Mokonzi ti e so ayeke sara kua laso

“Lo sigigi ti sö benda ti gue na ni nga ti hunzi songo benda ni.”​—APOC. 6:2.

1, 2. (a) Na yâ ti Bible a fa Christ tongana nyen ngbene ye so lo ga Gbia na ngu 1914? (b) Aye wa Christ asara ngbene ye so lo ga Gbia?

A ZIA Christ Gbia ti Royaume ti Jéhovah na ngu 1914. Ti e laso e pensé so Christ ayeke tongana nyen? Lo yeke mbeni gbia so aduti na ndo ti trône ti lo, so ngoi na ngoi lo yeke bi lê ti lo na sese ti bâ tongana nyen aye ayeke tambela na yâ ti congrégation ti lo? Tongana a yeke tongaso, a yeke nzoni e changé bango ndo ti e. Mbeti ti Psaume na ti Apocalypse afa lo tongana mbeni ngangu gbia so aduti na ndo ti mbarata, na lo yeke gue ti “sö benda ti gue na ni nga ti hunzi songo benda ni.” Lo yeke gue ti “hon na ngangu” biani biani.​—Apoc. 6:2; Ps. 2:6-9; 45:2-5.

² Kozo ye so Christ asara na pekoni so lo ga Gbia ayeke so lo sö benda na ndo ti “sioni nyama ni na a-ange ti lo”. Teti so Christ ayeke archange Michel so akomande na ndo ti a-ange ti lo, lo tomba Satan na asioni yingo ti lo na yayu na ala yeke fadeso nduru na sese (Apoc. 12:7-9). Na pekoni, Jésus so ayeke “Wakua ti mbele” ti Jéhovah, lo na Babâ ti lo aga abâ yâ ti temple ti yingo (Mal. 3:1). Lo dë ngbanga na ndo ti bungbi ti vorongo nzapa ti aChrétien ti wataka so ayeke kota mbage ti “Babylone, Ngangu gbata” so ngbanga ti mênë ti azo ayeke na li ti lo nga so na lege ti yingo lo sara lango-sioni na bungbi ti aye ti poroso ti dunia so.​—Apoc. 18:2, 3, 24.

Christ azi aye ti sioni na tere ti ngbâa ti lo na sese ge

3, 4. (a) Kusala wa Christ so ayeke “Wakua” ti Jéhovah asara lani? (b) Na ngoi so a ga a bâ yâ ti temple, a wara nyen na yâ ni? Teti so Jésus ayeke Mokonzi ti congrégation, lo soro zo wa ti bâ lege ti aye ti lo?

³ Na ngoi so Jéhovah na “Wakua” ti lo asi na yâ ti temple ni, ala bâ nga so na yâ ti sedu ti temple ti yingo so ayeke na sese ge mbeni groupe ti atâ Chrétien so ayeke pëpe na popo ti a-eglize ti aChrétien ti wataka ayeke dä. Ye oko, même aChrétien ni so so a soro ala na lege ti yingo wala “amolenge ti mara ti Lévi” ayeke na bezoin ti tene a sukula ala si ala ga nzoni. A yeke lani tongana ti so prophète Malachie afa tënë ni kozo, lo tene: “Lo [Jéhovah lo] duti tongana waturu na zo ti lungula saleté ti argent, na Lo sukula amolenge ti mara ti Lévi; Lo lungula sioye ti ala legeoko tongana a lungula saleté ti lor na ti argent; fade ala mû na LʼÉternel sacrifice nde nde na lege ti mbilimbili.” (Mal. 3:3). Jéhovah amû “Wakua ti mbele ni”, Christ Jésus, ti sukula azo ti Israël ti yingo so si ala ga nzoni.

