A ga ndulu ti lungula kota nzara ni awe!
MO LINGBI ti hunda tele ti mo: ‘Mara ti kota nzara wa a sala tënë ni ge?’ A yeke kota nzara ti kobe na lege ti yingo! Mbeni prophète Hébreu ti giriri asala tënë ti kota nzara wala boma so tongana lo tene: “Seigneur L’Eternel atene, Bâ, lâ ni ayeke ga so fade Mbi to boma na sese ni. A yeke boma ti kobe pëpe, wala nzara ti ngu pëpe, me a yeke nzara ti mä tënë ti L’Eternel.” (Amos 8:11). Ti mû mbage na kaïngo nzara na lege ti yingo so, a tokua na yâ akodoro 19 ti acontinent na azoa oku, a-élève 48 ti klase 112 ti Guiléad, Ekole ti Société Watchtower, so ayeke na Patterson, na New York.
Ala yeke mû tâ nyama na le-kobe pëpe ti gue na ni na ando nde nde so, me ala yeke gue na hingango ye, kode nga na fango lege so ala wara. Teti anze oku, ala mû tele ti ala ti manda Mbeti ti Nzapa ngangu. Nda ti mandango ye so ayeke ti kpengba mabe ti ala teti kusala ti missionnaire na kodoro wande. Na lango 9 ti nze ti mars, 2002, azo 5 554 so aga teti programme ti mungo kota mbeti so adengi mê na ngia ti mä tënë.
Stephen Lett, so asala kusala tongana oko ti Wabatango Bungbi ti aTémoin ti Jéhovah, ato nda ti programme ni na ngia na bê. Lo tene na wâ gango nzoni mbilimbili na agene mingi so alondo na akodoro nde nde ti sese. Na pekoni, lo fa tongana nyen atënë ti Jésus so: “I yeke lumière ti sese so” andu kusala ti a-élève ni so ayeke gue ti ga amissionnaire (Matthieu 5:14). Lo tene: ‘Na yâ aterritoire so a tokua i dä, i yeke sala si alege nde nde ti apendere kusala ti Jéhovah “aza”, na mungo lege na azo ti be-ti-mbilimbili ti bâ pendere ti Jéhovah nga na ti aye so lo leke ti sala.’ Ita Lett awa amissionnaire ti sala kusala na lumière ti Tënë ti Nzapa, ti sigigi na nda ti bingo ti afango ye ti wataka, na ti fa lege na ala so ayeke gi tâ tënë.
Dutingo na nzoni bango ndo asala si kusala ni alë lengo
Na peko ti akozo tënë ti président ni, Baltasar Perla, oko ti Comité ti Filiale ti Amerika, amû kozo diskur ti molongo ti adiskur so a leke ni ti mû maboko na a-élève ni ti ga anzoni missionnaire. Li ti tënë ti diskur so lo mû ayeke: “Gbu ngangu, zia bê ti mo akpengba dä, na sala kusala ni”. (1 Chronique 28:20). A mû na Gbia Salomon ti Israël ti giriri ngangu kusala so lo sala kozoni lâ oko pëpe: A yeke kusala ti leke mbeni temple na Jérusalem. A yeke ye so Salomon asala; Jéhovah amû maboko na lo, na a hunzi lekengo temple ni. Na salango kusala na tapande so, Ita Perla atene: ‘A mû na i mbeni fini kungba, a yeke kungba ti ga missionnaire. Tongaso, a lingbi e gbu ngangu, na e duti na bê so akpengba’. A-élève awara biani dengo bê na zendo so Jéhovah ayeke zia ande ala lâ oko pëpe na ngoi kue so ala yeke ngbâ ndulu na lo. Ita Perla andu bê ti azo so aga na hunzingo tënë ti lo na lege ti mungo bango ndo ti lo mveni: ‘I lingbi ti sala nzoni mingi na dutingo amissionnaire. A yeke lani amissionnaire si a ga na tâ tënë na mbi nga na sewa ti mbi!’
Li ti tënë ti diskur so Samuel Herd, mbeni oko ti Wabatango Bungbi, amû ni ayeke so: “Bâ ndo na mbage ti Jéhovah ti sala nzoni kua.” A-élève so abi tele ti ala na yâ mbeni kusala ti missionnaire teti fini ti ala kue, na mingi ni, nzoni lengo ti kusala ti ala abâ songo so ala yeke na ni na Jéhovah. Ita Herd awa ala tongaso: ‘I manda aye mingi na yâ Bible na lege ti mandango ye ti i na Guiléad. I kamata ye ni na ngia. Fadeso, tongana i ye ti wara nzoni biani na yâ kusala ni, a yeke ti i ti mû na ambeni zo ye so i manda’. (Kusala 20:35). Fade amissionnaire ayeke wara alege mingi ti sala tongaso tongana ala ‘sa ala mveni’ teti ambeni zo.—aPhilippien 2:17.
