Yeda na kua so Christ ayeke sara na yâ ti ye so Nzapa aleke

“NA TONGO nda ni Nzapa asara yayu na sese”, na ye kue so lo sara ayeke lani “nzoni mingi”. (Gen. 1:1, 31). Jéhovah asara azo, na lo zia na gbele ala pendere beku ti kekereke. Ye oko, so Adam na Ève ake yanga lani na yaka ti Éden abuba yâ ti nzoni duti ti azo. Me ye so asi so ayeke ngbâ biani biani pëpe. Ye so Jéhovah aleke ti sara teti sese nga na azo achangé ape. Nzapa afa so a yeke zi ande ahale ti Adam so amä yanga na yâ ti sioni dutingo ti ala so. A yeke kiri na tâ vorongo Nzapa na place ni, na Nzapa ayeke futi Satan Zabolo legeoko na asioni kusala ti lo kue (Gen. 3:15). Fade aye kue ayeke kiri ti ga “nzoni mingi”. Jéhovah ayeke sara aye so kue na lege ti Molenge ti lo, Jésus Christ (1 Jean 3:8). Ndani la a yeke tâ kota ye ti tene e yeda na kua ti Christ na yâ ti ye so Nzapa aleke.—Kus. 4:12; aPhil. 2:9, 11.

KUA TI CHRIST AYEKE NYEN?

² Na ngoi so e yeke gbu li ti e na ndö ti kua so Christ ayeke sara na yâ ti ye so Nzapa aleke, e bâ so yâ ti kua ti lo ni ayeke mingi. Na tapande, Jésus ayeke Zo ti zingo azo, Kota Prêtre, Mokonzi ti congrégation ti aChrétien, nga fadeso lo yeke Gbia ti Royaume ti Nzapa. Tongana e gbu li ti e na ndö ti akua so, a yeke sara si e bâ na nene ni mingi aye so Nzapa aleke nga e yeke ndoye Jésus Christ mingi. Bible afa ambeni kua so lo yeke sara.

³ Lani, na ngoi so Christ ayeke sara kua ti lo na sese, a sigi polele so a yeke biani na lege ti lo la si azo so amä yanga ayeke kiri ande ti lë songo na Nzapa (Jean 14:6). So Jésus ayeke Zo ti zingo azo, lo mû fini ti lo wani tongana ye so a futa ti zi azo mingi (Mat. 20:28). Tongaso, Jésus ayeke gï lani pëpe mbeni zo so tapande ti lo afa so lo sara ye alingbi na andia ti Nzapa. Me lo yeke nga zo so na lege ti lo Jéhovah ayeke sara si aye so lo leke ndali ti nzoni ti azo aga tâ tënë. A yeke gï na lege ti lo la Nzapa alingbi ti kiri ti bâ e na nzoni lê (Kus. 5:31; 2 aCor. 5:18, 19). Kuâ ti Jésus nga na zingongo ti lo na kuâ azi lege na azo so amä yanga ti wara ande aye ti nzoni, so ayeke ngbâ kpu na kpu, na gbe ti komandema ti Royaume ti Nzapa so ayeke na yayu.

⁴ So Jésus ayeke Kota Prêtre, lo lingbi ti “bâ mawa ti e na ando so e woko dä” na ti sara si a pardonné asiokpari ti adisciple ti lo so ayeke be-ta-zo, so ayeke na sese. Bazengele Paul atene: “Kota prêtre so e yeke na ni ayeke pëpe zo so alingbi pëpe ti bâ mawa ti e na ando so e woko dä, me a yeke mbeni zo so a tara lo na yâ ti aye kue legeoko tongana e, me a wara siokpari na yâ ti terê ti lo pëpe.” Na pekoni, Paul awa ala so amä na bê na Jésus Christ ti tene ala sara kue ti bâ nzoni na lege ti ye so Nzapa aleke ti tene azo akiri alë songo na lo. Lo tene: “Tongaso, na sarango tënë na kamene pëpe, zia e ga nduru na trône ti kota nzobe ti Nzapa, si a lingbi ti sara nzoni bê na e nga a sara kota nzobe na e na ngoi so e yeke na bezoin ti tene a mû maboko na e.”—aHéb. 4:14-16; 1 Jean 2:2.

