“Lo so Ayeke Kete Aga Saki Oko”

“Fade lo so ayeke kete aga saki oko, na lo so ayeke kete mingi aga mbeni mara ti ngangu.”​—ISAÏE 60:22, NW.

1, 2. (a) Ngbanga ti nyen bingo amu sese kue laso? (b) Tongana nyen, yeke yeke, lumière ti Jéhovah asu na ndo azo ti lo?

“FADE bingo akanga lë ti sese, na bingo so avuko pitipiti aga na ndo azo; me fade L’Eternel [“Jéhovah,” NW] alondo ti su na ndo mo, na azo aba gloire ti Lo na ndo mo.” (Esaïe 60:2) Atene so afa pendere mingi dutingo ti sese ngbele ye na ngu 1919. Chrétienté ake fä ti singo ti Jésus Christ tongana gbia, “lumière ti sese.” (Jean 8:12, NW; Matthieu 24:3) Ndali ti “kota ngonzo” ti Satan, mokonzi ti “ala so akomande bingo ti sese so,” siècle 20 ni ayeke ngoi ti sioni mingi ahon na so afuti ye dä mingi ahon atanga ti ngoi kue na yâ mbaï ti azo. (Apocalypse 12:12; aÉphésien 6:12) Mingi ti azo ayeke na yâ bingo na lege ti yingo.

² Ye oko, lumière ayeke su laso. Jéhovah ayeke ‘su’ na ndo awakua ti lo, tanga ti ala so asa yingo na ndo ti ala, so na ndo sese ge ayeke awatokua ti “wali” ti lo ti yayu. (Isaïe 60:1, NW) Mbilimbili ngbele ye na zingo ala na gbe ti ngba ti Babylone na ngu 1919, ala fa na gigi gloire ti Nzapa na ala ‘zia si lumière ti ala aza na gbele azo.’ (Matthieu 5:16) A londo na ngu 1919 ti si na ngu 1931, lumière ti Royaume aza lakue mingi ahon na ngoi so azo so ayeke lungula tanga ti abibe ti Babylone so agbu zo tongana zingiri. Wungo ti ala ague na li ni a si saki bale mingi na ngoi so Jéhovah asala si zendo ti lo aga tâ tene: “Fade Mbi bungbi tanga ti azo ti Israël; fade Mbi bungbi ala na ndo oko legeoko tongana a bungbi angasangbaga na yangbo, tongana kundu ti anyama na ndo ti tengo pele ti ala; fade wuluwulu alondo tene ti azo so asi singo.” (Michée 2:12) Na ngu 1931, a lingbi ti ba polele ahon gloire ti Jéhovah na ndo azo ti lo tongana ala yeda na iri ti aTémoin ti Jéhovah.​—Esaïe 43:10, 12.

³ Jéhovah ayeke su gi na ndo tanga ti ala ti “kete kundu”? (Luc 12:32, NW) Pepe. Numéro ti Tour ti Ba Ndo ti lango 1 ti septembre ngu 1931 afa na gigi mbeni bungbi nde. Na lege ti mbeni pendere fango nda ti Ezéchiel 9:1-11, a fa so, koli so ayeke na nza ti écrivain so a sala tene ti lo na yâ ti aversê so aduti fä ti tanga ti ala so asa yingo na ndo ti ala. “Zo” ni so azia marque na ndole ti azo wa? “Ambeni ngasangbaga,” ala so ayeke na beku ti duti na fini lakue lakue na ndo sese so aga paradis. (Jean 10:16; Psaume 37:29) Na ngu 1935 a ba giriri so bungbi ti “ambeni ngasangbaga” so ayeke “azo mingi so asi singo . . . ti amara kue” so bazengele Jean aba na suma. (Apocalypse 7:9-14) A londo na ngu 1935 ti si na laso, a bi lë mingi na ndo bungbingo azo mingi so asi singo.

