Nhwehwɛmuɛ Ma Abrabɔ Ne Asɛnga Adesũa Nwomaa
JULY 7-13
NYAMEƐ DWIRƐ NANU ASUADEƐ ANYANDERA 21
Afutue Pa Bɔ Ɔmaa Anigye Ba Agyaa Nu Ɔ
w03 10/15 4 ¶5
Ɛkɔyɛ Sɛɛ Na Asi Gyinayɛɛ Pa?
Ɛpere wɔnwo si gyinayɛɛ a, ye si ase ne, ekonwu kyɛ ali ngwaseasɛm. Anyandera 21:5 tu yɛ fo kyɛ: “Sona bɔ okuro adwuma ne, ye nhyehyɛleɛ maa onya ye nwo tam, nakoso sona bɔ ɔpere ye nwo de, onnya huu.” Mmabunu bɔ nnaa nwo akɔnnɔ gyé wɔ benu ne, odikyɛ bɛto bɛ boase kora ne bafa beti bawura agyaa nu. Wanyɛ sɔ a, edwirɛ bɔ William Congreve hane ne, bekonwu kyɛ ɔte nahorɛ. Ɔnwa: “Ɛpere wɔnwo gya a, ekonu wɔnwo afebɔɔ.”
g 7/08 7 ¶2
Nya anwobrɛaseɛ. Bible ne ka kyɛ: “Nnɛma ɛmɔfa pɛsɛmangomenya anaa nduhoɛ bɛyɔ nikyee biala, na mmom ɔsɛ kyɛ ɛmɔfa anwobrɛaseɛ adwene bebu ɛmɔ mmango mɔ bɛtra ɛmɔ bɔbɔ ɛmɔ nwo.” (Filipifoɛ 2:3) Edwirɛ bie si agyaa nu a, kyɛ ahaa benu biala kɔnea bɔ ɔkɔboka ye mmango na basiesie ne, ɛkɔnea ne, ɛhe pia to ɛhe aso, na ɛhe koso apia ato ɛhe aso. Ɛhene yeɛ ole agyaa nu ngondii nwora-nwora ne. Sɛ ele anwobrɛaseɛ a, nna bekye bɔ ɛbaapena bɔ odi bẽ ɔne bɔ odi fɔ ɔ.
w06 9/15 28 ¶13
“Nya Wɔ Mmerandeɛ Nu Braa Nwo Anigye”
Sɛ kyɛbɔ agyaafoɛ ne bɛnwo di nati, ɔmaa b’agyaa ne kongɔ berɛ a, nzu yeɛ bɛkɔyɛ ɔ? Sɛ b’agyaa ne kogyina a, ɔlla ase o. Ɔkɔhora kɔwa kyɛ ne benu biala noa yɛ yea, na ngakangaka wakakyi bɛ subaen. (Anyandera 12:18) Ɛhe kɔhora kɔsɛkye b’agyaa ne koraa. Bible nu anyandera bie ka kyɛ: “Ɔte paa kyɛ ɛkɔtena aseɛ akwaweɛ so tra kyɛ ɛne braa bɔ ye nwo te ngondii bɔ odwane wɔ nwo ɔ bɛkɔtena ɔ.” (Anyandera 21:19) Sɛ ɛte braa bɔ w’agyaa te sɔ a, bisa wɔnwo kyɛ, ‘Me subaen ti, ɔyɛ se ma mehu kyɛ okopingye me anaa? Bible ne ka kyɛ: “Huɛ mɔ, ɛmɔhuro ɛmɔ aye mɔ, na nnɛma ɛmɔteetee bɛ.” (Kolosefoɛ 3:19) Sɛ ɛte brienzua a, bisa wɔnwo kyɛ, ‘Me subaen ti, meye fite a yenye gye tra kyɛ ɔkɔtena awuro anaa?’ Ɔwɔ nu, ɛngɔhora ngɔha kyɛ bɔ ehu anaa ɛye yɛ nati, ɛkwaabɔ adwaman. Nakoso sɔ nikyee ne kɔhora kosi, ɛhene ati yeɛ yenwo hia kyɛ ɛmɔbonu besusu ɔhaw nanwo ne.
Bible Nu Dwirɛ Titire
w05 1/15 17 ¶9
Kesaalae, Yesu tte sona biala mbaen bɔ ɔte afunumu awa so ɔ, na mmom ɔte ɔhene bɔ ole tumi. Nakoso Bible ne nwa ɔte pɔngɔ so. Ɛhe gyi berɛ ma ngondii. (Anyandera 21:31) Nyekyire 6:2 ka kyɛ: “Nneane, na nwuni pɔngɔ fufue bie. Na bɔ ɔte ye so ne, né otira agyaen; na bɛmane ye abotire, na ofili berɛ hɔle oolili ngonim, na ɔhɔle so lili ngonim.” Dawide koso hane Yesu nwo dwirɛ kyɛ: “Wɔ tumi hɔtɔ ne, AWURADE kɔtengyɛ kofi Sion. Di hene wɔ wɔ pɔfoɛ mɔ b’afia.”—Edwein 110:2.
JULY 14-20
NYAMEƐ DWIRƐ NANU ASUADEƐ ANYANDERA 22
Kyɛbɔ Bɛtete Ngwalaa Nwo Afutue
w20. 10 27 ¶7
Benyi A, Bɛkɔso Yehowa Po Ɛne?
Sɛ ɛmɔpena kyɛ ɛmɔwo mmaa a, bisa wɔnwo kyɛ: ‘Yɛbrɛ yɛnwo ase, na yɛdɔ Yehowa bɔ yeti ɔkɔfa akwalaa bɔ ɔsombo sɔa kowura yɛ sa anaa?’ (Edw. 127:3, 4) Sɛ ele mmaa dada koso a, bisa wɔnwo kyɛ: ‘Meboka me mmaamɔ maa benwu mvasoɛ bɔ ɔwɔ so kyɛ bɛkɔyɛ adwuma serɛ anaa?’ (Nwo. 3:12, 13) Meyɛ bɔ ngɔhora biala mefa mebɔ me mmaamɔ nwo waen wɔ Satan wiase he anu? (Any. 22:3) Ɛtwe wɔ nu taenn po a, nna ɔhaw biala yeɛ ɛkɔhora kɔsɔ yenoa ɔ. Nakoso, ɛkɔhora kohyire bɛ kyɛbɔ bɛkɔpena afutue bekofi Bible nanu mmerɛ bɔ bayia ɔhaw bie ne. (Kenga Anyandera 2:1-6.) Yɛfa ye kyɛ, w’abusuaniɛ bie nwa ɔngɔso Yehowa ko. Ɛkɔhora kɔfa Bible kɔboka wɔ mma nemɔ maa bekonwu bɔ yeti yeɛ yenwo hia kyɛ bedi nahorɛ bɛma Yehowa ɔ. (Edw. 31:23) Sɛ ɛmɔnwoniɛ bie wu koso a, ɛkɔhora kohyire wɔ mmaamɔ kyɛbɔ bɛkɔpena awerɛkyekyerɛ bekofi Bible nanu, na banya asomdwee ɔ.—2 Kor. 1:3, 4; 2 Tim. 3:16.