⁴ Me Christ awara aChrétien be-ta-zo ni so, ala yeke sara kue ti mû kobe ti yingo na azo ti lo na ngoi so alingbi. Ti londo na ngu 1879 ti ga na ni, atâa aye atambela nzoni wala nzoni pëpe, ala ngbâ lakue ti sigigi na Tour ti Ba Ndo so afa atâ tënë so Bible atene na ndo ti Royaume ti Nzapa. Jésus afa na lege ti prophétie so na ngoi so lo yeke ‘ga’ ti bâ azo ti kua ti lo na “ngoi so aye ti ngoi so ayeke gue ti hunzi”, lo yeke wara mbeni ngbâa na mungo na azo ti kua ti lo “kobe ti ala na ngoi ni so alingbi”. Lo tene so ngbâa ni ayeke na ngia na lo yeke “zia lo na ndo ti akungba ti lo kue” so ayeke na sese ge (Mat. 24:3, 45-47). Christ so ayeke Mokonzi ti congrégation amû “ngbâa be-ta-zo so ayeke sara ye na ndara” so ti bâ lege ti aye ti Royaume ti lo so ayeke na ndo ti sese. Na lege ti Bebungbi, lo yeke fa lege na “azo ti kua” ti lo so a soro ala na lege ti yingo nga na “ambeni ngasangbaga”.​—Jean 10:16.

Fango alê ti kobe ti sese

5. Na yâ ti suma, Jean abâ Gbia Messie ayeke sara nyen?

⁵ Bazengele Jean abâ na yâ ti suma mbeni ye nde so Gbia Messie ayeke sara na “lâ ti Seigneur” na pekoni so a zia lo na ndo ti mbata ti gbia na ngu 1914. Jean atene: “Mbi bâ ndo, na mbi bâ mbeni vuru mbinda, na mbeni zo so akpa molenge ti zo aduti na ndo ti mbinda ni; lo yü couronne ti lor na li ti lo na lo gbu na yâ ti maboko ti lo mbeni zango zembe ti fango na alê ti kobe.” (Apoc. 1:​10; 14:​14). Jean amä mbeni ange so ayeke na tere ti Jéhovah so atene na Zo ti kongo lê ti kobe ni ti yôro zembe ti lo ti fango alê ti kobe ti fâ “alê ti kobe ti sese” ndali ti so “abe nzoni awe.”​—Apoc. 14:​15, 16.

6. Jésus atene tongana ngoi ayeke hon nyen la ayeke maï?

⁶ ‘Fango alê ti kobe ti sese’ adabe ti e na parabole ti Jésus na ndo ti blé na asioni pere. Jésus ahaka lo wani na zo so alu ngongoa ti blé na yâ ti yaka ti lo na lo yeke ku ti fâ nzoni blé, so ayeke “amolenge ti royaume”, atâ Chrétien so a soro ala na lege ti yingo ti gue ti komande legeoko na lo na yâ ti Royaume ti lo. Me na bï, mbeni wato, “Zabolo” aga alu na yâ ti yaka ni asioni pere, so ti tene “amolenge ti Zo ti sioni.” Zo ti lungo blé ni amû yanga na angbâa ti lo ti zia blé ni na asioni pere ni akono legeoko juska na ngoi ti kongo lê ti kobe ni so ti tene “ngoi so aye ti ngoi so ayeke gue ti hunzi.” Na ngoi ni so, lo yeke tokua a-ange ti lo ti kangbi yâ ti blé na asioni pere ni.​—Mat. 13:24-30, 36-41.

7. Tongana nyen Christ ayeke sara kusala ti ‘fango alê ti kobe ti sese’?

⁷ Ti lingbi na ye so Jean abâ na yâ ti suma, ­Jésus ayeke sara kusala ti kongo lê ti kobe na ndo ti sese kue. ‘Fango alê ti kobe ti sese’ ni ato nda ni na bungbingo tanga ti azo ti yâ ti groupe ti azo 144 000 so ti tene “amolenge ti royaume”, “blé” ti yâ ti parabole ti Jésus. Kangbi so ayeke na popo ti atâ Chrétien na aChrétien ti wataka asigigi polele mingi na peko ti Kozo Bira so Amû Sese Kue. Kangbi so azi lege na use mbage ti ‘fango alê ti kobe ti sese’ so ti tene bungbingo ambeni ngasangbaga. Ala yeke pëpe “amolenge ti royaume”, me ala yeke “azo mingi mingi” so ayeda ti duti na gbe ti Royaume ni. A mû ala na popo ti “azo kue, amara kue, na azo ti yanga nde nde kue”. Ala woko tere ti ala na gbe ti Royaume ti Messie, ngorogbia ti yayu, so na yâ ni a yeke wara Christ Jésus na “azo ti be-vulu” 144 000.​—Apoc. 7:9, 10; Dan. 7:13, 14, 18.

Mokonzi ti acongrégation

8, 9. (a) Nyen la afa so Christ ayeke bâ gi pëpe sarango ye ti acongrégation kue me lo yeke bâ nga tambela ti amembre ni oko oko kue? (b) “Aye ti Satan so nda ni alï mingi” so a lingbi e kpe ni ayeke so wa?

