Ababâ na mama, i bata sewa ti i nzoni

“Tongana mbeni zo abata azo ti lo pëpe, . . . lo bele tënë ti mabe awe.”​—1 TIMOTHÉE 5:8.

KOZO ti tene bungbi akomanse, tongana mo bi lê ti mo ti bâ azo ti kongregation, mo lingbi ti bâ amolenge so a sukula ala nzoni, ala yü bongo pendere na ala duti na tele ti ababâ na mama ti ala. A nzere mingi ti bâ ndoye so ayeke na yâ ti asewa tongaso: ndoye na mbage ti Jéhovah nga na popo ti ala. Ye oko, a yeke ngangu pëpe ti girisa aye kue so mbeni sewa asala ti ga na abungbi na l’heure.

² Fani mingi, na yâ ti lango ni kue ababâ na mama ayeke sala kua mingi, nga na alango so bungbi ayeke dä sewa ni ayeke tâ na aye mingi ti sala. A hunda ti tö ye, ti sala akua ti yâ ti da nga ti hunzi adevoir ti ekole so a hunda ti sala ni na yanga-da. Ababâ na mama ayeke yô kungba so ane mingi: ala yeke bâ si zo kue aleke tele ti lo, ate ye nga ayeke ndulu ti gue na bungbi na ngbonga ni. Me, teti so ala yeke na amolenge, mbeni ye so ala ku tele ti ala na ni oko pëpe ayeke si gi tongaso. Yaya ni asuru bongo ti lo na ngoi so lo yeke sala ngia. Ngambe ni atuku kobe ti lo. Amolenge ni ato nda ti papa (aProverbe 22:15). Ye nyen ayeke si na pekoni? Même yâ ti aprogramme so ababâ na mama aleke ni nzoni awe alingbi ti buba. Atâa so kue, sewa ni ayeke lakue ndulu ti si na Da ti Royaume kozoni si bungbi ato nda ni. A yeke tâ ye ti mungo ngia na zo ti bâ ala yenga na yenga, ngu na ngu na ngoi so amolenge ni ayeke kono ti sala na Jéhovah!

³ Atâa so ngoi na ngoi kua ti mo ti babâ wala mama ayeke ngangu, même a sala si mo woko kue, bê ti mo alingbi ti dë so Jéhovah ayeke bâ tâ na nene ni mingi angangu so mo yeke sala. Jéhovah la ayeke Walekengo sewa. Ni la, Tënë ti lo afa so asewa kue “awara iri ti ala”, wala abâ gigi, na lege ti Lo (aEphésien 3:14, 15). Tongaso, tongana i ababâ na mama, i yeke sala ngangu ti yô akungba ti i ti sewa tâ na lege ni, i yeke mû gonda na Kota Gbia ti Dunia Kue (1 aCorinthien 10:31). Ye so ayeke tâ mbeni kota matabisi! Tongaso, a yeke na lege ni ti tene e sala tënë na ndo kungba so Jéhovah amû na ababâ na mama. Na yâ article so, e yeke gbu li ande na ndo kungba ni so andu tënë ti batango sewa ni. Zia e bâ alege ota so na yâ ni Nzapa ahunda na ababâ na mama ti bata sewa ti ala.

Batango ala na lege ti mitele

⁴ Bazengele Paul asû na mbeti: “Tongana mbeni zo abata azo ti lo pëpe, na a hon so, tongana lo bata azo ti da ti lo mveni pëpe, lo bele tënë ti mabe awe, na sioni ti lo ahon sioni ti zo so amä na bê pëpe.” (1 Timothée 5:8). Ge, zo wa la Paul ayeke pensé na lo tongana lo tene “mbeni zo”? A yeke mokonzi ti sewa ni, so mingi ni a yeke babâ ni. Nzapa amû nga na wali mbeni kua so ane: kua ti mungo maboko na koli ti lo (Genèse 2:18). Na angoi so a sû Bible, fani mingi awali ayeke mû lani maboko na akoli ti ala ti bata sewa ni (aProverbe 31:13, 14, 16). Laso, asewa so gi babâ wala mama ni lo oko si ayeke bata amolenge amû ndo kue.a Mingi ti ababâ na mama Chrétien so ayeke gi ala oko ayeke sala nzoni mingi ti bata azo ti da ti ala. Ti tâ tënë ni, a yeke nzoni ti tene na yâ ti sewa babâ na mama, ala use kue, ayeke dä; na a yeke babâ si amû li ni.