fy 53 ¶6
Kyirekyire Bɛ Fi Bɛ Ngwalaa Nu
Anyandera 22:6 ka kyɛ: “Tete akwadaa ma onwu atee paa bɔ odi kyɛ ɔfa so ɔ.” Awofoɛ adwuma titire ko paa yeɛ ole kyɛ bɛkɔtete bɛ mmaamɔ. Yebisa kyɛ, sɔ ndeteyɛɛ ne, ɔhyɛ yebo mmerɛ beni? Bɛwo adɔma ne ngɛɛ nala. Somafoɛ Pɔɔlo nwa Timoteo nyane ndeteyɛɛ fi ye “ngwalaa nu.” Greek dwirɛ bɔ bɛfa bɛyɛle adwuma wɔ wa ne, ɔkɔhora kohyire adɔma anaa akwalaa bɔ bɛnwonzɛ ye ɔ. (Luka 1:41, 44; Asomafoɛ 7:18-20) Ɛhe kyire kyɛ, Timoteo ngwalaa nu pɛɛ yeɛ onyane sɔ ndeteyɛɛ ne, na ɔte ye atee so. Mmerɛ bɔ ɔte pa paa kyɛ bɛhyɛ yebo bɛtete akwalaa yeɛ ole mmerɛ bɔ ɔte adɔma ne. Akwalaa kamba po pena kyɛ osua nikye.
w06 4/1 9 ¶4
Awofoɛ—Ɛmɔyɛ Nikyee Bie Maa Ɛmɔ Mmaamɔ Besua
Akwalaa de, ɛyɛ ye sɛɛ ɔte akwalaa. Benu biemɔ wɔ berɛ a, ɛtea bɛ a, ɔndea. (Gyenesise 8:21) Nzu yeɛ awofoɛ kɔhora kɔyɛ ɔ? Bible ne nwa: “Ngwaseade yɔlɛ ayi akwadaa ti anu tɛkyɛ, ɛfa mbire tea ye a, otu ngwaseade ne fi ye nwo.” (Anyandera 22:15) Ebiemɔ nwa ebie yɛ sɔ a, ye tianu yɛ se soma, na sɔ nikyee ne po apɛ nu. Ɔte amba kyɛ, sɛ bɛyɛ ebie basabasa anaa bɛteetee ye a, Bible nzosɔ so. Ɔwɔ nu, ɔtɔ mmerɛ bie a, Bible ne ka “mbire” a, ogyi berɛ ma kein bɔ bɛfa befi akwalaa ne. Nakoso ɛwa de, nna ɛhene yeɛ ne ɔka ɔ, na mmom, né ɔka kyɛ odikyɛ awofoɛ fa begya besie ase, na bɛtea bɛwa ne. Bɛyɛ sɔ bɛfa bekyire kyɛ bɛdɔ akwalaa ne, na bɛpena kyɛ osi ye yé.—Hebrifoɛ 12:7-11.
Bible Nu Dwirɛ Titire
w21. 08 22 ¶11
Yɛpena kyɛ yɛnye gye paa a, nikyee biala bɔ bɛkɔfa bekowura yɛ sa wɔ Yehowa asafo nanu ne, odikyɛ yɛfa y’anwoserɛ amukoraa yegua so. ‘Fa wɔ mmerɛ to berɛ’ ka nzɛmba ne, na nikyee biala bɔ bɛyɛ ye wɔ asafo nanu ne, fa wɔnwo wura nu. (Aso. 18:5; Heb. 10:24, 25) Ɛkɔ adesua a, siesie wɔnwo kyɛ ɛkɔma mmuayɛɛ bɔ ɔhyɛ ngunaen. Bɛma wɔ asuafoɛ dwumadie a, nnɛfa di angorɛ. Bɛfrɛ wɔ kyɛ ɛɛyɛ adwuma bie wɔ asafo nanu a, dwu berɛ ndɛ, na nnɛyɛ kokoasa. Adwuma biala bɔ bɛkɔfa bɛkɔma wɔ wɔ asafo nanu ne, nnebu ye kyɛ ɔmvata wɔ. Sua adwuma ne yé. (Any. 22:29) Ɛyere wɔnwo yɛ adwuma bɔ owura wɔ sa wɔ asafo nanu a, ɛkɔhɔ wɔ nyunu ndɛndɛ, na wɔnye kɔgye paa. (Gal. 6:4) Afei koso, yenwo atee bie bɔ enyane a ahaa ekuro ne, sɛ okodi ebie sa nu a, wɔnye kɔgye kɔma sona ne.—Rom. 12:15; Gal. 5:26.
JULY 21-27
NYAMEƐ DWIRƐ NANU ASUADEƐ ANYANDERA 23
Nzaanonɛ Nwo Afutue
w04 12/1 19 ¶5-6
Yɛfa ye kyɛ ebie no nzaa paa, nakoso ɔnea yé kyɛ ɔngɔbo. Ɛhene koso ɛ? Ebiemɔ wɔ berɛ a, bɛkora bɛno nzaa paa, koso ennwu ye kyɛ babo. Sɛ ɛhene ati, b’adwene yɛ bɛ kyɛ ɔngɔyɛ bɛ hwee a, yede ne bɛlaka bɛnwo. (Yeremia 17:9) Ngakangaka, nzaa kɔfa bɛ kɔyɛ akoaa, na bɛkɔkakyi “akɔnomnzafoɛ.” (Tito 2:3) Akɔnomnza nwo dwirɛ bɔ yɛka ye, Caroline Knapp hane kyɛ, “ɔba ngakangaka, annea a engonnwu ye; wɔnye kɔwa wɔnwo so ne, ne wafa wɔ.” Akɔnomnza te ngaen bɔ ɔkɔhora koli wɔ awue ɔ!
