Mareferensya a Umaso Wathu Wacikristu na Utumiki — BHIBHLIYOTEKA MU INTERNETI ya Torre de Vigia

Mareferensya a Umaso Wathu Wacikristu na Utumiki

SUMANA 7-13 YA JULHO

MPFUMA ZA MAFALA A MULUNGU MISANGANI 21

Pinthu Pyakuti Pinakuphedzani Toera Kukhala na Banja Yakutsandzaya

Munabanyirana Tani Munjira Inapasa Mbiri Yahova?

Musafunika kubanyirana mu ndzidzi ungasi? Mungakhonda khala na ndzidzi wakukwana toera kucita cisankhulo, pinthu nee pinafamba mwadidi. (Mis. 21:5) Natenepa, musafunika kubanyirana mu ndzidzi wakukwana toera mudziwe mwadidi ndzanu. Mbwenye kubanyirana kwanu nee kusafunika kukwata ndzidzi uzinji kakamwe kupiringana ndzidzi unafunika toera kudziwana mwadidi. Bhibhlya isalonga: “Cinthu cinadikhira munthu cingakhonda kucitika pa ndzidzi unacidikhira iye, ntima usapha.” (Mis. 13:12) Kusiyapo pyenepi, mungabanyirana mu ndzidzi uzinji kakamwe, pisakhala pyakunentsa toera kupirira cifuno cakupita m’mabonde. (1 Akor. 7:9) M’mbuto mwakunyerezera kuti muli kubanyirana mu ndzidzi ungasi, pinakhala pyadidi kubvundzika: ‘Ndi pinthu pipi pinango pinafunika ine kudziwa kuna munthu anabanyirana na ine toera ndicite cisankhulo cadidi?’

Ncenjezi 07.20 tsa. 3 ndima 3-5

Mukhonde Kunyerezera Kupiringana Pinafunika Imwe Kunyerezera Thangwi ya Imwe Ene

Yahova asafuna kuti mamuna na nkazi akhale akutsandzaya pabanja. Mbwenye nakuti ndi akusowa ungwiro, midzidzi inango iwo anatsukwalisana. Paulu alonga kuti ale anamanga banja anadzaona nyatwa. (1 Akor. 7:28) Anango asaona kuti kazinji kene asatsukwalisana na ndzawo wa m’banja. Pyenepi pisaacitisa kunyerezera kuti nee akhafunika kumanga banja na munthu unoyu. Natenepa angakhuyiwa na manyerezero a anthu akuti nee asatumikira Yahova, anatoma kunyerezera kuti njira yadidi toera kumalisa nyatwa zawo na kukhala akutsandzaya ndi kukhondana.

Tisafunika kucalira kunyerezera kuti tamanga banja na munthu wakuphonyeka. Thangwi Bhibhlya isalonga kuti anyakumanga banja anakwanisa kukhondana basi ene khala m’bodzi acita ulukwali. (Mat. 5:32) Natenepa tingathimbana na nyatwa ninga zidalonga Paulu nee tisafunika kutawirisa kuti kudzikuza kuticitise kunyerezera tenepa: ‘Ndzanga wa m’banja nee asanditsalakanabve, pontho iye cincino nee asandifunabve. Panango ndinakhala wakutsandzaya ndingamanga banja na munthu unango.’ Tinganyerezera munjira ineyi, tikunyerezera basi ene pinafuna ife, tayu pinafuna ndzathu wa m’banja. Anthu akuti nee asatumikira Yahova asalonga kuti toera akhale na banja yakutsandzaya asafunika kucita pinafuna ntima wawo, ngakhale pyenepi panango pinaacitisa kumalisa banja. Bhibhlya isalonga kuti: “Lekani kunyerezera pinafuna imwe basi, mbwenye nyerezeranimbo pinafuna anango.” (Afil. 2:4) Yahova asafuna kuti mukhale na ndzanu wa m’banja kwenda na kwenda. (Mat. 19:6) Natenepa, ndi pyakufunika kakamwe kucita pinafuna Yahova, tayu pinafuna imwe.

Mamuna na nkazi asafunika kutsalakanana mwaufuni na mwacilemedzo. (Lerini Aefesi 5:33.) Bhibhlya isalonga kuti kupasa ndi kwakufunika kakamwe kupiringana kutambira. (Mabasa 20:35) Ninji pinafuna kuphedza anyakumanga banja toera kufunana na kulemedzana? Ndi kucepeseka. Mamuna na nkazi wakumanga banja wakuti ndi wakucepeseka nee asacita basi ene pinakomerwa na iye, mbwenye asacita “pinthu pinakomeresa ndzace.”—1 Akor. 10:24.

Sentinela 15/9/06 tsa. 28 ndima 13

“Komerwa na Nkazi wa Uphale Wako”

Ndiye tani khala banja iri kuthimbana na pinentso thangwi yakukhonda kutsalakanana mwadidi? Toera kumalisa pinentso pyenepi anyakumanga banja asafunika kuwangisira. Mwacitsandzo, panango nkazi na mamuna atoma kulonga mwakusowa ufuni kuna unango na ndzace, mbadzolowera kucita pyenepi. (Misangani 12:18) Ninga pidaona ife mu nsolo udamala, pyenepi pinakwanisa kubweresa nyatwa zizinji. Bhibhlya isalonga: “Mphyadidi kukhala nʼthando, kupiringana kukhala na nkazi wanthonga na wakunentsa.” (Misangani 21:19) Khala ndimwe nkazi wakumanga banja, pontho pyenepi piri kucitika m’banja mwanu, bvundzikani: ‘Kodi makhaliro anga asacitisa kuti mamunanga anentseke toera kucedza na ine?’ Bhibhlya isalonga tenepa kuna amuna akumanga banja: “Pitirizani kufuna akazanu, pontho lekani kuipirwa kakamwe na iwo.” (Akolose 3:19) Khala ndimwe mamuna wakumanga banja, bvundzikani: ‘Kodi ine ndine wakusowa ufuni, pontho ndisacitisa nkazanga kusaka munthu unango toera kum’balangaza?’ Ndimomwene kuti nkhabe mathangwi akubveka toera kucita ulukwali. Mbwenye nakuti pyenepi pinakwanisa kucitika, anyakumanga banja asafunika kucedza mwadidi thangwi ya nyatwa zawo.