⁵ Na 1 Timothée 5:8, Paul ayeke sala tënë ti batango sewa ni tongana nyen? Atënë so angoro ni afa so lo yeke sala tënë mbilimbili na ndo aye ti mitele so sewa ni ayeke na bezoin ni. Laso, na yâ ngangu so lo yeke sala ti mû aye ti mitele na azo ti da ti lo, mbeni mokonzi ti sewa ayeke tingbi na akpale mingi. Akpale ti nginza nga na akpale tongana ziango azo ti kua na sese, warango kua so aga ngangu nga na ngele ti aye so ague na li ni amû ndo kue. Ye nyen alingbi ti mû maboko na babâ wala mama ti kanga bê ti lo tongana lo tingbi na mara ti akpale so?

⁶ A lingbi zo so ayeke bata mbeni sewa adabe ti lo so lo yeke yô mbeni kungba so alondo na Jéhovah. Tënë ti Paul so lo sû na gbe ti yingo vulu afa so koli so lo lingbi ti bata komandema so, me lo ke ti sala ni, lo yeke tongana mbeni zo so ‘abele mabe awe’. A lingbi mbeni Chrétien asala kue ti kpe ti ga mara ti zo tongaso na gbele Nzapa ti lo. Ye oko, mawa ni ayeke so na yâ sese ti laso mingi ti azo ayeke “azo so andoye asongo ti ala pëpe”. (2 Timothée 3:1, 3). Biani, ababâ mingi ayeke kpe kungba ti ala na ala dö sewa ti ala azia gi tongaso. A lingbi akoli Chrétien awara mara ti sioni bê so pëpe, nga ala bâ pëpe tongana senge ye batango azo ti ala. Nde na mingi ti amba ti ala ti place ti kua, aChrétien so ayeke ababâ ti sewa ayeke bâ tâ na nene ni akua ti mitele so ayeke tongana asenge kua, nga ala yeke bâ ni tongana mbeni lege ti nzere na lê ti Jéhovah Nzapa, teti so akua tongaso ayeke mû lege na ala ti bata azo ti ala.

⁷ Amokonzi ti sewa alingbi nga ti wara mungo maboko na gbungo li na ndo tapande ti Jésus so ayeke mbilimbili-kue. E dabe ti e so mbeni prophétie ti Bible ahiri Jésus “Babâ Ti Lakue Lakue”. (Esaïe 9:5, 6). Teti lo yeke “Adam Ti Nda Ni”, Jésus amû biani place ti “Adam, zo ti kozoni” na lege so lo yeke tongana babâ ti azo so afa na gigi mabe (1 aCorinthien 15:45). Nde na Adam, so lo ga babâ ti kion, Jésus ayeke tâ nzoni babâ. Na ndo lo, Bible atene: “Na lege so e hinga ndoye, teti Lo mû fini ti Lo giriri teti e.” (1 Jean 3:16). Biani, Jésus amû fini ti lo teti azo na bê ti lo kue. Nga, lâ oko oko, même na yâ ti aye so ayeke kete mingi na tele ti sandaga ti lo, lo zia abezoin ti azo kozo na ti lo. I ababâ na mama, a lingbi i mû tapande ti bibe ti gbanzingo ye na tele so.

⁸ Ababâ na mama alingbi ti manda aye mingi na ndo ndoye so ayeke na kion pëpe so asigigi na yâ tënë so Jésus atene na azo ti Nzapa so li ti ala akpengba: “Lege mingi Mbi ye ti bungbi amolenge ti mo, legeoko tongana mama ti kondo abungbi amolenge ti lo na gbe ti kpangbi ti lo.” (Matthieu 23:37). Ge, Jésus afa tâ tongana nyen mbeni mama ti kondo ayeke bata amolenge ti lo na gbe ti akpangbi ti lo. Biani, ababâ na mama alingbi ti manda aye mingi na lege ti kode ti batango ye so Nzapa amû na mbeni mama ti ndeke, so lo yeke ndulu ti zia tele ti lo na lê ti sioni ti bata amolenge ti lo si sioni awara ala pëpe. Ye oko, ti bâ ye so ababâ na mama ti ndeke ayeke sala lâ na lâ ayeke nga ye ti dongo bê. Ala yeke gue na ala yeke ga lege mingi ti gi kobe. Atâa so ala ga ndulu ti woko kue, ala yeke zia kobe ni na yanga ti amolenge ni so azi kota. Na pekoni so ala mene ni awe, mingi ni amolenge ti ndeke so angbâ gi ti hunda mbeni. Mingi ti anyama so Jéhovah aleke ayeke na “ndara mingi” na yâ lege so ala yeke bata na amolenge ti ala.​—aProverbe 30:24.