Yesu bɔle yɛ kɔkɔ kyɛ: “Ɛ́mɔnea ɛmɔ nwo yé, ná poentolɛ ndrasoɛ ne nzaabolɛ ne asetena nu dadwene wanni ɛmɔ ti, ná sɔ kyẽa ne ammamvu ɛmɔ nu kyɛ ngaen; ofikyɛ ɔkɔwa bɛ bɔ bɛte aseɛ ye aso amukoraa so.” (Luka 21:34, 35) Sɛ ebie no nzaa na wammo po a, ɔkɔhora kɔmaa akwadworɔ kɔha ye, na ekonwu ye ne, ne yenye ayɛ ye seinn. Ɔba sɔ a, ɔmaa yenye nna berɛ wɔ Yehowa soen nu. Sɛ Yehowa kyea ne bato ye sɔ mmerɛ ne a, enwu ye sɛ?
it-1 656
Nzaabolɛ
Bible nzosɔ so. Ebie no nzaa bo a, Bible ne dwudwo tia koraa. Nyanzaniɛ bɔ ɔhworɔle Anyandera nwomaa ne, ɔmaa yenwu bɔ ɔkɔhora kɔto ebie bɔ ɔno nzaa pee ɔ. Dɔktafoɛ dé to nu kyɛ ye dwirɛ ne te nahorɛ. Sɔa yeɛ ɔhane ɔ: “Nwa yeɛ edwirɛ ato ye ɔ? Nwa yeɛ ye wora ɔbɔ ɔ? Nwa yeɛ okuro ngondiihonɛ? Nwa yeɛ okuro aporowaasulɛ ɔ? Nwa yeɛ wapurapura mbaen ɔ? Nwa yeɛ ye nye mmaa ayɛ kɔɔ ɔ? Bɛ bɔ bɛtena nzaa bo bɛkyɛ ne ɔ, bɛ bɔ bekyini bɛno nzaa mvrafra ne ɔ. Nnɛma wɔ nye yɛ nzaa bɔ ye nye apakye ɔ nwo koakoa [anaa nnɛnea], bɔ ye nye pɛ ahure wɔ kwangoa nu, bɔ ogua wɔ komvi a ɔkɔ yɔɔ ne. Nziɛ ye, ɔka wɔ kyɛ ewoo, na ye noa borɔ te kyɛ bɔnaa. Nningyein suronyisuronyi kogyinagyina wɔ nye so, na w’adwene kɔmaa ekodwudwo basabasa.” (Any 23:29-33) Ɛnea tworɔnzɛm ne a, ɔhaw bɔ ɔkɔhora kɔto sona ne bie ɛhe: Ɔkɔhora konya boɛ nu anwonyerɛ, ɔte berɛ a ne yenwo woso ye biribiri-biribiri, ɔkɔhora konya adwene nu anwonyerɛ, na ɔkɔhora kowu po. Kãa a ne ye wora afi nikye, yeti odwudwo a, onzisi so. Ɔyɛ nningyein biemɔ bɔ sɛ ɔnnone nzaa a, ahaa ɔngɔyɛ ye lle ɔ. Ɔba sɔ a, ne wato ye ne ndoatoa; bɔ ɔnzɛkyɛ ɔbɔ so po a, ne ɔka.—Hos 4:11; Mat 15:18, 19.
Afei bɔ ɔhworɔle Anyandera nwomaa ne, ɔhane kɔnomnzaniɛ nanwo dwirɛ kyɛ: “Wɔ nye so kɔyɛ wɔ kyɛ ebie bɔ ɔla ɛpo afia ɔ, okohyini wɔ kyɛ ebie bɔ waala ɛlɛen noa ɔ. Bafa nikyee babɔ me, nakoso mambura, babo me, nakoso ɔnyɛ me yea. Mmerɛ beni yeɛ me nye so kɔtete me maa ngɔɔpena nzaa bieku ngɔno ɔ?” (Any 23: 34, 35) Ɛnea bɔ tworɔnzɛm ne ka ne a, wayɛ kyɛ ebie bɔ nzue fa ye kɔ ɔ, anaa ebie bɔ ɔla ɛlɛen nu bɔ olengye-lengye ye ɔ; ɔkɔhora konya asedɛnt. Stroke kɔhora kɔhye ye, anaa ɔkɔɔha ngondii maa bɛkɔbo ye. Afei sɛ ɛnea ngyekyemuɛ 35 ne a, wayɛ kyɛ kɔnomnzaniɛ ne ngome yeɛ odwudwo-dwudwo ɔ. bɛ dufu ye paa, koso ɔnde po, ofikyɛ onnwu hwee. Nzaa ne amaa wala kagyaa, koso onyane a ahaa watete yenye so maa wasa waano bieku. Bɔ okofi nu kɔwa yeɛ ole kyɛ, ehiaa kɔdosa ye, ofikyɛ kãa biala bɔ ɔkɔwa yenwo ne, na wafa wano nzaa. Ongonya adwuma ngɔyɛ, ofikyɛ ebiala po ngɔma ye bie.—Any 23: 20, 21.
Bible Nu Dwirɛ Titire
w04 11/1 31 ¶2
Edwirɛ Bɔ Ebiemɔ Bisa Ɔ
Ebie te adifuu a, ɔkora maa ɔyɛ obolo, nakoso nna daa amu yeɛ ɔte sɔ ɔ. Anwonyerɛ kora maa ebie yɛ obolo. Ebie koso wɔ berɛ a, ofi abusua nu. Odikyɛ yɛkae kyɛ, ebie te obolo a, wɔnye bɔ ye so a enwu ye. Nakoso adifuu de, ɔte adwene bɔ sona ne le ye wɔ aleɛ nwo ɔ. Sɛ bɛka kyɛ ebie ayɛ obolo a, okyire kyɛ “ɛloe asone soma wɔ ye nipadua nanu.” Yeɛ bɛka kyɛ ebie te adifuu a, okyire kyɛ “yenye boro aleɛ, anaa odidi maa ɔboso.” Yeti, sɛ enwu kyɛ ebie ayɛ obolo a, ongyire kyɛ ɔte adifuu, na mmom adwene bɔ ole ye wɔ aleɛ nwo ne. Ebie wɔ berɛ a, ɔte sona teamaa, koso ɔte adifuu. Yeɛ sona bɔ ɛkɔha kyɛ wayɛ obolo wɔ nekaa bie ne, ɛkɔ nekaa foforɛ a, bɛngɔha kyɛ ɔte obolo.
