Fade e tambela na iri ti Jéhovah teti lakue lakue!

“Fade e tambela na iri ti L’Eternel [“Jéhovah”, NW ] Nzapa ti e lakue lakue.”​—MICHÉE 4:5.

JÉHOVAH ayeke na mbeni tënë ti tene na azo ti lo, na lo yeke sala kusala na Michée tongana prophète ti lo. Lo leke na bê ti lo ti londo na tele ti azo ti sioni. Lo leke ti fâ ngbanga ti sioni na ndo Israël teti so lo bele mabe ti lo na Nzapa. Me ye so amû ngia mingi ayeke so Jéhovah ayeke hiri ande deba nzoni na ndo ala so atambela na iri ti lo. A yeke atënë so asigigi polele na yâ achapitre 3 ti si na 5 ti prophétie ti Michée.

² Prophète ti Nzapa atene: “I mä tënë! i amokonzi ti azo ti Jacob, na i amokonzi ti azo ti da ti Israël; a yeke ngbanga ti i ti hinga lege ti fango ngbanga ti mbilimbili pëpe?” Tâ tënë, a yeke ngbanga ti ala ti sala tongaso; ye oko, ye nyen ala yeke sala biani? Michée atene: “I so i ke ye ti nzoni na i ndoye sioye; i so i lungula poro ti tele ti azo na i lungula mi na tele ti bio ti ala. Ala te mi ti azo ti mbi, na ala lungula poro ti tele ti ala, ala fâ bio ti ala, ala fâ mi ti ala ndulu ndulu tongana zo afâ nyama ti tö na ta, même tongana nyama na yâ kota ta.”​—Michée 3:1-3.

³ Amokonzi ni ayeke sala ngangu na awanzinga so ayeke na mbeni ye ti bata na tele ti ala pëpe. Ti ala so ayeke mä Michée, atapande so a sala na kusala ge ayeke aye so zo alingbi ti gbu nda ni hio. Tongana a mû mbeni taba so a fâ lo awe, si a tö ni na wâ, a yeke zi kozoni kue poro ti tele ti lo; na pekoni, a yeke zi ambage ti tele ni oko oko. Ngoi na ngoi, a yeke fâ yâ ti abio ni ti zi mafuta so ayeke na yâ ni. A yeke mû mi ti nyama ni nga na abio ni kue na a yeke tö ni na yâ mbeni mara ti kota ta so Michée asala tënë ni (Ezéchiel 24:3-5, 10). Tapande ni alingbi tâ na ni biani ti fa aye ti sioni kue so azo ni na ngoi ti Michée ayeke wara na mbage ti asioni mokonzi ni.

Jéhovah ayeke ku na mbage ti e ti sala mbilimbili

⁴ Tâ kota kangbi ayeke na popo ti Jéhovah so ayeke mbeni Berger so asala ye na ndoye, nga na amokonzi ti Israël. Teti so ala sala ye na lege ti mbilimbili pëpe, ala sala pëpe ye so a ku na mbage ti ala, so ti tene ti bata kundu ni. Nde na so, ala yeke sala kusala na kundu ti azo ni ti wara faïda ti sioni na pekoni, na fango ngbanga ti mbilimbili pëpe na ndo ala nga na salango sioni na ala “na lege ti mênë”, tongana ti so Michée 3:10 atene. Ye nyen e lingbi ti manda na ndo so?

⁵ Nzapa ayeke ku na mbage ti ala so amû li ni na popo ti azo ti lo ti sala ye na lege ti mbilimbili. A yeke ye so a yeke ku nga na mbage ti awakua ti Jéhovah laso. Nga, ye so ague oko na tënë ti Esaïe 32:1, so atene: “Bâ, fade gbia akomande na lege ti mbilimbili, na amokonzi akomande na lege ti fango ngbanga ti mbilimbili.” Ye oko, na ngoi ti Michée, ye nyen e bâ? ‘Azo so ake ye ti nzoni na andoye sioye’ angbâ lakue ti gbian yâ ti fango ngbanga ti mbilimbili.

