Tongana nyen e lingbi ti ku ti tene Nzapa asala ye?

NA SIÈCLE miombe kozoni na ngoi ti e, Ezéchias, Gbia ti Juda so ayeke na ngu 39 amä so lo yeke na mbeni ngangu kobela so gi kuâ la alingbi ti ga na pekoni. Teti so sango so lo mä aga na lo kota vundu, Ezéchias atoto na Nzapa ti sava lo. Nzapa akiri tënë na sambela ti lo na lege ti prophète ti lo: “Mbi mä sambela ti mo, Mbi bâ ngule ti mo, bâ, fade Mbi zia na ndo fini ti mo mbeni ngu bale-oko na ndo ni oku.”​—Esaïe 38:1-5.

Ngbanga ti nyen Nzapa aga ti sala ye na yâ mbilimbili ngoi so? Asiècle mingi kozoni, Nzapa amû zendo na David Gbia ti mbilimbili: “Fade azo ti da ti mo na royaume ti mo aga nzoni lakue, fade trône ti mo angbâ lakue.” Nzapa afa nga so a yeke dü ande Messie na yâ hale ti David (2 Samuel 7:16; Psaume 89:21, 27-30; Esaïe 11:1). Na ngoi so Ezéchias atï kobela, a de lo wara mbeni molenge ti koli pëpe. Tongaso, ahale ti gbia David alingbi fade ti ngbâ gi ge. Na yâ ye so asi na Ezéchias, Nzapa asala ye mbilimbili ti bata molongo so ayeke gue juska na Messie.

Ti sala si zendo ti lo aga tâ tënë, Jéhovah abâ lani so a lingbi lo sala ye teti awakua ti lo fani mingi na yâ ngoi so aga kozo na aChrétien. Na ndo zingo amolenge ti Israël na ngbâa na Egypte, Moïse atene: “Teti L’Eternel andoye i, na teti Lo ye ti bata tënë ti bä so lo dë na akotara ti i, tongaso L’Eternel asala si i sigigi na lege ti tïtî Lo ti ngangu.”​—Deuteronome 7:8.

Na kozo siècle, legeoko nga Nzapa abi tele ti lo na yâ tënë ti azo ti sala ye so lo leke na bê ti lo ti sala. Na tapande, na lege ti Damas, mbeni Juif so iri ti lo ayeke Saul abâ Jésus na lege ti ye ti kpene. A yeke ti kanga lege na lo ti sala sioni na adisciple ti Christ. Gbiango salango ye ti koli so, so lo ga bazengele Paul, asala kota ye mingi na yâ kusala ti fango nzo tënë na popo ti amara.​—Kusala 9:1-16; aRomain 11:13.

Nzapa ayeke bi tele ti lo na yâ ti aye kue?

Nzapa ayeke bi ândö tele ti lo na yâ ti aye kue wala gi ngoi na ngoi? Mbeti ti Nzapa afa polele so lo yeke bi tele ti lo lakue lakue pëpe na yâ ti atënë. Atâa so Nzapa azi ândö amaseka Hebreu ota na yâ four ti wâ nga prophète Daniel na yâ dû ti abamara, lo sala kusala ti sö ambeni prophète na yâ kuâ pëpe (2 Chronique 24:20, 21; Daniel 3:21-27; 6:16-22; aHébreu 11:37). A zi ândö Pierre na lege ti ye ti kpene na da ti kanga, ndo so Hérode Agrippa I abi lo dä. Ye oko, oko gbia so ahunda si a fâ bazengele Jacques, na Nzapa asala ye pëpe ti kanga lege na ni (Kusala 12:1-11). Atâa so Nzapa amû na abazengele ngangu ti kaï kobela na même ti zingo akuâ, lo yeda lani pëpe ti zi “kî na tele” ti Paul so alingbi peut-être ti duti mbeni kobela so asala sana na lo.​—2 aCorinthien 12:7-9; Kusala 9:32-41; 1 aCorinthien 12:28.

Nzapa asala ândö ye pëpe ti kanga lege na aye ti sioni so Togbia ti Rome Néron asala na mbage ti adisciple ti Jésus. A sala sana na aChrétien, a gbi ala na wâ na fini lê ti ala, na a bi ala na asioni nyama ti ngonda. Ye oko, ye so adö bê ti akozo Chrétien pëpe, na asala pëpe si ala dë kite so Nzapa ayeke dä. Teti biani, Jésus atene kozo na adisciple ti lo so a yeke gue ande na ala na gbele ngbanga na a yeke nzoni ala duti ndulu ti hu pono na même ti kui ndali ti mabe ti ala.​—Matthieu 10:17-22.

Legeoko tongana ti so lo sala giriri, laso, Nzapa ayeke biani na ngangu ti zi awakua ti lo na yâ akpale, nga a lingbi a kasa pëpe ala so abâ so Nzapa abata ala na yâ ambeni kpale. Ye oko, a yeke ngangu ti tene biani wala Nzapa abi tele ti lo lani wala pëpe na yâ mara ti aye tongaso. Awakua be-ta-zo ti Jéhovah mingi awara lani akä na yâ sungbango ti mbeni da ti lekengo asioni yorö na Toulouse, nga aChrétien be-ta-zo saki mingi awara kuâ ândö na yâ akando ti aNazi nga na ti aCommuniste, wala na yâ aye ti ngangu sân ti tene Nzapa asala mbeni ye ti kanga lege na ni. Ngbanga ti nyen Nzapa ayeke sala ye lakue lakue pëpe teti ala so lo yeda na ala?​—Daniel 3:17, 18.