Mpfuma Zauzimu

Ncenjezi 10.21 tsa. 12 ndima 16

Ife Tisatumikira Mulungu “Wantsisi Kakamwe”

Akristu onsene asawangisira toera kukhala antsisi ninga Yahova. Thangwi yanji? Thangwi ibodzi ndi yakuti Yahova nee anabvesera maphembero a ale anakhonda kubvera ntsisi andzawo. (Lerini Misangani 21:13.) Nee m’bodzi wa ife asafuna kuti Yahova akhonde kubvesera maphembero ace, na thangwi ineyi tisafunika kucalira kukhonda bvera ntsisi anango. M’mbuto mwakukhonda kubvesera Nkristu ndzathu angatipanga nyatwa zace, ndzidzi onsene tisafunika kubvesera ‘kukhuwa kwa nyakutcerenga.’ Kusiyapo pyenepi, ife tisafunika kucita pyonsene pinakwanisa ife toera kuphatisira uphungu wa m’Bhibhlya unalonga kuti: “Munthu anakhonda kubvera ntsisi, anadzatongwa mwakusowa ntsisi.” (Tiya. 2:13) Ife tingadzindikira mwakucepeseka kuti tisafunika kakamwe kubverwa ntsisi, tinakwanisambo kubvera ntsisi anango. Ife tisafunika kubvera ntsisi makamaka khala munthu atcunyuka madawo adacita iye mbabwezereswa mu mpingo.

SUMANA 14-20 YA JULHO

MPFUMA ZA MAFALA A MULUNGU MISANGANI 22

Malemba Akuti Anaphedza Toera Kukuza Mwadidi Ana

Ncenjezi 10.20 tsa. 27 ndima 7

Kodi Ananu Anakwanisa Kutumikira Mulungu mu Ndzidzi Unakula Iwo?

Khala ndimwe anyakumanga banja, pontho musafuna kukhala na ana bvundzikani: ‘Kodi ndife akucepeseka, pontho tisafuna Yahova na Mafalace? Kodi tinakwanisa kutsalakana ana ninga munafuna Yahova?’ (Masal. 127:3, 4) Khala ndimwe nyakubala bvundzikani: ‘Kodi ine ndisapfundzisa ananga kufunika kwa kuphata basa mwaphinga?’ (Koel. 3:12, 13) ‘Kodi ine ndisatsidzikiza ananga toera akhonde kukhuyiwa na makhaliro akuipa a dziko ino ya Sathani?’ (Mis. 22:3) Imwe nee munakwanisa kutsidzikiza ananu ku pinentso pyonsene pinafuna kuthimbana na iwo. Mbwenye imwe musafunika kuapfundzisa mwaufuni kuti angathimbana na nyatwa asafunika kunyindira Mafala a Mulungu. (Lerini Misangani 2:1-6.) Mwacitsandzo, khala m’bodzi wa m’banja mwanu asiya kutumikira Yahova, musafunika kuphedza ananu toera adziwe kuti thangwi yanji ndi pyakufunika kukhala akukhulupirika kuna Yahova. (Masal. 31:23) Khala m’bodzi wa m’banja mwanu afa, musafunika kupfundzisa ananu kuti aphatisire Bhibhlya toera akwanise kukunda nyatwa zenezi mbakhala akutsandzaya.—2 Akor. 1:3, 4; 2 Tim. 3:16.

Ncenjezi 12.19 tsa. 26 ndima 17-19

Anyakubala—Pfundzisani Ananu Toera Afune Yahova

Tomani kupfundzisa ananu mbaciri ana. Anyakubala angatoma kupfundzisa anawo mbaciri ana, ndi pyadidi kakamwe. (Mis. 22:6) Onani citsandzo ca Timoti wakuti pidakula iye akhacita ulendo na mpostolo Paulu. Mai wace Timoti, Eunise na yavu wace Loidhi, apfundzisa Timoti “kubulukira mu uwana” wace.—2 Tim. 1:5; 3:15.

Jean-Claude na Peace akuti ndi banja inakhala ku Costa do Marfim, yakwanisa kupfundzisa anawo atanthatu toera afune Yahova na kuntumikira. Ninji pidaaphedza toera kucita pyenepi? Iwo atowezera citsandzo ca Eunise na Loidhi. Iwo alonga: “Ife takhomera Mafala a Mulungu m’mitima ya anathu kubulukira mu uwana wawo, kutomera pidamala iwo kwene kubalwa.”—Deut. 6:6, 7.

Pisabvekanji ‘kukhomera’ Mafala a Yahova m’mitima ya ananu? ‘Kukhomera’ pisabveka “kupfundzisa na kukumbusa mwakubwereza-bwereza.” Toera kucita pyenepi, anyakubala asafunika kumala ndzidzi uzinji na anawo. Midzidzi inango, panango pinakhala pyakufewesa manungo kuna anyakubala toera kupfundzisa anawo pinthu pibodzi pyene. Mbwenye anyakubala asafunika kuona pyenepi ninga mwai toera aphedze anawo kuti abvesese Mafala a Mulungu na kuaphatisira.

