Tondo ti awafango tënë ti Royaume

“So fini ye la!”

DOROTA, mbeni wakua ti ngoi kue ti aTémoin ti Jéhovah ti Pologne ague ti zia molenge ti lo ti koli ti ngu 14 na mbeni hôpital so ayeke bâ lege ti awamandango mbeti. Na ngoi so lo yeke bâ molenge ni, docteur ni so iri ti lo ayeke Janinaa ahunda na Dorota kua wa molenge ti lo ayeke sala na kodoro.

Dorota atene: “Tongana mbi lingbi ti sala ni pëpe, molenge ti mbi ti koli ayeke to kobe teti e omene kue na yâ ti da ni. Lo yeke bale nga yâ ti da na lo yeke mû maboko ti leke aye na tele ti da. Lo ye ti diko mbeti mingi. Lo yeke mbeni nzoni élève.”

Janina atene: “A yeke tâ ye ti dongo bê. A sala angu 12 awe so mbi yeke sala kua ge, mbi de mbi mä mara ti tënë tongaso lâ oko pëpe.”

Na bango so mbeni lege ti fango tënë azi na lo, Dorota atene: “Laso, ababâ na mama ayeke fa tâ nzoni lege na amolenge ti ala pëpe. Ni la si, fani mingi, amolenge ti ala ayeke ne tele ti ala mingi pëpe.”

Janina ahunda na Dorota: “Mo hinga aye so kue tongana nyen? Mingi ti ababâ na mama ahinga ye na ndo tënë so pëpe.”

Dorota akiri tënë: “Bible ayeke mbeni pendere lingu ti mara ti atënë tongaso. Na tapande Deuteronome 6:6-9 atene , ti fa lege na amolenge ti e, a yeke nzoni e to nda ti fa lege na e mveni. E lingbi kozoni pëpe ti yôro yeke yeke na yâ bê nga na bibe ti e mveni aye so e ye ti fa na amolenge ti e?”

Janina atene: “A yeke tâ ye ti dongo bê! A yeke tâ ye ti dongo bê! Na pekoni lo hunda na Dorota tongana nyen Bible ayeke mû maboko na lo ti bata na ti fa ye na amolenge ti lo.

Dorota atene: “Yenga oko oko, e yeke manda Bible na amolenge ti e. E yeke sala kusala na buku Les jeunes s’interrogent​—Réponses pratiques.”b Na pekoni, lo fa buku ni na lo sala tënë ti ambeni li ti tënë so ayeke na yâ ni.

Janina atene na kongo: “So fini ye la! Mbi lingbi ti bâ buku ni?”

Ngbonga oko na pekoni, Dorota aga na buku ni.

Tongana lo yeke bâ buku ni, Janina ahunda na Dorota: “Mo sala Nzapa ti nyen?”

“Mbi yeke Témoin ti Jéhovah.”

“Tongana nyen aTémoin ti Jéhovah ayeke sala ye na mbage ti azo ti mbeni Nzapa nde?”

Dorota akiri tënë: “Gi tongana ti so mbi yeke sala na mo, na nengo mo. Biani, e ye si ala ga ti hinga tâ tënë ti Bible.”

Janina atene polele: “Tele ti mbi anzere mingi ahon ti kozo.”

Na nda ti lisoro ni, Dorota awa mingi Janina ti diko Bible. “A yeke sala si mo hinga ande ye so mo yeke sala na yâ fini ti mo nga a yeke mû maboko na mo na yâ kusala ti mo.”

Janina ayeda: “Mo wa mbi awe biani ti sala tongaso.”

Na lege ti kode nga na lekengo na bê kue, Dorota asala si guengo ti bâ docteur aga mbeni pendere lege ti fa na nzo tënë.​—1 Pierre 3:15.

[Akete tënë na gbe ni]