⁸ Na yâ ti article so ahon, e bâ tongana nyen Christ ayeke bâ dutingo ti acongrégation oko oko kue na lege ti yingo na ngoi ti akozo Chrétien. Laso, so lo ga Gbia na a mû na lo “komandema kue na yayu nga na sese”, Christ Mokonzi ti e ayeke komande na ndo ti acongrégation kue ti dunia nga na a-ancien so ayeke na yâ ni (Mat. 28:18; aCol. 1:18). Jéhovah ‘asara si lo duti li ti aye kue ti congrégation’ ti aChrétien so a soro ala na lege ti yingo (aÉph. 1:22). Teti so lo yeke Mokonzi ti congrégation, lo yeke bâ ye kue so asi na yâ ti acongrégation ti aTémoin ti Jéhovah so wungo ni ahon 100 000.

⁹ Na congrégation ti Thyatire, Jésus atokua tënë so: “Bâ aye so Molenge ti Nzapa, lo so lê ti lo ayeke za tongana menga-wa, . . . atene la: ‘Mbi hinga aye so mo yeke sara.’ ” (Apoc. 2:18, 19). Lo suku na ambeni membre ti congrégation ni ndali ti sioni sarango ye ti ala nga ndali ti so ala gi ti sara ye kue so bê ti ala aye. Lo tene na ala lo tene: “Mbi yeke lo so agi nda ti arein nga na bê ti zo, na fade mbi futa ala oko oko alingbi na aye so ala sara.” (Apoc. 2:23). Tënë so afa so Christ ayeke bâ gi pëpe acongrégation oko oko kue, me lo yeke bâ nga sarango ye ti amembre ni oko oko kue. Jésus agonda aChrétien ti Thyatire so “agi ti hinga pëpe aye so azo ni airi ni ‘aye ti Satan so nda ni alï mingi.’ ” (Apoc. 2:24). Laso nga, lo bâ na nzoni lê amaseka wala akangba so ake ti gi ti hinga “aye ti Satan so nda ni alï mingi” so zo ayeke wara na lege ti Internet wala angia ti vidéo so afa sarango ye ti ngangu. Nga ala ke atënë so ayeke na lege ni pëpe. Lo yeke na ngia ti bâ ngangu so aChrétien mingi ayeke sara laso nga sacrifice so ala yeke sara ti dö ambeni ye ti zia ti sara ye alingbi na fango lege ti lo na yâ ti fini ti ala kue.

10. Christ ayeke fâ lege na a-ancien ti congrégation. Mbeti ti Apocalypse afa ni tongana nyen? Nyen la a lingbi a-ancien ahinga?

¹⁰ Na ndoye, Christ ayeke bâ ndo na ndo ti acongrégation na lege ti a-ancien (aÉph. 4:8, 11, 12). Na ngoi ti akozo Chrétien, azo kue so ayeke bâ ndo na ndo ti congrégation ayeke lani aChrétien so a soro ala na lege ti yingo. Na yâ ti mbeti ti Apocalypse a fa ala tongana atongoro na yâ ti maboko ti Christ ti koli (Apoc. 1:16, 20). Laso, mingi ti a-ancien ti congrégation ayeke ambeni ngasangbaga. Ala nga kue ayeke na gbe ti fango lege ti Christ ndali ti so a sambela mingi kozoni si a soro ala nga a sara ni na gbe ti fango lege ti yingo vulu (Kus. 20:28).Ye oko, ala hinga so Christ ayeke sara kua na mbeni kete groupe ti aChrétien so a soro ala na lege ti yingo na so ayeke sara kusala tongana Bebungbi ti mû li ni na ti fa lege na adisciple ti lo na ndo ti sese.​—Diko Kusala 15:6, 28-30.