⁴ A sala giriri tene ti kusala ti bungbingo so na yâ prophétie ti Isaïe tongana a tene: “Fade aGentil asi na lumière ti mo, na fade agbia asi na sungo ti londongo ti mo.” (Esaïe 60:3) “Agbia” so asala tene ti ala ge ayeke azo wa? Tanga ti azo 144 000 so, na tele ti Jésus Christ, ayeke afon héritier na yâ Royaume ti yayu na so amu li ni na yâ kusala ti salango tene ti témoin. (aRomain 8:17; Apocalypse 12:17; 14:1) Laso, wungo ti “aGentil” wala amara, ala so ayeke na beku ti ngbâ na sese, so aga na Jéhovah ti manda ye, na so ayeke tisa ambeni zo nde ti sala tongaso nga, ahon ngangu mingi wungo ti tanga ti ala saki mingi pepe so asa yingo na ndo ti ala.​—Esaïe 2:3.

Awakua ti Jéhovah so Asala Kusala na Wâ

⁵ Tä so wâ si, na yâ ti siècle 20 ni so kue, aTémoin ti Jéhovah ti laso afa na gigi! Na atä aye ti ngangu so angbâ lakue ti gue na li ni, wâ ti ala akiri na peko pepe na ngoi so ngu 2 000 ni aga ndulu. Ala ngbâ lakue ti ba komandema ti Jésus so na nene ni mingi: “I sala si azo na popo ti amara kue aga adisciple.” (Matthieu 28:19, 20, NW) Wungo ti awafango nzo tene so asala kua na ngoi ti ndangba ngu ti kusala ti siècle 20 ni asi na mbeni fini kota wungo ti 5 912 492. Wungo ti angbonga kue so adö bê, ayeke 1 144 566 849, so ala mu ti fa na ambeni zo tene na ndo Nzapa nga na ndo aye so lo leke ti sala. Ala sala afini vizite 420 047 796 na azo so asala nzala ti tene ni, na ala mu li ni na yâ amandango Bible 4 433 884 senge senge na da ti azo. Tä so pendere tondo ti salango kusala na wâ!

⁶ Na nze ti janvier so ahon, Wabatango Bungbi afa mbeni ye so aleke so andu angbonga so ahunda teti apionnier. Azo mingi agbu lege so azi ti lï na popo ti apionnier permanent nga na auxiliaire. Na tapande, na ngoi ti akozo nze osio ti calendrier ti ngu 1999, Béthel ti Pays-Bas awara wungo ti azo so ahunda ti ga pionnier permanent fani osio ahon ti so lo wara na oko ngoi ni so na ngu so aga kozoni. Ghana atene: “Ngbele ye na ngoi so fini ngbonga teti apionnier ato nda ni, wungo ti apionnier permanent ti e ayeke gue lakue na li ni.” Na ngoi ti ngu ti kusala ti ngu 1999, wungo ti apionnier na ndo sese kue asi 738 343, mbeni pendere fango na gigi ‘wâ teti nzo kusala.’​—Tite 2:14.

⁷ Jéhovah ahiri deba nzoni na ndo salango kusala na wâ so? Tâ tene. Na lege ti Isaïe lo tene: “Mo yä lë ti mo, mo ba ndo na tele ti mo; ala kue abungbi na ndo oko, ala ga na mo; amolenge ti mo ti koli alondo yongoro kâ aga, na azo ayö amolenge ti mo ti wali na maboko ti ala.” (Esaïe 60:4) ‘Amolenge-koli’ na ‘amolenge-wali’ so asa yingo na ndo ti ala, so abungbi ala awe, angbâ lakue ti sala na Nzapa na wâ. Na fadeso, a yeke bungbi ambeni ngasangbaga ti Jésus na tele ti ‘amolenge-koli’ na ‘amolenge-wali’ ti Jéhovah so asa yingo na ndo ti ala na yâ ti akodoro 234 nga na azoa ti ngu-ingo.

“Nzoni Kusala Kue”

⁸ A-Chrétien ayeke na kungba ti fa nzo tene ti Royaume na ti mu maboko na azo so asala nzala ti tene ni ti ga adisciple. Me ala “wara ye kue teti nzoni kusala kue.” (2 Timothée 3:17, NW) Ni la, na lege ti ndoye ala yeke bata asewa ti ala, ala yeke yamba agene, na ala yeke gue ti ba azo ti kobela. (1 Timothée 5:8; aHébreu 13:16) Na azo so amu tele na bê kue ti sala kusala ayeke mu mbage na yâ ti apialo tongana lekengo aDa ti Royaume, kusala so ayeke sala nga tene ti témoin. Na Togo, na peko ti lekengo mbeni da oko, akota zo ti mbeni église charismatique ti ndo ni aye ti hinga ngbanga ti nyen aTémoin ti Jéhovah awara lege ti leke ada ti ala ala mveni na ngoi so a hunda na église ni ti futa ambeni zo nde ti leke ti ala! Togo atene so lekengo apendere Da ti Royaume asala nzoni kusala na ndo azo so ayeke ndulu na ni si ambeni zo mingi atara ti loué wala ti leke ada ndulu na ando so aye ti leke aDa ti Royaume dä.

