I Luti Tongana Azo So Alingbi Kue Na I Hinga Ye Na Bê Ti I Biani

Mungo Maboko na Apendere na Fango Ye so Asi na Ngoi Ni

ÉPAPHRAS ayeke la ni mbeni Chrétien ti kozo siècle so ague na Rome. Atä so kue, teti mbeni nda ti tene so ayeke na lege ni, lo ngbâ ti bi bê ti lo na Colosses, mbeni gbata na Asie Mineure. Lo fa nzo tene na ndo so, nga lo mu maboko biani na ambeni zo ti Colosses ti ga adisciple ti Jésus Christ. (aColossien 1:7) Épaphras abi bê ti lo mingi na ndo afon lo wamabe na Colosses, teti tongana ti so a lingbi ti ba na yâ mbeti so lo sû na Rome, bazengele Paul atene na ala: “Épaphras . . . abalao i, lo yeke tiri teti i lakue na yâ sambela ti lo, si i luti tongana azo so alingbi kue, na i hinga na bê ti i biani ye kue so Nzapa aye.”—aColossien 4:12.

Legeoko nga, ababâ na mama so ayeke aChrétien ti ngoi ti e asambela lakue teti nzoni ti amolenge ti ala na lege ti yingo. Ababâ na mama so asala ngangu ti yôro ndoye teti Nzapa na yâ bê ti amolenge ti ala si ala lingbi luti ngangu na yâ mabe.

Apendere mingi so ayeke aChrétien ahunda ti tene a mu maboko na ala na yâ akpale so ala wara na ekole nga na mbeni ndo nde. Mbeni maseka wali ti ngu 15 atene: “Akpale ti e akiri aga ngangu mingi ahon. Fini amu mbito na bê mingi. E ye si a mu maboko na e!” A kiri tene na ahundango ndo ti apendere tongaso nga na asambela ti ababâ na mama so abata tene ti Nzapa? Biani! “Ngba ti be-ta-zo na ti ndara” amu fango ye so aluti na ndo ti Bible. (Matthieu 24:45, NW) Article so asala tene ti ambeni mbeti so amu maboko na apendere saki ngbangbo mingi ti ‘luti tongana azo so alingbi kue na ti hinga ye biani na bê.’ Zia e ba ambeni ti ambeti so.

‘Ba . . . Afini Témoin 15 000!’

Na août 1941, azo 115 000 abungbi na St. Louis, Missouri, U.S.A., ndali ti mbeni bungbi ti aTémoin ti Jéhovah ti kota ahon so a sala na ngoi ni kâ. Na ndangba lango ti bungbi ni, “Lâ ti Amolenge,” amolenge 15 000 so aduti ndulu na estrade ni adengi mê nzoni ahon na ngoi so Joseph F. Rutherford asala tene na ndo li ti tene “Amolenge ti Gbia.” Ndulu na nda ti diskur ti lo, Rutherford, so ayeke na ngu 71, atene na go ti mbeni babâ:

“I kue . . . amolenge so i yeda . . . ti mä yanga ti Nzapa na ti Gbia ti lo, zia i londo.” Amolenge ni kue alondo legeoko. Ita Rutherford atene: “Ba, afini témoin ti Royaume ahon 15 000!” Azo apika la ni sako mingi. Lo kiri lo tene: “I kue so i yeke sala ande ye so i lingbi ti sala ti fa tene ti Royaume ti Nzapa na ambeni zo . . . , zia i tene I yeda.” Amolenge ni akiri tene na kota go “I yeda!” Na pekoni lo fa fini buku Enfants, so azo ayamba ni na pikango sako so aninga.

Na peko ti diskur so apika bê, mbeni yongoro molongo ti apendere ague na mbage ti estrade ni, ndo so ita Rutherford amu na ala fini buku ni. Ye so azo aba apusu ala ti toto. Mbeni koli so aba ni na lê ti lo atene: “Gi zo so ayeke na bê pepe si alingbi pepe ti fa tene ti bê ti lo na bango apendere [so afa] ziango bê kue nga kota mabe na yâ Nzapa ti ala, Jéhovah.”

