Agosto

Onani pinthu piwiri pyakufunika kakamwe pinalonga lemba ineyi: (1) Anthu akulungama asathimbana na nyatwa. (2) Yahova asatipulumusa mu nyatwa zathu. Mphapo Yahova asatipulumusa tani? Njira ibodzi ndi kutiphedza toera kukhala na maonero adidi mu dziko ino yakuipa. Pidalonga Yahova kuti tingantumikira tinakhala akutsandzaya, iye nee alonga kuti tinakhala na umaso wakusowa pinentso cincino. (Iza. 66:14) Iye asafuna kuti tiikhe manyerezero athu ntsogolo mu ndzidzi unafuna kukhala ife na umaso wakutsandzaya kwenda na kwenda. (2 Akor. 4:16-18) Mbwenye cincino iye asatiphedza toera tipitirize kuntumikira. (Ciliro 3:22-24) Tinapfundzanji na pitsandzo pya atumiki a Yahova akukhulupirika akale na a mu ntsiku zino? Ife panango tinathimbana na pinentso pyakukhonda dikhira. Mbwenye tinganyindira Yahova, ndzidzi onsene iye anatiphedza.—Mas. 55:22. w23.04 tsa. 14-15 ¶3-4

Ife tinakwanisa kutowezera citsandzo ca Zuze na Mariya adabvera mautongi maseze pikhali pyakunentsa kuna iwo. (Luka 2:1-6) Mariya pikhali iye na mimba cifupi na miyezi mipfemba, iye na Zuze aphembwa toera kucita cinthu cakunentsa kakamwe. Ntongi Augustu akhazikisa ntemo toera anthu onsene a mu Utongi Waciroma alemberwe. Zuze na Mariya akhafunika kucita ulendo wa makilometru 150 m’mapiri toera kufika ku Bhetelehemu. Ulendo unoyu mbudakhala wakunentsa kakamwe makamaka kuna Mariya. Panango iwo adzudzumika thangwi ya citsidzikizo cawo na ca mwana akhafuna kubalwa. Panango iwo akhabvundzika kuti mbadacitanji Mariya angabala mwana mu ndzidzi ukhacita iwo ulendo. Nakuti iye akhafuna kubala Mesiya, panango pyenepi mbapidaacitisa kukhonda kubvera mautongi. Zuze na Mariya nee atawirisa kuti kudzudzumika kweneku kuacitise kukhonda bvera mautongi. Yahova aapasa nkhombo thangwi yakubvera kwawo. Mariya afika mwakutsidzikizika ku Bhetelehemu, abala mwana waungumi wadidi, pontho aphedzera kukwanirisika kwa profesiya ya Bhibhlya!—Mik. 5:2. w23.10 tsa. 8 ¶9; tsa. 9 ¶11-12

Ndiye tani khala musagopa kakamwe kutawira pa misonkhano? Panango pinakhala pyadidi kuna imwe mungakhunganyika mwadidi. (Mis. 21:5) Mungadziwa mwadidi mphangwa zinafuna kupfundza imwe pa misonkhano ntsiku ineyi, pinakhala pyakukhonda nentsa toera kutawira. Kusiyapo pyenepi, perekani ntawiro wacigwagwa. (Mis. 15:23; 17:27) Ntawiro wacigwagwa unakuphedzani toera mukhonde kugopa pakutawira. Mungapereka ntawiro wacigwagwa mukuphatisira mafala anu ene, munapangiza kuti mwakhunganyika mwadidi, pontho mwabvesesa mwadidi mphangwa zinapfundzwa. Ndiye tani khala mwayesera kuphatisira maonero anewa mangasi mbwenye musapitiriza kugopa kutawira kazinji kene pa misonkhano? Khalani na cinyindiro cakuti Yahova asakomerwa na kuwangisira kwanu toera kucita pinakwanisa imwe. (Luka 21:1-4) Yahova nee asatiphemba toera kucita pinthu pyakuti nee tinakwanisa kupicita. (Afil. 4:5) Khazikisani cifuno ca pinthu pinakwanisa imwe kucita, pontho phembani Yahova toera akuphedzeni kuti mukhale wakukhurudzika. Pakutoma panango munakhazikisa cifuno cakupereka ntawiro ubodzi mwacigwagwa. w23.04 tsa. 21 ¶6-8

Mpostolo Paulu atilandanisa na anyankhondo akuti akhunganyika toera kuenda kamenya nkhondo. Nyankhondo asadikhirwa kuti ndzidzi onsene akhale wakukhunganyika toera kumenya nkhondo. Munjira ibodzi ene, ife tisafunikambo kukhala akukhunganyika. Ife tinakhala akukhunganyika ntsiku ya Yahova mbidzati kufika tingabvala cakutsidzikiza naco diti ca cikhulupiro, ufuni na capeu ca utale ca cidikhiro. Cakutsidzikiza naco diti cikhatsidzikiza ntima wa nyankhondo. Cikhulupiro na ufuni pisatsidzikizambo ntima wathu wakuphiphirisa. Ipyo pisatiphedza toera kupitiriza kutumikira Mulungu na kutowezera Yezu. Cikhulupiro cisatipasa cinyindiro cakuti Yahova anadzatipasa nkhombo thangwi ya kunsaka kwathu na ntima onsene. (Aheb. 11:6) Ico cisatiphedzambo toera kupitiriza kukhala akukhulupirika kuna Ntsogoleri wathu Yezu, maseze tithimbane na nyatwa. Ife tinakwanisa kuwangisa cikhulupiro cathu toera tikwanise kupirira nyatwa. Tinakwanisa kucita pyenepi tingapfundza pitsandzo pya atumiki a Yahova a mu ntsiku zino akuti apitiriza kukhala akukhulupirika mwakukhonda tsalakana kutcingwa peno nyatwa yakusowa kobiri. Pontho tinacalira ngozwi yakufuna kobiri na kukhala na pinthu pizinji tingatowezera pitsandzo pya ale adalulupisa umaso wawo toera kuikha Umambo wa Mulungu pa mbuto yakutoma. w23.06 tsa. 10-11 ¶8-9

