuba tutagishoboye gukora ikintu cose twahora dukora mu murimo wiwe. Vyogenda gute nka hamwe umugenzi wacu yoterwa agakomereka? None twoca tubona ko ata co akimaze ngo ni uko atagishoboye kudukorera ibingana n’ivyo yahora adukorera? Habe namba! Twobandanya kumukunda kandi tukamwitwararika, na canecane mu gihe yoba yakomeretse ariko agerageza gukora ibitwungura. None wumva twokwitega ko Yehova yokora ibiri munsi y’ivyo? Bibiliya ivuga iti: “Imana [si] iyitagororotse ku buryo yibagira igikorwa canyu n’urukundo mwerekanye ku bw’izina ryayo.”​—Heb. 6:10.

Ivyanditswe biravuga ivyerekeye “umupfakazi umwe w’umukene” ashobora kuba yaramaze imyaka myinshi ashigikira ibijanye no gusenga Imana. Mbega igihe Yezu yamwihweza ariko atiburira “uduceri tubiri tw’agaciro gatoyi cane” mw’isandugu y’amahera yo ku rusengero, yoba none yabonye uwo mupfakazi be n’iryo shikanwa ryiwe nk’aho ata co vyari bimaze? Aho kubigenza gutyo, yaramushemagije ku kuba yari akoze ivyo ashoboye vyose mu ntumbero yo gushigikira ugusenga kw’ukuri.​—Luka 21:1-4.

Igihe tuzigamye ugutungana kwacu, turashobora kwizigira tudakeka yuko ubucuti dufitaniye na Yehova buzoguma bukomeye, naho agasembwa kacu kotumerera nabi gute biciye ku kwiterera mu myaka canke ku ndwara. Imana ntizokwigera iheba abantu b’intahemuka ngo ni ukubera gusa yuko ingorane bafise zitumye ubushobozi bwabo bwo kuyisukurira bugira aho bugarukira.​—Zab. 71:9, 17, 18.

Mwemere “inkofero y’ubukiriro”

Dushobora gute kwikingira poropagande ya Shetani? Intumwa Paulo yanditse ati: “Mubandanye kwironsa ububasha mu Mukama no mu bushobozi bw’inkomezi ziwe. Mwambare umwambaro ukwiye w’ibirwanisho biva ku Mana kugira ngo mushobore guhagarara mushikamye mu kurwanya uruyeri rwa wa Mubesheranyi.” Kimwe muri ivyo birwanisho vyo mu buryo bw’impwemu ni “inkofero y’ubukiriro.” (Ef. 6:10, 11, 17) Ku bijanye na poropagande ya Shetani, dukwiye kuraba neza ko twemeye iyo nkofero kandi tukaguma tuyambaye. Inkofero y’umusirikare irakingira umutwe wiwe. “Icizigiro [cacu] c’ubukiriro,” ni ukuvuga ukuba twizigira tudakeka ibijanye n’iranguka ry’imihango Imana yasezeranye yerekeye isi nshasha yayo ininahaye, kizokingira imizirikanyi yacu ibinyoma vya Shetani. (1 Tes. 5:8) Turakeneye gutuma ico cizigiro kiguma gikayangana kandi gikomeye, biciye ku kwiyigisha Ivyanditswe tubigiranye umwete.

Yobu yarihanganiye ibitero vy’ububisha kandi biranga urwanko bituruka kuri Shetani. Yobu yarizera izuka bimwe bikomeye cane ku buryo n’igihe yageramirwa n’urupfu bitatumye acika intege. Ahubwo yabwiye Yehova ati: “Wompamagaye nkakwitaba; wobaye wifuza igikorwa c’amaboko yawe.” (Yobu 14:15) Naho mbere Yobu yari gupfa azira ukuzigama ugutungana kwiwe, yarizigira yuko urwo Imana ikunda abasavyi bayo b’intahemuka rwotumye ibahamagara ikabakura mu bapfuye.

Ese twokwizigira Imana y’ukuri nk’uko kwa Yobu! Yehova yoshobora gukuraho ikintu ico ari co cose Shetani n’abakozi biwe boshobora kuduteza. Niwibuke kandi yuko Paulo adukura amazinda ati: “Imana ni inyizigirwa, ntizobareka ngo mugeragezwe ibirenze ivyo mushobora kwihanganira, mugabo hamwe na nya kigeragezo, izobacira kandi icanzo kugira ngo mushobore kucihanganira.”​—1 Kor. 10:13.

[Ifoto ku rup. 20]

Yehova araha agaciro igikorwa umurangurira udahemuka

[Ifoto ku rup. 21]

Niwemere inkofero y’ubukiriro, kandi ugume uyambaye