“Aye ti Pendere” Ayeke Si yâ ti Da ti Jéhovah

“Fade mbi [Jéhovah] yengi amara kue, na fade a lingbi aye ti pendere ti amara kue alï; na fade mbi sala si da so asi na gloire.”​—HAGGAÏ 2:7, NW.

1. Na ngoi ti ye ti ngangu, ngbanga ti nyen e yeke bi bê kozoni kue na azo so e ndoye ala mingi?

AYE ti pendere wa asi yâ ti da ti mo? Mo yeke na aye ti yâ ti da ti ngele ngangu, mbeni ordinateur so asigigi fade fadeso, mbeni fini kutukutu na yâ gbagba ti mo? Atä mo yeke na aye so kue, mo yeke yeda pepe so aye so ayeke na ngele ngangu mingi ahon ayeke azo, azo ti sewa ti mo? Bi bê kete so na mbeni bï fion ti guru azingo mo. Da ti mo ayeke gbi, na mo yeke na ngoi gi kete ti kpe! Ye wa ayeke gbu bê ti mo kozoni? Aye ti yâ ti da ti mo? Ordinateur ti mo? Kutukutu ti mo? Nde na so, mo yeke bi bê pepe na ndo azo so mo ndoye ala mingi? A yeke duti biani tongaso, teti azo ayeke na ngele mingi ahon aye.

2. Konongo ti aye so Jéhovah aleke ayeke tongana nyen, na mbage wa Jésus asala nzala ni mingi?

² Fadeso bi bê na ndo Jéhovah Nzapa na Molenge ti lo, Jésus Christ. Jéhovah ayeke ‘Lo so asala yayu na sese na kota ngu ti ingo, na ye kue so ayeke na yâ ni.’ (Kusala 4:24) Molenge ti lo, “wakua ti kode,” ayeke la ni zo so na lege ti lo Jéhovah asala tanga ti aye kue. (aProverbe 8:30, 31, NW; Jean 1:3; aColossien 1:15-17) Biani, Jéhovah nga na Jésus aba na nene ni aye kue so ala leke. (Ba Genèse 1:31.) Me ti mo, na popo ti aye so ala leke, so wa ayeke kota mingi na lê ti ala, aye wala azo? Na dutingo tongana ndara so asala tene tongana zo, Jésus atene: “Mbi wara ngia na popo ti amolenge ti azo,” wala tongana ti so kiringo na peko ti Bible ti William F. Beck atene, Jésus “awara ngia na yâ azo.”

3. Prophétie wa Jéhovah asala tene ni na lege ti Haggaï?

³ Jéhovah aba azo biani na nene ni mingi. A wara mbeni ye oko so afa ni na yâ atene ti prophétie so lo tene na ngu 520 K.N.E. na lege ti prophète Haggaï. Jéhovah atene: “Na fade mbi yengi amara kue, na fade a lingbi aye ti pendere ti amara kue alï; na fade mbi sala si da so asi na gloire. . . . Fade gloire ti nda ni ti da so ahon kozo gloire ni.”​—Haggaï 2:7, 9, NW.

4, 5. (a) Ngbanga ti nyen a yeke na lege ni pepe ti tene na nda ni so tene “aye ti pendere” andu pendere ti ye ti mitele? (b) Mo yeke fa nda ti “aye ti pendere” tongana nyen, na ngbanga ti nyen?

⁴ “Aye ti pendere” wa ayeke si yâ ti da ti Jéhovah na aga na yâ ni gloire so ade ti si lâ oko pepe? Gbâ ti aye ti yâ ti da nga ti apendere ye ti lekengo yâ ni? Lor, argent, na atênë ti ngele ngangu? A yeke ngangu ti tene ye so aduti na lege ni. Dabe mo, ngbele temple, so a sala matanga ti zingo yanga ni a ninga angu ngbangbo oku awe, ayeke giriri mbeni da so ngele ni ayeke dollar ngbundangbu mingi!a Biani, Jéhovah ayeke ku pepe ti tene temple so kete wungo ti aJuif so akiri na kodoro ti ala aleke ni ahon temple ti Salomon na pendere ti akungba ni!