Wango ti nda ni wa awafango mbeti na ekole ni ayeke soro ande ti mû na a-élève ni? Li ti tënë ti diskur so Mark Noumair amû aluti na ndo Ruth 3:18: ‘Duti kpô juska mo hinga nda ti tënë so’. Na salango kusala na tapande ti Naomi na Ruth, wamungo diskur ni awa a-élève ni ti zia bê kue na aye so bungbi ti Nzapa na sese aleke, na ti yekia yanga-ti-komande so Lo zia. Na ndungo bê ti a-élève ni, ita Noumair atene: ‘A lingbi ti si ande so i gbu nda ti mbeni desizion so a mû na ndo i pëpe, wala i pensé so a lingbi fade ti sala ye tongaso na mbeni lege nde. Fade i yeke sala tongana nyen? I yeke londo ti leke aye ni i mveni? Wala i yeke “duti kpô”, i zia bê na fango lege ti Nzapa, na hingango so, tongana ngoi ni asi, fade Nzapa ayeke sala si gi ye ti nzoni aga na pekoni?’ (aRomain 8:28). Wango ti ‘luti mingi na ndo aye so amaï kusala ti Royaume, na batango lê na ndo ye so bungbi ti Jéhovah ayeke sala, ahon ti bâ gi asalango ye ti azo ni’, ayeke duti ande wango ti ngele ngangu mingi teti amissionnaire so ayeke gue na yâ akodoro wande.
Wallace Liverance, so lo mveni asala kusala lani tongana missionnaire, na so fadeso ayeke wafango mbeti na Guiléad, amû ndangba diskur ti molongo ti adiskur so. Li ti tënë ti diskur ti lo ayeke so: “I zia lê gi na ndo kusala ti i, i ngbâ lakue na yâ kusala ti Nzapa.” Lo fa so tingo ti Babylone, nga ye so Jérémie afa kozoni awe, amû lege lani na prophète Daniel ti bâ so ngoi ti zingo azo ti Israël na gbe ti ngbâa aga ndulu awe (Jérémie 25:11; Daniel 9:2). Daniel ahinga ye kete na ndo molongo ti aye so Jéhovah aleke ti sala, na ye so amû maboko na lo ti zia lê gi na ndo gango tâ tënë ti aye so Nzapa aleke ti sala. Nde na so, azo ti Israël na ngoi ti prophète Aggée atene: ‘Lâ ni ade aga pëpe.’ (Aggée 1:2). Ala zia lê ti ala pëpe gi na ndo ngoi so ala yeke dä na ye so a ye ti tene, me ala zia lê ti ala mingi ahon na ndo nzoni duti ti ala nga na nzara ti bê ti ala, na ala zia lege ti kusala so a zi ala na ngbâa na Babylone ti ga ti sala, so ayeke kusala ti lekengo temple. Ita Liverance atene na nda ni: “Tongaso, i zia lê ti i gi na ndo kusala ni na batango lakue na li ye so Jéhovah aleke ti sala.”
Lawrence Bowen, wafango mbeti na Guiléad so amû tënë na pekoni, asala kusala tongana président ti mbage ti programme ni so andu li ti tënë so: “Jéhovah ahiri deba nzoni na ndo ala so asala kusala na Tënë so ayeke na fini”. (aHébreu 4:12). Mbage so aluti na ndo aye so asi na a-élève ni na angoi ti fango tënë, na a fa tongana nyen Jéhovah ahiri deba nzoni na ndo ala so asala kusala na Bible tongana ala yeke fa tënë na ala yeke fa ye. Ita Bowen afa so Jésus Christ azia nzoni tapande teti awakua ti Nzapa kue: ‘Jésus alingbi tâ na lege ni ti tene so ye so lo yeke fa alondo na lo mveni pëpe, me lo yeke fa Tënë ti Nzapa.’ Azo ti be-ti-mbilimbili abâ so a yeke tâ tënë, na ala sala ye alingbi na ni (Jean 7:16, 17). A yeke nga ye so e bâ laso.