⁹ Na tapande ti andeke so, na ndo sese kue ababâ na mama so ayeke aChrétien ayeke fa na gigi mbeni bibe ti gbanzingo ye na tele so ayeke pendere mingi. I mveni i yeke zia tele ti i na lê ti sioni ahon ti zia amolenge ti i na lê ni. Na ndo ni, lâ oko oko i yeke sala tâ kue ti bata azo ti i. Mingi ti i ayeke londo na kota ndapelele ti sala akua so ayeke woko zo wala so anzere oko pëpe. I yeke sala kua ngangu ti wara kobe ndali ti sewa ni. I yeke pika li ti tene amolenge ti i ayü saleté bongo pëpe, alango na yâ ti nzoni da nga amanda mbeti na lege ni. Na i ngbâ ti sala tongaso lâ na lâ, ngu na ngu. Biani mara ti gbanzingo ye na tele nga na gbungo ngangu tongaso anzere na Jéhovah mingi (aHébreu 13:16). Me, na oko ngoi ni a lingbi i dabe ti i so ambeni lege ti batango azo ti i tongaso, so ayeke kota ahon so, ayeke dä.

Batango ala na lege ti yingo

¹⁰ Mbeni ye so ayeke kota ahon batango amolenge na lege ti mitele ayeke batango ala na lege ti yingo. Jésus atene: “Fade zo angbâ na fini gi na lege ti mapa pëpe, me na lege ti tënë kue so asigigi na yanga ti Nzapa.” (Matthieu 4:4; 5:3). I ababâ na mama, i lingbi ti sala nyen ti bata amolenge ti i na lege ti yingo?

¹¹ Na ndo tënë so, peut-être aversê so a yeke diko ni lege mingi ahon atanga ni kue ayeke Deutéronome 6:5-7. I zi Bible ti i na i diko aversê so. Bâ so a hunda kozoni kue na ababâ na mama ti kpengba dutingo ti ala mveni na lege ti yingo, ti kpengba ndoye ti ala na mbage ti Jéhovah nga ti bata atënë ti lo na bê ti ala. Ni la, a yeke kota ye teti i ti duti azo so ayeke manda Tënë ti Nzapa mingi, ayeke diko Bible nga ayeke gbu li na ndo ni lakue, tongaso si i duti na tâ gbungo nda ti ye nga i ndoye lege ti Jéhovah, akpengba-ndia ti lo na andia ti lo. Ye so i yeke wara na pekoni ayeke so li ti i ayeke si singo na apendere tâ tënë ti Bible so ayeke mû ande lege na i ti duti na ngia, ti kpe mbito ti Jéhovah nga ti ye lo. I yeke duti ande na gbâ ti anzoni ye ti yôro na yâ bê ti amolenge ti i.​—Luc 6:45.

¹² Ababâ na mama so akpengba na lege ti yingo ayeke na ye kue awe ti sala ye alingbi na wango ti Deutéronome 6:7 so ahunda ti “fa” wala ti “yôro” tënë ti Jéhovah na yâ bê ti amolenge ti ala na ngoi kue so lege azi ti sala ni. Ti “yôro” aye ti tene ti fa ye nga ti sala si a lï na yâ ti li ti zo na tenengo ni fani mingi. Jéhovah ahinga nzoni mingi so e kue, mbilimbili amolenge, e yeke na bezoin ti tene a kiri na ndo ti mbeni ye fani mingi si e hinga ni nzoni. Ni la, na yâ kusala ti lo, Jésus akiri na ndo ti mbeni ye lege mingi. Na tapande, tongana lo yeke fa lani na adisciple ti lo ti duti na tâ be-ti-molenge ahon ti duti na fandara wala ti gbugburu tele ti duti na li ni, lo sala kusala na alege nde nde ti kiri na ndo ti oko kpengba-ndia so. Lo fa ni na lege ti fango nda ti tënë, na mungo mbeni tapande nga même na lege ti salango ye ti lo mveni (Matthieu 18:1-4; 20:25-27; Jean 13:12-15). Ye oko, a yeke nzoni ti bâ so bê ti Jésus anze lâ oko pëpe. Legeoko nga, a lingbi ababâ na mama agi alege nde nde ti fa atâ tënë so ayeke kota na amolenge ti ala. Na be-nze-pepe, ala kiri na ndo akpengba-ndia ti Jéhovah lege mingi juska amolenge ni agbu nda ni nzoni nga ala sala ye alingbi na ni.