⁵ Tongaso, “aye ti pendere” so ayeke si yâ ti da ti Jéhovah ayeke nyen? A yeke polele, a yeke gi azo. Teti biani, ye so azia ngia na bê ti Jéhovah ayeke pepe argent na lor me azo so asala na lo ndali ti ndoye. (aProverbe 27:11; 1 aCorinthien 10:26) Biani, Jéhovah aba na nene ni akoli, awali, na amolenge kue so avoro lo na lege ni. (Jean 4:23, 24) Azo so ayeke “aye ti pendere,” na ala yeke na ngele ngangu mingi na lê ti Jéhovah ahon apendere ye so aleke na temple ti Salomon.

6. A leke temple ti Nzapa ti giriri ti sala kusala ti nyen?

⁶ Atä kota kangango lege, a hunzi ti leke temple ni na ngu 515 K.N.E. Juska na ngoi ti sadaka ti Jésus, temple na Jérusalem angbâ libe ti vorongo so ayeke na sioni oko pepe teti “aye ti pendere” mingi, so na yâ ni a wara ala so adü ala aJuif nga na aGentil so akamata lege ti vorongo ti aJuif. Me temple ni aduti fä ti mbeni ye so ayeke kota ahon, tongana ti so e yeke ba ande.

Mbeni Gango Tâ Tene na Kozo Siècle

7. (a) Ngbele temple ti Nzapa na Jérusalem aduti gbede ti nyen? (b) Fa peko ti akusala ti kota prêtre na Lâ ti Lungula Siokpari.

⁷ Temple na Jérusalem aduti gbede ti mbeni lekengo ye ti kota ahon teti vorongo. A yeke temple ti Nzapa ti yingo, so Jéhovah aleke gere ni na ngu 29 N.E. na ziango Jésus tongana Kota Prêtre. (aHébreu 5:4-10; 9:11, 12) Ba mbeni ye so ague legeoko na popo ti akungba ti kota prêtre ti Israël na akusala ti Jésus. Na ngu oko oko, na Lâ ti Lungula Siokpari, kota prêtre aga ndulu na balaga na yâ sedu ti temple na lo mu sadaka ti mbeni koli-bagara ti lungula siokpari ti aprêtre. Na pekoni, lo lï na yâ temple na mênë ti koli-bagara ni, lo hon na ayanga-da so akangbi popo ti sedu ni na Ndo ti Nzoni-Kue nga na pekoni na lo hon kota lê ti bongo so akangbi popo ti Ndo ti Nzoni-Kue na Ndo ti Nzoni Ahon Kue. Tongana lo lï na yâ ti Ndo ti Nzoni Ahon Kue awe, kota prêtre ni aki mênë ni na gbele arche ti mbele. Na pekoni, na mungo peko ti oko salango ye ni, lo mu sadaka ti mbeni ngasa ti lungula siokpari ti akete mara 12 ti Israël so ayeke ti aprêtre pepe. (Lévitique 16:5-15) Tongana nyen salango ye so andu temple ti Nzapa ti yingo?

8. (a) Na lege wa a mu Jésus na sadaka, a to nda ni na ngu 29 N.E.? (b) Songo wa so ayeke nde mingi Jésus ayeke na ni na Jéhovah na yâ kusala ti lo kue na ndo sese?

⁸ Biani, a mu Jésus tongana sadaka na ndo balaga ti ye so bê ti Nzapa aye na ngoi so lo kamata batême na a sa yingo ti nzoni-kue ti Nzapa na ndo lo na ngu 29 N.E. (Luc 3:21, 22) Biani, ye so aduti teti Jésus fä ti tongo nda ti mbeni tambela ti fini so amu ni tongana sadaka, so aninga angu ota na ndambo. (aHébreu 10:5-10) Na ngoi ni, Jésus awara mbeni songo tongana molenge ti Nzapa so aga na lege ti yingo. Ambeni zo ti mitele alingbi pepe ti gbu nda ni kue ti dutingo so ayeke nde, so Jésus ayeke na ni na Babâ ti lo ti yayu. A yeke tongana mo ba mo tene mbeni voile akanga lê ti ala ti gbungo nda ti ye, legeoko tongana ti so voile akanga Ndo ti Nzoni-Kue na lê ti azo so ayeke na sedu ti tabernacle ni.​—Exode 40:28.