Jéhovah ayeke mä sambela ti azo wa?

⁶ Azo ti sioni ti ngoi ti Michée alingbi ti ku tele ti ala ti wara deba nzoni ti Jéhovah? Biani, a lingbi ti duti tongaso pëpe! Michée 3:4 atene: “Fade ala toto na L’Eternel, me fade Lo kiri tënë na ala pëpe; biani, fade Lo honde lê ti Lo na ala na lâ ni kâ, ngbanga ti sioye so ala sala.” Versê so agboto lê ti e na ndo ti mbeni kpengba tënë.

⁷ Jéhovah ayeke kiri tënë oko pëpe na asambela ti e tongana e yeke lango na yâ siokpari. Ye ni ayeke duti tongaso tongana e sala ye na lege ti ndendia, na hondengo aye ti sioni so e yeke sala, me na gingo ti fa na lê ti azo so e yeke be-ta-zo na yâ kusala ti e na Nzapa. Na Psaume 26:4, David atene: “Mbi duti pëpe na azo ti handa, na mbi tambela pëpe na awandendia.” Nga, Jéhovah ayeke mä oko pëpe asambela ti ala so adoro Tënë ti lo tâ na mbana.

Yingo ti Nzapa amû ngangu na azo

⁸ So tâ aye ti sioni si ayeke tambela biani na popo ti amokonzi ti vorongo na Israël! Aprophète ti wataka ayeke sala si azo ti Nzapa ague kirikiri na lege ti yingo. Amokonzi so bê asala ala ayeke dekongo “Siriri!”, me ti bâ ni nzoni, ala yeke ndulu ti sala bira na zo kue so aye ti zia kobe na yanga ti ala pëpe. Ni la, Jéhovah atene: “Fade bï aga na ndo i si i bâ ye tongana suma pëpe. Fade ndo avuko na ndo i si i lingbi gi bendo pëpe. Fade lâ akui na ndo aprophète; même na lâ, fade ndo avuko na li ti ala. Fade kamene agbu azo ti bâ nda ti ye, na bê ti awagingo bendo adö; fade ala gbu yanga ti ala [“ala kanga ye na ndo kua-yanga ti ala”, NW ].”​—Michée 3:5-7a.

⁹ Ngbanga ti nyen ala yeke “kanga ye na ndo kua-yanga ti ala”? Azo ti sioni ti ngoi ti Michée ayeke sala ni ngbanga ti kamene. Na biani a lingbi azo ti sioni so aduti na kamene teti na bango ndo ti ala, “Nzapa akiri tënë na ala pëpe.” (Michée 3:7b). Jéhovah adengi mê oko pëpe na asambela ti azo ti sioni so ayeke na fandara.

¹⁰ Michée ayeke na nda ti tënë oko pëpe ti “kanga ye na ndo kua-yanga ti lo”. Kamene asala lo pëpe. Jéhovah akiri tënë na asambela ti lo. Bâ tënë ti Michée 3:8; na ndo so, prophète be-ta-zo ni atene: “Me ti mbi, mbi si na ngangu na Yingo ti L’Eternel, na fango ngbanga ti mbilimbili, na ngangu mingi.” Michée akiri singila mingi teti so na yâ fini ti lo so lo sala kusala be-biani aninga, lo ‘si na ngangu na yingo ti Jéhovah’ lakue. Ye so amû lege na lo ti “fa na Jacob kengo-ndia ti lo na [ti] fa na Israël siokpari ti lo.”

¹¹ Ti fa tënë ti fango ngbanga ti Nzapa na ndo ye ti sioni, a hunda lani na Michée ti duti na ngangu so ahon ti azo. Yingo ti Jéhovah, so ti tene ngangu ti Lo so Lo yeke sala na kusala, ayeke kota ye mingi. Ka ti e ayeke tongana nyen? E lingbi ti sala kusala ti e ti fango tënë tâ nzoni gi tongana Jéhovah akpengba e na lege ti yingo vulu ti lo. Tongana e ngbâ ti sala siokpari na mbana, kusala ti e ti fango tënë ayeke ga gi ye senge. Na yâ ye so, Nzapa alingbi pëpe ti mä e tongana e hunda na lo ngangu ti sala kusala so. Biani, e lingbi ti fa atokua ti fango ngbanga ti Babâ ti e ti yayu gi tongana ‘yingo ti Jéhovah’ ayeke na ndo e. Na lege ti asambela so Nzapa amä nga na lege ti mungo maboko ti yingo vulu, e yeke wara ngangu ti fa tënë ti Nzapa na mbito pëpe legeoko tongana Michée.

