Kpe mbeto ti Jéhovah na duti na ngia!

“Ngia ayeke na zo so akpe mbeto ti L’Eternel.”​—PSAUME 112:1.

A YEKE ngangu ti duti na ngia. Tâ ngia ayeke ga na lege ti mungo anzoni desizion, sarango nzoni nga na kpengo ye so ayeke sioni. Wasarango e, Jéhovah, amû na e Tënë ti lo, Bible, ti fa na e tongana nyen ti wara nzoni lege ti duti na fini. Ti gi fango lege ti Jéhovah na ti mû pekoni afa so e kpe mbeto ti Nzapa. Sarango tongaso ayeke ga na e tâ nzerengo tere na ngia.​—Psaume 23:1; aProverbe 14:26.

² Na yâ ti article so, fade e yeke bâ atapande na yâ ti Bible nga ti laso so afa tongana nyen tâ kpengo mbeto ti Nzapa akpengba zo ti ke aye so ayeke pusu zo ti sara sioni na ti mû na lo ngangu ti sara ye ti nzoni. Fade e yeke bâ so kpengo mbeto ti Nzapa alingbi ti ga na e ngia na pusungo e ti leke mbeni tambela so ayeke sioni, tongana ti so a lingbi Gbia David asara ândö. E yeke bâ nga so kpengo mbeto ti Jéhovah ayeke mbeni ye ti héritier ti ngere ngangu so ababâ na mama alingbi ti mû na amolenge ti ala. Biani, Tënë ti Nzapa amû na e zendo so: “Ngia ayeke na zo so akpe mbeto ti L’Eternel.”​—Psaume 112:1.

Ala kiri awara ngia ti ala

³ Tongana ti so kozo article afa, fani ota David akpe mbeto ti Nzapa na lege ni pëpe na lo sara siokpari. Ye oko, sarango ye ti lo tongana Jéhovah ase lo afa so lo yeke biani zo so akpe mbeto ti Nzapa. Yekiango ndo so lo yeke na ni teti Nzapa apusu lo ti yeda na sioni ti lo, ti kiri na nzoni lege na ti kiri ti lë nzoni songo na Jéhovah. Atâa so agirisango lege ti lo asara si lo na ambeni zo abâ pasi, tâ gbiango bê ti lo asara si Jéhovah angbâ lakue ti mû na lo maboko na ti yeda na lo. Tapande ti David alingbi biani ti mû ngangu na aChrétien so laso atï na yâ kota siokpari.

⁴ Zia e bâ ye so asi na Sonia.a Atâa so lo yeke pionnier, Sonia awara asioni kamarade, na lo tï na yâ ti ye ti sioni, na tongaso a lingbi lani a bi lo na gigi ti kongregation. Tongana li ti lo aga dä na pekoni, Sonia asara ye kue so a hunda ti kiri ti leke songo ti lo na Jéhovah. Na pekoni, a kiri na lo na bungbi. Na yâ ti aye so kue, nzara so Sonia ayeke na ni ti sara na Jéhovah angbâ. Lo kiri lo mû kusala ti pionnier. Na pekoni, lo sara mariage na mbeni ancien, na laso lo yeke na ngia ti sara kua na tere ti lo na yâ kongregation. Atâa so vundu asara Sonia ndali ti so lo zia nzoni tambela ti aChrétien teti mbeni ngoi, lo yeke na ngia so kpengo mbeto ti Nzapa amû na lo maboko ti kiri na Jéhovah.

Ti hu pono ahon ti sara siokpari

⁵ Biani, a yeke nzoni mingi tongana kpengo mbeto ti Nzapa akanga lege na zo ti sara siokpari. A yeke ye so lani David asara. Mbeni lâ, na ngoi so lo na aturugu ti lo saki ota ayeke tomba David, Saül alï na yâ mbeni dû ti tênë: tâ gi dû so David na azo ti lo ahonde tere ti ala dä. Azo ti David atene na lo ti fâ Saül. Jéhovah azia wato ti David na tïtî lo awe pëpe? David ahara yeke asi na Saül na lo fâ yanga ti bongo ti lo. Ngbanga ti so David akpe mbeto ti Nzapa, même kete ye so lo sara, bê ti lo agi lo na ndo ni mingi. David agbanzi lege na azo ti lo so tere ti ala adö dongo, lo tene: “A lingbi mbi zia maboko ti mbi na ndo lo pëpe, teti lo yeke zo so L’Eternel asa mafuta na li ti lo.”b​—1 Samuel 24:2-8.