Sentinela 1/4/06 tsa. 9 ndima 4

Anyakubala, Khalani Citsandzo Cadidi Kuna Ananu

Kazinji kene ana asacita pinthu ninga ana, pontho anango nee asabvera anyakubala. (Genesi 8:21) Anyakubala anacitanji? Bhibhlya isalonga: “Udzemwa uli mʼmitima ya anangʼono, mbwenye ntcamu wakulanga nawo unaubulusa mbukhala kutali na iwo.” (Misangani 22:15) Anango asaona kuti kucita pyenepi ndi kutsalakana ana mwausumankha, pontho ndi pyakale. Mbwenye Bhibhlya isakhondesa uphanga na kutsalakana anango mwakuipa. Maseze “ntcamu” usaphataniza kumenya, iwo usapangiza basa iri na anyakubala yakuti asaicita mwaufuni, mbapangiza kuti asafuna anawo akhale na tsogolo yadidi.—Ahebheri 12:7-11.

Mpfuma Zauzimu

Ncenjezi 08.21 tsa. 22 ndima 11

Tsandzayani na Pinthu Pinakwanisa Imwe Kucita Kuna Yahova

Munjira ibodzi ene, ife tinakhala akutsandzaya kakamwe tingacita na ntima onsene mabasa onsene anapaswa ife mu gulu ya Yahova. Phatisirani “ndzidzi” uzinji m’basa yakumwaza mphangwa, pontho citani mabasa onsene anapaswa imwe mu mpingo. (Mabasa 18:5; Aheb. 10:24, 25) Khunganyikani mwadidi misonkhano toera mukwanise kupereka matawiro akuwangisa. Pontho khunganyikani mwadidi makhundu onsene anapaswa imwe pa misonkhano ya pakati pa sumana. Mungaphembwa toera kucita mabasa anango mu mpingo, aciteni nakweru, pontho khalani wakunyindirika. Onani mabasa onsene anapaswa imwe mu mpingo kukhala akufunika kakamwe, pontho lekani nyerezera kuti mungacita mabasa anewa mukubvunga ndzidzi wanu papezi. Wangisirani kakamwe kucita mabasa onsene anapaswa imwe toera kuthimizira maluso anu. (Mis. 22:29) Mungawangisira toera kucita mabasa a Yahova, munakhala na uxamwali wakuwanga na iye, pontho munakhala wakutsandzaya kakamwe. (Agal. 6:4) Kusiyapo pyenepi, imwe munadzakhala wakutsandzaya anango angapaswa miyai yakutumikira mu mpingo yakuti imwe mukhaifunambo.—Aroma 12:15; Agal. 5:26.

SUMANA 21-27 YA JULHO

MPFUMA ZA MAFALA A MULUNGU MISANGANI 23

Malemba Akuti Anakuphedzani Khala Musamwa

Tsandzayani na Umaso Kwenda na Kwenda! nsolo 43 khundu 2

Bhibhlya Isalonganji Thangwi ya Pyakumwa Pyakuledzeresa?

Yahova asakhondesa kumwa kakamwe na kuledzera. (Agalata 5:21) Bhibhlya isalonga: “Leka kukhala pabodzi na anthu anamwa kakamwe vinyu.” (Misangani 23:20) Natenepa, ife tingasankhula kumwa, mwakukhonda tsalakana khala tiri kumwa pabodzi na anango peno tiri kumwa tekhene, tisafunika kukhala na madire. Nee tisafunika kumwa mpaka kucimwana kunyerezera mwadidi, kucimwana kulonga mwadidi peno kucita pinthu pyakukhonda thema. Kusiyapo pyenepi, kumwa mwakupiringana midida kusaikhambo pangozwi ungumi wa munthu. Mbwenye khala tingamwa tisapiringana midida, mphyadidi kusiya kwene kumwa.

Perspicaz vol. 1 tsa. 304

Kuledzera

Bhibhlya Isakhondesa Kuledzera. Bhibhlya isakhondesa kumwa kakamwe mpaka kuledzera. Nyakulemba bukhu ya Misangani alonga pinthu pinacitikira anthu anamwa kakamwe. Iye alonga: “Mbani anathabuka? Mbani anadzudzumika? Mbani anasosa nthonga? Mbani anadungunya? Mbani anaphekeka mwakusowa mathangwi? Mbani ali na maso akufuira? Ndi ale anamala ndzidzi uzinji mbakamwa vinyu; ale anasaka vinyu yakubvungazwa. Leka kukwatika na kore yakufuira ya vinyu, mu ndzidzi unayetimira iyo nkopo, mbitcita pangʼono-pangʼono. Thangwi pakumalisa, iyo isaluma ninga nyoka, pontho isabulusa venenu ninga nyoka. Maso ako anadzaona pinthu pyakuti nee piripo, pontho ntima wako unakukulumiza toera kulonga pinthu pyaudzemwa.”—Mis. 23:29-33; Oze. 4:11; Mat. 15:18, 19.

