So ayeke Tour ti Ba Ndo ti mandango ni!

E kiri e sara si Tour ti Ba Ndo ti mandango ni akiri aga pendere mingi nga ayeke kiri ti mû maboko na mo mingi ti manda akpengba tâ tënë ti Nzapa so ayeke na yâ ti Bible.​—Ps. 1:2; 119:97.

A sara ngu osio awe la e komanse ti sigigi na Tour ti Ba Ndo ti fango na tënë nde na ti mandango ni nde. Ti mandango ni ayeke ndali ti e aTémoin ti Jéhovah nga na awamandango Bible so ayeke gue na li ni.

Mbeni ita-koli so avoro Jéhovah teti angu mingi afa tënë ti bê ti lo na ndo ti Tour ti Ba Ndo ti mandango ni lo tene: “Kozo Tour ti Ba Ndo ti mandango ni ayeke pendere nga andu bê ti mbi mingi. Lege so a zi na nda ti akpengba tâ tënë ti Bible na yâ ti Tour ti Ba Ndo so ague droit na bê ti mbi. Merci mingi ndali ti fini ye so.” Mbeni ita-koli ni nde atene: “Mbi yeke ku kungo ti mû ngoi mingi ti manda Tour ti Ba Ndo ti mandango ni na Bible na maboko.” E pensé so tënë ti bê ti mo ayeke nga tongaso.

Tongana ti so mo hinga, a to nda ti sigigi na Tour ti Ba Ndo ngbene ye na ngu 1879, a yeke grâce na yingo ti Jéhovah nga na tënë nzoni ti lo la a ngbâ ti sigigi na ni juska laso so (Zach. 4:6). Na yâ ti ngu 133 so, a changé aye mingi na ndo ti couverture ti Tour ti Ba Ndo. Na ngu 2012, na ndo ti Tour ti Ba Ndo ti mandango ni oko oko kue a yeke wara ande mbeni pendere dessin na ndo ti fango tënë, ye so ayeke dabe ti e na kusala so Nzapa amû na e so ayeke ti fa nda ti tënë ni kue na ndo ti Royaume ti Jéhovah na azo (Kus. 28:23). Na lembeti 2, mo yeke wara foto so a mû ni si a sara na dessin so ayeke na ndo ti couverture ni so nga mo yeke wara na tere ti foto ni nduru tënë na ndo ti ye so a yeke sara na lê ti foto ni nga ndo so ye ni asi dä. Na yâ ti ngu ni kue, afoto ni so ayeke dabe ti e ande kue so awakua ti Jéhovah ayeke fa nzoni tënë “na ndo ti sese kue so azo ayeke dä”.​—Mat. 24:14.

Ambeni ye wa la a changé na yâ ti Tour ti Ba Ndo so? A kiri na ahundango tënë ti dango bê na tongo nda ti article ti mandango ni oko oko kue. A yeke gboto lê ti mo na ndo ti akota tënë so a lingbi mo gi ti hinga ni na ngoi so mo yeke diko article ni nga mo yeke manda ni. Me, zo so ayeke mû li ni na ngoi ti mandango Tour ti Ba Ndo ni ayeke ngbâ ande ti sara kusala na ahundango tënë so na hunzingo ti étude ni. Mo yeke bâ ande so place so ayeke na yanga ti alembeti ni akiri akono kete nga a sara anuméro ti alembeti ni na ti aparagraphe ni na mbeni lege so zo alingbi ti bâ ni nzoni.

Tongana ti so a fa na yâ ti Tour ti Ba Ndo so, a zia na yâ ni mbeni fini article, “Sango na ndo ti mbaï ti bungbi ti e” ti fa akota ye so asi na yâ ti mbaï ti aTémoin ti Jéhovah ti ngoi ti e. Nga, mbeni article so iri ni ayeke “Ala mû tere ti ala wani ti sara ye” ayeke sigigi ngoi na ngoi. Na yâ ni a yeke sara tënë ti atâ ye so asi na awakua ti Jéhovah. A-article so ayeke fa ande ngia nga na nzerengo tere so aita awara na ngoi so ala yeke fa tënë na ando so a yeke na bezoin ti awafango tënë ti Royaume dä mingi.

Zia mo wara ngia mingi na mungo ngoi ti manda Mbeti ti Nzapa na lege ti Tour ti Ba Ndo so.

Awasarango mbeti ni

[Foto na lembeti 3]

1879

[Foto na lembeti 3]

1895

[Foto na lembeti 3]

1931

[Foto na lembeti 3]

1950

[Foto na lembeti 3]

1974

[Foto na lembeti 3]

2008