Kudzitonga ndi luso yakudziwa mwadidi mabvero na macitiro athu. Kudzitonga kunatikulumiza kukwanirisa pifuno pyathu, makamaka khala cifuno ceneci ndi cakunentsa peno nee tiri na cifuno toera kucicita. Kumbukani kuti n’khaliro wakudzitonga usacita khundu ya misapo ya nzimu, natenepa phembani Yahova toera akuphedzeni kukulisa n’khaliro unoyu wakufunika kakamwe. (Luka 11:13; Agal. 5:22, 23) Lekani kudikhira ndzidzi wakuti pinthu pinakhala mwadidi. Tingadikhira ndzidzi unoyu, panango nee tinakwanirisa pifuno pyathu. Panango nee tinakhala na cifuno thangwi pinthu pinafuna kucita ife pisaoneka ninga ndi pyakunentsa kakamwe toera kupicita. Khala ndi pyenepi pinacitika na imwe, panango pinakhala mwadidi kugawa pifuno pyanu. Khala cifuno canu ndi kukulisa n’khaliro Wacikristu, musaona tani kupangiza n’khaliro unoyu mwapang’ono na pang’ono? Khala cifuno canu ndi cakuleri Bhibhlya yonsene, musaona tani kutoma kuleri mu ndzidzi wakucepa? w23.05 tsa. 29 ¶11-13

Ngakhale mu ntsiku zino zakumalisa, Yahova asaphatisira gulu yace mbatipasa pitsogolero toera kutiphedza kuti tipitirize kufamba ‘Munjira Yakucena.’ (Iza. 35:8; 48:17; 60:17) Panango ife tinalonga kuti munthu anatoma kupfundza Bhibhlya, ali na mwai wakupita ‘Munjira Yakucena.’ Anango asafamba pang’ono munjira ineyi, buluka penepo mbaisiya. Mbwenye anango ali akutonga kupitiriza kufamba munjira ineyi mpaka kufika kunaenda iwo. Mphapo ndi kupi kunaenda iwo? Kuna ale ali na cidikhiro cakuenda kudzulu, “Njira Yakucena” isaatsogolera “m’paraizu ya Mulungu” kudzulu. (Apok. 2:7) Kuna ale ali na cidikhiro cakukhala pa dziko yapantsi, njira ineyi isaatsogolera ku umaso waungwiro kunkhomo kwa pyaka 1.000. Khala imwe muli kufamba munjira ineyi lero, lekani kunyerezera pinthu pidasiya imwe nduli. Pontho lekani kubuluka munjira ineyi mpaka kufika mu dziko ipswa! w23.05 tsa. 17 ¶15; tsa. 19 ¶16-18

Munganyerezera pinthu pyonsene pidakucitirani Yahova, imwe munafuna kupereka takhuta kakamwe kuna iye, pontho munafuna kuperekeka kuna iye. (Mas. 116:12-14.) Bhibhlya isalonga kuti “muoni onsene wadidi na wakulungama” usabuluka kuna Yahova. (Tiya. 1:17) Ukulu kakamwe mwa miyoni ineyi ndi ntsembe ya Mwanace, Yezu. Thangwi yanji? Thangwi kubulukira mu ciomboli, imwe munakwanisa kukhala na uxamwali wakuwanga na Yahova. Pontho Yahova akupasani cidikhiro cakukhala m’maso kwenda na kwenda. (1 Juw. 4:9, 10) Na thangwi ineyi, kuperekeka kuna Yahova ndi ibodzi mwa njira zakupangiza kuti musapereka takhuta kakamwe thangwi ya ufuni wace ukulu na nkhombo zonsene zidakupasani iye.—Dheu. 16:17; 2 Akor. 5:15. w24.03 tsa. 5 ¶8

Tingaona makhaliro akuipa ali na anthu ntsiku zino, ife tisakhala na mabvero mabodzi ene ninga akhali na Loti. Iye “akhatsukwala thangwi ya makhaliro akupasa manyadzo a anthu akuipa,” thangwi akhadziwa kuti Babathu wakudzulu asaida makhaliro anewa. (2 Ped. 2:7, 8) Kugopa Mulungu na kunfuna kwakulumiza Loti toera kucalira makhaliro aulukwali a anthu a mu ndzidzi wace. Lero ife tazungulirwambo na anthu akuti nee asalemedza midida ya Yahova. Ngakhale tenepo, tingafuna Mulungu wathu na kun’gopa, tinakwanisa kupitiriza kukhala na makhaliro adidi. Toera kutiphedza kucita pyenepi, Yahova asatiwangisa na uphungu unagumanika m’bukhu ya Misangani. Akristu onsene: Amuna na akazi, aphale na atsikana, kuphatanizambo akulu, anakwanisa kuphedzeka na uphungu unagumanika m’bukhu ineyi. Tingagopa Yahova, tinacalira kucita uxamwali na anthu anacita pinthu pyakuipa. w23.06 tsa. 20 ¶1-2; tsa. 21 ¶5