Nyakulemba bukhu ineyi ya Misangani apitiriza kulonga pinthu pinacitika na munthu anamwa kakamwe: “Iwe unadzakhala ninga munthu wakuti ali kugona pakati pa bara [anadzudzumika ninga ali kulirima mbakhonda kuona peno kubva], ninga uli kugona pa ntsonga ya mulongoti wa xitima ya mʼmadzi [ninga kutekenyeka kwa xitima ya m’madzi kusathimizirika pa mbuto ineyi, nyakuledzera asakhala pa ngozwi ya kucitikirwa na pidengwa na pinthu pinango]. ‘Iwo andimenya, mbwenye ine nee ndapibva; iwo andibubuda, mbwenye nee cibodzi cidabva ine. [Nyakuledzera alonga ekhene kuti nee akhakwanisa kubva pinthu pikhancitikira na nyatwa zikhatamba iye]. Ndinalamuka lini kani? Toera ndimwe pontho [Iye asafunika kugona toera akungunuke, mbwenye ndi bitcu wa pyakumwa, pontho asadikhira mwai toera amwe pontho].’” Iye anakhala ntcerengi thangwi ya kubvunga kobiri na pyakumwa, pontho thangwi yakukhonda nyindirwa na kusowa mphambvu toera kuphata basa.—Mis. 23:20, 21, 34, 35.

Mpfuma Zauzimu

Tsandzayani na Umaso Kwenda na Kwenda! nsolo 43 khundu 2

Bhibhlya Isalonganji Thangwi ya Pyakumwa Pyakuledzeresa?

SUMANA 28 YA JULHO–3 AGOSTO

MPFUMA ZA MAFALA A MULUNGU MISANGANI 24

Wangisani Cikhulupiro Canu Toera Mukwanise Kuthimbana na Nyatwa

Ncenjezi 07.23 tsa. 18 ndima 15

“Khalani Dzololo na Akuwanga”

Pfundzani Mafala a Mulungu na kunyerezera mwadidi pinapfundza imwe. Ninga muti wakuti usakhala wakuwanga khala mitcici yace yaenda pantsi kakamwe, ife tinakwanisambo kupitiriza kukhala akuwanga khala cikhulupiro cathu kuna Yahova ndi cakuwanga. Mu ndzidzi unakula muti unoyu mitcici yace isaenda pantsi kakamwe, pontho isathimizirika. Tingapfundza na kunyerezera pinapfundza ife m’Bhibhlya, tinawangisa cikhulupiro cathu, pontho tinakhala na cinyindiro cakuti mitemo ya Yahova ndzidzi onsene ndi yadidi. (Akol. 2:6, 7) Nyerezerani pipfundziso pya Yahova, citsogolero cace na citsidzikizo cidapereka iye kuna atumiki ace nduli. Mwacitsandzo, Ezekiyeli akhayang’ana mwadidi mu ndzidzi udaona iye masomphenya anju mbakapima templo. Masomphenya anewa awangisa Ezekiyeli, pontho asatipfundzisambo kuti tinabvera tani midida ya Yahova toera tipitirize mu ulambiri wakucena. (Ezek. 40:1-4; 43:10-12) Ife tinaphedzekambo tingakhala na ndzidzi wakupfundza na kunyerezera mwadidi pinthu pyakunentsa pinagumanika m’Mafala a Mulungu.

Sentinela 15/12/09 tsa. 18 ndima 12-13

Pitirizani Kukhala Wakutsandzaya m’Midzidzi ya Nyatwa

Bukhu ya Misangani 24:10 isalonga: “Ungatsukwala pa ntsiku ya nyatwa, mphambvu zako zinacepa.” Pontho lemba ya Misangani 15:13 isalonga: “Ntima wakutsukwala usatsukwalisa munthu.” Akristu anango asatsukwala kakamwe mbasiya kuleri Bhibhlya na kunyerezera pinaleri iwo. Iwo asatoma kulonga pinthu pibodzi pyene m’maphembero awo, pontho asasiya kucedza na Akristu andzawo.—Mis. 18:1, 14.

Kukhala na maonero adidi kunatiphedza toera kunyerezera pinthu pyakuti pinatitsandzayisa. Dhavidhi alemba: “Mulungu wanga, ine ndisakomerwa kucita pinafuna imwe.” (Mas. 40:8) Pinthu pingakhonda kutifambira mwadidi, nee tisafunika kusiya kuleri Bhibhlya, kucita phembero na kugumanika pa misonkhano. Njira yadidi yakumalisa kutsukwala ndi kucita pinthu pyakuti pinatiphedza toera kukhala akutsandzaya. Yahova asatipanga kuti toera tikhale akutsandzaya tisafunika kuleri na kufufudza Mafalace ntsiku zonsene. (Mas. 1:1, 2; Tiya. 1:25) Bhibhlya na misonkhano yathu Yacikristu isatiphedza toera kugumana “mafala adidi” akuti asatitsandzayisa.—Mis. 12:25; 16:24.

Ncenjezi 12.20 tsa. 15

Mibvundzo Inacitwa na Anyakuleri

Lemba ya Misangani 24:16 isalonga: “Munthu wakulungama anakwanisa kugwa kanomwe mbalamuka pontho.” Kodi vesi ineyi isalonga pya munthu anacita madawo mwakubwereza-bwereza buluka penepo mbalekererwa na Mulungu?

Mwandimomwene vesi ineyi nee isalonga pyenepi. M’mbuto mwace, vesi ineyi isalonga pya munthu anathimbana na nyatwa zizinji, mbwenye asakwanisa kupirira.