Fango ye ti Ekole ti Guiléad amû na zo ye kue so alingbi teti nzo kusala
Na pekoni, Richard Abrahamson na Patrick LaFranca so aninga mingi na Béthel ahunda tënë na angbele élève omene ti Guiléad so ayeke sala kusala fadeso na yâ alege nde nde ti kusala ti ngoi kue. A-élève ti klase 112 awara ngia ti mä so, angu mingi na pekoni, atâa kusala wa so ala wara ti sala fadeso, amissionnaire omene so angbâ lakue ti sala kusala na fango lege so ala wara na Guiléad so andu mandango Bible, gingo nda ti aye, wala batango nzoni songo na azo.
Théodore Jaracz, mbeni oko ti Wabatango Bungbi, amû kota diskur ti programme ni. Li ti tënë ni ayeke: “Ye so gbungo ngangu na gbele kengo ndo ti Satan ayeke sala.” Na yâ anze oku so ahon, a-élève alango na yâ mbeni nzoni ndo ti ndoye, so Nzapa ayeda na ni. Ye oko, tongana ti so ala manda na ekole ni, e yeke na yâ mbeni sese so ayeke wato ti e. A yeke gi ti sala ngangu na azo ti Jéhovah na ndo sese kue (Matthieu 24:9). Na salango kusala na atondo ti Bible nde nde, Ita Jaracz atene so ‘lê ti Satan ayeke na ndo e. A lingbi e kpengba songo ti e na Jéhovah na e gi ti wara ngangu ti luti na gbele atara so ayeke ga.’ (Job 1:8; Daniel 6:4; Jean 15:20; Apocalypse 12:12, 17). Ita Jaracz atene na nda ni so atâa kengo ndo so azo angbâ ti fa na mbage ti azo ti Nzapa, tongana ti so Esaïe 54:17 atene giriri, fade mbeni ‘ye ti bira so azo asala ti ke i na ni alingbi sala ye na i pëpe. Fade Jéhovah ayeke sala kue ti zi e na ngoi so lo ye, nga na lege so lo ye.’
Teti so ala “wara ye kue alingbi”, kite ayeke pëpe so a-élève ti klase 112 ti Guiléad ayeke sala ande ye mingi ti lungula kota nzara ti kobe ti yingo na yâ akodoro so ala yeke sala ande kusala dä (2 Timothée 3:16, 17). E yeke ku na wâ ti wara atondo na ndo lege so ala yeke fa na tokua ti mungo kobe ti yingo na azo ti akodoro so.
[Encadré na lembeti 23]
AYE TI HINGA NA NDO KLASE NI
Wungo ti akodoro so a-élève ni alondo dä: 6
Wungo ti akodoro so a tokua ala dä: 19
Wungo ti a-élève ni: 48
Wungo ti ngu ti zo oko oko: 33.2
Wungo ti ngu so zo oko oko asala na yâ tâ tënë: 15.7
Wungo ti ngu so zo oko oko asala na yâ kusala ti ngoi kue: 12.2
[Foto na lembeti 24]
Ala so awara kota mbeti na klase 112 ti Guiléad, Ekole ti Mandango Bible ti Société Watchtower
Na yâ bungbi ti a-iri so a fa na gbe ni ge, a fa numéro ti amolongo ni ti londo na devant ti kiri na peko, nga na ndo molongo oko oko, a fa iri ti azo ni ti londo na gati ti gue na mbage ti koti.
(1) Parotte, M.; Hooker, E.; Anaya, R.; Reynolds, J.; Gesualdi, K.; Gonzalez, J. (2) Robinson, C.; Phillips, B.; Maidment, K.; Moore, I.; Noakes, J.; Barnett, S. (3) Stires, T.; Palmer, B.; Yang, C.; Groothuis, S.; Groppe, T.; Bach, C. (4) Anaya, R.; Soukoreff, E.; Stewart, K.; Simozrag, N.; Simottel, C.; Bach, E. (5) Stewart, R.; Yang, H.; Gilfeather, A.; Harris, R.; Barnett, D.; Parotte, S. (6) Maidment, A.; Moore, J.; Groothuis, C.; Gilfeather, C.; Noakes, S.; Stires, T. (7) Gesualdi, D.; Groppe, T.; Soukoreff, B.; Palmer, G.; Phillips, N.; Simottel, J. (8) Harris, S.; Hooker, P.; Gonzalez, J.; Simozrag, D.; Reynolds, D.; Robinson, M.