Tongana nyen la e lingbi ti ngbâ lakue ti ‘ku’?

1. Nyen la alingbi ti sara si ambeni na popo ti e angbâ ti kanga bê ape?

ALANGO ti ndani ti dunia ti Satan ato nda ni na ngu 1914 na ngoi so a zia Christ Gbia na yayu. A yeke lani na ngu so la mbeni bira alondo na yayu na Jésus abi Zabolo na asioni yingo ti lo na sese. (Diko Apocalypse 12:7-9.) Satan ahinga so “lo yeke na ngoi mingi pëpe.” (Apoc. 12:12). Me ‘ngoi so ayeke mingi pëpe’ so aninga mingi ahon ti so ambeni na popo ti e aku tere ti ala na ni. Na ngoi so e yeke ku Jéhovah ti futi dunia ti Satan, e yeke ngbâ ti kanga bê?

2. Article so ayeke kiri tënë na ahundango ndo wa?

² Tongana e kanga bê ape alingbi ti ga na e kpale, ndali ti so a lingbi ti pusu e ti sara mbeni ye sân ti gbu li ti e kozo. Tongana nyen la e lingbi ti ngbâ lakue ti ku? Ahundango ndo so ayeke na gbe ni ge, so article so ayeke kiri tënë na ni, ayeke mû ande maboko na e ti sara ni. (1) Nyen la e lingbi ti manda na ndo ti kangango bê na lege ti tapande ti Michée? (2) Aye wa ayeke si ande so ayeke fa so e ga nduru na futingo ti dunia so awe? (3) Na lege wa e lingbi ti kiri singila na Nzapa ndali ti so lo kanga bê ti ku?

E LINGBI TI MANDA NYEN NA LEGE TI TAPANDE TI MICHÉE?

3. Sarango ye ti amolenge ti Israël ayeke tongana nyen na ngoi ti Michée?

³ Diko Michée 7:2-6. Michée so ayeke prophète ti Nzapa abâ lani so amolenge ti Israël akomanse ti sara aye so ague nde na aye so bê ti Nzapa aye. A si na ngoi so sioni Gbia Akaz akomande, ala kiri asara ye ague tâ nde mingi na ye so bê ti Nzapa aye. Michée atene amolenge ti Israël so ayeke be-ta-zo pëpe ayeke tongana “keki” nga na “gbagba ti kî.” Akî wala gbagba ti kî ayeke kpaka zo na kä tongana lo hon na yâ ni. Azo ti Israël so ayeke be-ta-zo pëpe ayeke tongana akî so ndali ti so ala sara ye na azo na lege ni ape na ayeke son azo ni. Aye ni so ala sara so akiri aga sioni mingi na a sara si même azo ti yâ ti sewa aye tere pëpe. Michée ahinga so lo lingbi ti sara ye oko pëpe ti kaï kpale ni so, tongaso lo sambela Jéhovah na bê ti lo kue. Na pekoni lo kanga bê ti lo lo ku Jéhovah ti leke kpale ni. Michée ayeke lani na kite pëpe so Jéhovah ayeke leke kpale ni na ngoi so lo wani lo soro.