Natenepa, mafala anagumanika pa Misangani 24:16 nee asalonga pya kugwa m’madawo, mbwenye asalonga pya nyatwa zinathimbana na munthu mwakubwereza-bwereza. Mu dziko ino yakuipa, munthu wakulungama anakwanisa kuthimbana na nyatwa za ungumi peno na nyatwa zinango. Kusiyapo pyenepi, iye anakwanisa kutcingwa na mautongi. Mbwenye iye anakwanisa kunyindira kuti Mulungu anantsidzikiza, pontho anamphedza toera kupirira nyatwa zenezi. Ninga ntumiki wa Mulungu, kazinji kene imwe musakwanisa kuona kuti pinthu pisafamba mwadidi. Thangwi yanji? Thangwi tiri na cinyindiro cakuti ‘Yahova asaphedza onsene ale adagwa, pontho asalamusa onsene ale adakotama.’—Mas. 41:1-3; 145:14-19.

Mpfuma Zauzimu

Kufuna Mulungu nsolo 10 ndima 13-15

Kumanga Banja Ndi Muoni Wakubuluka Kwa Mulungu

Khala musanyerezera kumanga banja, khalani na cinyindiro cakuti muli wakukhunganyika. Panango musaona kuti mwakhunganyika, mbwenye tendeni tione kuti kukhunganyika toera kumanga banja kusabvekanji. Panango munadzaona pinthu pyakuti nee mukhapidikhira.

Bhibhlya isapangiza kuti mamuna na nkazi ali na mabasa akusiyana pabanja. Pyenepi pisapangiza kuti kukhunganyika ndi kwakusiyana pakati pa nkazi na mamuna. Khala mamuna akunyerezera kumanga banja, asafunika kubvundzika khala ali dzololo toera kukhala nsolo wa banja. Yahova asadikhira kuti mamuna atsalakane nkazace na anace mu pinthu pyauzimu na pyakumanungo. Cinthu cakufunika kakamwe ndi cakuti mamuna asafunika kutsogolera banjace toera kulambira Mulungu. Bhibhlya isalonga kuti mamuna anakhonda kutsalakana banjace “ndi wakuipa kakamwe kupiringana munthu wakusowa cikhulupiro.” (1 Timoti 5:8) Khala mamuna asanyerezera kumanga banja asafunika kudziwa kuti anaphatisira tani mafala awa a m’Bhibhlya: ‘Cita malonda ako kunja kwa nzinda, sasanyira pyonsene m’munda mwako, pakumalisa sasanya nyumba yako.’ Munjira inango, mbamudzati kumanga banja, musafunika kukhala na cinyindiro cakuti munakwanisa kutsalakana nkazanu ninga munafunira Yahova.—Misangani 24:27.

Khala nkazi akunyerezera kumanga banja asafunika kudziwa khala anakwanisa mabasa ace ninga nkazi peno mama. Bhibhlya isalonga mabasa mazinji akuti nkazi wadidi asaacita toera kutsalakana mamunace peno anace. (Misangani 31:10-31) Lero, amuna na akazi azinji asadikhira basi ene kucitirwa pinthu na ndzawo wa m’banja. Mbwenye Yahova asafuna kuti tinyerezere pinthu pinafuna ife kucitira ndzathu wa m’banja.

SUMANA 4-10 YA AGOSTO

MPFUMA ZA MAFALA A MULUNGU MISANGANI 25

Malemba Akuti Anatiphedza Toera Kulonga Munjira Yadidi

Ncenjezi 15/12/15 tsa. 19 ndima 6-7

Phatisirani Mwadidi Mphambvu Ya Lirimi Yanu

Lemba ya Misangani 25:11 isapangiza kufunika kwa kusankhula ndzidzi wakuthema toera kulonga: “Kulonga mwadidi pa ndzidzi unafunikira ipyo, nkhupereka masau a ndalama m’mbale ya prata.” Masau a ndalama ndi akubalika kakamwe. Kuaikha m’mbale ya prata mbakudathimizira kubalika kwawo. Munjira ibodzi ene, kusankhula mwadidi ndzidzi wakuthema toera kulonga kunacitisa mafala athu kukhala akutsandzayisa na akuwangisa. Tinacita tani pyenepi?

Mafala athu anakwanisa kukhala adidi kakamwe kwa anyakubvesera, mbwenye tingakhonda kusankhula ndzidzi wadidi toera kulonga panango nee pinaaphedza. (Lerini Misangani 15:23.) Mwacitsandzo, mu nthanda ya Murope ya caka 2011, citeketeke na condzi cikulu cafudza mizinda mizinji ya kumabulukiro a dzuwa a Japau. Anthu akupiringana 15.000 aluza umaso wawo. Maseze Mboni za Yahova athabukambo pabodzi na anyakuendekana awo, iwo abandza miyai yonsene toera kubalangaza anyakutsukwala mukuphatisira Bhibhlya. Mbwenye anthu azinji apacisa nkhabe kudziwa pipfundziso pizinji pya Bhibhlya thangwi ndi auphemberi wa Budhista. Abale athu adzindikira kuti nee ukhali ndzidzi wakuthema toera kulonga na iwo pya cidikhiro ca kulamuswa muli akufa. M’mbuto mwace, iwo aphatisira muoni wakulonga toera kubalangaza na kuphatisira Bhibhlya toera kupangiza kuti thangwi yanji pinthu pyakuipa ninga pyenepi pisacitika kwa anthu adidi.