“Ga, Seigneur Jésus”

11. Ngbanga ti nyen e ye mingi ti tene Mokonzi ti e aga hio?

¹¹ Na yâ ti suma so bazengele Jean abâ, fani mingi Jésus atene so ni yeke ga fade fadeso (Apoc. 2:16; 3:11; 22:7, 20). Kite ayeke pëpe so Jésus ayeke sara lani tënë ti gango ti lo ti dë ngbanga na ndo ti Babylone, Ngangu gbata nga na tanga ti sioni bungbi ti aye ti Satan (2 aThes. 1:7, 8). Bazengele Jean, so aga mbakoro awe na so ayeke ku kungo ti bâ gango tâ tënë ti apendere ye so kue so a fa tene ni kozo awe, atene: “Amen! Ga, Seigneur Jésus.” E so e yeke na ngoi ti nda ni ti bungbi ti aye ti sioni ti Satan, e nga kue e yeke ku kungo ti bâ gango ti Mokonzi ti e na Gbia ti e na yâ ti ngangu ti komande ti lo ti sara si iri ti Babâ ti lo aga nzoni-kue nga ti fa so Jéhovah la ayeke na droit ti komande dunia kue.

12. Kusala wa Christ ayeke hunzi ti sara ni kozoni si a zi maboko na tere ti apupu ti futingo ye?

¹² Kozoni si Jésus aga ti futi bungbi ti Satan so lê ayeke bâ, a yeke kpo nzoroko biani biani na ndo ti lê ti tanga ti amembre ti Israël ti yingo so wungo ti ala ayeke 144 000. Bible afa polele so a yeke hunzi ti kpo nzoroko na ndo ti azo 144 000 kue awe si a yeke zi ande maboko na tere ti apupu ti futingo ye ti ga ti futi bungbi ti Satan.​—Apoc. 7:1-4.

13. Na ngoi ti kozo mbage ti “kota ye ti vundu”, tongana nyen Christ ayeke fa so lo si awe na lo yeke dä?

¹³ Mingi ti azo ti sese ahinga pëpe so Christ ‘asi awe na lo yeke dä’ ngbene ye na ngu 1914 (2 Pi. 3:3, 4). Me na yâ ti ngoi kete, lo yeke sara si azo ahinga so lo si awe na lo yeke dä na lege so lo yeke futi aye nde nde ti bungbi ti Satan alingbi na fango ngbanga ti Jéhovah. Futingo “zo-ti-kpengo-ndia-pepe”, akota zo ti abungbi ti aChrétien ti wataka, ayeke duti “ye so afa so lo si awe na lo yeke dä.” (Diko 2 aThessalonicien 2:3, 8.) A yeke fa biani so Christ ayeke sara kusala tongana juge so Jéhovah la asoro lo. (Diko 2 Timothée 4:1.) Na yâ ti Babylone, Ngangu gbata, bungbi ti nzapa ti aChrétien ti wataka la tënë ayeke na li ti lo mingi. A yeke futi ni kozoni awe si a futi tanga ti abungbi ti vorongo nzapa ti wataka kue. Jéhovah ayeke zia na yâ ti bê ti amokonzi ti poroso ti futi wali-ndumba so. Ye so la ayeke duti ande kozo mbage ti “kota ye ti vundu”.​—Mat. 24:21.

14. (a) Ngbanga ti nyen la a yeke kiri na alango ti kozo mbage ti kota ye ti vundu so nduru? (b) “Fä ti Molenge ti zo” aye ti tene ande nyen na azo ti Jéhovah?

¹⁴ Jésus atene ndali ti “azo so a soro ala”, so ti tene tanga ti aChrétien so a soro ala ti gue na yayu na so angbâ na sese ge, a yeke kiri na alango ti kota ye ti vundu so nduru (Mat. 24:22). Jéhovah ayeke zia pëpe si futingo so ayeke tï na ndo ti bungbi ti vorongo nzapa ti wataka afuti aChrétien so a soro ala nga na amba ti ala ambeni ngasangbaga. Lo tene nga so na peko ti “kota ye ti vundu ti alango ni so,” a yeke bâ na yâ ti lâ, nze na atongoro afä nga “na pekoni, fade fä ti Molenge ti zo ayeke sigigi na yayu”. Ye so ayeke pusu azo ti sese ti “pika tere ti ala ti fa so ala yeke na vundu.” Me ti aChrétien so a soro ala ti gue na yayu nga na ambeni ngasangbaga so ayeke na beku ti ngbâ na ndo ti sese ayeke tongaso pëpe. Ala yeke “luti na ala yô li ti ala na nduzu teti ngoi ti zingo ala aga nduru awe.”​—Mat. 24:29, 30; Luc 21:25-28.