¹² Peut-être mo dabe mo na tondo ti Kusala 4:23-31. Bâ so mo yeke fade mbeni oko ti adisciple ti Jésus na kozo siècle. Asioni wasalango ngangu ayeke gi lege ti kanga yanga ti adisciple ti Christ. Me adisciple be-ta-zo so asambela Kota Gbia ti ala, ala tene: “[Jéhovah], Mo bâ lege so ala yeke zingo, na Mo mû ngangu na aboi ti Mo ti fa tënë ti Mo na mbito pëpe.” Ye nyen asi na pekoni? Tongana ala hunzi sambela ti ala ni awe, ndo so ala bungbi dä ayengi ngangu; na ala kue asi na yingo vulu na ala fa tënë ti Nzapa na mbito pëpe. Tongaso, zia e gi Jéhovah na e hunda mungo maboko ti yingo vulu na ngoi so e yeke sala kusala ti e ti fango tënë.

¹³ Kiri mo gbu li na ndo alâ ti Michée. Michée 3:9-12 afa so amokonzi ni so ngbanga ti mênë ayeke na li ti ala ayeke fâ ngbanga na lege ti petengo goro; aprêtre ni ayeke fa ye gi ti wara faïda na pekoni, na aprophète ti wataka ayeke bi tele ti ala na yâ gingo bendo ti wara nginza dä. Ni la, bê ti e adö pëpe tongana Nzapa amû yanga so fade li-kodoro ti Juda, Jérusalem, ‘ayeke ga kundu ti tênë’. Teti so vorongo ti wataka na sioni tambela amaï lani mingi na Israël, yingo ti Nzapa apusu Michée ti tene so fade Nzapa ayeke sala si Samarie aga “kundu ti tênë”. (Michée 1:6). Biani, prophète ni angbâ lani na fini aninga, ti bâ na lê ti lo futingo ti Samarie so a sala tënë ni kozo awe; na a yeke aturugu ti Assyrie si afuti gbata ni na ngu 740 kozoni na ngoi ti e (2 aGbia 17:5, 6; 25:1-21). E bâ polele so a lingbi lani ti mû angangu tokua so a bi ni na ndo Jérusalem na Samarie so gi na ngangu ti Jéhovah.

¹⁴ Juda alingbi biani pëpe ti kpe ngbanga ti Jéhovah na ndo lo. Tongana ti so prophétie ti Michée 3:12 atene, fade a yeke “dë Sion legeoko tongana zo adë yaka ti lo”. Na lege ti bango ndo ti e ti aye laso, e hinga so aye so aga tâ tënë tongana azo ti Babylone afuti Juda na Jérusalem na ngu 607 kozoni na ngoi ti e. Ye so asi angu mingi na pekoni so Michée afa atënë ti prophétie ti lo; me lo hinga lani biani so fade a yeke ga tâ tënë. E nga kue a lingbi e hinga nga biani na bê ti e so fade sioni sese ti laso ayeke hunzi na ‘lâ ti Jéhovah’ so a fa tënë ni kozo.​—2 Pierre 3:11, 12.