Ncenjezi 15/12/15 tsa. 21 ndima 15-16

Phatisirani Mwadidi Mphambvu Ya Lirimi Yanu

Njira inaphatisira ife toera kulonga ndi yakufunikambo kakamwe ninga pinthu pinalonga ife. Pidalonga Yezu mu sinagoga mu nzinda wa Nazarete, anthu ‘adzuma mafala akukoma akhabuluka nkanwa mwace.’ (Luka 4:22) Tingalonga munjira yadidi, anthu asakomerwa kakamwe mbabvesera pinalonga ife. (Mis. 25:15) Tinakwanisa kutowezera citsandzo cadidi ca Yezu mu kukhala akukoma ntima, acilemedzo na kubvesesa mabvero a anango. Mwacitsandzo, pidaona iye kuti anthu akhawangisira kakamwe toera kubvesera mafalace, Yezu akomerwa kakamwe mbaphatisira ndzidzi wace toera kucedza na iwo na ‘kuapfundzisa pinthu pizinji.’ (Marko 6:34) Ngakhale mu ndzidzi ukhatikanwa iye, Yezu nee abwezera mafala akutikana.—1 Ped. 2:23.

Kulonga mwakupfulika na mwacilemedzo pisanentsa khala ndzathu analonga na ife tisadziwana naye kakamwe. Panango tinanyerezera kuti nee tisafunika kucita mpholemphole pakulonga nawo. Pyenepi pisacitika kakamwe khala tikulonga na acibale peno axamwali apantima m’mpingo. Kodi Yezu anyerezera kuti uxamwali wapantima na anyakupfundzace ukhampasa ufulu toera kulonga mwaukali na iwo? Nee pang’ono pene! Pidapitiriza anyakupfundzace kuketesana kuti mbani nkulu mwa iwo, Yezu aaphedza na mafala adidi toera kusasanyira maonero awo mbaphatisira citsandzo ca mwanang’ono. (Marko 9:33-37) Akulu a mpingo anakwanisa kutowezera citsandzo ca Yezu mu kupasa uphungu na “ntima wakukhurudzika.”—Agal. 6:1.

Sentinela 1/4/95 tsa. 17 ndima 8

Tinawangisana Tani Toera Kupangiza Ufuni na Kucita Mabasa Adidi?

Pakutumikira Mulungu tonsene tinakwanisa kuwangisana. Mwakukhonda penula, Yezu awangisa anyakubvesera ace. Iye akhakomerwa na utumiki Wacikristu, pontho akhauona ninga wakufunika kakamwe. Kuna iye utumiki ukhali ninga cakudya. (Juwau 4:34; Aroma 11:13) Kucita pyenepi kusakulumiza anango toera kucitambo pibodzi pyene. Kodi imwe musapangizambo kuti musakomerwa na utumiki? Pangani abale na alongo pinthu pyadidi pidakucitikirani mu utumiki, mbwenye lekani kupasika mbiri. Mungaphemba anango toera kumwaza mphangwa pabodzi na imwe onani kuti munaaphedza tani toera akomerwe na kupanga anango pya Nciti wathu Yahova.—Misangani 25:25.

Mpfuma Zauzimu

Perspicaz vol. 1 tsa. 379

Kukhurudzika

Munthu wakukhurudzika asakhala na n’khaliro unoyu thangwi ali na cikhulupiro na mphambvu. Munthu wakukhonda khurudzika asatsukwala kakamwe, nee ali na cikhulupiro na cidikhiro. Na thangwi ineyi, bukhu ya Misangani isalonga kuti: “Munthu wakuti nkhabe nentsa kuipirwa, ndi ninga nzinda wakuti mipanda yace yamala kufudzwa.” (Mis. 25:28) Iye anakwanisa kukhala na manyerezero akuipa mwakukhonda nentsa mbancitisa kucita pinthu pyakuipa.

SUMANA 11-17 YA AGOSTO

MPFUMA ZA MAFALA A MULUNGU MISANGANI 26

Khalani Kutali na “Dzemwa”

Perspicaz vol. 2 tsa. 485 ndima 6

Kubvumba Kwa Madzi

Malimwe na Khoni. Mu Dziko Yakupikirwa, ndzidzi wa khoni ukhaoniwa ninga ndzidzi wa kubvumba, pontho ndzidzi wa malimwe ukhaoniwa ninga ndzidzi wakukhonda bvumba. (Onani Mas. 32:4; Nyim. 2:11.) Kutomera mwezi wa Abril mpaka Outubro madzi nee akhabvumba maningi. Madzi nee asabvumba maningi midzidzi ineyi yakubvuna. Bukhu ya Misangani 26:1 isapangiza kuti madzi nee akhafunika kubvumba mu ndzidzi wakubvuna. (Onani 1 Sam. 12:17-19.) Mu ndzidzi wa khoni, madzi nee asabvumba kazinji kene. Nakuti unoyu ndi ndzidzi wakutonthola, madzi angabvumba asacitisa munthu kubva mphepo kakamwe. (Esd. 10:9, 13) Natenepa nyumba yakukhumba ndi yakufunika kakamwe.—Iza. 4:6; 25:4; 32:2; Yobe 24:8.

Sentinela 1/10/87 tsa. 19 ndima 12

Anthu anango asafunika kusandikwa ninga pinalonga Misangani 26:3 kuti: “Mpswimbo ndi toera kukwapula kavalo, nkhambala ndi toera kumanga mulomo wa buru, ntcamu ndi toera kumenya kunsana kwa madzemwa.” Midzidzi inango, Yahova asiya mbumba ya Izraeli kuti itongwe na anthu a madzindza anango thangwi ya pinthu pyakuipa pikhacita iwo. “Iwo nee abvera mafala a Mulungu; iwo nee abvera uphungu wa Mulungu Wakudzulu Kakamwe. Iye aapasa manyadzo pidatawirisa iye kuti atambe nyatwa; iwo agwegweduka, mbwenye nee pakhali na munthu toera kuaphedza. Mu ndzidzi ukhanentseka iwo, acemera Yahova toera kuaphedza; iye aapulumusa mu nyatwa zawo.” (Masalmo 107:11-13) Mbwenye madzemwa anango apitiriza kukhonda bvera maseze asandikwa. Na thangwi ineyi Bhibhlya isalonga: “Munthu anapitiriza kuumisa ntima wace pakumala kusandikwa kazinji kene, anadzafudzwa mwakucimbiza, mbasowa cidikhiro.”—Misangani 29:1.