9. Ngbanga ti nyen Jésus alingbi la ni pepe ti lï na yayu tongana zo ti mitele, na a leke kpale so tongana nyen?

⁹ Atä so lo yeke Molenge ti Nzapa so asa yingo na ndo ti lo, Jésus na tele ti zo alingbi la ni pepe ti wara fini na yayu. Ngbanga ti nyen? Ngbanga ti so mitele na mênë alingbi pepe ti ga héritier ti Royaume ti Nzapa ti yayu. (1 aCorinthien 15:44, 50) Teti so mitele ti Jésus ayeke mbeni ye so akanga lege, kota lê ti bongo so akangbi Ndo ti Nzoni-Kue na Ndo ti Nzoni Ahon Kue na yâ temple ti Nzapa ti giriri aduti biani fä ni. (aHébreu 10:20) Me lango ota na peko ti kuâ ti lo, Nzapa ayä Jésus na popo ti awakinda tongana mbeni yingo. (1 Pierre 3:18) Tongaso, lo lingbi ti lï na Ndo ti Nzoni Ahon Kue ti temple ti Nzapa ti yingo, yayu mveni. Na a yeke ye so asi biani la ni. Paul asû na mbeti: “Christ alï pepe na Ndo ti Nzoni-kue [biani na salango tene ti Ndo ti Nzoni Ahon Kue] so maboko ti zo asala, so akpa tâ ye ni mveni; me Lo lï na yayu mveni ti si na gbele Nzapa fadeso teti e.”​—aHébreu 9:24.

10. Jésus asala nyen na peko ti so lo kiri na yayu?

¹⁰ Na yayu Jésus ‘aki mênë’ ti sadaka ti lo na fango na Jéhovah ngele ti fini ti lo so asö zo. Me, Jésus asala ye mingi ahon so. Ngoi kete kozoni na kui ti lo, lo tene la ni na adisciple ti lo: “Mbi gue ti leke ndo na i. Na tongana Mbi gue na Mbi leke ndo na i, fade Mbi kiri na fade Mbi kamata i ti duti na tele ti Mbi, si na ndo so Mbi yeke dä, i lingbi duti kâ nga.” (Jean 14:2, 3) Tongaso, na lindango na Ndo ti Nzoni Ahon Kue, wala yayu, Jésus azi lege na ambeni zo nde ti mu peko ti lo. (aHébreu 6:19, 20) Azo so, wungo ti ala ayeke duti ande 144 000, ayeke sala kusala tongana agbenyon-prêtre na yâ lekengo ye ti temple ti Nzapa ti yingo. (Apocalypse 7:4; 14:1; 20:6) Legeoko tongana ti so kota prêtre ti Israël alï kozoni na mênë ti koli-bagara na yâ Ndo ti Nzoni Ahon Kue ti lungula asiokpari ti aprêtre, ngele ti mênë so Jésus asa asala kusala kozoni teti agbenyon-prêtre 144 000 so.b

“Aye ti Pendere” ti Laso

11. Kota prêtre ti Israël ayeke mu sadaka ti mbeni ngasa teti azo wa, na ye so aduti gbede ti nyen?

¹¹ A lingbi ti tene so a si na ngu 1935, kota bungbingo ala so asa yingo na ndo ti ala ahunzi awe.c Me Jéhovah ade ti hunzi pepe ti mu gloire na da ti lo. Biani, “aye ti pendere” ayeke ngbâ ti lï na yâ ni. Dabe mo so kota prêtre na Israël amu anyama use: mbeni koli-bagara teti asiokpari ti aprêtre na mbeni ngasa teti asiokpari ti akete mara so ayeke ti aprêtre pepe. Teti aprêtre aduti fä ti ala so asa yingo na ndo ti ala, so ayeke duti na Jésus na yâ Royaume ti yayu, akete mara so ayeke ti aprêtre pepe aduti fä ti zo wa? A wara kiringo tene ni na yâ atene ti Jésus na Jean 10:16: “Mbi yeke na ambeni ngasangbaga nga, so ayeke ti yangbo so pepe. A yeke ngbanga ti Mbi ti ga na ala nga, na fade ala mä yanga ti Mbi; fade kundu ayeke oko, na Berger ayeke oko.” Ni la, mênë ti Jésus so asa aga na nzoni teti abungbi use ti azo: kozoni teti aChrétien so beku ti ala ayeke ti komande na Jésus na yayu, nga use ni, ala so ayeke na beku ti fini ti lakue lakue na ndo mbeni sese ti paradis. Biani, a yeke bungbi use ni so si “aye ti pendere” ti prophétie ti Haggaï aduti fä ni.​—Michée 4:1, 2; 1 Jean 2:1, 2.