Jéhovah aleke tënë

¹⁵ Na kiringo na ngoi ti giriri, e bâ so na pekoni Michée afa mbeni tokua ti beku so amû wâ na bê. So tâ atënë ti mungo wâ na bê si e wara na Michée 4:1-4! Michée atene: “Na lâ ti nda ni fade tënë asi tongaso, A sala si hoto ti da ti L’Eternel aga li ti ahoto kue, na A yä hoto so na nduzu ahon ambeni hoto kue; na azo ague kâ tongana ngu so asua. . . . Fade lo fâ ngbanga na popo ti amara; Lo leke tënë ti amara ti ngangu so ayeke na yongoro ndo; fade ala pika épée ti ala si a ga soc, na likongo ti ala si a ga zeme ti fâ tikeke; fade mara ayä épée na tele ti mbeni mara pëpe, na ala manda ti sala bira mbeni pëpe. Fade azo oko oko kue aduti na gbe ti vigne ti ala mveni, na gbe ti keke ti figue ti ala mveni; zo oko ti mû mbito na ala ayeke pëpe teti yanga ti L’Eternel Ti Sabaoth asala tënë ni awe.”

¹⁶ “Amara” na “amara ti ngangu” so a sala tënë ti ala ge ayeke azo wa? Ala yeke pëpe amara na ayanga-ti-komande ti sese so. Nde na so, prophétie ni andu azo ti amara nde nde so laso abungbi oko na yâ kusala ti nzoni-kue so ala sala na hoto ti Jéhovah so aduti fä ti tâ vorongo.

¹⁷ Tongana ti so prophétie ti Michée ni afa, na yâ ngoi kete fade tâ vorongo ti Jéhovah so ye ti sioni ayeke dä oko pëpe ayeke mû ndo lê sese kue. Laso, ala so “ayeke na yâ mbilimbili dutingo so a hunda teti fini ti lakue lakue” ayeke wara fango ye so andu alege ti Jéhovah (Kusala 13:48, NW ). Jéhovah ayeke fâ ngbanga na lo yeke leke tënë na lege ti yingo teti awavorongo lo so amû mbage ti Royaume. Fade ala yeke sö fini ti ala na yâ “kota ye ti vundu” tongana mbeni mbage ti “azo mingi so asi singo”. (Apocalypse 7:9, 14). Teti so ala leke épée ti ala ti ga soc, laso ala yeke na siriri na ambeni Témoin ti Jéhovah nga na ambeni zo nde. So tâ ye ti ngia biani ti duti na popo ti ala!

E ye tâ gi ti tambela na iri ti Jéhovah

¹⁸ Na ngoi ti e, tongana mbito amû sese kue mo bâ mo tene mbinda ti ngu, e yeke na ngia so azo mingi ayeke manda alege ti Jéhovah. E yeke ku kungo ngoi so aga ndulu awe, so mara ti azo kue tongaso, so andoye Nzapa, ayeke manda mbeni pëpe ti sala bira, me fade ala yeke duti na gbe ti vigne ti ala, nga na gbe ti keke ti figue ti ala. Mingi ni, a yeke lu ka akeke ti figue na yâ ayaka ti vigne (Luc 13:6). Ti duti na gbe ti vigne nga na gbe ti keke ti figue ayeke tongana fä ti angoi ti siriri, ti maïngo ti aye, nga na ti nzoni dutingo. Même ti fadeso, songo ti e na Jéhovah amû lege na e ti duti na siriri ti bibe nga na nzoni dutingo na lege ti yingo. Tongana mara ti aye so asi ande na gbe ti komandema ti Royaume, fade e yeke duti na mbito oko pëpe nga na nzoni dutingo kue.

¹⁹ Ti wara deba nzoni ti Jéhovah, a lingbi e tambela na iri ti lo. A yeke ye so a fa ni tâ polele mingi na Michée 4:5; na ndo so, prophète ni atene: “Azo kue atambela na iri ti anzapa ti ala, me fade e tambela na iri ti L’Eternel [“Jéhovah”, NW ] Nzapa ti e lakue lakue.” Tongana a sala tënë ti tambela na iri ti Jéhovah, a bâ gi pëpe senge tenengo na yanga so Lo yeke Nzapa ti e. A hunda ye mingi ahon gi senge mungo mbage ti e na abungbi nga na fango tënë ti Royaume, atâa so akusala so ayeke nga kota ye mingi. Tongana e yeke tambela na iri ti Jéhovah, e yeke mû tele ti e kue na lo na e yeke sala kue ti sala kusala be-biani na lo na yengo lo na âme ti e kue (Matthieu 22:37). Nga teti so e yeke voro lo, kite ayeke pëpe so e ye tâ gi ti tambela na iri ti Jéhovah Nzapa ti e teti lakue lakue.

