Jéhovah airi tënë nzoni mingi na ndo ti azo so amû ye na lo na bê ti ala wani
WASARANGO e ane e azo na lege so lo mû na e mbeni kota matabisi so ayeke liberté ti soro ye so bê ti e aye. Na ndo ni, lo yeke iri tënë nzoni mingi na ndo ti azo so na nzoni bê ayeke sara kua na liberté ti ala so ti tene tâ vorongo ague na li ni, ti tene iri ti lo aga nzoni-kue nga ti mû maboko ti tene ye so lo leke na bê ti lo ti sara aga tâ tënë. Jéhovah aye pëpe ti tene e mä yanga ti lo mo bâ mo tene a gbu e gbungo na ngangu ti sara ni. Me, a nzere na lo mingi tongana e sara na lo na bê ti e kue ndali ti so e ye lo mingi nga e ye ti kiri singila na lo.
Na tapande, na ngoi so azo ti Israël ayeke lani na yando ti Sinaï, Jéhovah ahunda na ala ti leke mbeni place ti voro lo dä. Lo tene: “I kamata na popo ti i offrande teti L’Éternel; tongana bê ti zo aye, zia lo ga na offrande ti lo na L’Éternel.” (Ex. 35:5). Zo oko oko kue alingbi lani ti mû ye so alingbi na ngangu ti lo. Nga, atâa ye wa la zo ni aga na ni, atâa a yeke mingi wala pëpe, a yeke sara lani kua na ni nzoni ti sara na ye so bê ti Nzapa aye. Azo ti Israël asara ye lani tongana nyen?
“Azo oko oko kue so bê ti ala aye” amû offrande ti nzoni bê so “bê ti ala ayeda” ti mû ni. Akoli na awali aga na aye na bê ti ala wani ndali ti kua ti Jéhovah: boucle, aye ti mê, abage, lor, argent, gengere, bongo ti bleu, ti pourpre, ti bengba, ti lin so ayeke nzoni mingi, ti kuä ti tere ti angasa, poro ti tere ti akoli-ngasangbaga so ala sara ni bengba, na poro ti tere ti adauphin, keke ti acacia, bijou, épice nde nde nga na mafuta. Na nda ni, “ye so ala wara alingbi na kusala ni kue, même ahon ndo ni.”—Ex. 35:21-24, 27-29; 36:7.
Ye so amû ngia na Jéhovah lani mingi ayeke pëpe aye so azo ti Israël aga na ni, me a yeke bibe so ala yeke na ni ti mû ye na bê ti ala wani ndali ti tâ vorongo. Bê ti ala apusu nga ala ti mû ngoi ti ala nga na ngangu ti ala ti sara na kua ndali ti tâ vorongo. Mbaï ni atene nga so “awali kue so ayeke na ndara, ala tina [wala ala fü abongo] na maboko ti ala.” Biani, “awali kue so bê ti ala azingo ndara ti ala, ala tina kuä ti angasa”, so ti tene ala fü abongo so a sara na kuä ti tere ti angasa. Nga, Jéhovah amû na Betsaléel “ndara, na ndara ti hinga nda ti ye, na mayele ti sara kusala ti wakode nde nde kue”. Nzapa amû na Betsaléel nga na Oholiab kode so ala yeke na bezoin ni ti sara na akua kue so lo mû na ala.—Ex. 35:25, 26, 30-35.
Na ngoi so Jéhovah ahunda na azo ti Israël ti mû offrande, lo hinga lani na bê ti lo kue so ‘zo kue so bê ti lo aye’ ayeke mû ande maboko na kua ti tâ vorongo. Na nda ni, na nzoni bê lo iri tënë nzoni na ndo ti ala so amû na lo ye na bê ti ala wani na lege so lo fa lege na ala nga lo sara si ala wara ngia mingi. Tongaso, Jéhovah afa so na ngoi so lo yeke iri tënë nzoni na ndo ti awakua ti lo so amû ye na lo na bê ti ala wani, lo lingbi ti sara kue si ala wara aye kue so ala yeke na bezoin ni ti sara na kua ti lo nga na kode ti sara na kua ni (Ps. 34:10). Tongana mo mû tere ti mo kue ti sara na Jéhovah, lo yeke iri tënë nzoni na ndo ti mo ndali ti so mo mû ye na lo na bê ti mo wani.