12. Tongana nyen a yeke gboto “aye ti pendere” mingi na mbage ti da ti Nzapa laso?

¹² “Aye ti pendere” so angbâ ti si yâ ti da ti Jéhovah. Na yâ angu so ahon ade ti ninga pepe, a zi aye so akanga lege na kusala ni na Poto ti Tö, na ambeni mbage ti Afrika, nga na ambeni kodoro nde. Salango tongaso amu lege si nzo tene ti Royaume ti Nzapa, so aleke ni awe, amaï na yâ ando ti fango tene so kozoni ade ti ndu ni pepe. Na ngoi so aye ti pendere ayeke lï na yâ lekengo ye ti temple ti Nzapa, ala nga asala ngangu ti sala adisciple mingi, na yengo dä na komandema ti Jésus. (Matthieu 28:19, 20) Tongana ala yeke sala tongaso, ala wara azo mingi, apendere nga na akangba, so alingbi ande ti ga “aye ti pendere” so fade ayeke mu gloire na da ti Jéhovah. Ba gi ambeni kete tapande ti lege so ye so ayeke si.

13. Tongana nyen mbeni kete molenge-wali na Bolivie afa na gigi wâ ti lo ti kangbi tene ti Royaume?

¹³ Na Bolivie, mbeni molenge-wali ti ngu oku so ababâ na mama ti lo ayeke aTémoin, ahunda na wali so ayeke fa mbeti na lo ti zia lege na lo ti ga na ekole pepe na ngoi ti yenga ti vizite ti surveillant ti circonscription. Ngbanga ti nyen? Lo ye ti mu mbage na yâ fango tene na yenga ni kue ti kusala so ayeke nde. Ye so adö bê ti ababâ na mama ti lo, me ala yeke na ngia so lo yeke na mbeni pendere bango ndo tongaso. Kete molenge-wali so ayeke manda fadeso Bible na azo oku na da ti ala, na ambeni ti awamandango mbeti ni ayeke ga na abungbi ti aChrétien. Lo ga même na wafango mbeti na lo na Da ti Royaume. Peut-être mbeni lâ, ambeni zo so lo yeke manda Bible na ala ayeke fa tele ti ala ande tongana “aye ti pendere” so ayeke mu gloire na da ti Jéhovah.

14. Na Corée, tongana nyen a futa gbungo ngangu ti mbeni ita-wali na mbage ti mbeni zo so aba atene lo sala nzala ti tene ni pepe?

¹⁴ Na ngoi so lo yeke na ndo ti kungo train, mbeni wali so ayeke Chrétien na Corée aga ndulu na mbeni wamandango mbeti so ayeke mä mozoko na ndo ti walkman. Ita-wali ni ahunda: “Mo yeke na mbeni lege ti vorongo?” Wamandango mbeti ni akiri tene: “Mbi sala nzala ti lege ti vorongo oko pepe.” Bê ti ita-wali ni anze pepe. Lo ngbâ ti tene: “Tongana ngoi ayeke hon, peut-être mbeni zo ayeke ye ande ti soro lege ti vorongo oko. Me tongana lo hinga tene oko pepe na ndo lege ti vorongo, lo lingbi ti soro mbeni so ayeke sioni.” Lê ti wamandango mbeti ni agbian, na lo to nda ti dengi mê na ita ti e ti wali. Lo mu na lo buku Y a-t-il un Créateur qui se soucie de vous? na lo tene fade mbeti so ayeke mu maboko na lo mingi tongana ngoi ti lo ti soro mbeni lege ti vorongo aga. Lo yeda fade fade na buku ni. Na yenga so aga na pekoni, lo to nda ti manda Bible na aTémoin ti Jéhovah, na fadeso lo yeke ga na abungbi kue ti kongrégation.