Panango imwe muli kutcingwa na acibale anu, peno panango mwasiya pinthu pyanu pyakumanungo toera mukwanise kuikha Umambo wa Mulungu pa mbuto yakutoma. (Mat. 6:33) Khala ndi tenepo, khalani na cinyindiro cakuti Yahova asaona mabasa anacita imwe mwakukhulupirika. (Aheb. 6:10) Panango imwe mwakwanisa kuona kuti mafala adalonga Yezu thangwi ya pyenepi ndi andimomwene. Iye alonga: “Ule adasiya nyumba yace, abale ace amuna peno akazi, pai wace, mai wace, anace, peno munda wace thangwi ya ine na thangwi ya mphangwa zadidi, anadzatambira pizinji kupiringana 100 mu ndzidzi uno—nyumba, abale amuna na akazi, amama, ana na minda, kubulukira mu kutcingwa, pontho ntsogolo anadzagumana umaso wakukhonda mala.” (Marko 10:29, 30) Nkhombo zinatambira imwe ndi zikulu kakamwe kupiringana kuwangisira konsene kudacita imwe.—Mas. 37:4. w24.03 tsa. 9 ¶5

Onani pidacitika mu ndzidzi udathimbana Akristu a ku Yudeya na njala ikulu. Pidabva mpingo wa ku Antiyokiya wa ku Sirya kuti abale awo akuthabuka na njala ku Yudeya, mwakukhonda penula iwo aabvera ntsisi. Natenepa iwo acita pinthu toera kuphedza abale na alongo anewa. Iwo “abverana kuti m’bodzi na m’bodzi abuluse pinakwanisa iye toera atumize ciphedzo kuna abale a ku Yudeya.” (Mabasa 11:27-30) Maseze abale na alongo anewa akhali kutali, Akristu a ku Antiyokiya acita pyonsene pikhakwanisa iwo toera kuaphedza. (1 Juw. 3:17, 18) Ife tinakwanisambo kubvera ntsisi anango lero tingabva kuti abale na alongo athu agwerwa na cidengwa. Mwakukhonda dembuka panango tinaphemba akulu a mpingo toera tiphedzere mabasa anango, kucita pyakupereka na kucita phembero thangwi ya ale adagwerwa na cidengwa. Abale na alongo athu panango anafuna ciphedzo toera kukhala na pinthu kuti apitirize kukhala m’maso. Mambo wathu Kristu Yezu, angadzatonga anthu, tisafuna kuti iye atigumane tiri kubvera ntsisi anango mbaticemera kuti ‘titambire Umambo.’—Mat. 25:34-40. w23.07 tsa. 4 ¶9-10; tsa. 6 ¶12

Yezu atowezera kulinganira kwa Yahova. Iye akhadabwera pa dziko yapantsi toera kumwazira mphangwa “mabira akutayika a dzindza ya Izraeli.” Mbwenye iye akhali wakulinganira mu ndzidzi ukhamwaza iye mphangwa kuna anthu. Mwacitsandzo, nkazi wakuti nee akhali wa dzindza ya Izraeli an’dembetera toera awangise mwanace wankazi wakuti ‘akhathabuka kakamwe thangwi iye akhali na dimonyo.’ Yezu abvera ntsisi nkazi unoyu mbawangisa mwanace. (Mat. 15:21-28) Onani citsandzo cinango. Mu ndzidzi ukhatoma Yezu utumiki wace, iye alonga: “Ule anandikhonda . . . , inembo ndinadzan’khonda.” (Mat. 10:33) Mbwenye iye nee akhonda Pedhru, maseze Pedhru akhadan’khonda katatu. Yezu aona kuti Pedhru akhadatcunyuka, pontho akhali wakukhulupirika. Pidalamuswa Yezu muli akufa aonekera kuna Pedhru, pontho pisaoneka kuti ampasa cinyindiro cakuti amulekerera na asanfuna. (Luka 24:33, 34) Yahova Mulungu na Yezu Kristu ndi akulinganira. Ndiye tanimbo ife? Yahova asafuna kuti tikhale akulinganira. w23.07 tsa. 21 ¶6-7

Mphapo tinalonganji kuna anango toera akhalembo na cinyindiro cakuti pikiro ya Mulungu thangwi ya Paraizu inacitikadi? Cakutoma, adacita pikiro ineyi ndi Yahova. Bukhu ya Apokalipse isalonga: “Ule akhali pa mpando waumambo alonga: ‘Ona! Ine ndiri kucita pinthu pyonsene kudza pipswa.’” Yahova ali na udziwisi, mphambvu na cifuno cakukwanirisa pikiro yace. Kusiyapo pyenepi, Yahova asadziwa kuti anacita pidalonga iye. Na thangwi ineyi iye alonga: ‘Mafala anewa ndi akunyindirika na andimomwene. Iwo akwanirisika kale.’ Pontho nkhabe cinthu cinafuna kucimwanisa Yahova kucita pinafuna iye. Na thangwi ineyi, iye alonga: “Ine ndine Alfa na Omega.” (Apok. 21:6) Yahova anapangiza kuti Sathani ndi nyauthambi, pontho iye nee anakwanisa kupingiza Yahova toera kukwanirisa cifuniro cace. Munthu angalonga kuti pyenepi nee ndi pyandimomwene, munakwanisa kuleri na kufokotoza Apokalipse 21: 5, 6. Pangizani kuti Yahova atipasa cinyindiro cakuti anakwanirisa pikiro yace ninga kuti alemba asinatura yace pa dhokumento.—Iza. 65:16. w23.11 tsa. 7 ¶18-19