⁵ Jésus ayeke nga Mokonzi ti congrégation ti aChrétien. Legeoko tongana ti adisciple ti lo ti ândö, laso e yeke pëpe na bezoin ti mbeni zo ti sese ti komande na ndö ti e tongana mokonzi. Jésus ayeke fa lege na e na lege ti yingo vulu nga na lege ti aberger so ahinga kua ti ala nzoni. Ala yeke na tënë ti kiri na ni na lo nga na Babâ ti lo ti yayu ndali ti kua ti batango kundu ti ataba ti Nzapa (aHéb. 13:17; 1 Pi. 5:2, 3). Lani, tongana Jéhovah ayeke sara tënë ti Jésus na yâ ti mbeni prophétie, lo tene: “Ala bâ! Mbi zia lo ti duti témoin ndali ti amara; lo fa lege na amara nga lo komande na ndö ti ala.” (És. 55:4). Jésus afa so prophétie so aga tâ tënë na ndö ti lo na ngoi so lo tene na adisciple ti lo, lo tene: “Ala zia mbeni zo airi ala amokonzi pëpe, ndali ti so Mokonzi ti ala ayeke gï oko, Christ.”—Mat. 23:10.

⁶ Ti tene Jésus afa na gigi bibe ti lo nga ti fa so lo yeke na nzara ti mû maboko na e, lo tene na e, lo tene: “Ala ga na mbi, ala kue so asara ngangu kua na kungba ane ala, na mbi yeke dë bê ti ala. Ala yô joug ti mbi na ala manda ye na mbage ti mbi, ndali ti so mbi yeke sara ye na ngangu pëpe nga mbi sara terê ti mbi kete, na ala yeke wara dengo bê ndali ti ala wani. Ndali ti so a yeke ngangu pëpe ti yô joug ti mbi na kungba ti mbi ayapu.” (Mat. 11:28-30). So Jésus Christ ayeke mû li ni na ndö ti congrégation ti aChrétien na ngangu ape nga na mbeni lege so adë bê ti e, lo fa so lo yeke “berger so ayeke nzoni mingi”, so amû tapande ti Babâ ti lo ti yayu, Jéhovah Nzapa.—Jean 10:11; És. 40:11.

⁷ Na yâ ti kozo mbeti ti Paul na aCorinthien, lo fa mbeni mbage ti kua ti Jésus Christ, lo tene: “A lingbi lo komande tongana gbia juska Nzapa azia awato ti lo kue na gbe ti gere ti lo awe si. Me tongana aye kue aga ande na gbe ti lo awe, Molenge ni nga ayeke duti ande na gbe ti Lo so azia aye kue na gbe ti lo Molenge ni, si Nzapa aga aye kue ndali ti zo oko oko kue.” (1 aCor. 15:25, 28). Kozo si Jésus aga na sese, lo yeke “wakode-kua” na terê ti Nzapa, na a yeke lo la lo yeke kozo ye so Nzapa aleke (aProv. 8:22-31). Na ngoi so Nzapa atokua lani Jésus na sese, lo sara lani ye so bê ti Nzapa aye na ngoi kue. Lo luti na gbele tara so ahon atanga ni kue na lo kui be-ta-zo na Babâ ti lo (Jean 4:34; 15:10). Teti so Molenge ti Nzapa angbâ be-ta-zo na lo même juska na kuâ, Nzapa azingo lo ti gue na yayu nga lo mû na lo droit ti duti Gbia ti Royaume so ayeke na yayu (Kus. 2:32-36). Ni la, Nzapa amû na lo mbeni kota kua, so ayeke ti mû gbâ ti angangu ange na peko ti lo ti ga ti futi agouvernement ti azo nga na asioni ye kue so ayeke na ndö ti sese (aProv. 2:21, 22; 2 aThes. 1:6-9; Apoc. 19:11-21; 20:1-3). Na pekoni, gï Royaume ti Nzapa so ayeke na yayu, so Christ ayeke Gbia ni, la ayeke komande na ndö ti dunia kue.—Apoc. 11:15.