Perspicaz vol. 2 tsa. 580 ndima 2

Kulamala

Kuphatisirwa ninga nsangani. Mambo Salomoni alonga: “Munthu anasiya kuti pinthu pyace picitwe na dzemwa [munthu wakulamala], ndi sawasawa na ule anagwanda ekhene miyendo yace mbathabusika ekhene.” Natenepa munthu anapanga dzemwa toera ancitire basa yace ali kuthabusika ekhene, thangwi basa ineyi nee inacitwa.—Mis. 26:6.

Mpfuma Zauzimu

Perspicaz vol. 2 tsa. 1140

Dzemwa

Kutawira dzemwa “mwakubverana na udzemwa wace” kunacitisa munthu anantawira kukhala sawasawa na iye. Toera tikhonde kukhala ninga dzemwa, bukhu ya Misangani isalonga: “Leka kutawira dzemwa mwakubverana na udzemwa wace.” Munjira inango, bukhu ya Misangani 26:4, 5 isalongambo kuti midzidzi inango ndi pyadidi kutawira dzemwa “mwakubverana na udzemwa wace.” Pyenepi pisabveka kuti munthu asafunika kunyerezera toera akwanise kupangiza kuti pinthu pinalonga dzemwa ndi pyakusowa ndzeru.

SUMANA 18-24 YA AGOSTO

MPFUMA ZA MAFALA A MULUNGU MISANGANI 27

Axamwali Andimomwene Asatiphedza Tani?

Ncenjezi 09.19 tsa. 5 ndima 12

Atumiki Akucepeseka a Yahova Ndi Akufunika Kakamwe Kuna Iye

Munthu wakucepeseka asapereka takhuta angapaswa uphungu. Mwacitsandzo: Nyerezerani kuti muli pa misonkhano Yacikristu. Pakumala kucedza na abale azinji, m’bale unango asakucemerani pakhundu, mbakupangani kuti m’madzino mwanu mwaphatirira cakudya. Mwakukhonda penula, imwe munakhala na manyadzo. Mbwenye munapereka takhuta kuna iye. Mwandimomwene, imwe mbamudakomerwa kakamwe khala munthu unango akupangani pyenepi nakweru! Munjira ibodzi ene, ife tisafunika kupereka takhuta kuna m’bale peno mulongo wakuti ali na cipapo cakutipasa uphungu unafuna ife. Tisaona munthu unoyu ninga xamwali wathu, tayu ninga nyamalwa wathu.—Lerini Misangani 27:5, 6; Agal. 4:16.

Perspicaz vol. 2 tsa. 1215 ndima 5

Munthu Anakhala na Ife Pacisa

Bukhu ya Misangani isalonga kuti ndi pyakufunika kunyindira ndzathu anakhala na ife pacisa mbatimphemba ciphedzo mu ndzidzi unafuna ife. Bukhu ineyi isalonga tenepa: “Leka kuthawa xamwali wako peno xamwali wa pai wako, pontho leka kuenda kunyumba kwa m’bale wako ungagwerwa na nyatwa; munthu anakhala na iwe pacisa wakuti ali dhuzi ndi wadidi kakamwe kupiringana m’bale wako ali kutali.” (Mis. 27:10) Pisaoneka kuti Salomoni akhafuna kulonga kuti mphyadidi kupangiza ufuni kuna xamwali ali dhuzi na ife na kumphemba ciphedzo, m’mbuto mwakuphemba ciphedzo wacibale wathu wakuti ali kutali, thangwi midzidzi inango wacibale wathu nee anakwanisa kutiphedza mwadidi kakamwe ninga xamwali ali dhuzi na ife.

Ncenjezi 09.23 tsa. 10 ndima 7

Aphale na Atsikana—Munacitanji mu Umaso Wanu?

Cinthu cibodzi cinapfundza ife thangwi ya cisankhulo cakuipa cidacita Yeowasi ndi cakuti tisafunika kusankhula axamwali akuti asafuna Yahova, pontho asafuna kuntsandzayisa. Ife nee tisafunika kucita uxamwali basi ene na anthu a thunga yathu. Kumbukani, Yeowasi akhali mwana kakamwe kupiringana xamwali wace, Yeoyadha. Bvundzikani tenepa thangwi ya axamwali anasankhula imwe: ‘Kodi iwo asandiphedza toera ndiwangise cikhulupiro canga kuna Yahova? Kodi iwo asandiwangisa toera ndibvere midida ya Mulungu? Kodi iwo asalonga thangwi ya Yahova na pinthu pinapfundza iwo m’Bhibhlya? Asapangiza kuti asalemedza midida ya Mulungu? Kodi iwo asandipanga basi ene pinakomerwa na ine peno asandisandika ndingacita cinthu cakuipa?’ (Mis. 27:5, 6, 17) Mwandimomwene, khala axamwali anu nee asafuna Yahova, iwo nee anakuphedzani. Mbwenye khala iwo asafuna Yahova, ndzidzi onsene anakuphedzani!—Mis. 13:20.