¹³ Angoi so ayeke tâ nzoni mingi ndali ti mara ti fango ye tongaso ayeke akapa ti mandango ye na sewa. Biani, mbeni mandango ye na sewa so a sala ni lakue, so ayeke kpengba zo na so a sala ni na ngia ayeke tâ kota ye ndali ti dutingo ti sewa ni na lege ti yingo. Asewa ti aChrétien na ndo sese kue ayeke wara ngia na yâ amandango ye tongaso na salango kusala na ambeti so bungbi ti Jéhovah ayeke sigigi na ni, nga na lekengo mandango ye ni ti lingbi na abezoin ti amolenge ni. Legeoko tongana buku Les jeunes s’interrogent​—Réponses pratiques, buku Mä Kota Wafango yeb ayeke tâ mbeni nzoni gbakuru teti mandango ye ni. Ye oko, mandango ye na sewa si ayeke gi oko ngoi ti fango ye na amolenge pëpe.

¹⁴ Tongana ti so Deutéronome 6:7 afa, angoi so i ababâ na mama i lingbi ti sala lisoro na amolenge ti i na ndo aye ti yingo ayeke mingi. Tongana i na ala i yeke tambela, i yeke sala kua wala i yeke gboto gere legeoko, i lingbi ti gbu alege so azi ti mû na amolenge ti i aye ti yingo so ala yeke na bezoin ni. Ti tâ tënë ni, mo yeke pëpe na bezoin ti diko tënë lakue gbâ ni gbâ ni na amolenge ti mo na ndo atâ tënë ti Bible. Nde na so, sala kue ti tene lisoro na sewa aduti lakue ye so akpengba zo, nga so kota mbage ni andu aye ti yingo. Na tapande, Réveillez-vous! ayeke na gbâ ti a-article so asala tënë na ndo ti aye nde nde. A-article tongaso alingbi ti mû lege na i ti sala lisoro na ndo anyama so Jéhovah aleke ala, ambeni ndo so ayeke pendere mingi nga na apendere ngobo ti salango ye nde nde so azo ayeke na ni. Alisoro tongaso alingbi ti pusu amolenge ti diko mingi ambeti so bungbi ti ngbâa be-ta-zo na ti ndara ayeke sigigi na ni.​—Matthieu 24:45-47.

¹⁵ Salango alisoro so akpengba zo na amolenge ti i ayeke mû ande maboko na i ti mû na ala mbeni ye ti yingo nde so ala yeke na bezoin ni. Amolenge so ayeke aChrétien ayeke na bezoin ti manda ti fa tënë ti mabe ti ala nzoni na azo. Tongana i yeke sala lisoro na ndo mbeni tënë so agbu bê ti i na yâ Tour ti Ba Ndo wala Réveillez-vous!, i lingbi ti gi ambeni kode ti tingbi ni na kusala ti fango tënë. Na tapande, i lingbi ti hunda: “Tongana gbâ ti azo ahinga tënë so na ndo Jéhovah, mo pensé so a yeke duti ande nzoni mingi? Ti mo, tongana nyen si e lingbi ti zia nzara ti tënë so na bê ti mbeni zo?” Mara ti alisoro tongaso alingbi ti mû maboko na amolenge ti duti na kota nzara ti fa na azo aye so ala yeke manda. Na pekoni, tongana amolenge ti i ayeke fa tënë legeoko na i, ala yeke bâ tâ tongana nyen ti sala kua na alisoro so. Ala yeke bâ nga so fango tënë ayeke mbeni kusala so anzere mingi na so zo ayeke wara kota ngia na pekoni.​—Kusala 20:35.

¹⁶ Ababâ na mama ayeke bata nga amolenge ti ala na lege ti yingo tongana ala yeke sambela. Jésus afa lani na adisciple ti lo tongana nyen ti sambela, nga na angoi mingi lo sambela legeoko na ala (Luc 11:1-13). Tara ti bâ aye mingi so ala manda na sambelango ni legeoko na Molenge ti Jéhovah mveni! Legeoko nga, amolenge ti i alingbi ti manda aye mingi na lege ti asambela ti i. Na tapande, ala lingbi ti manda so Jéhovah aye si e fa na lo atënë kue so ayeke na bê ti e, e fa na lo akpale kue so e lingbi ti wara. Biani, asambela ti i alingbi ti mû maboko na amolenge ti i ti hinga mbeni kpengba tâ tënë na ndo Nzapa: ala lingbi ti lë songo na Babâ ti ala so ayeke na yayu.​—1 Pierre 5:7.