JULY 28–AUGUST 3
NYAMEƐ DWIRƐ NANU ASUADEƐ ANYANDERA 24
Bɔ Ɛfa Nu Ne, Yere Wɔnwo Gyina Yenoa
it-2 610 ¶8
Ɛpɔen
Akatuaa bɔ ɔla berɛ ɔnwondɛ bɛbɔ bemia bɛnye begyina ɔhaw nu ne, Kristofoɛ nye sɔ paa. Yesu hane sɔ akatuaa nanwo dwirɛ kyɛ: “Bɛ bɔ tenenee ti bɛtane bɛ nye ne, banya saleɛ, ofikyɛ bɛ yeɛ nyameɛso ahennie ne te bɛ deɛ ɔ.” (Mat 5:10) Odikyɛ besua ewuetingyelɛ nanwo nikye. Afei, Nyameɛ bɔ ɔnwa ɔkɔfa sɔ nhyiraa ne kɔma bɛ ne koso, odikyɛ besua yenwo nikye. Bɛyɛ sɔ a, ɔkɔmaa bɛ gyidie kɔyɛ se. Sɛ bɛbɔ bɛtane bɛnye ne ka kyɛ beku bɛ po a, sɔ anyelasoɛ nati, bɛkɔso bedi nahorɛ bɛma Nyameɛ. Bɛse bɔ Yesu wue ne kora yɛ ɔ, ɛhene ati yeɛ bɛfa ewue benwuna-nwuna bɛ po a, benzuro ne. (Heb 2:14, 15) Sɛ bɛtane Kristoniɛ bie nye a, sɛ ɔkɔhora koli nahorɛ oo, ɔngɔhora oo, ogyi adwene bɔ okonya ye wɔ yenwo naso. Bible ne ka kyɛ: ‘Ɛ́mɔma adwene bɔ ɔwɔ Kristo Yesu nu ne ala yeɛ ɔ́tena ɛmɔ nu ɔ . . . ɔyɛle asommerɛ fa hɔle ewue nu, asɛndua ne aso wue nu po.’ (Flp 2:5-8) ‘Na ɔnate anigye bɔ né ɔla ye nyunu ne ati, omiane ye nye fale amaneɛ ne animguaseɛ wue nu wɔ asɛndua ne aso.’—Heb 12:2; nea 2Ko 12:10; 2Tɛ 1:4; 1Pe 2:21-23 koso.
w09 12/15 18 ¶12-13
Anyandera 24:10 ka kyɛ: ‘Kyẽa bɔ edwirɛ kɔto wɔ ne, sɛ w’aba nu bu a, ye de w’anwoserɛ so kɔte.’ Anyandera foforɛ koso nwa: “Aworabɔlɛ ma sona sunzum nwo to.” (Any. 15:13) Kristofoɛ biemɔ abanu abu alaa maa kesaalae bɛngenga Bible po na badwene yenwo, bɛbɔ mbaeɛ biala-biala, na bɛnga bɛngɔ aliemaamɔ nwo. Bɔ ɔte yeɛ ole kyɛ, sɛ w’abanu bu na anyɛ yenwo hwee a, edwirɛ kɔhora kɔto wɔ.—Any. 18:1, 14.
Kyɛ ahaa yɛkɔdwene nningyein bɔ ɔmaa y’abanu bu nanwo ne, odikyɛ yɛfa y’adwene yesie bɔ ɔmaa yɛnye gye naso mmom. Dawide hworɔle kyɛ: “Ao me Nyameɛ, bɔ mekuro ole kyɛ ngɔyɔ w’apɛdeɛ ɔ.” (Edw. 40:8) Sɛ nningyein ngoye wɔ y’abrabɔ nu po a, ɔnzɛkyɛ ɔba yɛ tianu lle kyɛ yɛkɔyakyi nningyein bɔ yɛyɛ yɛfa yɛso Yehowa ne. Sɛ wɔ wora bɔ a, yenoa ayire yeɛ ole kyɛ ɛkɔyɛ nningyein bɔ ɔmaa wɔnye gye ɔ. Yehowa nwa sɛ yɛnye kɔgye paa a, odikyɛ yɛneanea ye Dwirɛ nanu daa biala. (Edw. 1:1, 2; Yak. 1:25) Sɛ yɛkɔ adesua, na yɛkenga Bible a, yenya “edwirɛ bɔ ɔyɛ fɛ” bɔ ɔmaa y’ahone tɔ yɛ kunu ɔ.—Any. 12:25; 16:24.
w20. 12 15
Edwirɛ Bɔ Ebiemɔ Bisa Ɔ
Anyandera 24:16 ka kyɛ: “Teneneeniɛ kɔhora kofĩ ase pɛen nzoo, nakoso osa dwɔso.” Edwirɛ he fa ebie bɔ ɔyɛ bɔne na Nyameɛ afa ahyɛ ye, ne wasa waayɛ na wafa wahyɛ ye nanwo anaa?
Daabi, nna sɔ yeɛ okyire ɔ. Na mmom ɔfa ebie bɔ ɔhaw taa toto ye nanwo. Ɔhaw he kɔ na ɛhe awa, koso daa ogyi ye gya so.
Edwirɛ, ‘wafi ase’ bɔ ɔwɔ Anyandera 16:24 ne, nna ebie bɔ wayɛ bɔne nwo dwirɛ yeɛ ɔka ɔ, na mmom ɔfa ebie bɔ edwirɛ taa toto ye nanwo. Ewiase bɔne he anu de, teneneeniɛ kora fa ɔhaw nu; ebie yeɛ ole anwonyerɛ. Awaen ne kɔhora kɔtane yenye. Nakoso, ɔkɔhora konya gyidie kyɛ Nyameɛ kɔboka ye maa okogyina ye gya so bieku. Bisa wɔnwo kyɛ, ‘Bɛbɔ bɛso Nyameɛ yé ne, mahyɛ ye nzorɛ kyɛ nningyein taa kɔ yé ma bɛ anaa? Nzuati yeɛ ɔte sɔ ɔ? Bahyɛ yɛ bɔ kyɛ: “AWURADE sɔ bɛ bɔ bɛtete begua ɔ amukoraa nu, na ɔma bɛ bɔ baboto ɔ so.”—Edw. 41:1-3; 145:14-19.
Bible Nu Dwirɛ Titire
w09 10/15 12
Edwirɛ Bɔ Ebiemɔ Bisa Ɔ
Bible mmerɛ nu ne, sɛ ne brienzua bie pena kyɛ ‘osi ye awuro’ anaa ogya na ɔkyekye ye abusua a, odikyɛ obisa yenwo kyɛ, ‘Menea menwo a, ngɔhora ngɔnea meye? Sɛ kyeabie mewo a, ngɔhora ngɔnea ngwalaa nemɔ ɛne? Kora bɔ okogya ne, ne odikyɛ ɔyɛ boo. Yeti sɛ ɛnea Today’s English Version Bible nanu a, Anyandera 24:27 ka kyɛ: “Nnesi w’awuro, yeɛ nnɛhyehyɛ w’abusua, sana wɔ fieso aleɛ awa, bɔ ede di kyɛ ɛkɔhora kɔnea wɔnwo ɔ.” Ɛnea a sɔ dwirɛ he, ɔyɛ adwuma ɛnnɛ?