Yahova acita pikiro ineyi kuna Abhrahamu pikhali iye na pyaka 75 pyakubalwa. Kodi Abhrahamu aona kukwanirisika kwa pikiro ineyi? Iye aona basi ene kukwanirisika kwa khundu ibodzi ya pikiro ineyi. Pidawambuka iye Nkulo wa Eufrate mbadikhira pyaka 25, Abhrahamu aona kubalwa kwa mwanace Izaki, pontho pidapita pyaka 60, iye aona kubalwa kwa adzukulu ace Ezau na Yakobe. (Aheb. 6:15.) Mbwenye Abhrahamu nee aona kukula kwa dzindza yace, pontho nee apita mu Dziko Yakupikirwa. Ngakhale tenepo, mamuna unoyu wakukhulupirika akhali na uxamwali wakuwanga na Nciti wace. (Tiya. 2:23) Pontho Abhrahamu angadzalamuswa muli akufa, iye anatsandzaya kakamwe angadziwa kuti thangwi ya cikhulupiro cace na kupirira kwace, anthu onsene apaswa nkhombo. (Gen. 22:18) Tisapfundzanji? Panango ife nee tinaona kukwanirisika kwa mapikiro onsene a Yahova. Mbwenye tingapirira ninga Abhrahamu, tinakwanisa kukhala na cinyindiro cakuti Yahova anatipasa nkhombo cincino, pontho anatipasa nkhombo zizinji n’dziko ipswa idapikira Iye.—Marko 10:29, 30. w23.08 tsa. 24 ¶14

Pikhali iye m’phale, Mambo Uziya akhali wakucepeseka. Iye apfundziswa “toera agope Mulungu wandimomwene.” Iye afa na pyaka 68 pyakubalwa, pontho Yahova ampasa nkhombo mu pyaka pizinji pya umaso wace. (2 Kro. 26:1-4) Uziya akunda anyamalwa azinji, pontho acitisa kuti Yerusalemu akhale wakutsidzikizika. (2 Kro. 26:6-15) Mwakukhonda penula, Uziya akhali wakutsandzaya thangwi ya pinthu pidacita iye na ciphedzo ca Mulungu. (Ekle. 3:12, 13) Mambo Uziya akhadadzolowera kupasa anango pitsogolero. Panango ndi pyenepi pidancitisa kunyerezera kuti anakwanisa kucita pyonsene pinafuna iye. Thangwi ntsiku inango Uziya apita mu templo ya Yahova mwakudzikuza toera kupisa insenso pa guwa. Amambo nee akhatawiriswa kucita pyenepi. (2 Kro. 26:16-18) Nyantsembe Wankulu Azariya ayesera kunkhondesa, mbwenye Uziya aipirwa kakamwe. Mwakutsukwalisa, Uziya asiya kukhala wakukhulupirika, pontho Yahova antcunyusa na matanya. (2 Kro. 26:19-21) Mbadapitiriza kukhala wakucepeseka, umaso wace mbudakhala wadidi kakamwe. w23.09 tsa. 10 ¶9-10

Ngakhale pakumala kudzodzwa, mpostolo Pedhru akhapitiriza kucita madodo. Mu caka 36 Pakumala Kubalwa kwa Kristu, Mulungu atuma Pedhru toera aende kunyumba kwa Korneliyo wakuti nee akhali Muyuda, pontho kweneko Mulungu adzodza Korneliyo na nzimu wakucena. Pyenepi pyapangiza pakweca kuti “Mulungu nkhabe tsankhulo,” pontho pyapangiza kuti anthu akuti nee akhali Ayuda mbadakwanisa kucita khundu ya mpingo Wacikristu. (Mabasa 10:34, 44, 45) Buluka penepo, Pedhru atoma kudya na anthu akuti nee akhali Ayuda, pinthu pyakuti nee akhapicita kale. Mbwenye Akristu anango Aciyuda akhaona kuti Ayuda nee akhafunika kudya pabodzi na Akristu akuti nee akhali Ayuda. Pidafika Akristu anango akuti akhali na maonero mabodzi ene buluka ku Antiyokiya, Pedhru asiya kudya na Akristu akuti nee akhali Ayuda. Panango iye acita pyenepi thangwi akhagopa kutsukwalisa Akristu Aciyuda. Pidaona mpostolo Paulu pyenepi, iye asandika Pedhru pamaso pa anthu onsene. (Agal. 2:13, 14) Mbwenye mwakukhonda tsalakana madodo anewa, Pedhru apitiriza kutumikira Yahova mwakupirira. w23.09 tsa. 22 ¶8