²⁰ Fadeso, e wa mo ti bâ atënë ti prophétie so a wara na Michée 4:6-13. A lingbi “molenge-wali ti Sion” ague na ngbâa “juska na Babylone”. A yeke tâ ye so asi lani na azo ti Jérusalem na ngu 607 kozoni na ngoi ti e. Ye oko, prophétie ti Michée afa so fade mbeni tanga ti azo ni ayeke kiri na Juda, na tongana a kiri na aye na place ni kâ na Sion, fade Jéhovah ayeke sala si a neka awato ti Sion ni.

²¹ A fa nga ambeni ye ti kpene ni na Michée chapitre 5. Na tapande, bâ tënë so afa na Michée 5:1-3. Michée afa so fade Mokonzi so Nzapa asoro, “Lo so kusala ti lo akomanse giriri kozoni”, ayeke sigigi na Bethléhem. Fade lo yeke komande tongana mbeni berger ‘na yâ ngangu ti Jéhovah’. Na ndo ni, fade Mokonzi so ayeke ga kota, pëpe gi na Israël me nga “juska na nda ti sese kue”. Peut-être azo ti sese mingi ahinga Mokonzi so pëpe, me a yeke ye ti ndima oko pëpe teti e.

²² Zo ti kota ahon atanga ni kue so a dü lo lani na Bethléhem ayeke zo wa? Nga zo wa si ayeke ga ande “kota juska na nda ti sese kue”? A yeke gi Messie, Jésus Christ! Tongana Hérode ti Kota ahunda na amokonzi ti aprêtre nga na ascribe ndo so a yeke dü Messie dä, ala tene: “Na Bethléhem ti Judée.” Ala tënë même peko ti atënë so a wara na Michée 5:1 (Matthieu 2:3-6). Ambeni zo na popo ti azo ti mara ni ahinga tënë ni nga, teti Jean 7:42 afa peko ti tënë ti yanga ti ala so ala tene: “Mbeti ti Nzapa atene pëpe? Christ ayeke ti ahale ti David, na Lo londo na Bethléhem, kodoro so David ayeke dä giriri.”

Tâ dengo bê teti mara ni

²³ Michée 5:4-14 asala tënë ti azo ti Assyrie so ayeke lï ande na yâ ti kodoro teti kete ngoi, na afa nga so fade Nzapa ayeke fâ ngbanga na ndo amara so ake yanga. Michée 5:6 amû zendo so fade a yeke kiri ande na mbeni tanga ti aJuif so agbian bê ti ala ti ga na sese ti ala, me atënë ni andu ngoi ti e nga. Michée atene: “Fade tanga ti azo ti Jacob ayeke na popo ti azo mingi tongana mamio so alondo na L’Eternel, tongana ngu-nduzu so apika na ndo pele, so aku zo pëpe wala aku amolenge ti azo pëpe.” A sala kusala na pendere tënë so ti fa so fade tanga ti azo ti Jacob wala Israël ti yingo ayeke duti ande mbeni deba nzoni so alondo na Nzapa teti azo. “Ambeni ngasangbaga” ti Jésus so ayeke na beku ti wara fini na sese ayeke na ngia ti sala kusala maboko na maboko na tanga ti “Israël ti Nzapa” ti laso ti dë bê ti azo na lege ti yingo (Jean 10:16; aGalate 6:16; Sophonie 3:9). Na ndo tënë so, mbeni ye ayeke dä so a lingbi e gbu li na ndo ni. Teti so e yeke awafango tënë ti Royaume, a lingbi e yekia matabisi ti e ti ga na tâ dengo bê na amba ti e.