Yoo, ɔyɛ adwuma papa! Brienzua bɔ ɔpena kyɛ ogya ne, odikyɛ ɔboa yenwo yé paa. Sɛ ye sa buru mukoraati gua yenwo de a, odikyɛ ɔyɛ adwuma. Bɛka kyɛ brienzua nea ye abusua a, nna asetena nu nningyein ngome yeɛ odikyɛ ɔfa ma bɛ ɔ. Na mmom, odikyɛ ɔmaa bɛnye gye, na ɔboka bɛ maa bɛso Yehowa. Bible ne nwa, sɛ brienzua bie nyɛ sɔ a, ɔte nipabɔne tra bɔ onne ni po. (1 Tim. 5:8) Yeti, sɛ abrandeɛ bie pena kyɛ ogya na ɔkyekye ye abusua a, odikyɛ obisa yenwo kyɛ: ‘Menea menwo a, bɔ m’abusua hia ye wɔ asetena nu ne, ngɔhora ngɔfa ngɔma bɛ anaa? Ngɔhora ngoli m’abusua ne nyunu maa bɛkɔso Yehowa? Ngɔhora ngɔfa Bible ne ngohyirehyire bɛ daa?’ Nyameɛ Dwirɛ ne maa yenwu kyɛ ɛhe te brienzua ne asɛdeɛ titire paa.—Deut. 6:6-8; Ɛfe. 6:4.
Abrandeɛ bɔ ɔpena kyɛ ogya ne, odikyɛ ɔto ye boase susu edwirɛ bɔ ɔwɔ Anyandera 24:27 nanwo yé. Taluwa koso, odikyɛ obisa yenwo kyɛ, asɛdeɛ bɔ brasua le ye wɔ abusua nu ne, mayɛ krado kyɛ ngɔyɛ anaa? Abrandeɛ ne taluwa bie gya foforɛ na bɛpena kyɛ bɛwo mmaa a, odikyɛ bebisa bɛnwo sɔ dwirɛ ne bie. (Luka 14:28) Sɛ Nyameɛ mmenia fa afutue bɔ yaha yenwo dwirɛ ne yɛ adwuma a, b’abusua ne nye kɔgye, na ɔhaw bɔ ɔwɔ agyaa nu ne, so kɔte.
AUGUST 4-10
NYAMEƐ DWIRƐ NANU ASUADEƐ ANYANDERA 25
Afutue Bɔ Ɔkɔmaa Yɛnoa Dwudwolɛ Kɔyɛ Fɛ Ɔ
w15 12/15 19 ¶6-7
Ɔte pa kyɛ yekodwudwo mmerɛ bɔ ɔfata nu. Anyandera 25:11 maa yenwu ye sɔ. Ɛberɛ nwa: “Ɛkã edwirɛ wɔ mmerɛ bɔ ɔfata nu a, ɔte kyɛ sikaa kɔkorɛ bɔ bafa bali adwii bagua ɛdwetɛ nu ɔ.” Sikaa kɔkorɛ mia ɔyɛ nyeme dada, na nea kyɛ basa bafa bali adwii bagua ɛdwetɛ nu ɔ; nea ye nyeme! Sɔ ala yeɛ yɛ koso, sɛ yɛpena kyɛ yɛka edwirɛ bɔ ɔyɛ fɛ kyire ebie, na yɛnwondɛ mmerɛ bɔ ɔfata nu a, ɔmaa yɛnoa dwudwolɛ yɛ fɛ paa. Atee beni aso?
Ebiaa edwirɛ bɔ yɛkwaaha yekyire sona ne, ɛhene yeɛ ɔkɔboka ye paa ɔ, nakoso sɛ yanga ye wɔ mmerɛ bɔ ɔte pa nu a, ebiaa ɔngɔte yebo. (Kenga Anyandera 15:23.) Wɔ March 2011 nu ne, aseɛwosolɛ sili wɔ ɛpo nu wɔ Japan. Ohwi fale nguro biemɔ so. Mmenia kɔbo 15,000 yeɛ bewuli ɔ. Bɛbɔ b’abusuafoɛ wuwuli ne, ne Yehowa Adanzefoɛ boka ye, koso bɛfale Bible ne bɛkyekyele bɛ mmango nemɔ wora. Ne bɛte Buddhafoɛ bɔ bɛ soen ali bɛ ti ɔ, na ne bɛnze Bible nanwo bali. Aliemaamɔ nwuni kyɛ, sɛ bɛka ewuetingyelɛ nanwo dwirɛ bekyire bɛ sɔ mmerɛ ne a, ɔngɔboka. Yeti bɛkyekyele bɛ wora mmom, na bɛmaa benwuni bɔ yeti yeɛ nningyein bɔ ɔte sɔ kora to mmeni pa ɔ.
w15 12/15 21 ¶15-16
Edwirɛ bɔ yɛka yekyire mmenia ne, yenwo hia paa, na sɔ ala yeɛ atee bɔ yɛfa so yɛka ne koso nwo hia ɔ. Mmerɛ bɔ Yesu dwudwole wɔ asɔre awuro bɔ ɔwɔ Nazaret ne, yenoa dwirɛ ne yɛle mmenia nemɔ “nwanwa.” (Luka 4:22) Sɛ yɛnoa dwudwolɛ yɛ fɛ a, ɔmaa mmenia tie yɛ, na ɔhyɛ bɛ ngunaen. Ɔnzɛkyɛ yɛfa kyɛbɔ yedwudwo ne yedi angorɛ koraa. (Any. 25:15) Kyɛbɔ Yesu nyane aboterɛ ne mmenia dwudwole, na ɔmaa b’ahone tɔle bɛ kunu ne, yɛkɔhora yekosuasua ye. Yesu nwuni mmɔden bɔ mmenia nemɔ abɔ kyɛ bekotie ye ne, bɛnwo yɛle ye anwumvo, na “ɔhyɛle ye bo hyirehyirele bɛ nningyein pee.” (Marko 6:34) Mmerɛ bɔ mmenia pepɛle Yesu nzoaa ne, wambɛ bɛ bie.—1 Pet. 2:23.