Yeserani kutawira mibvundzo ineyi, pontho mungaona kuti piripo pinafunika imwe kusasanyira, lekani kutsukwala. “Mbuya ndi wakukoma ntima,” pontho iye anakuphedzani toera mucite mwadidi mabasa anu. (1 Ped. 2:3) Mpostolo Pedhru atipasa cinyindiro cakuti: “Mulungu . . . anadzamalisira kupfundziswa kwanu. Iye anadzakuwangisani.” Pakutoma Pedhru akhapibva kuti nee ndi wakuthema kukhala pabodzi na Yezu. (Luka 5:8) Mbwenye na ciphedzo ca Yahova na ca Yezu, Pedhru apitiriza kutowera Yezu mwakukhulupirika. Na thangwi ineyi, Yahova atawirisa Pedhru toera kupita “mu Umambo wakukhonda mala wa Mbuyathu na Mpulumusi wathu Yezu Kristu.” (2 Ped. 1:11) Pyenepi ndi pyakutsandzayisa kakamwe! Mungapitiriza kutumikira Yahova mwakukhulupirika ninga pidacita Pedhru mbamutawira kupfundziswa na Yahova, imwe munadzatambirambo umaso wakukhonda mala. Munadzakwanirisa “cifuniro ca cikhulupiro canu, cakuti ndi kupulumuswa kwanu.”—1 Ped. 1:9. w23.09 tsa. 31 ¶16-17

Tabhernakulo yakale ikhali na thando yakuzungulirwa na mpanda, pontho anyantsembe akhaphata mabasa awo mwenemo. Guwa ikulu ya nkuwa ikhaphatisirwa toera kupereka ntsembe ikhali pa thando pabodzi na basiya ya nkuwa yakuti ikhaikhirwa madzi yakuti anyantsembe akhaiphatisira toera kuceneseka mbadzati kupereka ntsembe. (Eks. 30:17-20; 40:6-8) Lero, Akristu akudzodzwa adasalikira asatumikira mwakukhulupirika pa thando yankati ya templo yauzimu pa dziko yapantsi. Basiya ikulu ya madzi isaakumbusa kuti iwo kuphatanizambo Akristu onsene asafunika kupitiriza kukhala na makhaliro adidi na akucena mwauzimu. Mphapo “mwinji ukulu” unatumikira kupi Yahova? M’masomphenya, mpostolo Juwau aaona dzololo ‘patsogolo pa mpando waumambo mbakatumikira Mulungu masiku na masikati.’ Mwinji ukulu usacita pyenepi pa thando yakunja ya templo yauzimu pano pa dziko yapantsi. (Apok. 7:9, 13-15) Ife tisapereka takhuta kakamwe kuna Yahova thangwi yakutipasa mwai wa kumulambira mu templo ikulu yauzimu. w23.10 tsa. 28 ¶15-16

Yahova asaphatisirambo akulu a mpingo toera kutipasa mphambvu. (Iza. 32:1, 2) Natenepa, mungakhala wakudzudzumika cedzani na akulu a mpingo thangwi ya pinthu pinakudzudzumisani. Tawirani ciphedzo cawo angafuna kukuphedzani. Thangwi Yahova asaaphatisira toera kukupasani mphambvu. Mapikiro anagumanika m’Bhibhlya thangwi ya cidikhiro cakukhala pa dziko yapantsi Mparaizu kwenda na kwenda, peno cakukhala kudzulu anakwanisambo kutipasa mphambvu. (Aroma 4:3, 18, 19) Cidikhiro cathu cisatiphedza toera kupirira nyatwa, kumwaza mphangwa zadidi na kucita mabasa akusiyana-siyana mu mpingo. (1 Ates. 1:3) Cidikhiro ceneci capasambo mphambvu mpostolo Paulu. Iye ‘apfinywa kakamwe, amala ndzeru, atcingwa, pontho agwiswa pantsi.’ Kusiyapo pyenepi, midzidzi inango umaso wace ukhali pangozwi. (2 Akor. 4:8-10) Paulu akhali na mphambvu thangwi akhanyerezera cidikhiro ca ntsogolo. (2 Akor. 4:16-18) Paulu akhanyerezera pinthu pya ntsogolo. Cidikhiro cace cakukhala na umaso wakukhonda mala kudzulu. Paulu akhanyerezera mwadidi cidikhiro ceneci, pontho thangwi ya pyenepi, iye akhali ‘na mphambvu ntsiku zonsene.’ w23.10 tsa. 15-16 ¶14-17

Mungacita phembero, onani khala ndi ndzidzi wakuthema toera Yahova akupaseni pinthu pidam’phemba imwe. Panango tinanyerezera kuti tisafunika kutawirwa maphembero athu mu ndzidzi ubodzi ene. Mbwenye Yahova asadziwa ndzidzi wakuthema toera kutiphedza. (Aheb. 4:16) Tingakhonda kutambira cinthu cidaphemba ife mu ndzidzi ubodzi ene, panango tinanyerezera kuti Yahova akhonda. Mbwenye panango iye anatawira phembero yathu mu ndzidzi unango. Mwacitsandzo, m’bale aphemba Yahova toera awangiswe utenda wace. Mbwenye iye nee awanga. Yahova mbadamuwangisa mwacirengo, Sathani panango mbadalonga kuti m’bale unoyu asapitiriza kutumikira Yahova basi ene thangwi awangiswa utenda wace. (Yobe 1:9-11; 2:4) Kusiyapo pyenepi, Yahova akhazikisa kale ndzidzi toera kumalisa mautenda onsene. (Iza. 33:24; Apok. 21:3, 4) Mpaka ndzidzi unoyu, ife nee tisafunika kudikhira kuwangiswa mwacirengo. Natenepa, m’bale unoyu panango mbadaphemba Yahova toera ampase mphambvu na ntendere wa m’manyerezero kuti akwanise kupirira utenda wace mbapitiriza kuntumikira mwakukhulupirika. w23.11 tsa. 24 ¶13