⁶ Mbeni lâ na pekoni, na bï Saül na azo ti lo ase kando, na Jéhovah “asara si kota lango atï na ndo ala kue.” David na ngangu koya ti lo, Abisaï, ague yeke juska na bê ti kando ni na ala luti tâ gi na tere ti Saül so ayeke lango. Abisaï aye ti lo ti fa gi lo fango. David ake na Abisaï, lo tene: “Tongana zo azia maboko ti lo na ndo zo so L’Eternel asa mafuta na li ti lo, fade ngbanga ayeke na li ti zo so pëpe?”​—1 Samuel 26:9, 12.

⁷ Fani use David awara lege ti fâ Saül. Ngbanga ti nyen lo sara ni pëpe? Ngbanga ti so lo kpe mbeto ti Jéhovah mingi ahon ti Saül. Teti lo kpe mbeto ti Nzapa na lege ni, David ayeke nduru ti hu pono ahon ti sara siokpari (aHébreu 11:25). Lo zia bê ti lo kue na Jéhovah so ayeke bata azo ti lo nga na lo David ni mveni. Lo hinga so mango yanga na ziango bê na Nzapa ayeke ga na ngia nga na aye ti nzoni mingi; me kengo yanga ti Nzapa ayeke sara si Nzapa ake lo (Psaume 65:5). Lo hinga nga so Nzapa ayeke bata zendo ti lo ti sara si lo David ni aga gbia na fade Nzapa ayeke lungula Saül na ngoi nga na lege so lo ye.​—1 Samuel 26:10.

Kpengo mbeto ti Nzapa aga na ngia

⁸ E so e yeke aChrétien, e hinga so hengo ndo, sarango ngangu na ambeni tara ayeke si na e (Matthieu 24:9; 2 Pierre 3:3). Na ambeni ngoi, e lingbi ti wara kpale même na amba ti e awavorongo Nzapa. Ye oko, e hinga so Jéhovah ayeke bâ ye kue, lo yeke mä sambela ti e nga, na ngoi so alingbi, lo yeke leke tënë ni alingbi na ye so bê ti lo aye (aRomain 12:17-21; aHébreu 4:16). Tongaso, ahon ti sara mbeto ti awato ti e, e kpe mbeto ti Nzapa na e ku lo ti zi e. Legeoko tongana David, e yeke kiri sioni pëpe na ala so asara sioni na e, na e yeke doro pëpe akpengba-ndia ti mbilimbili ti kpe pono. Na nda ni, sarango tongaso aga na ngia. Me tongana nyen?

⁹ Mbeni missionnaire so aninga na Afrika atene: “Mbi bi bê ti mbi na tapande ti mbeni mama na molenge ti lo ti wali so ayeke maseka. Ndali ti dutingo nde ti ala ti Chrétien ala ke ti vo karte ti kama-poroso ti kodoro ni. Akoli mingi mingi apika ala ngangu na atene na ala ti kiri na kodoro. Na lege, mama ni atara ti dë bê ti molenge ni so ayeke toto, teti lo gi li ti lo gbä na ye so asi. Na ngoi ni so ala yeke na ngia pëpe, me yingo-ti-hinga ti ala ayeke nzoni. Na pekoni, ala yeke na ngia mingi so ala mä lani yanga ti Nzapa. Tongana ala vo lani akarte ti kama-poroso ni, ka fade tere ti azo ni ayeke nzere mingi. Ka fade akoli ni ayeke mû na ala ajus ti nyongo ni, na ala yeke dodo na tere ti ala juska na yanga-da. Me, tongana lani maseka ni na mama ti lo ahinga so ala bere mabe ti ala, ka fade vundu ahon ndo ti ala.” Kpengo mbeto ti Nzapa abata ala na ye so.