4. Akpale wa e yeke tingbi na ni?

⁴ Legeoko tongana ti Michée, e nga laso e yeke na popo ti azo so abi bê gi na ala wani. Azo mingi ayeke “azo so ahinga ti kiri singila pëpe, azo so ayeke abe-ta-zo pëpe, azo so aye amba ti ala zo pëpe”. (2 Tim. 3:2, 3). A yeke sara e vundu mingi tongana azo ti place ti kua ti e, azo so e na ala e sara ekole oko wala avoizin ti e abi bê gi na ala wani. Me ambeni wakua ti Jéhovah awara même mbeni kpale so ayeke ngangu mingi ahon ati so. Jésus atene so fade afami ti adisciple ti lo ayeke kanga lege na ala, na lo sara kua na mara ti tënë so ayeke na Michée 7:6. Lo tene: “Teti mbi ga ti zia kangbi: Fade molenge-koli ake babâ ti lo, molenge-wali ake mama ti lo, na wali so ade maseka ake mama ti koli ti lo. Ti tâ tënë ni, fade awato ti zo ayeke duti azo ti da ti lo wani.” (Mat. 10:35, 36). Na ngoi so ambeni zo ti sewa ti e so avoro Jéhovah pëpe ahe e wala akanga lege na e, a lingbi ti duti ngangu na e ti kanga bê. Tongana e yeke na yâ ti mara ti ye so, a lingbi e zia si a sara ngangu na ndo ti e ape. A lingbi e ngbâ be-ta-zo na Jéhovah na e kanga bê e ku lo ti leke kpale ni. Tongana e hunda lo lakue ti mû maboko na e, lo yeke kpengba e na lo yeke mû na e ndara so e yeke na bezoin ni ti ngbâ be-ta-zo na lo.

5, 6. Jéhovah afuta lani Michée tongana nyen? Nyen la Michée abâ lani singo ni ape?

⁵ Jéhovah afuta Michée teti so lo kanga bê lo ku. Michée abâ tingo ti Gbia Akaz na sioni komandema ti lo. Lo bâ nzoni Gbia Ézéchias, so ayeke molenge ti Akaz, amû mbata ti gbia na lo mû maboko na amolenge ti Israël ti kiri ti voro Jéhovah na lege ni. Michée abâ nga tongana nyen la aye so lo tene na yâ ti prophétie na ndo ti Samarie asi na ngoi so Assyrie amû mbage ti royaume ti banga ti Israël na ngangu.​—Mi. 1:6.

⁶ Me Michée abâ lani kue pëpe singo ti aprophétie so Jéhovah atene na lo ti sû ni ndali ti so lo kui kozo ti tene aprophétie ni aga tâ tënë kue. Na tapande, Michée atene: “Na lâ ti nda ni fade . . . hoto ti da ti L’Éternel aga li ti ahoto kue, na A yä hoto so na nduzu ahon ambeni hoto kue; na azo ague kâ tongana ngu so asua. Amara mingi ague, ala tene, I ga, zia e ma na Hoto ti L’Éternel.” (Mi. 4:1, 2). Michée akui aninga kozo si aye so lo tene na yâ ti prophétie so aga tâ tënë. Michée aleke na bê ti lo ti ngbâ lakue be-ta-zo na Jéhovah juska na kuâ, atâa ye wa la azo so angoro lo asara. Lo tene: “Azo kue atambela na iri ti anzapa ti ala, me fade e tambela na iri ti L’Éternel Nzapa ti e lakue lakue.” (Mi. 4:5). Michée akanga bê na yâ ti angoi ti ngangu so teti so lo hinga na bê ti lo kue so Jéhovah ayeke sara si aye kue so lo mû zendo ni asi biani. Prophète be-ta-zo so azia lani bê ti lo kue na Jéhovah.

7, 8. (a) Raison wa la e yeke na ni ti zia bê ti e kue na Jéhovah? (b) Nyen la alingbi ti sara si e bâ so ngoi ahon hio mingi?

⁷ Mo zia bê ti mo kue na Jéhovah tongana ti Michée so? Mo yeke na nzoni raison ti zia bê ti mo na Jéhovah tongaso. E bâ so, aye so Michée asara tënë ni na yâ ti prophétie ti lo aga tâ tënë. Na ngoi ti alango ti nda ni so, azo kutu na kutu alondo na popo ti amara kue na akete mara kue nga na ayanga ti kodoro kue aga na “hoto ti da ti L’Éternel”. Atâa so ala londo na popo ti amara so amä tere ape, awakua ti Jéhovah so apika “épée ti ala si a ga soc” nga ala “manda ti sara bira mbeni pëpe.” (Mi. 4:3). A yeke mbeni kota pasa la e yeke na ni ti duti mbeni oko ti awakua ti Jéhovah so ayeke na siriri!