⁹ Na ambeni ngoi, a hunda ti sala ambeni nzoni kusala nde. Na ngoi ti ngu ti kusala so ahon, aye ti ngangu apika akodoro mingi, na fani mingi azo so ayeke si kozo na ndo ni ti mu maboko ayeke aTémoin ti Jéhovah. Na tapande, Kota Pupu Mitch afuti la ni ambage mingi ti Honduras. Fade fade, Béthel azia na sese ambeni komite, ti sala ye hio ti leke mungo maboko. A-Témoin na Honduras nga na ambeni kodoro nde amu abongo, kobe, yorö, na ambeni kozo ye so atia. A-Komite régional ti Salango Da asala kusala na akode ti ala ti kiri ti leke ada. Fade fade, a mu maboko na aita ti e so atï na yâ kpale so ti kiri na akusala ti ala ti lâ oko oko. Na Équateur, aTémoin ti Jéhovah amu maboko na aita ti ala na ngoi so mbeni ngu so asuku mingi abuba ambeni da. Tongana lo ba na lege wa ala sala kusala nzoni mingi na gbele ye so asi, mbeni wakua ti ngorogbia atene: “Tongana mbi wara lege ti tene bungbi ti azo tongaso asala kusala teti mbi, ka mbi yeke sala akpengba ye! A lingbi mara ti azo tongana i aduti na ambage kue ti sese.” Mara ti nzoni kusala tongaso aga na gonda na ndo Jéhovah Nzapa na a yeke mbeni fä ti “batango tene ti Nzapa [so] ayeke nzoni na yâ ye kue” ti e.​—1 Timothée 4:8, NW.

Ala ‘Hulu Tongana Mbinda’

¹⁰ Fadeso Jéhovah ahunda: “Ala so ahulu tongana mbinda, na ala hulu tongana abungu ahulu na da ti ala, ala yeke azo nyen? Biani, fade azoa aku Mbi, na fade abateau ti Tarsis alondo kozoni ti ga na amolenge ti mo so alondo yongoro . . . Fade awande asala gbagba ti bira ti mo, na agbia ti ala asala kusala teti mo.” (Esaïe 60:8-10) Akozo zo so ayeda na ‘sungo ti londongo’ ti Jéhovah ayeke la ni “amolenge ti lo ti koli,” aChrétien so asa yingo na ndo ti ala. Na pekoni “awande” aga, azo mingi so asi singo, so na dutingo be-biani ala sala kusala na aita ti ala so asa yingo na ndo ti ala, na mungo peko ti fango lege ti ala na yâ fango nzo tene. Ni la, atä so wungo ti ala so asa yingo na ndo ti ala ayeke kiri na gbe ni, a ngbâ lakue ti fa iri ti Jéhovah na ndo sese kue, na mbeni lege so ade ti sala kozoni pepe.

¹¹ Tongana ye ti pekoni, azo kutu mingi ayeke bungbi tele “tongana abungu ahulu na da ti ala,” ala wara ndo ti bata tele na yâ kongrégation ti aChrétien. A yeke zia azo saki ngbangbo mingi na ndo ni ngu oko oko, na lege angbâ lakue ti zi teti ambeni mingi. Isaïe atene: “Fade a lungula yanga ti kodoro ti mo teti lakue; fade a kanga yanga ni na lâ wala na bï pepe, si azo alingbi ga na mosoro ti amara na mo.” (Esaïe 60:11) Na ngu so ahon, azo 323 439 awara batême ti fa mungo tele ti ala na Jéhovah, na ade lo kanga ayanga ti kodoro ni pepe. “Aye ti pendere ti amara kue,” azo mingi so asi singo, angbâ ti lï gbâ ni na ayanga ti kodoro ni. (Haggaï 2:7, NW) A yeke kanga lege pepe na zo kue so aye ti sigigi na yâ bingo. (Jean 12:46) Zia si mara ti azo tongaso kue aglisa lâ oko pepe bango na nene ni so ala yeke na ni teti lumière ni!