²⁴ Ye nyen e manda na yâ achapitre 3 ti si na 5 ti prophétie ti Michée? Peut-être atënë tongana ti so: (1)  Nzapa ayeke ku na mbage ti ala so amû li ni na popo ti azo ti lo ti fâ ngbanga na lege ti mbilimbili. (2) Jéhovah ayeke mä sambela ti e pëpe tongana e sala siokpari na mbana. (3) E lingbi ti sala kusala ti e ti fango tënë gi tongana Nzapa akpengba e na lege ti yingo vulu ti lo. (4) Ti wara deba nzoni ti Jéhovah, a lingbi e tambela na iri ti lo. (5) Teti so e yeke awafango tënë ti Royaume, a lingbi e yekia matabisi ti e ti mû tâ dengo bê na azo. Peut-être ambeni ye nde ayeke nga dä so apika bê ti e. Aye wa e lingbi nga ti manda na yâ buku ti prophétie so? Fade article ti peko ayeke mû maboko na e ti hinga aye so e lingbi ti manda laso na ndo andangba chapitre use ti prophétie ti Michée so akpengba mabe biani.

Fade mo kiri tënë tongana nyen?

• Ye nyen Nzapa ayeke ku na mbage ti ala so ayeke mû li ni na popo ti azo ti lo?

• Ngbanga ti nyen sambela na yingo vulu ayeke kota ye mingi na yâ kusala ti e teti Jéhovah?

• Tongana nyen azo ayeke ‘tambela na iri ti Jéhovah’?

[Ahundango tënë ti manda na ye]

1. Atënë wa e wara ni na yâ achapitre 3 ti si na 5 ti Michée?

2, 3. (a) A lingbi amokonzi ti Israël agi ti fa na gigi mara ti lengo wa? Me ahon ti sala tongaso, ye nyen ala yeke sala? (b) Mo yeke fa ande peko ti atapande ti Michée 3:2, 3 so tongana nyen?

4. Kota kangbi wa a yeke na popo ti Jéhovah na amokonzi ti Israël?

5. Ye nyen Jéhovah ayeke ku na mbage ti ala so amû li ni na popo ti azo ti lo?

6, 7. Kpengba tënë wa a wara ni na Michée 3:4?

8. A gboto mê ti aprophète ti wataka ti ngoi ti Michée na ndo nyen?

9, 10. Tongana a sala tënë ti ‘kangango ye na ndo ti kua-yanga’, ye so aye ti tene nyen? Nga ngbanga ti nyen Michée ayeke na nda ti tënë oko pëpe ti sala mara ti ye tongaso?

11. Tongana nyen azo ayeke wara ngangu ti fa atënë ti Nzapa?

12. Ngbanga ti nyen akozo disciple ti Jésus alingbi lani ti ‘ngbâ ti fa tënë ti Nzapa na mbito pëpe’?

13. Ye nyen ayeke si ande na Jérusalem na Samarie? Na ngbanga ti nyen?

14. Tongana nyen prophétie so a sû ni lani na Michée 3:12 aga tâ tënë? Na lege wa a lingbi prophétie so asala ngangu na ndo e?

15. Na atënë ti mo mveni, tongana nyen mo yeke fa ande peko ti atënë ti prophétie so a sû na Michée 4:1-4?

16, 17. Tongana nyen prophétie ti Michée 4:1-4 ayeke ga tâ tënë laso?

18. Tongana a tene so ‘zo oko oko aduti na gbe ti vigne ti lo na ti figue ti lo’, a ye ti tene nyen?

19. Ti tambela na iri ti Jéhovah aye ti tene nyen?

20. Michée 4:6-13 afa tënë ti ye wa so ayeke si?

21, 22. Tongana nyen prophétie ti Michée 5:1 aga tâ tënë?

23. Ye nyen ayeke si laso na gango tâ tënë ti Michée 5:6?

24. Atënë wa so a yeke na yâ achapitre 3 ti si na 5 ti Michée apika bê ti mo?

[Foto na lembeti 15]

Mo lingbi ti fa nda ti tapande ti Michée na ndo ta ti tongo kobe?

[Afoto na lembeti 16]

Tongana Michée, e yeke sala kusala ti e ti fango tënë na mbito pëpe