⁸ E kue e ye ti tene Jéhovah afuti sioni dunia ti Satan so fade fadeso. Me ti tene e ngbâ ti kanga bê ti ku, a lingbi e duti na oko bango ndo ti Jéhovah. Lo soro mbeni lango awe so lo yeke fâ ande ngbanga na ndo ti azo “na lege ti mbeni koli so lo zia lo,” Jésus Christ (Kus. 17:31). Me kozo ti tene ngoi ni so alingbi, Nzapa amû lege na azo kue ti “si na tâ hingango ye na ndo ti tâ tënë”, ti sara ye alingbi na hingango ye ni so na ti sö fini ti ala. A lingbi e girisa ape so fini ti azo ayeke na yâ ti kpale (Diko 1 Timothée 2:3, 4.) Tongana e yeke bi tere ti e kue ti mû maboko na azo ti hinga Nzapa, e yeke bâ so ngoi so angbâ ti tene Jéhovah afâ ngbanga ti azo ayeke hon hio hio mingi. Na yâ ti kete ngoi, même na mbeni ngoi so e ku tere ti e na ni ape, ngoi ni ayeke hunzi. Na ngoi so futingo ni so ayeke si, a yeke nzere ande na e mingi so e bi tere ti kue na yâ ti kua ti fango tënë.

AYE SO AYEKE SI ANDE SO AFA SO E GA NDURU NA FUTINGO TI DUNIA SO

9-11. Tënë so ayeke na 1 aThessalonicien 5:3 aga tâ tënë lani awe? Fa ngbanga ti nyen la mo tënë tongaso.

⁹ Diko 1 aThessalonicien 5:1-3. Na yâ ti kete ngoi, azo ti amara ayeke tene, “Siriri na nzoni duti ayeke dä!” Tongana e ye ti tene tënë so ahanda e ape, a lingbi e “zia lê ti e angbâ na zingo ni na e zia li ti e kpô.” (1 aThes. 5:6). Ti mû maboko na e ti lango pëpe na lege ti yingo, zia e bâ ambeni ye so asi so ayeke mû lege na azo ti tene, “Siriri na nzoni duti ayeke dä!”

¹⁰ Na peko ti kozo bira nga na use bira so amû sese kue, amara ahunda ti duti na siriri. Na peko ti kozo bira ni, a sigigi na Bungbi ti Amara na beku ti tene lo sara si siriri akiri. Kete na peko ti use bira ni, azo azia beku ti ala na Bendo ti Gigi ti ga na siriri na ndo ti sese kue. Azo ti ngorogbia nga na akota zo ti eglize azia bê ti ala kue na ndo ti abungbi use so ti ga na siriri na azo. Na tapande, Bendo ti Gigi atene so ngu 1986 ayeke Ngu ti Siriri na ndo ti Sese Kue. Na ngu ni so akota zo ti poroso nga na akota zo ti a-eglize awara tere na lo so amû li ni na ndo ti Eglize Catholique na Assise, Italie, ti sambela ndali ti siriri.

¹¹ Me tënë so ala tene, “Siriri na nzoni duti ayeke dä” nga na ambeni tënë ni so ague legeoko na ni, a yeke pëpe atënë ti prophétie so ayeke na 1 aThessalonicien 5:3 la aga tâ tënë so. Ngbanga ti nyen? Ngbanga ti so ‘futingo aga hio tongaso na ndo ti ala’ pëpe.

12. Nyen la e hinga na ndo ti tënë so atene, “Siriri na nzoni duti ayeke dä”?

¹² Azo wa la ayeke tene ande kota tënë so atene, “Siriri na nzoni duti ayeke dä”? Akota zo ti a-eglize so atene ala yeke aChrétien nga na ti ambeni bungbi ti nzapa ayeke sara ti ala ande nyen na yâ ti tënë so? Na lege wa azo ti poroso ayeke mû ande mbage na ni? Bible afa ni ape. Ye so e hinga ayeke so atâa a tene ni tongana nyen wala a tene ni na mbeni fason ti tene azo ayeda na ni, a yeke tâ tënë ape. Satan ayeke ngbâ ti komande na ndo ti sioni dunia so. Dunia so abuba awe na ayeke ngbâ gi ti buba ti gue na ni. A yeke duti sioni mingi tongana e yeda na tënë ti mvene ti Satan so atene, “Siriri na nzoni duti ayeke dä”, na e yôro tere ti e na yâ ti aye ti poroso.