Na Mbito Pepe na Gbele Kangango Lege

¹² Azo so andoye bingo ake lumière ti Jéhovah. (Jean 3:19) Ambeni atara même ti mingo lumière so. E yeke ku ye tongaso kungo. Azo ti kodoro ti Jésus ahe, akanga lege, nga na nda ni afa même lo, lo so ayeke “tâ Lumière, so amu lumière na azo kue.” (Jean 1:9) Na yâ ti siècle 20 ni so kue, ahe aTémoin ti Jéhovah nga, abi ala na da ti kanga, akanga lege ti kusala ti ala, na afâ même ala tongana ala za lumière ti Jéhovah na gigi na dutingo be-ta-zo. Na yâ ti angu so ahon ade ti ninga pepe, azo ti kangango lege asala kusala na kangbingo atene ti mvene na lege ti asango, na ndo ala so ayeke za lumière ti Nzapa. Ambeni aye ti pusu azo ti mä na bê so aTémoin ti Jéhovah ayeke azo so alingbi ti sala sioni na a lingbi a kanga lege na kusala ti ala. Azo ti kangango lege tongaso ahon na ngangu?

¹³ Pepe. Na ndo so lege ti sala ni ayeke dä, aTémoin ti Jéhovah ague na andokua ti sango ti fa nda ti aye ni. Tongana ye ti pekoni, a kangbi na ndo mingi iri ti Jéhovah na yâ ti ambeti-sango nga na ambeni mbeti nde, na fonono nga na singa-le. So aga na aye ti nzoni mingi teti kusala ti fango tene. Na Danemark, na tapande, mbeni programme ti Télé ti kodoro ni apika patara na ndo kota li ti tene “Ngbanga ti nyen mabe ti azo ti Danemark ayeke kiri na peko.” A hunda tene na aTémoin ti Jéhovah, legeoko na ambeni watokua ti alege ti vorongo nde. Na pekoni, mbeni wali so aba kua-singa ni atene: “A yeke la ni polele ti ba zo wa ayeke na yingo ti Nzapa.” A to nda ti manda ye na lo.

¹⁴ A-Témoin ti Jéhovah ahinga so fade azo mingi na sese so ayeke ke ala. (Jean 17:14) Ye oko, prophétie ti Isaïe akpengba ala: “Amolenge ti azo so asala ye ti ngangu na mo, fade ala ga, ala kuku na gbele mo; na azo kue so ake mo, fade ala zuku tele ti ala na gbe ti gere ti mo, na fade ala di iri ti mo Kodoro ti L’Eternel, Sion ti Lo Ti Nzoni-kue ti Israël.” (Esaïe 60:14) Na kota kamela na lë, fade na yâ ngoi kete azo ti kangango lege ayeke ba so ala yeke tiri biani na Nzapa mveni. Zo wa alingbi ti hon na ngangu na yâ bira tongaso?

¹⁵ Na pekoni, Jéhovah akiri amu zendo: “Fade Mbi sala si mo wara gloire ti lakue . . . Fade mo nyon dulait ti amara, na mo nyon me ti agbia, na fade mo hinga Mbi, L’Eternel, Mbi yeke Sauveur ti mo.” (Esaïe 60:15, 16) Tâ tene, Jéhovah ayeke Sauveur ti azo ti lo. Tongana ala zia biani bê kue na lo, fade ala yeke ngbâ teti “lakue.” Na fade ala “nyon dulait ti amara,” na salango kusala na ambeni ye so ayeke dä teti guengo na li ni ti tâ vorongo. Na tapande, salango kusala na lege ti ndara na ordinateur nga na senda-kode ti singa asala si a yeke ngangu mingi mbeni pepe ti sigigi na mbeti Tour ti Ba Ndo na ayanga ti kodoro 121 nga na Réveillez-vous! na ayanga 62. A leke mbeni programme ti ordinateur so ayeke nde ti mu maboko na yâ kiringo na Traduction du monde nouveau na ambeni fini yanga nde, na kiringo na pekoni tongaso a ga na ngia mingi. Tongana a sigigi na Mbeti ti Nzapa so asala na yanga ti Grec na yanga ti azo ti Croatie na ngu 1999, azo saki mingi atoto na ngule ti ngia. Mbeni ita-koli so aga kangba awe atene: “Mbi ku Bible so teti ngoi mingi. Fadeso mbi lingbi ti kui na siriri!” Sigingo ti Traduction du monde nouveau, atä a yeke gi mbage ni wala kue, ahon kutu 100 na ayanga 34.

