“Kusala ni ayeke kota”

NGOI ti tene a sara mbeni kpengba bungbi na Jérusalem alingbi awe. Gbia David abungbi amokonzi, akota zo ti yangbo nga na angangu koli kue so ayeke ti lo. Ala yeke na ngia ti mä mbeni kpengba tokua. Jéhovah amû na Salomon, molenge ti David, kua ti lekengo mbeni kota ndo so mara ni ayeke dä pëpe ti tene a voro tâ Nzapa dä. Nzapa afa plan ti ndo ni na David, gbia ti Israël so aga mbakoro awe, na lo mû ni na Salomon. David atene: “Kusala ni ayeke kota, na da so ayeke ti azo pëpe, me ti L’Éternel Nzapa.”—1 Chron. 28:1, 2, 6, 11, 12; 29:1.

Na pekoni, David ahunda tënë so: “Tongaso, zo nyen aye ti mû ye na L’Éternel laso na nzobe?” (1 Chron. 29:5). Tongana mo yeke lani kâ, mo yeke sara ye tongana nyen? Bê ti mo ayeke pusu mo ti mû maboko na kota kua so? Azo ti Israël asara lani ye hio. Biani, ala yeke na “ngia teti ala mû ye na nzobe, ala mû ye na nzobe na bê ti ala kue na L’Éternel.”—1 Chron. 29:9.

Angu ngbangbo mingi na pekoni, Jéhovah azia na sese mbeni ye so ayeke kota mingi ahon temple ni. Lo zia na sese kota temple ti yingo, ye so Nzapa aleke ti tene na lege ni azo avoro lo na lege ti sacrifice ti Jésus (aHéb. 9:11, 12). Tongana nyen la Jéhovah ayeke mû maboko na azo ti kiri ti leke songo na lo laso? A yeke na lege ti kua ti e ti sarango adisciple (Mat. 28:19, 20). Ye so aga na peko ti kua so ayeke so, ngu oko oko, a yeke manda Bible na azo kutu mingi, adisciple saki mingi ayeke wara batême nga afini congrégation ngbangbo mingi ayeke bâ gigi.

Nga, guengo na li ni so asara si a yeke na bezoin ti pete ambeti mingi ahon ti kozo, ti leke aDa ti Royaume nga ti bâ lege ni nga ti wara ando ti sara akota bungbi dä. Biani mo yeke yeda so kua ti e ti fango nzoni tënë ayeke mbeni kota kua nga ayeke ga na aye ti nzoni.—Mat. 24:14.

Ndoye so azo ti Nzapa ayeke na ni na mbage ti lo nga na mbage ti amba ti ala nga so a lingbi ala sara kua ti fango tënë ti Royaume hio apusu ala “ti mû ye na L’Éternel . . . na nzobe” na lege so ala mû a-offrande na bê ti ala. A nzere na e mingi ti “yä iri ti L’Éternel na lege ti ye ti [e]” nga ti bâ so a sara kua na ni nzoni nga na ndara ti sara kua so ayeke kota mingi na yâ ti mbaï ti azo.— aProv. 3:9.

Lege so ambeni zo ayeke mû na a-offrande ndali ti kua ti fango tënë na ndo ti sese kue

Laso, azo mingi “azi mbeni ye abata”, wala ala zi mbeni nginza na yâ ti nginza so ala yeke wara, ti zia na yâ ti boîte ti congrégation so a sara na tere ni “Kusala ti fango tënë na ndo ti sese kue.” (1 aCor. 16:2). Nze oko oko, acongrégation ayeke tokua a-offrande so na filiale ti aTémoin ti Jéhovah so ayeke bâ ndo na ndo ti kodoro ti ala. Lege ayeke nga dä ti tene mo tokua a-offrande ti mo droit na Association “Les Témoins de Jéhovah.” Mo lingbi ti wara adresse ti filiale na ndo ti site www.pr2711.com. Na gbe ni ge mo yeke wara mara ti a-offrande nde nde so mo lingbi ti tokua ni droit na Association “Les Témoins de Jéhovah.”

A-OFFRANDE SO A HUNDA TI KIRI NA NI PËPE

A-offrande so a mû ni na lege ti transfert nga na carte banquaire. Na yâ ti ambeni filiale, a lingbi ti tokua ni na lege ti site jw.org wala na lege ti mbeni site nde so a fa ni.
Nginza, abijou, wala ambeni ye ti mo so ngere ni ayeke ngangu. Zia na tere ni mbeni lettre so afa so nginza ni wala aye ni so ayeke offrande ti mo la na mo hunda ti tene a kiri na ni na mo pëpe.

MBENI YE SO AZO AMÛ NA OFFRANDE

Nde na nginza nga na ambeni ye so ngere ni ayeke ngangu so zo alingbi ti mû na offrande, ambeni kode ni nde ayeke dä so zo alingbi ti mû na offrande ti mû maboko na kusala ti Royaume so a yeke sara na ndo ti sese kue. Akode ni so la a fa ni na gbe ni ge so. Atâa akode wa la mo ye ti sara kua na ni, hunda kozoni na filiale so ayeke bâ ndo na ndo ti kodoro ti mo ti bâ wala ala so wa la ayeke na yâ ti kodoro ni. Teti so aye so ndia ahunda nga na a-impôt ti akodoro ayeke nde nde, a yeke kota ye ti tene mo bâ azo so ahinga ye nzoni na ndo ti a-impôt nga na awamungo wango na ndo ti tënë ti ndia kozoni ti soro mbeni kode so ayeke nzoni.

Assurance: Mbeni zo alingbi ti zia iri ti Association “Les Témoins de Jéhovah” ti wara na peko ti kuâ ti lo nginza so lo futa assurance ndali ni wala nginza ti retraite ti lo.

Nginza so a zia na banque: A lingbi ti mû na Association “Les Témoins de Jéhovah” nginza so a zia na banque, wala nginza so a zia na banque ti bata teti ngoi ti retraite, wala zo ni alingbi ti leke ti tene Association “Les Témoins de Jéhovah” awara nginza ti lo na peko ti kuâ ti lo.

Testament na amatabisi so a bata ti mû na mbeni ngoi: A lingbi ti zia na Association “Les Témoins de Jéhovah” ada na nginza na lege ti mbeni testament so ndia ayeda na ni, wala a lingbi ti sû mbeni mbeti ti fa so Association “Les Témoins de Jéhovah” ayeke ga ande wa ti ada nga na nginza ni na mbeni ngoi. Lekengo ye ti tene mbeni bungbi ti vorongo Nzapa aga ande wa ti aye so alingbi peut-être ti zi lege ti kiri na peko a-impôt so a lingbi a futa ni.

Ti wara ambeni sango na ndo ni, gue na ndo ti jw.org na gbe ni, cliqué na ndo ti tënë “Faire un don pour notre œuvre mondiale”, wala mo lingbi ti hunda na filiale ti kodoro ti mo.