¹⁰ Kpengo mbeto ti Nzapa aga nga na ngia tongana zo atingbi na atara so andu nene ti fini. Tongana Marie ayeke na ngo ti ota molenge ti lo, wanganga ni awa lo ti tuku ngo ni. Lo tene: “Seni ti mo ayeke nzoni pëpe. Mbeni kpale alingbi ti si na mo gi hio tongaso na mo lingbi ti kui gi na yâ ti lango oko. Tongana a si tongaso, bébé ni nga ayeke ngbâ pëpe. Atâa ye ni ayeke tongana nyen, e hinga pëpe wala bébé ni ayeke duti ande nzoni.” Na lâ ni so, Marie ayeke manda Bible na aTémoin ti Jéhovah me lo de ti wara batême pëpe. Marie atene: “Ye oko, mbi mû lani desizion awe ti sara na Jéhovah, na mbi leke na bê ti mbi ti ngbâ ti mä yanga ti lo atâa ye nyen asi.”​—Exode 21:22, 23.

¹¹ Na ngoi so lo yeke na ngo, Marie angbâ ti manda Bible na ti bata sewa ti lo. Na nda ni lo dü molenge ni. Marie atene: “Dungo ni ayeke ngangu kete ahon ti ala use so mbi dü kozo, me mbeni kota kpale ayeke dä pëpe.” Kpengo mbeto ti Nzapa amû maboko na Marie ti bata nzo yingo-ti-hinga, na a ninga pëpe lo wara batême. Tongana molenge ni ayeke kono, lo nga lo manda ti kpe mbeto ti Jéhovah, na laso lo yeke sara kua na mbeni oko ti afiliale ti aTémoin ti Jéhovah.

‘Sara si bê ti mo akpengba na yâ Jéhovah’

¹² Kpengo mbeto ti Jéhovah so David ayeke na ni akanga lege na lo gi ti sara sioni pëpe. A mû nga na lo ngangu ti londo hio ti sara ye na ndara na yâ ye ti ngangu. Teti ngu oko na nze osio, David na azo ti lo akpe Saül ti bata tere ti ala na Tsiklag, kodoro ti aPhilistin (1 Samuel 27:5-7). Mbeni lâ tongana akoli kue ahon, azo ti mara ti Amalek aga, ala gbi kodoro ni na ala gbu awali, amolenge na anyama kue ague na ni. Tongana ala kiri na ala bâ ye so asi, David na azo ti lo atoto. Hio vundu ni aga ngonzo, na azo so ayeke na David asara tënë ti bolo lo na tênë. Atâa so lo yeke na vundu, bê ti David awoko pëpe (aProverbe 24:10). Kpengo mbeto ti Nzapa apusu David ti turne na mbage ti Jéhovah, na lo to nda ti ‘sara si bê ti lo akpengba na yâ L’Eternel Nzapa ti lo.’ Nzapa amû maboko na David, tongaso lo na azo ti lo awara azo ti Amalek na ala wara ye kue so ala nzi ni.​—1 Samuel 30:1-20.

¹³ Laso nga awakua ti Nzapa atingbi na aye so ahunda ti zia bê na Jéhovah na ti wara ngangu ti londo hio ti sara ye. Bâ tapande ti Kristina. Lâ ni so lo de kete, Kristina amanda Bible na aTémoin ti Jéhovah. Me lo ye lani ti ga kota wapikango bia na piano, na lo gue na li ni ngangu mingi na yâ ni. Na ndo ni, kusala ti fango tënë amû na lo kamene na tongaso lo yeke na mbeto ti yô akungba so batême aga na ni. Tongana Kristina angbâ ti manda Tënë ti Nzapa, lo komanse ti bâ ngangu ni. Lo manda ti kpe mbeto ti Nzapa na lo bâ so Jéhovah aku ti tene awakua ti lo andoye lo na bê ti ala kue, na bibe ti ala kue, na âme ti ala kue nga na ngangu ti ala kue (Marc 12:30). Ye so apusu lo ti mû tere ti lo na Jéhovah na ti wara batême.

¹⁴ Kristina ahunda Jéhovah ti mû na lo maboko ti gue na li ni na lege ti yingo. Kristina atene: “Mbi hinga so kusala ti pikango bia ahunda ti tambela lakue na ti mä tere na azo nde nde ti sigigi même fani 400 ti pika bia na yâ ti ngu oko. Tongaso mbi mû desizion ti zia ni na ti ga wafango ye ti wara kobe ti yanga ti mbi na ti sara kua ti pionnier.” Na lâ ni kâ, Kristina amä tere kozo na azo ti pika bia na kota da ti pikango mozoko na kodoro ti lo. Lo tene: “Kozo bia ti mbi aga nga ndangba bia ti mbi.” A sara mbeni ngoi awe so Kristina asara mariage na mbeni ancien. Ala use kue ayeke sara kua fadeso na mbeni oko ti afiliale ti aTémoin ti Jéhovah. Kristina ayeke na ngia so Jéhovah amû na lo ngangu ti mû anzoni desizion nga so lo lingbi fadeso ti mû ngoi na ngangu ti lo ti sara na lo.