13. Ngbanga ti nyen la a-ange agbu apupu ti futingo ye na ala yeke ku?

¹³ Diko Apocalypse 7:1-4. Na ngoi so e yeke ku ti tene tënë so ayeke na 1 aThessalonicien 5:3 aga tâ tënë, a-ange so ayeke ngangu mingi agbu apupu ti futingo ye ti kota ye ti vundu. Nyen la ala yeke ku? Bazengele Jean atene so a lingbi a kpo nzoroko biani biani na ndo ti lê ti “angbâa ti Nzapa” so a soro ala ti gue na yayu.a Tongana a sara ande ni kue awe, a-ange ni ayeke zi maboko ti ala na tere ti apupu ti futingo ye ni. Nyen la ayeke si ande na pekoni?

14. Nyen la afa na e so a ga nduru ti futi Babylone, Ngangu gbata awe?

¹⁴ A yeke futi Babylone, Ngangu gbata, bungbi ti vorongo nzapa ti wataka kue, tongana ti so lo lingbi na ni. “Azo ti kodoro, gbâ ti azo, amara na ayanga ti kodoro” alingbi ande pëpe ti mû maboko na lo. E bâ awe aye so afa atene a ga nduru ti futi lo awe (Apoc. 16:12; 17:15-18; 18:7, 8, 21). Na yâ ti ambeti-sango laso, a kasa abungbi ti nzapa nga na akota zo ni, ye so afa so ala yeke na mungo maboko ape. Atâa so kue akota zo ti nzapa abâ pëpe so ala yeke na yâ ti kota kpale. Ala handa tere ti ala. Na pekoni so a yeke tene ande “Siriri na nzoni duti ayeke dä!” azo ti ngorogbia ayeke londo na tere ti bungbi ti vorongo nzapa ti wataka na ala yeke futi lo biani biani. E yeke mä tënë ti Babylone, Ngangu gbata mbeni pëpe. Biani, a yeke kota ye ti tene e kanga bê e ku akota ye so ayeke si ande so.​—Apoc. 18:8, 10.

NA LEGE WA E LINGBI TI KIRI SINGILA NA NZAPA SO LO KANGA BÊ TI KU?

15. Ngbanga ti nyen Jéhovah akanga bê lo ku?

¹⁵ Atâa so azo abuba iri ti Jéhovah, lo ngbâ lakue ti kanga bê ti ku ngoi so alingbi ti tene lo leke tënë ni. Jéhovah aye pëpe ti futi azo so ayeke na nzara ti voro lo (2 Pi. 3:9, 10). Mo yeke na mara bibe ti Nzapa so? Kozo si lâ ti Jéhovah asi, e lingbi ti fa so e kiri singila ndali ti so Nzapa akanga bê ti ku na yâ ti alege so e yeke gue ti bâ.

16, 17. (a) Ngbanga ti nyen a yeke nzoni e mû maboko na aita so ayeke fa tënë mbeni pëpe? (b) Ngbanga ti nyen a lingbi aita so ayeke fa tënë mbeni pëpe akiri na Jéhovah hio?

¹⁶ E mû maboko na aita so ayeke fa tënë mbeni pëpe. Jésus atene ngia ayeke na yayu tongana a wara mbeni ngasangbaga oko so agirisa (Mat. 18:14; Luc 15:3-7). Jéhovah ayeke bi bê ti lo mingi na azo so afa so ala ye lo, même tongana ala yeke sara na lo fadeso ape. Tongana e mû maboko na mara ti azo tongaso ti kiri na yâ ti congrégation, e yeke zia ngia na bê ti Jéhovah nga na a-ange.