15. Tongana nyen mbeni maseka wali na Japon ato nda ti amandango Bible, na tongana nyen a futa angangu so lo sala?

¹⁵ Na Japon, Mégoumi, mbeni molenge-wali ti ngu 12, aba da-mbeti ti lo tongana mbeni yaka so alë lengo teti fango tene na fango ye. Lo wara même lege ti to nda ti amandango Bible mingi. Mégoumi ayeke sala ni tongana nyen? Teti so lo yeke diko Bible wala lo leke abungbi ti lo na ngoi ti hungo tele, fani mingi akamarade ti lo ti ekole ayeke hunda na lo ye so lo yeke sala. Ambeni ahunda Mégoumi ngbanga ti nyen lo yeke mu mbage pepe na ambeni kusala ti ekole. Mégoumi ayeke kiri tene na ahundango tene ti ala, na lo tene na ala so Nzapa ayeke na mbeni iri. Ye so fani mingi ayeke zingo nzala ti ala so amä lo. Na pekoni lo yeke hunda na ala ti manda Bible. Fadeso Mégoumi ayeke manda Bible na azo 20, so na popo ni 18 ayeke akamarade ti lo ti ekole.

16. Tongana nyen mbeni ita-koli na Cameroun alingbi la ni ti to nda ti manda Bible na ambeni zo na popo ti ala so ayeke he lo?

¹⁶ Na Cameroun, mbeni kete bungbi ti akoli miombe so ayeke sala kusala na mbeni chantier ahiri mbeni ita-koli so ayeke fa ambeti na azo so ayeke hon na lege. Teti ala ye ti he ita ni, ala hunda na lo ngbanga ti nyen lo mä na bê pepe na Nzapa ti li ota, enfer ti wâ, wala âme so ayeke kui pepe. Na salango kusala na Bible, ita ti e akiri tene na ahundango tene ti ala. Tongana ye ti pekoni, ota na popo ti akoli ni ayeda ti manda Bible. Mbeni oko ti ala, Daniel, ato nda ti gue na bungbi na même lo fâ yâ ti aye ti ayingo sioni ti lo kue. (Apocalypse 21:8 ) Kozoni si ngu oko alingbi, lo wara batême.

17. Tongana nyen ambeni ita na Salvador asala kusala na ndara ti ga ndulu na mbeni koli so kozoni aye pepe ti mä tene ti Royaume?

¹⁷ Na Salvador, mbeni koli ayeke kanga sioni mbo ti lo na yanga ti da na ngoi kue so lo ba aTémoin ti Jéhovah ayeke ga. Koli ni ayeke ku ti tene aTémoin ahon awe si lo kiri na mbo ni na yâ ti da. Aita awara lege lâ oko pepe ti sala tene na koli ni. Tongaso, mbeni lâ ala yeda ti tara mbeni kode nde. Teti ala hinga so koli ni alingbi ti mä ala, ala tene fade ala fa tene na mbo ni. Ala ga na da ni, ala bala mbo ni, na ala tene na lo so ala yeke na ngia mingi ti wara lege ti sala tene na lo. Ala sala tene ti ngoi so paradis ayeke duti ande na ndo sese, ngoi so zo oko ayeke sala ande ngonzo mbeni pepe, na biani, même anyama ayeke duti na siriri. Na pekoni ala bala mbo ni nzoni na ala to nda ti hon. Na dongo bê, ala ba koli ni asigigi na da ni na lo gbu gere ti ala teti so lo mu na aTémoin lege lâ oko pepe ti sala tene na lo. Lo mu apériodique, na lo to nda ti manda Bible. Laso, koli so ayeke ita ti e, mbeni oko ti “aye ti pendere”!

“Duti na Mbito Pepe”

18. Akpale wa aChrétien mingi ayeke na ni, me Jéhovah aba awavorongo lo tongana nyen?

¹⁸ Mo yeke mu mbage na yâ kota kusala ti fango tene ti Royaume nga ti salango adisciple? Tongana a yeke tongaso, mo wara tâ kota matabisi. Biani, a yeke na lege ti kusala so si Jéhovah ayeke gboto “aye ti pendere” na yâ da ti lo. (Jean 6:44) Tâ tene, na mbeni ngoi mo lingbi ti woko kete wala bê ti mo anze. Ngoi na ngoi, ambeni zo, même na popo ti awakua be-ta-zo ti Jéhovah, ayeke tiri na bibe ti bango tele tongana ye senge. Me kanga bê! Jéhovah aba awavorongo lo oko oko tongana ye ti pendere, na lo bi bê mingi na salut ti mo.​—2 Pierre 3:9.