Ye ti héritier ti ngere ngangu

¹⁵ David atene: “Ga amolenge, i mä mbi, na fade mbi fa na i mbeto ti L’Eternel!” (Psaume 34:12). Tongana mbeni babâ, David asara kue ti mû na amolenge ti lo mbeni ye ti héritier ti ngere ngangu: kpengo mbeto ti Jéhovah so ayeke mbilimbili, so ayeke na lege ni na so asara nzoni na zo. Na lege ti tënë ti yanga ti lo nga na sarango ye ti lo, David afa Jéhovah pëpe tongana mbeni Nzapa so ahunda ye mingi na so amû mbeto na zo, Nzapa so ayeke nduru ti bâ faute kue so zo asara na ndia ti lo, me tongana mbeni Nzapa ti ndoye, so abata zo na so ayeke nduru ti mû pardon na amolenge ti lo na sese. David ahunda: “Zo nyen alingbi hinga ye so lo sara na lege ni pëpe?” Na pekoni, ti fa so lo zia bê ti lo na Jéhovah so lo yeke gi lakue ti bâ afaute ti e pëpe, David atene na ndo ni: “Pardone mbi na ye so mbi sara na lege ni pëpe, même ye so mbi hinga pëpe.” David ahinga biani so tongana lo sara ngangu kue, atënë na abibe ti lo ayeke mû ngia na Jéhovah.​—Psaume 19:13, 15.

¹⁶ David ayeke mbeni tapande teti ababâ na mama ti laso. Ralph, so lo na ngambe ti lo ti koli ayeke sara kua na mbeni filiale ti aTémoin ti Jéhovah, atene: “Babâ na mama ti e abata e na mbeni lege so asara si dutingo na yâ tâ tënë anzere mingi. Na kete ti e, e na ala e yeke sara lisoro na ndo akusala ti kongregation, na e yeke na wâ teti tâ tënë tongana ala. Ala fa na e so e lingbi ti sara aye ti nzoni na yâ kusala ti Jéhovah. Teti angu mingi sewa ti e aduti na mbeni kodoro so awakua ti Royaume ayeke dä mingi pëpe na e mû maboko ti tene afini kongregation abâ gigi.

¹⁷ “Ye so abata e na nzo lege ayeke pëpe gbâ ti andia so akpengba, me a yeke so ti babâ na mama ti e Jéhovah ayeke dä biani, lo yeke nzoni mingi nga lo yeke na nzobe mingi. Ala yeke gi lakue ti hinga Jéhovah nzoni na ti nzere na lê ti lo, na e manda ye na ndo tâ kpengo mbeto ti Nzapa nga na ndoye so ala yeke na ni teti lo. Même tongana e sara mbeni ye na lege ni pëpe, babâ na mama ti e asara pëpe si e bâ e tene Jéhovah aye e mbeni pëpe; wala na ngonzo ala lu mbeni ndia senge senge pëpe. Mingi ni, ala iri e ti duti, ala sara tënë na e yeke na ala gi lege ti ndu bê ti e, ngoi na ngoi Mama asara ni na ngu ti lê. Na ye ni aga nzoni. Atënë na akusala ti babâ na mama ti e afa na e so kpengo mbeto ti Jéhovah ayeke mbeni ye ti nzoni mingi na ti duti aTémoin ti lo ayeke mbeni ye so amû ngia na nzerengo tere na pëpe mbeni nengo kungba.”​—1 Jean 5:3.