Ebie bɔ yepingye ye ne, sɛ yɛne ye dwudwo a, annea a, yɛkɔha yɛ dwirɛ pein-pein. Ɛhe kɔhora kosi mmerɛ bɔ yɛne y’abusuaniɛ, anaa yɛ damvo bie bɔ yɛne ye wɔ asafo nanu yedwudwo ne. Ne Yesu ne ye asuafoɛ nemɔ afia te kama. Yebisa kyɛ, ɛhene ati, ne ɔbobɔ ye adwene kyire bɛ anaa? Wanyɛ sɔ lle! Mmerɛ bie, ne Yesu asuafoɛ ne su bɛnwo aporowaa kyɛ bɛ nu nwa yeɛ ɔte titire paa ɔ. Nakoso, Yesu ne bɛ dwudwole bɔkɔɔ, na ɔfale akwalaa bie oogyinane berɛ kyɛ besuesua ye. (Marko 9:33-37) Asafo nu mbanyi tu aliemaamɔ fo a, odikyɛ benya bɛnwo “aboterɛ.” Bɛyɛ sɔ a ne besuesua Yesu.—Gal. 6:1.
w95 4/1 17 ¶8
Yɛbɔ yɛso Nyameɛ ne, yɛkɔhora yɛkɔhyehyɛ yɛnwo ngunaen. Sɔ ala yeɛ Yesu yɛle ɔ. Yesu nate asɛnga adwuma naso hyɛle mmenia ngunaen. Ne asɛnga yɛ ye fɛ paa; ɔhane kyɛ ɔtekyɛ aleɛ bɔ odi ɔ. (Yohane 4:34; Romanfoɛ 11:13) Anigye bɔ yɛfa yɛyɛ asɛnga adwuma ne, ɔkora sa. Yede, anigye bɔ ɛfa yɛ asɛnga adwuma ne, ɛkɔyɛ sɛɛ na amaa aliemaamɔ anya bie? Suahu bɔ anya ye wɔ asɛnga nu ne, ɛkɔhora ne aliemaamɔ bɔ bɛwɔ w’asafo nanu kɔhyɛ. Nakoso, nea yé na andwa wɔnoa nu. Sɛ ɛne aliemaamɔ nate asɛnga nu a, ɛyɛ a hyɛ bɛ ngunaen maa bɛyere bɛnwo bɛha Ɔbɔadeɛ nanwo dwirɛ behyire mmenia.—Anyandera 25:25.
Bible Nu Dwirɛ Titire
it-2 399
Ebie bɔ ɔhyɛ yenwo so ne, ole gyidie ne akokoduro paa. Ɔmva yenwo ne bɔ ɔkɔto ye biala ne, ogyi ye gya so, na ye adwene nu laberɛ. Nakoso, ebie bɔ ɔngora nhyɛ yenwo so ne de, olle anwobamɔ, olle gyidie ne anyelasoɛ, na daa ne ye adwene atu afra. Anyandera nwomaa ne nwa: “Sona bɔ ɔngora nhyɛ ye nwo so ne, ɔte kyɛ kuro bɔ pɔfoɛ mɔ awura nu, bɔ ye nwo fasue abubu agua ɔ.” (Any 25:28) Nikyee biala bɔ okonya yenwo akɔnnɔ ne, ne oli ye si dwoli-dwoli, yeti ɔkɔhora kɔyɛ nikyee bɔ ɔttemaye ɔ.
AUGUST 11-17
NYAMEƐ DWIRƐ NANU ASUADEƐ ANYANDERA 26
Nnɛfa Wɔnwo Bɔ “Kwaseaa”
it-2 729 ¶6
Nzue
Sizin. Wɔ Bɔhyɛ Aseɛ naso ne, ne bele sizin nyɔ; asuso ne wawa. (Fa toto Edw 32:4; Edw Nu 2:11 nanwo.) Sɛ bewura April bosome nanu alaa bɔ ɔkwaadwu October afia berɛ ne, nzue tɔ, nakoso ɔtte gidigidi sɔ. Sɔ mmerɛ ne yeɛ akuafoɛ pɛ bɛ fiɛso aleɛ ɔ. Anyandera 26:1 nwa, odwu mmerɛ bɔ bɛpɛ fiɛso aleɛ a, nzue ndɔ. (Fa toto 1Sa 12:17-19 nanwo.) Sɛ odwu asuso mmerɛ a, nna kyɛ ngyerɛmɔ, eyia, nnɔsoa biala na nzue tɔ, na mmom ɔtɔ kaa na eyia koso abɔ kaa. Ɔnate kyɛ sɔ mmerɛ ne, ewienu te frɔlɔɔ nati, sɛ nzue tɔ a ɔfa ayire ba. (Ɛsr 10:9, 13) Ɔba sɔ a, odikyɛ enya nekaa bie bɔ ɔyɛ hye kowura.—Yes 4:6; 25:4; 32:2; Yob 24:8.
w87 10/1 19 ¶12
Anyandera 26:3 nwa: “Pɔngɔ fata bakaa, afupɔngɔ fata nyamaa, yeɛ kwaseaa si fata mbire.” Sɛ Yisraelfoɛ yɛ asoserɛ na ɔkɔfa ɔhaw brɛ bɛ a, ne Yehowa yakyi bɛ maa ebie fa bɛnye so. Bible ne nwa: “Bɛyɔle Nyameɛ dwirɛ nwo lɔen, na bebuli Anwuro Anwuroniɛ ne nhyehyɛleɛ animtia. Ɔfale amaneɛ piri tole bɛ so brɛle b’ase, befifini ase bɔ bannya bokafoɛ biala ɔ. Yeɛ besu bɛfrɛle AWURADE wɔ b’amaneɛnwunɛ nu, na ɔpepɛ lele bɛ fili b’anwokyere nu.” (Edwein 107:11-13) Ngwaseafoɛ biemɔ de babo afutue so; nna bɔ ɛka po yeɛ betie ɔ. Bible ne nwa: “Sona bɔ bɛtaa betwi ye nyunu a ogua ye so asi ne, musue bɔ ɔkɔto ye mvum nu ne, ongonya ye sɔbea.”—Anyandera 29:1.
it-2 191 ¶4
Apakye
Bɔ ogyi berɛ ma ɔ. Ɔhene Solomon nyanzaniɛ ne, ɔhane kyɛ: “Sɛ ɛfa ngraa soma kwaseaa a, ɔpepɛ ye bɔbɔ ye gya gua [ɔba sɔ a, ɔkɔyɛ apakye], yeɛ ɔtwetwe musue dwirɛ ba.” Ebiala bɔ ɔfa ye adwuma wura kwaseaa sa ne, ɔto ye sikaa gua mbaen. Ngakangaka ye adwuma ne kogu. Ɔba sɔ a, ne ye bɔbɔ deinn yeɛ ɔyɛ yenwo aborɛ ɔ, tekyɛ bɔ ɔpepɛ ye bɔbɔ ye gya gua maa ɔyɛ apakye ne.—Any 26:6.