19. Tene wa ti kpengba zo Jéhovah amu na lege ti Haggaï, na tongana nyen atene so alingbi ti mu ngangu na e?

¹⁹ Tongana bê ti e anze, atä a yeke ndali ti kangango lege wala ambeni ye nde so anzere pepe, atene ti Jéhovah na aJuif so akiri na kodoro ti ala alingbi ti mu ngangu. Na Haggaï 2:4-6 (NW), e diko: “Jéhovah atene, ‘Me fadeso, duti na ngangu, O Zorobabel, na duti na ngangu, O Josué molenge ti Jéhozadac, kota prêtre ni. Na duti na ngangu, i azo kue ti kodoro ni,’ so ayeke tene ti Jéhovah, ‘na i sala kua. Teti mbi yeke na i,’ so ayeke tene ti Jéhovah ti aturugu. ‘I dabe i na ye so mbi mä tele dä na i tongana i sigigi na Égypte, na tongana yingo ti mbi aluti na popo ti i. I duti na mbito pepe.’ Teti ba ye so Jéhovah ti aturugu atene, ‘Ti mbeni​—a ngbâ kete​—na mbi yeke yengi ayayu na sese, na kota ngu-ingo, nga na kuru sese.’” Ba so Jéhovah awa e pepe gi ti duti na mbito pepe me nga lo mu na e lege ti wara ngangu. Tongana nyen? Ba atene ti dengo bê so: “Mbi yeke na i.” So ye ti kpengba mabe ti hinga so atä akpale wa e wara, Jéhovah ayeke na e!​—aRomain 8:31.

20. Na lege wa gloire so ade ti si kozoni pepe ayeke si yâ ti da ti Jéhovah?

²⁰ Jéhovah afa giriri biani so lo yeke na azo ti lo. Tâ tene, a yeke gi tongana ti so lo tene na lege ti prophète Haggaï: “Fade gloire ti nda ni ti da so ahon kozo gloire ni . . . Na fade Mbi mu siriri na ndo ni so.” (Aggée 2:9) Tâ tene, a yeke wara gloire ti kota ahon kue laso na yâ temple ti Jéhovah ti yingo. Ni la, na ngu oko oko azo saki ngbangbo mingi ayeke ga na tâ vorongo. A yeke mu kobe ti yingo nzoni na ala, na même na yâ sese so wuluwulu ayeke dä, ala yeke na siriri so gi siriri na yâ fini sese ti Nzapa si ayeke hon ni.​—Esaïe 9:5, 6 (9:6, 7, NW); Luc 12:42.

21. A lingbi e leke ye wa na bê ti e?

²¹ Yengingo amara so Jéhovah ayeke sala na Har-Maguédôn aga ndulu mingi. (Apocalypse 16:14, 16) Tongaso, zia e mu ngoi so angbâ ti mu maboko ti sö fini ti azo mingi ahon. Zia e duti na ngangu na e zia bê kue na Jéhovah. Zia e leke na bê ti e ti ngbâ ti voro na kota temple ti lo ti yingo, na ti sala si yâ ni angbâ ti si na “aye ti pendere” mingi ahon juska Jéhovah atene kusala ti e ahunzi awe.

[Akete Tene na Gbe Ni]

Mo Dabe Mo?

• Na lê ti Jéhovah ye wa ayeke na ngele ngangu mingi ahon aye ti mitele?

• Mênë ti Jésus so asa aga na nzoni na abungbi use wa ti azo?

• “Aye ti pendere” so ayeke si yâ ti da ti Jéhovah na gloire ayeke azo wa?

• Ye wa afa na e polele so prophétie ti Haggaï ayeke ga tâ tene laso?

[Diagram na lembeti 10]

(Ti ba tene ni mbilimbili, ba buku ni)

Mo hinga ye so ngbele temple ti Jéhovah aduti fä ni?

Kota lê ti bongo

Ndo ti Nzoni-Kue

Balaga

Ndo ti Nzoni Ahon Kue

Yanga ti da

Sedu

[Foto na lembeti 9]

Kota prêtre amu mbeni koli-bagara teti siokpari ti azo ti Lévi nga mbeni ngasa teti siokpari ti akete mara ti Israël so ayeke ti aprêtre pepe

[Foto na lembeti 12]

Kusala ti fango tene ti Royaume na ndo sese kue ayeke gboto azo mingi mingi na da ti Jéhovah