15. Kusala wa Christ ayeke sara ande na ngoi so lo yeke ga?

¹⁵ Kozoni si Molenge ti zo ahunzi songo benda ti lo biani biani, lo yeke ga nga na mbeni lege nde. Lo fa na lege ti prophétie, lo tene: “Na ngoi so Molenge ti zo ayeke ga na yâ ti gloire ti lo na a-ange kue na tere ti lo, fade lo yeke duti na ndo ti trône ti lo ti gloire. Fade a yeke bungbi amara kue na gbele lo. Na lo yeke kangbi popo ti azo tongana ti so berger ayeke kangbi popo ti angasangbaga na angasa. Fade lo yeke zia angasangbaga ni na mbage ti maboko ti lo ti koli, na angasa ni na mbage ti maboko ti lo ti wali.” (Mat. 25:31-33). Ye so aye ti sara tënë ti gango ti Christ tongana Juge ti kangbi yâ ti azo ti “amara kue” use: “angasangbaga” na “angasa”. Angasangbaga ni ayeke azo so amû maboko na aita ti lo na lege ti yingo (aChrétien so a soro ala na so angbâ na sese ge) nga angasa ni ayeke azo “so asara ye alingbi pëpe na nzoni tënë na ndo ti Seigneur ti e Jésus.” (2 aThes. 1:7, 8). Angasangbaga ayeke “azo ti mbilimbili” so ayeke wara “fini ti lakue lakue” na ndo ti sese. Me angasa “ayeke wara kuâ teti lakue lakue” wala a yeke futi ala.​—Mat. 25:34, 40, 41, 45, 46.

Jésus ahunzi ti sö benda

16. Christ Mokonzi ti e ayeke hunzi ande songo benda ti lo tongana nyen?

¹⁶ Tongana a hunzi awe ti kpo nzoroko na ndo ti azo kue so ayeke sara kua na tere ti Christ tongana agbia na aprêtre, nga a hinga awe azo so ayeke angasangbaga na a zia ala na mbage ti maboko ti Christ ti koli ti wara salut, lo yeke “hunzi songo benda ni.” (Apoc. 5:9, 10; 6:2). So Christ ayeke mû li ni na ndo ti angangu ange nga na aita ti lo so azingo na kuâ, lo yeke futi bungbi ti aye so Satan asigigi na ni na lege ti poroso, ti kua ti turugu nga na lege ti dengo buze (Apoc. 2:26, 27; 19:11-21). Christ ayeke hunzi ti sö ande benda na ngoi so lo yeke futi bungbi ti aye ti Satan. Na pekoni lo yeke bi ande Satan na asioni yingo ti lo na yâ ti kota dû so alï mingi teti ngu saki oko.​—Apoc. 20:1-3.

17. Na ngoi ti Komandema ti Ngu Saki Oko ti Christ, lo yeke fa lege na ambeni ngasangbaga ti gue na ala na ndo wa? Nyen la a lingbi e leke na bê ti e ti ngbâ ti sara?

¹⁷ Bazengele Jean atene prophétie na ndo ti “azo mingi mingi” so ayeke sö ande kuâ na ngoi ti kota ye ti vundu, lo tene: “Molenge ti ngasangbaga, so ayeke na bê ti trône ni, ayeke bata ala ande tongana berger nga lo yeke fa lege na ala ti gue na ala na ali ti ngu so ayeke mû fini na zo.” (Apoc. 7:9, 17). Tâ tënë, na ngoi ti Komandema ti Ngu Saki Oko ti Christ, lo yeke ngbâ ti fa lege na ambeni ngasangbaga so ayeke dengi mê biani ti mä lo nga lo yeke gue na ala ti wara fini ti lakue lakue. (Diko Jean 10:16, 26-28.) Zia e ngbâ lakue ti mû peko ti Mokonzi ti e so ayeke Gbia laso nga na yâ ti fini dunia so Jéhovah amû zendo ni!

Mo dabe ti mo na ni?

• Ye wa Christ asara na pekoni so a zia lo na ndo ti mbata ti gbia?

• Zo wa la Christ ayeke sara kusala na lo na sese ge ti fa lege na acongrégation?

• Na ambeni lege nde wa Christ, Mokonzi ti e ayeke ga?

• Na lege wa Christ ayeke ngbâ ande ti fa lege na e na yâ ti fini dunia?

[Foto na lembeti 32]

Futingo bungbi ti aye ti Satan ayeke sara si azo ahinga so Christ asi awe na lo yeke dä