Anzoni Salango Ye so Ayeke na Nduzu Mingi

¹⁶ Jésus atene: “Zo so asala sioni ake Lumière.” (Jean 3:20) Na mbeni mbage nde, ala so angbâ na yâ lumière andoye alege ti Jéhovah so ayeke na nduzu mingi. Na lege ti Isaïe, Jéhovah atene: “Fade azo ti mo kue ayeke mbilimbili.” (Esaïe 60:21a) Na yâ ti mbeni sese so ye ti pitan, mvene, salango bê, na baba ahon ndo ni mingi, batango ambilimbili lege ti tambela a lingbi ti duti mbeni kota ye ti hon ndo ni. Na tapande, na yâ ti ambeni kodoro, aye ti konomi ayeke gue na li ni mingi na a yeke ngangu pepe ti hon nde ti tï na yâ tombango gi peko ti mosoro. Ye oko, Paul agboto mê: “Ala so aleke na bê ti ala ti ga wamosoro atï na yâ handa, na yâ son, nga na yâ ti asioni nzala mingi ti buba, so abi azo na yâ ti futingo nga na yâ ye so afuti.” (1 Timothée 6:9, NW) Ba tongana nyen a yeke duti ye ti vundu mingi tongana mbeni zo abi tele ngangu mingi na yâ akusala ti dengo buze si lo glisa aye so ayeke biani kota, tongana bungbingo na aChrétien, kusala so azia ni nde, akpengba-ndia ti nzoni lege ti tambela, na akungba ti sewa!

¹⁷ Ti bata ambilimbili lege ti tambela alingbi ti duti biani ngangu mingi teti apendere, na ngoi so mingi ti akamarade ti ala abi tele na yâ nyongo mbangi na ye ti pitan. Na Suriname, na ekole, mbeni pendere molenge-koli aga ndulu na mbeni molenge-wali ti ngu 14 na ahunda lo ti bungbi koli na wali. Molenge-wali ni ake, na fango so Bible akanga lege na mara ti ye tongaso na gigi ti mariage. Ambeni molenge-wali ti ekole ni ahe lo na atara ti pusu lo ti gbian bibe ti lo, na tenengo so azo kue aye ti bungbi na molenge-koli so. Ye oko, maseka-wali so aluti ngangu. Ambeni yenga kete na pekoni, a wara makongo ti VIH na tele ti molenge-koli ni na tele ti lo ato nda ti so mingi. Molenge-wali so ayeke na ngia teti lo bata komandema ti Jéhovah ti ‘ke ye ti pitan.’ (Kusala 15:28, 29) A-Témoin ti Jéhovah ayeke pika kate mingi teti apendere na popo ti ala so aluti ngangu teti ye so ayeke na lege ni. Mabe ti ala, na ti ababâ na mama ti ala, ‘amu gloire,’ wala aga na gonda, na iri ti Jéhovah Nzapa.​—Esaïe 60:21b.

Jéhovah Amu Guengo na Li Ni

¹⁸ Biani, Jéhovah abi lumière na ndo azo ti lo, na hiringo deba nzoni, na fango lege, nga na kpengbango ala. Na ngoi ti siècle 20 ni so, ala ba gango tâ tene ti atene ti Isaïe: “Fade lo so ayeke kete aga saki oko, na lo so ayeke kete mingi aga mbeni mara ti ngangu. Mbi mveni, Jéhovah, fade mbi sala si ye so ague na li ni hio na ngoi ni.” (Isaïe 60:22, NW) A londo na kete wungo ti ala so ayeke na ngu 1919, wungo ti “lo so ayeke kete” aga ahon “saki oko.” Nga, nda ti guengo na li ni so ade ti si pepe! Na ngu so ahon, azo 14 088 751 ague na Matanga ti Dango Bê na kui ti Jésus. Mingi ti azo so ayeke la ni pepe aTémoin so asala kua. E yeke na ngia so ala gue la ni na kpengba matanga so, na e tisa ala ti ngbâ ti gue na li ni na mbage ti lumière. Jéhovah angbâ lakue ti su ngangu na ndo azo ti lo. Yanga-da ti bungbi ti lo angbâ na zingo ni. Tongaso, zia azo kue aleke na bê ti ala ti ngbâ na yâ lumière ti Jéhovah. Tä so adeba nzoni si a yeke ga na ni na e fadeso! Na so tâ ngia si a yeke ga na ni na ngoi ti kekereke tongana création kue ayeke sepela ande Jéhovah na asala ngia na yâ zango ti gloire ti lo!​—Apocalypse 5:13, 14.