TI YEDA NA KUA TI CHRIST AYE TI TENE NYEN?

⁸ Jésus Christ, so ayeke Tapande ndali ti e, ayeke mbilimbili-kue. A mû na lo kua ti bango ndo na ndö ti e. Ni la, tongana e ye ti bâ nzoni na lege ti kua ti lo ni, so lo yeke sara na ndoye, a yeke nzoni e ngbâ be-ta-zo na Jéhovah nga e ngbâ ti tambela legeoko na bungbi ti lo so ayeke gue na li ni.

⁹ Akozo disciple ti Jésus ayeda lani na bê ti ala kue na kua so Christ ayeke sara na yâ ti aye so Nzapa aleke. Ala fa ni lani na lege so ala sara kua beoko na gbe ti Christ so amû li ni na ndö ti ala, nga ala woko terê na gbe ti fango lege so lo yeke fa na ala na lege ti yingo vulu (Kus. 15:12-21). Bazengele Paul asara tënë ti beoko ti congrégation ti aChrétien so a soro ala ti gue na yayu tongana lo tene: “Na tenengo tâ tënë, zia e kono na lege ti ndoye na yâ ti ye kue na gbe ti lo so lo yeke li ni, so ti tene Christ. A yeke na lege ti lo la si terê ni kue abungbi oko na yâ ti mango terê nga asara kua maboko na maboko na lege ti ando oko oko so abio ni atingbi dä si ayeke mû na amembre ni ye so ala bezoin ni. Tongana membre ni oko oko asara kua na lege ni, a yeke mû maboko na terê ni ti kono na ngoi so lo yeke kpengba terê ti lo wani na yâ ti ndoye.”—aÉph. 4:15, 16.

¹⁰ Tongana zo oko oko na yâ ti congrégation asara kua maboko na maboko na amba ti lo nga ala kue asara ni na gbe ti Christ so ayeke mû li ni, congrégation ayeke gue na li ni na e yeke sara ye na ndoye, so ayeke “kamba so abungbi ye mbilimbili.”—Jean 10:16; aCol. 3:14; 1 aCor. 12:14-26.

¹¹ Tongana e bâ aye so ayeke passé na yâ ti dunia, so afa so aprophétie ti Bible aga tâ tënë, afa polele so a mû na Jésus Christ ngangu ti komande tongana Gbia depuis ngu 1914. Fadeso, lo yeke komande na popo ti awato ti lo (Ps. 2:1-12; 110:1, 2). Ye so aye ti tene nyen ndali ti azo so ayeke fadeso na ndö ti sese? Jésus aga nduru awe ti fa na gigi so lo la lo yeke Gbia ti agbia na Seigneur ti aseigneur, na lege so lo yeke fâ ngbanga na ndö ti awato ti lo (Apoc. 11:15; 12:10; 19:16). Na pekoni, Christ ayeke sö ande azo so lo zia ala na mbage ti maboko ti lo ti koli, ti lingbi na zendo so Jéhovah amû lani na peko ti so azo ake yanga na tongo nda ni (Mat. 25:34). A nzere na e mingi ti yeda na kua so Christ ayeke sara na yâ ti ye so Nzapa aleke! Zia e ngbâ lakue ti duti beoko na ngoi so e yeke sara kua ti e na yâ ti dunia kue, na gbe ti fango lege ti Christ na lâ ti nda ni so.