‘A Lingbi Asala Ye Kue ti Kpengba Zo’
1 Na yâ songo ti e na aita ti e ti koli na ti wali, a lingbi e sala ye so ayeke nzoni ti kpengba ala. So ti tene, a lingbi e bi bê ti e ti bata dutingo ti ala na lege ti yingo. Tongana kua ti e ayeke ti kä mbeni kungba wala ti sala kusala teti azo, a lingbi e bata si mbeni oko ti akusala ti e asala si aita ti e atï pepe.—2 aCor. 6:3; aPhil. 1:9, 10.
2 Ambeni abi tele ti ala na yâ ti kusala ti dengo buze nde nde na bingo bê ti wara a-client na popo ti ambeni Chrétien. Ambeni ndokua ayeke wa azo so asala kusala na iri ti ala ti ba zo oko oko, nga afon ala awamabe, tongana mbeni zo so alingbi ti duti client. Ambeni ita aleke akota bungbi ti aTémoin ti hunda na ala ti bi tele na yâ mbeni kusala ti dengo buze. Ambeni asala sabango na tokuango na ngangu akungba, a-catalogue, asango na ndo ti Internet wala a-vidéo na afon ala na yâ mabe. A yeke na lege ni ti tene mbeni Chrétien awara ye na lege ti aita ti lo ti koli na ti wali na lege ti yingo teti so lo yeke na asongo ti théocratie na ala? Oko pepe!—1 aCor. 10:23, 24, 31-33.
3 A lingbi aita aduti na donzi: A ye ti tene pepe so Chrétien alingbi pepe ti dë buze na mbeni nde. Tene ni aba zo oko oko. Ye oko, ambeni azia na sese ambeni pialo ti dengo buze so awa bibe ti wara ye mingi, na ala hunda na afon ala ti bungbi legeoko na ala wala ti zia nginza na yâ ti dengo buze ti ala. Mingi ti adengo buze ni alï ngu, na ala so amu tele ti ala dä aglisa gbâ ti nginza. Atä nzala ti wara nginza hio agbu bê ti ala so alï na yâ ti dengo buze ni, a lingbi lo so ayeke na gunda ni abi bê pepe so tene ayeke na li ti lo pepe. A lingbi lo gbu li ti lo nzoni na ndo ye so ayeke sala ande na ndo ti seni ti aita na lege ti yingo nga na ti mitele tongana dengo buze ni alï ngu. A lingbi ala so ayö akungba ti théocratie abata mbilimbili lege so ala yeke wara na nginza, teti tanga ti aita ni ayekia ala na azia bê ti ala kue na ala. A yeke duti ande na lege ni pepe ti zia vundu na bê ti aita. Ita so asala si azo ayekia lo mbeni pepe alingbi ti glisa amatabisi ti lo ti kusala.
4 A lingbi ye so e zia na gbele e ayeke ti “sala ye kue ti kpengba zo.” (1 aCor. 14:26) A lingbi e bi tele ti e lâ oko pepe na yâ ti akusala ti dengo buze na yâ ti kongrégation wala ti mu maboko na ni. Biani, kamba ayeke na popo ni oko pepe na anda ni so Bible ahunda na e ti bungbi.—aHéb. 10:24, 25.