Atënë so azo ahunda

So Salomon, gbia ti Israël, angbâ be-ta-zo pëpe na Nzapa na ngoi so lo ga mbakoro, e lingbi ti tene so lo yeke zingo ande na kuâ pëpe?​—1 aGbia 11:3-9.

Na yâ ti Bible, a yeke wara iri ti ambeni koli na awali wamabe so ayeke zingo ande biani na kuâ. Me atâa so kue, Bible atene pëpe so zo oko oko kue so lo fa iri ti lo si ayeke zingo ande na kuâ wala pëpe (aHébreu 11:1-40). Ye oko, ti Salomon, e lingbi ti hinga kamême ye so ayeke na bê ti Nzapa na ndo lo. E yeke hinga ni na hakango ye so asi na lo na lâ ti kuâ ti lo na ye so asi lani na ambeni be-ta-zo na lâ ti kuâ ti ala.

Mbeti ti Nzapa afa gi aye use na ndo azo so akui: ala so akui teti kete ngoi nga na ala so akui ti ala biani biani. Ti ala so a bâ a tene ala lingbi pëpe ti tene a zingo ala na kuâ, a yeke bi ala na “ndo-ti-wa”, wala “lac ti wâ.” (Matthieu 5:22; Marc 9:47, 48; Apocalypse 20:14). Na popo ti ala, a yeke wara Adam na Eve nga na Judas Iscariote so akä Jésus. A yeke wara nga ambeni zo so Nzapa afâ ngbanga na ndo ti ala, na tapande azo ti ngoi ti Noé na azo ti Sodome na Gomorrhe.a Ti azo so a yeke zingo ala ande, na ngoi so ala kui ala yeke gue na dû ti kuâ. Na ndo ye so ayeke si na ala ande, Bible atene: “Kota ngu ti ingo azia na gigi awakinda so ayeke na yâ ni; na Kui na Ndo-ti-awakinda azia na gigi awakinda so ayeke na yâ ala. Na A fâ ngbanga ti ala oko oko kue alingbi na kusala ti ala.”​—Apocalypse 20:13.

Tongaso, abe-ta-zo so a sala tënë ti ala na aHébreu chapitre 11, ala yeke na yâ dû ti kuâ, na ala yeke ku ti tene a zingo ala. A yeke wara na popo ti ala awakua be-ta-zo ti Nzapa tongana Abraham, Moïse na David. Fadeso, zia e bâ lege so Bible asala tënë na ndo kuâ ti ala. Jéhovah atene na Abraham: “Fade mo gue na ababâ ti mo na siriri; tongana mo ga mbakoro mingi, fade mo ngbâ na ngia juska lâ ti lungo mo.” (Genèse 15:15). Jéhovah atene nga na Moïse: “Bâ, fade mo lango legeoko na akotara ti mo.” (Deutéronome 31:16). Ti David, babâ ti Salomon, Bible atene: “David alango legeoko na akotara ti lo, na ala lu lo na Kodoro ti David.” (1 aGbia 2:10). Tongaso, tënë ‘lango legeoko na akotara’ ayeke mbeni lege ti tene so zo ni ague lani na yâ dû ti kuâ.

Nyen la asi na Salomon tongana lo kui? Bible akiri tënë: “Salomon akomande Israël kue ngu bale-osio na Jérusalem. Na Salomon alango legeoko na akotara ti lo, na ala lu lo na Kodoro ti David, kodoro ti babâ ti lo.” (1 aGbia 11:42, 43). Tongaso, a bâ so a yeke na lege ni ti tene so Salomon ayeke na yâ dû ti kuâ, na lo yeke ku ti tene a zingo lo.

Tënë so aye ti fa so ala so Bible atene polele so ‘ala lango legeoko na akotara ti ala’, lege ayeke dä ti tene ala zingo na kuâ. Biani, mingi ti agbia so aga lani na peko ti Salomon, atâa so ala duti be-ta-zo pëpe, a tene mara ti tënë tongaso na ndo ala. A yeke na lege ni ti tene tongaso ngbanga ti so “londongo ti awakinda kue, azo ti mbilimbili, na azo ti kirikiri” ayeke duti ande dä (Kusala 24:15). Ti tâ tënë ni, a yeke gi na peko ti so “azo kue so ayeke na dukua” alondo si e yeke hinga biani azo so a zingo ala na kuâ (Jean 5:28, 29). Ni la, ahon ti tene e tene zo ti giriri tongaso ayeke zingo ande na kuâ wala pëpe, e yeke ku ti bâ. E hinga e tene adesizion ti Jéhovah ayeke mbilimbili-kue.

[Kete tënë na gbe ni]