Salango si amolenge ahinga so mo ye ala

¹⁷ Ti tâ tënë ni, amolenge ayeke nga na kota nzara ti hinga so mo ye ala. Tënë ti Nzapa afa na ababâ na mama so ayeke tâ kota ye ti fa yengo ndo so na mbage ti amolenge. Na tapande, a wa awali so ade maseka ti “ndoye amolenge ti ala”. Ti sala tongaso, a hunda ti tene amama so ade maseka aduti azo so ayeke bi bê na lege ni (Tite 2:4). Biani, a yeke tâ na lege ni ti fa ndoye na mbage ti mbeni molenge. Salango tongaso ayeke fa na molenge ni ti ye ambeni zo nga a yeke sala nzoni na lo na yâ ti gigi ti lo kue. Nde na so, a yeke tâ ye ti buba ti fa pëpe na mbeni molenge ti ye amba ti lo. Fango ni na lo pëpe ayeke ga na kota vundu nga a fa so e mû tapande ti Jéhovah oko pëpe, lo so lo ye e mingi atâa so e yeke mbilimbili-kue pëpe.​—Psaume 103:8-14.

¹⁸ Même Jéhovah amû li ni kozo ti ye amolenge ti lo so ayeke na sese ge. Tongana ti so 1 Jean 4:19 atene, “Lo ndoye e kozoni.” I ababâ na mama, a yeke ti i ti mû tapande ti Jéhovah na mungo li ni kozo ti lë songo ti ndoye na amolenge ti i. Bible awa ababâ ti sala hange ti so bê ti amolenge ti ala senge senge pëpe, “si bê ti ala anze”. (aColossien 3:21). Na popo ti aye so ayeke so bê ti amolenge mingi, ti so mbeni babâ wala mama ayeke sala ye mo bâ mo tene lo ye ala pëpe wala lo bâ ala na nene ni pëpe aso ahon atanga ni. A lingbi ababâ so ayeke ndulu pëpe ti fa na amolenge ti ala so ala ye ala adabe na tapande ti Jéhovah. Même kâ na yayu, Jéhovah asala tënë ti fa so lo yeda na Molenge ti lo nga Lo ye lo (Matthieu 3:17; 17:5). Tënë so amû ngangu mingi na Jésus! Legeoko nga, amolenge ayeke wara ngangu, nga tele ti ala ayeke nzere mingi tongana ababâ na mama afa tâ biani so ala ye ala nga ala yeda na ala.

¹⁹ Biani, ndoye ti ababâ na mama na mbage ti amolenge angbâ gi na senge tënë ti yanga pëpe. A yeke fa ndoye kozoni kue na lege ti kusala. Mungo aye ti mitele nga na aye ti yingo alingbi ti fa ndoye ti ababâ na mama, mbilimbili tongana ala sala ni na mbeni lege so afa atene a yeke tâ ndoye si apusu ala ti sala tongaso. Na ndo ni, sengo ndo ayeke mbeni kota ye so afa ndoye ti ababâ na mama. Biani, “zo so Seigneur andoye lo, Lo wa lo”, wala Lo se lo (aHébreu 12:6). Nde na so, tongana ababâ na mama ase amolenge pëpe, a fa so ala ke amolenge ni (aProverbe 13:24). Jéhovah ayeke sala ye lakue na lege ni, lo yeke se zo na “lege so alingbi”. (Jérémie 46:28, NW ). Ti sala ye na lege ni tongana ti Jéhovah ayeke lakue kete ye pëpe na ababâ na mama so ayeke mbilimbili-kue pëpe. Ye oko, ngangu so i yeke sala ti sala ye tâ na lege ni ayeke ye ti ngele ngangu. Sengo ndo so ayeke ngangu nga so a sala ni na ndoye ayeke mû maboko na mbeni molenge ti kono ti duti na mbeni fini so ayeke na ngia nga atambela nzoni (aProverbe 22:6). A yeke ye so bê ti babâ wala mama kue so ayeke Chrétien aye ndali ti molenge ti lo.