Mo Lingbi ti Fa Nda Ni?

• Azo wa afa na gigi gloire ti Jéhovah na lâ ti nda ni so?

• Ye nyen afa so wâ ti azo ti Jéhovah akiri na peko pepe?

• Ambeni nzoni kusala so aTémoin ti Jéhovah ayeke na ye mingi ti sala dä ayeke so wa?

• Atä sioni kangango lege, ye nyen e lingbi zia bê ti e kue dä?

3. Tongana nyen a sigigi polele so lumière ti Jéhovah ayeke su na ndo ambeni zo nde na ala so asa yingo na ndo ti ala?

4. “Agbia” na “aGentil” so asala tene ti ala na Esaïe 60:3 ayeke azo wa?

5. (a) Aye wa afa so wâ ti azo ti Jéhovah akiri na peko pepe? (b) Akodoro wa awara kota guengo na li ni na ngu 1999? (Ba molongo so ayeke na alembeti 27 ti si na 30.)

6. Mbeni fini ye wa a leke teti apionnier, na ye ti pekoni ayeke so wa?

7. Tongana nyen Jéhovah ahiri deba nzoni na ndo salango kusala na wâ ti awakua ti lo?

8. Na yâ ‘anzoni kusala’ wa aTémoin ti Jéhovah ayeke sala kua dä ngangu?

9. Tongana nyen aTémoin ti Jéhovah asala ye na ngoi so akpale asi?

10. Atä kiringo na gbe ni ti wungo ti ala so asa yingo na ndo ti ala, ngbanga ti nyen a yeke fa iri ti Jéhovah na mbeni lege so ade ti sala kozoni pepe?

11. (a) Ye wa angbâ lakue ti gue na li ni, nga ye ti pekoni ayeke so wa na ngu 1999? (b) Akodoro wa ayeke na kota wungo ti batême teti ngu 1999? (Ba molongo so ayeke na alembeti 27 ti si na 30.)

12. Tongana nyen azo so andoye bingo atara ti mingo lumière ni?

13. Ye wa aga na peko ti fango aye na ndo kusala ti e na lege ti ndara na yâ ti asango?

14. Na kota kamela na lë, fade na yâ ngoi kete a yeke gbu na ngangu azo ti kangango lege ti yeda na nyen?

15. Tongana nyen aTémoin ti Jéhovah ayeke “nyon dulait ti amara,” na tongana nyen ye so asigigi polele na yâ kusala ti ala ti fango ye na ti fango nzo tene?

16, 17. (a) Atä so a yeke ngangu ti sala ni, ngbanga ti nyen a yeke kota ye mingi ti bata alege ti salango ye so ayeke na nduzu mingi ti Jéhovah? (b) Aye wa so asi afa so apendere alingbi ti kpe ti tene sese so abuba ala?

18. (a) Kota ye wa Jéhovah asala teti azo ti lo? (b) Ye wa afa so fade konongo ni ayeke ngbâ ti gue na li ni, na apendere beku wa ayeke ku ala so angbâ na yâ lumière?

[Tableau na lembeti 27-30]

TONDO TI ATÉMOIN TI JÉHOVAH TI NDO SESE KUE TETI NGU TI KUSALA 1999

[Afoto na lembeti 25]

Azo angbâ ti ga mingi mingi na yâ bungbi ti Jéhovah

[Foto na lembeti 32]

E yeke na ngia so Jéhovah azia yanga-da ni angbâ na zingo ni kota teti azo so andoye lumière