¹⁸ Na yâ “tënë ti nda ni ti David” e diko ye so: “Zo so akomande azo na lege ti mbilimbili, na lo so akomande na lege ti kpengo mbeto ti Nzapa, Lo yeke tongana sungo ti lâ tongana lâ alondo.” (2 Samuel 23:1, 3, 4). Salomon, molenge ti David so aga gbia na peko ti lo, agbu nda ti atënë so nzoni, teti lo hunda na Jéhovah ti mû na lo “bê ti ndara” nga na ngangu “ti kangbi nzoni na sioni”. (1 aGbia 3:9). Salomon ahinga so kpengo mbeto ti Jéhovah aga na ndara na ngia. Na pekoni, na nduru tënë lo fa peko ti buku ti Zo-ti-fa-tene tongaso: “Tongana a mä ye kue awe, so ayeke nda ti tënë ni: mo kpe mbeto ti Nzapa, na mo bata komandema ti Lo, teti so ayeke kusala ti azo kue. Teti fade Nzapa asara si kusala kue na ye kue so a honde aga na gbe ti ngbanga, tongana a yeke nzoni wala sioni.” (Zo-ti-fa-tene 12:15, 16). Tongana e mä wango so, fade e yeke bâ biani so “futa ti tâ be-ti-molenge na kpengo mbeto ti” Jéhovah ayeke gi ndara na dutingo na ngia pëpe, me nga “mosoro, na yango-iri, na fini.”​—aProverbe 22:4.

¹⁹ Na lege ti atapande ti Mbeti ti Nzapa na ti ngoi ti laso, e bâ so tâ kpengo mbeto ti Nzapa asara ye ti nzoni mingi na yâ fini ti atâ wakua ti Jéhovah. Mara ti mbeto tongaso alingbi ti kanga lege na e ti sara ye so anzere pëpe na lê ti Baba ti e ti yayu, me nga a lingbi ti mû na e ngangu ti luti na gbele awato ti e na ti gbu ngangu na yâ ti atara na akpale so asi na e. Tongaso, zia e kue, amaseka na akangba, e sara ngangu ti manda Mbeti ti Nzapa, ti gbu li na ndo ye so e manda na ti ga nduru na Jéhovah lakue na lege ti asambela so alondo na bê ti e. Na sarango tongaso, fade e yeke wara “lege ti hinga Nzapa” na fade e yeke hinga nda ti “kpengo mbeto” ti Jéhovah.​—aProverbe 2:1-5.

[Akete tënë na gbe ni]

Mo lingbi ti fa nda ni?

Tongana nyen kpengo mbeto ti Nzapa alingbi ti

• mû maboko na zo ti ga nzoni na peko ti kota siokpari?

• ga na ngia na ngoi ti atara na ti ye ti ngangu?

• kpengba e ti sara ye so be ti Nzapa aye?

• duti ye ti héritier ti ngere ngangu ti mû na amolenge ti e?

[Ahundango tënë ti manda na ye]

1,  2. Kpengo mbeto ti Jéhovah alingbi ti ga na nyen?

3. Ye nyen amû maboko na David ti kiri ti ga nzoni na peko ti siokpari ti lo?

4. Na lege wa kpengo mbeto ti Nzapa amû maboko na zo ti kiri ti wara ngia ti lo?

5,  6. Tongana nyen fani use David ake ti fâ Saül? Ngbanga ti nyen lo sara ni pëpe?

7. Ye wa akanga lege na David ti sara siokpari?

8. E lingbi ti manda nyen na ndo sarango ye ti David na gbele tara?

9. Fa mbeni tapande ti kpengo mbeto ti Nzapa so aga na ngia atâa sarango ngangu.

10,  11. Aye ti nzoni wa asi na peko ti so mbeni wali akpe mbeto ti Nzapa?

12. Tongana nyen kpengo mbeto ti Nzapa akpengba David?

13, 14. Tongana nyen kpengo mbeto ti Nzapa amû maboko na mbeni Chrétien ti mû anzoni desizion?

15. Nyen la David aye ti mû na amolenge ti lo? Lo sara ni tongana nyen?

16, 17. Na lege wa ababâ na mama alingbi ti fa na amolenge kpengo mbeto ti Jéhovah?

18. Futa ti kpengo mbeto ti tâ Nzapa ayeke nyen?

19. Ye nyen ayeke mû lege na e ti hinga nda ti “kpengo mbeto” ti Jéhovah?

[Foto na lembeti 26]

Kpengo mbeto ti Jéhovah akanga lege lani na David ti sara sioni na Gbia Saül

[Afoto na lembeti 29]

Kpengo mbeto ti Nzapa ayeke mbeni ye ti héritier ti ngere ngangu so ababâ na mama alingbi ti mû na amolenge ti ala