Samisoni akhadacita cinthu cakuipa kakamwe, mbwenye nee abwerera nduli. Iye asaka mwai toera kucita basa idapaswa iye na Mulungu yakuti ikhali basa yakumenya nkhondo na Afilisti. (Aton. 16:28-30) Samisoni adembetera kuna Yahova: ‘Nditawiriseni toera ndibwezere pyakuipa pidacita Afilisti.’ Mulungu wandimomwene atawira phembero ya Samisoni mukumpasa pontho mphambvu mwacirengo. Samisoni apha Afilisti azinji kakamwe pa ndzidzi unoyu kupiringana midzidzi inango yonsene. Maseze Samisoni athabuka kakamwe thangwi ya madodo ace, iye nee asiya kucita cifuno ca Yahova. Ngakhale ticite madodo mbatisandikwa peno mbatiluza mwai wakutumikira, ife nee tisafunika kubwerera nduli. Kumbukani kuti Yahova ali dzololo toera kutilekerera. (Mas. 103:8, 9) Mwakukhonda tsalakana madodo adacita ife, tinakwanisa kuphatisirwa pontho na Yahova ninga pidacita iye na Samisoni. w23.09 tsa. 6 ¶15-16

Kupirira kwanu kusakucitisani kukhala wakutawirika kuna Yahova. Pyenepi nee pisabveka kuti Yahova asakomerwa mungathimbana na nyatwa. Mbwenye asatsandzaya thangwi yakukhulupirika kwanu. Ndi pyakutsandzayisa kakamwe kudziwa kuti tingapirira tisatsandzayisa Yahova! (Mas. 5:12) Kumbukani kuti Abhrahamu apirira nyatwa, pontho akhala wakutawirika kuna Mulungu. Yahova amuona ninga xamwali wace, pontho amuona ninga wakulungama. (Gen. 15:6; Aroma 4:13, 22) Pyenepi pinakwanisambo kucitika kuna ife. Yahova nee asakomerwa na ife thangwi yakukhala na miyai yakuntumikira peno mbuto inantumikira ife. Iye asationa ninga akutawirika thangwi yakupirira kwathu mwakukhulupirika. Pontho mwakukhonda tsalakana thunga yathu, pinthu pinaticitikira, peno maluso athu, ife tonsene tinakwanisa kupirira. Kodi imwe muli kupirira nyatwa cincino mbamupitiriza kukhala wakukhulupirika kuna Yahova? Khala ndi tenepo, kumbukani kuti muli kutsandzayisa Yahova. Kumbukani kuti kukhala akutawirika kuna Mulungu kunakwanisa kutiphedza kakamwe. Kucita pyenepi kunawangisa cidikhiro cathu. w23.12 tsa. 11 ¶13-14

Nkristu asafunika kupfundza kucedza mwadidi na anango. Munthu wakuti ali na luso yadidi yakucedza, iye asabvesera, pontho asabvesesa pinanyerezera anango na mabvero awo. (Mis. 20:5) Iye anakwanisa kupfundza pinanyerezera munthu kubulukira ku fala yace, nkhope yace na pinacita iye pakulonga. Imwe nee munakwanisa kupfundza kucita pyenepi mungakhonda kucedza na anthu. Mungaphatisira kazinji kene interneti toera kucedza na anthu, ninga e-mail peno kutumiza mphangwa, pyenepi pinapungula luso yanu yakucedza na anthu nkhope na nkhope. Na thangwi ineyi, sakani miyai toera kucedza na anango nkhope na nkhope. (2 Juw. 12) Nkristu wakukola mwauzimu asafunikambo kutsalakanika na kutsalakana anthu a panyumba pace. (1 Tim. 5:8) Mphyadidi kupfundza pinthu pyakuti pinakuphedzani toera kugumana basa. (Mabasa 18:2, 3; 20:34; Aef. 4:28) Phatani basa mwaphinga, pontho citani pyonsene pinakwanisa imwe toera mumalise basa idatoma imwe. Anango anadzaona pyenepi, pontho anadzakomerwa kakamwe na basa yanu. Mungacita pyenepi, pinadzakhala pyakukhonda nentsa kugumana basa mbamupitiriza nayo. w23.12 tsa. 27 ¶12-13

Bhibhlya ingalonga pya “ntsiku ya Yahova” isalonga pya ndzidzi wakuti Yahova anadzafudza anyamalwa ace mbapulumusa atumiki ace. Kale, Yahova afudza madzindza anango akuti akhali anyamalwa ace. (Iza. 13:1, 6; Ezek. 13:5; Sof. 1:8) Ntsogolo, “ntsiku ya Yahova” inadzatoma mu ndzidzi wakuti atsogoleri a dziko anadzafudza Bhabhilonya Wankulu, buluka penepo mbitoma nkhondo ya Armajedhoni. Toera kudzapulumuka pa “ntsiku” ineyi, ife tisafunika kukhunganyika cincino. Yezu apfundzisa kuti nee tisafunika basi ene kukhunganyika “nyatwa ikulu” mbidzati kufika, mbwenye tisafunikambo “kukhala akukhunganyika.” Mat. 24:21; Luka 12:40. Mu tsamba yakutoma idalembera iye Akristu a ku Tesalonika, mpostolo Paulu aphatisira pitsandzo pizinji toera kuphedza Akristu kuti apitirize kukhala akukhunganyika ntsiku ikulu ya Yahova mbidzati kufika. Paulu akhadziwa kuti ntsiku ya Yahova nee mbidafika pa ndzidzi unoyu. (2 Ates. 2:1-3) Ngakhale tenepo, iye akulumiza abale na alongo ace toera akhunganyike ntsiku ineyi ninga kuti mbidafika mangwana. Ife tisafunikambo kuphatisira uphungu unoyu. w23.06 tsa. 8 ¶1-2

