Mo dabe mo na ni?

Dikongo a-article ti Tour ti Ba Ndo so asigigi ade ti ninga pëpe anzere na mo mingi? Tongaso, bâ wala mo lingbi ti kiri tënë na ahundango tënë so ge:

• Na yâ ambeni lege wa Ruth azia lani mbeni nzoni tapande?

Lo zia lani tapande na lege ti ndoye ti lo teti Jéhovah, be-biani ti lo na mbage ti Naomi, nga wâ ti lo na kusala na nga tâ be-ti-molenge ti lo. A yeke tâ na lege ni si azo abâ lo lani tongana “wali so alingbi”. (Ruth 3:11)​—15/4, alembeti 23-26.

• E hinga tongana nyen so Jéhovah ayeke bâ ndo na ndo asenge zo?

Lo tene na azo ti Israël so a sala giriri sana na ala na Egypte ti sala sana pëpe na asenge zo (Exode 22:21-24). Jésus so amû lani tapande ti Babâ ti lo afa so lo bi bê ti lo mingi na asenge zo, na ala so lo soro tongana abazengele ayeke “azo so amanda mbeti pëpe, na ala yeke azo senge”. (Kusala 4:13; Matthieu 9:36). E lingbi ti mû tapande ti Nzapa na bingo bê na ndo amba ti e, mbilimbili na ndo apendere.​—15/4, alembeti 28-31.

• Nda ti tënë wa apusu e ti tene biani so Jéhovah ayeke bâ ye so e yeke sala?

Atondo ti Bible afa so Jéhovah ayeke bâ aye so azo ayeke sala. Lo bâ lani sandaga so Abel amû, na lo yeke bâ ‘sacrifice ti e ti gondango so ayeke lengo ti yanga’. (aHébreu 13:15). Jéhovah ahinga so Hénoch asala kue ti nzere na lo na dutingo na nzoni tambela so ayeke kirikiri pëpe. Nga Nzapa abâ tongana nyen mbeni womua ti Sarepta akangbi kete kobe so lo yeke na ni na prophète Elie. Jéhovah ayeke bâ nga akusala ti mabe ti e.​—1/5, alembeti 28-31.

• Ngbanga ti nyen a lingbi ti tene so na peko ti Pentecôte 33 ti ngoi ti e, a yeke ku na mbage ti aJuif so aga aChrétien ti tene ala mû tele ti ala na Nzapa kozoni?

Na ngu 1513 kozoni na ngoi ti e, azo ti Israël ti giriri alï na yâ mbeni songo so atingbi ala na Jéhovah (Exode 19:3-8). Ti londo na ngoi ni so, a dü aJuif na yâ mbeni mara so amû tele ti lo na Nzapa awe na gbe ti mbele ti Ndia. Me Jéhovah alungula mbele ti Ndia na lege ti kuâ ti Christ na ngu 33 ti ngoi ti e (aColossien 2:14). Na peko ti ye so, tongana aJuif aye ti sala na Nzapa, a hunda na ala na lege ni ti mû tele ti ala na lo na ti wara batême na iri ti Jésus Christ.​—15/5, alembeti 30-31.

• A hunda ti zö yombo na yâ tâ vorongo laso?

Zongo yombo ayeke ândö mbeni ye so a yeke sala ni na yâ tâ vorongo na Israël ti giriri (Exode 30:37, 38; Lévitique 16:12, 13). Me mbele ti ndia, so andu nga salango kusala na yombo, ahunzi lani tongana Christ akui. A yeke na aChrétien ti mû desizion wala ala yeke sala kusala na yombo teti ambeni ye so andu vorongo pëpe. Ye oko, a hunda ni laso pëpe na yâ tâ vorongo. A lingbi zo so aye ti sala tongaso agi ti bi bê nga na yingo-ti-hinga ti amba ti lo ti sala pëpe si ala pika gere ti ala.​—1/6, alembeti 28-30.

• Aye wa so a wara ni ade ti ninga mingi pëpe apusu lani azo mingi ti bâ so biani Jésus ayeke lani na fini na sese?

A kangbi mingi na azo tënë na ndo mbeni sanduku so a zia bio ti azo so akui na yâ ni na so a wara na Israël. A kpa mbeni ye so a sala ni na kozo siècle, na a wara na ndo ni mbeti so a sû ni, so atene: “Jacques, molenge ti Joseph, ita ti Jésus.” Ambeni zo abâ ni tongana “ngbele fä so ayeke nde na ti Bible, so awagingo nda ti ye awara” na so afa so Jésus ayeke lani na fini.​—15/6 alembeti 3-4.

• Tongana nyen azo ayeke manda ti ndoye zo?

Azo ayeke manda kozoni kue ti ndoye zo na lege ti tapande na fango lege ti ababâ na mama ti ala. Tongana koli na wali afa ndoye na yekiango mba, amolenge ti ala alingbi ti manda ti ndoye zo (aEphésien 5:28; Tite 2:4). Même tongana mbeni zo alondo na yâ mbeni sewa so ndoye ayeke dä pëpe, lo lingbi ti manda ti ndoye zo tongana lo yeda na fango lege so Jéhovah ayeke mû tongana mbeni Babâ, tongana yingo vulu amû maboko na lo, nga tongana lo wara nzoni na lege ti mungo maboko ti wâ so sewa ti aita ti lo Chrétien agi ti ga na ni na lo.​—1/7, alembeti 4-7.

• Eusèbe ayeke lani zo wa? Na ye nyen e lingbi ti manda na ndo lo?

Eusèbe ayeke lani mbeni wasungo mbaï ti giriri so, na ngu 324 ti ngoi ti e, ahunzi sungo bungbi ti abuku bale-oko so li ti tënë ni ayeke History of the Christian Church (Mbaï ti église). Atâa so lo mä na bê so Babâ ni ayeke na fini kozoni na Molenge ni, Eusèbe ayeda na mbeni bango ndo so ayeke nde na ni, na ngoi ti kota bungbi ti Nicée. Na bango ni, lo ke ti sala ye alingbi na tënë so Jésus amû lani na adisciple ti lo ti duti “ti sese so pëpe”. (Jean 17:16).​—15/7, alembeti 29-31.

• Jéhovah agbian bango ndo ti lo na ndo tënë ti mungo awali mingi?

Jéhovah agbian bango ndo ti lo pëpe na ndo mungo awali mingi (Malachie 3:6). Ye so Nzapa aleke giriri teti kozo koli ayeke ti tene lo “duti na wali ti lo” na ala ga mitele oko (Genèse 2:24). Jésus atene so tongana a yeke ngbanga ti pitan pëpe si zo azia wali ti lo ti mû mbeni fini ni na mariage, lo sala lango-sioni (Matthieu 19:4-6, 9). Jéhovah ake ti zia lege na mungo awali mingi tongana lo zia na sese kongregation ti aChrétien.​—1/8, lembeti 28.