Bible Nu Dwirɛ Titire
18 Ɔmva yenwo ne atẽe biala bɔ yɛkɔfa so yekohyirehyire bɔ yedé yedi nanu yekohyire mmenia ne, nná bɛ mukoraati yeɛ bɛnye kɔgye yenwo kyɛ bekotie yɛ ɔ. Nakoso sɛ yɛbrɛ yɛnwo ase na yɛmaa yɛnoa dwudwolɛ yɛ fɛ a, ɔkɔmaa ebiemɔ kotie yɛ. (Kenga Kolosefoɛ 4:6.) Yɛkɔhora yɛkɔfa yɛ gyidie nwo dwirɛ bɔ yɛkɔhã yekohyire mmenia ne yɛkɔtoto mmenia nyɔ bie bɔ bɛbɔ bɔɔl nwo. Sɛ bɛkɔhora bɛkɔbɔ bɔɔl ne maa ɔkɔyɛ kama a, sana bɛto bɛ boase bɛpaase bɔɔl ne bɛma bɛnwo. Sɔ ala yeɛ sɛ yɛbrɛ yɛnwo ase, na yenya mmenia nwo aboterɛ mmerɛ bɔ yɛne bɛ dwudwo ne a, ɔkɔmaa bɛnye kɔgye yenwo kyɛ bekotie yɛ, na ɛhẽne kobukyé yenwo atẽe maa yekoli b’adanzeɛ. Nakoso, sɛ yenwu ye kyɛ sona ne ahyɛ da kyɛ ɔne yɛ kosu aporowaa, anaa ɔkɔgoro yɛnwo a, ɛhẽne de odikyɛ yɛpɛ so na yɛkɔ. (Any. 26:4) Nakoso, nná ebiala yeɛ ɔkɔyɛ sɔ ɔ, na mmom mmeni pẽe nala wɔ berɛ a, bɛnye kɔgye yenwo kyɛ bekotie yɛ.
AUGUST 18-24
NYAMEƐ DWIRƐ NANU ASUADEƐ ANYANDERA 27
Kyɛbɔ Nnamvoa Pa Boka Yɛ Ɔ
w19. 09 5 ¶12
Bɛbɔ Bɛbrɛ Bɛnwo Ase Bɛma Yehowa Ne, Bɛsombo Bɛma Ye
Ebie bɔ ɔbrɛ yenwo ase ne, onni afutue nwo angorɛ. Yɛfa ye kyɛ ahɔ adesua, yeɛ ɛhyɛle yebo kyɛ ɛne aliemaamɔ bɔ ngɔmmɔ. Egu so ɛbɔ ngɔmmɔ nala yeɛ benu ko frɛle wɔ hɔle ahameɛ ɔ. Yeɛ ɔnwa aleɛ teta wɔ gye so. Ɛhe de, ɛkɔfɛle kaa. Nakoso, ɔngɔyɛ wɔ fɛ kyɛ ɔha hyirele wɔ anaa? Ebie ha hyirele wɔ ndɛ a, ahaa ɔkɔyɛ wɔ fɛ. Sɔ ala yeɛ yeliema Kristoniɛ bie nya akokoduro tu yɛ fo a, odikyɛ yɛbrɛ yɛnwo ase na yede yɛto nu ɔ. Sɔ sona ne, yebu ye kyɛ yɛ damvo, na nna yɛ pɔfoɛ.—Kenga Anyandera 27:5, 6; Gal. 4:16.
it-2 491 ¶3
Wɔ Mmango
Anyandera nwomaa ne tu yɛ fo kyɛ, yele yɛ damvomɔ yeli, na ɔkɔba kyɛ yɛkɔ ahokyerɛ nu a, yɛfrɛ bɛ. Sɔa yeɛ ɔhane edwirɛ ne ɔ: “Nnɛpo wɔ damvo ne wɔ baba damvo; yeɛ sɛ edwirɛ to wɔ a, nnɛkɔ eliɛma awuro, na mmom sona bɔ ɔte pingye wɔ ne, ɔkɔhora kɔboka wɔ kɔtra eliɛma bɔ ɔwɔ dedeede ɔ.” (Any 27:10) Ne ɔpena kyire kyɛ, adamvoa pa so le mvasoɛ paa. Ɔkɔba kyɛ yɛkɔ ahokyerɛ nu a, yɛkɔhora yɛkɔfrɛ ye mmerɛ po bɔ yeliema wɔ berɛ ɔ. Ofikyɛ ebiaa ne yeliema ne te dede, anaa sɔ mmerɛ ne ɔngɔhora ngɔboka yɛ.
Mmrandeɛ Ne Ndaluwa, Nzu Yeɛ Ɔkɔmaa Okosi Ɛmɔ Yé Ɔ?
7 Nikyee kõ bɔ yɛkɔhora yekosũa yekofi Yoase dwirɛ nanu yeɛ ole kyɛ, yɛkɔfa abiɛngoɛ pá ɔ. Bɔ ɛhe kyire yeɛ ole kyɛ, yɛkɔfa mmenia bɔ bɛdɔ Yehowa, na bɛpena kyɛ bɛyɛ bɔ okuro ne adamvoa. Nakoso, nna bɛbɔ yɛne bɛ bɔ tipɛen ne ngome yeɛ yɛkɔhora yɛkɔfa bɛ adamvoa ɔ. Ofikyɛ né Yoase te akwalaa, nakoso ɔfale Yehoada bɔ né ɔtra ye panyi koraa ne adamvoa. Sɛ ɛpena kyɛ ɛfa ebie adamvoa a, bisa wɔnwo kyɛ: ‘Aso sona he kɔboka me maa ngɔhɔso ngɔsõ Yehowa? Aso ɔkɔhyɛ me ngunaen maa ngɔfa Nyameɛ dwirɛ ne ngɔbɔ me bra? Sɛ metie yenoa dwudwolɛ a, aso menwu ye kyɛ yenye gye nahorɛ nanwo anaa? Aso me damvo te ebie bɔ sɛ medi mvomsoɛ a, onya akokoduro kã kyire me? Anaakyɛ bɔ ɔkɔyɛ meso anu fɛ ne ngome yeɛ daa ɔkã kyire me ɔ?’ (Any. 27:5, 6, 17) Yeti, sɛ ele adamvoa bie bɔ ɔnnɔ Yehowa a, odikyɛ ɛtwẽ wɔnwo fi yenwo. Nakoso sɛ wɔ damvomɔ te mmenia bɔ bɛdɔ Yehowa a, kɔso pingyé bɛ, ofikyɛ bɛkɔboka wɔ maa ɛkɔyɛ bɔ Yehowa kuro ɔ.—Any. 13:20.