Mu pyaka 1970, mu nzinda wa Tokyo ku Japau kwamangwa predhyo yakulapha kakamwe. Anthu akhaona kumangwa kwa predhyo ineyi akhadzuma kuti iyo mbidapitiriza tani kukhala mwadidi nakuti mukhacitika piteketeke pizinji mu nzinda unoyu. Ninji pidacita anyakumanga toera pyenepi pikwanisike? Iwo amanga predhyo ineyi munjira yakuti inakwanisa kutekenyeka, mbwenye nee inagwa na piteketeke. Akristu akhala ninga predhyo ineyi. Munjira ipi? Nkristu asafunika kukhala dzololo na wakuwanga maseze atekenyeke. Iye asafunika kucita pyenepi ndzidzi onsene toera akwanise kubvera mitemo ya Yahova na midida yace. Iye ‘asakhala dzololo toera kubvera,’ pontho asapitiriza kukhala wakukhulupirika. Kusiyapo pyenepi, iye asafunikambo kukhala “wakulinganira” khala ndi pyakufunika. (Tiya. 3:17) Nkristu wakuti ali na maonero akulinganira nee asayesera kukhazikisa mitemo mu pinthu pyakuti nee pyalembwa, pontho nee asapwaza mitemo ya Yahova. w23.07 tsa. 14 ¶1-2

Pidakula iye, Yezu apitiriza kukhala wakukhulupirika mu ndzidzi ukhayeserwa iye na Sathani Dyabo, maseze Sathani ampanga toera asiye kukhala wakukhulupirika kuna Mulungu. (Mat. 4:1-11) Sathani akhali dzololo toera kucitisa kuti Yezu adawe toera acimwane kulipa ntengo wa umaso wace toera atiombole. Pikhamwaza iye mphangwa pa dziko yapantsi, Yezu apirira mayesero akusiyana-siyana. Anyamalwa ace antcinga, pontho ayesera kumupha. (Luka 4:28, 29; 13:31) Iye akhafunikambo kupirira madodo a anyakupfundzace akusowa ungwiro. (Marko 9:33, 34) Mu ndzidzi ukhayeserwa iye, akhathabuswa, pontho akhasingirirwa. Iye akhomerwa pamuti ninga phanga mwakupasa manyadzo, mbabva kupha kakamwe. (Aheb. 12:1-3) Iye akhafunika kupirira mayesero onsene ekhene, mwakusowa citsidzikizo ca Yahova. (Mat. 27:46) Mwandimomwene, Yezu athabuka kakamwe toera kupereka umaso wace ninga ciomboli. Tinganyerezera pyonsene pidacita Yezu toera kutipulumusa, ufuni wathu kuna iye usathimizirika. w24.01 tsa. 10-11 ¶7-9

Kupirira kunatiphedza toera kubverana mwadidi na anango. Kupirira kusatiphedza toera kubvesera mwadidi mu ndzidzi unalonga anango. (Tiya. 1:19) Kupirira kusatiphedzambo toera tikhale muntendere na anango. Tingakhala akupirira, ife nee tinaipirwa mwakucimbiza mbatilonga mwakusowa ufuni tingatsukwala. Pontho tingakhala akupirira, nee tinaipirwa mwakucimbiza anthu anango angatitsukwalisa. M’mbuto mwa kubwezera pyakuipa, ife tinapitiriza ‘kupirirana unango na ndzace mbatilekererana na ntima onsene.’ (Akol. 3:12, 13) Kupirira kunatiphedzambo toera kucita pisankhulo pyadidi. M’mbuto mwakucita pinthu mwamangungu, ife tinakhala na ndzidzi toera kufufudza na kunyerezera mwadidi pinafuna ife kucita. Mwacitsandzo, khala tiri kusaka basa, panango tinatawira basa yonsene inaona ife. Mbwenye tingakhala akupirira, tinakhala na ndzidzi wakunyerezera kuti basa ineyi inakhuya tani banja yathu na uxamwali wathu na Yahova. Tingakhala akupirira, tinacalira kucita pisankhulo pyakuipa. w23.08 tsa. 22 ¶8-9

Mungatsukwala thangwi ya kupitiriza kuthimbana na mabvero akucita pyakuipa, kukumbuka pikiro idacita imwe kuna Yahova mu ndzidzi udaperekeka imwe kuna iye kunakupasani mphambvu toera kukunda mayesero. Munjira ipi? Mungaperekeka kuna Yahova, imwe musakhondeka mwekhene. Pyenepi pisabveka kuti imwe musakhonda pifuno pyanu pyakuti mbapidakucitisani kutsukwalisa Yahova. (Mat. 16:24) Natenepa mungathimbana na mayesero, imwe nee munafunika kunyerezera pinafunika imwe kucita. Thangwi imwe munagumanika kuti mwasankhula kale pinafuna imwe kucita toera mupitirize kukhala wakukhulupirika kuna Yahova. Imwe munakhala dzololo toera kukomeresa Yahova. Pontho munakhala ninga Yobe. Maseze athimbana na nyatwa zakunentsa kakamwe, iye alonga na cinyindiro consene kuti: “Ine nee ndinasiya kukhala munthu wakukhulupirika!”—Yobe 27:5. w24.03 tsa. 9 ¶6-7