Na kota bungbi so zo alingbi ti glisa pepe, apendere 1 300 awara batême tongana fä ti mungo tele ti ala na Jéhovah. Mingi ti ala angbâ ti luti ngangu na yâ mabe juska fadeso. Ala mu maboko na akongregation ti ala, ala sala kusala na Béthel, wala ala sala kusala tongana amissionnaire na akodoro wande. Biani, “Lâ ti Amolenge” nga na buku Enfants asala ye mingi na ndo bê ti apendere mingi!

“Mo Ba A Tene Ala Si Tâ na Ngoi Ni”

Na yâ ti angu 1970 ti si na angu 1980, aTémoin ti Jéhovah asigigi na ambeni buku ota so andu bê ti apendere saki ngbangbo mingi. Abuku ni ayeke Écoutez le grand Enseignant, Votre jeunesse—Comment en tirer le meilleur parti, na Mbeti ti atene ti Bible. Na ngu 1982 molongo ti “Les jeunes s’interrogent . . . ” ato nda ti sigigi na yâ ti Réveillez-vous! A-article so andu bê ti apendere nga na ti akangba mingi. Mbeni pendere ti ngu 14 atene: “Na bï oko oko mbi kiri singila na Nzapa so lo sala si ala sigigi.” Mbeni maseka wali ti ngu 13 atene: “Mbi ye a-article so mingi, mo ba a tene ala si tâ na ngoi ni.” Ababâ na mama nga na a-ancien so a hiri ala na kusala ayeda so a-article ni asi tâ na ngoi ni nga asala nzoni.

Ti si na ngu 1989, a-article “Les jeunes s’interrogent” ndulu na 200 asigigi na yâ ti Réveillez-vous! Na Kota Bungbi ti District ti oko ngu so “La piété,” a sigigi na buku Les jeunes s’interrogent​—Réponses pratiques. Buku so amu maboko na apendere ti luti ngangu na yâ mabe? Apendere ota asû na mbeti: “Buku so aduti mbeni pendere gbakuru so amu lege na e ti gbu nda ti akpale ti e na ti hinga tongana nyen ti hon ndo ni. Singila teti bingo bê ti i na ndo nzoni duti ti e.” Apendere mingi so adiko ni na yâ sese kue ayeda na ni.

“A Kaï Nzala ti E”

Na 1999, aTémoin ti Jéhovah aleke mbeni mbage nde ti fango ye so asi na ngoi ni teti apendere: kasete vidéo Young People Ask—How Can I Make Real Friends? A ndu bê ti azo mingi. Mbeni maseka wali ti ngu 14 atene: “Kasete vidéo so alï tâ na yâ bê ti mbi.” Mbeni mama so ayeke gi lo oko ti bata amolenge atene: “A yeke duti ande lakue mbeni mbage ti tengo kobe ti e ti yingo ti lâ oko oko.” Mbeni maseka wali so amu koli atene: “A yeke ye ti mungo wâ na bê ti hinga so kota Kamarade ti e, Jéhovah, andoye e biani na abata apendere na yâ bungbi ti lo na ndo sese kue.”

Ye nyen kasete so asala? Apendere atene: “A mu maboko na mbi ti sala hange na akamarade ti mbi, ti hinga azo mingi na yâ ti kongregation, na ti sala si Jéhovah aga kamarade ti mbi.” “A mu maboko na mbi ti luti na gbele akamarade ti mbi.” “A sala si lekengo na bê ti mbi ti sala na Jéhovah na ngangu ti mbi kue akpengba.” Na mbeni koli na wali ti lo atene: “Singila mingi teti ‘kobe’ so i mu na e. A kaï nzala ti e.”

Na dutingo be-ta-zo na kusala so Nzapa amu na lo, “ngba ti be-ta-zo na ti ndara” so a sa yingo na ndo ti lo amu kobe ti yingo so asi na ngoi ni na azo kue so ayeke yeda ande na ni. Na so ye ti mungo ngia ti ba tongana nyen fango ye ti Mbeti ti Nzapa ayeke mu maboko na apendere laso ti ‘luti tongana azo so alingbi kue, na ti hinga na bê ti ala ye kue so Nzapa aye’!