Mû tapande ti aprophète: Michée
1. Tënë wa Michée ahunda peut-être lani na tere ti lo? Fango tënë ti lo angbâ gi senge senge?
1 ‘Lawa la a yeke futi ande sioni dunia so?’ Prophète Michée agbu lani peut-être li ti lo na ndo ti oko hundango tënë so tongana lo yeke fa tokua ti fango ngbanga so Jéhovah ayeke ga na ni na ndo ti royaume ti Israël na ti Juda. Me, lo fa lani tënë gi senge senge pëpe. Na ngu 740 kozo ti Christ, na ngoi so Michée angbâ na fini, atënë so Jéhovah atene na ndo ti Samarie aga lani tâ tënë (Mi. 1:6, 7). Na pekoni, a futi Jérusalem na ngu 607 kozo ti Christ (Mi. 3:12). Tongana nyen e lingbi ti mû peko ti tapande ti Michée na ngoi so e yeke ku lango ti fango ngbanga so Jéhovah ayeke ga na ni na ngoi ti e?
2. Tongana nyen nga ngbanga ti nyen a lingbi e kanga bê na ngoi so e yeke ku lâ ti Jéhovah?
2 Kanga bê mo ku: Michée asû na mbeti: “Ti mbi, fade mbi yä lê ti mbi na L’Éternel; mbi ku Nzapa ti salut ti mbi.” (Mi. 7:7). Biani, Michée aduti lani gi tongaso pëpe ti ku ti tene lango ni aga. Lo ngbâ ti sara kusala mingi tongana prophète ti Jéhovah. Na ngoi so e yeke ku lâ ti Jéhovah, a lingbi e nga e bi tere ti e na yâ ti ‘sarango ye so ayeke nzoni-kue nga na akusala so afa so e gbu tënë ti Nzapa ngangu.’ (2 Pi. 3:11, 12). So Jéhovah angbâ ti kanga bê ayeke ngbanga ti so lo ye ti tene azo kue achangé bê ti ala (2 Pi. 3:9). Tongaso, zia e leke na bê ti e ti sara ye alingbi na wango ti Bible so ahunda na e ti kanga bê ti ku tongana ti aprophète.—Jacq. 5:10.
3. Ngbanga ti nyen a lingbi e hunda na Jéhovah ti mû na e yingo vulu ti lo?
3 Zia bê kue na ndo ti ngangu ti Jéhovah: Atâa so Michée ayeke lani na kota kua ti sarango ni, lo bâ ndo na mbage ti Jéhovah ti mû ngangu na lo ti sara ni (Mi. 3:8). A yeke senge ye pëpe si Bible ahunda na e ti zia bê ti e kue na ndo ti ngangu ti Nzapa ti mû maboko na e. Na nzoni bê, lo yeke mû ngangu na azo so awoko si ala lingbi ti sara akua so a mû na ala na yâ ti bungbi (Ps. 84:6, 8; És. 40:28-31). Mo wani mo bâ awe na yâ ti fini ti mo so Jéhovah amû ngangu na mo ti sara kusala ti lo? Mo yeke hunda lakue na Jéhovah ti mû maboko na mo na lege ti yingo vulu ti lo?—Luc 11:13.
4. E lingbi ti manda nyen na lege ti pendere tapande ti Michée?
4 Michée azia ye so bê ti Jéhovah aye na kozo ndo na yâ ti fini ti lo kue. Lo leke na bê ti lo ti ngbâ be-ta-zo atâa so lo yeke lani na popo ti azo so sarango ye ti tere ti ala ayeke sioni. Legeoko nga, lâ oko oko dutingo be-ta-zo ti e ayeke na yâ ti tara. Ni la, zia e leke na bê ti e ti ‘tambela na iri ti Jéhovah Nzapa ti e lakue lakue.’—Mi. 4:5.