Bible Nu Dwirɛ Titire
w06 9/15 19 ¶12
Anyandera Nwomaa Nanu Dwirɛ Titire
Anyandera 27:21. Sɛ bɛbɔ y’aba so a, ɔmaa yenwu kyɛbɔ yesi yɛte ɔ. Sɛ yede yɛto nu kyɛ Yehowa yeɛ ɔbokale yɛ, na ɛhene maa yɛkɔso yɛso ye a, okyire kyɛ yɛbrɛ yɛnwo ase. Nakoso, sɛ bɛbɔ y’aba so na ɛhene maa yɛmoma yɛ mmati so a, okyire kyɛ waha yɛ anwobrɛaseɛ kãa.
AUGUST 25-31
NYAMEƐ DWIRƐ NANU ASUADEƐ ANYANDERA 28
Nzonzoleɛ Bɔ Ɔla Bɔnefoɛ Ne Teneneeniɛ B’afia Ɔ
w93 5/15 26 ¶2
“Teneneeniɛ de, ye hue yɛ se te kyɛ gyata.” (Anyandera 28:1) Teneneefoɛ le gyidie, bɛfa bɛnwo bɛto Nyameɛ dwirɛ naso, na bɛfa akokoduro bɛso Yehowa ɔmva yenwo ne bɔ ɔkɔto bɛ biala ne.
it-2 1139 ¶3
Ndeaseɛ
Bɛbɔ bamini bafi Nyameɛ atee so. Sona bɔ bɔne ali ye ti ne, sɛ osi gyinayɛɛ a, ɔngae Nyameɛ po. (Yob 34:27) Ɔmaa ye ahone lakalaka ye, yeti sɛ ɔyɛ bɔne po a, onnwu ye. (Edw 36:1-4) Ɔyɛ yenwo kyɛ ɔso Nyameɛ po a, sona ahyɛdeɛ yeɛ odi so ɔ, na nna Nyameɛ deɛ. (Yes 29:13, 14) Ɔyɛ akyiwadeɛ po a, ɔnwa odi “angorɛ.” (Any 10:23) Ye adwene ne ye nzusuyɛɛ amukoraa aporɔ, na ɔdwene kyɛ kaka. Ye adwene yɛ ye kyɛ Nyameɛ nye asi, yeti onnwu bɔ ɔyɛ ne. (Edw 94:4-10; Yes 29:15, 16; Yer 10:21) Ɛnea bɔ ɔyɛ ne a, bɔ ɔpena kyire alaa yeɛ ole kyɛ, “Nyameɛ biala nne berɛ.” (Edw 14:1-3) Ɔmva Nyameɛ nyɛ fuu. Ɔnate kyɛ ɔmma Yehowa ngyire ye atee nati, ɔngora nzi gyinayɛɛ pa. Ofikyɛ olle nyanza bɔ ɔkɔfa kɔdwene edwirɛ nanwo kɔhɔ siɛ po na wate yebo.—Any 28:5.
it-1 1211 ¶4
Nahorɛlilɛ
Sɛ ebie kɔhora koli nahorɛ kɔma Yehowa a, nna ye anwoserɛ ɔ, na mmom odikyɛ onya Yehowa nu gyidie, na ɔfa yenwo to ye so. (Edw 25:21) Nyameɛ ahyɛ bɔ kyɛ bɛbɔ bedi nahorɛ ma ye ne, ɔkɔyɛ “akokyɛm” ne “anwoserɛ afealeɛ” kɔma bɛ. (Any 2:6-8; 10:29; Edw 41:12) Bɔ ohia bɛ paa yeɛ ole kyɛ, bɛkɔyɛ bɔ Nyameɛ kuro ɔ, yeti ɔmaa bɛ soanu dwo bɛ. Bɛnea benyunu tee wɔ Yehowa soen nu, na nikyefee ndwetwe bɛ. (Edw 26:1-3; Any 11:5; 28:18) Kyɛbɔ Yob hane ne, sɛ abɔnefoɛ di tumi a, ɔmaa mmeni pa fɛ. Yeɛ abɔnefoɛ wu, mmeni pa koso wu. Nakoso Yehowa se bɔ bɛfa nu namu, na wahyɛ bɔ kyɛ b’agyapadeɛ kɔtena berɛ afebɔɔ. Kyeabie bɛ soanu kodwo bɛ, na wama bɛ nikyee pa kyɛ b’agyapadeɛ. (Yob 9:20-22; Edw 37:18, 19, 37; 84:11; Any 28:10) Kyɛbɔ Yob dwirɛ ne maa yenwu ye ne, sɛ bɛka kyɛ ebie so le mvasoɛ a, nna ye sikaa ɔ, na mmom nahorɛ bɔ odi ma Yehowa ne. (Any 19:1; 28:6) Ngwalaa bɔ b’awofoɛ te sɔ ne, bayie koraa! (Any 20:7) Dumaa pa ne obuo bɔ bɛ baba le ye ne, ebie ka bɛ.
Bible Nu Dwirɛ Titire
19 Sɛ yele mmerɛyɛlɛ bie bɔ ɔyɛ se kyɛ yekoli so a, nzu yeɛ odikyɛ yɛyɛ ɔ? Yeɛ ole kyɛ yɛkɔfa Yesu afutue he yɛkɔyɛ adwuma ɔ. Yenwa, “ɛ́mɔwɛne,” kyire kyɛ yɛnea yé na yangɔ nzɔhwɛ nu. Yeti sɛ w’adwene yɛ wɔ kyɛ nikyeefee ngɔhora wɔ po a, nningyein bɔ ɔkɔmaa ɛkɔyɛ bɔne ne, kɔso twe wɔnwo fi yenwo. (1 Kor. 10:12) Nningyein bɔ waboka wɔ maa ali wɔ mmerɛyɛlɛ naso ne koso, nnɛyakyi ye yɛlɛ. ‘Bɔ mmɔden’ kyɛ ɛkɔmaa wɔnye kɔla berɛ mmerɛ biala, na angɔ nzɔhwɛ nu.—2 Pet. 3:14.