¹⁷ Mo yeke na popo ti azo so asara na Nzapa fadeso ape? Peut-être mo zia lege ti guengo na bungbi ndali ti so mbeni zo na yâ ti congrégation ason bê ti mo. Peut-être ambeni ngoi ahon na pekoni awe, hunda tere ti mo: ‘Mbi sara nzoni ye na fini ti mbi, nga mbi yeke na ngia? A yeke Jéhovah la ason lani bê ti mbi, wala mbeni zo so siokpari ayeke na tere ti lo? Lâ oko Jéhovah asara mbeni ye ti sioni na mbi awe?’ Jéhovah ayeke sara lakue ye ti nzoni na e. Atâa fadeso e sara ye pëpe alingbi na mungo tere ti e so e mû na lo, lo ngbâ ti zia lege na e ti bâ nzoni na lege ti anzoni ye so lo mû na e (Jacq. 1:16, 17). Na yâ ti kete ngoi lâ ti Jéhovah ayeke si. A yeke ngoi ti tene e kiri na mbage ti Jéhovah, Babâ ti e so lo ye e mingi, nga na mbage ti congrégation la. A yeke gi oko ndo so e lingbi ti duti dä nzoni na alango ti nda ni so la.​—Deut. 33:27; aHéb. 10:24, 25.

18. Ngbanga ti nyen la a yeke nzoni e mû maboko na aita so amû li ni?

¹⁸ E mû maboko na aita so amû li ni na bê ti e kue. Jéhovah, Berger ti e so ayeke sara ye na nzoni bê, ayeke fa lege na e nga ayeke bata e. Lo zia Molenge ti lo tongana Kota Berger ti kundu ni (1 Pi. 5:4). A-ancien so ayeke na yâ ti acongrégation ahon 100 000 ayeke mû ngoi ti fa lege na angasangbaga ti Nzapa oko oko kue (Kus. 20:28).Tongana e mû maboko na ala so a zia ala ti mû li ni na bê ti e kue, e yeke fa so e kiri singila na Jéhovah nga na Jésus ndali ti aye kue so ala sara teti e.

19. Tongana nyen la e lingbi ti ngbâ nduru na mba?

¹⁹ E ga nduru na mba. Tënë so aye ti tene nyen? Ambeni turugu so a fa ye na ala nzoni ayeke luti na molongo nduru na tere ti mba tongana awato ti ala alondo ti sara bira na ala. Ala yeke sara tongaso ti kanga lege na mbeni ye ti si na amba ti ala. Satan akiri asara ngangu laso mingi na awakua ti Jéhovah ahon ti kozo. A yeke ngoi ti tene e tiri na popo ti e la ape. Me a yeke ngoi ti tene e ngbâ nduru na mba, e hon ndo ti awokongo ti amba ti e, nga e zia confiance ti e na Jéhovah.

20. Nyen la a yeke nzoni e sara laso?

²⁰ A yeke nzoni e kue e ngbâ ti kpengba songo ti e na Jéhovah nga e ngbâ lakue ti ku. Zia e kanga bê e ku ngoi so ayeke tene, “Siriri na nzoni duti ayeke dä!” nga na ngoi so a yeke zia nzoroko ti biani biani na ndo ti lê ti aChrétien so a soro ala ti gue na yayu. Na pekoni, a-ange osio ayeke zi maboko ti ala na tere ti apupu ti futingo ye nga a yeke futi Babylone, Ngangu gbata. Na ngoi so e yeke ku akota ye so ayeke si ande so, zia e mû peko ti fango lege so azo so a zia ala ti mû li ni na yâ ti bungbi ti Jéhovah ayeke fa na e. E ga nduru na aita ti e ti luti na Satan nga na asioni yingo. Laso a yeke ngoi ti tene e sara ye alingbi na wango ti mbeni zo ti sungo psaume so atene: “Gbu ngangu, zia bê ti i akpengba dä, i kue so beku ti i ayeke na L’Éternel.”​—Ps. 31:25.