Mû merci na Jéhovah ndali ti so Lo mû ye na E
JÉHOVAH ayeke Nzapa so ayeke mû ye na zo mingi (Jacq. 1:17). Aye so Jéhovah acréé ahe bia na lo ndali ti so lo yeke mû ye na zo, a londo na atongoro so ayeke sû na lê ti nduzu na bï ti si na aye so amû ndo ti sese.—Ps. 65:13, 14; 147:7, 8; 148:3, 4.
Bê ti mbeni zo ti sungo psaume asi lani na singila mingi ndali ti Wasarango lo na apusu lo ti leke mbeni pendere bia so agonda aye so Jéhovah asara. Diko Psaume 104, nga gi ti bâ wala mo kue aye so ayeke na bê ti mo ague oko na atënë ti psaume so. Zo ti sungo psaume ni atene: “Fade mbi sara bia na [Jéhovah] na lâ ti fini ti mbi kue; Fade mbi sara bia ti sepela Nzapa ti mbi tongana mbi dë na fini.” (Ps. 104:33). Mo kue mo ye ti sara tongaso?
ZO SO AZIA NZONI TAPANDE TI MUNGO YE NA ZO AHON TANGA TI AZO KUE
Jéhovah aye ti tene e mû tapande ti lo, e mû ye na zo. Lo fa nga na e araison so a lingbi e mû ye na zo ndali ni. Bâ tënë so yingo vulu ti lo apusu bazengele Paul ti tene: “Mo mû yanga na ala so ayeke azo ti mosoro na yâ ti aye ti ngoi so, ti bâ tere ti ala kota pëpe, na ti zia beku ti ala pëpe na ndo ti amosoro so ayeke ye ti ziango bê dä pëpe, me ti zia beku ti ala na ndo ti Nzapa, lo so amû aye kue mingi mingi na e si e wara ngia dä; mo mû yanga na ala ti sara ye ti nzoni, ti sara anzoni kusala mingi, ti duti azo so maboko ti ala awoko, ti duti nduru ti kangbi ye na zo, si ala bata tongana mbeni mosoro ndali ti ala wani mbeni nzoni gere teti gigi ti kekereke na mbeni nzoni ndo, tongaso si ala gbu fini so ayeke tâ fini ni biani.”—1 Tim. 6:17-19.
Na ngoi so Paul asû lani use lettre ti lo na congrégation ti Corinthe, lo gboto lê na ndo ti bango ndo so a lingbi aChrétien aduti na ni na ndo ti mungo ye na zo. Paul atene: “Zia zo oko oko asara tongana ti so lo leke na bê ti lo ti sara, na vundu na bê pëpe wala a gbu lo gbungo na ngangu pëpe, teti Nzapa andoye zo so amû ye na ngia.” (2 aCor. 9:7). Na pekoni, Paul afa azo so ayeke wara ye ti nzoni na peko ti mungo ye ni: azo so awara ye ni awara ye so ala bezoin ni; nga azo so amû ye ni na azo ni awara tënë nzoni ti Nzapa.—2 aCor. 9:11-14.
Na hunzingo ti mbage ti lettre ti Paul so, lo sara tënë ti kpengba ye so afa so Nzapa ayeke mû ye na zo. Lo tene: “Singila na Nzapa ndali ti matabisi ti lo so lo mû ni senge senge, so a lingbi ti fa nda ni kue pëpe.” (2 aCor. 9:15). Matabisi ti Jéhovah so andu anzoni ye kue so Nzapa asara ndali ti azo na lege ti Jésus Christ. A yeke ye so ane mingi na e yeke na mbeni ye so e lingbi ti haka na ni ape.
Tongana nyen la e lingbi ti kiri singila ndali ti aye kue so Jéhovah nga na Molenge ti lo asara awe ndali ti e nga na aye so ala yeke sara ande ndali ti e? Mbeni ye so e lingbi ti sara ayeke ti mû ngoi ti e, ngangu ti e nga na aye ti e ti mû maboko na bungbi ti Jéhovah ti gue na li ni, atâa a yeke kete wala a yeke kota.—1 Chron. 22:14; 29:3-5; Luc 21:1-4.