“Ngoi na ye so zo aku pëpe asi na ala kue”

Tongana mbeni ye ti ngangu asi, a lingbi ti ndu zo kue, na a lingbi ti si na azo kue atâa na ala so aduti be-biani. Na ngoi ti sungbango ti mbeni ndo ti lekengo asioni yorö na Toulouse so Alain na Liliane asö kuâ dä, azo 30 awara kuâ nga ambeni ngbangbo mingi awara kota kä atâa so ala sala mbeni ye ti sioni pëpe. Na ando mingi, azo saki mingi mingi abâ pasi teti kengo ndia, teti azo so akpe na kutukutu kirikiri, wala teti bira, na a lingbi a bâ Nzapa tongana zo so ayeke na gunda ti akpale ti ala pëpe. Bible adabe ti e so “ngoi na ye so zo aku pëpe asi” na e oko oko kue.​—Zo-ti-fa-tene 9:11, NW.

Na ndo ni, azo ayeke tï kobela, ayeke ga mbakoro na ayeke kui. Même ambeni so abâ so Nzapa asö lani fini ti ala na lege ti kpene wala asala si kobela ti ala hunzi, na nda ni ala tingbi na kuâ lê na lê. Zingo kobela na kui nga na ‘ngule kue’ na lê ti azo ayeke ande na yâ ngoi so ayeke ga.​—Apocalypse 21:1-4.

Ti tene ye ni asi, a hunda ti sala mbeni ye so ayeke kota, so alingbi kue, ahon ti sala gi mbeni ye ngoi na ngoi. Bible asala tënë ti mbeni ye so a hiri ni “Kota lâ ti L’Eternel”. (Sophonie 1:14). Na ngoi ti kota salango ye so, fade Nzapa ayeke lungula sioye kue. Fade a yeke mû ande lege na azo ti wara fini ti lakue lakue na yâ dutingo so ayeke mbilimbili-kue, so na yâ ni “fade azo adabe ala na kozo ye pëpe, na ala bi bê ti ala dä mbeni pëpe.” (Esaïe 65:17). Fade a yeke zingo même akuâ, na lege so a yeke gbian biani kota ye ti ziango vundu na bê ti azo kue (Jean 5:28, 29). Fade Nzapa, na yâ kota ndoye nga na nzobe ti lo, ayeke kaï na ngoi ni so akpale ti azo biaku biaku.

Lege so Nzapa ayeke sala na ye laso

Ye oko, a ye ti tene pëpe so ti ku na ngoi ni so, Nzapa ayeke duti gi tongaso na ngoi so azo ayeke dema. Laso, Nzapa amû na azo kue, atâa mara ti ala wala ndo so ala londo dä, lege ti ga ti hinga lo na ti maï songo na lo mveni (1 Timothée 2:3, 4). Jésus afa peko ti ye so na yâ atënë so: “Zo oko alingbi ga na Mbi pëpe, gi tongana Babâ so ato Mbi ahiri lo.” (Jean 6:44). Nzapa ayeke gboto na tele ti lo azo ti bê ti mbilimbili na lege ti tokua ti Royaume so awakua ti lo ayeke fa ni na ndo sese mobimba.

Na ndo ni, Nzapa ayeke sala kusala na yâ fini ti ala so ayeke na nzara ti tene lo fa lege na ala. Na lege ti yingo vulu ti lo, Nzapa ‘azi bê ti ala’ ti gbu nda ti ye so lo ye na ti sala ye so lo hunda (Kusala 16:14). Biani, na mungo lege na azo ti ga ti hinga lo, ti hinga Tënë ti lo nga na ye so lo leke ti sala, Nzapa afa na gigi so lo yeke bi bê, na lege ti ndoye, na ndo e oko oko kue.​—Jean 17:3.

Na nda ni, Nzapa ayeke mû maboko na awakua ti lo laso, pëpe na zingo ala na lege ti kpene, me na mungo na ala yingo vulu ti lo nga “ngangu [so] alondo na Nzapa” ti hon ndo ti aye kue so alingbi ti si na ala (2 aCorinthien 4:7). Bazengele Paul asû ândö na mbeti: “Mbi lingbi sala ye kue na yâ Lo [Jéhovah Nzapa] so asala si mbi wara ngangu.”​—aPhilippien 4:13.

Tongaso, e yeke na nda ti tënë kue ti kiri singila na Nzapa lâ oko oko ndali ti fini so lo mû na e nga na beku ti dutingo na fini ti lakue lakue na yâ mbeni sese so bango pasi kue ayeke hunzi. Wasungo psaume ahunda tënë: “Fade mbi mû nyen na L’Eternel teti ye kue ti nzoni so Lo sala na mbi? Fade mbi kamata kopo ti salut, na mbi di iri ti L’Eternel.” (Psaume 116:12, 13). Ti diko périodique so lakue ayeke mû ande maboko na mo ti gbu nda ti ye so Nzapa asala ândö, so lo yeke sala fadeso nga so lo yeke sala ande so alingbi ti ga na mo ngia fadeso na kpengba beku teti kekereke.​—1 Timothée 4:8.

[Kete tënë na lembeti 6]

“Fade azo adabe ala na kozo ye pëpe, na ala bi bê ti ala dä mbeni pëpe.”​—Esaïe 65:17

[Afoto na lembeti 5]

Giriri, Jéhovah akanga lege pëpe na bongo Zacharie na tênë juska na kuâ . . .

wala na Hérode ti fâ gbâ ti azo senge senge

[Foto na lembeti 7]

Ngoi aga ndulu awe ti tene pasi ahunzi; même akuâ ayeke kiri ti duti ande na fini