Mpfuma Zauzimu

Sentinela 15/9/06 tsa. 19 ndima 12

Ntsonga Zikulu za Bukhu ya Misangani

Misangani 27:21. Pinthu pinacita ife tingasimbwa pinakwanisa kupangiza makhaliro athu. Kusimbwa kweneku kunapangiza kuti ndife akucepeseka tingapasa mbiri Yahova mbatipitiriza kuntumikira. Munthu angasimbwa mbapibva kuti ndi wakufunika kakamwe kupiringana anango pisapangiza kuti iye nee ndi wakucepeseka.

SUMANA 25-31 YA AGOSTO

MPFUMA ZA MAFALA A MULUNGU MISANGANI 28

Munthu Wakuipa na Wakulungama Asiyana Tani?

Sentinela 15/5/93 tsa. 26 ndima 2

Musabvera Yahova na Ntima Onsene?

“ANYAKULUNGAMA ndi acipapo ninga nkhalamu.” (Misangani 28:1) Iwo ali na cikhulupiro, asanyindira Mafala a Mulungu mbapitiriza kutumikira Yahova mwaphinga maseze umaso wawo ukhale pangozwi.

Perspicaz vol. 1 tsa. 814 ndima 2

Kubvesesa

Ale anakhonda kubvera Mulungu. Munthu anacita madawo asatoma kusiya kunyerezera pinafuna Mulungu pakucita pisankhulo. (Yobe 34:27) Ntima wa munthu unoyu usantsogolera toera kucita pinthu pyakuipa, pontho asaluza ndzeru zakucita pinthu pyadidi. (Mas. 36:1-4) Maseze alonge kuti asalambira Mulungu, iye asaikha pifuno pya anthu pa mbuto yakutoma. (Iza. 29:13, 14) Iye asaona pinthu pyakuipa pinacita iye ninga “masendzekero,” (Mis. 10:23) mbanyerezera kuti Mulungu wakukhonda kuoneka nee asaona madawo ace. (Mas. 94:4-10; Iza. 29:15, 16; Yer. 10:21) Iye asalonga na macitiro ace kuti “Yahova nee alipo,” (Mas. 14:1-3) pontho ‘nee asanyerezera Mulungu pakucita pinthu.’ Nakuti iye nee asatsogolerwa na mitemo ya Mulungu, nee asakwanisa kusiyanisa mwadidi pinthu pyadidi na pyakuipa, pontho nee asakwanisa kucita pisankhulo pyadidi.—Mis. 28:5.

Perspicaz vol. 1 tsa. 1237 ndima 1

Kukhulupirika

Munthu nee anakwanisa kukhala wakukhulupirika na mphambvu zace, mbwenye angakhala na cikhulupiro cakuwanga mbanyindira Yahova na mphambvu zace. (Mas. 25:21) Mulungu apikira kuti anakhala “xango” na “mbuto yacitsidzikizo” kuna anthu akukhulupirika. (Mis. 2:6-8; 10:29; Mas. 41:12) Cifuno cawo cakucita pinthu pinakomeresa Yahova cisaacitisa kukhala akutsandzaya, mbapitiriza kucita pinthu mwakukhulupirika. (Mas. 26:1-3; Mis. 11:5; 28:18) Maseze Yobe alonga kuti munthu wakusowa mulando anakwanisa kuthabuka thangwi ya anthu akuipa, peno kufa pabodzi na anyakuipa, Yahova asatipasa cinyindiro cakuti asadziwa nyatwa zinatamba munthu wakusowa mulando, pontho unthaka wace unadzakhala kwenda na kwenda. Kusiyapo pyenepi, tsogolo ya munthu unoyu inadzakhala yantendere. (Yobe 9:20-22; Mas. 37:18, 19, 37; 84:11; Mis. 28:10) Ninga pidacitika kuna Yobe, cinacitisa munthu kukhala wakufunika kakamwe na wakuthema kulemedzwa ndi kukhulupirika kwace, tayu mpfuma yace. (Mis. 19:1; 28:6) Ana akuti anyakubalawo ndi akukhulupirika, asakhala akutsandzaya (Mis. 20:7), asatowezera citsandzo cadidi ca anyakubalawo, asalongwa mwadidi thangwi ya anyakubalawo, pontho asalemedzwa.

Mpfuma Zauzimu

Sentinela 1/12/01 tsa. 12 ndima 1

Munakwanisa Kucalira Utenda Wauzimu?

Kudzinyindira kakamwe. Anthu azinji adakhala na utenda wa ntima akhadzinyindira kakamwe kuti ungumi wawo uli mwadidi mbadzati kuphatwa na utenda unoyu. Kazinji kene iwo nee akhaenda kuxipitari toera kaona khala ungumi wawo uli mwadidi. Munjira ibodzi ene, anango panango ananyerezera kuti thangwi yakutumikira Yahova mu ndzidzi uzinji, nkhabe cinthu cinafuna kuacitikira. Panango iwo anatoma kusiya kucita mabasa auzimu mpaka kuona nyatwa. Natenepa ndi pyakufunika kukumbuka uphungu wa mpostolo Paulu toera tikhonde kudzinyindira kakamwe. Iye alonga: “Ule ananyerezera kuti ali dzololo mbacite mphole-mphole toera akhonde kugwa.” Tisafunika kudzindikira kuti ndife akusowa ungwiro, pontho midzidzi inango tisafunika kuoneka tekhene khala tiri kupitiriza na uxamwali wathu na Yahova.—1 Akorinto 10:12; Misangani 28:14.