²⁰ Tongana i ababâ na mama, i sala kota kua so Jéhovah amû na i, so ti tene ti bata amolenge ti i na lege ti mitele nga na lege ti yingo nga i sala si ala hinga so i ye ala, anzoni ye ti pekoni ayeke mingi. Na lege so i yeke sala si amolenge ti i alingbi ti wara lege nzoni ti soro “fini” si na pekoni ala “ngbâ na fini”. (Deutéronome 30:19). Amolenge so asoro ti sala na Jéhovah si ala ngbâ na ndo lege ti fini na ngoi so ala kono ayeke zia kota ngia mingi na bê ti ababâ na mama ti ala (Psaume 127:3-5). Mara ti ngia tongaso ayeke ngbâ ande lakue lakue! Ye oko, tongana nyen amaseka alingbi ti sepela Jéhovah laso? Article ti peko ayeke sala ande tënë na ndo ni.

[Akete tënë na gbe ni]

Fade mo kiri tënë tongana nyen?

Ye nyen ababâ na mama alingbi ti sala ti bata amolenge ti ala na lege ti. . .

• mitele?

• yingo?

• nga si amolenge ni ahinga so ala ye ala?

[Ahundango tënë ti manda na ye]

1, 2. (a) Ngbanga ti nyen a yeke ye ti mungo ngia na zo ti bâ asewa so ayeke ga na abungbi legeoko? (b) Ambeni kpale so asewa ayeke hon ndo ni ti ga na bungbi na l’heure ayeke so wa?

3. Tongana nyen e hinga so Jéhovah abâ asewa tâ na nene ni mingi?

4. Ti tene a bata amolenge nzoni, aye wa Jéhovah aleke ni na yâ ti sewa?

5, 6. (a) Ala so ayeke pika li ti bata sewa ti ala na lege ti mitele ayeke tingbi na ambeni kpale wa? (b) Dutingo lakue na bango ndo wa na mbage ti akua ti mitele ayeke mû ande maboko na aChrétien so ayeke bata sewa ti ala?

7. Ngbanga ti nyen a yeke tâ na lege ni ti tene ababâ na mama agbu li na ndo tapande ti Jésus?

8, 9. (a) Na ndo gbanzingo ye na tele ti bata amolenge ti ala, aye wa ababâ na mama alingbi ti manda na ndo ti andeke? (b) Tongana nyen mingi ti ababâ na mama so ayeke aChrétien ayeke fa na gigi bibe ti gbanzingo ye na tele?

10, 11. Kota ye so zo ayeke na bezoin ni ahon atanga ni kue ayeke nyen? Na a lingbi ababâ na mama asala nyen kozo si ala wara lege ti kaï nzara so na yâ amolenge ti ala?

12. Tongana a yeke ti yôro atâ tënë ti Bible na yâ bê ti amolenge ti ala, tongana nyen ababâ na mama alingbi ti mû tapande ti Jésus?

13, 14. Ambeni ngoi so ababâ na mama alingbi ti yôro atâ tënë ti Bible na yâ bê ti amolenge ti ala ayeke so wa? Na ala lingbi ti sala kua na aye wa?

15. Tongana nyen ababâ na mama alingbi ti mû maboko na amolenge ti ala ti bâ fango tënë tongana mbeni ye so anzere nga azia ngia na bê?

16. Aye wa amolenge alingbi ti manda na mango asambela ti ababâ na mama ti ala?

17, 18. (a) Tongana nyen Bible afa nene ti fa ndoye na mbage ti amolenge? (b) Tongana nyen ababâ na mama alingbi ti mû tapande ti Jéhovah na yâ fango ndoye na mbage ti amolenge ti ala?

19. Ngbanga ti nyen sengo ndo ayeke kota ye? Ababâ na mama so ayeke aChrétien ayeke sala ngangu ti sala ni tongana nyen?

20. Tongana nyen ababâ na mama alingbi ti sala si amolenge ti ala awara lege nzoni ti soro “fini”?

[Foto na lembeti 18]

Mingi ti andeke ayeke sala ngangu mingi ti bata amolenge ti ala

[Foto na lembeti 20]

Kozoni kue a lingbi ababâ na mama akpengba dutingo ti ala mveni na lege ti yingo

[Afoto na lembeti 21, 22]

Ababâ na mama alingbi ti wara alege nde nde ti fa ye na amolenge ti ala na ndo Wasalango ye

[Foto na lembeti 22]

Amolenge ayeke wara ngangu nga tele ti ala ayeke nzere tongana ababâ na mama afa so ala yeda na ala