Yahova, “Mulungu waufuni,” ali na ife! (2 Akor. 13:11) Iye asatsalakana m’bodzi na m’bodzi wa ife. Ife tiri na cinyindiro cakuti iye asatitsidzikiza “na ufuni Wace wakukhonda mala.” (Mas. 32:10) Tinganyerezera kakamwe ufuni unapangiza iye kuna ife, iye anakhala wandimomwene kuna ife, pontho uxamwali wathu na iye unakhala wakuwanga. Ife tinakwanisa kucita phembero kuna iye mwakusudzuka, mbatimpanga kuti tisafuna kakamwe ufuni wace. Tinakwanisa kumpanga nyatwa zathu zonsene na cinyindiro cakuti iye anatibvesera, pontho anacita pinthu toera kutiphedza. (Mas. 145:19) Kutonthola kusaticitisa kufuna kukhala dhuzi na moto, munjira ibodzi ene, ufuni wa Yahova usaticitisa kufuna kukhala dhuzi na iye. Maseze ufuni wa Yahova ndi ukulu kakamwe, iye asaupangiza mwakukoma ntima. Natenepa, khalani wakutsandzaya thangwi Yahova asakufunani. Pontho pangizanimbo kuti musafuna Yahova mbamulonga mwakutsandzaya kuti: “Ine ndisafuna Yahova”!—Mas. 116:1. w24.01 tsa. 31 ¶19-20

Yezu acita pinthu pizinji kupiringana basi ene kulonga kuna anthu kuti dzina ya Mulungu ndi Yahova. Ayuda akhacedza na Yezu akhadziwa kale dzina ya Mulungu, ngakhale tenepo ‘Yezu aafokotozera.’ (Juw. 1:17, 18) Mwacitsandzo, Malemba Acihebheri asalonga kuti Yahova ndi wantsisi na wakukoma ntima. (Eks. 34:5-7) Yezu abvekesa mwadidi pyenepi na nsangani wa mwana wakutsumbikika. Tingaleri m’Bhibhlya thangwi ya Pai adaona mwanace na kutali mbathamanga toera kaonana naye mbankhumbatira na kumulekerera na ntima onsene, tisakwanisa kubvesesa mwadidi kuti Yahova ndi wantsisi na wakukoma ntima. (Luka 15:11-32) Mwandimomwene Yezu atipangiza mwadidi makhaliro a Pai wace. w24.02 tsa. 10 ¶8-9

Yahova asabalangaza ale anatsukwala. Tinabverambo tani ntsisi anango mbatiabalangaza ninga pinacita Yahova? Njira ibodzi yakucita pyenepi ndi kukulisa makhaliro akuti anatiphedza toera kubvera ntsisi anango mbatiabalangaza. Ndi api mangasi mwa makhaliro anewa? Ninji pinafuna kutiphedza toera tipitirize kufunana na “kubalangazana unango na ndzace” ntsiku zonsene? (1 Ates. 4:18) Tisafunika kukulisa n’khaliro wakubvera ntsisi anango, kufuna abale na kukhala akukoma ntima. (Akol. 3:12; 1 Ped. 3:8) Kodi makhaliro anewa anatiphedza tani? Tingabvera ntsisi abale na alongo athu na kuatsalakana mwaufuni, tinafuna kakamwe kuabalangaza m’midzidzi inathimbana iwo na nyatwa. Yezu alonga: “Mulomo usalonga pire pidadzala muntima. Munthu wadidi asalonga pinthu pyadidi, thangwi muntima mwace mwadzala na pinthu pyadidi.” (Mat. 12:34, 35) Kubalangaza abale na alongo athu ndi njira yakufunika kakamwe yakupangiza ufuni wathu kuna iwo. w23.11 tsa. 10 ¶10-11

Ife tisafunika kuphemba ciphedzo khala nee tiri kubvesesa maprofesiya a Bhibhlya. Mwacitsandzo, nyerezerani kuti muli kuenda kaona mbuto yakuti nee musaidziwa mwadidi, mbwenye xamwali wanu anaenda na imwe asaidziwa mwadidi. Iye asadziwa mwadidi mbuto inagumanika imwe, pontho asadziwa kunenda nseu ubodzi na ubodzi. Mwakukhonda penula, imwe munatsandzaya thangwi yakucita ulendo na xamwali unoyu! Munjira ibodzi ene, Yahova ndi ninga xamwali unoyu, thangwi iye asadziwa mwadidi tsogolo yathu. Natenepa, toera tibvesese maprofesiya a Bhibhlya, mwakucepeseka tisafunika kuphemba ciphedzo ca Yahova. (Dhan. 2:28; 2 Ped. 1:19, 20) Ninga nyakubala wadidi, Yahova asafuna kuti anace akhale na umaso wadidi ntsogolo. (Yer. 29:11) Mbwenye mwakusiyana na anyakubala, Yahova anakwanisa kutipanga pinthu pinafuna kucitika ntsogolo, pontho pinthu pyenepi pisacitikadi. Iye alembesa maprofesiya a Bhibhlya toera tikwanise kudziwa pinthu pyakufunika mbapidzati kucitika.—Iza. 46:10. w23.08 tsa. 8 ¶3-4